Leviticus (Vayikra) Chapter 3

‎1 ‏וְאִם־זֶ֥בַח שְׁלָמִ֖ים קָרְבָּנ֑וֹ אִ֤ם מִן־הַבָּקָר֙ ה֣וּא מַקְרִ֔יב אִם־זָכָר֙ אִם־נְקֵבָ֔ה תָּמִ֥ים יַקְרִיבֶ֖נּוּ לִפְנֵ֥י יְהוָֽה׃

‎2 ‏וְסָמַ֤ךְ יָדוֹ֙ עַל־רֹ֣אשׁ קָרְבָּנ֔וֹ וּשְׁחָט֕וֹ פֶּ֖תַח אֹ֣הֶל מוֹעֵ֑ד וְזָרְק֡וּ בְּנֵי֩ אַהֲרֹ֨ן הַכֹּהֲנִ֧ים אֶת־הַדָּ֛ם עַל־הַמִּזְבֵּ֖חַ סָבִֽיב׃

‎3 ‏וְהִקְרִיב֙ מִזֶּ֣בַח הַשְּׁלָמִ֔ים אִשֶּׁ֖ה לַיהוָ֑ה אֶת־הַחֵ֙לֶב֙ הַֽמְכַסֶּ֣ה אֶת־הַקֶּ֔רֶב וְאֵת֙ כָּל־הַחֵ֔לֶב אֲשֶׁ֖ר עַל־הַקֶּֽרֶב׃

‎4 ‏וְאֵת֙ שְׁתֵּ֣י הַכְּלָיֹ֔ת וְאֶת־הַחֵ֙לֶב֙ אֲשֶׁ֣ר עֲלֵהֶ֔ן אֲשֶׁ֖ר עַל־הַכְּסָלִ֑ים וְאֶת־הַיֹּתֶ֙רֶת֙ עַל־הַכָּבֵ֔ד עַל־הַכְּלָי֖וֹת יְסִירֶֽנָּה׃

‎5 ‏וְהִקְטִ֨ירוּ אֹת֤וֹ בְנֵֽי־אַהֲרֹן֙ הַמִּזְבֵּ֔חָה עַל־הָ֣עֹלָ֔ה אֲשֶׁ֥ר עַל־הָעֵצִ֖ים אֲשֶׁ֣ר עַל־הָאֵ֑שׁ אִשֵּׁ֛ה רֵ֥יחַ נִיחֹ֖חַ לַֽיהוָֽה׃ פ

‎6 ‏וְאִם־מִן־הַצֹּ֧אן קָרְבָּנ֛וֹ לְזֶ֥בַח שְׁלָמִ֖ים לַיהוָ֑ה זָכָר֙ א֣וֹ נְקֵבָ֔ה תָּמִ֖ים יַקְרִיבֶֽנּוּ׃

‎7 ‏אִם־כֶּ֥שֶׂב הֽוּא־מַקְרִ֖יב אֶת־קָרְבָּנ֑וֹ וְהִקְרִ֥יב אֹת֖וֹ לִפְנֵ֥י יְהוָֽה׃

‎8 ‏וְסָמַ֤ךְ אֶת־יָדוֹ֙ עַל־רֹ֣אשׁ קָרְבָּנ֔וֹ וְשָׁחַ֣ט אֹת֔וֹ לִפְנֵ֖י אֹ֣הֶל מוֹעֵ֑ד וְ֠זָרְקוּ בְּנֵ֨י אַהֲרֹ֧ן אֶת־דָּמ֛וֹ עַל־הַמִּזְבֵּ֖חַ סָבִֽיב׃

‎9 ‏וְהִקְרִ֨יב מִזֶּ֣בַח הַשְּׁלָמִים֮ אִשֶּׁ֣ה לַיהוָה֒ חֶלְבּוֹ֙ הָאַלְיָ֣ה תְמִימָ֔ה לְעֻמַּ֥ת הֶעָצֶ֖ה יְסִירֶ֑נָּה וְאֶת־הַחֵ֙לֶב֙ הַֽמְכַסֶּ֣ה אֶת־הַקֶּ֔רֶב וְאֵת֙ כָּל־הַחֵ֔לֶב אֲשֶׁ֖ר עַל־הַקֶּֽרֶב׃

