Numbers (Bemidbar) Chapter 4

‎1 ‏וַיְדַבֵּ֣ר יְהוָ֔ה אֶל־מֹשֶׁ֥ה וְאֶֽל־אַהֲרֹ֖ן לֵאמֹֽר׃

‎2 ‏נָשֹׂ֗א אֶת־רֹאשׁ֙ בְּנֵ֣י קְהָ֔ת מִתּ֖וֹךְ בְּנֵ֣י לֵוִ֑י לְמִשְׁפְּחֹתָ֖ם לְבֵ֥ית אֲבֹתָֽם׃

‎3 ‏מִבֶּ֨ן שְׁלֹשִׁ֤ים שָׁנָה֙ וָמַ֔עְלָה וְעַ֖ד בֶּן־חֲמִשִּׁ֣ים שָׁנָ֑ה כָּל־בָּא֙ לַצָּבָ֔א לַעֲשׂ֥וֹת מְלָאכָ֖ה בְּאֹ֥הֶל מוֹעֵֽד׃

‎4 ‏זֹ֛את עֲבֹדַ֥ת בְּנֵי־קְהָ֖ת בְּאֹ֣הֶל מוֹעֵ֑ד קֹ֖דֶשׁ הַקֳּדָשִֽׁים׃

‎5 ‏וּבָ֨א אַהֲרֹ֤ן וּבָנָיו֙ בִּנְסֹ֣עַ הַֽמַּחֲנֶ֔ה וְהוֹרִ֕דוּ אֵ֖ת פָּרֹ֣כֶת הַמָּסָ֑ךְ וְכִ֨סּוּ־בָ֔הּ אֵ֖ת אֲרֹ֥ן הָעֵדֻֽת׃

‎6 ‏וְנָתְנ֣וּ עָלָ֗יו כְּסוּי֙ ע֣וֹר תַּ֔חַשׁ וּפָרְשׂ֧וּ בֶֽגֶד־כְּלִ֛יל תְּכֵ֖לֶת מִלְמָ֑עְלָה וְשָׂמ֖וּ בַּדָּֽיו׃

‎7 ‏וְעַ֣ל׀ שֻׁלְחַ֣ן הַפָּנִ֗ים יִפְרְשׂוּ֮ בֶּ֣גֶד תְּכֵלֶת֒ וְנָתְנ֣וּ עָ֠לָיו אֶת־הַקְּעָרֹ֤ת וְאֶת־הַכַּפֹּת֙ וְאֶת־הַמְּנַקִּיֹּ֔ת וְאֵ֖ת קְשׂ֣וֹת הַנָּ֑סֶךְ וְלֶ֥חֶם הַתָּמִ֖יד עָלָ֥יו יִהְיֶֽה׃

‎8 ‏וּפָרְשׂ֣וּ עֲלֵיהֶ֗ם בֶּ֚גֶד תּוֹלַ֣עַת שָׁנִ֔י וְכִסּ֣וּ אֹת֔וֹ בְּמִכְסֵ֖ה ע֣וֹר תָּ֑חַשׁ וְשָׂמ֖וּ אֶת־בַּדָּֽיו׃

‎9 ‏וְלָקְח֣וּ׀ בֶּ֣גֶד תְּכֵ֗לֶת וְכִסּ֞וּ אֶת־מְנֹרַ֤ת הַמָּאוֹר֙ וְאֶת־נֵ֣רֹתֶ֔יהָ וְאֶת־מַלְקָחֶ֖יהָ וְאֶת־מַחְתֹּתֶ֑יהָ וְאֵת֙ כָּל־כְּלֵ֣י שַׁמְנָ֔הּ אֲשֶׁ֥ר יְשָׁרְתוּ־לָ֖הּ בָּהֶֽם׃

‎10 ‏וְנָתְנ֤וּ אֹתָהּ֙ וְאֶת־כָּל־כֵּלֶ֔יהָ אֶל־מִכְסֵ֖ה ע֣וֹר תָּ֑חַשׁ וְנָתְנ֖וּ עַל־הַמּֽוֹט׃

