Lamentations (Eichah) Chapter 2

‎1 ‏אֵיכָה֩ יָעִ֨יב בְּאַפּ֤וֹ׀ אֲדֹנָי֙ אֶת־בַּת־צִיּ֔וֹן הִשְׁלִ֤יךְ מִשָּׁמַ֙יִם֙ אֶ֔רֶץ תִּפְאֶ֖רֶת יִשְׂרָאֵ֑ל וְלֹא־זָכַ֥ר הֲדֹם־רַגְלָ֖יו בְּי֥וֹם אַפּֽוֹ׃ ס

‎2 ‏בִּלַּ֨ע אֲדֹנָ֜י לא וְלֹ֣א חָמַ֗ל אֵ֚ת כָּל־נְא֣וֹת יַעֲקֹ֔ב הָרַ֧ס בְּעֶבְרָת֛וֹ מִבְצְרֵ֥י בַת־יְהוּדָ֖ה הִגִּ֣יעַ לָאָ֑רֶץ חִלֵּ֥ל מַמְלָכָ֖ה וְשָׂרֶֽיהָ׃ ס

‎3 ‏גָּדַ֣ע בָּֽחֳרִי־אַ֗ף כֹּ֚ל קֶ֣רֶן יִשְׂרָאֵ֔ל הֵשִׁ֥יב אָח֛וֹר יְמִינ֖וֹ מִפְּנֵ֣י אוֹיֵ֑ב וַיִּבְעַ֤ר בְּיַעֲקֹב֙ כְּאֵ֣שׁ לֶֽהָבָ֔ה אָכְלָ֖ה סָבִֽיב׃ ס

‎4 ‏דָּרַ֨ךְ קַשְׁתּ֜וֹ כְּאוֹיֵ֗ב נִצָּ֤ב יְמִינוֹ֙ כְּצָ֔ר וַֽיַּהֲרֹ֔ג כֹּ֖ל מַחֲמַדֵּי־עָ֑יִן בְּאֹ֙הֶל֙ בַּת־צִיּ֔וֹן שָׁפַ֥ךְ כָּאֵ֖שׁ חֲמָתֽוֹ׃ ס

‎5 ‏הָיָ֨ה אֲדֹנָ֤י׀ כְּאוֹיֵב֙ בִּלַּ֣ע יִשְׂרָאֵ֔ל בִּלַּע֙ כָּל־אַרְמְנוֹתֶ֔יהָ שִׁחֵ֖ת מִבְצָרָ֑יו וַיֶּ֙רֶב֙ בְּבַת־יְהוּדָ֔ה תַּאֲנִיָּ֖ה וַאֲנִיָּֽה׃ ס

‎6 ‏וַיַּחְמֹ֤ס כַּגַּן֙ שֻׂכּ֔וֹ שִׁחֵ֖ת מוֹעֲד֑וֹ שִׁכַּ֨ח יְהוָ֤ה׀ בְּצִיּוֹן֙ מוֹעֵ֣ד וְשַׁבָּ֔ת וַיִּנְאַ֥ץ בְּזַֽעַם־אַפּ֖וֹ מֶ֥לֶךְ וְכֹהֵֽן׃ ס

‎7 ‏זָנַ֨ח אֲדֹנָ֤י׀ מִזְבְּחוֹ֙ נִאֵ֣ר מִקְדָּשׁ֔וֹ הִסְגִּיר֙ בְּיַד־אוֹיֵ֔ב חוֹמֹ֖ת אַרְמְנוֹתֶ֑יהָ ק֛וֹל נָתְנ֥וּ בְּבֵית־יְהוָ֖ה כְּי֥וֹם מוֹעֵֽד׃ ס

‎8 ‏חָשַׁ֨ב יְהוָ֤ה׀ לְהַשְׁחִית֙ חוֹמַ֣ת בַּת־צִיּ֔וֹן נָ֣טָה קָ֔ו לֹא־הֵשִׁ֥יב יָד֖וֹ מִבַּלֵּ֑עַ וַיַּֽאֲבֶל־חֵ֥ל וְחוֹמָ֖ה יַחְדָּ֥ו אֻמְלָֽלוּ׃ ס

‎9 ‏טָבְע֤וּ בָאָ֙רֶץ֙ שְׁעָרֶ֔יהָ אִבַּ֥ד וְשִׁבַּ֖ר בְּרִיחֶ֑יהָ מַלְכָּ֨הּ וְשָׂרֶ֤יהָ בַגּוֹיִם֙ אֵ֣ין תּוֹרָ֔ה גַּם־נְבִיאֶ֕יהָ לֹא־מָצְא֥וּ חָז֖וֹן מֵיְהוָֽה׃ ס

‎10 ‏יֵשְׁב֨וּ לָאָ֤רֶץ יִדְּמוּ֙ זִקְנֵ֣י בַת־צִיּ֔וֹן הֶֽעֱל֤וּ עָפָר֙ עַל־רֹאשָׁ֔ם חָגְר֖וּ שַׂקִּ֑ים הוֹרִ֤ידוּ לָאָ֙רֶץ֙ רֹאשָׁ֔ן בְּתוּלֹ֖ת יְרוּשָׁלִָֽם׃ ס

‎11 ‏כָּל֨וּ בַדְּמָע֤וֹת עֵינַי֙ חֳמַרְמְר֣וּ מֵעַ֔י נִשְׁפַּ֤ךְ לָאָ֙רֶץ֙ כְּבֵדִ֔י עַל־שֶׁ֖בֶר בַּת־עַמִּ֑י בֵּֽעָטֵ֤ף עוֹלֵל֙ וְיוֹנֵ֔ק בִּרְחֹב֖וֹת קִרְיָֽה׃ ס

‎12 ‏לְאִמֹּתָם֙ יֹֽאמְר֔וּ אַיֵּ֖ה דָּגָ֣ן וָיָ֑יִן בְּהִֽתְעַטְּפָ֤ם כֶּֽחָלָל֙ בִּרְחֹב֣וֹת עִ֔יר בְּהִשְׁתַּפֵּ֣ךְ נַפְשָׁ֔ם אֶל־חֵ֖יק אִמֹּתָֽם׃ ס

‎13 ‏מָֽה־אֲעִידֵ֞ךְ מָ֣ה אֲדַמֶּה־לָּ֗ךְ הַבַּת֙ יְר֣וּשָׁלִַ֔ם מָ֤ה אַשְׁוֶה־לָּךְ֙ וַאֲנַֽחֲמֵ֔ךְ בְּתוּלַ֖ת בַּת־צִיּ֑וֹן כִּֽי־גָד֥וֹל כַּיָּ֛ם שִׁבְרֵ֖ךְ מִ֥י יִרְפָּא־לָֽךְ׃ ס

‎14 ‏נְבִיאַ֗יִךְ חָ֤זוּ לָךְ֙ שָׁ֣וְא וְתָפֵ֔ל וְלֹֽא־גִלּ֥וּ עַל־עֲוֹנֵ֖ךְ לְהָשִׁ֣יב שביתך שְׁבוּתֵ֑ךְ וַיֶּ֣חֱזוּ לָ֔ךְ מַשְׂא֥וֹת שָׁ֖וְא וּמַדּוּחִֽים׃ ס

‎15 ‏סָֽפְק֨וּ עָלַ֤יִךְ כַּפַּ֙יִם֙ כָּל־עֹ֣בְרֵי דֶ֔רֶךְ שָֽׁרְקוּ֙ וַיָּנִ֣עוּ רֹאשָׁ֔ם עַל־בַּ֖ת יְרוּשָׁלִָ֑ם הֲזֹ֣את הָעִ֗יר שֶׁיֹּֽאמְרוּ֙ כְּלִ֣ילַת יֹ֔פִי מָשׂ֖וֹשׂ³ לְכָל־הָאָֽרֶץ׃ ס

‎16 ‏פָּצ֨וּ עָלַ֤יִךְ פִּיהֶם֙ כָּל־א֣וֹיְבַ֔יִךְ שָֽׁרְקוּ֙ וַיַּֽחַרְקוּ־שֵׁ֔ן אָמְר֖וּ בִּלָּ֑עְנוּ אַ֣ךְ זֶ֥ה הַיּ֛וֹם שֶׁקִּוִּינֻ֖הוּ מָצָ֥אנוּ רָאִֽינוּ׃ ס

‎17 ‏עָשָׂ֨ה יְהוָ֜ה אֲשֶׁ֣ר זָמָ֗ם בִּצַּ֤ע אֶמְרָתוֹ֙ אֲשֶׁ֣ר צִוָּ֣ה מִֽימֵי־קֶ֔דֶם הָרַ֖ס וְלֹ֣א חָמָ֑ל וַיְשַׂמַּ֤ח עָלַ֙יִךְ֙ אוֹיֵ֔ב הֵרִ֖ים קֶ֥רֶן צָרָֽיִךְ׃ ס

‎18 ‏צָעַ֥ק לִבָּ֖ם אֶל־אֲדֹנָ֑י חוֹמַ֣ת בַּת־צִ֠יּוֹן הוֹרִ֨ידִי כַנַּ֤חַל דִּמְעָה֙ יוֹמָ֣ם וָלַ֔יְלָה אַֽל־תִּתְּנִ֤י פוּגַת֙ לָ֔ךְ אַל־תִּדֹּ֖ם בַּת־עֵינֵֽךְ׃ ס

‎19 ‏ק֣וּמִי׀ רֹ֣נִּי בליל בַלַּ֗יְלָה³ לְרֹאשׁ֙ אַשְׁמֻר֔וֹת שִׁפְכִ֤י כַמַּ֙יִם֙ לִבֵּ֔ךְ נֹ֖כַח פְּנֵ֣י אֲדֹנָ֑י שְׂאִ֧י אֵלָ֣יו כַּפַּ֗יִךְ עַל־נֶ֙פֶשׁ֙ עֽוֹלָלַ֔יִךְ הָעֲטוּפִ֥ים בְּרָעָ֖ב בְּרֹ֥אשׁ כָּל־חוּצֽוֹת׃ ס

‎20 ‏רְאֵ֤ה יְהוָה֙ וְֽהַבִּ֔יטָה לְמִ֖י עוֹלַ֣לְתָּ כֹּ֑ה אִם־תֹּאכַ֨לְנָה נָשִׁ֤ים פִּרְיָם֙ עֹלֲלֵ֣י טִפֻּחִ֔ים אִם־יֵהָרֵ֛ג בְּמִקְדַּ֥שׁ אֲדֹנָ֖י כֹּהֵ֥ן וְנָבִֽיא׃ ס

‎21 ‏שָׁכְב֨וּ לָאָ֤רֶץ חוּצוֹת֙ נַ֣עַר וְזָקֵ֔ן בְּתוּלֹתַ֥י וּבַחוּרַ֖י נָפְל֣וּ בֶחָ֑רֶב הָרַ֙גְתָּ֙ בְּי֣וֹם אַפֶּ֔ךָ טָבַ֖חְתָּ לֹ֥א חָמָֽלְתָּ׃ ס

‎22 ‏תִּקְרָא֩ כְי֨וֹם מוֹעֵ֤ד מְגוּרַי֙ מִסָּבִ֔יב וְלֹ֥א הָיָ֛ה בְּי֥וֹם אַף־יְהוָ֖ה פָּלִ֣יט וְשָׂרִ֑יד אֲשֶׁר־טִפַּ֥חְתִּי וְרִבִּ֖יתִי אֹיְבִ֥י כִלָּֽם׃ פ

1 ’êḵâ yā‘îḇ bə’apwō| ’ăḏōnāy ’eṯ-baṯ-ṣîywōn hišəlîḵə miššāmayim ’ereṣ tifə’ereṯ yiśərā’ēl wəlō’-zāḵar hăḏōm-raḡəlāyw bəywōm ’apwō: s

2 bill^a‘ ’ăḏōnāy lō’ wəlō’ ḥāmal ’ēṯ kāl-nə’wōṯ y^a‘ăqōḇ hāras bə‘eḇərāṯwō miḇəṣərê ḇaṯ-yəhûḏâ higî‘a lā’āreṣ ḥillēl maməlāḵâ wəśāreyhā: s

3 gāḏ^a‘ bāḥŏrî-’af kōl qeren yiśərā’ēl hēšîḇ ’āḥwōr yəmînwō mipənê ’wōyēḇ wayyiḇə‘ar bəy^a‘ăqōḇ kə’ēš lehāḇâ ’āḵəlâ sāḇîḇ: s

4 dāraḵə qašətwō kə’wōyēḇ niṣṣāḇ yəmînwō kəṣār wayyahărōḡ kōl m^aḥămadê-‘āyin bə’ōhel baṯ-ṣîywōn šāfaḵə kā’ēš ḥămāṯwō: s

5 hāyâ ’ăḏōnāy| kə’wōyēḇ bill^a‘ yiśərā’ēl bill^a‘ kāl-’arəmənwōṯeyhā šiḥēṯ miḇəṣārāyw wayyereḇ bəḇaṯ-yəhûḏâ ta’ănîyâ wa’ănîyâ: s

6 wayy^aḥəmōs kagan śukwō šiḥēṯ mwō‘ăḏwō šik^aḥ yəhwâ| bəṣîywōn mwō‘ēḏ wəšabāṯ wayyinə’aṣ bəz^a‘am-’apwō meleḵə wəḵōhēn: s

7 zān^aḥ ’ăḏōnāy| mizəbəḥwō ni’ēr miqədāšwō hisəgîr bəyaḏ-’wōyēḇ ḥwōmōṯ ’arəmənwōṯeyhā qwōl nāṯənû bəḇêṯ-yəhwâ kəywōm mwō‘ēḏ: s

8 ḥāšaḇ yəhwâ| ləhašəḥîṯ ḥwōmaṯ baṯ-ṣîywōn nāṭâ qāw lō’-hēšîḇ yāḏwō miballē‘a wayya’ăḇel-ḥēl wəḥwōmâ y^aḥədāw ’uməlālû: s

9 ṭāḇə‘û ḇā’āreṣ šə‘āreyhā ’ibaḏ wəšibar bərîḥeyhā maləkāh wəśāreyhā ḇagwōyim ’ên twōrâ gam-nəḇî’eyhā lō’-māṣə’û ḥāzwōn mêəhwâ: s

10 yēšəḇû lā’āreṣ yidəmû ziqənê ḇaṯ-ṣîywōn he‘ĕlû ‘āfār ‘al-rō’šām ḥāḡərû śaqqîm hwōrîḏû lā’āreṣ rō’šān bəṯûlōṯ yərûšālāim: s

11 kālû ḇadəmā‘wōṯ ‘ênay ḥŏmarəmərû mē‘ay nišəpaḵə lā’āreṣ kəḇēḏî ‘al-šeḇer baṯ-‘ammî bē‘āṭēf ‘wōlēl wəywōnēq birəḥōḇwōṯ qirəyâ: s

12 lə’immōṯām yō’mərû ’ayyēh dāḡān wāyāyin bəhiṯə‘aṭṭəfām keḥālāl birəḥōḇwōṯ ‘îr bəhišətapēḵə nafəšām ’el-ḥêq ’immōṯām: s

13 mâ-’ă‘îḏēḵə mâ ’ăḏammeh-llāḵə habaṯ yərûšālaim mâ ’ašəweh-llāḵə wa’ăn^aḥămēḵə bəṯûlaṯ baṯ-ṣîywōn kî-ḡāḏwōl kayyām šiḇərēḵə mî yirəpā’-lāḵə: s

14 nəḇî’ayiḵə ḥāzû lāḵə šāwə’ wəṯāfēl wəlō’-ḡillû ‘al-‘ăwōnēḵə ləhāšîḇ šəḇîṯēḵə šəḇûṯēḵə wayyeḥĕzû lāḵə maśə’wōṯ šāwə’ ûmadûḥîm: s

15 sāfəqû ‘ālayiḵə kapayim kāl-‘ōḇərê ḏereḵə šārəqû wayyāni‘û rō’šām ‘al-baṯ yərûšālāim hăzō’ṯ hā‘îr šeyyō’mərû kəlîlaṯ yōfî māśwōś³ ləḵāl-hā’āreṣ: s

16 pāṣû ‘ālayiḵə pîhem kāl-’wōyəḇayiḵə šārəqû wayy^aḥarəqû-šēn ’āmərû billā‘ənû ’aḵə zeh hayywōm šeqqiûînuhû māṣā’nû rā’înû: s

17 ‘āśâ yəhwâ ’ăšer zāmām biṣṣ^a‘ ’emərāṯwō ’ăšer ṣiûâ mîmê-qeḏem hāras wəlō’ ḥāmāl wayəśamm^aḥ ‘ālayiḵə ’wōyēḇ hērîm qeren ṣārāyiḵə: s

18 ṣā‘aq libām ’el-’ăḏōnāy ḥwōmaṯ baṯ-ṣîywōn hwōrîḏî ḵann^aḥal dimə‘â ywōmām wālayəlâ ’al-titənî fûḡaṯ lāḵə ’al-tidōm baṯ-‘ênēḵə: s

19 qûmî| rōnnî ḇallayil ḇallayəlâ³ lərō’š ’ašəmurwōṯ šifəḵî ḵammayim libēḵə nōḵ^aḥ pənê ’ăḏōnāy śə’î ’ēlāyw kapayiḵə ‘al-nefeš ‘wōlālayiḵə hā‘ăṭûfîm bərā‘āḇ bərō’š kāl-ḥûṣwōṯ: s

20 rə’ēh yəhwâ wəhabîṭâ ləmî ‘wōlalətā kōh ’im-tō’ḵalənâ nāšîm pirəyām ‘ōlălê ṭipuḥîm ’im-yēhārēḡ bəmiqədaš ’ăḏōnāy kōhēn wənāḇî’: s

21 šāḵəḇû lā’āreṣ ḥûṣwōṯ n^a‘ar wəzāqēn bəṯûlōṯay ûḇ^aḥûray nāfəlû ḇeḥāreḇ hāraḡətā bəywōm ’apeḵā ṭāḇ^aḥətā lō’ ḥāmālətā: s

22 tiqərā’ ḵəywōm mwō‘ēḏ məḡûray missāḇîḇ wəlō’ hāyâ bəywōm ’af-yəhwâ pālîṭ wəśārîḏ ’ăšer-ṭip^aḥətî wəribîṯî ’ōyəḇî ḵillām: f