Psalms (Tehilim) Chapter 18

‎1 ‏לַמְנַצֵּ֤חַ׀ לְעֶ֥בֶד יְהוָ֗ה לְדָ֫וִ֥ד אֲשֶׁ֤ר דִּבֶּ֨ר׀ לַיהוָ֗ה אֶת־דִּ֭בְרֵי הַשִּׁירָ֣ה הַזֹּ֑את בְּי֤וֹם הִֽצִּיל־יְהוָ֘ה אוֹת֥וֹ מִכַּ֥ף כָּל־אֹ֝יְבָ֗יו וּמִיַּ֥ד שָׁאֽוּל׃

‎2 ‏וַיֹּאמַ֡ר אֶרְחָמְךָ֖ יְהוָ֣ה חִזְקִֽי׃

‎3 ‏יְהוָ֤ה׀ סַֽלְעִ֥י וּמְצוּדָתִ֗י וּמְפַ֫לְטִ֥י אֵלִ֣י צ֭וּרִי אֶֽחֱסֶה־בּ֑וֹ מָֽגִנִּ֥י וְקֶֽרֶן־יִ֝שְׁעִ֗י מִשְׂגַּבִּֽי׃

‎4 ‏מְ֭הֻלָּל אֶקְרָ֣א יְהוָ֑ה וּמִן־אֹ֝יְבַ֗י אִוָּשֵֽׁעַ׃

‎5 ‏אֲפָפ֥וּנִי חֶבְלֵי־מָ֑וֶת וְֽנַחֲלֵ֖י בְלִיַּ֣עַל יְבַֽעֲתֽוּנִי׃

‎6 ‏חֶבְלֵ֣י שְׁא֣וֹל סְבָב֑וּנִי קִ֝דְּמ֗וּנִי מ֣וֹקְשֵׁי מָֽוֶת׃

‎7 ‏בַּצַּר־לִ֤י׀ אֶֽקְרָ֣א יְהוָה֮ וְאֶל־אֱלֹהַ֪י אֲשַׁ֫וֵּ֥עַ יִשְׁמַ֣ע מֵהֵיכָל֣וֹ קוֹלִ֑י וְ֝שַׁוְעָתִ֗י לְפָנָ֤יו׀ תָּב֬וֹא בְאָזְנָֽיו׃

‎8 ‏וַתִּגְעַ֬שׁ וַתִּרְעַ֨שׁ׀ הָאָ֗רֶץ וּמוֹסְדֵ֣י הָרִ֣ים יִרְגָּ֑זוּ וַ֝יִּתְגָּֽעֲשׁ֗וּ כִּי־חָ֥רָה לֽוֹ׃

‎9 ‏עָ֘לָ֤ה עָשָׁ֨ן׀ בְּאַפּ֗וֹ וְאֵשׁ־מִפִּ֥יו תֹּאכֵ֑ל גֶּ֝חָלִ֗ים בָּעֲר֥וּ מִמֶּֽנּוּ׃

‎10 ‏וַיֵּ֣ט שָׁ֭מַיִם וַיֵּרַ֑ד וַ֝עֲרָפֶ֗ל תַּ֣חַת רַגְלָֽיו׃

‎11 ‏וַיִּרְכַּ֣ב עַל־כְּ֭רוּב וַיָּעֹ֑ף וַ֝יֵּ֗דֶא עַל־כַּנְפֵי־רֽוּחַ׃

‎12 ‏יָ֤שֶׁת חֹ֨שֶׁךְ׀ סִתְר֗וֹ סְבִֽיבוֹתָ֥יו סֻכָּת֑וֹ חֶשְׁכַת־מַ֝֗יִם עָבֵ֥י שְׁחָקִֽים׃

‎13 ‏מִנֹּ֗גַהּ נֶ֫גְדּ֥וֹ עָבָ֥יו עָבְר֑וּ בָּ֝רָ֗ד וְגַֽחֲלֵי־אֵֽשׁ׃

‎14 ‏וַיַּרְעֵ֬ם בַּשָּׁמַ֨יִם׀ יְֽהוָ֗ה וְ֭עֶלְיוֹן יִתֵּ֣ן קֹל֑וֹ בָּ֝רָ֗ד וְגַֽחֲלֵי־אֵֽשׁ׃