‎11 ‏וְעַ֣ל׀ מִזְבַּ֣ח הַזָּהָ֗ב יִפְרְשׂוּ֙ בֶּ֣גֶד תְּכֵ֔לֶת וְכִסּ֣וּ אֹת֔וֹ בְּמִכְסֵ֖ה ע֣וֹר תָּ֑חַשׁ וְשָׂמ֖וּ אֶת־בַּדָּֽיו׃

‎12 ‏וְלָקְחוּ֩ אֶת־כָּל־כְּלֵ֨י הַשָּׁרֵ֜ת אֲשֶׁ֧ר יְשָֽׁרְתוּ־בָ֣ם בַּקֹּ֗דֶשׁ וְנָֽתְנוּ֙ אֶל־בֶּ֣גֶד תְּכֵ֔לֶת וְכִסּ֣וּ אוֹתָ֔ם בְּמִכְסֵ֖ה ע֣וֹר תָּ֑חַשׁ וְנָתְנ֖וּ עַל־הַמּֽוֹט׃

‎13 ‏וְדִשְּׁנ֖וּ אֶת־הַמִּזְבֵּ֑חַ וּפָרְשׂ֣וּ עָלָ֔יו בֶּ֖גֶד אַרְגָּמָֽן׃

‎14 ‏וְנָתְנ֣וּ עָ֠לָיו אֶֽת־כָּל־כֵּלָ֞יו אֲשֶׁ֣ר יְֽשָׁרְת֧וּ עָלָ֣יו בָּהֶ֗ם אֶת־הַמַּחְתֹּ֤ת אֶת־הַמִּזְלָגֹת֙ וְאֶת־הַיָּעִ֣ים וְאֶת־הַמִּזְרָקֹ֔ת כֹּ֖ל כְּלֵ֣י הַמִּזְבֵּ֑חַ וּפָרְשׂ֣וּ עָלָ֗יו כְּס֛וּי ע֥וֹר תַּ֖חַשׁ וְשָׂמ֥וּ בַדָּֽיו׃

‎15 ‏וְכִלָּ֣ה אַֽהֲרֹן־וּ֠בָנָיו לְכַסֹּ֨ת אֶת־הַקֹּ֜דֶשׁ וְאֶת־כָּל־כְּלֵ֣י הַקֹּדֶשׁ֮ בִּנְסֹ֣עַ הַֽמַּחֲנֶה֒ וְאַחֲרֵי־כֵ֗ן יָבֹ֤אוּ בְנֵי־קְהָת֙ לָשֵׂ֔את וְלֹֽא־יִגְּע֥וּ אֶל־הַקֹּ֖דֶשׁ וָמֵ֑תוּ אֵ֛לֶּה מַשָּׂ֥א בְנֵֽי־קְהָ֖ת בְּאֹ֥הֶל מוֹעֵֽד׃

‎16 ‏וּפְקֻדַּ֞ת אֶלְעָזָ֣ר׀ בֶּן־אַהֲרֹ֣ן הַכֹּהֵ֗ן שֶׁ֤מֶן הַמָּאוֹר֙ וּקְטֹ֣רֶת הַסַּמִּ֔ים וּמִנְחַ֥ת הַתָּמִ֖יד וְשֶׁ֣מֶן הַמִּשְׁחָ֑ה פְּקֻדַּ֗ת כָּל־הַמִּשְׁכָּן֙ וְכָל־אֲשֶׁר־בּ֔וֹ בְּקֹ֖דֶשׁ וּבְכֵלָֽיו׃ ס

‎17 ‏וַיְדַבֵּ֣ר יְהוָ֔ה אֶל־מֹשֶׁ֥ה וְאֶֽל־אַהֲרֹ֖ן לֵאמֹֽר׃

‎18 ‏אַל־תַּכְרִ֕יתוּ אֶת־שֵׁ֖בֶט מִשְׁפְּחֹ֣ת הַקְּהָתִ֑י מִתּ֖וֹךְ הַלְוִיִּֽם׃

