2 Kings (2 Melakhim) Chapter 14

‎1 ‏בִּשְׁנַ֣ת שְׁתַּ֔יִם לְיוֹאָ֥שׁ בֶּן־יוֹאָחָ֖ז מֶ֣לֶךְ יִשְׂרָאֵ֑ל מָלַ֛ךְ אֲמַצְיָ֥הוּ בֶן־יוֹאָ֖שׁ מֶ֥לֶךְ יְהוּדָֽה׃

‎2 ‏בֶּן־עֶשְׂרִ֨ים וְחָמֵ֤שׁ שָׁנָה֙ הָיָ֣ה בְמָלְכ֔וֹ וְעֶשְׂרִ֤ים וָתֵ֙שַׁע֙ שָׁנָ֔ה מָלַ֖ךְ בִּירוּשָׁלִָ֑ם וְשֵׁ֣ם אִמּ֔וֹ יהועדין יְהֽוֹעַדָּ֖ן מִן־יְרוּשָׁלִָֽם׃

‎3 ‏וַיַּ֤עַשׂ הַיָּשָׁר֙ בְּעֵינֵ֣י יְהוָ֔ה רַ֕ק לֹ֖א כְּדָוִ֣ד אָבִ֑יו כְּכֹ֧ל אֲשֶׁר־עָשָׂ֛ה יוֹאָ֥שׁ אָבִ֖יו עָשָֽׂה׃

‎4 ‏רַ֥ק הַבָּמ֖וֹת לֹא־סָ֑רוּ ע֥וֹד הָעָ֛ם מְזַבְּחִ֥ים וּֽמְקַטְּרִ֖ים בַּבָּמֽוֹת׃

‎5 ‏וַיְהִ֕י כַּאֲשֶׁ֛ר חָזְקָ֥ה הַמַּמְלָכָ֖ה בְּיָד֑וֹ וַיַּךְ֙ אֶת־עֲבָדָ֔יו הַמַּכִּ֖ים אֶת־הַמֶּ֥לֶךְ אָבִֽיו׃

‎6 ‏וְאֶת־בְּנֵ֥י הַמַּכִּ֖ים לֹ֣א הֵמִ֑ית כַּכָּת֣וּב בְּסֵ֣פֶר תּֽוֹרַת־מֹ֠שֶׁה אֲשֶׁר־צִוָּ֨ה יְהוָ֜ה לֵאמֹ֗ר לֹא־יוּמְת֨וּ אָב֤וֹת עַל־בָּנִים֙ וּבָנִים֙ לֹא־יוּמְת֣וּ עַל־אָב֔וֹת כִּ֛י אִם־אִ֥ישׁ בְּחֶטְא֖וֹ ימות יוּמָֽת׃

‎7 ‏הוּא־הִכָּ֨ה אֶת־אֱד֤וֹם בְּגֵיא־המלח מֶ֙לַח֙ עֲשֶׂ֣רֶת אֲלָפִ֔ים וְתָפַ֥שׂ אֶת־הַסֶּ֖לַע בַּמִּלְחָמָ֑ה וַיִּקְרָ֤א אֶת־שְׁמָהּ֙ יָקְתְאֵ֔ל עַ֖ד הַיּ֥וֹם הַזֶּֽה׃ פ

‎8 ‏אָ֣ז שָׁלַ֤ח אֲמַצְיָה֙ מַלְאָכִ֔ים אֶל־יְהוֹאָ֨שׁ בֶּן־יְהוֹאָחָ֧ז בֶּן־יֵה֛וּא מֶ֥לֶךְ יִשְׂרָאֵ֖ל לֵאמֹ֑ר לְכָ֖ה נִתְרָאֶ֥ה פָנִֽים׃