‎15 ‏וַיִּשְׁלַ֣ח חִ֭צָּיו וַיְפִיצֵ֑ם וּבְרָקִ֥ים רָ֝ב וַיְהֻמֵּֽם׃

‎16 ‏וַיֵּ֤רָא֨וּ׀ אֲפִ֥יקֵי מַ֗יִם וַֽיִּגָּלוּ֮ מוֹסְד֪וֹת תֵּ֫בֵ֥ל מִגַּעֲרָ֣תְךָ֣ יְהוָ֑ה מִ֝נִּשְׁמַ֗ת ר֣וּחַ אַפֶּֽךָ׃

‎17 ‏יִשְׁלַ֣ח מִ֭מָּרוֹם יִקָּחֵ֑נִי יַֽ֝מְשֵׁ֗נִי מִמַּ֥יִם רַבִּֽים׃

‎18 ‏יַצִּילֵ֗נִי מֵאֹיְבִ֥י עָ֑ז וּ֝מִשֹּׂנְאַ֗י כִּֽי־אָמְצ֥וּ מִמֶּֽנִּי׃

‎19 ‏יְקַדְּמ֥וּנִי בְיוֹם־אֵידִ֑י וַֽיְהִי־יְהוָ֖ה לְמִשְׁעָ֣ן לִֽי׃

‎20 ‏וַיּוֹצִיאֵ֥נִי לַמֶּרְחָ֑ב יְ֝חַלְּצֵ֗נִי כִּ֘י חָ֥פֵֽץ בִּֽי׃

‎21 ‏יִגְמְלֵ֣נִי יְהוָ֣ה כְּצִדְקִ֑י כְּבֹ֥ר יָ֝דַ֗י יָשִׁ֥יב לִֽי׃

‎22 ‏כִּֽי־שָׁ֭מַרְתִּי דַּרְכֵ֣י יְהוָ֑ה וְלֹֽא־רָ֝שַׁ֗עְתִּי מֵאֱלֹהָֽי׃

‎23 ‏כִּ֣י כָל־מִשְׁפָּטָ֣יו לְנֶגְדִּ֑י וְ֝חֻקֹּתָ֗יו לֹא־אָסִ֥יר מֶֽנִּי׃

‎24 ‏וָאֱהִ֣י תָמִ֣ים עִמּ֑וֹ וָ֝אֶשְׁתַּמֵּ֗ר מֵעֲוֹנִֽי׃

‎25 ‏וַיָּֽשֶׁב־יְהוָ֣ה לִ֣י כְצִדְקִ֑י כְּבֹ֥ר יָ֝דַ֗י לְנֶ֣גֶד עֵינָֽיו׃

‎26 ‏עִם־חָסִ֥יד תִּתְחַסָּ֑ד עִם־גְּבַ֥ר תָּ֝מִ֗ים תִּתַּמָּֽם׃

‎27 ‏עִם־נָבָ֥ר תִּתְבָּרָ֑ר וְעִם־עִ֝קֵּ֗שׁ תִּתְפַּתָּֽל׃

‎28 ‏כִּֽי־אַ֭תָּה עַם־עָנִ֣י תוֹשִׁ֑יעַ וְעֵינַ֖יִם רָמ֣וֹת תַּשְׁפִּֽיל׃

‎29 ‏כִּֽי־אַ֭תָּה תָּאִ֣יר נֵרִ֑י יְהוָ֥ה אֱ֝לֹהַ֗י יַגִּ֥יהַּ חָשְׁכִּֽי׃

‎30 ‏כִּֽי־בְ֭ךָ אָרֻ֣ץ גְּד֑וּד וּ֝בֵֽאלֹהַ֗י אֲדַלֶּג־שֽׁוּר׃

‎31 ‏הָאֵל֮ תָּמִ֪ים דַּ֫רְכּ֥וֹ אִמְרַֽת־יְהוָ֥ה צְרוּפָ֑ה מָגֵ֥ן ה֝֗וּא לְכֹ֤ל׀ הַחֹסִ֬ים בּֽוֹ׃

