Leviticus (Vayikra) Chapter 6

‎1 ‏וַיְדַבֵּ֥ר יְהוָ֖ה אֶל־מֹשֶׁ֥ה לֵּאמֹֽר׃

‎2 ‏צַ֤ו אֶֽת־אַהֲרֹן֙ וְאֶת־בָּנָ֣יו לֵאמֹ֔ר זֹ֥את תּוֹרַ֖ת הָעֹלָ֑ה הִ֣וא הָעֹלָ֡ה עַל֩ מוֹקְדָ֨ה עַל־הַמִּזְבֵּ֤חַ כָּל־הַלַּ֙יְלָה֙ עַד־הַבֹּ֔קֶר וְאֵ֥שׁ הַמִּזְבֵּ֖חַ תּ֥וּקַד בּֽוֹ׃

‎3 ‏וְלָבַ֨שׁ הַכֹּהֵ֜ן מִדּ֣וֹ בַ֗ד וּמִֽכְנְסֵי־בַד֮ יִלְבַּ֣שׁ עַל־בְּשָׂרוֹ֒ וְהֵרִ֣ים אֶת־הַדֶּ֗שֶׁן אֲשֶׁ֨ר תֹּאכַ֥ל הָאֵ֛שׁ אֶת־הָעֹלָ֖ה עַל־הַמִּזְבֵּ֑חַ וְשָׂמ֕וֹ אֵ֖צֶל הַמִּזְבֵּֽחַ׃

‎4 ‏וּפָשַׁט֙ אֶת־בְּגָדָ֔יו וְלָבַ֖שׁ בְּגָדִ֣ים אֲחֵרִ֑ים וְהוֹצִ֤יא אֶת־הַדֶּ֙שֶׁן֙ אֶל־מִח֣וּץ לַֽמַּחֲנֶ֔ה אֶל־מָק֖וֹם טָהֽוֹר׃

‎5 ‏וְהָאֵ֨שׁ עַל־הַמִּזְבֵּ֤חַ תּֽוּקַד־בּוֹ֙ לֹ֣א תִכְבֶּ֔ה וּבִעֵ֨ר עָלֶ֧יהָ הַכֹּהֵ֛ן עֵצִ֖ים בַּבֹּ֣קֶר בַּבֹּ֑קֶר וְעָרַ֤ךְ עָלֶ֙יהָ֙ הָֽעֹלָ֔ה וְהִקְטִ֥יר עָלֶ֖יהָ חֶלְבֵ֥י הַשְּׁלָמִֽים׃

‎6 ‏אֵ֗שׁ תָּמִ֛יד תּוּקַ֥ד עַל־הַמִּזְבֵּ֖חַ לֹ֥א תִכְבֶֽה׃¹ ס

‎7 ‏וְזֹ֥את תּוֹרַ֖ת הַמִּנְחָ֑ה הַקְרֵ֨ב אֹתָ֤הּ בְּנֵֽי־אַהֲרֹן֙ לִפְנֵ֣י יְהוָ֔ה אֶל־פְּנֵ֖י הַמִּזְבֵּֽחַ׃

‎8 ‏וְהֵרִ֨ים מִמֶּ֜נּוּ בְּקֻמְצ֗וֹ מִסֹּ֤לֶת הַמִּנְחָה֙ וּמִשַּׁמְנָ֔הּ וְאֵת֙ כָּל־הַלְּבֹנָ֔ה אֲשֶׁ֖ר עַל־הַמִּנְחָ֑ה וְהִקְטִ֣יר הַמִּזְבֵּ֗חַ רֵ֧יחַ נִיחֹ֛חַ אַזְכָּרָתָ֖הּ לַיהוָֽה׃

‎9 ‏וְהַנּוֹתֶ֣רֶת מִמֶּ֔נָּה יֹאכְל֖וּ אַהֲרֹ֣ן וּבָנָ֑יו מַצּ֤וֹת תֵּֽאָכֵל֙ בְּמָק֣וֹם קָדֹ֔שׁ בַּחֲצַ֥ר אֹֽהֶל־מוֹעֵ֖ד יֹאכְלֽוּהָ׃

‎10 ‏לֹ֤א תֵאָפֶה֙ חָמֵ֔ץ חֶלְקָ֛ם נָתַ֥תִּי אֹתָ֖הּ מֵאִשָּׁ֑י קֹ֤דֶשׁ קָֽדָשִׁים֙ הִ֔וא כַּחַטָּ֖את וְכָאָשָֽׁם׃

‎11 ‏כָּל־זָכָ֞ר בִּבְנֵ֤י אַהֲרֹן֙ יֹֽאכֲלֶ֔נָּה³ חָק־עוֹלָם֙ לְדֹרֹ֣תֵיכֶ֔ם מֵאִשֵּׁ֖י יְהוָ֑ה כֹּ֛ל³ אֲשֶׁר־יִגַּ֥ע בָּהֶ֖ם יִקְדָּֽשׁ׃ פ

‎12 ‏וַיְדַבֵּ֥ר יְהוָ֖ה אֶל־מֹשֶׁ֥ה לֵּאמֹֽר׃

‎13 ‏זֶ֡ה קָרְבַּן֩ אַהֲרֹ֨ן וּבָנָ֜יו אֲשֶׁר־יַקְרִ֣יבוּ לַֽיהוָ֗ה בְּיוֹם֙ הִמָּשַׁ֣ח אֹת֔וֹ עֲשִׂירִ֨ת הָאֵפָ֥ה סֹ֛לֶת מִנְחָ֖ה תָּמִ֑יד מַחֲצִיתָ֣הּ בַּבֹּ֔קֶר וּמַחֲצִיתָ֖הּ בָּעָֽרֶב׃

‎14 ‏עַֽל־מַחֲבַ֗ת בַּשֶּׁ֛מֶן תֵּעָשֶׂ֖ה מֻרְבֶּ֣כֶת תְּבִיאֶ֑נָּה תֻּפִינֵי֙ מִנְחַ֣ת פִּתִּ֔ים תַּקְרִ֥יב רֵֽיחַ־נִיחֹ֖חַ לַיהוָֽה׃

‎15 ‏וְהַכֹּהֵ֨ן הַמָּשִׁ֧יחַ תַּחְתָּ֛יו מִבָּנָ֖יו יַעֲשֶׂ֣ה אֹתָ֑הּ חָק־עוֹלָ֕ם לַיהוָ֖ה כָּלִ֥יל תָּקְטָֽר׃

‎16 ‏וְכָל־מִנְחַ֥ת כֹּהֵ֛ן כָּלִ֥יל תִּהְיֶ֖ה לֹ֥א תֵאָכֵֽל׃ פ

‎17 ‏וַיְדַבֵּ֥ר יְהוָ֖ה אֶל־מֹשֶׁ֥ה לֵּאמֹֽר׃

‎18 ‏דַּבֵּ֤ר אֶֽל־אַהֲרֹן֙ וְאֶל־בָּנָ֣יו לֵאמֹ֔ר זֹ֥את תּוֹרַ֖ת הַֽחַטָּ֑את בִּמְק֡וֹם אֲשֶׁר֩ תִּשָּׁחֵ֨ט הָעֹלָ֜ה תִּשָּׁחֵ֤ט הַֽחַטָּאת֙ לִפְנֵ֣י יְהוָ֔ה קֹ֥דֶשׁ קָֽדָשִׁ֖ים הִֽוא׃

‎19 ‏הַכֹּהֵ֛ן הַֽמְחַטֵּ֥א אֹתָ֖הּ יֹאכֲלֶ֑נָּה בְּמָק֤וֹם קָדֹשׁ֙ תֵּֽאָכֵ֔ל בַּחֲצַ֖ר אֹ֥הֶל מוֹעֵֽד׃

‎20 ‏כֹּ֛ל אֲשֶׁר־יִגַּ֥ע בִּבְשָׂרָ֖הּ יִקְדָּ֑שׁ וַאֲשֶׁ֨ר יִזֶּ֤ה מִדָּמָהּ֙ עַל־הַבֶּ֔גֶד אֲשֶׁר֙ יִזֶּ֣ה עָלֶ֔יהָ תְּכַבֵּ֖ס בְּמָק֥וֹם קָדֹֽשׁ׃

‎21 ‏וּכְלִי־חֶ֛רֶשׂ אֲשֶׁ֥ר תְּבֻשַּׁל־בּ֖וֹ יִשָּׁבֵ֑ר וְאִם־בִּכְלִ֤י נְחֹ֙שֶׁת֙ בֻּשָּׁ֔לָה וּמֹרַ֥ק וְשֻׁטַּ֖ף בַּמָּֽיִם׃

‎22 ‏כָּל־זָכָ֥ר בַּכֹּהֲנִ֖ים יֹאכַ֣ל אֹתָ֑הּ קֹ֥דֶשׁ קָֽדָשִׁ֖ים הִֽוא׃

‎23 ‏וְכָל־חַטָּ֡את אֲשֶׁר֩ יוּבָ֨א מִדָּמָ֜הּ אֶל־אֹ֧הֶל מוֹעֵ֛ד לְכַפֵּ֥ר בַּקֹּ֖דֶשׁ לֹ֣א תֵאָכֵ֑ל בָּאֵ֖שׁ תִּשָּׂרֵֽף׃ פ

1 wayəḏabēr yəhwâ ’el-mōšeh llē’mōr:

2 ṣaw ’eṯ-’ahărōn wə’eṯ-bānāyw lē’mōr zō’ṯ twōraṯ hā‘ōlâ hiw’ hā‘ōlâ ‘al mwōqəḏâ ‘al-hammizəbēḥa kāl-hallayəlâ ‘aḏ-habōqer wə’ēš hammizəbēḥa tûqaḏ bwō:

3 wəlāḇaš hakōhēn midwō ḇaḏ ûmiḵənəsê-ḇaḏ yiləbaš ‘al-bəśārwō wəhērîm ’eṯ-hadešen ’ăšer tō’ḵal hā’ēš ’eṯ-hā‘ōlâ ‘al-hammizəbēḥa wəśāmwō ’ēṣel hammizəbēḥa:

4 ûfāšaṭ ’eṯ-bəḡāḏāyw wəlāḇaš bəḡāḏîm ’ăḥērîm wəhwōṣî’ ’eṯ-hadešen ’el-miḥûṣ lamm^aḥăneh ’el-māqwōm ṭâwōr:

5 wəhā’ēš ‘al-hammizəbēḥa tûqaḏ-bwō lō’ ṯiḵəbeh ûḇi‘ēr ‘āleyhā hakōhēn ‘ēṣîm babōqer babōqer wə‘āraḵə ‘āleyhā hā‘ōlâ wəhiqəṭîr ‘āleyhā ḥeləḇê haššəlāmîm:

6 ’ēš tāmîḏ tûqaḏ ‘al-hammizəbēḥa lō’ ṯiḵəḇeh:¹ s

7 wəzō’ṯ twōraṯ hamminəḥâ haqərēḇ ’ōṯāh bənê-’ahărōn lifənê yəhwâ ’el-pənê hammizəbēḥa:

8 wəhērîm mimmennû bəquməṣwō missōleṯ hamminəḥâ ûmiššamənāh wə’ēṯ kāl-halləḇōnâ ’ăšer ‘al-hamminəḥâ wəhiqəṭîr hammizəbēḥa rêḥa nîḥōḥa ’azəkārāṯāh layhwâ:

9 wəhannwōṯereṯ mimmennâ yō’ḵəlû ’ahărōn ûḇānāyw maṣṣwōṯ tē’āḵēl bəmāqwōm qāḏōš b^aḥăṣar ’ōhel-mwō‘ēḏ yō’ḵəlûhā:

10 lō’ ṯē’āfeh ḥāmēṣ ḥeləqām nāṯatî ’ōṯāh mē’iššāy qōḏeš qāḏāšîm hiw’ k^aḥaṭṭā’ṯ wəḵā’āšām:

11 kāl-zāḵār biḇənê ’ahărōn yō’ḵălennâ³ ḥāq-‘wōlām ləḏōrōṯêḵem mē’iššê yəhwâ kōl³ ’ăšer-yig^a‘ bâem yiqədāš: f

12 wayəḏabēr yəhwâ ’el-mōšeh llē’mōr:

13 zeh qārəban ’ahărōn ûḇānāyw ’ăšer-yaqərîḇû layhwâ bəywōm himmāš^aḥ ’ōṯwō ‘ăśîriṯ hā’ēfâ sōleṯ minəḥâ tāmîḏ m^aḥăṣîṯāh babōqer ûm^aḥăṣîṯāh bā‘āreḇ:

14 ‘al-m^aḥăḇaṯ baššemen tē‘āśeh murəbeḵeṯ təḇî’ennâ tufînê minəḥaṯ pitîm taqərîḇ rêḥa-nîḥōḥa layhwâ:

15 wəhakōhēn hammāšîḥa t^aḥətāyw mibānāyw y^a‘ăśeh ’ōṯāh ḥāq-‘wōlām layhwâ kālîl tāqəṭār:

16 wəḵāl-minəḥaṯ kōhēn kālîl tihəyeh lō’ ṯē’āḵēl: f

17 wayəḏabēr yəhwâ ’el-mōšeh llē’mōr:

18 dabēr ’el-’ahărōn wə’el-bānāyw lē’mōr zō’ṯ twōraṯ h^aḥaṭṭā’ṯ biməqwōm ’ăšer tiššāḥēṭ hā‘ōlâ tiššāḥēṭ h^aḥaṭṭā’ṯ lifənê yəhwâ qōḏeš qāḏāšîm hiw’:

19 hakōhēn haməḥaṭṭē’ ’ōṯāh yō’ḵălennâ bəmāqwōm qāḏōš tē’āḵēl b^aḥăṣar ’ōhel mwō‘ēḏ:

20 kōl ’ăšer-yig^a‘ biḇəśārāh yiqədāš wa’ăšer yizzeh midāmāh ‘al-habeḡeḏ ’ăšer yizzeh ‘āleyhā təḵabēs bəmāqwōm qāḏōš:

21 ûḵəlî-ḥereś ’ăšer təḇuššal-bwō yiššāḇēr wə’im-biḵəlî nəḥōšeṯ buššālâ ûmōraq wəšuṭṭaf bammāyim:

22 kāl-zāḵār bakōhănîm yō’ḵal ’ōṯāh qōḏeš qāḏāšîm hiw’:

23 wəḵāl-ḥaṭṭā’ṯ ’ăšer yûḇā’ midāmāh ’el-’ōhel mwō‘ēḏ ləḵapēr baqqōḏeš lō’ ṯē’āḵēl bā’ēš tiśśārēf: f