‎19 ‏וְזֹ֣את׀ עֲשׂ֣וּ לָהֶ֗ם וְחָיוּ֙ וְלֹ֣א יָמֻ֔תוּ בְּגִשְׁתָּ֖ם אֶת־קֹ֣דֶשׁ הַקֳּדָשִׁ֑ים אַהֲרֹ֤ן וּבָנָיו֙ יָבֹ֔אוּ וְשָׂמ֣וּ אוֹתָ֗ם אִ֥ישׁ אִ֛ישׁ עַל־עֲבֹדָת֖וֹ וְאֶל־מַשָּׂאֽוֹ׃

‎20 ‏וְלֹא־יָבֹ֧אוּ לִרְא֛וֹת כְּבַלַּ֥ע אֶת־הַקֹּ֖דֶשׁ וָמֵֽתוּ׃ פ

‎21 ‏וַיְדַבֵּ֥ר יְהוָ֖ה אֶל־מֹשֶׁ֥ה לֵּאמֹֽר׃

‎22 ‏נָשֹׂ֗א אֶת־רֹ֛אשׁ בְּנֵ֥י גֵרְשׁ֖וֹן גַּם־הֵ֑ם לְבֵ֥ית אֲבֹתָ֖ם לְמִשְׁפְּחֹתָֽם׃

‎23 ‏מִבֶּן֩ שְׁלֹשִׁ֨ים שָׁנָ֜ה וָמַ֗עְלָה עַ֛ד בֶּן־חֲמִשִּׁ֥ים שָׁנָ֖ה תִּפְקֹ֣ד אוֹתָ֑ם כָּל־הַבָּא֙ לִצְבֹ֣א צָבָ֔א לַעֲבֹ֥ד עֲבֹדָ֖ה בְּאֹ֥הֶל מוֹעֵֽד׃

‎24 ‏זֹ֣את עֲבֹדַ֔ת מִשְׁפְּחֹ֖ת הַגֵּרְשֻׁנִּ֑י לַעֲבֹ֖ד וּלְמַשָּֽׂא׃

‎25 ‏וְנָ֨שְׂא֜וּ אֶת־יְרִיעֹ֤ת הַמִּשְׁכָּן֙ וְאֶת־אֹ֣הֶל מוֹעֵ֔ד מִכְסֵ֕הוּ וּמִכְסֵ֛ה הַתַּ֥חַשׁ אֲשֶׁר־עָלָ֖יו מִלְמָ֑עְלָה וְאֶ֨ת־מָסַ֔ךְ פֶּ֖תַח אֹ֥הֶל מוֹעֵֽד׃

‎26 ‏וְאֵת֩ קַלְעֵ֨י הֶֽחָצֵ֜ר וְאֶת־מָסַ֣ךְ׀ פֶּ֣תַח׀ שַׁ֣עַר הֶחָצֵ֗ר אֲשֶׁ֨ר עַל־הַמִּשְׁכָּ֤ן וְעַל־הַמִּזְבֵּ֙חַ֙ סָבִ֔יב וְאֵת֙ מֵֽיתְרֵיהֶ֔ם וְאֶֽת־כָּל־כְּלֵ֖י עֲבֹדָתָ֑ם וְאֵ֨ת כָּל־אֲשֶׁ֧ר יֵעָשֶׂ֛ה לָהֶ֖ם וְעָבָֽדוּ׃

‎27 ‏עַל־פִּי֩ אַהֲרֹ֨ן וּבָנָ֜יו תִּהְיֶ֗ה כָּל־עֲבֹדַת֙ בְּנֵ֣י הַגֵּרְשֻׁנִּ֔י לְכָל־מַשָּׂאָ֔ם וּלְכֹ֖ל עֲבֹדָתָ֑ם וּפְקַדְתֶּ֤ם עֲלֵהֶם֙ בְּמִשְׁמֶ֔רֶת אֵ֖ת כָּל־מַשָּׂאָֽם׃

‎28 ‏זֹ֣את עֲבֹדַ֗ת מִשְׁפְּחֹ֛ת בְּנֵ֥י הַגֵּרְשֻׁנִּ֖י בְּאֹ֣הֶל מוֹעֵ֑ד וּמִ֨שְׁמַרְתָּ֔ם בְּיַד֙ אִֽיתָמָ֔ר בֶּֽן־אַהֲרֹ֖ן הַכֹּהֵֽן׃ פ

‎29 ‏בְּנֵ֖י מְרָרִ֑י לְמִשְׁפְּחֹתָ֥ם לְבֵית־אֲבֹתָ֖ם תִּפְקֹ֥ד אֹתָֽם׃

‎30 ‏מִבֶּן֩ שְׁלֹשִׁ֨ים שָׁנָ֜ה וָמַ֗עְלָה וְעַ֛ד בֶּן־חֲמִשִּׁ֥ים שָׁנָ֖ה תִּפְקְדֵ֑ם כָּל־הַבָּא֙ לַצָּבָ֔א לַעֲבֹ֕ד אֶת־עֲבֹדַ֖ת אֹ֥הֶל מוֹעֵֽד׃

‎31 ‏וְזֹאת֙ מִשְׁמֶ֣רֶת מַשָּׂאָ֔ם לְכָל־עֲבֹדָתָ֖ם בְּאֹ֣הֶל מוֹעֵ֑ד קַרְשֵׁי֙ הַמִּשְׁכָּ֔ן וּבְרִיחָ֖יו וְעַמּוּדָ֥יו וַאֲדָנָֽיו׃

‎32 ‏וְעַמּוּדֵי֩ הֶחָצֵ֨ר סָבִ֜יב וְאַדְנֵיהֶ֗ם וִֽיתֵדֹתָם֙ וּמֵ֣יתְרֵיהֶ֔ם לְכָל־כְּלֵיהֶ֔ם וּלְכֹ֖ל עֲבֹדָתָ֑ם וּבְשֵׁמֹ֣ת תִּפְקְד֔וּ אֶת־כְּלֵ֖י מִשְׁמֶ֥רֶת מַשָּׂאָֽם׃

‎33 ‏זֹ֣את עֲבֹדַ֗ת מִשְׁפְּחֹת֙ בְּנֵ֣י מְרָרִ֔י לְכָל־עֲבֹדָתָ֖ם בְּאֹ֣הֶל מוֹעֵ֑ד בְּיַד֙ אִֽיתָמָ֔ר בֶּֽן־אַהֲרֹ֖ן הַכֹּהֵֽן׃

‎34 ‏וַיִּפְקֹ֨ד מֹשֶׁ֧ה וְאַהֲרֹ֛ן וּנְשִׂיאֵ֥י הָעֵדָ֖ה אֶת־בְּנֵ֣י הַקְּהָתִ֑י לְמִשְׁפְּחֹתָ֖ם וּלְבֵ֥ית אֲבֹתָֽם׃

‎35 ‏מִבֶּ֨ן שְׁלֹשִׁ֤ים שָׁנָה֙ וָמַ֔עְלָה וְעַ֖ד בֶּן־חֲמִשִּׁ֣ים שָׁנָ֑ה כָּל־הַבָּא֙ לַצָּבָ֔א לַעֲבֹדָ֖ה בְּאֹ֥הֶל מוֹעֵֽד׃

‎36 ‏וַיִּהְי֥וּ פְקֻדֵיהֶ֖ם לְמִשְׁפְּחֹתָ֑ם אַלְפַּ֕יִם שְׁבַ֥ע מֵא֖וֹת וַחֲמִשִּֽׁים׃

‎37 ‏אֵ֤לֶּה פְקוּדֵי֙ מִשְׁפְּחֹ֣ת הַקְּהָתִ֔י כָּל־הָעֹבֵ֖ד בְּאֹ֣הֶל מוֹעֵ֑ד אֲשֶׁ֨ר פָּקַ֤ד מֹשֶׁה֙ וְאַהֲרֹ֔ן עַל־פִּ֥י יְהוָ֖ה בְּיַד־מֹשֶֽׁה׃ ס

‎38 ‏וּפְקוּדֵ֖י בְּנֵ֣י גֵרְשׁ֑וֹן לְמִשְׁפְּחוֹתָ֖ם וּלְבֵ֥ית אֲבֹתָֽם׃

‎39 ‏מִבֶּ֨ן שְׁלֹשִׁ֤ים שָׁנָה֙ וָמַ֔עְלָה וְעַ֖ד בֶּן־חֲמִשִּׁ֣ים שָׁנָ֑ה כָּל־הַבָּא֙ לַצָּבָ֔א לַעֲבֹדָ֖ה בְּאֹ֥הֶל מוֹעֵֽד׃

‎40 ‏וַיִּֽהְיוּ֙ פְּקֻ֣דֵיהֶ֔ם לְמִשְׁפְּחֹתָ֖ם לְבֵ֣ית אֲבֹתָ֑ם אַלְפַּ֕יִם וְשֵׁ֥שׁ מֵא֖וֹת וּשְׁלֹשִֽׁים׃

‎41 ‏אֵ֣לֶּה פְקוּדֵ֗י מִשְׁפְּחֹת֙ בְּנֵ֣י גֵרְשׁ֔וֹן כָּל־הָעֹבֵ֖ד בְּאֹ֣הֶל מוֹעֵ֑ד אֲשֶׁ֨ר פָּקַ֥ד מֹשֶׁ֛ה וְאַהֲרֹ֖ן עַל־פִּ֥י יְהוָֽה׃

‎42 ‏וּפְקוּדֵ֕י מִשְׁפְּחֹ֖ת בְּנֵ֣י מְרָרִ֑י לְמִשְׁפְּחֹתָ֖ם לְבֵ֥ית אֲבֹתָֽם׃

‎43 ‏מִבֶּ֨ן שְׁלֹשִׁ֤ים שָׁנָה֙ וָמַ֔עְלָה וְעַ֖ד בֶּן־חֲמִשִּׁ֣ים שָׁנָ֑ה כָּל־הַבָּא֙ לַצָּבָ֔א לַעֲבֹדָ֖ה בְּאֹ֥הֶל מוֹעֵֽד׃

‎44 ‏וַיִּהְי֥וּ פְקֻדֵיהֶ֖ם לְמִשְׁפְּחֹתָ֑ם שְׁלֹ֥שֶׁת אֲלָפִ֖ים וּמָאתָֽיִם׃

‎45 ‏אֵ֣לֶּה פְקוּדֵ֔י מִשְׁפְּחֹ֖ת בְּנֵ֣י מְרָרִ֑י אֲשֶׁ֨ר פָּקַ֤ד מֹשֶׁה֙ וְאַהֲרֹ֔ן עַל־פִּ֥י יְהוָ֖ה בְּיַד־מֹשֶֽׁה׃

‎46 ‏כָּֽל־הַפְּקֻדִ֡ים אֲשֶׁר֩ פָּקַ֨ד מֹשֶׁ֧ה וְאַהֲרֹ֛ן וּנְשִׂיאֵ֥י יִשְׂרָאֵ֖ל אֶת־הַלְוִיִּ֑ם לְמִשְׁפְּחֹתָ֖ם וּלְבֵ֥ית אֲבֹתָֽם׃

‎47 ‏מִבֶּ֨ן שְׁלֹשִׁ֤ים שָׁנָה֙ וָמַ֔עְלָה וְעַ֖ד בֶּן־חֲמִשִּׁ֣ים שָׁנָ֑ה כָּל־הַבָּ֗א לַעֲבֹ֨ד עֲבֹדַ֧ת עֲבֹדָ֛ה וַעֲבֹדַ֥ת מַשָּׂ֖א בְּאֹ֥הֶל מוֹעֵֽד׃

‎48 ‏וַיִּהְי֖וּ פְּקֻדֵיהֶ֑ם שְׁמֹנַ֣ת אֲלָפִ֔ים וַחֲמֵ֥שׁ מֵא֖וֹת וּשְׁמֹנִֽים׃

‎49 ‏עַל־פִּ֨י יְהוָ֜ה פָּקַ֤ד אוֹתָם֙ בְּיַד־מֹשֶׁ֔ה אִ֥ישׁ אִ֛ישׁ עַל־עֲבֹדָת֖וֹ וְעַל־מַשָּׂא֑וֹ וּפְקֻדָ֕יו אֲשֶׁר־צִוָּ֥ה יְהוָ֖ה אֶת־מֹשֶֽׁה׃ פ

1 wayəḏabēr yəhwâ ’el-mōšeh wə’el-’ahărōn lē’mōr:

2 nāśō’ ’eṯ-rō’š bənê qəhāṯ mitwōḵə bənê lēwî ləmišəpəḥōṯām ləḇêṯ ’ăḇōṯām:

3 miben šəlōšîm šānâ wām^a‘əlâ wə‘aḏ ben-ḥămiššîm šānâ kāl-bā’ laṣṣāḇā’ l^a‘ăśwōṯ məlā’ḵâ bə’ōhel mwō‘ēḏ:

4 zō’ṯ ‘ăḇōḏaṯ bənê-qəhāṯ bə’ōhel mwō‘ēḏ qōḏeš haqqŏḏāšîm:

5 ûḇā’ ’ahărōn ûḇānāyw binəsō‘a hamm^aḥăneh wəhwōriḏû ’ēṯ pārōḵeṯ hammāsāḵə wəḵissû-ḇāh ’ēṯ ’ărōn hā‘ēḏuṯ:

6 wənāṯənû ‘ālāyw kəsûy ‘wōr t^aḥaš ûfārəśû ḇeḡeḏ-kəlîl təḵēleṯ miləmā‘əlâ wəśāmû badāyw:

7 wə‘al| šuləḥan hapānîm yifərəśû beḡeḏ təḵēleṯ wənāṯənû ‘ālāyw ’eṯ-haqqə‘ārōṯ wə’eṯ-hakapōṯ wə’eṯ-hammənaqqîyōṯ wə’ēṯ qəśwōṯ hannāseḵə wəleḥem hatāmîḏ ‘ālāyw yihəyeh:

8 ûfārəśû ‘ălêhem beḡeḏ twōl^a‘aṯ šānî wəḵissû ’ōṯwō bəmiḵəsēh ‘wōr tāḥaš wəśāmû ’eṯ-badāyw:

9 wəlāqəḥû| beḡeḏ təḵēleṯ wəḵissû ’eṯ-mənōraṯ hammā’wōr wə’eṯ-nērōṯeyhā wə’eṯ-maləqāḥeyhā wə’eṯ-m^aḥətōṯeyhā wə’ēṯ kāl-kəlê šamənāh ’ăšer yəšārəṯû-lāh bâem:

10 wənāṯənû ’ōṯāh wə’eṯ-kāl-kēleyhā ’el-miḵəsēh ‘wōr tāḥaš wənāṯənû ‘al-hammwōṭ:

11 wə‘al| mizəb^aḥ hazzâāḇ yifərəśû beḡeḏ təḵēleṯ wəḵissû ’ōṯwō bəmiḵəsēh ‘wōr tāḥaš wəśāmû ’eṯ-badāyw:

12 wəlāqəḥû ’eṯ-kāl-kəlê haššārēṯ ’ăšer yəšārəṯû-ḇām baqqōḏeš wənāṯənû ’el-beḡeḏ təḵēleṯ wəḵissû ’wōṯām bəmiḵəsēh ‘wōr tāḥaš wənāṯənû ‘al-hammwōṭ:

13 wəḏiššənû ’eṯ-hammizəbēḥa ûfārəśû ‘ālāyw beḡeḏ ’arəgāmān:

14 wənāṯənû ‘ālāyw ’eṯ-kāl-kēlāyw ’ăšer yəšārəṯû ‘ālāyw bâem ’eṯ-hamm^aḥətōṯ ’eṯ-hammizəlāḡōṯ wə’eṯ-hayyā‘îm wə’eṯ-hammizərāqōṯ kōl kəlê hammizəbēḥa ûfārəśû ‘ālāyw kəsûy ‘wōr t^aḥaš wəśāmû ḇadāyw:

15 wəḵillâ ’ahărōn-ûḇānāyw ləḵassōṯ ’eṯ-haqqōḏeš wə’eṯ-kāl-kəlê haqqōḏeš binəsō‘a hamm^aḥăneh wə’^aḥărê-ḵēn yāḇō’û ḇənê-qəhāṯ lāśē’ṯ wəlō’-yigə‘û ’el-haqqōḏeš wāmēṯû ’ēlleh maśśā’ ḇənê-qəhāṯ bə’ōhel mwō‘ēḏ:

16 ûfəqudaṯ ’elə‘āzār| ben-’ahărōn hakōhēn šemen hammā’wōr ûqəṭōreṯ hassammîm ûminəḥaṯ hatāmîḏ wəšemen hammišəḥâ pəqudaṯ kāl-hammišəkān wəḵāl-’ăšer-bwō bəqōḏeš ûḇəḵēlāyw: s

17 wayəḏabēr yəhwâ ’el-mōšeh wə’el-’ahărōn lē’mōr:

18 ’al-taḵərîṯû ’eṯ-šēḇeṭ mišəpəḥōṯ haqqəhāṯî mitwōḵə haləwîyim:

19 wəzō’ṯ| ‘ăśû lâem wəḥāyû wəlō’ yāmuṯû bəḡišətām ’eṯ-qōḏeš haqqŏḏāšîm ’ahărōn ûḇānāyw yāḇō’û wəśāmû ’wōṯām ’îš ’îš ‘al-‘ăḇōḏāṯwō wə’el-maśśā’wō:

20 wəlō’-yāḇō’û lirə’wōṯ kəḇall^a‘ ’eṯ-haqqōḏeš wāmēṯû: f

21 wayəḏabēr yəhwâ ’el-mōšeh llē’mōr:

22 nāśō’ ’eṯ-rō’š bənê ḡērəšwōn gam-hēm ləḇêṯ ’ăḇōṯām ləmišəpəḥōṯām:

23 miben šəlōšîm šānâ wām^a‘əlâ ‘aḏ ben-ḥămiššîm šānâ tifəqōḏ ’wōṯām kāl-habā’ liṣəḇō’ ṣāḇā’ l^a‘ăḇōḏ ‘ăḇōḏâ bə’ōhel mwō‘ēḏ:

24 zō’ṯ ‘ăḇōḏaṯ mišəpəḥōṯ hagērəšunnî l^a‘ăḇōḏ ûləmaśśā’:

25 wənāśə’û ’eṯ-yərî‘ōṯ hammišəkān wə’eṯ-’ōhel mwō‘ēḏ miḵəsēhû ûmiḵəsēh hat^aḥaš ’ăšer-‘ālāyw miləmā‘əlâ wə’eṯ-māsaḵə peṯ^aḥ ’ōhel mwō‘ēḏ:

26 wə’ēṯ qalə‘ê heḥāṣēr wə’eṯ-māsaḵə| peṯ^aḥ| š^a‘ar heḥāṣēr ’ăšer ‘al-hammišəkān wə‘al-hammizəbēḥa sāḇîḇ wə’ēṯ mêṯərêhem wə’eṯ-kāl-kəlê ‘ăḇōḏāṯām wə’ēṯ kāl-’ăšer yē‘āśeh lâem wə‘āḇāḏû:

27 ‘al-pî ’ahărōn ûḇānāyw tihəyeh kāl-‘ăḇōḏaṯ bənê hagērəšunnî ləḵāl-maśśā’ām ûləḵōl ‘ăḇōḏāṯām ûfəqaḏətem ‘ălēhem bəmišəmereṯ ’ēṯ kāl-maśśā’ām:

28 zō’ṯ ‘ăḇōḏaṯ mišəpəḥōṯ bənê hagērəšunnî bə’ōhel mwō‘ēḏ ûmišəmarətām bəyaḏ ’îṯāmār ben-’ahărōn hakōhēn: f

29 bənê mərārî ləmišəpəḥōṯām ləḇêṯ-’ăḇōṯām tifəqōḏ ’ōṯām:

30 miben šəlōšîm šānâ wām^a‘əlâ wə‘aḏ ben-ḥămiššîm šānâ tifəqəḏēm kāl-habā’ laṣṣāḇā’ l^a‘ăḇōḏ ’eṯ-‘ăḇōḏaṯ ’ōhel mwō‘ēḏ:

31 wəzō’ṯ mišəmereṯ maśśā’ām ləḵāl-‘ăḇōḏāṯām bə’ōhel mwō‘ēḏ qarəšê hammišəkān ûḇərîḥāyw wə‘ammûḏāyw wa’ăḏānāyw:

32 wə‘ammûḏê heḥāṣēr sāḇîḇ wə’aḏənêhem wîṯēḏōṯām ûmêṯərêhem ləḵāl-kəlêhem ûləḵōl ‘ăḇōḏāṯām ûḇəšēmōṯ tifəqəḏû ’eṯ-kəlê mišəmereṯ maśśā’ām:

33 zō’ṯ ‘ăḇōḏaṯ mišəpəḥōṯ bənê mərārî ləḵāl-‘ăḇōḏāṯām bə’ōhel mwō‘ēḏ bəyaḏ ’îṯāmār ben-’ahărōn hakōhēn:

34 wayyifəqōḏ mōšeh wə’ahărōn ûnəśî’ê hā‘ēḏâ ’eṯ-bənê haqqəhāṯî ləmišəpəḥōṯām ûləḇêṯ ’ăḇōṯām:

35 miben šəlōšîm šānâ wām^a‘əlâ wə‘aḏ ben-ḥămiššîm šānâ kāl-habā’ laṣṣāḇā’ l^a‘ăḇōḏâ bə’ōhel mwō‘ēḏ:

36 wayyihəyû fəquḏêhem ləmišəpəḥōṯām ’aləpayim šəḇ^a‘ mē’wōṯ w^aḥămiššîm:

37 ’ēlleh fəqûḏê mišəpəḥōṯ haqqəhāṯî kāl-hā‘ōḇēḏ bə’ōhel mwō‘ēḏ ’ăšer pāqaḏ mōšeh wə’ahărōn ‘al-pî yəhwâ bəyaḏ-mōšeh: s

38 ûfəqûḏê bənê ḡērəšwōn ləmišəpəḥwōṯām ûləḇêṯ ’ăḇōṯām:

39 miben šəlōšîm šānâ wām^a‘əlâ wə‘aḏ ben-ḥămiššîm šānâ kāl-habā’ laṣṣāḇā’ l^a‘ăḇōḏâ bə’ōhel mwō‘ēḏ:

40 wayyihəyû pəquḏêhem ləmišəpəḥōṯām ləḇêṯ ’ăḇōṯām ’aləpayim wəšēš mē’wōṯ ûšəlōšîm:

41 ’ēlleh fəqûḏê mišəpəḥōṯ bənê ḡērəšwōn kāl-hā‘ōḇēḏ bə’ōhel mwō‘ēḏ ’ăšer pāqaḏ mōšeh wə’ahărōn ‘al-pî yəhwâ:

42 ûfəqûḏê mišəpəḥōṯ bənê mərārî ləmišəpəḥōṯām ləḇêṯ ’ăḇōṯām:

43 miben šəlōšîm šānâ wām^a‘əlâ wə‘aḏ ben-ḥămiššîm šānâ kāl-habā’ laṣṣāḇā’ l^a‘ăḇōḏâ bə’ōhel mwō‘ēḏ:

44 wayyihəyû fəquḏêhem ləmišəpəḥōṯām šəlōšeṯ ’ălāfîm ûmā’ṯāyim:

45 ’ēlleh fəqûḏê mišəpəḥōṯ bənê mərārî ’ăšer pāqaḏ mōšeh wə’ahărōn ‘al-pî yəhwâ bəyaḏ-mōšeh:

46 kāl-hapəquḏîm ’ăšer pāqaḏ mōšeh wə’ahărōn ûnəśî’ê yiśərā’ēl ’eṯ-haləwîyim ləmišəpəḥōṯām ûləḇêṯ ’ăḇōṯām:

47 miben šəlōšîm šānâ wām^a‘əlâ wə‘aḏ ben-ḥămiššîm šānâ kāl-habā’ l^a‘ăḇōḏ ‘ăḇōḏaṯ ‘ăḇōḏâ w^a‘ăḇōḏaṯ maśśā’ bə’ōhel mwō‘ēḏ:

48 wayyihəyû pəquḏêhem šəmōnaṯ ’ălāfîm w^aḥămēš mē’wōṯ ûšəmōnîm:

49 ‘al-pî yəhwâ pāqaḏ ’wōṯām bəyaḏ-mōšeh ’îš ’îš ‘al-‘ăḇōḏāṯwō wə‘al-maśśā’wō ûfəquḏāyw ’ăšer-ṣiûâ yəhwâ ’eṯ-mōšeh: f