1 Kings (1 Melakhim) Chapter 12

‎1 ‏וַיֵּ֥לֶךְ רְחַבְעָ֖ם שְׁכֶ֑ם כִּ֥י שְׁכֶ֛ם בָּ֥א כָל־יִשְׂרָאֵ֖ל לְהַמְלִ֥יךְ אֹתֽוֹ׃

‎2 ‏וַיְהִ֞י כִּשְׁמֹ֣עַ׀ יָרָבְעָ֣ם בֶּן־נְבָ֗ט וְהוּא֙ עוֹדֶ֣נּוּ בְמִצְרַ֔יִם אֲשֶׁ֣ר בָּרַ֔ח מִפְּנֵ֖י הַמֶּ֣לֶךְ שְׁלֹמֹ֑ה וַיֵּ֥שֶׁב יָרָבְעָ֖ם בְּמִצְרָֽיִם׃

‎3 ‏וַֽיִּשְׁלְחוּ֙ וַיִּקְרְאוּ־ל֔וֹ ויבאו וַיָּבֹ֥א יָרָבְעָ֖ם וְכָל־קְהַ֣ל יִשְׂרָאֵ֑ל וַֽיְדַבְּר֔וּ אֶל־רְחַבְעָ֖ם לֵאמֹֽר׃

‎4 ‏אָבִ֖יךָ הִקְשָׁ֣ה אֶת־עֻלֵּ֑נוּ וְאַתָּ֡ה עַתָּ֣ה הָקֵל֩ מֵעֲבֹדַ֨ת אָבִ֜יךָ הַקָּשָׁ֗ה וּמֵעֻלּ֧וֹ הַכָּבֵ֛ד אֲשֶׁר־נָתַ֥ן עָלֵ֖ינוּ וְנַעַבְדֶֽךָּ׃

‎5 ‏וַיֹּ֣אמֶר אֲלֵיהֶ֗ם לְכ֥וּ עֹ֛ד שְׁלֹשָׁ֥ה יָמִ֖ים וְשׁ֣וּבוּ אֵלָ֑י וַיֵּלְכ֖וּ הָעָֽם׃

‎6 ‏וַיִּוָּעַ֞ץ הַמֶּ֣לֶךְ רְחַבְעָ֗ם אֶת־הַזְּקֵנִים֙ אֲשֶׁר־הָי֣וּ עֹמְדִ֗ים אֶת־פְּנֵי֙ שְׁלֹמֹ֣ה אָבִ֔יו בִּֽהְיֹת֥וֹ חַ֖י לֵאמֹ֑ר אֵ֚יךְ אַתֶּ֣ם נֽוֹעָצִ֔ים לְהָשִׁ֥יב אֶת־הָֽעָם־הַזֶּ֖ה דָּבָֽר׃

‎7 ‏וידבר וַיְדַבְּרוּ֙ אֵלָ֜יו לֵאמֹ֗ר אִם־הַ֠יּוֹם תִּֽהְיֶה־עֶ֜בֶד לָעָ֤ם הַזֶּה֙ וַֽעֲבַדְתָּ֔ם וַעֲנִיתָ֕ם וְדִבַּרְתָּ֥ אֲלֵיהֶ֖ם דְּבָרִ֣ים טוֹבִ֑ים וְהָי֥וּ לְךָ֛ עֲבָדִ֖ים כָּל־הַיָּמִֽים׃

‎8 ‏וַֽיַּעֲזֹ֛ב אֶת־עֲצַ֥ת הַזְּקֵנִ֖ים אֲשֶׁ֣ר יְעָצֻ֑הוּ וַיִּוָּעַ֗ץ אֶת־הַיְלָדִים֙ אֲשֶׁ֣ר גָּדְל֣וּ אִתּ֔וֹ אֲשֶׁ֥ר הָעֹמְדִ֖ים לְפָנָֽיו׃

