Micah (Mikhah) Chapter 6

‎1 ‏שִׁמְעוּ־נָ֕א אֵ֥ת אֲשֶׁר־יְהוָ֖ה אֹמֵ֑ר ק֚וּם רִ֣יב אֶת־הֶהָרִ֔ים וְתִשְׁמַ֥עְנָה הַגְּבָע֖וֹת קוֹלֶֽךָ׃

‎2 ‏שִׁמְע֤וּ הָרִים֙ אֶת־רִ֣יב יְהוָ֔ה וְהָאֵתָנִ֖ים מֹ֣סְדֵי אָ֑רֶץ כִּ֣י רִ֤יב לַֽיהוָה֙ עִם־עַמּ֔וֹ וְעִם־יִשְׂרָאֵ֖ל יִתְוַכָּֽח׃

‎3 ‏עַמִּ֛י מֶה־עָשִׂ֥יתִי לְךָ֖ וּמָ֣ה הֶלְאֵתִ֑יךָ עֲנֵ֥ה בִֽי׃

‎4 ‏כִּ֤י הֶעֱלִתִ֙יךָ֙ מֵאֶ֣רֶץ מִצְרַ֔יִם וּמִבֵּ֥ית עֲבָדִ֖ים פְּדִיתִ֑יךָ וָאֶשְׁלַ֣ח לְפָנֶ֔יךָ אֶת־מֹשֶׁ֖ה אַהֲרֹ֥ן וּמִרְיָֽם׃

‎5 ‏עַמִּ֗י זְכָר־נָא֙ מַה־יָּעַ֗ץ בָּלָק֙ מֶ֣לֶךְ מוֹאָ֔ב וּמֶה־עָנָ֥ה אֹת֖וֹ בִּלְעָ֣ם בֶּן־בְּע֑וֹר מִן־הַשִּׁטִּים֙ עַד־הַגִּלְגָּ֔ל לְמַ֕עַן דַּ֖עַת צִדְק֥וֹת יְהוָֽה׃

‎6 ‏בַּמָּה֙ אֲקַדֵּ֣ם יְהוָ֔ה אִכַּ֖ף לֵאלֹהֵ֣י מָר֑וֹם הַאֲקַדְּמֶ֣נּוּ בְעוֹל֔וֹת בַּעֲגָלִ֖ים בְּנֵ֥י שָׁנָֽה׃

‎7 ‏הֲיִרְצֶ֤ה יְהוָה֙ בְּאַלְפֵ֣י אֵילִ֔ים בְּרִֽבְב֖וֹת נַֽחֲלֵי־שָׁ֑מֶן הַאֶתֵּ֤ן בְּכוֹרִי֙ פִּשְׁעִ֔י פְּרִ֥י בִטְנִ֖י חַטַּ֥את נַפְשִֽׁי׃

‎8 ‏הִגִּ֥יד לְךָ֛ אָדָ֖ם מַה־טּ֑וֹב וּמָֽה־יְהוָ֞ה דּוֹרֵ֣שׁ מִמְּךָ֗ כִּ֣י אִם־עֲשׂ֤וֹת מִשְׁפָּט֙ וְאַ֣הֲבַת חֶ֔סֶד וְהַצְנֵ֥עַ לֶ֖כֶת עִם־אֱלֹהֶֽיךָ׃ פ

‎9 ‏ק֤וֹל יְהוָה֙ לָעִ֣יר יִקְרָ֔א וְתוּשִׁיָּ֖ה יִרְאֶ֣ה שְׁמֶ֑ךָ שִׁמְע֥וּ מַטֶּ֖ה וּמִ֥י יְעָדָֽהּ׃

‎10 ‏ע֗וֹד הַאִשׁ֙ בֵּ֣ית רָשָׁ֔ע אֹצְר֖וֹת רֶ֑שַׁע וְאֵיפַ֥ת רָז֖וֹן זְעוּמָֽה׃

‎11 ‏הַאֶזְכֶּ֖ה בְּמֹ֣אזְנֵי רֶ֑שַׁע וּבְכִ֖יס אַבְנֵ֥י מִרְמָֽה׃

‎12 ‏אֲשֶׁ֤ר עֲשִׁירֶ֙יהָ֙ מָלְא֣וּ חָמָ֔ס וְיֹשְׁבֶ֖יהָ דִּבְּרוּ־שָׁ֑קֶר וּלְשׁוֹנָ֖ם רְמִיָּ֥ה בְּפִיהֶֽם׃

‎13 ‏וְגַם־אֲנִ֖י הֶחֱלֵ֣יתִי הַכּוֹתֶ֑ךָ הַשְׁמֵ֖ם עַל־חַטֹּאתֶֽךָ׃

‎14 ‏אַתָּ֤ה תֹאכַל֙ וְלֹ֣א תִשְׂבָּ֔ע וְיֶשְׁחֲךָ֖ בְּקִרְבֶּ֑ךָ וְתַסֵּג֙ וְלֹ֣א תַפְלִ֔יט וַאֲשֶׁ֥ר תְּפַלֵּ֖ט לַחֶ֥רֶב אֶתֵּֽן׃

‎15 ‏אַתָּ֥ה תִזְרַ֖ע וְלֹ֣א תִקְצ֑וֹר אַתָּ֤ה תִדְרֹֽךְ־זַ֙יִת֙ וְלֹא־תָס֣וּךְ שֶׁ֔מֶן וְתִיר֖וֹשׁ וְלֹ֥א תִשְׁתֶּה־יָּֽיִן׃

‎16 ‏וְיִשְׁתַּמֵּ֞ר חֻקּ֣וֹת עָמְרִ֗י וְכֹל֙ מַעֲשֵׂ֣ה בֵית־אַחְאָ֔ב וַתֵּלְכ֖וּ בְּמֹֽעֲצוֹתָ֑ם לְמַעַן֩ תִּתִּ֨י אֹתְךָ֜ לְשַׁמָּ֗ה וְיֹשְׁבֶ֙יהָ֙ לִשְׁרֵקָ֔ה וְחֶרְפַּ֥ת עַמִּ֖י תִּשָּֽׂאוּ׃ פ

1 šimə‘û-nā’ ’ēṯ ’ăšer-yəhwâ ’ōmēr qûm rîḇ ’eṯ-hehārîm wəṯišəm^a‘ənâ hagəḇā‘wōṯ qwōleḵā:

2 šimə‘û hārîm ’eṯ-rîḇ yəhwâ wəhā’ēṯānîm mōsəḏê ’āreṣ kî rîḇ layhwâ ‘im-‘ammwō wə‘im-yiśərā’ēl yiṯəwakāḥ:

3 ‘ammî meh-‘āśîṯî ləḵā ûmâ helə’ēṯîḵā ‘ănēh ḇî:

4 kî he‘ĕliṯîḵā mē’ereṣ miṣərayim ûmibêṯ ‘ăḇāḏîm pəḏîṯîḵā wā’ešəl^aḥ ləfāneyḵā ’eṯ-mōšeh ’ahărōn ûmirəyām:

5 ‘ammî zəḵār-nā’ mah-yyā‘aṣ bālāq meleḵə mwō’āḇ ûmeh-‘ānâ ’ōṯwō bilə‘ām ben-bə‘wōr min-haššiṭṭîm ‘aḏ-hagiləgāl ləm^a‘an d^a‘aṯ ṣiḏəqwōṯ yəhwâ:

6 bammâ ’ăqadēm yəhwâ ’ikaf lē’lōhê mārwōm ha’ăqadəmennû ḇə‘wōlwōṯ b^a‘ăḡālîm bənê šānâ:

7 hăyirəṣeh yəhwâ bə’aləfê ’êlîm bəriḇəḇwōṯ n^aḥălê-šāmen ha’etēn bəḵwōrî pišə‘î pərî ḇiṭənî ḥaṭṭa’ṯ nafəšî:

8 higîḏ ləḵā ’āḏām mah-ṭṭwōḇ ûmâ-yəhwâ dwōrēš mimməḵā kî ’im-‘ăśwōṯ mišəpāṭ wə’ahăḇaṯ ḥeseḏ wəhaṣənē‘a leḵeṯ ‘im-’ĕlōheyḵā: f

9 qwōl yəhwâ lā‘îr yiqərā’ wəṯûšîyâ yirə’eh šəmeḵā šimə‘û maṭṭeh ûmî yə‘āḏāh:

10 ‘wōḏ ha’iš bêṯ rāšā‘ ’ōṣərwōṯ reš^a‘ wə’êfaṯ rāzwōn zə‘ûmâ:

11 ha’ezəkeh bəmō’zənê reš^a‘ ûḇəḵîs ’aḇənê mirəmâ:

12 ’ăšer ‘ăšîreyhā mālə’û ḥāmās wəyōšəḇeyhā dibərû-šāqer ûləšwōnām rəmîyâ bəfîhem:

13 wəḡam-’ănî heḥĕlêṯî hakwōṯeḵā hašəmēm ‘al-ḥaṭṭō’ṯeḵā:

14 ’atâ ṯō’ḵal wəlō’ ṯiśəbā‘ wəyešəḥăḵā bəqirəbeḵā wəṯassēḡ wəlō’ ṯafəlîṭ wa’ăšer təfallēṭ l^aḥereḇ ’etēn:

15 ’atâ ṯizər^a‘ wəlō’ ṯiqəṣwōr ’atâ ṯiḏərōḵə-zayiṯ wəlō’-ṯāsûḵə šemen wəṯîrwōš wəlō’ ṯišəteh-yyāyin:

16 wəyišətammēr ḥuqqwōṯ ‘āmərî wəḵōl m^a‘ăśēh ḇêṯ-’^aḥə’āḇ watēləḵû bəmō‘ăṣwōṯām ləm^a‘an titî ’ōṯəḵā ləšammâ wəyōšəḇeyhā lišərēqâ wəḥerəpaṯ ‘ammî tiśśā’û: f