Joshua (Yehoshua) Chapter 13

‎1 ‏וִיהוֹשֻׁ֣עַ זָקֵ֔ן בָּ֖א בַּיָּמִ֑ים וַיֹּ֨אמֶר יְהוָ֜ה אֵלָ֗יו אַתָּ֤ה זָקַ֙נְתָּה֙ בָּ֣אתָ בַיָּמִ֔ים וְהָאָ֛רֶץ נִשְׁאֲרָ֥ה הַרְבֵּֽה־מְאֹ֖ד לְרִשְׁתָּֽהּ׃

‎2 ‏זֹ֥את הָאָ֖רֶץ הַנִּשְׁאָ֑רֶת כָּל־גְּלִיל֥וֹת הַפְּלִשְׁתִּ֖ים וְכָל־הַגְּשׁוּרִֽי׃

‎3 ‏מִֽן־הַשִּׁיח֞וֹר אֲשֶׁ֣ר׀ עַל־פְּנֵ֣י מִצְרַ֗יִם וְעַ֨ד גְּב֤וּל עֶקְרוֹן֙ צָפ֔וֹנָה לַֽכְּנַעֲנִ֖י תֵּחָשֵׁ֑ב חֲמֵ֣שֶׁת׀ סַרְנֵ֣י פְלִשְׁתִּ֗ים הָעַזָּתִ֤י וְהָאַשְׁדּוֹדִי֙ הָאֶשְׁקְלוֹנִ֣י הַגִּתִּ֔י וְהָעֶקְרוֹנִ֖י וְהָעַוִּֽים׃

‎4 ‏מִתֵּימָ֞ן כָּל־אֶ֣רֶץ הַֽכְּנַעֲנִ֗י וּמְעָרָ֛ה אֲשֶׁ֥ר לַצִּידֹנִ֖ים עַד־אֲפֵ֑קָה עַ֖ד גְּב֥וּל הָאֱמֹרִֽי׃

‎5 ‏וְהָאָ֣רֶץ הַגִּבְלִ֗י וְכָל־הַלְּבָנוֹן֙ מִזְרַ֣ח הַשֶּׁ֔מֶשׁ מִבַּ֣עַל גָּ֔ד תַּ֖חַת הַר־חֶרְמ֑וֹן עַ֖ד לְב֥וֹא חֲמָֽת׃

‎6 ‏כָּל־יֹשְׁבֵ֣י הָ֠הָר מִֽן־הַלְּבָנ֞וֹן עַד־מִשְׂרְפֹ֥ת מַ֙יִם֙ כָּל־צִ֣ידֹנִ֔ים אָֽנֹכִי֙ אוֹרִישֵׁ֔ם מִפְּנֵ֖י בְּנֵ֣י יִשְׂרָאֵ֑ל רַ֠ק הַפִּלֶ֤הָ לְיִשְׂרָאֵל֙ בְּֽנַחֲלָ֔ה כַּאֲשֶׁ֖ר צִוִּיתִֽיךָ׃

‎7 ‏וְעַתָּ֗ה חַלֵּ֞ק אֶת־הָאָ֧רֶץ הַזֹּ֛את בְּנַחֲלָ֖ה לְתִשְׁעַ֣ת הַשְּׁבָטִ֑ים וַחֲצִ֖י הַשֵּׁ֥בֶט הַֽמְנַשֶּֽׁה׃

‎8 ‏עִמּ֗וֹ הָרֽאוּבֵנִי֙ וְהַגָּדִ֔י לָקְח֖וּ נַחֲלָתָ֑ם אֲשֶׁר֩ נָתַ֨ן לָהֶ֜ם מֹשֶׁ֗ה בְּעֵ֤בֶר הַיַּרְדֵּן֙ מִזְרָ֔חָה כַּאֲשֶׁר֙ נָתַ֣ן לָהֶ֔ם מֹשֶׁ֖ה עֶ֥בֶד יְהוָֽה׃

‎9 ‏מֵעֲרוֹעֵ֡ר אֲשֶׁר֩ עַל־שְׂפַת־נַ֨חַל אַרְנ֜וֹן וְהָעִ֨יר אֲשֶׁ֧ר בְּתוֹךְ־הַנַּ֛חַל וְכָל־הַמִּישֹׁ֥ר מֵידְבָ֖א עַד־דִּיבֽוֹן׃