‎9 ‏וַיִּשְׁלַ֞ח יְהוֹאָ֣שׁ מֶֽלֶךְ־יִשְׂרָאֵ֗ל אֶל־אֲמַצְיָ֣הוּ מֶֽלֶךְ־יְהוּדָה֮ לֵאמֹר֒ הַח֜וֹחַ אֲשֶׁ֣ר בַּלְּבָנ֗וֹן שָׁ֠לַח אֶל־הָאֶ֜רֶז אֲשֶׁ֤ר בַּלְּבָנוֹן֙ לֵאמֹ֔ר תְּנָֽה־אֶת־בִּתְּךָ֥ לִבְנִ֖י לְאִשָּׁ֑ה וַֽתַּעֲבֹ֞ר חַיַּ֤ת הַשָּׂדֶה֙ אֲשֶׁ֣ר בַּלְּבָנ֔וֹן וַתִּרְמֹ֖ס אֶת־הַחֽוֹחַ׃

‎10 ‏הַכֵּ֤ה הִכִּ֙יתָ֙ אֶת־אֱד֔וֹם וּֽנְשָׂאֲךָ֖ לִבֶּ֑ךָ הִכָּבֵד֙ וְשֵׁ֣ב בְּבֵיתֶ֔ךָ וְלָ֤מָּה תִתְגָּרֶה֙ בְּרָעָ֔ה וְנָ֣פַלְתָּ֔ה אַתָּ֖ה וִיהוּדָ֥ה עִמָּֽךְ׃

‎11 ‏וְלֹא־שָׁמַ֣ע אֲמַצְיָ֔הוּ וַיַּ֨עַל יְהוֹאָ֤שׁ מֶֽלֶךְ־יִשְׂרָאֵל֙ וַיִּתְרָא֣וּ פָנִ֔ים ה֖וּא וַאֲמַצְיָ֣הוּ מֶֽלֶךְ־יְהוּדָ֑ה בְּבֵ֥ית שֶׁ֖מֶשׁ אֲשֶׁ֥ר לִיהוּדָֽה׃

‎12 ‏וַיִּנָּ֥גֶף יְהוּדָ֖ה לִפְנֵ֣י יִשְׂרָאֵ֑ל וַיָּנֻ֖סוּ אִ֥ישׁ לאהלו לְאֹהָלָֽיו׃

‎13 ‏וְאֵת֩ אֲמַצְיָ֨הוּ מֶֽלֶךְ־יְהוּדָ֜ה בֶּן־יְהוֹאָ֣שׁ בֶּן־אֲחַזְיָ֗הוּ תָּפַ֛שׂ יְהוֹאָ֥שׁ מֶֽלֶךְ־יִשְׂרָאֵ֖ל בְּבֵ֣ית שָׁ֑מֶשׁ ויבאו וַיָּבֹא֙ יְר֣וּשָׁלִַ֔ם וַיִּפְרֹץ֩ בְּחוֹמַ֨ת יְרוּשָׁלִַ֜ם בְּשַׁ֤עַר אֶפְרַ֙יִם֙ עַד־שַׁ֣עַר הַפִּנָּ֔ה אַרְבַּ֥ע מֵא֖וֹת אַמָּֽה׃

‎14 ‏וְלָקַ֣ח אֶת־כָּל־הַזָּהָב־וְ֠הַכֶּסֶף וְאֵ֨ת כָּל־הַכֵּלִ֜ים הַנִּמְצְאִ֣ים בֵּית־יְהוָ֗ה וּבְאֹֽצְרוֹת֙ בֵּ֣ית הַמֶּ֔לֶךְ וְאֵ֖ת בְּנֵ֣י הַתַּֽעֲרֻב֑וֹת וַיָּ֖שָׁב שֹׁמְרֽוֹנָה׃

‎15 ‏וְיֶתֶר֩ דִּבְרֵ֨י יְהוֹאָ֜שׁ אֲשֶׁ֤ר עָשָׂה֙ וּגְב֣וּרָת֔וֹ וַאֲשֶׁ֣ר נִלְחַ֔ם עִ֖ם אֲמַצְיָ֣הוּ מֶֽלֶךְ־יְהוּדָ֑ה הֲלֹא־הֵ֣ם כְּתוּבִ֗ים עַל־סֵ֛פֶר דִּבְרֵ֥י הַיָּמִ֖ים לְמַלְכֵ֥י יִשְׂרָאֵֽל׃

‎16 ‏וַיִּשְׁכַּ֤ב יְהוֹאָשׁ֙ עִם־אֲבֹתָ֔יו וַיִּקָּבֵר֙ בְּשֹׁ֣מְר֔וֹן עִ֖ם מַלְכֵ֣י יִשְׂרָאֵ֑ל וַיִּמְלֹ֛ךְ יָרָבְעָ֥ם בְּנ֖וֹ תַּחְתָּֽיו׃ פ

‎17 ‏וַיְחִ֨י אֲמַצְיָ֤הוּ בֶן־יוֹאָשׁ֙ מֶ֣לֶךְ יְהוּדָ֔ה אַֽחֲרֵ֣י מ֔וֹת יְהוֹאָ֥שׁ בֶּן־יְהֽוֹאָחָ֖ז מֶ֣לֶךְ יִשְׂרָאֵ֑ל חֲמֵ֥שׁ עֶשְׂרֵ֖ה שָׁנָֽה׃

‎18 ‏וְיֶ֖תֶר דִּבְרֵ֣י אֲמַצְיָ֑הוּ הֲלֹא־הֵ֣ם כְּתוּבִ֗ים עַל־סֵ֛פֶר דִּבְרֵ֥י הַיָּמִ֖ים לְמַלְכֵ֥י יְהוּדָֽה׃

‎19 ‏וַיִּקְשְׁר֨וּ עָלָ֥יו קֶ֛שֶׁר בִּירוּשָׁלִַ֖ם וַיָּ֣נָס לָכִ֑ישָׁה וַיִּשְׁלְח֤וּ אַֽחֲרָיו֙ לָכִ֔ישָׁה וַיְמִתֻ֖הוּ שָֽׁם׃

‎20 ‏וַיִּשְׂא֥וּ אֹת֖וֹ עַל־הַסּוּסִ֑ים וַיִּקָּבֵ֧ר בִּירוּשָׁלִַ֛ם עִם־אֲבֹתָ֖יו בְּעִ֥יר דָּוִֽד׃

‎21 ‏וַיִּקְח֞וּ כָּל־עַ֤ם יְהוּדָה֙ אֶת־עֲזַרְיָ֔ה וְה֕וּא בֶּן־שֵׁ֥שׁ עֶשְׂרֵ֖ה שָׁנָ֑ה וַיַּמְלִ֣כוּ אֹת֔וֹ תַּ֖חַת אָבִ֥יו אֲמַצְיָֽהוּ׃

‎22 ‏ה֚וּא בָּנָ֣ה אֶת־אֵילַ֔ת וַיְשִׁבֶ֖הָ לִֽיהוּדָ֑ה אַחֲרֵ֥י שְׁכַֽב־הַמֶּ֖לֶךְ עִם־אֲבֹתָֽיו׃ פ

‎23 ‏בִּשְׁנַת֙ חֲמֵשׁ־עֶשְׂרֵ֣ה³ שָׁנָ֔ה לַאֲמַצְיָ֥הוּ בֶן־יוֹאָ֖שׁ מֶ֣לֶךְ יְהוּדָ֑ה מָ֠לַךְ יָרָבְעָ֨ם בֶּן־יוֹאָ֤שׁ מֶֽלֶךְ־יִשְׂרָאֵל֙ בְּשֹׁ֣מְר֔וֹן אַרְבָּעִ֥ים וְאַחַ֖ת שָׁנָֽה׃

‎24 ‏וַיַּ֥עַשׂ הָרַ֖ע בְּעֵינֵ֣י יְהוָ֑ה לֹ֣א סָ֗ר מִכָּל־חַטֹּאות֙ יָרָבְעָ֣ם בֶּן־נְבָ֔ט אֲשֶׁ֥ר הֶחֱטִ֖יא אֶת־יִשְׂרָאֵֽל׃