‎10 ‏וְאֵת֙ שְׁתֵּ֣י הַכְּלָיֹ֔ת וְאֶת־הַחֵ֙לֶב֙ אֲשֶׁ֣ר עֲלֵהֶ֔ן אֲשֶׁ֖ר עַל־הַכְּסָלִ֑ים וְאֶת־הַיֹּתֶ֙רֶת֙ עַל־הַכָּבֵ֔ד עַל־הַכְּלָיֹ֖ת יְסִירֶֽנָּה׃

‎11 ‏וְהִקְטִיר֥וֹ הַכֹּהֵ֖ן הַמִּזְבֵּ֑חָה לֶ֥חֶם אִשֶּׁ֖ה לַיהוָֽה׃ פ

‎12 ‏וְאִ֥ם³ עֵ֖ז קָרְבָּנ֑וֹ וְהִקְרִיב֖וֹ לִפְנֵ֥י יְהוָֽה׃

‎13 ‏וְסָמַ֤ךְ אֶת־יָדוֹ֙ עַל־רֹאשׁ֔וֹ וְשָׁחַ֣ט אֹת֔וֹ לִפְנֵ֖י אֹ֣הֶל מוֹעֵ֑ד וְ֠זָרְקוּ בְּנֵ֨י אַהֲרֹ֧ן אֶת־דָּמ֛וֹ עַל־הַמִּזְבֵּ֖חַ סָבִֽיב׃

‎14 ‏וְהִקְרִ֤יב מִמֶּ֙נּוּ֙ קָרְבָּנ֔וֹ אִשֶּׁ֖ה לַֽיהוָ֑ה אֶת־הַחֵ֙לֶב֙ הַֽמְכַסֶּ֣ה אֶת־הַקֶּ֔רֶב וְאֵת֙ כָּל־הַחֵ֔לֶב אֲשֶׁ֖ר עַל־הַקֶּֽרֶב׃

‎15 ‏וְאֵת֙ שְׁתֵּ֣י הַכְּלָיֹ֔ת וְאֶת־הַחֵ֙לֶב֙ אֲשֶׁ֣ר עֲלֵהֶ֔ן אֲשֶׁ֖ר עַל־הַכְּסָלִ֑ים וְאֶת־הַיֹּתֶ֙רֶת֙ עַל־הַכָּבֵ֔ד עַל־הַכְּלָיֹ֖ת יְסִירֶֽנָּה׃

‎16 ‏וְהִקְטִירָ֥ם הַכֹּהֵ֖ן הַמִּזְבֵּ֑חָה לֶ֤חֶם אִשֶּׁה֙ לְרֵ֣יחַ נִיחֹ֔חַ כָּל־חֵ֖לֶב לַיהוָֽה׃

‎17 ‏חֻקַּ֤ת עוֹלָם֙ לְדֹרֹ֣תֵיכֶ֔ם בְּכֹ֖ל מֽוֹשְׁבֹתֵיכֶ֑ם כָּל־חֵ֥לֶב וְכָל־דָּ֖ם לֹ֥א תֹאכֵֽלוּ׃ פ

1 wə’im-zeḇ^aḥ šəlāmîm qārəbānwō ’im min-habāqār hû’ maqərîḇ ’im-zāḵār ’im-nəqēḇâ tāmîm yaqərîḇennû lifənê yəhwâ:

2 wəsāmaḵə yāḏwō ‘al-rō’š qārəbānwō ûšəḥāṭwō peṯ^aḥ ’ōhel mwō‘ēḏ wəzārəqû bənê ’ahărōn hakōhănîm ’eṯ-hadām ‘al-hammizəbēḥa sāḇîḇ:

3 wəhiqərîḇ mizzeḇ^aḥ haššəlāmîm ’iššeh layhwâ ’eṯ-h^aḥēleḇ haməḵasseh ’eṯ-haqqereḇ wə’ēṯ kāl-h^aḥēleḇ ’ăšer ‘al-haqqereḇ:

4 wə’ēṯ šətê hakəlāyōṯ wə’eṯ-h^aḥēleḇ ’ăšer ‘ălēhen ’ăšer ‘al-hakəsālîm wə’eṯ-hayyōṯereṯ ‘al-hakāḇēḏ ‘al-hakəlāywōṯ yəsîrennâ:

5 wəhiqəṭîrû ’ōṯwō ḇənê-’ahărōn hammizəbēḥâ ‘al-hā‘ōlâ ’ăšer ‘al-hā‘ēṣîm ’ăšer ‘al-hā’ēš ’iššēh rêḥa nîḥōḥa layhwâ: f

6 wə’im-min-haṣṣō’n qārəbānwō ləzeḇ^aḥ šəlāmîm layhwâ zāḵār ’wō nəqēḇâ tāmîm yaqərîḇennû:

7 ’im-keśeḇ hû’-maqərîḇ ’eṯ-qārəbānwō wəhiqərîḇ ’ōṯwō lifənê yəhwâ:

8 wəsāmaḵə ’eṯ-yāḏwō ‘al-rō’š qārəbānwō wəšāḥaṭ ’ōṯwō lifənê ’ōhel mwō‘ēḏ wəzārəqû bənê ’ahărōn ’eṯ-dāmwō ‘al-hammizəbēḥa sāḇîḇ:

9 wəhiqərîḇ mizzeḇ^aḥ haššəlāmîm ’iššeh layhwâ ḥeləbwō hā’aləyâ ṯəmîmâ lə‘ummaṯ he‘āṣeh yəsîrennâ wə’eṯ-h^aḥēleḇ haməḵasseh ’eṯ-haqqereḇ wə’ēṯ kāl-h^aḥēleḇ ’ăšer ‘al-haqqereḇ:

10 wə’ēṯ šətê hakəlāyōṯ wə’eṯ-h^aḥēleḇ ’ăšer ‘ălēhen ’ăšer ‘al-hakəsālîm wə’eṯ-hayyōṯereṯ ‘al-hakāḇēḏ ‘al-hakəlāyōṯ yəsîrennâ:

11 wəhiqəṭîrwō hakōhēn hammizəbēḥâ leḥem ’iššeh layhwâ: f

12 wə’im³ ‘ēz qārəbānwō wəhiqərîḇwō lifənê yəhwâ:

13 wəsāmaḵə ’eṯ-yāḏwō ‘al-rō’šwō wəšāḥaṭ ’ōṯwō lifənê ’ōhel mwō‘ēḏ wəzārəqû bənê ’ahărōn ’eṯ-dāmwō ‘al-hammizəbēḥa sāḇîḇ:

14 wəhiqərîḇ mimmennû qārəbānwō ’iššeh layhwâ ’eṯ-h^aḥēleḇ haməḵasseh ’eṯ-haqqereḇ wə’ēṯ kāl-h^aḥēleḇ ’ăšer ‘al-haqqereḇ:

15 wə’ēṯ šətê hakəlāyōṯ wə’eṯ-h^aḥēleḇ ’ăšer ‘ălēhen ’ăšer ‘al-hakəsālîm wə’eṯ-hayyōṯereṯ ‘al-hakāḇēḏ ‘al-hakəlāyōṯ yəsîrennâ:

16 wəhiqəṭîrām hakōhēn hammizəbēḥâ leḥem ’iššeh lərêḥa nîḥōḥa kāl-ḥēleḇ layhwâ:

17 ḥuqqaṯ ‘wōlām ləḏōrōṯêḵem bəḵōl mwōšəḇōṯêḵem kāl-ḥēleḇ wəḵāl-dām lō’ ṯō’ḵēlû: f