‎10 ‏וְכֹ֗ל עָרֵי֙ סִיחוֹן֙ מֶ֣לֶךְ הָאֱמֹרִ֔י אֲשֶׁ֥ר מָלַ֖ךְ בְּחֶשְׁבּ֑וֹן עַד־גְּב֖וּל בְּנֵ֥י עַמּֽוֹן׃

‎11 ‏וְהַגִּלְעָ֞ד וּגְב֧וּל הַגְּשׁוּרִ֣י וְהַמַּעֲכָתִ֗י וְכֹ֨ל הַ֥ר חֶרְמ֛וֹן וְכָל־הַבָּשָׁ֖ן עַד־סַלְכָֽה׃

‎12 ‏כָּל־מַמְלְכ֥וּת עוֹג֙ בַּבָּשָׁ֔ן אֲשֶׁר־מָלַ֥ךְ בְּעַשְׁתָּר֖וֹת וּבְאֶדְרֶ֑עִי ה֤וּא נִשְׁאַר֙ מִיֶּ֣תֶר הָרְפָאִ֔ים וַיַּכֵּ֥ם מֹשֶׁ֖ה וַיֹּרִשֵֽׁם׃

‎13 ‏וְלֹ֤א הוֹרִ֙ישׁוּ֙ בְּנֵ֣י יִשְׂרָאֵ֔ל אֶת־הַגְּשׁוּרִ֖י וְאֶת־הַמַּעֲכָתִ֑י וַיֵּ֨שֶׁב גְּשׁ֤וּר וּמַֽעֲכָת֙ בְּקֶ֣רֶב יִשְׂרָאֵ֔ל עַ֖ד הַיּ֥וֹם הַזֶּֽה׃

‎14 ‏רַ֚ק לְשֵׁ֣בֶט הַלֵּוִ֔י לֹ֥א נָתַ֖ן נַחֲלָ֑ה אִשֵּׁ֨י יְהוָ֜ה אֱלֹהֵ֤י יִשְׂרָאֵל֙ ה֣וּא נַחֲלָת֔וֹ כַּאֲשֶׁ֖ר דִּבֶּר־לֽוֹ׃ ס

‎15 ‏וַיִּתֵּ֣ן מֹשֶׁ֔ה לְמַטֵּ֥ה בְנֵֽי־רְאוּבֵ֖ן לְמִשְׁפְּחֹתָֽם׃

‎16 ‏וַיְהִ֨י לָהֶ֜ם הַגְּב֗וּל מֵעֲרוֹעֵ֡ר אֲשֶׁר֩ עַל־שְׂפַת־נַ֨חַל אַרְנ֜וֹן וְהָעִ֨יר אֲשֶׁ֧ר בְּתוֹךְ־הַנַּ֛חַל וְכָל־הַמִּישֹׁ֖ר עַל־מֵידְבָֽא׃

‎17 ‏חֶשְׁבּ֥וֹן וְכָל־עָרֶ֖יהָ אֲשֶׁ֣ר בַּמִּישֹׁ֑ר דִּיבוֹן֙ וּבָמ֣וֹת בַּ֔עַל וּבֵ֖ית בַּ֥עַל מְעֽוֹן׃

‎18 ‏וְיַ֥הְצָה וּקְדֵמֹ֖ת וּמֵפָֽעַת׃

‎19 ‏וְקִרְיָתַ֣יִם וְשִׂבְמָ֔ה³ וְצֶ֥רֶת הַשַּׁ֖חַר בְּהַ֥ר הָעֵֽמֶק׃

‎20 ‏וּבֵ֥ית פְּע֛וֹר וְאַשְׁדּ֥וֹת הַפִּסְגָּ֖ה וּבֵ֥ית הַיְשִׁמֽוֹת׃

‎21 ‏וְכֹל֙ עָרֵ֣י הַמִּישֹׁ֔ר וְכָֽל־מַמְלְכ֗וּת סִיחוֹן֙ מֶ֣לֶךְ הָאֱמֹרִ֔י אֲשֶׁ֥ר מָלַ֖ךְ בְּחֶשְׁבּ֑וֹן אֲשֶׁר֩ הִכָּ֨ה מֹשֶׁ֜ה אֹת֣וֹ׀ וְאֶת־נְשִׂיאֵ֣י מִדְיָ֗ן אֶת־אֱוִ֤י וְאֶת־רֶ֙קֶם֙ וְאֶת־צ֤וּר וְאֶת־חוּר֙ וְאֶת־רֶ֔בַע נְסִיכֵ֣י סִיח֔וֹן יֹשְׁבֵ֖י הָאָֽרֶץ׃

