Joshua (Yehoshua) Chapter 23

‎1 ‏וַֽיְהִי֙ מִיָּמִ֣ים רַבִּ֔ים אַ֠חֲרֵי אֲשֶׁר־הֵנִ֨יחַ יְהוָ֧ה לְיִשְׂרָאֵ֛ל מִכָּל־אֹיְבֵיהֶ֖ם מִסָּבִ֑יב וִיהוֹשֻׁ֣עַ זָקֵ֔ן בָּ֖א בַּיָּמִֽים׃

‎2 ‏וַיִּקְרָ֤א יְהוֹשֻׁ֙עַ֙ לְכָל־יִשְׂרָאֵ֔ל לִזְקֵנָיו֙ וּלְרָאשָׁ֔יו וּלְשֹׁפְטָ֖יו וּלְשֹֽׁטְרָ֑יו וַיֹּ֣אמֶר אֲלֵהֶ֔ם אֲנִ֣י זָקַ֔נְתִּי בָּ֖אתִי בַּיָּמִֽים׃

‎3 ‏וְאַתֶּ֣ם רְאִיתֶ֗ם אֵת֩ כָּל־אֲשֶׁ֨ר עָשָׂ֜ה יְהוָ֧ה אֱלֹהֵיכֶ֛ם לְכָל־הַגּוֹיִ֥ם הָאֵ֖לֶּה מִפְּנֵיכֶ֑ם כִּ֚י יְהוָ֣ה אֱלֹהֵיכֶ֔ם ה֖וּא הַנִּלְחָ֥ם לָכֶֽם׃

‎4 ‏רְאוּ֩ הִפַּ֨לְתִּי לָכֶ֜ם אֶֽת־הַ֠גּוֹיִם הַנִּשְׁאָרִ֥ים הָאֵ֛לֶּה בְּנַחֲלָ֖ה לְשִׁבְטֵיכֶ֑ם מִן־הַיַּרְדֵּ֗ן וְכָל־הַגּוֹיִם֙ אֲשֶׁ֣ר הִכְרַ֔תִּי וְהַיָּ֥ם הַגָּד֖וֹל מְב֥וֹא הַשָּֽׁמֶשׁ׃

‎5 ‏וַיהוָ֣ה אֱלֹֽהֵיכֶ֗ם ה֚וּא יֶהְדֳּפֵ֣ם מִפְּנֵיכֶ֔ם וְהוֹרִ֥ישׁ אֹתָ֖ם מִלִּפְנֵיכֶ֑ם וִֽירִשְׁתֶּם֙ אֶת־אַרְצָ֔ם כַּאֲשֶׁ֥ר דִּבֶּ֛ר יְהוָ֥ה אֱלֹהֵיכֶ֖ם לָכֶֽם׃

‎6 ‏וַחֲזַקְתֶּ֣ם מְאֹ֔ד לִשְׁמֹ֣ר וְלַעֲשׂ֔וֹת אֵ֚ת כָּל־הַכָּת֔וּב בְּסֵ֖פֶר תּוֹרַ֣ת מֹשֶׁ֑ה לְבִלְתִּ֥י סוּר־מִמֶּ֖נּוּ יָמִ֥ין וּשְׂמֹֽאול׃

‎7 ‏לְבִלְתִּי־בוֹא֙ בַּגּוֹיִ֣ם הָאֵ֔לֶּה הַנִּשְׁאָרִ֥ים הָאֵ֖לֶּה אִתְּכֶ֑ם וּבְשֵׁ֨ם אֱלֹהֵיהֶ֤ם לֹא־תַזְכִּ֙ירוּ֙ וְלֹ֣א תַשְׁבִּ֔יעוּ וְלֹ֣א תַעַבְד֔וּם וְלֹ֥א תִֽשְׁתַּחֲו֖וּ לָהֶֽם׃

‎8 ‏כִּ֛י אִם־בַּיהוָ֥ה אֱלֹהֵיכֶ֖ם תִּדְבָּ֑קוּ כַּאֲשֶׁ֣ר עֲשִׂיתֶ֔ם עַ֖ד הַיּ֥וֹם הַזֶּֽה׃

‎9 ‏וַיּ֤וֹרֶשׁ יְהוָה֙ מִפְּנֵיכֶ֔ם גּוֹיִ֖ם גְּדֹלִ֣ים וַעֲצוּמִ֑ים וְאַתֶּ֗ם לֹא־עָ֤מַד אִישׁ֙ בִּפְנֵיכֶ֔ם עַ֖ד הַיּ֥וֹם הַזֶּֽה׃

‎10 ‏אִישׁ־אֶחָ֥ד מִכֶּ֖ם יִרְדָּף־אָ֑לֶף כִּ֣י׀ יְהוָ֣ה אֱלֹהֵיכֶ֗ם ה֚וּא הַנִּלְחָ֣ם לָכֶ֔ם כַּאֲשֶׁ֖ר דִּבֶּ֥ר לָכֶֽם׃

‎11 ‏וְנִשְׁמַרְתֶּ֥ם מְאֹ֖ד לְנַפְשֹֽׁתֵיכֶ֑ם לְאַהֲבָ֖ה אֶת־יְהוָ֥ה אֱלֹהֵיכֶֽם׃

‎12 ‏כִּ֣י׀ אִם־שׁ֣וֹב תָּשׁ֗וּבוּ וּדְבַקְתֶּם֙ בְּיֶ֙תֶר֙ הַגּוֹיִ֣ם הָאֵ֔לֶּה הַנִּשְׁאָרִ֥ים הָאֵ֖לֶּה אִתְּכֶ֑ם וְהִֽתְחַתַּנְתֶּ֥ם בָּהֶ֛ם וּבָאתֶ֥ם בָּהֶ֖ם וְהֵ֥ם בָּכֶֽם׃

‎13 ‏יָד֙וֹעַ֙ תֵּֽדְע֔וּ כִּי֩ לֹ֨א יוֹסִ֜יף יְהוָ֣ה אֱלֹהֵיכֶ֗ם לְהוֹרִ֛ישׁ אֶת־הַגּוֹיִ֥ם הָאֵ֖לֶּה מִלִּפְנֵיכֶ֑ם וְהָי֨וּ לָכֶ֜ם לְפַ֣ח וּלְמוֹקֵ֗שׁ וּלְשֹׁטֵ֤ט בְּצִדֵּיכֶם֙ וְלִצְנִנִ֣ים בְּעֵינֵיכֶ֔ם עַד־אֲבָדְכֶ֗ם מֵ֠עַל הָאֲדָמָ֤ה הַטּוֹבָה֙ הַזֹּ֔את אֲשֶׁר֙ נָתַ֣ן לָכֶ֔ם יְהוָ֖ה אֱלֹהֵיכֶֽם׃

‎14 ‏וְהִנֵּ֨ה אָנֹכִ֤י הוֹלֵךְ֙ הַיּ֔וֹם בְּדֶ֖רֶךְ כָּל־הָאָ֑רֶץ וִידַעְתֶּ֞ם בְּכָל־לְבַבְכֶ֣ם וּבְכָל־נַפְשְׁכֶ֗ם כִּ֣י לֹֽא־נָפַל֩ דָּבָ֨ר אֶחָ֜ד מִכֹּ֣ל׀ הַדְּבָרִ֣ים הַטּוֹבִ֗ים אֲשֶׁ֨ר דִּבֶּ֜ר יְהוָ֤ה אֱלֹהֵיכֶם֙ עֲלֵיכֶ֔ם הַכֹּל֙ בָּ֣אוּ לָכֶ֔ם לֹֽא־נָפַ֥ל מִמֶּ֖נּוּ דָּבָ֥ר אֶחָֽד׃

‎15 ‏וְהָיָ֗ה כַּאֲשֶׁר־בָּ֤א עֲלֵיכֶם֙ כָּל־הַדָּבָ֣ר הַטּ֔וֹב אֲשֶׁ֥ר דִּבֶּ֛ר יְהוָ֥ה אֱלֹהֵיכֶ֖ם אֲלֵיכֶ֑ם כֵּן֩ יָבִ֨יא יְהוָ֜ה עֲלֵיכֶ֗ם אֵ֚ת כָּל־הַדָּבָ֣ר הָרָ֔ע עַד־הַשְׁמִיד֣וֹ אוֹתְכֶ֗ם מֵ֠עַל הָאֲדָמָ֤ה הַטּוֹבָה֙ הַזֹּ֔את אֲשֶׁר֙ נָתַ֣ן לָכֶ֔ם יְהוָ֖ה אֱלֹהֵיכֶֽם׃

‎16 ‏בְּ֠עָבְרְכֶם אֶת־בְּרִ֨ית יְהוָ֥ה אֱלֹהֵיכֶם֮ אֲשֶׁ֣ר צִוָּ֣ה אֶתְכֶם֒ וַהֲלַכְתֶּ֗ם וַעֲבַדְתֶּם֙ אֱלֹהִ֣ים אֲחֵרִ֔ים וְהִשְׁתַּחֲוִיתֶ֖ם לָהֶ֑ם וְחָרָ֤ה אַף־יְהוָה֙ בָּכֶ֔ם וַאֲבַדְתֶּ֣ם מְהֵרָ֔ה מֵעַל֙ הָאָ֣רֶץ הַטּוֹבָ֔ה אֲשֶׁ֖ר נָתַ֥ן לָכֶֽם׃ פ

1 wayəhî mîyāmîm rabîm ’^aḥărê ’ăšer-hēnîḥa yəhwâ ləyiśərā’ēl mikāl-’ōyəḇêhem missāḇîḇ wîhwōšu‘a zāqēn bā’ bayyāmîm:

2 wayyiqərā’ yəhwōšu‘a ləḵāl-yiśərā’ēl lizəqēnāyw ûlərā’šāyw ûləšōfəṭāyw ûləšōṭərāyw wayyō’mer ’ălēhem ’ănî zāqanətî bā’ṯî bayyāmîm:

3 wə’atem rə’îṯem ’ēṯ kāl-’ăšer ‘āśâ yəhwâ ’ĕlōhêḵem ləḵāl-hagwōyim hā’ēlleh mipənêḵem kî yəhwâ ’ĕlōhêḵem hû’ hanniləḥām lāḵem:

4 rə’û hipalətî lāḵem ’eṯ-hagwōyim hannišə’ārîm hā’ēlleh bən^aḥălâ ləšiḇəṭêḵem min-hayyarədēn wəḵāl-hagwōyim ’ăšer hiḵəratî wəhayyām hagāḏwōl məḇwō’ haššāmeš:

5 wayhwâ ’ĕlōhêḵem hû’ yehədŏfēm mipənêḵem wəhwōrîš ’ōṯām millifənêḵem wîrišətem ’eṯ-’arəṣām ka’ăšer diber yəhwâ ’ĕlōhêḵem lāḵem:

6 w^aḥăzaqətem mə’ōḏ lišəmōr wəl^a‘ăśwōṯ ’ēṯ kāl-hakāṯûḇ bəsēfer twōraṯ mōšeh ləḇilətî sûr-mimmennû yāmîn ûśəmō’wl:

7 ləḇilətî-ḇwō’ bagwōyim hā’ēlleh hannišə’ārîm hā’ēlleh ’itəḵem ûḇəšēm ’ĕlōhêhem lō’-ṯazəkîrû wəlō’ ṯašəbî‘û wəlō’ ṯ^a‘aḇəḏûm wəlō’ ṯišət^aḥăwû lâem:

8 kî ’im-bayhwâ ’ĕlōhêḵem tiḏəbāqû ka’ăšer ‘ăśîṯem ‘aḏ hayywōm hazzeh:

9 wayywōreš yəhwâ mipənêḵem gwōyim gəḏōlîm w^a‘ăṣûmîm wə’atem lō’-‘āmaḏ ’îš bifənêḵem ‘aḏ hayywōm hazzeh:

10 ’îš-’eḥāḏ mikem yirədāf-’ālef kî| yəhwâ ’ĕlōhêḵem hû’ hanniləḥām lāḵem ka’ăšer diber lāḵem:

11 wənišəmarətem mə’ōḏ lənafəšōṯêḵem lə’ahăḇâ ’eṯ-yəhwâ ’ĕlōhêḵem:

12 kî| ’im-šwōḇ tāšûḇû ûḏəḇaqətem bəyeṯer hagwōyim hā’ēlleh hannišə’ārîm hā’ēlleh ’itəḵem wəhiṯəḥatanətem bâem ûḇā’ṯem bâem wəhēm bāḵem:

13 yāḏwō‘a tēḏə‘û kî lō’ ywōsîf yəhwâ ’ĕlōhêḵem ləhwōrîš ’eṯ-hagwōyim hā’ēlleh millifənêḵem wəhāyû lāḵem ləf^aḥ ûləmwōqēš ûləšōṭēṭ bəṣidêḵem wəliṣəninîm bə‘ênêḵem ‘aḏ-’ăḇāḏəḵem mē‘al hā’ăḏāmâ haṭṭwōḇâ hazzō’ṯ ’ăšer nāṯan lāḵem yəhwâ ’ĕlōhêḵem:

14 wəhinnēh ’ānōḵî hwōlēḵə hayywōm bəḏereḵə kāl-hā’āreṣ wîḏ^a‘ətem bəḵāl-ləḇaḇəḵem ûḇəḵāl-nafəšəḵem kî lō’-nāfal dāḇār ’eḥāḏ mikōl| hadəḇārîm haṭṭwōḇîm ’ăšer diber yəhwâ ’ĕlōhêḵem ‘ălêḵem hakōl bā’û lāḵem lō’-nāfal mimmennû dāḇār ’eḥāḏ:

15 wəhāyâ ka’ăšer-bā’ ‘ălêḵem kāl-hadāḇār haṭṭwōḇ ’ăšer diber yəhwâ ’ĕlōhêḵem ’ălêḵem kēn yāḇî’ yəhwâ ‘ălêḵem ’ēṯ kāl-hadāḇār hārā‘ ‘aḏ-hašəmîḏwō ’wōṯəḵem mē‘al hā’ăḏāmâ haṭṭwōḇâ hazzō’ṯ ’ăšer nāṯan lāḵem yəhwâ ’ĕlōhêḵem:

16 bə‘āḇərəḵem ’eṯ-bərîṯ yəhwâ ’ĕlōhêḵem ’ăšer ṣiûâ ’eṯəḵem wahălaḵətem w^a‘ăḇaḏətem ’ĕlōhîm ’ăḥērîm wəhišət^aḥăwîṯem lâem wəḥārâ ’af-yəhwâ bāḵem wa’ăḇaḏətem məhērâ mē‘al hā’āreṣ haṭṭwōḇâ ’ăšer nāṯan lāḵem: f