‎32 ‏כִּ֤י מִ֣י אֱ֭לוֹהַּ מִבַּלְעֲדֵ֣י יְהוָ֑ה וּמִ֥י צ֝֗וּר זוּלָתִ֥י אֱלֹהֵֽינוּ׃

‎33 ‏הָ֭אֵל הַמְאַזְּרֵ֣נִי חָ֑יִל וַיִּתֵּ֖ן תָּמִ֣ים דַּרְכִּֽי׃

‎34 ‏מְשַׁוֶּ֣ה רַ֭גְלַי כָּאַיָּל֑וֹת וְעַ֥ל בָּ֝מֹתַ֗י יַעֲמִידֵֽנִי׃

‎35 ‏מְלַמֵּ֣ד יָ֭דַי לַמִּלְחָמָ֑ה וְֽנִחֲתָ֥ה קֶֽשֶׁת־נְ֝חוּשָׁ֗ה זְרוֹעֹתָֽי׃

‎36 ‏וַתִּתֶּן־לִי֮ מָגֵ֪ן יִ֫שְׁעֶ֥ךָ וִֽימִינְךָ֥ תִסְעָדֵ֑נִי וְֽעַנְוַתְךָ֥ תַרְבֵּֽנִי׃

‎37 ‏תַּרְחִ֣יב צַעֲדִ֣י תַחְתָּ֑י וְלֹ֥א מָ֝עֲד֗וּ קַרְסֻלָּֽי׃

‎38 ‏אֶרְדּ֣וֹף א֭וֹיְבַי וְאַשִּׂיגֵ֑ם וְלֹֽא־אָ֝שׁוּב¹ עַד־כַּלּוֹתָֽם׃

‎39 ‏אֶ֭מְחָצֵם וְלֹא־יֻ֣כְלוּ ק֑וּם יִ֝פְּל֗וּ תַּ֣חַת רַגְלָֽי׃

‎40 ‏וַתְּאַזְּרֵ֣נִי חַ֭יִל לַמִּלְחָמָ֑ה תַּכְרִ֖יעַ קָמַ֣י תַּחְתָּֽי׃

‎41 ‏וְֽאֹיְבַ֗י נָתַ֣תָּה לִּ֣י עֹ֑רֶף וּ֝מְשַׂנְאַ֗י אַצְמִיתֵֽם׃

‎42 ‏יְשַׁוְּע֥וּ וְאֵין־מוֹשִׁ֑יעַ עַל־יְ֝הוָ֗ה וְלֹ֣א עָנָֽם׃

‎43 ‏וְֽאֶשְׁחָקֵ֗ם כְּעָפָ֥ר עַל־פְּנֵי־ר֑וּחַ כְּטִ֖יט חוּצ֣וֹת אֲרִיקֵֽם׃

‎44 ‏תְּפַלְּטֵנִי֮ מֵרִ֪יבֵ֫י עָ֥ם תְּ֭שִׂימֵנִי לְרֹ֣אשׁ גּוֹיִ֑ם עַ֖ם לֹא־יָדַ֣עְתִּי יַֽעַבְדֽוּנִי׃

‎45 ‏לְשֵׁ֣מַֽע אֹ֭זֶן יִשָּׁ֣מְעוּ לִ֑י בְּנֵֽי־נֵ֝כָ֗ר יְכַחֲשׁוּ־לִֽי׃

‎46 ‏בְּנֵי־נֵכָ֥ר יִבֹּ֑לוּ וְ֝יַחְרְג֗וּ מִֽמִּסְגְּרֽוֹתֵיהֶֽם׃

‎47 ‏חַי־יְ֭הוָה וּבָר֣וּךְ צוּרִ֑י וְ֝יָר֗וּם אֱלוֹהֵ֥י יִשְׁעִֽי׃

‎48 ‏הָאֵ֗ל הַנּוֹתֵ֣ן נְקָמ֣וֹת לִ֑י וַיַּדְבֵּ֖ר עַמִּ֣ים תַּחְתָּֽי׃

‎49 ‏מְפַלְּטִ֗י מֵאֹ֫יְבָ֥י אַ֣ף מִן־קָ֭מַי תְּרוֹמְמֵ֑נִי מֵאִ֥ישׁ חָ֝מָ֗ס תַּצִּילֵֽנִי׃