‎22 ‏וְאֶת־בִּלְעָ֥ם בֶּן־בְּע֖וֹר הַקּוֹסֵ֑ם הָרְג֧וּ בְנֵֽי־יִשְׂרָאֵ֛ל בַּחֶ֖רֶב אֶל־חַלְלֵיהֶֽם׃

‎23 ‏וַיְהִ֗י גְּבוּל֙ בְּנֵ֣י רְאוּבֵ֔ן הַיַּרְדֵּ֖ן וּגְב֑וּל זֹ֣את נַחֲלַ֤ת בְּנֵֽי־רְאוּבֵן֙ לְמִשְׁפְּחֹתָ֔ם הֶעָרִ֖ים וְחַצְרֵיהֶֽן׃ פ

‎24 ‏וַיִּתֵּ֤ן מֹשֶׁה֙ לְמַטֵּה־גָ֔ד לִבְנֵי־גָ֖ד לְמִשְׁפְּחֹתָֽם׃

‎25 ‏וַיְהִ֤י לָהֶם֙ הַגְּב֔וּל יַעְזֵר֙ וְכָל־עָרֵ֣י הַגִּלְעָ֔ד וַחֲצִ֕י אֶ֖רֶץ בְּנֵ֣י עַמּ֑וֹן עַד־עֲרוֹעֵ֕ר אֲשֶׁ֖ר עַל־פְּנֵ֥י רַבָּֽה׃

‎26 ‏וּמֵחֶשְׁבּ֛וֹן עַד־רָמַ֥ת הַמִּצְפֶּ֖ה וּבְטֹנִ֑ים וּמִֽמַּחֲנַ֖יִם עַד־גְּב֥וּל לִדְבִֽר׃

‎27 ‏וּבָעֵ֡מֶק בֵּ֣ית הָרָם֩ וּבֵ֨ית נִמְרָ֜ה וְסֻכּ֣וֹת וְצָפ֗וֹן יֶ֚תֶר מַמְלְכ֗וּת סִיחוֹן֙ מֶ֣לֶךְ חֶשְׁבּ֔וֹן הַיַּרְדֵּ֖ן וּגְבֻ֑ל עַד־קְצֵה֙ יָם־כִּנֶּ֔רֶת עֵ֥בֶר הַיַּרְדֵּ֖ן מִזְרָֽחָה׃

‎28 ‏זֹ֛את נַחֲלַ֥ת בְּנֵי־גָ֖ד לְמִשְׁפְּחֹתָ֑ם הֶעָרִ֖ים וְחַצְרֵיהֶֽם׃

‎29 ‏וַיִּתֵּ֣ן מֹשֶׁ֔ה לַחֲצִ֖י שֵׁ֣בֶט מְנַשֶּׁ֑ה וַיְהִ֗י לַחֲצִ֛י מַטֵּ֥ה בְנֵֽי־מְנַשֶּׁ֖ה לְמִשְׁפְּחוֹתָֽם׃

‎30 ‏וַיְהִ֣י גְבוּלָ֗ם מִמַּחֲנַ֨יִם כָּֽל־הַבָּשָׁ֜ן כָּֽל־מַמְלְכ֣וּת׀ ע֣וֹג מֶֽלֶךְ־הַבָּשָׁ֗ן וְכָל־חַוֹּ֥ת יָאִ֛יר אֲשֶׁ֥ר בַּבָּשָׁ֖ן שִׁשִּׁ֥ים עִֽיר׃

‎31 ‏וַחֲצִ֤י הַגִּלְעָד֙ וְעַשְׁתָּר֣וֹת וְאֶדְרֶ֔עִי עָרֵ֛י מַמְלְכ֥וּת ע֖וֹג בַּבָּשָׁ֑ן לִבְנֵ֤י מָכִיר֙ בֶּן־מְנַשֶּׁ֔ה לַחֲצִ֥י בְנֵֽי־מָכִ֖יר לְמִשְׁפְּחוֹתָֽם׃

‎32 ‏אֵ֕לֶּה אֲשֶׁר־נִחַ֥ל מֹשֶׁ֖ה בְּעַֽרְב֣וֹת מוֹאָ֑ב מֵעֵ֛בֶר לְיַרְדֵּ֥ן יְרִיח֖וֹ מִזְרָֽחָה׃ ס

‎33 ‏וּלְשֵׁ֙בֶט֙ הַלֵּוִ֔י לֹֽא־נָתַ֥ן מֹשֶׁ֖ה נַחֲלָ֑ה יְהוָ֞ה אֱלֹהֵ֤י יִשְׂרָאֵל֙ ה֣וּא נַחֲלָתָ֔ם כַּאֲשֶׁ֖ר דִּבֶּ֥ר לָהֶֽם׃

1 wîhwōšu‘a zāqēn bā’ bayyāmîm wayyō’mer yəhwâ ’ēlāyw ’atâ zāqanətâ bā’ṯā ḇayyāmîm wəhā’āreṣ nišə’ărâ harəbēh-mə’ōḏ lərišətāh:

2 zō’ṯ hā’āreṣ hannišə’āreṯ kāl-gəlîlwōṯ hapəlišətîm wəḵāl-hagəšûrî:

3 min-haššîḥwōr ’ăšer| ‘al-pənê miṣərayim wə‘aḏ gəḇûl ‘eqərwōn ṣāfwōnâ lakən^a‘ănî tēḥāšēḇ ḥămēšeṯ| sarənê fəlišətîm hā‘azzāṯî wəhā’ašədwōḏî hā’ešəqəlwōnî hagitî wəhā‘eqərwōnî wəhā‘aûîm:

4 mitêmān kāl-’ereṣ hakən^a‘ănî ûmə‘ārâ ’ăšer laṣṣîḏōnîm ‘aḏ-’ăfēqâ ‘aḏ gəḇûl hā’ĕmōrî:

5 wəhā’āreṣ hagiḇəlî wəḵāl-halləḇānwōn mizər^aḥ haššemeš mib^a‘al gāḏ t^aḥaṯ har-ḥerəmwōn ‘aḏ ləḇwō’ ḥămāṯ:

6 kāl-yōšəḇê hâār min-halləḇānwōn ‘aḏ-miśərəfōṯ mayim kāl-ṣîḏōnîm ’ānōḵî ’wōrîšēm mipənê bənê yiśərā’ēl raq hapilehā ləyiśərā’ēl bən^aḥălâ ka’ăšer ṣiûîṯîḵā:

7 wə‘atâ ḥallēq ’eṯ-hā’āreṣ hazzō’ṯ bən^aḥălâ ləṯišə‘aṯ haššəḇāṭîm w^aḥăṣî haššēḇeṭ hamənaššeh:

8 ‘immwō hār’ûḇēnî wəhagāḏî lāqəḥû n^aḥălāṯām ’ăšer nāṯan lâem mōšeh bə‘ēḇer hayyarədēn mizərāḥâ ka’ăšer nāṯan lâem mōšeh ‘eḇeḏ yəhwâ:

9 mē‘ărwō‘ēr ’ăšer ‘al-śəfaṯ-n^aḥal ’arənwōn wəhā‘îr ’ăšer bəṯwōḵə-hann^aḥal wəḵāl-hammîšōr mêḏəḇā’ ‘aḏ-dîḇwōn:

10 wəḵōl ‘ārê sîḥwōn meleḵə hā’ĕmōrî ’ăšer mālaḵə bəḥešəbwōn ‘aḏ-gəḇûl bənê ‘ammwōn:

11 wəhagilə‘āḏ ûḡəḇûl hagəšûrî wəhamm^a‘ăḵāṯî wəḵōl har ḥerəmwōn wəḵāl-habāšān ‘aḏ-saləḵâ:

12 kāl-mamələḵûṯ ‘wōḡ babāšān ’ăšer-mālaḵə bə‘ašətārwōṯ ûḇə’eḏəre‘î hû’ nišə’ar mîyeṯer hārəfā’îm wayyakēm mōšeh wayyōrišēm:

13 wəlō’ hwōrîšû bənê yiśərā’ēl ’eṯ-hagəšûrî wə’eṯ-hamm^a‘ăḵāṯî wayyēšeḇ gəšûr ûm^a‘ăḵāṯ bəqereḇ yiśərā’ēl ‘aḏ hayywōm hazzeh:

14 raq ləšēḇeṭ hallēwî lō’ nāṯan n^aḥălâ ’iššê yəhwâ ’ĕlōhê yiśərā’ēl hû’ n^aḥălāṯwō ka’ăšer diber-lwō: s

