Numbers (Bemidbar) Chapter 8

‎1 ‏וַיְדַבֵּ֥ר יְהוָ֖ה אֶל־מֹשֶׁ֥ה לֵּאמֹֽר׃

‎2 ‏דַּבֵּר֙ אֶֽל־אַהֲרֹ֔ן וְאָמַרְתָּ֖ אֵלָ֑יו בְּהַעֲלֹֽתְךָ֙ אֶת־הַנֵּרֹ֔ת אֶל־מוּל֙ פְּנֵ֣י הַמְּנוֹרָ֔ה יָאִ֖ירוּ שִׁבְעַ֥ת הַנֵּרֽוֹת׃

‎3 ‏וַיַּ֤עַשׂ כֵּן֙ אַהֲרֹ֔ן אֶל־מוּל֙ פְּנֵ֣י הַמְּנוֹרָ֔ה הֶעֱלָ֖ה נֵרֹתֶ֑יהָ כַּֽאֲשֶׁ֛ר צִוָּ֥ה יְהוָ֖ה אֶת־מֹשֶֽׁה׃

‎4 ‏וְזֶ֨ה מַעֲשֵׂ֤ה הַמְּנֹרָה֙ מִקְשָׁ֣ה זָהָ֔ב עַד־יְרֵכָ֥הּ עַד־פִּרְחָ֖הּ מִקְשָׁ֣ה הִ֑וא כַּמַּרְאֶ֗ה אֲשֶׁ֨ר הֶרְאָ֤ה יְהוָה֙ אֶת־מֹשֶׁ֔ה כֵּ֥ן עָשָׂ֖ה אֶת־הַמְּנֹרָֽה׃ פ

‎5 ‏וַיְדַבֵּ֥ר יְהוָ֖ה אֶל־מֹשֶׁ֥ה לֵּאמֹֽר׃

‎6 ‏קַ֚ח אֶת־הַלְוִיִּ֔ם מִתּ֖וֹךְ בְּנֵ֣י יִשְׂרָאֵ֑ל וְטִהַרְתָּ֖ אֹתָֽם׃

‎7 ‏וְכֹֽה־תַעֲשֶׂ֤ה לָהֶם֙ לְטַֽהֲרָ֔ם הַזֵּ֥ה עֲלֵיהֶ֖ם מֵ֣י חַטָּ֑את וְהֶעֱבִ֤ירוּ תַ֙עַר֙ עַל־כָּל־בְּשָׂרָ֔ם וְכִבְּס֥וּ בִגְדֵיהֶ֖ם וְהִטֶּהָֽרוּ׃

‎8 ‏וְלָֽקְחוּ֙ פַּ֣ר בֶּן־בָּקָ֔ר וּמִנְחָת֔וֹ סֹ֖לֶת בְּלוּלָ֣ה בַשָּׁ֑מֶן וּפַר־שֵׁנִ֥י בֶן־בָּקָ֖ר תִּקַּ֥ח לְחַטָּֽאת׃

‎9 ‏וְהִקְרַבְתָּ֙ אֶת־הַלְוִיִּ֔ם לִפְנֵ֖י אֹ֣הֶל מוֹעֵ֑ד וְהִ֨קְהַלְתָּ֔ אֶֽת־כָּל־עֲדַ֖ת בְּנֵ֥י יִשְׂרָאֵֽל׃

‎10 ‏וְהִקְרַבְתָּ֥ אֶת־הַלְוִיִּ֖ם לִפְנֵ֣י יְהוָ֑ה וְסָמְכ֧וּ בְנֵי־יִשְׂרָאֵ֛ל אֶת־יְדֵיהֶ֖ם עַל־הַלְוִיִּֽם׃

‎11 ‏וְהֵנִיף֩ אַהֲרֹ֨ן אֶת־הַלְוִיִּ֤ם תְּנוּפָה֙ לִפְנֵ֣י יְהוָ֔ה מֵאֵ֖ת בְּנֵ֣י יִשְׂרָאֵ֑ל וְהָי֕וּ לַעֲבֹ֖ד אֶת־עֲבֹדַ֥ת יְהוָֽה׃

‎12 ‏וְהַלְוִיִּם֙ יִסְמְכ֣וּ אֶת־יְדֵיהֶ֔ם עַ֖ל רֹ֣אשׁ הַפָּרִ֑ים וַ֠עֲשֵׂה אֶת־הָאֶחָ֨ד חַטָּ֜את וְאֶת־הָאֶחָ֤ד עֹלָה֙ לַֽיהוָ֔ה לְכַפֵּ֖ר עַל־הַלְוִיִּֽם׃

‎13 ‏וְהַֽעֲמַדְתָּ֙ אֶת־הַלְוִיִּ֔ם לִפְנֵ֥י אַהֲרֹ֖ן וְלִפְנֵ֣י בָנָ֑יו וְהֵנַפְתָּ֥ אֹתָ֛ם תְּנוּפָ֖ה לַֽיהוָֽה׃

‎14 ‏וְהִבְדַּלְתָּ֙ אֶת־הַלְוִיִּ֔ם מִתּ֖וֹךְ בְּנֵ֣י יִשְׂרָאֵ֑ל וְהָ֥יוּ לִ֖י הַלְוִיִּֽם׃

‎15 ‏וְאַֽחֲרֵי־כֵן֙ יָבֹ֣אוּ הַלְוִיִּ֔ם לַעֲבֹ֖ד אֶת־אֹ֣הֶל מוֹעֵ֑ד וְטִֽהַרְתָּ֣ אֹתָ֔ם וְהֵנַפְתָּ֥ אֹתָ֖ם תְּנוּפָֽה׃

‎16 ‏כִּי֩ נְתֻנִ֨ים נְתֻנִ֥ים הֵ֙מָּה֙ לִ֔י מִתּ֖וֹךְ בְּנֵ֣י יִשְׂרָאֵ֑ל תַּחַת֩ פִּטְרַ֨ת כָּל־רֶ֜חֶם בְּכ֥וֹר כֹּל֙ מִבְּנֵ֣י יִשְׂרָאֵ֔ל לָקַ֥חְתִּי אֹתָ֖ם לִֽי׃

‎17 ‏כִּ֣י לִ֤י כָל־בְּכוֹר֙ בִּבְנֵ֣י יִשְׂרָאֵ֔ל בָּאָדָ֖ם וּבַבְּהֵמָ֑ה בְּי֗וֹם הַכֹּתִ֤י כָל־בְּכוֹר֙ בְּאֶ֣רֶץ מִצְרַ֔יִם הִקְדַּ֥שְׁתִּי אֹתָ֖ם לִֽי׃

‎18 ‏וָאֶקַּח֙ אֶת־הַלְוִיִּ֔ם תַּ֥חַת כָּל־בְּכ֖וֹר בִּבְנֵ֥י יִשְׂרָאֵֽל׃

‎19 ‏וָאֶתְּנָ֨ה אֶת־הַלְוִיִּ֜ם נְתֻנִ֣ים׀ לְאַהֲרֹ֣ן וּלְבָנָ֗יו מִתּוֹךְ֮ בְּנֵ֣י יִשְׂרָאֵל֒ לַעֲבֹ֞ד אֶת־עֲבֹדַ֤ת בְּנֵֽי־יִשְׂרָאֵל֙ בְּאֹ֣הֶל מוֹעֵ֔ד וּלְכַפֵּ֖ר עַל־בְּנֵ֣י יִשְׂרָאֵ֑ל וְלֹ֨א יִהְיֶ֜ה בִּבְנֵ֤י יִשְׂרָאֵל֙ נֶ֔גֶף בְּגֶ֥שֶׁת בְּנֵֽי־יִשְׂרָאֵ֖ל אֶל־הַקֹּֽדֶשׁ׃

‎20 ‏וַיַּ֨עַשׂ מֹשֶׁ֧ה וְאַהֲרֹ֛ן וְכָל־עֲדַ֥ת בְּנֵי־יִשְׂרָאֵ֖ל לַלְוִיִּ֑ם כְּ֠כֹל אֲשֶׁר־צִוָּ֨ה יְהוָ֤ה אֶת־מֹשֶׁה֙ לַלְוִיִּ֔ם כֵּן־עָשׂ֥וּ לָהֶ֖ם בְּנֵ֥י יִשְׂרָאֵֽל׃

‎21 ‏וַיִּֽתְחַטְּא֣וּ הַלְוִיִּ֗ם וַֽיְכַבְּסוּ֙ בִּגְדֵיהֶ֔ם וַיָּ֨נֶף אַהֲרֹ֥ן אֹתָ֛ם תְּנוּפָ֖ה לִפְנֵ֣י יְהוָ֑ה וַיְכַפֵּ֧ר עֲלֵיהֶ֛ם אַהֲרֹ֖ן לְטַהֲרָֽם׃

‎22 ‏וְאַחֲרֵי־כֵ֞ן בָּ֣אוּ הַלְוִיִּ֗ם לַעֲבֹ֤ד אֶת־עֲבֹֽדָתָם֙ בְּאֹ֣הֶל מוֹעֵ֔ד לִפְנֵ֥י אַהֲרֹ֖ן וְלִפְנֵ֣י בָנָ֑יו כַּאֲשֶׁר֩ צִוָּ֨ה יְהוָ֤ה אֶת־מֹשֶׁה֙ עַל־הַלְוִיִּ֔ם כֵּ֖ן עָשׂ֥וּ לָהֶֽם׃ ס

‎23 ‏וַיְדַבֵּ֥ר יְהוָ֖ה אֶל־מֹשֶׁ֥ה לֵּאמֹֽר׃

‎24 ‏זֹ֖את אֲשֶׁ֣ר לַלְוִיִּ֑ם מִבֶּן֩ חָמֵ֨שׁ וְעֶשְׂרִ֤ים שָׁנָה֙ וָמַ֔עְלָה יָבוֹא֙ לִצְבֹ֣א צָבָ֔א בַּעֲבֹדַ֖ת אֹ֥הֶל מוֹעֵֽד׃

‎25 ‏וּמִבֶּן֙ חֲמִשִּׁ֣ים שָׁנָ֔ה יָשׁ֖וּב מִצְּבָ֣א הָעֲבֹדָ֑ה וְלֹ֥א יַעֲבֹ֖ד עֽוֹד׃

‎26 ‏וְשֵׁרֵ֨ת אֶת־אֶחָ֜יו בְּאֹ֤הֶל מוֹעֵד֙ לִשְׁמֹ֣ר מִשְׁמֶ֔רֶת וַעֲבֹדָ֖ה לֹ֣א יַעֲבֹ֑ד כָּ֛כָה תַּעֲשֶׂ֥ה לַלְוִיִּ֖ם בְּמִשְׁמְרֹתָֽם׃ פ

1 wayəḏabēr yəhwâ ’el-mōšeh llē’mōr:

2 dabēr ’el-’ahărōn wə’āmarətā ’ēlāyw bəh^a‘ălōṯəḵā ’eṯ-hannērōṯ ’el-mûl pənê hammənwōrâ yā’îrû šiḇə‘aṯ hannērwōṯ:

3 wayy^a‘aś kēn ’ahărōn ’el-mûl pənê hammənwōrâ he‘ĕlâ nērōṯeyhā ka’ăšer ṣiûâ yəhwâ ’eṯ-mōšeh:

4 wəzeh m^a‘ăśēh hammənōrâ miqəšâ zâāḇ ‘aḏ-yərēḵāh ‘aḏ-pirəḥāh miqəšâ hiw’ kammarə’eh ’ăšer herə’â yəhwâ ’eṯ-mōšeh kēn ‘āśâ ’eṯ-hammənōrâ: f

5 wayəḏabēr yəhwâ ’el-mōšeh llē’mōr:

6 q^aḥ ’eṯ-haləwîyim mitwōḵə bənê yiśərā’ēl wəṭiharətā ’ōṯām:

7 wəḵōh-ṯ^a‘ăśeh lâem ləṭahărām hazzēh ‘ălêhem mê ḥaṭṭā’ṯ wəhe‘ĕḇîrû ṯ^a‘ar ‘al-kāl-bəśārām wəḵibəsû ḇiḡəḏêhem wəhiṭṭehārû:

8 wəlāqəḥû par ben-bāqār ûminəḥāṯwō sōleṯ bəlûlâ ḇaššāmen ûfar-šēnî ḇen-bāqār tiqq^aḥ ləḥaṭṭā’ṯ:

9 wəhiqəraḇətā ’eṯ-haləwîyim lifənê ’ōhel mwō‘ēḏ wəhiqəhalətā ’eṯ-kāl-‘ăḏaṯ bənê yiśərā’ēl:

10 wəhiqəraḇətā ’eṯ-haləwîyim lifənê yəhwâ wəsāməḵû ḇənê-yiśərā’ēl ’eṯ-yəḏêhem ‘al-haləwîyim:

11 wəhēnîf ’ahărōn ’eṯ-haləwîyim tənûfâ lifənê yəhwâ mē’ēṯ bənê yiśərā’ēl wəhāyû l^a‘ăḇōḏ ’eṯ-‘ăḇōḏaṯ yəhwâ:

12 wəhaləwîyim yisəməḵû ’eṯ-yəḏêhem ‘al rō’š hapārîm w^a‘ăśēh ’eṯ-hā’eḥāḏ ḥaṭṭā’ṯ wə’eṯ-hā’eḥāḏ ‘ōlâ layhwâ ləḵapēr ‘al-haləwîyim:

13 wəh^a‘ămaḏətā ’eṯ-haləwîyim lifənê ’ahărōn wəlifənê ḇānāyw wəhēnafətā ’ōṯām tənûfâ layhwâ:

14 wəhiḇədalətā ’eṯ-haləwîyim mitwōḵə bənê yiśərā’ēl wəhāyû lî haləwîyim:

15 wə’^aḥărê-ḵēn yāḇō’û haləwîyim l^a‘ăḇōḏ ’eṯ-’ōhel mwō‘ēḏ wəṭiharətā ’ōṯām wəhēnafətā ’ōṯām tənûfâ:

16 kî nəṯunîm nəṯunîm hēmmâ lî mitwōḵə bənê yiśərā’ēl t^aḥaṯ piṭəraṯ kāl-reḥem bəḵwōr kōl mibənê yiśərā’ēl lāq^aḥətî ’ōṯām lî:

17 kî lî ḵāl-bəḵwōr biḇənê yiśərā’ēl bā’āḏām ûḇabəhēmâ bəywōm hakōṯî ḵāl-bəḵwōr bə’ereṣ miṣərayim hiqədašətî ’ōṯām lî:

18 wā’eqq^aḥ ’eṯ-haləwîyim t^aḥaṯ kāl-bəḵwōr biḇənê yiśərā’ēl:

19 wā’etənâ ’eṯ-haləwîyim nəṯunîm| lə’ahărōn ûləḇānāyw mitwōḵə bənê yiśərā’ēl l^a‘ăḇōḏ ’eṯ-‘ăḇōḏaṯ bənê-yiśərā’ēl bə’ōhel mwō‘ēḏ ûləḵapēr ‘al-bənê yiśərā’ēl wəlō’ yihəyeh biḇənê yiśərā’ēl neḡef bəḡešeṯ bənê-yiśərā’ēl ’el-haqqōḏeš:

20 wayy^a‘aś mōšeh wə’ahărōn wəḵāl-‘ăḏaṯ bənê-yiśərā’ēl laləwîyim kəḵōl ’ăšer-ṣiûâ yəhwâ ’eṯ-mōšeh laləwîyim kēn-‘āśû lâem bənê yiśərā’ēl:

21 wayyiṯəḥaṭṭə’û haləwîyim wayəḵabəsû biḡəḏêhem wayyānef ’ahărōn ’ōṯām tənûfâ lifənê yəhwâ wayəḵapēr ‘ălêhem ’ahărōn ləṭahărām:

22 wə’^aḥărê-ḵēn bā’û haləwîyim l^a‘ăḇōḏ ’eṯ-‘ăḇōḏāṯām bə’ōhel mwō‘ēḏ lifənê ’ahărōn wəlifənê ḇānāyw ka’ăšer ṣiûâ yəhwâ ’eṯ-mōšeh ‘al-haləwîyim kēn ‘āśû lâem: s

23 wayəḏabēr yəhwâ ’el-mōšeh llē’mōr:

24 zō’ṯ ’ăšer laləwîyim miben ḥāmēš wə‘eśərîm šānâ wām^a‘əlâ yāḇwō’ liṣəḇō’ ṣāḇā’ b^a‘ăḇōḏaṯ ’ōhel mwō‘ēḏ:

25 ûmiben ḥămiššîm šānâ yāšûḇ miṣṣəḇā’ hā‘ăḇōḏâ wəlō’ y^a‘ăḇōḏ ‘wōḏ:

26 wəšērēṯ ’eṯ-’eḥāyw bə’ōhel mwō‘ēḏ lišəmōr mišəmereṯ w^a‘ăḇōḏâ lō’ y^a‘ăḇōḏ kāḵâ t^a‘ăśeh laləwîyim bəmišəmərōṯām: f