‎50 ‏עַל־כֵּ֤ן׀ אוֹדְךָ֖ בַגּוֹיִ֥ם׀ יְהוָ֑ה וּלְשִׁמְךָ֥ אֲזַמֵּֽרָה׃

‎51 ‏מגדל מַגְדִּיל֮ יְשׁוּע֪וֹת מַ֫לְכּ֥וֹ וְעֹ֤שֶׂה חֶ֨סֶד׀ לִמְשִׁיח֗וֹ לְדָוִ֥ד וּלְזַרְע֗וֹ עַד־עוֹלָֽם׃

1 lamənaṣṣēḥa| lə‘eḇeḏ yəhwâ ləḏāwiḏ ’ăšer diber| layhwâ ’eṯ-diḇərê haššîrâ hazzō’ṯ bəywōm hiṣṣîl-yəhwâ ’wōṯwō mikaf kāl-’ōyəḇāyw ûmîyaḏ šā’ûl:

2 wayyō’mar ’erəḥāməḵā yəhwâ ḥizəqî:

3 yəhwâ| salə‘î ûməṣûḏāṯî ûməfaləṭî ’ēlî ṣûrî ’eḥĕseh-bwō māḡinnî wəqeren-yišə‘î miśəgabî:

4 məhullāl ’eqərā’ yəhwâ ûmin-’ōyəḇay ’iûāšē‘a:

5 ’ăfāfûnî ḥeḇəlê-māweṯ wən^aḥălê ḇəlîy^a‘al yəḇ^a‘ăṯûnî:

6 ḥeḇəlê šə’wōl səḇāḇûnî qidəmûnî mwōqəšê māweṯ:

7 baṣṣar-lî| ’eqərā’ yəhwâ wə’el-’ĕlōhay ’ăšaûē‘a yišəm^a‘ mēhêḵālwō qwōlî wəšawə‘āṯî ləfānāyw| tāḇwō’ ḇə’āzənāyw:

8 watiḡə‘aš watirə‘aš| hā’āreṣ ûmwōsəḏê hārîm yirəgāzû wayyiṯəgā‘ăšû kî-ḥārâ lwō:

9 ‘ālâ ‘āšān| bə’apwō wə’ēš-mipîw tō’ḵēl geḥālîm bā‘ărû mimmennû:

10 wayyēṭ šāmayim wayyēraḏ w^a‘ărāfel t^aḥaṯ raḡəlāyw:

11 wayyirəkaḇ ‘al-kərûḇ wayyā‘ōf wayyēḏe’ ‘al-kanəfê-rûḥa:

12 yāšeṯ ḥōšeḵə| siṯərwō səḇîḇwōṯāyw sukāṯwō ḥešəḵaṯ-mayim ‘āḇê šəḥāqîm:

13 minnōḡ^ah neḡədwō ‘āḇāyw ‘āḇərû bārāḏ wəḡ^aḥălê-’ēš:

14 wayyarə‘ēm baššāmayim| yəhwâ wə‘eləywōn yitēn qōlwō bārāḏ wəḡ^aḥălê-’ēš:

15 wayyišəl^aḥ ḥiṣṣāyw wayəfîṣēm ûḇərāqîm rāḇ wayəhummēm:

16 wayyērā’û| ’ăfîqê mayim wayyigālû mwōsəḏwōṯ tēḇēl mig^a‘ărāṯəḵā yəhwâ minnišəmaṯ rûḥa ’apeḵā:

17 yišəl^aḥ mimmārwōm yiqqāḥēnî yaməšēnî mimmayim rabîm:

18 yaṣṣîlēnî mē’ōyəḇî ‘āz ûmiśśōnə’ay kî-’āməṣû mimmennî:

19 yəqadəmûnî ḇəywōm-’êḏî wayəhî-yəhwâ ləmišə‘ān lî:

20 wayywōṣî’ēnî lammerəḥāḇ yəḥalləṣēnî kî ḥāfēṣ bî:

21 yiḡəməlēnî yəhwâ kəṣiḏəqî kəḇōr yāḏay yāšîḇ lî:

22 kî-šāmarətî darəḵê yəhwâ wəlō’-rāš^a‘ətî mē’ĕlōhāy:

23 kî ḵāl-mišəpāṭāyw ləneḡədî wəḥuqqōṯāyw lō’-’āsîr mennî:

24 wā’ĕhî ṯāmîm ‘immwō wā’ešətammēr mē‘ăwōnî:

25 wayyāšeḇ-yəhwâ lî ḵəṣiḏəqî kəḇōr yāḏay ləneḡeḏ ‘ênāyw:

26 ‘im-ḥāsîḏ tiṯəḥassāḏ ‘im-gəḇar tāmîm titammām:

27 ‘im-nāḇār tiṯəbārār wə‘im-‘iqqēš tiṯəpatāl:

28 kî-’atâ ‘am-‘ānî ṯwōšî‘a wə‘ênayim rāmwōṯ tašəpîl:

29 kî-’atâ tā’îr nērî yəhwâ ’ĕlōhay yagîhha ḥāšəkî:

30 kî-ḇəḵā ’āruṣ gəḏûḏ ûḇē’lōhay ’ăḏalleḡ-šûr:

31 hā’ēl tāmîm darəkwō ’iməraṯ-yəhwâ ṣərûfâ māḡēn hû’ ləḵōl| h^aḥōsîm bwō:

32 kî mî ’ĕlwōhha mibalə‘ăḏê yəhwâ ûmî ṣûr zûlāṯî ’ĕlōhênû:

33 hā’ēl hamə’azzərēnî ḥāyil wayyitēn tāmîm darəkî:

34 məšaûeh raḡəlay kā’ayyālwōṯ wə‘al bāmōṯay y^a‘ămîḏēnî:

35 məlammēḏ yāḏay lammiləḥāmâ wəniḥăṯâ qešeṯ-nəḥûšâ zərwō‘ōṯāy:

36 watiten-lî māḡēn yišə‘eḵā wîmînəḵā ṯisə‘āḏēnî wə‘anəwaṯəḵā ṯarəbēnî:

37 tarəḥîḇ ṣ^a‘ăḏî ṯ^aḥətāy wəlō’ mā‘ăḏû qarəsullāy:

38 ’erədwōf ’wōyəḇay wə’aśśîḡēm wəlō’-’āšûḇ¹ ‘aḏ-kallwōṯām:

39 ’eməḥāṣēm wəlō’-yuḵəlû qûm yipəlû t^aḥaṯ raḡəlāy:

40 watə’azzərēnî ḥayil lammiləḥāmâ taḵərî‘a qāmay t^aḥətāy:

41 wə’ōyəḇay nāṯatâ llî ‘ōref ûməśanə’ay ’aṣəmîṯēm:

42 yəšaûə‘û wə’ên-mwōšî‘a ‘al-yəhwâ wəlō’ ‘ānām:

43 wə’ešəḥāqēm kə‘āfār ‘al-pənê-rûḥa kəṭîṭ ḥûṣwōṯ ’ărîqēm:

44 təfalləṭēnî mērîḇê ‘ām təśîmēnî lərō’š gwōyim ‘am lō’-yāḏ^a‘ətî y^a‘aḇəḏûnî:

45 ləšēm^a‘ ’ōzen yiššāmə‘û lî bənê-nēḵār yəḵ^aḥăšû-lî:

46 bənê-nēḵār yibōlû wəy^aḥərəḡû mimmisəgərwōṯêhem:

47 ḥay-yəhwâ ûḇārûḵə ṣûrî wəyārûm ’ĕlwōhê yišə‘î:

48 hā’ēl hannwōṯēn nəqāmwōṯ lî wayyaḏəbēr ‘ammîm t^aḥətāy:

49 məfalləṭî mē’ōyəḇāy ’af min-qāmay tərwōməmēnî mē’îš ḥāmās taṣṣîlēnî:

50 ‘al-kēn| ’wōḏəḵā ḇagwōyim| yəhwâ ûləšiməḵā ’ăzammērâ:

51 maḡədil maḡədîl yəšû‘wōṯ maləkwō wə‘ōśeh ḥeseḏ| liməšîḥwō ləḏāwiḏ ûləzarə‘wō ‘aḏ-‘wōlām: