Leviticus (Vayikra) Chapter 11

‎1 ‏וַיְדַבֵּ֧ר יְהוָ֛ה אֶל־מֹשֶׁ֥ה וְאֶֽל־אַהֲרֹ֖ן לֵאמֹ֥ר אֲלֵהֶֽם׃

‎2 ‏דַּבְּר֛וּ אֶל־בְּנֵ֥י יִשְׂרָאֵ֖ל לֵאמֹ֑ר זֹ֤את הַֽחַיָּה֙ אֲשֶׁ֣ר תֹּאכְל֔וּ מִכָּל־הַבְּהֵמָ֖ה אֲשֶׁ֥ר עַל־הָאָֽרֶץ׃

‎3 ‏כֹּ֣ל׀ מַפְרֶ֣סֶת פַּרְסָ֗ה וְשֹׁסַ֤עַת שֶׁ֙סַע֙ פְּרָסֹ֔ת מַעֲלַ֥ת גֵּרָ֖ה בַּבְּהֵמָ֑ה אֹתָ֖הּ תֹּאכֵֽלוּ׃

‎4 ‏אַ֤ךְ אֶת־זֶה֙ לֹ֣א תֹֽאכְל֔וּ מִֽמַּעֲלֵי֙ הַגֵּרָ֔ה וּמִמַּפְרִיסֵ֖י הַפַּרְסָ֑ה אֶֽת־הַ֠גָּמָל כִּֽי־מַעֲלֵ֨ה גֵרָ֜ה ה֗וּא וּפַרְסָה֙ אֵינֶ֣נּוּ מַפְרִ֔יס טָמֵ֥א ה֖וּא לָכֶֽם׃

‎5 ‏וְאֶת־הַשָּׁפָ֗ן כִּֽי־מַעֲלֵ֤ה גֵרָה֙ ה֔וּא וּפַרְסָ֖ה לֹ֣א יַפְרִ֑יס טָמֵ֥א ה֖וּא לָכֶֽם׃

‎6 ‏וְאֶת־הָאַרְנֶ֗בֶת כִּֽי־מַעֲלַ֤ת גֵּרָה֙ הִ֔וא וּפַרְסָ֖ה לֹ֣א הִפְרִ֑יסָה טְמֵאָ֥ה הִ֖וא לָכֶֽם׃

‎7 ‏וְאֶת־הַ֠חֲזִיר כִּֽי־מַפְרִ֨יס פַּרְסָ֜ה ה֗וּא וְשֹׁסַ֥ע שֶׁ֙סַע֙ פַּרְסָ֔ה וְה֖וּא גֵּרָ֣ה לֹֽא־יִגָּ֑ר טָמֵ֥א ה֖וּא לָכֶֽם׃

‎8 ‏מִבְּשָׂרָם֙ לֹ֣א תֹאכֵ֔לוּ וּבְנִבְלָתָ֖ם לֹ֣א תִגָּ֑עוּ טְמֵאִ֥ים הֵ֖ם לָכֶֽם׃

‎9 ‏אֶת־זֶה֙ תֹּֽאכְל֔וּ מִכֹּ֖ל אֲשֶׁ֣ר בַּמָּ֑יִם כֹּ֣ל אֲשֶׁר־לוֹ֩ סְנַפִּ֨יר וְקַשְׂקֶ֜שֶׂת בַּמַּ֗יִם בַּיַּמִּ֛ים וּבַנְּחָלִ֖ים אֹתָ֥ם תֹּאכֵֽלוּ׃

‎10 ‏וְכֹל֩ אֲשֶׁ֨ר אֵֽין־ל֜וֹ סְנַפִּ֣יר וְקַשְׂקֶ֗שֶׂת בַּיַּמִּים֙ וּבַנְּחָלִ֔ים מִכֹּל֙ שֶׁ֣רֶץ הַמַּ֔יִם וּמִכֹּ֛ל נֶ֥פֶשׁ הַחַיָּ֖ה אֲשֶׁ֣ר בַּמָּ֑יִם שֶׁ֥קֶץ הֵ֖ם לָכֶֽם׃

‎11 ‏וְשֶׁ֖קֶץ יִהְי֣וּ לָכֶ֑ם מִבְּשָׂרָם֙ לֹ֣א תֹאכֵ֔לוּ וְאֶת־נִבְלָתָ֖ם תְּשַׁקֵּֽצוּ׃

‎12 ‏כֹּ֣ל אֲשֶׁ֥ר אֵֽין־ל֛וֹ סְנַפִּ֥יר וְקַשְׂקֶ֖שֶׂת בַּמָּ֑יִם שֶׁ֥קֶץ ה֖וּא לָכֶֽם׃

‎13 ‏וְאֶת־אֵ֙לֶּה֙ תְּשַׁקְּצ֣וּ מִן־הָע֔וֹף לֹ֥א יֵאָכְל֖וּ שֶׁ֣קֶץ הֵ֑ם אֶת־הַנֶּ֙שֶׁר֙ וְאֶת־הַפֶּ֔רֶס וְאֵ֖ת הָעָזְנִיָּֽה׃

‎14 ‏וְאֶת־הַ֨דָּאָ֔ה וְאֶת־הָאַיָּ֖ה לְמִינָֽהּ׃

‎15 ‏אֵ֥ת כָּל־עֹרֵ֖ב לְמִינֽוֹ׃

‎16 ‏וְאֵת֙ בַּ֣ת הַֽיַּעֲנָ֔ה וְאֶת־הַתַּחְמָ֖ס וְאֶת־הַשָּׁ֑חַף וְאֶת־הַנֵּ֖ץ לְמִינֵֽהוּ׃

‎17 ‏וְאֶת־הַכּ֥וֹס וְאֶת־הַשָּׁלָ֖ךְ וְאֶת־הַיַּנְשֽׁוּף׃

‎18 ‏וְאֶת־הַתִּנְשֶׁ֥מֶת וְאֶת־הַקָּאָ֖ת וְאֶת־הָרָחָֽם׃

‎19 ‏וְאֵת֙ הַחֲסִידָ֔ה הָאֲנָפָ֖ה לְמִינָ֑הּ וְאֶת־הַדּוּכִיפַ֖ת וְאֶת־הָעֲטַלֵּֽף׃

‎20 ‏כֹּ֚ל שֶׁ֣רֶץ הָע֔וֹף הַהֹלֵ֖ךְ עַל־אַרְבַּ֑ע שֶׁ֥קֶץ ה֖וּא לָכֶֽם׃ ס

‎21 ‏אַ֤ךְ אֶת־זֶה֙ תֹּֽאכְל֔וּ מִכֹּל֙ שֶׁ֣רֶץ הָע֔וֹף הַהֹלֵ֖ךְ עַל־אַרְבַּ֑ע אֲשֶׁר־לא ל֤וֹ כְרָעַ֙יִם֙ מִמַּ֣עַל לְרַגְלָ֔יו לְנַתֵּ֥ר בָּהֵ֖ן עַל־הָאָֽרֶץ׃

‎22 ‏אֶת־אֵ֤לֶּה מֵהֶם֙ תֹּאכֵ֔לוּ אֶת־הָֽאַרְבֶּ֣ה³ לְמִינ֔וֹ וְאֶת־הַסָּלְעָ֖ם לְמִינֵ֑הוּ וְאֶת־הַחַרְגֹּ֣ל לְמִינֵ֔הוּ וְאֶת־הֶחָגָ֖ב לְמִינֵֽהוּ׃

‎23 ‏וְכֹל֙ שֶׁ֣רֶץ הָע֔וֹף אֲשֶׁר־ל֖וֹ אַרְבַּ֣ע רַגְלָ֑יִם שֶׁ֥קֶץ ה֖וּא לָכֶֽם׃

‎24 ‏וּלְאֵ֖לֶּה תִּטַּמָּ֑אוּ כָּל־הַנֹּגֵ֥עַ בְּנִבְלָתָ֖ם יִטְמָ֥א עַד־הָעָֽרֶב׃

‎25 ‏וְכָל־הַנֹּשֵׂ֖א מִנִּבְלָתָ֑ם יְכַבֵּ֥ס בְּגָדָ֖יו וְטָמֵ֥א עַד־הָעָֽרֶב׃

‎26 ‏לְֽכָל־הַבְּהֵמָ֡ה אֲשֶׁ֣ר הִוא֩ מַפְרֶ֨סֶת פַּרְסָ֜ה וְשֶׁ֣סַע׀ אֵינֶ֣נָּה שֹׁסַ֗עַת וְגֵרָה֙ אֵינֶ֣נָּה מַעֲלָ֔ה טְמֵאִ֥ים הֵ֖ם לָכֶ֑ם כָּל־הַנֹּגֵ֥עַ בָּהֶ֖ם יִטְמָֽא׃

‎27 ‏וְכֹ֣ל׀ הוֹלֵ֣ךְ עַל־כַּפָּ֗יו בְּכָל־הַֽחַיָּה֙ הַהֹלֶ֣כֶת עַל־אַרְבַּ֔ע טְמֵאִ֥ים הֵ֖ם לָכֶ֑ם כָּל־הַנֹּגֵ֥עַ בְּנִבְלָתָ֖ם יִטְמָ֥א עַד־הָעָֽרֶב׃

‎28 ‏וְהַנֹּשֵׂא֙ אֶת־נִבְלָתָ֔ם יְכַבֵּ֥ס בְּגָדָ֖יו וְטָמֵ֣א עַד־הָעָ֑רֶב טְמֵאִ֥ים הֵ֖מָּה לָכֶֽם׃ ס

‎29 ‏וְזֶ֤ה לָכֶם֙ הַטָּמֵ֔א בַּשֶּׁ֖רֶץ הַשֹּׁרֵ֣ץ עַל־הָאָ֑רֶץ הַחֹ֥לֶד וְהָעַכְבָּ֖ר וְהַצָּ֥ב לְמִינֵֽהוּ׃

‎30 ‏וְהָאֲנָקָ֥ה וְהַכֹּ֖חַ וְהַלְּטָאָ֑ה וְהַחֹ֖מֶט וְהַתִּנְשָֽׁמֶת׃

‎31 ‏אֵ֛לֶּה הַטְּמֵאִ֥ים לָכֶ֖ם בְּכָל־הַשָּׁ֑רֶץ כָּל־הַנֹּגֵ֧עַ בָּהֶ֛ם בְּמֹתָ֖ם יִטְמָ֥א עַד־הָעָֽרֶב׃

‎32 ‏וְכֹ֣ל אֲשֶׁר־יִפֹּל־עָלָיו֩ מֵהֶ֨ם׀ בְּמֹתָ֜ם יִטְמָ֗א מִכָּל־כְּלִי־עֵץ֙ א֣וֹ בֶ֤גֶד אוֹ־עוֹר֙ א֣וֹ שָׂ֔ק כָּל־כְּלִ֕י אֲשֶׁר־יֵעָשֶׂ֥ה מְלָאכָ֖ה בָּהֶ֑ם בַּמַּ֧יִם יוּבָ֛א וְטָמֵ֥א עַד־הָעֶ֖רֶב וְטָהֵֽר׃

‎33 ‏וְכָל־כְּלִי־חֶ֔רֶשׂ אֲשֶׁר־יִפֹּ֥ל מֵהֶ֖ם אֶל־תּוֹכ֑וֹ כֹּ֣ל אֲשֶׁ֧ר בְּתוֹכ֛וֹ יִטְמָ֖א וְאֹת֥וֹ תִשְׁבֹּֽרוּ׃

‎34 ‏מִכָּל־הָאֹ֜כֶל אֲשֶׁ֣ר יֵאָכֵ֗ל אֲשֶׁ֨ר יָב֥וֹא עָלָ֛יו מַ֖יִם יִטְמָ֑א וְכָל־מַשְׁקֶה֙ אֲשֶׁ֣ר יִשָּׁתֶ֔ה בְּכָל־כְּלִ֖י יִטְמָֽא׃