15 wayyitēn mōšeh ləmaṭṭēh ḇənê-rə’ûḇēn ləmišəpəḥōṯām:

16 wayəhî lâem hagəḇûl mē‘ărwō‘ēr ’ăšer ‘al-śəfaṯ-n^aḥal ’arənwōn wəhā‘îr ’ăšer bəṯwōḵə-hann^aḥal wəḵāl-hammîšōr ‘al-mêḏəḇā’:

17 ḥešəbwōn wəḵāl-‘āreyhā ’ăšer bammîšōr dîḇwōn ûḇāmwōṯ b^a‘al ûḇêṯ b^a‘al mə‘wōn:

18 wəyahəṣâ ûqəḏēmōṯ ûmēfā‘aṯ:

19 wəqirəyāṯayim wəśiḇəmâ³ wəṣereṯ hašš^aḥar bəhar hā‘ēmeq:

20 ûḇêṯ pə‘wōr wə’ašədwōṯ hapisəgâ ûḇêṯ hayəšimwōṯ:

21 wəḵōl ‘ārê hammîšōr wəḵāl-mamələḵûṯ sîḥwōn meleḵə hā’ĕmōrî ’ăšer mālaḵə bəḥešəbwōn ’ăšer hikâ mōšeh ’ōṯwō| wə’eṯ-nəśî’ê miḏəyān ’eṯ-’ĕwî wə’eṯ-reqem wə’eṯ-ṣûr wə’eṯ-ḥûr wə’eṯ-reḇ^a‘ nəsîḵê sîḥwōn yōšəḇê hā’āreṣ:

22 wə’eṯ-bilə‘ām ben-bə‘wōr haqqwōsēm hārəḡû ḇənê-yiśərā’ēl b^aḥereḇ ’el-ḥaləlêhem:

23 wayəhî gəḇûl bənê rə’ûḇēn hayyarədēn ûḡəḇûl zō’ṯ n^aḥălaṯ bənê-rə’ûḇēn ləmišəpəḥōṯām he‘ārîm wəḥaṣərêhen: f

24 wayyitēn mōšeh ləmaṭṭēh-ḡāḏ liḇənê-ḡāḏ ləmišəpəḥōṯām:

25 wayəhî lâem hagəḇûl y^a‘əzēr wəḵāl-‘ārê hagilə‘āḏ w^aḥăṣî ’ereṣ bənê ‘ammwōn ‘aḏ-‘ărwō‘ēr ’ăšer ‘al-pənê rabâ:

26 ûmēḥešəbwōn ‘aḏ-rāmaṯ hammiṣəpeh ûḇəṭōnîm ûmimm^aḥănayim ‘aḏ-gəḇûl liḏəḇir:

27 ûḇā‘ēmeq bêṯ hārām ûḇêṯ nimərâ wəsukwōṯ wəṣāfwōn yeṯer mamələḵûṯ sîḥwōn meleḵə ḥešəbwōn hayyarədēn ûḡəḇul ‘aḏ-qəṣēh yām-kinnereṯ ‘ēḇer hayyarədēn mizərāḥâ:

28 zō’ṯ n^aḥălaṯ bənê-ḡāḏ ləmišəpəḥōṯām he‘ārîm wəḥaṣərêhem:

29 wayyitēn mōšeh l^aḥăṣî šēḇeṭ mənaššeh wayəhî l^aḥăṣî maṭṭēh ḇənê-mənaššeh ləmišəpəḥwōṯām:

30 wayəhî ḡəḇûlām mimm^aḥănayim kāl-habāšān kāl-mamələḵûṯ| ‘wōḡ meleḵə-habāšān wəḵāl-ḥaûōṯ yā’îr ’ăšer babāšān šiššîm ‘îr:

31 w^aḥăṣî hagilə‘āḏ wə‘ašətārwōṯ wə’eḏəre‘î ‘ārê mamələḵûṯ ‘wōḡ babāšān liḇənê māḵîr ben-mənaššeh l^aḥăṣî ḇənê-māḵîr ləmišəpəḥwōṯām:

32 ’ēlleh ’ăšer-niḥal mōšeh bə‘arəḇwōṯ mwō’āḇ mē‘ēḇer ləyarədēn yərîḥwō mizərāḥâ: s

33 ûləšēḇeṭ hallēwî lō’-nāṯan mōšeh n^aḥălâ yəhwâ ’ĕlōhê yiśərā’ēl hû’ n^aḥălāṯām ka’ăšer diber lâem: