1 Kings (1 Melakhim) Chapter 15

‎1 ‏וּבִשְׁנַת֙ שְׁמֹנֶ֣ה עֶשְׂרֵ֔ה לַמֶּ֖לֶךְ יָרָבְעָ֣ם בֶּן־נְבָ֑ט מָלַ֥ךְ אֲבִיָּ֖ם עַל־יְהוּדָֽה׃

‎2 ‏שָׁלֹ֣שׁ שָׁנִ֔ים מָלַ֖ךְ בִּירוּשָׁלִָ֑ם וְשֵׁ֣ם אִמּ֔וֹ מַעֲכָ֖ה בַּת־אֲבִישָׁלֽוֹם׃

‎3 ‏וַיֵּ֕לֶךְ בְּכָל־חַטֹּ֥אות אָבִ֖יו אֲשֶׁר־עָשָׂ֣ה לְפָנָ֑יו וְלֹא־הָיָ֨ה לְבָב֤וֹ שָׁלֵם֙ עִם־יְהוָ֣ה אֱלֹהָ֔יו כִּלְבַ֖ב דָּוִ֥ד אָבִֽיו׃

‎4 ‏כִּ֚י לְמַ֣עַן דָּוִ֔ד נָתַן֩ יְהוָ֨ה אֱלֹהָ֥יו ל֛וֹ נִ֖יר בִּירוּשָׁלִָ֑ם לְהָקִ֤ים אֶת־בְּנוֹ֙ אַחֲרָ֔יו וּֽלְהַעֲמִ֖יד אֶת־יְרוּשָׁלִָֽם׃

‎5 ‏אֲשֶׁ֨ר עָשָׂ֥ה דָוִ֛ד אֶת־הַיָּשָׁ֖ר בְּעֵינֵ֣י יְהוָ֑ה וְלֹֽא־סָ֞ר מִכֹּ֣ל אֲשֶׁר־צִוָּ֗הוּ כֹּ֚ל יְמֵ֣י חַיָּ֔יו רַ֕ק בִּדְבַ֖ר אוּרִיָּ֥ה הַחִתִּֽי׃

‎6 ‏וּמִלְחָמָ֨ה הָיְתָ֧ה בֵין־רְחַבְעָ֛ם וּבֵ֥ין יָרָבְעָ֖ם כָּל־יְמֵ֥י חַיָּֽיו׃

‎7 ‏וְיֶ֨תֶר דִּבְרֵ֤י אֲבִיָּם֙ וְכָל־אֲשֶׁ֣ר עָשָׂ֔ה הֲלֽוֹא־הֵ֣ם כְּתוּבִ֗ים עַל־סֵ֛פֶר דִּבְרֵ֥י הַיָּמִ֖ים לְמַלְכֵ֣י יְהוּדָ֑ה וּמִלְחָמָ֥ה הָיְתָ֛ה בֵּ֥ין אֲבִיָּ֖ם וּבֵ֥ין יָרָבְעָֽם׃

‎8 ‏וַיִּשְׁכַּ֤ב אֲבִיָּם֙ עִם־אֲבֹתָ֔יו וַיִּקְבְּר֥וּ אֹת֖וֹ בְּעִ֣יר דָּוִ֑ד וַיִּמְלֹ֛ךְ אָסָ֥א בְנ֖וֹ תַּחְתָּֽיו׃ פ

‎9 ‏וּבִשְׁנַ֣ת עֶשְׂרִ֔ים לְיָרָבְעָ֖ם מֶ֣לֶךְ יִשְׂרָאֵ֑ל מָלַ֥ךְ אָסָ֖א מֶ֥לֶךְ יְהוּדָֽה׃

‎10 ‏וְאַרְבָּעִ֤ים וְאַחַת֙ שָׁנָ֔ה מָלַ֖ךְ בִּירוּשָׁלִָ֑ם וְשֵׁ֣ם אִמּ֔וֹ מַעֲכָ֖ה בַּת־אֲבִישָׁלֽוֹם׃

‎11 ‏וַיַּ֧עַשׂ אָסָ֛א הַיָּשָׁ֖ר בְּעֵינֵ֣י יְהוָ֑ה כְּדָוִ֖ד אָבִֽיו׃

‎12 ‏וַיַּעֲבֵ֥ר הַקְּדֵשִׁ֖ים מִן־הָאָ֑רֶץ וַיָּ֙סַר֙ אֶת־כָּל־הַגִּלֻּלִ֔ים אֲשֶׁ֥ר עָשׂ֖וּ אֲבֹתָֽיו׃

‎13 ‏וְגַ֣ם׀ אֶת־מַעֲכָ֣ה אִמּ֗וֹ וַיְסִרֶ֙הָ֙ מִגְּבִירָ֔ה אֲשֶׁר־עָשְׂתָ֥ה מִפְלֶ֖צֶת לָאֲשֵׁרָ֑ה וַיִּכְרֹ֤ת אָסָא֙ אֶת־מִפְלַצְתָּ֔הּ וַיִּשְׂרֹ֖ף בְּנַ֥חַל קִדְרֽוֹן׃

‎14 ‏וְהַבָּמ֖וֹת לֹא־סָ֑רוּ רַ֣ק לְבַב־אָסָ֗א הָיָ֥ה שָׁלֵ֛ם עִם־יְהוָ֖ה כָּל־יָמָֽיו׃

‎15 ‏וַיָּבֵא֙ אֶת־קָדְשֵׁ֣י אָבִ֔יו וקדשו וְקָדְשֵׁ֖י בֵּ֣ית יְהוָ֑ה כֶּ֥סֶף וְזָהָ֖ב וְכֵלִֽים׃

‎16 ‏וּמִלְחָמָ֨ה הָיְתָ֜ה בֵּ֣ין אָסָ֗א וּבֵ֛ין בַּעְשָׁ֥א מֶֽלֶךְ־יִשְׂרָאֵ֖ל כָּל־יְמֵיהֶֽם׃

‎17 ‏וַיַּ֨עַל בַּעְשָׁ֤א מֶֽלֶךְ־יִשְׂרָאֵל֙ עַל־יְהוּדָ֔ה וַיִּ֖בֶן אֶת־הָרָמָ֑ה לְבִלְתִּ֗י תֵּ֚ת יֹצֵ֣א וָבָ֔א לְאָסָ֖א מֶ֥לֶךְ יְהוּדָֽה׃

‎18 ‏וַיִּקַּ֣ח אָ֠סָא אֶת־כָּל־הַכֶּ֨סֶף וְהַזָּהָ֜ב הַֽנּוֹתָרִ֣ים׀ בְּאוֹצְר֣וֹת בֵּית־יְהוָ֗ה וְאֶת־אֽוֹצְרוֹת֙ בֵּ֣ית מלך הַמֶּ֔לֶךְ וַֽיִּתְּנֵ֖ם בְּיַד־עֲבָדָ֑יו וַיִּשְׁלָחֵ֞ם הַמֶּ֣לֶךְ אָסָ֗א אֶל־בֶּן־הֲ֠דַד בֶּן־טַבְרִמֹּ֤ן בֶּן־חֶזְיוֹן֙ מֶ֣לֶךְ אֲרָ֔ם הַיֹּשֵׁ֥ב בְּדַמֶּ֖שֶׂק לֵאמֹֽר׃

‎19 ‏בְּרִית֙ בֵּינִ֣י וּבֵינֶ֔ךָ בֵּ֥ין אָבִ֖י וּבֵ֣ין אָבִ֑יךָ הִנֵּה֩ שָׁלַ֨חְתִּֽי לְךָ֥ שֹׁ֙חַד֙ כֶּ֣סֶף וְזָהָ֔ב לֵ֣ךְ הָפֵ֗רָה אֶת־בְּרִֽיתְךָ֙ אֶת־בַּעְשָׁ֣א מֶֽלֶךְ־יִשְׂרָאֵ֔ל וְיַעֲלֶ֖ה מֵעָלָֽי׃

‎20 ‏וַיִּשְׁמַ֨ע בֶּן־הֲדַ֜ד אֶל־הַמֶּ֣לֶךְ אָסָ֗א וַ֠יִּשְׁלַח אֶת־שָׂרֵ֨י הַחֲיָלִ֤ים אֲשֶׁר־לוֹ֙ עַל־עָרֵ֣י יִשְׂרָאֵ֔ל וַיַּךְ֙ אֶת־עִיּ֣וֹן וְאֶת־דָּ֔ן וְאֵ֖ת אָבֵ֣ל בֵּֽית־מַעֲכָ֑ה וְאֵת֙ כָּל־כִּנְר֔וֹת עַ֖ל כָּל־אֶ֥רֶץ נַפְתָּלִֽי׃

‎21 ‏וַֽיְהִי֙ כִּשְׁמֹ֣עַ בַּעְשָׁ֔א וַיֶּחְדַּ֕ל מִבְּנ֖וֹת אֶת־הָֽרָמָ֑ה וַיֵּ֖שֶׁב בְּתִרְצָֽה׃

‎22 ‏וְהַמֶּ֨לֶךְ אָסָ֜א הִשְׁמִ֤יעַ אֶת־כָּל־יְהוּדָה֙ אֵ֣ין נָקִ֔י וַיִּשְׂא֞וּ אֶת־אַבְנֵ֤י הָֽרָמָה֙ וְאֶת־עֵצֶ֔יהָ אֲשֶׁ֥ר בָּנָ֖ה בַּעְשָׁ֑א וַיִּ֤בֶן בָּם֙ הַמֶּ֣לֶךְ אָסָ֔א אֶת־גֶּ֥בַע בִּנְיָמִ֖ן וְאֶת־הַמִּצְפָּֽה׃

‎23 ‏וְיֶ֣תֶר כָּל־דִּבְרֵֽי־אָ֠סָא וְכָל־גְּב֨וּרָת֜וֹ וְכָל־אֲשֶׁ֣ר עָשָׂ֗ה וְהֶֽעָרִים֙ אֲשֶׁ֣ר בָּנָ֔ה הֲלֹֽא־הֵ֣מָּה כְתוּבִ֗ים עַל־סֵ֛פֶר דִּבְרֵ֥י הַיָּמִ֖ים לְמַלְכֵ֣י יְהוּדָ֑ה רַ֚ק לְעֵ֣ת זִקְנָת֔וֹ חָלָ֖ה אֶת־רַגְלָֽיו׃

‎24 ‏וַיִּשְׁכַּ֤ב אָסָא֙ עִם־אֲבֹתָ֔יו וַיִּקָּבֵר֙ עִם־אֲבֹתָ֔יו בְּעִ֖יר דָּוִ֣ד אָבִ֑יו וַיִּמְלֹ֛ךְ יְהוֹשָׁפָ֥ט בְּנ֖וֹ תַּחְתָּֽיו׃ פ

‎25 ‏וְנָדָ֣ב בֶּן־יָרָבְעָ֗ם מָלַךְ֙ עַל־יִשְׂרָאֵ֔ל בִּשְׁנַ֣ת שְׁתַּ֔יִם לְאָסָ֖א מֶ֣לֶךְ יְהוּדָ֑ה וַיִּמְלֹ֥ךְ עַל־יִשְׂרָאֵ֖ל שְׁנָתָֽיִם׃

‎26 ‏וַיַּ֥עַשׂ הָרַ֖ע בְּעֵינֵ֣י יְהוָ֑ה וַיֵּ֙לֶךְ֙ בְּדֶ֣רֶךְ אָבִ֔יו וּ֨בְחַטָּאת֔וֹ אֲשֶׁ֥ר הֶחֱטִ֖יא אֶת־יִשְׂרָאֵֽל׃

‎27 ‏וַיִּקְשֹׁ֨ר עָלָ֜יו בַּעְשָׁ֤א בֶן־אֲחִיָּה֙ לְבֵ֣ית יִשָּׂשכָ֔ר וַיַּכֵּ֣הוּ בַעְשָׁ֔א בְּגִבְּת֖וֹן אֲשֶׁ֣ר לַפְּלִשְׁתִּ֑ים וְנָדָב֙ וְכָל־יִשְׂרָאֵ֔ל צָרִ֖ים עַֽל־גִּבְּתֽוֹן׃

‎28 ‏וַיְמִתֵ֣הוּ בַעְשָׁ֔א בִּשְׁנַ֣ת שָׁלֹ֔שׁ לְאָסָ֖א מֶ֣לֶךְ יְהוּדָ֑ה וַיִּמְלֹ֖ךְ תַּחְתָּֽיו׃

