Numbers (Bemidbar) Chapter 25

‎1 ‏וַיֵּ֥שֶׁב יִשְׂרָאֵ֖ל בַּשִּׁטִּ֑ים וַיָּ֣חֶל הָעָ֔ם לִזְנ֖וֹת אֶל־בְּנ֥וֹת מוֹאָֽב׃

‎2 ‏וַתִּקְרֶ֣אןָ לָעָ֔ם לְזִבְחֵ֖י אֱלֹהֵיהֶ֑ן וַיֹּ֣אכַל הָעָ֔ם וַיִּֽשְׁתַּחֲוּ֖וּ¹ לֵֽאלֹהֵיהֶֽן׃

‎3 ‏וַיִּצָּ֥מֶד יִשְׂרָאֵ֖ל לְבַ֣עַל פְּע֑וֹר וַיִּֽחַר־אַ֥ף יְהוָ֖ה בְּיִשְׂרָאֵֽל׃

‎4 ‏וַיֹּ֨אמֶר יְהוָ֜ה אֶל־מֹשֶׁ֗ה קַ֚ח אֶת־כָּל־רָאשֵׁ֣י הָעָ֔ם וְהוֹקַ֥ע אוֹתָ֛ם לַיהוָ֖ה נֶ֣גֶד הַשָּׁ֑מֶשׁ וְיָשֹׁ֛ב חֲר֥וֹן אַף־יְהוָ֖ה מִיִּשְׂרָאֵֽל׃

‎5 ‏וַיֹּ֣אמֶר מֹשֶׁ֔ה אֶל־שֹׁפְטֵ֖י יִשְׂרָאֵ֑ל הִרְגוּ֙ אִ֣ישׁ אֲנָשָׁ֔יו הַנִּצְמָדִ֖ים לְבַ֥עַל פְּעֽוֹר׃

‎6 ‏וְהִנֵּ֡ה אִישׁ֩ מִבְּנֵ֨י יִשְׂרָאֵ֜ל בָּ֗א וַיַּקְרֵ֤ב אֶל־אֶחָיו֙ אֶת־הַמִּדְיָנִ֔ית לְעֵינֵ֣י מֹשֶׁ֔ה וּלְעֵינֵ֖י כָּל־עֲדַ֣ת בְּנֵי־יִשְׂרָאֵ֑ל וְהֵ֣מָּה בֹכִ֔ים פֶּ֖תַח אֹ֥הֶל מוֹעֵֽד׃

‎7 ‏וַיַּ֗רְא פִּֽינְחָס֙ בֶּן־אֶלְעָזָ֔ר בֶּֽן־אַהֲרֹ֖ן הַכֹּהֵ֑ן וַיָּ֙קָם֙ מִתּ֣וֹךְ הָֽעֵדָ֔ה וַיִּקַּ֥ח רֹ֖מַח בְּיָדֽוֹ׃

‎8 ‏וַ֠יָּבֹא אַחַ֨ר אִֽישׁ־יִשְׂרָאֵ֜ל אֶל־הַקֻּבָּ֗ה וַיִּדְקֹר֙ אֶת־שְׁנֵיהֶ֔ם אֵ֚ת אִ֣ישׁ יִשְׂרָאֵ֔ל וְאֶת־הָאִשָּׁ֖ה אֶל־קֳבָתָ֑הּ וַתֵּֽעָצַר֙ הַמַּגֵּפָ֔ה מֵעַ֖ל בְּנֵ֥י יִשְׂרָאֵֽל׃

‎9 ‏וַיִּהְי֕וּ הַמֵּתִ֖ים בַּמַּגֵּפָ֑ה אַרְבָּעָ֥ה וְעֶשְׂרִ֖ים אָֽלֶף׃ פ

‎10 ‏וַיְדַבֵּ֥ר יְהוָ֖ה אֶל־מֹשֶׁ֥ה לֵּאמֹֽר׃

‎11 ‏פִּֽינְחָ֨ס בֶּן־אֶלְעָזָ֜ר בֶּן־אַהֲרֹ֣ן הַכֹּהֵ֗ן הֵשִׁ֤יב אֶת־חֲמָתִי֙ מֵעַ֣ל בְּנֵֽי־יִשְׂרָאֵ֔ל בְּקַנְא֥וֹ אֶת־קִנְאָתִ֖י בְּתוֹכָ֑ם וְלֹא־כִלִּ֥יתִי אֶת־בְּנֵֽי־יִשְׂרָאֵ֖ל בְּקִנְאָתִֽי׃

‎12 ‏לָכֵ֖ן אֱמֹ֑ר הִנְנִ֨י נֹתֵ֥ן ל֛וֹ אֶת־בְּרִיתִ֖י שָׁלֽוֹם׃

‎13 ‏וְהָ֤יְתָה לּוֹ֙ וּלְזַרְע֣וֹ אַחֲרָ֔יו בְּרִ֖ית כְּהֻנַּ֣ת עוֹלָ֑ם תַּ֗חַת אֲשֶׁ֤ר קִנֵּא֙ לֵֽאלֹהָ֔יו וַיְכַפֵּ֖ר עַל־בְּנֵ֥י יִשְׂרָאֵֽל׃

‎14 ‏וְשֵׁם֩ אִ֨ישׁ יִשְׂרָאֵ֜ל הַמֻּכֶּ֗ה אֲשֶׁ֤ר הֻכָּה֙ אֶת־הַמִּדְיָנִ֔ית זִמְרִ֖י בֶּן־סָל֑וּא נְשִׂ֥יא בֵֽית־אָ֖ב לַשִּׁמְעֹנִֽי׃