‎25 ‏ה֗וּא הֵשִׁיב֙ אֶת־גְּב֣וּל יִשְׂרָאֵ֔ל מִלְּב֥וֹא חֲמָ֖ת עַד־יָ֣ם הָעֲרָבָ֑ה כִּדְבַ֤ר יְהוָה֙ אֱלֹהֵ֣י יִשְׂרָאֵ֔ל אֲשֶׁ֣ר דִּבֶּ֗ר בְּיַד־עַבְדּ֞וֹ יוֹנָ֤ה בֶן־אֲמִתַּי֙ הַנָּבִ֔יא אֲשֶׁ֖ר מִגַּ֥ת הַחֵֽפֶר׃

‎26 ‏כִּי־רָאָ֧ה יְהוָ֛ה אֶת־עֳנִ֥י יִשְׂרָאֵ֖ל מֹרֶ֣ה מְאֹ֑ד וְאֶ֤פֶס עָצוּר֙ וְאֶ֣פֶס עָז֔וּב וְאֵ֥ין עֹזֵ֖ר לְיִשְׂרָאֵֽל׃

‎27 ‏וְלֹא־דִבֶּ֣ר יְהוָ֔ה לִמְחוֹת֙ אֶת־שֵׁ֣ם יִשְׂרָאֵ֔ל מִתַּ֖חַת הַשָּׁמָ֑יִם וַיּ֣וֹשִׁיעֵ֔ם בְּיַ֖ד יָרָבְעָ֥ם בֶּן־יוֹאָֽשׁ׃

‎28 ‏וְיֶתֶר֩ דִּבְרֵ֨י יָרָבְעָ֜ם וְכָל־אֲשֶׁ֤ר עָשָׂה֙ וּגְבוּרָת֣וֹ אֲשֶׁר־נִלְחָ֔ם וַאֲשֶׁ֨ר הֵשִׁ֜יב אֶת־דַּמֶּ֧שֶׂק וְאֶת־חֲמָ֛ת לִיהוּדָ֖ה בְּיִשְׂרָאֵ֑ל הֲלֹא־הֵ֣ם כְּתוּבִ֗ים עַל־סֵ֛פֶר דִּבְרֵ֥י הַיָּמִ֖ים לְמַלְכֵ֥י יִשְׂרָאֵֽל׃

‎29 ‏וַיִּשְׁכַּ֤ב יָֽרָבְעָם֙ עִם־אֲבֹתָ֔יו עִ֖ם מַלְכֵ֣י יִשְׂרָאֵ֑ל וַיִּמְלֹ֛ךְ זְכַרְיָ֥ה בְנ֖וֹ תַּחְתָּֽיו׃ פ

1 bišənaṯ šətayim ləywō’āš ben-ywō’āḥāz meleḵə yiśərā’ēl mālaḵə ’ămaṣəyâû ḇen-ywō’āš meleḵə yəhûḏâ:

2 ben-‘eśərîm wəḥāmēš šānâ hāyâ ḇəmāləḵwō wə‘eśərîm wāṯēš^a‘ šānâ mālaḵə bîrûšālāim wəšēm ’immwō yəhwō‘adîn yəhwō‘adān min-yərûšālāim:

3 wayy^a‘aś hayyāšār bə‘ênê yəhwâ raq lō’ kəḏāwiḏ ’āḇîw kəḵōl ’ăšer-‘āśâ ywō’āš ’āḇîw ‘āśâ:

4 raq habāmwōṯ lō’-sārû ‘wōḏ hā‘ām məzabəḥîm ûməqaṭṭərîm babāmwōṯ:

5 wayəhî ka’ăšer ḥāzəqâ hammaməlāḵâ bəyāḏwō wayyaḵə ’eṯ-‘ăḇāḏāyw hammakîm ’eṯ-hammeleḵə ’āḇîw:

6 wə’eṯ-bənê hammakîm lō’ hēmîṯ kakāṯûḇ bəsēfer twōraṯ-mōšeh ’ăšer-ṣiûâ yəhwâ lē’mōr lō’-yûməṯû ’āḇwōṯ ‘al-bānîm ûḇānîm lō’-yûməṯû ‘al-’āḇwōṯ kî ’im-’îš bəḥeṭə’wō yāmûṯ yûmāṯ:

7 hû’-hikâ ’eṯ-’ĕḏwōm bəḡê’-hammel^aḥ mel^aḥ ‘ăśereṯ ’ălāfîm wəṯāfaś ’eṯ-hassel^a‘ bammiləḥāmâ wayyiqərā’ ’eṯ-šəmāh yāqəṯə’ēl ‘aḏ hayywōm hazzeh: f

8 ’āz šāl^aḥ ’ămaṣəyâ malə’āḵîm ’el-yəhwō’āš ben-yəhwō’āḥāz ben-yēhû’ meleḵə yiśərā’ēl lē’mōr ləḵâ niṯərā’eh fānîm:

9 wayyišəl^aḥ yəhwō’āš meleḵə-yiśərā’ēl ’el-’ămaṣəyâû meleḵə-yəhûḏâ lē’mōr h^aḥwōḥa ’ăšer balləḇānwōn šāl^aḥ ’el-hā’erez ’ăšer balləḇānwōn lē’mōr tənâ-’eṯ-bitəḵā liḇənî lə’iššâ wat^a‘ăḇōr ḥayyaṯ haśśāḏeh ’ăšer balləḇānwōn watirəmōs ’eṯ-h^aḥwōḥa:

10 hakēh hikîṯā ’eṯ-’ĕḏwōm ûnəśā’ăḵā libeḵā hikāḇēḏ wəšēḇ bəḇêṯeḵā wəlāmmâ ṯiṯəgāreh bərā‘â wənāfalətâ ’atâ wîhûḏâ ‘immāḵə:

11 wəlō’-šām^a‘ ’ămaṣəyâû wayy^a‘al yəhwō’āš meleḵə-yiśərā’ēl wayyiṯərā’û fānîm hû’ wa’ămaṣəyâû meleḵə-yəhûḏâ bəḇêṯ šemeš ’ăšer lîhûḏâ:

12 wayyinnāḡef yəhûḏâ lifənê yiśərā’ēl wayyānusû ’îš lə’âŏlwō lə’ōhālāyw:

13 wə’ēṯ ’ămaṣəyâû meleḵə-yəhûḏâ ben-yəhwō’āš ben-’ăḥazəyâû tāfaś yəhwō’āš meleḵə-yiśərā’ēl bəḇêṯ šāmeš wayyāḇō’û wayyāḇō’ yərûšālaim wayyifərōṣ bəḥwōmaṯ yərûšālaim bəš^a‘ar ’efərayim ‘aḏ-š^a‘ar hapinnâ ’arəb^a‘ mē’wōṯ ’ammâ:

14 wəlāq^aḥ ’eṯ-kāl-hazzâāḇ-wəhakesef wə’ēṯ kāl-hakēlîm hanniməṣə’îm bêṯ-yəhwâ ûḇə’ōṣərwōṯ bêṯ hammeleḵə wə’ēṯ bənê hat^a‘ăruḇwōṯ wayyāšāḇ šōmərwōnâ:

15 wəyeṯer diḇərê yəhwō’āš ’ăšer ‘āśâ ûḡəḇûrāṯwō wa’ăšer niləḥam ‘im ’ămaṣəyâû meleḵə-yəhûḏâ hălō’-hēm kəṯûḇîm ‘al-sēfer diḇərê hayyāmîm ləmaləḵê yiśərā’ēl:

16 wayyišəkaḇ yəhwō’āš ‘im-’ăḇōṯāyw wayyiqqāḇēr bəšōmərwōn ‘im maləḵê yiśərā’ēl wayyiməlōḵə yārāḇə‘ām bənwō t^aḥətāyw: f

17 wayəḥî ’ămaṣəyâû ḇen-ywō’āš meleḵə yəhûḏâ ’^aḥărê mwōṯ yəhwō’āš ben-yəhwō’āḥāz meleḵə yiśərā’ēl ḥămēš ‘eśərēh šānâ:

18 wəyeṯer diḇərê ’ămaṣəyâû hălō’-hēm kəṯûḇîm ‘al-sēfer diḇərê hayyāmîm ləmaləḵê yəhûḏâ:

19 wayyiqəšərû ‘ālāyw qešer bîrûšālaim wayyānās lāḵîšâ wayyišələḥû ’^aḥărāyw lāḵîšâ wayəmiṯuhû šām:

20 wayyiśə’û ’ōṯwō ‘al-hassûsîm wayyiqqāḇēr bîrûšālaim ‘im-’ăḇōṯāyw bə‘îr dāwiḏ:

21 wayyiqəḥû kāl-‘am yəhûḏâ ’eṯ-‘ăzarəyâ wəhû’ ben-šēš ‘eśərēh šānâ wayyaməliḵû ’ōṯwō t^aḥaṯ ’āḇîw ’ămaṣəyâû:

22 hû’ bānâ ’eṯ-’êlaṯ wayəšiḇehā lîhûḏâ ’^aḥărê šəḵaḇ-hammeleḵə ‘im-’ăḇōṯāyw: f

23 bišənaṯ ḥămēš-‘eśərēh³ šānâ la’ămaṣəyâû ḇen-ywō’āš meleḵə yəhûḏâ mālaḵə yārāḇə‘ām ben-ywō’āš meleḵə-yiśərā’ēl bəšōmərwōn ’arəbā‘îm wə’^aḥaṯ šānâ:

24 wayy^a‘aś hār^a‘ bə‘ênê yəhwâ lō’ sār mikāl-ḥaṭṭō’wṯ yārāḇə‘ām ben-nəḇāṭ ’ăšer heḥĕṭî’ ’eṯ-yiśərā’ēl:

25 hû’ hēšîḇ ’eṯ-gəḇûl yiśərā’ēl milləḇwō’ ḥămāṯ ‘aḏ-yām hā‘ărāḇâ kiḏəḇar yəhwâ ’ĕlōhê yiśərā’ēl ’ăšer diber bəyaḏ-‘aḇədwō ywōnâ ḇen-’ămitay hannāḇî’ ’ăšer migaṯ h^aḥēfer:

26 kî-rā’â yəhwâ ’eṯ-‘ŏnî yiśərā’ēl mōreh mə’ōḏ wə’efes ‘āṣûr wə’efes ‘āzûḇ wə’ên ‘ōzēr ləyiśərā’ēl:

27 wəlō’-ḏiber yəhwâ liməḥwōṯ ’eṯ-šēm yiśərā’ēl mit^aḥaṯ haššāmāyim wayywōšî‘ēm bəyaḏ yārāḇə‘ām ben-ywō’āš:

28 wəyeṯer diḇərê yārāḇə‘ām wəḵāl-’ăšer ‘āśâ ûḡəḇûrāṯwō ’ăšer-niləḥām wa’ăšer hēšîḇ ’eṯ-dammeśeq wə’eṯ-ḥămāṯ lîhûḏâ bəyiśərā’ēl hălō’-hēm kəṯûḇîm ‘al-sēfer diḇərê hayyāmîm ləmaləḵê yiśərā’ēl:

29 wayyišəkaḇ yārāḇə‘ām ‘im-’ăḇōṯāyw ‘im maləḵê yiśərā’ēl wayyiməlōḵə zəḵarəyâ ḇənwō t^aḥətāyw: f