Leviticus (Vayikra) Chapter 21

‎1 ‏וַיֹּ֤אמֶר יְהוָה֙ אֶל־מֹשֶׁ֔ה אֱמֹ֥ר אֶל־הַכֹּהֲנִ֖ים בְּנֵ֣י אַהֲרֹ֑ן וְאָמַרְתָּ֣ אֲלֵהֶ֔ם לְנֶ֥פֶשׁ לֹֽא־יִטַּמָּ֖א בְּעַמָּֽיו׃

‎2 ‏כִּ֚י אִם־לִשְׁאֵר֔וֹ הַקָּרֹ֖ב אֵלָ֑יו לְאִמּ֣וֹ וּלְאָבִ֔יו וְלִבְנ֥וֹ וּלְבִתּ֖וֹ וּלְאָחִֽיו׃

‎3 ‏וְלַאֲחֹת֤וֹ הַבְּתוּלָה֙ הַקְּרוֹבָ֣ה אֵלָ֔יו אֲשֶׁ֥ר לֹֽא־הָיְתָ֖ה לְאִ֑ישׁ לָ֖הּ יִטַּמָּֽא׃

‎4 ‏לֹ֥א יִטַּמָּ֖א בַּ֣עַל בְּעַמָּ֑יו לְהֵ֖חַלּֽוֹ׃

‎5 ‏לֹֽא־יקרחה יִקְרְח֤וּ קָרְחָה֙ בְּרֹאשָׁ֔ם וּפְאַ֥ת זְקָנָ֖ם לֹ֣א יְגַלֵּ֑חוּ וּבִ֨בְשָׂרָ֔ם לֹ֥א יִשְׂרְט֖וּ שָׂרָֽטֶת׃

‎6 ‏קְדֹשִׁ֤ים יִהְיוּ֙ לֵאלֹ֣הֵיהֶ֔ם וְלֹ֣א יְחַלְּל֔וּ שֵׁ֖ם אֱלֹהֵיהֶ֑ם כִּי֩ אֶת־אִשֵּׁ֨י יְהוָ֜ה לֶ֧חֶם אֱלֹהֵיהֶ֛ם הֵ֥ם מַקְרִיבִ֖ם וְהָ֥יוּ קֹֽדֶשׁ׃

‎7 ‏אִשָּׁ֨ה זֹנָ֤ה וַחֲלָלָה֙ לֹ֣א יִקָּ֔חוּ וְאִשָּׁ֛ה גְּרוּשָׁ֥ה מֵאִישָׁ֖הּ לֹ֣א יִקָּ֑חוּ כִּֽי־קָדֹ֥שׁ ה֖וּא לֵאלֹהָֽיו׃

‎8 ‏וְקִדַּשְׁתּ֔וֹ כִּֽי־אֶת־לֶ֥חֶם אֱלֹהֶ֖יךָ ה֣וּא מַקְרִ֑יב קָדֹשׁ֙ יִֽהְיֶה־לָּ֔ךְ כִּ֣י קָד֔וֹשׁ אֲנִ֥י יְהוָ֖ה מְקַדִּשְׁכֶֽם׃

‎9 ‏וּבַת֙ אִ֣ישׁ כֹּהֵ֔ן כִּ֥י תֵחֵ֖ל לִזְנ֑וֹת אֶת־אָבִ֙יהָ֙ הִ֣יא מְחַלֶּ֔לֶת בָּאֵ֖שׁ תִּשָּׂרֵֽף׃ ס

‎10 ‏וְהַכֹּהֵן֩ הַגָּד֨וֹל מֵאֶחָ֜יו אֲ‍ֽשֶׁר־יוּצַ֥ק עַל־רֹאשׁ֣וֹ׀ שֶׁ֤מֶן הַמִּשְׁחָה֙ וּמִלֵּ֣א אֶת־יָד֔וֹ לִלְבֹּ֖שׁ אֶת־הַבְּגָדִ֑ים אֶת־רֹאשׁוֹ֙ לֹ֣א יִפְרָ֔ע וּבְגָדָ֖יו לֹ֥א יִפְרֹֽם׃

‎11 ‏וְעַ֛ל כָּל־נַפְשֹׁ֥ת מֵ֖ת לֹ֣א יָבֹ֑א לְאָבִ֥יו וּלְאִמּ֖וֹ לֹ֥א יִטַּמָּֽא׃

‎12 ‏וּמִן־הַמִּקְדָּשׁ֙ לֹ֣א יֵצֵ֔א וְלֹ֣א יְחַלֵּ֔ל אֵ֖ת מִקְדַּ֣שׁ אֱלֹהָ֑יו כִּ֡י נֵ֠זֶר שֶׁ֣מֶן מִשְׁחַ֧ת אֱלֹהָ֛יו עָלָ֖יו אֲנִ֥י יְהוָֽה׃

‎13 ‏וְה֕וּא אִשָּׁ֥ה בִבְתוּלֶ֖יהָ יִקָּֽח׃

‎14 ‏אַלְמָנָ֤ה וּגְרוּשָׁה֙ וַחֲלָלָ֣ה זֹנָ֔ה אֶת־אֵ֖לֶּה לֹ֣א יִקָּ֑ח כִּ֛י אִם־בְּתוּלָ֥ה מֵעַמָּ֖יו יִקַּ֥ח אִשָּֽׁה׃

‎15 ‏וְלֹֽא־יְחַלֵּ֥ל זַרְע֖וֹ בְּעַמָּ֑יו כִּ֛י אֲנִ֥י יְהוָ֖ה מְקַדְּשֽׁוֹ׃ פ

‎16 ‏וַיְדַבֵּ֥ר יְהוָ֖ה אֶל־מֹשֶׁ֥ה לֵּאמֹֽר׃

‎17 ‏דַּבֵּ֥ר אֶֽל־אַהֲרֹ֖ן לֵאמֹ֑ר אִ֣ישׁ מִֽזַּרְעֲךָ֞ לְדֹרֹתָ֗ם אֲשֶׁ֨ר יִהְיֶ֥ה בוֹ֙ מ֔וּם לֹ֣א יִקְרַ֔ב לְהַקְרִ֖יב לֶ֥חֶם אֱלֹהָֽיו׃

‎18 ‏כִּ֥י כָל־אִ֛ישׁ אֲשֶׁר־בּ֥וֹ מ֖וּם לֹ֣א יִקְרָ֑ב אִ֤ישׁ עִוֵּר֙ א֣וֹ פִסֵּ֔חַ א֥וֹ חָרֻ֖ם א֥וֹ שָׂרֽוּעַ׃

‎19 ‏א֣וֹ אִ֔ישׁ אֲשֶׁר־יִהְיֶ֥ה ב֖וֹ שֶׁ֣בֶר רָ֑גֶל א֖וֹ שֶׁ֥בֶר יָֽד׃

‎20 ‏אֽוֹ־גִבֵּ֣ן אוֹ־דַ֔ק א֖וֹ תְּבַלֻּ֣ל בְּעֵינ֑וֹ א֤וֹ גָרָב֙ א֣וֹ יַלֶּ֔פֶת א֖וֹ מְר֥וֹחַ אָֽשֶׁךְ׃

‎21 ‏כָּל־אִ֞ישׁ אֲשֶׁר־בּ֣וֹ מ֗וּם מִזֶּ֙רַע֙ אַהֲרֹ֣ן הַכֹּהֵ֔ן לֹ֣א יִגַּ֔שׁ לְהַקְרִ֖יב אֶת־אִשֵּׁ֣י יְהוָ֑ה מ֣וּם בּ֔וֹ אֵ֚ת לֶ֣חֶם אֱלֹהָ֔יו לֹ֥א יִגַּ֖שׁ לְהַקְרִֽיב׃

‎22 ‏לֶ֣חֶם אֱלֹהָ֔יו מִקָּדְשֵׁ֖י הַקֳּדָשִׁ֑ים וּמִן־הַקֳּדָשִׁ֖ים יֹאכֵֽל׃

‎23 ‏אַ֣ךְ אֶל־הַפָּרֹ֜כֶת לֹ֣א יָבֹ֗א וְאֶל־הַמִּזְבֵּ֛חַ לֹ֥א יִגַּ֖שׁ כִּֽי־מ֣וּם בּ֑וֹ וְלֹ֤א יְחַלֵּל֙ אֶת־מִקְדָּשַׁ֔י כִּ֛י אֲנִ֥י יְהוָ֖ה מְקַדְּשָֽׁם׃

‎24 ‏וַיְדַבֵּ֣ר מֹשֶׁ֔ה אֶֽל־אַהֲרֹ֖ן וְאֶל־בָּנָ֑יו וְאֶֽל־כָּל־בְּנֵ֖י יִשְׂרָאֵֽל׃ פ

1 wayyō’mer yəhwâ ’el-mōšeh ’ĕmōr ’el-hakōhănîm bənê ’ahărōn wə’āmarətā ’ălēhem lənefeš lō’-yiṭṭammā’ bə‘ammāyw:

2 kî ’im-lišə’ērwō haqqārōḇ ’ēlāyw lə’immwō ûlə’āḇîw wəliḇənwō ûləḇitwō ûlə’āḥîw:

3 wəla’ăḥōṯwō habəṯûlâ haqqərwōḇâ ’ēlāyw ’ăšer lō’-hāyəṯâ lə’îš lāh yiṭṭammā’:

4 lō’ yiṭṭammā’ b^a‘al bə‘ammāyw ləhēḥallwō:

5 lō’-yiqərəḥâ yiqərəḥû qārəḥâ bərō’šām ûfə’aṯ zəqānām lō’ yəḡallēḥû ûḇiḇəśārām lō’ yiśərəṭû śārāṭeṯ:

6 qəḏōšîm yihəyû lē’lōhêhem wəlō’ yəḥalləlû šēm ’ĕlōhêhem kî ’eṯ-’iššê yəhwâ leḥem ’ĕlōhêhem hēm maqərîḇim wəhāyû qōḏeš:

7 ’iššâ zōnâ w^aḥălālâ lō’ yiqqāḥû wə’iššâ gərûšâ mē’îšāh lō’ yiqqāḥû kî-qāḏōš hû’ lē’lōhāyw:

8 wəqidašətwō kî-’eṯ-leḥem ’ĕlōheyḵā hû’ maqərîḇ qāḏōš yihəyeh-llāḵə kî qāḏwōš ’ănî yəhwâ məqadišəḵem:

9 ûḇaṯ ’îš kōhēn kî ṯēḥēl lizənwōṯ ’eṯ-’āḇîhā hî’ məḥalleleṯ bā’ēš tiśśārēf: s

10 wəhakōhēn hagāḏwōl mē’eḥāyw ’ă‍šer-yûṣaq ‘al-rō’šwō| šemen hammišəḥâ ûmillē’ ’eṯ-yāḏwō liləbōš ’eṯ-habəḡāḏîm ’eṯ-rō’šwō lō’ yifərā‘ ûḇəḡāḏāyw lō’ yifərōm:

11 wə‘al kāl-nafəšōṯ mēṯ lō’ yāḇō’ lə’āḇîw ûlə’immwō lō’ yiṭṭammā’:

12 ûmin-hammiqədāš lō’ yēṣē’ wəlō’ yəḥallēl ’ēṯ miqədaš ’ĕlōhāyw kî nēzer šemen mišəḥaṯ ’ĕlōhāyw ‘ālāyw ’ănî yəhwâ:

13 wəhû’ ’iššâ ḇiḇəṯûleyhā yiqqāḥ:

14 ’aləmānâ ûḡərûšâ w^aḥălālâ zōnâ ’eṯ-’ēlleh lō’ yiqqāḥ kî ’im-bəṯûlâ mē‘ammāyw yiqq^aḥ ’iššâ:

15 wəlō’-yəḥallēl zarə‘wō bə‘ammāyw kî ’ănî yəhwâ məqadəšwō: f

16 wayəḏabēr yəhwâ ’el-mōšeh llē’mōr:

17 dabēr ’el-’ahărōn lē’mōr ’îš mizzarə‘ăḵā ləḏōrōṯām ’ăšer yihəyeh ḇwō mûm lō’ yiqəraḇ ləhaqərîḇ leḥem ’ĕlōhāyw:

18 kî ḵāl-’îš ’ăšer-bwō mûm lō’ yiqərāḇ ’îš ‘iûēr ’wō fissēḥa ’wō ḥārum ’wō śārû‘a:

19 ’wō ’îš ’ăšer-yihəyeh ḇwō šeḇer rāḡel ’wō šeḇer yāḏ:

20 ’wō-ḡibēn ’wō-ḏaq ’wō təḇallul bə‘ênwō ’wō ḡārāḇ ’wō yallefeṯ ’wō mərwōḥa ’āšeḵə:

21 kāl-’îš ’ăšer-bwō mûm mizzer^a‘ ’ahărōn hakōhēn lō’ yigaš ləhaqərîḇ ’eṯ-’iššê yəhwâ mûm bwō ’ēṯ leḥem ’ĕlōhāyw lō’ yigaš ləhaqərîḇ:

22 leḥem ’ĕlōhāyw miqqāḏəšê haqqŏḏāšîm ûmin-haqqŏḏāšîm yō’ḵēl:

23 ’aḵə ’el-hapārōḵeṯ lō’ yāḇō’ wə’el-hammizəbēḥa lō’ yigaš kî-mûm bwō wəlō’ yəḥallēl ’eṯ-miqədāšay kî ’ănî yəhwâ məqadəšām:

24 wayəḏabēr mōšeh ’el-’ahărōn wə’el-bānāyw wə’el-kāl-bənê yiśərā’ēl: f