‎35 ‏וְ֠כֹל אֲשֶׁר־יִפֹּ֨ל מִנִּבְלָתָ֥ם׀ עָלָיו֮ יִטְמָא֒ תַּנּ֧וּר וְכִירַ֛יִם יֻתָּ֖ץ טְמֵאִ֣ים הֵ֑ם וּטְמֵאִ֖ים יִהְי֥וּ לָכֶֽם׃

‎36 ‏אַ֣ךְ מַעְיָ֥ן וּב֛וֹר מִקְוֵה־מַ֖יִם יִהְיֶ֣ה טָה֑וֹר וְנֹגֵ֥עַ בְּנִבְלָתָ֖ם יִטְמָֽא׃

‎37 ‏וְכִ֤י יִפֹּל֙ מִנִּבְלָתָ֔ם עַל־כָּל־זֶ֥רַע זֵר֖וּעַ אֲשֶׁ֣ר יִזָּרֵ֑עַ טָה֖וֹר הֽוּא׃

‎38 ‏וְכִ֤י יֻתַּן־מַ֙יִם֙ עַל־זֶ֔רַע וְנָפַ֥ל מִנִּבְלָתָ֖ם עָלָ֑יו טָמֵ֥א ה֖וּא לָכֶֽם׃ ס

‎39 ‏וְכִ֤י יָמוּת֙ מִן־הַבְּהֵמָ֔ה אֲשֶׁר־הִ֥יא לָכֶ֖ם לְאָכְלָ֑ה הַנֹּגֵ֥עַ בְּנִבְלָתָ֖הּ יִטְמָ֥א עַד־הָעָֽרֶב׃

‎40 ‏וְהָֽאֹכֵל֙ מִנִּבְלָתָ֔הּ יְכַבֵּ֥ס בְּגָדָ֖יו וְטָמֵ֣א עַד־הָעָ֑רֶב וְהַנֹּשֵׂא֙ אֶת־נִבְלָתָ֔הּ יְכַבֵּ֥ס בְּגָדָ֖יו וְטָמֵ֥א עַד־הָעָֽרֶב׃

‎41 ‏וְכָל־הַשֶּׁ֖רֶץ הַשֹּׁרֵ֣ץ עַל־הָאָ֑רֶץ שֶׁ֥קֶץ ה֖וּא לֹ֥א יֵאָכֵֽל׃

‎42 ‏כֹּל֩ הוֹלֵ֨ךְ עַל־גָּח֜וֹ⁵ן וְכֹ֣ל׀ הוֹלֵ֣ךְ עַל־אַרְבַּ֗ע עַ֚ד כָּל־מַרְבֵּ֣ה רַגְלַ֔יִם לְכָל־הַשֶּׁ֖רֶץ הַשֹּׁרֵ֣ץ עַל־הָאָ֑רֶץ לֹ֥א תֹאכְל֖וּם כִּי־שֶׁ֥קֶץ הֵֽם׃

‎43 ‏אַל־תְּשַׁקְּצוּ֙ אֶת־נַפְשֹׁ֣תֵיכֶ֔ם בְּכָל־הַשֶּׁ֖רֶץ הַשֹּׁרֵ֑ץ וְלֹ֤א תִֽטַּמְּאוּ֙ בָּהֶ֔ם וְנִטְמֵתֶ֖ם בָּֽם׃

‎44 ‏כִּ֣י אֲנִ֣י יְהוָה֮ אֱלֹֽהֵיכֶם֒ וְהִתְקַדִּשְׁתֶּם֙ וִהְיִיתֶ֣ם קְדֹשִׁ֔ים כִּ֥י קָד֖וֹשׁ אָ֑נִי וְלֹ֤א תְטַמְּאוּ֙ אֶת־נַפְשֹׁ֣תֵיכֶ֔ם בְּכָל־הַשֶּׁ֖רֶץ הָרֹמֵ֥שׂ עַל־הָאָֽרֶץ׃

‎45 ‏כִּ֣י׀ אֲנִ֣י יְהוָ֗ה הַֽמַּעֲלֶ֤ה אֶתְכֶם֙ מֵאֶ֣רֶץ מִצְרַ֔יִם לִהְיֹ֥ת לָכֶ֖ם לֵאלֹהִ֑ים וִהְיִיתֶ֣ם קְדֹשִׁ֔ים כִּ֥י קָד֖וֹשׁ אָֽנִי׃

‎46 ‏זֹ֣את תּוֹרַ֤ת הַבְּהֵמָה֙ וְהָע֔וֹף וְכֹל֙ נֶ֣פֶשׁ הַֽחַיָּ֔ה הָרֹמֶ֖שֶׂת בַּמָּ֑יִם וּלְכָל־נֶ֖פֶשׁ הַשֹּׁרֶ֥צֶת עַל־הָאָֽרֶץ׃

‎47 ‏לְהַבְדִּ֕יל בֵּ֥ין הַטָּמֵ֖א וּבֵ֣ין הַטָּהֹ֑ר וּבֵ֤ין הַֽחַיָּה֙ הַֽנֶּאֱכֶ֔לֶת וּבֵין֙ הַֽחַיָּ֔ה אֲשֶׁ֖ר לֹ֥א תֵאָכֵֽל׃ פ

1 wayəḏabēr yəhwâ ’el-mōšeh wə’el-’ahărōn lē’mōr ’ălēhem:

2 dabərû ’el-bənê yiśərā’ēl lē’mōr zō’ṯ h^aḥayyâ ’ăšer tō’ḵəlû mikāl-habəhēmâ ’ăšer ‘al-hā’āreṣ:

3 kōl| mafəreseṯ parəsâ wəšōs^a‘aṯ šes^a‘ pərāsōṯ m^a‘ălaṯ gērâ babəhēmâ ’ōṯāh tō’ḵēlû:

4 ’aḵə ’eṯ-zeh lō’ ṯō’ḵəlû mimm^a‘ălê hagērâ ûmimmafərîsê haparəsâ ’eṯ-hagāmāl kî-m^a‘ălēh ḡērâ hû’ ûfarəsâ ’ênennû mafərîs ṭāmē’ hû’ lāḵem:

5 wə’eṯ-haššāfān kî-m^a‘ălēh ḡērâ hû’ ûfarəsâ lō’ yafərîs ṭāmē’ hû’ lāḵem:

6 wə’eṯ-hā’arəneḇeṯ kî-m^a‘ălaṯ gērâ hiw’ ûfarəsâ lō’ hifərîsâ ṭəmē’â hiw’ lāḵem:

7 wə’eṯ-h^aḥăzîr kî-mafərîs parəsâ hû’ wəšōs^a‘ šes^a‘ parəsâ wəhû’ gērâ lō’-yigār ṭāmē’ hû’ lāḵem:

8 mibəśārām lō’ ṯō’ḵēlû ûḇəniḇəlāṯām lō’ ṯigā‘û ṭəmē’îm hēm lāḵem:

9 ’eṯ-zeh tō’ḵəlû mikōl ’ăšer bammāyim kōl ’ăšer-lwō sənapîr wəqaśəqeśeṯ bammayim bayyammîm ûḇannəḥālîm ’ōṯām tō’ḵēlû:

10 wəḵōl ’ăšer ’ên-lwō sənapîr wəqaśəqeśeṯ bayyammîm ûḇannəḥālîm mikōl šereṣ hammayim ûmikōl nefeš h^aḥayyâ ’ăšer bammāyim šeqeṣ hēm lāḵem:

11 wəšeqeṣ yihəyû lāḵem mibəśārām lō’ ṯō’ḵēlû wə’eṯ-niḇəlāṯām təšaqqēṣû:

12 kōl ’ăšer ’ên-lwō sənapîr wəqaśəqeśeṯ bammāyim šeqeṣ hû’ lāḵem:

13 wə’eṯ-’ēlleh təšaqqəṣû min-hā‘wōf lō’ yē’āḵəlû šeqeṣ hēm ’eṯ-hannešer wə’eṯ-haperes wə’ēṯ hā‘āzənîyâ:

14 wə’eṯ-hadā’â wə’eṯ-hā’ayyâ ləmînāh:

15 ’ēṯ kāl-‘ōrēḇ ləmînwō:

16 wə’ēṯ baṯ hayy^a‘ănâ wə’eṯ-hat^aḥəmās wə’eṯ-haššāḥaf wə’eṯ-hannēṣ ləmînēhû:

17 wə’eṯ-hakwōs wə’eṯ-haššālāḵə wə’eṯ-hayyanəšûf:

18 wə’eṯ-hatinəšemeṯ wə’eṯ-haqqā’āṯ wə’eṯ-hārāḥām:

19 wə’ēṯ h^aḥăsîḏâ hā’ănāfâ ləmînāh wə’eṯ-hadûḵîfaṯ wə’eṯ-hā‘ăṭallēf:

20 kōl šereṣ hā‘wōf hahōlēḵə ‘al-’arəb^a‘ šeqeṣ hû’ lāḵem: s

21 ’aḵə ’eṯ-zeh tō’ḵəlû mikōl šereṣ hā‘wōf hahōlēḵə ‘al-’arəb^a‘ ’ăšer-lō’ lwō ḵərā‘ayim mimm^a‘al ləraḡəlāyw lənatēr bâēn ‘al-hā’āreṣ:

22 ’eṯ-’ēlleh mēhem tō’ḵēlû ’eṯ-hā’arəbeh³ ləmînwō wə’eṯ-hassālə‘ām ləmînēhû wə’eṯ-h^aḥarəgōl ləmînēhû wə’eṯ-heḥāḡāḇ ləmînēhû:

23 wəḵōl šereṣ hā‘wōf ’ăšer-lwō ’arəb^a‘ raḡəlāyim šeqeṣ hû’ lāḵem:

24 ûlə’ēlleh tiṭṭammā’û kāl-hannōḡē‘a bəniḇəlāṯām yiṭəmā’ ‘aḏ-hā‘āreḇ:

25 wəḵāl-hannōśē’ minniḇəlāṯām yəḵabēs bəḡāḏāyw wəṭāmē’ ‘aḏ-hā‘āreḇ:

26 ləḵāl-habəhēmâ ’ăšer hiw’ mafəreseṯ parəsâ wəšes^a‘| ’ênennâ šōs^a‘aṯ wəḡērâ ’ênennâ m^a‘ălâ ṭəmē’îm hēm lāḵem kāl-hannōḡē‘a bâem yiṭəmā’:

27 wəḵōl| hwōlēḵə ‘al-kapāyw bəḵāl-h^aḥayyâ hahōleḵeṯ ‘al-’arəb^a‘ ṭəmē’îm hēm lāḵem kāl-hannōḡē‘a bəniḇəlāṯām yiṭəmā’ ‘aḏ-hā‘āreḇ:

28 wəhannōśē’ ’eṯ-niḇəlāṯām yəḵabēs bəḡāḏāyw wəṭāmē’ ‘aḏ-hā‘āreḇ ṭəmē’îm hēmmâ lāḵem: s

29 wəzeh lāḵem haṭṭāmē’ baššereṣ haššōrēṣ ‘al-hā’āreṣ h^aḥōleḏ wəhā‘aḵəbār wəhaṣṣāḇ ləmînēhû:

30 wəhā’ănāqâ wəhakōḥa wəhalləṭā’â wəh^aḥōmeṭ wəhatinəšāmeṯ:

31 ’ēlleh haṭṭəmē’îm lāḵem bəḵāl-haššāreṣ kāl-hannōḡē‘a bâem bəmōṯām yiṭəmā’ ‘aḏ-hā‘āreḇ:

32 wəḵōl ’ăšer-yipōl-‘ālāyw mēhem| bəmōṯām yiṭəmā’ mikāl-kəlî-‘ēṣ ’wō ḇeḡeḏ ’wō-‘wōr ’wō śāq kāl-kəlî ’ăšer-yē‘āśeh məlā’ḵâ bâem bammayim yûḇā’ wəṭāmē’ ‘aḏ-hā‘ereḇ wəṭâēr:

33 wəḵāl-kəlî-ḥereś ’ăšer-yipōl mēhem ’el-twōḵwō kōl ’ăšer bəṯwōḵwō yiṭəmā’ wə’ōṯwō ṯišəbōrû:

34 mikāl-hā’ōḵel ’ăšer yē’āḵēl ’ăšer yāḇwō’ ‘ālāyw mayim yiṭəmā’ wəḵāl-mašəqeh ’ăšer yiššāṯeh bəḵāl-kəlî yiṭəmā’:

35 wəḵōl ’ăšer-yipōl minniḇəlāṯām| ‘ālāyw yiṭəmā’ tannûr wəḵîrayim yutāṣ ṭəmē’îm hēm ûṭəmē’îm yihəyû lāḵem:

36 ’aḵə m^a‘əyān ûḇwōr miqəwēh-mayim yihəyeh ṭâwōr wənōḡē‘a bəniḇəlāṯām yiṭəmā’:

37 wəḵî yipōl minniḇəlāṯām ‘al-kāl-zer^a‘ zērû‘a ’ăšer yizzārē‘a ṭâwōr hû’:

38 wəḵî yutan-mayim ‘al-zer^a‘ wənāfal minniḇəlāṯām ‘ālāyw ṭāmē’ hû’ lāḵem: s

39 wəḵî yāmûṯ min-habəhēmâ ’ăšer-hî’ lāḵem lə’āḵəlâ hannōḡē‘a bəniḇəlāṯāh yiṭəmā’ ‘aḏ-hā‘āreḇ:

40 wəhā’ōḵēl minniḇəlāṯāh yəḵabēs bəḡāḏāyw wəṭāmē’ ‘aḏ-hā‘āreḇ wəhannōśē’ ’eṯ-niḇəlāṯāh yəḵabēs bəḡāḏāyw wəṭāmē’ ‘aḏ-hā‘āreḇ:

41 wəḵāl-haššereṣ haššōrēṣ ‘al-hā’āreṣ šeqeṣ hû’ lō’ yē’āḵēl:

42 kōl hwōlēḵə ‘al-gāḥwō⁵n wəḵōl| hwōlēḵə ‘al-’arəb^a‘ ‘aḏ kāl-marəbēh raḡəlayim ləḵāl-haššereṣ haššōrēṣ ‘al-hā’āreṣ lō’ ṯō’ḵəlûm kî-šeqeṣ hēm:

43 ’al-təšaqqəṣû ’eṯ-nafəšōṯêḵem bəḵāl-haššereṣ haššōrēṣ wəlō’ ṯiṭṭammə’û bâem wəniṭəmēṯem bām:

44 kî ’ănî yəhwâ ’ĕlōhêḵem wəhiṯəqadišətem wihəyîṯem qəḏōšîm kî qāḏwōš ’ānî wəlō’ ṯəṭammə’û ’eṯ-nafəšōṯêḵem bəḵāl-haššereṣ hārōmēś ‘al-hā’āreṣ:

45 kî| ’ănî yəhwâ hamm^a‘ăleh ’eṯəḵem mē’ereṣ miṣərayim lihəyōṯ lāḵem lē’lōhîm wihəyîṯem qəḏōšîm kî qāḏwōš ’ānî:

46 zō’ṯ twōraṯ habəhēmâ wəhā‘wōf wəḵōl nefeš h^aḥayyâ hārōmeśeṯ bammāyim ûləḵāl-nefeš haššōreṣeṯ ‘al-hā’āreṣ:

47 ləhaḇədîl bên haṭṭāmē’ ûḇên haṭṭâōr ûḇên h^aḥayyâ hanne’ĕḵeleṯ ûḇên h^aḥayyâ ’ăšer lō’ ṯē’āḵēl: f