‎15 ‏וְשֵׁ֨ם הָֽאִשָּׁ֧ה הַמֻּכָּ֛ה הַמִּדְיָנִ֖ית כָּזְבִּ֣י בַת־צ֑וּר רֹ֣אשׁ אֻמּ֥וֹת בֵּֽית־אָ֛ב בְּמִדְיָ֖ן הֽוּא׃ פ

‎16 ‏וַיְדַבֵּ֥ר יְהוָ֖ה אֶל־מֹשֶׁ֥ה לֵּאמֹֽר׃

‎17 ‏צָר֖וֹר אֶת־הַמִּדְיָנִ֑ים וְהִכִּיתֶ֖ם אוֹתָֽם׃

‎18 ‏כִּ֣י צֹרְרִ֥ים הֵם֙ לָכֶ֔ם בְּנִכְלֵיהֶ֛ם אֲשֶׁר־נִכְּל֥וּ לָכֶ֖ם עַל־דְּבַר־פְּע֑וֹר וְעַל־דְּבַ֞ר כָּזְבִּ֨י בַת־נְשִׂ֤יא מִדְיָן֙ אֲחֹתָ֔ם הַמֻּכָּ֥ה בְיוֹם־הַמַּגֵּפָ֖ה עַל־דְּבַר־פְּעֽוֹר׃

‎19 ‏וַיְהִ֖י אַחֲרֵ֣י הַמַּגֵּפָ֑ה² פ

1 wayyēšeḇ yiśərā’ēl baššiṭṭîm wayyāḥel hā‘ām lizənwōṯ ’el-bənwōṯ mwō’āḇ:

2 watiqəre’nā lā‘ām ləziḇəḥê ’ĕlōhêhen wayyō’ḵal hā‘ām wayyišət^aḥăûû¹ lē’lōhêhen:

3 wayyiṣṣāmeḏ yiśərā’ēl ləḇ^a‘al pə‘wōr wayyiḥar-’af yəhwâ bəyiśərā’ēl:

4 wayyō’mer yəhwâ ’el-mōšeh q^aḥ ’eṯ-kāl-rā’šê hā‘ām wəhwōq^a‘ ’wōṯām layhwâ neḡeḏ haššāmeš wəyāšōḇ ḥărwōn ’af-yəhwâ mîyiśərā’ēl:

5 wayyō’mer mōšeh ’el-šōfəṭê yiśərā’ēl hirəḡû ’îš ’ănāšāyw hanniṣəmāḏîm ləḇ^a‘al pə‘wōr:

6 wəhinnēh ’îš mibənê yiśərā’ēl bā’ wayyaqərēḇ ’el-’eḥāyw ’eṯ-hammiḏəyānîṯ lə‘ênê mōšeh ûlə‘ênê kāl-‘ăḏaṯ bənê-yiśərā’ēl wəhēmmâ ḇōḵîm peṯ^aḥ ’ōhel mwō‘ēḏ:

7 wayyarə’ pînəḥās ben-’elə‘āzār ben-’ahărōn hakōhēn wayyāqām mitwōḵə hā‘ēḏâ wayyiqq^aḥ rōm^aḥ bəyāḏwō:

8 wayyāḇō’ ’^aḥar ’îš-yiśərā’ēl ’el-haqqubâ wayyiḏəqōr ’eṯ-šənêhem ’ēṯ ’îš yiśərā’ēl wə’eṯ-hā’iššâ ’el-qŏḇāṯāh watē‘āṣar hammagēfâ mē‘al bənê yiśərā’ēl:

9 wayyihəyû hammēṯîm bammagēfâ ’arəbā‘â wə‘eśərîm ’ālef: f

10 wayəḏabēr yəhwâ ’el-mōšeh llē’mōr:

11 pînəḥās ben-’elə‘āzār ben-’ahărōn hakōhēn hēšîḇ ’eṯ-ḥămāṯî mē‘al bənê-yiśərā’ēl bəqanə’wō ’eṯ-qinə’āṯî bəṯwōḵām wəlō’-ḵillîṯî ’eṯ-bənê-yiśərā’ēl bəqinə’āṯî:

12 lāḵēn ’ĕmōr hinənî nōṯēn lwō ’eṯ-bərîṯî šālwōm:

13 wəhāyəṯâ llwō ûləzarə‘wō ’^aḥărāyw bərîṯ kəhunnaṯ ‘wōlām t^aḥaṯ ’ăšer qinnē’ lē’lōhāyw wayəḵapēr ‘al-bənê yiśərā’ēl:

14 wəšēm ’îš yiśərā’ēl hammukeh ’ăšer hukâ ’eṯ-hammiḏəyānîṯ zimərî ben-sālû’ nəśî’ ḇêṯ-’āḇ laššimə‘ōnî:

15 wəšēm hā’iššâ hammukâ hammiḏəyānîṯ kāzəbî ḇaṯ-ṣûr rō’š ’ummwōṯ bêṯ-’āḇ bəmiḏəyān hû’: f

16 wayəḏabēr yəhwâ ’el-mōšeh llē’mōr:

17 ṣārwōr ’eṯ-hammiḏəyānîm wəhikîṯem ’wōṯām:

18 kî ṣōrərîm hēm lāḵem bəniḵəlêhem ’ăšer-nikəlû lāḵem ‘al-dəḇar-pə‘wōr wə‘al-dəḇar kāzəbî ḇaṯ-nəśî’ miḏəyān ’ăḥōṯām hammukâ ḇəywōm-hammagēfâ ‘al-dəḇar-pə‘wōr:

19 wayəhî ’^aḥărê hammagēfâ² f