‎29 ‏וַיְהִ֣י כְמָלְכ֗וֹ הִכָּה֙ אֶת־כָּל־בֵּ֣ית יָרָבְעָ֔ם לֹֽא־הִשְׁאִ֧יר כָּל־נְשָׁמָ֛ה לְיָרָבְעָ֖ם עַד־הִשְׁמִד֑וֹ כִּדְבַ֣ר יְהוָ֔ה אֲשֶׁ֣ר דִּבֶּ֔ר בְּיַד־עַבְדּ֖וֹ אֲחִיָּ֥ה הַשִּׁילֹנִֽי׃

‎30 ‏עַל־חַטֹּ֤אות יָרָבְעָם֙ אֲשֶׁ֣ר חָטָ֔א וַאֲשֶׁ֥ר הֶחֱטִ֖יא אֶת־יִשְׂרָאֵ֑ל בְּכַעְס֕וֹ אֲשֶׁ֣ר הִכְעִ֔יס אֶת־יְהוָ֖ה אֱלֹהֵ֥י יִשְׂרָאֵֽל׃

‎31 ‏וְיֶ֛תֶר דִּבְרֵ֥י נָדָ֖ב וְכָל־אֲשֶׁ֣ר עָשָׂ֑ה הֲלֹא־הֵ֣ם כְּתוּבִ֗ים עַל־סֵ֛פֶר דִּבְרֵ֥י הַיָּמִ֖ים לְמַלְכֵ֥י יִשְׂרָאֵֽל׃

‎32 ‏וּמִלְחָמָ֨ה הָיְתָ֜ה בֵּ֣ין אָסָ֗א וּבֵ֛ין בַּעְשָׁ֥א מֶֽלֶךְ־יִשְׂרָאֵ֖ל כָּל־יְמֵיהֶֽם׃ פ

‎33 ‏בִּשְׁנַ֣ת שָׁלֹ֔שׁ לְאָסָ֖א מֶ֣לֶךְ יְהוּדָ֑ה מָ֠לַךְ בַּעְשָׁ֨א בֶן־אֲחִיָּ֤ה עַל־כָּל־יִשְׂרָאֵל֙ בְּתִרְצָ֔ה עֶשְׂרִ֥ים וְאַרְבַּ֖ע שָׁנָֽה׃

‎34 ‏וַיַּ֥עַשׂ הָרַ֖ע בְּעֵינֵ֣י יְהוָ֑ה וַיֵּ֙לֶךְ֙ בְּדֶ֣רֶךְ יָרָבְעָ֔ם וּ֨בְחַטָּאת֔וֹ אֲשֶׁ֥ר הֶחֱטִ֖יא אֶת־יִשְׂרָאֵֽל׃ ס

1 ûḇišənaṯ šəmōneh ‘eśərēh lammeleḵə yārāḇə‘ām ben-nəḇāṭ mālaḵə ’ăḇîyām ‘al-yəhûḏâ:

2 šālōš šānîm mālaḵə bîrûšālāim wəšēm ’immwō m^a‘ăḵâ baṯ-’ăḇîšālwōm:

3 wayyēleḵə bəḵāl-ḥaṭṭō’wṯ ’āḇîw ’ăšer-‘āśâ ləfānāyw wəlō’-hāyâ ləḇāḇwō šālēm ‘im-yəhwâ ’ĕlōhāyw kiləḇaḇ dāwiḏ ’āḇîw:

4 kî ləm^a‘an dāwiḏ nāṯan yəhwâ ’ĕlōhāyw lwō nîr bîrûšālāim ləhāqîm ’eṯ-bənwō ’^aḥărāyw ûləh^a‘ămîḏ ’eṯ-yərûšālāim:

5 ’ăšer ‘āśâ ḏāwiḏ ’eṯ-hayyāšār bə‘ênê yəhwâ wəlō’-sār mikōl ’ăšer-ṣiûâû kōl yəmê ḥayyāyw raq biḏəḇar ’ûrîyâ h^aḥitî:

6 ûmiləḥāmâ hāyəṯâ ḇên-rəḥaḇə‘ām ûḇên yārāḇə‘ām kāl-yəmê ḥayyāyw:

7 wəyeṯer diḇərê ’ăḇîyām wəḵāl-’ăšer ‘āśâ hălwō’-hēm kəṯûḇîm ‘al-sēfer diḇərê hayyāmîm ləmaləḵê yəhûḏâ ûmiləḥāmâ hāyəṯâ bên ’ăḇîyām ûḇên yārāḇə‘ām:

8 wayyišəkaḇ ’ăḇîyām ‘im-’ăḇōṯāyw wayyiqəbərû ’ōṯwō bə‘îr dāwiḏ wayyiməlōḵə ’āsā’ ḇənwō t^aḥətāyw: f

9 ûḇišənaṯ ‘eśərîm ləyārāḇə‘ām meleḵə yiśərā’ēl mālaḵə ’āsā’ meleḵə yəhûḏâ:

10 wə’arəbā‘îm wə’^aḥaṯ šānâ mālaḵə bîrûšālāim wəšēm ’immwō m^a‘ăḵâ baṯ-’ăḇîšālwōm:

11 wayy^a‘aś ’āsā’ hayyāšār bə‘ênê yəhwâ kəḏāwiḏ ’āḇîw:

12 wayy^a‘ăḇēr haqqəḏēšîm min-hā’āreṣ wayyāsar ’eṯ-kāl-hagillulîm ’ăšer ‘āśû ’ăḇōṯāyw:

13 wəḡam| ’eṯ-m^a‘ăḵâ ’immwō wayəsirehā migəḇîrâ ’ăšer-‘āśəṯâ mifəleṣeṯ lā’ăšērâ wayyiḵərōṯ ’āsā’ ’eṯ-mifəlaṣətāh wayyiśərōf bən^aḥal qiḏərwōn:

14 wəhabāmwōṯ lō’-sārû raq ləḇaḇ-’āsā’ hāyâ šālēm ‘im-yəhwâ kāl-yāmāyw:

15 wayyāḇē’ ’eṯ-qāḏəšê ’āḇîw wəqāḏəšwō wəqāḏəšê bêṯ yəhwâ kesef wəzâāḇ wəḵēlîm:

16 ûmiləḥāmâ hāyəṯâ bên ’āsā’ ûḇên b^a‘əšā’ meleḵə-yiśərā’ēl kāl-yəmêhem:

17 wayy^a‘al b^a‘əšā’ meleḵə-yiśərā’ēl ‘al-yəhûḏâ wayyiḇen ’eṯ-hārāmâ ləḇilətî tēṯ yōṣē’ wāḇā’ lə’āsā’ meleḵə yəhûḏâ:

18 wayyiqq^aḥ ’āsā’ ’eṯ-kāl-hakesef wəhazzâāḇ hannwōṯārîm| bə’wōṣərwōṯ bêṯ-yəhwâ wə’eṯ-’wōṣərwōṯ bêṯ meleḵə hammeleḵə wayyitənēm bəyaḏ-‘ăḇāḏāyw wayyišəlāḥēm hammeleḵə ’āsā’ ’el-ben-hăḏaḏ ben-ṭaḇərimmōn ben-ḥezəywōn meleḵə ’ărām hayyōšēḇ bəḏammeśeq lē’mōr:

19 bərîṯ bênî ûḇêneḵā bên ’āḇî ûḇên ’āḇîḵā hinnēh šāl^aḥətî ləḵā šōḥaḏ kesef wəzâāḇ lēḵə hāfērâ ’eṯ-bərîṯəḵā ’eṯ-b^a‘əšā’ meleḵə-yiśərā’ēl wəy^a‘ăleh mē‘ālāy:

20 wayyišəm^a‘ ben-hăḏaḏ ’el-hammeleḵə ’āsā’ wayyišəl^aḥ ’eṯ-śārê h^aḥăyālîm ’ăšer-lwō ‘al-‘ārê yiśərā’ēl wayyaḵə ’eṯ-‘îywōn wə’eṯ-dān wə’ēṯ ’āḇēl bêṯ-m^a‘ăḵâ wə’ēṯ kāl-kinərwōṯ ‘al kāl-’ereṣ nafətālî:

21 wayəhî kišəmō‘a b^a‘əšā’ wayyeḥədal mibənwōṯ ’eṯ-hārāmâ wayyēšeḇ bəṯirəṣâ:

22 wəhammeleḵə ’āsā’ hišəmî‘a ’eṯ-kāl-yəhûḏâ ’ên nāqî wayyiśə’û ’eṯ-’aḇənê hārāmâ wə’eṯ-‘ēṣeyhā ’ăšer bānâ b^a‘əšā’ wayyiḇen bām hammeleḵə ’āsā’ ’eṯ-geḇ^a‘ binəyāmin wə’eṯ-hammiṣəpâ:

23 wəyeṯer kāl-diḇərê-’āsā’ wəḵāl-gəḇûrāṯwō wəḵāl-’ăšer ‘āśâ wəhe‘ārîm ’ăšer bānâ hălō’-hēmmâ ḵəṯûḇîm ‘al-sēfer diḇərê hayyāmîm ləmaləḵê yəhûḏâ raq lə‘ēṯ ziqənāṯwō ḥālâ ’eṯ-raḡəlāyw:

24 wayyišəkaḇ ’āsā’ ‘im-’ăḇōṯāyw wayyiqqāḇēr ‘im-’ăḇōṯāyw bə‘îr dāwiḏ ’āḇîw wayyiməlōḵə yəhwōšāfāṭ bənwō t^aḥətāyw: f

25 wənāḏāḇ ben-yārāḇə‘ām mālaḵə ‘al-yiśərā’ēl bišənaṯ šətayim lə’āsā’ meleḵə yəhûḏâ wayyiməlōḵə ‘al-yiśərā’ēl šənāṯāyim:

26 wayy^a‘aś hār^a‘ bə‘ênê yəhwâ wayyēleḵə bəḏereḵə ’āḇîw ûḇəḥaṭṭā’ṯwō ’ăšer heḥĕṭî’ ’eṯ-yiśərā’ēl:

27 wayyiqəšōr ‘ālāyw b^a‘əšā’ ḇen-’ăḥîyâ ləḇêṯ yiśśāsḵār wayyakēhû ḇ^a‘əšā’ bəḡibəṯwōn ’ăšer lapəlišətîm wənāḏāḇ wəḵāl-yiśərā’ēl ṣārîm ‘al-gibəṯwōn:

28 wayəmiṯēhû ḇ^a‘əšā’ bišənaṯ šālōš lə’āsā’ meleḵə yəhûḏâ wayyiməlōḵə t^aḥətāyw:

29 wayəhî ḵəmāləḵwō hikâ ’eṯ-kāl-bêṯ yārāḇə‘ām lō’-hišə’îr kāl-nəšāmâ ləyārāḇə‘ām ‘aḏ-hišəmiḏwō kiḏəḇar yəhwâ ’ăšer diber bəyaḏ-‘aḇədwō ’ăḥîyâ haššîlōnî:

30 ‘al-ḥaṭṭō’wṯ yārāḇə‘ām ’ăšer ḥāṭā’ wa’ăšer heḥĕṭî’ ’eṯ-yiśərā’ēl bəḵ^a‘əswō ’ăšer hiḵə‘îs ’eṯ-yəhwâ ’ĕlōhê yiśərā’ēl:

31 wəyeṯer diḇərê nāḏāḇ wəḵāl-’ăšer ‘āśâ hălō’-hēm kəṯûḇîm ‘al-sēfer diḇərê hayyāmîm ləmaləḵê yiśərā’ēl:

32 ûmiləḥāmâ hāyəṯâ bên ’āsā’ ûḇên b^a‘əšā’ meleḵə-yiśərā’ēl kāl-yəmêhem: f

33 bišənaṯ šālōš lə’āsā’ meleḵə yəhûḏâ mālaḵə b^a‘əšā’ ḇen-’ăḥîyâ ‘al-kāl-yiśərā’ēl bəṯirəṣâ ‘eśərîm wə’arəb^a‘ šānâ:

34 wayy^a‘aś hār^a‘ bə‘ênê yəhwâ wayyēleḵə bəḏereḵə yārāḇə‘ām ûḇəḥaṭṭā’ṯwō ’ăšer heḥĕṭî’ ’eṯ-yiśərā’ēl: s