‎9 ‏וַיֹּ֣אמֶר אֲלֵיהֶ֗ם מָ֚ה אַתֶּ֣ם נֽוֹעָצִ֔ים וְנָשִׁ֥יב דָּבָ֖ר אֶת־הָעָ֣ם הַזֶּ֑ה אֲשֶׁ֨ר דִּבְּר֤וּ אֵלַי֙ לֵאמֹ֔ר הָקֵל֙ מִן־הָעֹ֔ל אֲשֶׁר־נָתַ֥ן אָבִ֖יךָ עָלֵֽינוּ׃

‎10 ‏וַיְדַבְּר֣וּ אֵלָ֗יו הַיְלָדִים֙ אֲשֶׁ֨ר גָּדְל֣וּ אִתּוֹ֮ לֵאמֹר֒ כֹּֽה־תֹאמַ֣ר לָעָ֣ם הַזֶּ֡ה אֲשֶׁר֩ דִּבְּר֨וּ אֵלֶ֜יךָ לֵאמֹ֗ר אָבִ֙יךָ֙ הִכְבִּ֣יד אֶת־עֻלֵּ֔נוּ וְאַתָּ֖ה הָקֵ֣ל מֵעָלֵ֑ינוּ כֹּ֚ה תְּדַבֵּ֣ר אֲלֵיהֶ֔ם קָֽטָנִּ֥י עָבָ֖ה מִמָּתְנֵ֥י אָבִֽי׃

‎11 ‏וְעַתָּ֗ה אָבִי֙ הֶעְמִ֤יס עֲלֵיכֶם֙ עֹ֣ל כָּבֵ֔ד וַאֲנִ֖י אוֹסִ֣יף עַֽל־עֻלְּכֶ֑ם אָבִ֗י יִסַּ֤ר אֶתְכֶם֙ בַּשּׁוֹטִ֔ים וַאֲנִ֕י אֲיַסֵּ֥ר אֶתְכֶ֖ם בָּעַקְרַבִּֽים׃

‎12 ‏ויבו וַיָּב֨וֹא יָרָבְעָ֧ם וְכָל־הָעָ֛ם אֶל־רְחַבְעָ֖ם בַּיּ֣וֹם הַשְּׁלִישִׁ֑י כַּאֲשֶׁ֨ר דִּבֶּ֤ר הַמֶּ֙לֶךְ֙ לֵאמֹ֔ר שׁ֥וּבוּ אֵלַ֖י בַּיּ֥וֹם הַשְּׁלִישִֽׁי׃

‎13 ‏וַיַּ֧עַן הַמֶּ֛לֶךְ אֶת־הָעָ֖ם קָשָׁ֑ה וַֽיַּעֲזֹ֛ב אֶת־עֲצַ֥ת הַזְּקֵנִ֖ים אֲשֶׁ֥ר יְעָצֻֽהוּ׃

‎14 ‏וַיְדַבֵּ֣ר אֲלֵיהֶ֗ם כַּעֲצַ֤ת הַיְלָדִים֙ לֵאמֹ֔ר אָבִי֙ הִכְבִּ֣יד אֶֽת־עֻלְּכֶ֔ם וַאֲנִ֖י אֹסִ֣יף עַֽל־עֻלְּכֶ֑ם אָבִ֗י יִסַּ֤ר אֶתְכֶם֙ בַּשּׁוֹטִ֔ים וַאֲנִ֕י אֲיַסֵּ֥ר אֶתְכֶ֖ם בָּעַקְרַבִּֽים׃

‎15 ‏וְלֹֽא־שָׁמַ֥ע הַמֶּ֖לֶךְ אֶל־הָעָ֑ם כִּֽי־הָיְתָ֤ה סִבָּה֙ מֵעִ֣ם יְהוָ֔ה לְמַ֜עַן הָקִ֣ים אֶת־דְּבָר֗וֹ אֲשֶׁ֨ר דִּבֶּ֤ר יְהוָה֙ בְּיַד֙ אֲחִיָּ֣ה הַשִּׁילֹנִ֔י אֶל־יָרָבְעָ֖ם בֶּן־נְבָֽט׃

‎16 ‏וַיַּ֣רְא כָּל־יִשְׂרָאֵ֗ל כִּ֠י לֹֽא־שָׁמַ֣ע הַמֶּלֶךְ֮ אֲלֵיהֶם֒ וַיָּשִׁ֣בוּ הָעָ֣ם אֶת־הַמֶּ֣לֶךְ דָּבָ֣ר׀ לֵאמֹ֡ר מַה־לָּנוּ֩ חֵ֨לֶק בְּדָוִ֜ד וְלֹֽא־נַחֲלָ֣ה בְּבֶן־יִשַׁ֗י לְאֹהָלֶ֙יךָ֙ יִשְׂרָאֵ֔ל עַתָּ֕ה רְאֵ֥ה בֵיתְךָ֖ דָּוִ֑ד וַיֵּ֥לֶךְ יִשְׂרָאֵ֖ל לְאֹהָלָֽיו׃

‎17 ‏וּבְנֵ֣י יִשְׂרָאֵ֔ל הַיֹּשְׁבִ֖ים בְּעָרֵ֣י יְהוּדָ֑ה וַיִּמְלֹ֥ךְ עֲלֵיהֶ֖ם רְחַבְעָֽם׃ פ

‎18 ‏וַיִּשְׁלַ֞ח הַמֶּ֣לֶךְ רְחַבְעָ֗ם אֶת־אֲדֹרָם֙ אֲשֶׁ֣ר עַל־הַמַּ֔ס וַיִּרְגְּמ֨וּ כָל־יִשְׂרָאֵ֥ל בּ֛וֹ אֶ֖בֶן וַיָּמֹ֑ת וְהַמֶּ֣לֶךְ רְחַבְעָ֗ם הִתְאַמֵּץ֙ לַעֲל֣וֹת בַּמֶּרְכָּבָ֔ה לָנ֖וּס יְרוּשָׁלִָֽם׃

‎19 ‏וַיִּפְשְׁע֤וּ יִשְׂרָאֵל֙ בְּבֵ֣ית דָּוִ֔ד עַ֖ד הַיּ֥וֹם הַזֶּֽה׃ ס

‎20 ‏וַיְהִ֞י כִּשְׁמֹ֤עַ כָּל־יִשְׂרָאֵל֙ כִּֽי־שָׁ֣ב יָרָבְעָ֔ם וַֽיִּשְׁלְח֗וּ וַיִּקְרְא֤וּ אֹתוֹ֙ אֶל־הָ֣עֵדָ֔ה וַיַּמְלִ֥יכוּ אֹת֖וֹ עַל־כָּל־יִשְׂרָאֵ֑ל לֹ֤א הָיָה֙ אַחֲרֵ֣י בֵית־דָּוִ֔ד זוּלָתִ֥י שֵֽׁבֶט־יְהוּדָ֖ה לְבַדּֽוֹ׃

‎21 ‏ויבאו וַיָּבֹ֣א רְחַבְעָם֮ יְרוּשָׁלִַם֒ וַיַּקְהֵל֩ אֶת־כָּל־בֵּ֨ית יְהוּדָ֜ה וְאֶת־שֵׁ֣בֶט בִּנְיָמִ֗ן מֵאָ֨ה וּשְׁמֹנִ֥ים אֶ֛לֶף בָּח֖וּר עֹשֵׂ֣ה מִלְחָמָ֑ה לְהִלָּחֵם֙ עִם־בֵּ֣ית יִשְׂרָאֵ֔ל לְהָשִׁיב֙ אֶת־הַמְּלוּכָ֔ה לִרְחַבְעָ֖ם בֶּן־שְׁלֹמֹֽה׃ פ

‎22 ‏וַיְהִי֙ דְּבַ֣ר הָֽאֱלֹהִ֔ים אֶל־שְׁמַעְיָ֥ה אִישׁ־הָאֱלֹהִ֖ים לֵאמֹֽר׃

‎23 ‏אֱמֹ֗ר אֶל־רְחַבְעָ֤ם בֶּן־שְׁלֹמֹה֙ מֶ֣לֶךְ יְהוּדָ֔ה וְאֶל־כָּל־בֵּ֥ית יְהוּדָ֖ה וּבִנְיָמִ֑ין וְיֶ֥תֶר הָעָ֖ם לֵאמֹֽר׃

‎24 ‏כֹּ֣ה אָמַ֣ר יְהוָ֡ה לֹֽא־תַעֲלוּ֩ וְלֹא־תִלָּ֨חֲמ֜וּן עִם־אֲחֵיכֶ֣ם בְּנֵֽי־יִשְׂרָאֵ֗ל שׁ֚וּבוּ אִ֣ישׁ לְבֵית֔וֹ כִּ֧י מֵאִתִּ֛י נִהְיָ֖ה הַדָּבָ֣ר הַזֶּ֑ה וַיִּשְׁמְעוּ֙ אֶת־דְּבַ֣ר יְהוָ֔ה וַיָּשֻׁ֥בוּ לָלֶ֖כֶת כִּדְבַ֥ר יְהוָֽה׃ ס

‎25 ‏וַיִּ֨בֶן יָרָבְעָ֧ם אֶת־שְׁכֶ֛ם בְּהַ֥ר אֶפְרַ֖יִם וַיֵּ֣שֶׁב בָּ֑הּ וַיֵּצֵ֣א מִשָּׁ֔ם וַיִּ֖בֶן אֶת־פְּנוּאֵֽל׃

‎26 ‏וַיֹּ֥אמֶר יָרָבְעָ֖ם בְּלִבּ֑וֹ עַתָּ֛ה תָּשׁ֥וּב הַמַּמְלָכָ֖ה לְבֵ֥ית דָּוִֽד׃

‎27 ‏אִֽם־יַעֲלֶ֣ה׀ הָעָ֣ם הַזֶּ֗ה לַעֲשׂ֨וֹת זְבָחִ֤ים בְּבֵית־יְהוָה֙ בִּיר֣וּשָׁלִַ֔ם וְ֠שָׁב לֵ֣ב הָעָ֤ם הַזֶּה֙ אֶל־אֲדֹ֣נֵיהֶ֔ם אֶל־רְחַבְעָ֖ם מֶ֣לֶךְ יְהוּדָ֑ה וַהֲרָגֻ֕נִי וְשָׁ֖בוּ אֶל־רְחַבְעָ֥ם מֶֽלֶךְ־יְהוּדָֽה׃

‎28 ‏וַיִּוָּעַ֣ץ הַמֶּ֔לֶךְ וַיַּ֕עַשׂ שְׁנֵ֖י עֶגְלֵ֣י זָהָ֑ב וַיֹּ֣אמֶר אֲלֵהֶ֗ם רַב־לָכֶם֙ מֵעֲל֣וֹת יְרוּשָׁלִַ֔ם הִנֵּ֤ה אֱלֹהֶ֙יךָ֙ יִשְׂרָאֵ֔ל אֲשֶׁ֥ר הֶעֱל֖וּךָ מֵאֶ֥רֶץ מִצְרָֽיִם׃

‎29 ‏וַיָּ֥שֶׂם אֶת־הָאֶחָ֖ד בְּבֵֽית־אֵ֑ל וְאֶת־הָאֶחָ֖ד נָתַ֥ן בְּדָֽן׃

‎30 ‏וַיְהִ֛י הַדָּבָ֥ר הַזֶּ֖ה לְחַטָּ֑את וַיֵּלְכ֥וּ הָעָ֛ם לִפְנֵ֥י הָאֶחָ֖ד עַד־דָּֽן׃

‎31 ‏וַיַּ֖עַשׂ אֶת־בֵּ֣ית בָּמ֑וֹת וַיַּ֤עַשׂ כֹּֽהֲנִים֙ מִקְצ֣וֹת הָעָ֔ם אֲשֶׁ֥ר לֹֽא־הָי֖וּ מִבְּנֵ֥י לֵוִֽי׃

‎32 ‏וַיַּ֣עַשׂ יָרָבְעָ֣ם׀ חָ֡ג בַּחֹ֣דֶשׁ הַשְּׁמִינִ֣י בַּחֲמִשָּֽׁה־עָשָׂר֩ י֨וֹם׀ לַחֹ֜דֶשׁ כֶּחָ֣ג׀ אֲשֶׁ֣ר בִּיהוּדָ֗ה וַיַּ֙עַל֙ עַל־הַמִּזְבֵּ֔חַ כֵּ֤ן עָשָׂה֙ בְּבֵֽית־אֵ֔ל לְזַבֵּ֖חַ לָעֲגָלִ֣ים אֲשֶׁר־עָשָׂ֑ה וְהֶעֱמִיד֙ בְּבֵ֣ית אֵ֔ל אֶת־כֹּהֲנֵ֥י הַבָּמ֖וֹת אֲשֶׁ֥ר עָשָֽׂה׃

‎33 ‏וַיַּ֜עַל עַֽל־הַמִּזְבֵּ֣חַ׀ אֲשֶׁר־עָשָׂ֣ה בְּבֵֽית־אֵ֗ל בַּחֲמִשָּׁ֨ה עָשָׂ֥ר יוֹם֙ בַּחֹ֣דֶשׁ הַשְּׁמִינִ֔י בַּחֹ֖דֶשׁ אֲשֶׁר־בָּדָ֣א מלבד מִלִּבּ֑וֹ וַיַּ֤עַשׂ חָג֙ לִבְנֵ֣י יִשְׂרָאֵ֔ל וַיַּ֥עַל עַל־הַמִּזְבֵּ֖חַ לְהַקְטִֽיר׃ פ

1 wayyēleḵə rəḥaḇə‘ām šəḵem kî šəḵem bā’ ḵāl-yiśərā’ēl ləhaməlîḵə ’ōṯwō:

2 wayəhî kišəmō‘a| yārāḇə‘ām ben-nəḇāṭ wəhû’ ‘wōḏennû ḇəmiṣərayim ’ăšer bār^aḥ mipənê hammeleḵə šəlōmōh wayyēšeḇ yārāḇə‘ām bəmiṣərāyim:

3 wayyišələḥû wayyiqərə’û-lwō wayyāḇō’û wayyāḇō’ yārāḇə‘ām wəḵāl-qəhal yiśərā’ēl wayəḏabərû ’el-rəḥaḇə‘ām lē’mōr:

4 ’āḇîḵā hiqəšâ ’eṯ-‘ullēnû wə’atâ ‘atâ hāqēl mē‘ăḇōḏaṯ ’āḇîḵā haqqāšâ ûmē‘ullwō hakāḇēḏ ’ăšer-nāṯan ‘ālênû wən^a‘aḇəḏeḵḵā:

5 wayyō’mer ’ălêhem ləḵû ‘ōḏ šəlōšâ yāmîm wəšûḇû ’ēlāy wayyēləḵû hā‘ām:

6 wayyiûā‘aṣ hammeleḵə rəḥaḇə‘ām ’eṯ-hazzəqēnîm ’ăšer-hāyû ‘ōməḏîm ’eṯ-pənê šəlōmōh ’āḇîw bihəyōṯwō ḥay lē’mōr ’êḵə ’atem nwō‘āṣîm ləhāšîḇ ’eṯ-hā‘ām-hazzeh dāḇār:

7 wayəḏabēr wayəḏabərû ’ēlāyw lē’mōr ’im-hayywōm tihəyeh-‘eḇeḏ lā‘ām hazzeh w^a‘ăḇaḏətām w^a‘ănîṯām wəḏibarətā ’ălêhem dəḇārîm ṭwōḇîm wəhāyû ləḵā ‘ăḇāḏîm kāl-hayyāmîm:

8 wayy^a‘ăzōḇ ’eṯ-‘ăṣaṯ hazzəqēnîm ’ăšer yə‘āṣuhû wayyiûā‘aṣ ’eṯ-hayəlāḏîm ’ăšer gāḏəlû ’itwō ’ăšer hā‘ōməḏîm ləfānāyw:

9 wayyō’mer ’ălêhem mâ ’atem nwō‘āṣîm wənāšîḇ dāḇār ’eṯ-hā‘ām hazzeh ’ăšer dibərû ’ēlay lē’mōr hāqēl min-hā‘ōl ’ăšer-nāṯan ’āḇîḵā ‘ālênû:

10 wayəḏabərû ’ēlāyw hayəlāḏîm ’ăšer gāḏəlû ’itwō lē’mōr kōh-ṯō’mar lā‘ām hazzeh ’ăšer dibərû ’ēleyḵā lē’mōr ’āḇîḵā hiḵəbîḏ ’eṯ-‘ullēnû wə’atâ hāqēl mē‘ālênû kōh təḏabēr ’ălêhem qāṭānnî ‘āḇâ mimmāṯənê ’āḇî:

11 wə‘atâ ’āḇî he‘əmîs ‘ălêḵem ‘ōl kāḇēḏ wa’ănî ’wōsîf ‘al-‘ulləḵem ’āḇî yissar ’eṯəḵem baššwōṭîm wa’ănî ’ăyassēr ’eṯəḵem bā‘aqərabîm:

12 wayyāḇwō wayyāḇwō’ yārāḇə‘ām wəḵāl-hā‘ām ’el-rəḥaḇə‘ām bayywōm haššəlîšî ka’ăšer diber hammeleḵə lē’mōr šûḇû ’ēlay bayywōm haššəlîšî:

13 wayy^a‘an hammeleḵə ’eṯ-hā‘ām qāšâ wayy^a‘ăzōḇ ’eṯ-‘ăṣaṯ hazzəqēnîm ’ăšer yə‘āṣuhû:

14 wayəḏabēr ’ălêhem k^a‘ăṣaṯ hayəlāḏîm lē’mōr ’āḇî hiḵəbîḏ ’eṯ-‘ulləḵem wa’ănî ’ōsîf ‘al-‘ulləḵem ’āḇî yissar ’eṯəḵem baššwōṭîm wa’ănî ’ăyassēr ’eṯəḵem bā‘aqərabîm:

15 wəlō’-šām^a‘ hammeleḵə ’el-hā‘ām kî-hāyəṯâ sibâ mē‘im yəhwâ ləm^a‘an hāqîm ’eṯ-dəḇārwō ’ăšer diber yəhwâ bəyaḏ ’ăḥîyâ haššîlōnî ’el-yārāḇə‘ām ben-nəḇāṭ:

16 wayyarə’ kāl-yiśərā’ēl kî lō’-šām^a‘ hammeleḵə ’ălêhem wayyāšiḇû hā‘ām ’eṯ-hammeleḵə dāḇār| lē’mōr mah-llānû ḥēleq bəḏāwiḏ wəlō’-n^aḥălâ bəḇen-yišay lə’ōhāleyḵā yiśərā’ēl ‘atâ rə’ēh ḇêṯəḵā dāwiḏ wayyēleḵə yiśərā’ēl lə’ōhālāyw:

17 ûḇənê yiśərā’ēl hayyōšəḇîm bə‘ārê yəhûḏâ wayyiməlōḵə ‘ălêhem rəḥaḇə‘ām: f

18 wayyišəl^aḥ hammeleḵə rəḥaḇə‘ām ’eṯ-’ăḏōrām ’ăšer ‘al-hammas wayyirəgəmû ḵāl-yiśərā’ēl bwō ’eḇen wayyāmōṯ wəhammeleḵə rəḥaḇə‘ām hiṯə’ammēṣ l^a‘ălwōṯ bammerəkāḇâ lānûs yərûšālāim:

19 wayyifəšə‘û yiśərā’ēl bəḇêṯ dāwiḏ ‘aḏ hayywōm hazzeh: s

20 wayəhî kišəmō‘a kāl-yiśərā’ēl kî-šāḇ yārāḇə‘ām wayyišələḥû wayyiqərə’û ’ōṯwō ’el-hā‘ēḏâ wayyaməlîḵû ’ōṯwō ‘al-kāl-yiśərā’ēl lō’ hāyâ ’^aḥărê ḇêṯ-dāwiḏ zûlāṯî šēḇeṭ-yəhûḏâ ləḇadwō:

21 wayyāḇō’û wayyāḇō’ rəḥaḇə‘ām yərûšālaim wayyaqəhēl ’eṯ-kāl-bêṯ yəhûḏâ wə’eṯ-šēḇeṭ binəyāmin mē’â ûšəmōnîm ’elef bāḥûr ‘ōśēh miləḥāmâ ləhillāḥēm ‘im-bêṯ yiśərā’ēl ləhāšîḇ ’eṯ-hamməlûḵâ lirəḥaḇə‘ām ben-šəlōmōh: f

22 wayəhî dəḇar hā’ĕlōhîm ’el-šəm^a‘əyâ ’îš-hā’ĕlōhîm lē’mōr:

23 ’ĕmōr ’el-rəḥaḇə‘ām ben-šəlōmōh meleḵə yəhûḏâ wə’el-kāl-bêṯ yəhûḏâ ûḇinəyāmîn wəyeṯer hā‘ām lē’mōr:

24 kōh ’āmar yəhwâ lō’-ṯ^a‘ălû wəlō’-ṯillāḥămûn ‘im-’ăḥêḵem bənê-yiśərā’ēl šûḇû ’îš ləḇêṯwō kî mē’itî nihəyâ hadāḇār hazzeh wayyišəmə‘û ’eṯ-dəḇar yəhwâ wayyāšuḇû lāleḵeṯ kiḏəḇar yəhwâ: s

25 wayyiḇen yārāḇə‘ām ’eṯ-šəḵem bəhar ’efərayim wayyēšeḇ bāh wayyēṣē’ miššām wayyiḇen ’eṯ-pənû’ēl:

26 wayyō’mer yārāḇə‘ām bəlibwō ‘atâ tāšûḇ hammaməlāḵâ ləḇêṯ dāwiḏ:

27 ’im-y^a‘ăleh| hā‘ām hazzeh l^a‘ăśwōṯ zəḇāḥîm bəḇêṯ-yəhwâ bîrûšālaim wəšāḇ lēḇ hā‘ām hazzeh ’el-’ăḏōnêhem ’el-rəḥaḇə‘ām meleḵə yəhûḏâ wahărāḡunî wəšāḇû ’el-rəḥaḇə‘ām meleḵə-yəhûḏâ:

28 wayyiûā‘aṣ hammeleḵə wayy^a‘aś šənê ‘eḡəlê zâāḇ wayyō’mer ’ălēhem raḇ-lāḵem mē‘ălwōṯ yərûšālaim hinnēh ’ĕlōheyḵā yiśərā’ēl ’ăšer he‘ĕlûḵā mē’ereṣ miṣərāyim:

29 wayyāśem ’eṯ-hā’eḥāḏ bəḇêṯ-’ēl wə’eṯ-hā’eḥāḏ nāṯan bəḏān:

30 wayəhî hadāḇār hazzeh ləḥaṭṭā’ṯ wayyēləḵû hā‘ām lifənê hā’eḥāḏ ‘aḏ-dān:

31 wayy^a‘aś ’eṯ-bêṯ bāmwōṯ wayy^a‘aś kōhănîm miqəṣwōṯ hā‘ām ’ăšer lō’-hāyû mibənê lēwî:

32 wayy^a‘aś yārāḇə‘ām| ḥāḡ b^aḥōḏeš haššəmînî b^aḥămiššâ-‘āśār ywōm| l^aḥōḏeš keḥāḡ| ’ăšer bîhûḏâ wayy^a‘al ‘al-hammizəbēḥa kēn ‘āśâ bəḇêṯ-’ēl ləzabēḥa lā‘ăḡālîm ’ăšer-‘āśâ wəhe‘ĕmîḏ bəḇêṯ ’ēl ’eṯ-kōhănê habāmwōṯ ’ăšer ‘āśâ:

33 wayy^a‘al ‘al-hammizəbēḥa| ’ăšer-‘āśâ bəḇêṯ-’ēl b^aḥămiššâ ‘āśār ywōm b^aḥōḏeš haššəmînî b^aḥōḏeš ’ăšer-bāḏā’ millibaḏ millibwō wayy^a‘aś ḥāḡ liḇənê yiśərā’ēl wayy^a‘al ‘al-hammizəbēḥa ləhaqəṭîr: f