1 Samuel (1 Shmuel) Chapter 8

‎1 ‏וַיְהִ֕י כַּאֲשֶׁ֥ר זָקֵ֖ן שְׁמוּאֵ֑ל וַיָּ֧שֶׂם אֶת־בָּנָ֛יו שֹׁפְטִ֖ים לְיִשְׂרָאֵֽל׃

‎2 ‏וַיְהִ֞י שֶׁם־בְּנ֤וֹ הַבְּכוֹר֙ יוֹאֵ֔ל וְשֵׁ֥ם מִשְׁנֵ֖הוּ אֲבִיָּ֑ה שֹׁפְטִ֖ים בִּבְאֵ֥ר שָֽׁבַע׃

‎3 ‏וְלֹֽא־הָלְכ֤וּ בָנָיו֙ בדרכו בִּדְרָכָ֔יו וַיִּטּ֖וּ אַחֲרֵ֣י הַבָּ֑צַע וַיִּ֨קְחוּ־שֹׁ֔חַד וַיַּטּ֖וּ מִשְׁפָּֽט׃ פ

‎4 ‏וַיִּֽתְקַבְּצ֔וּ כֹּ֖ל זִקְנֵ֣י יִשְׂרָאֵ֑ל וַיָּבֹ֥אוּ אֶל־שְׁמוּאֵ֖ל הָרָמָֽתָה׃

‎5 ‏וַיֹּאמְר֣וּ אֵלָ֗יו הִנֵּה֙ אַתָּ֣ה זָקַ֔נְתָּ וּבָנֶ֕יךָ לֹ֥א הָלְכ֖וּ בִּדְרָכֶ֑יךָ עַתָּ֗ה שִֽׂימָה־לָּ֥נוּ מֶ֛לֶךְ לְשָׁפְטֵ֖נוּ כְּכָל־הַגּוֹיִֽם׃

‎6 ‏וַיֵּ֤רַע הַדָּבָר֙ בְּעֵינֵ֣י שְׁמוּאֵ֔ל כַּאֲשֶׁ֣ר אָמְר֔וּ תְּנָה־לָּ֥נוּ מֶ֖לֶךְ לְשָׁפְטֵ֑נוּ וַיִּתְפַּלֵּ֥ל שְׁמוּאֵ֖ל אֶל־יְהוָֽה׃ פ

‎7 ‏וַיֹּ֤אמֶר יְהוָה֙ אֶל־שְׁמוּאֵ֔ל שְׁמַע֙ בְּק֣וֹל הָעָ֔ם לְכֹ֥ל אֲשֶׁר־יֹאמְר֖וּ אֵלֶ֑יךָ כִּ֣י לֹ֤א אֹֽתְךָ֙ מָאָ֔סוּ כִּֽי־אֹתִ֥י מָאֲס֖וּ מִמְּלֹ֥ךְ עֲלֵיהֶֽם׃

‎8 ‏כְּכָֽל־הַמַּעֲשִׂ֣ים אֲשֶׁר־עָשׂ֗וּ מִיּוֹם֩ הַעֲלֹתִ֨י אֹתָ֤ם מִמִּצְרַ֙יִם֙ וְעַד־הַיּ֣וֹם הַזֶּ֔ה וַיַּ֣עַזְבֻ֔נִי וַיַּעַבְד֖וּ אֱלֹהִ֣ים אֲחֵרִ֑ים כֵּ֛ן הֵ֥מָּה עֹשִׂ֖ים גַּם־לָֽךְ׃

‎9 ‏וְעַתָּ֖ה שְׁמַ֣ע בְּקוֹלָ֑ם אַ֗ךְ כִּֽי־הָעֵ֤ד תָּעִיד֙ בָּהֶ֔ם וְהִגַּדְתָּ֣ לָהֶ֔ם מִשְׁפַּ֣ט הַמֶּ֔לֶךְ אֲשֶׁ֥ר יִמְלֹ֖ךְ עֲלֵיהֶֽם׃ ס

‎10 ‏וַיֹּ֣אמֶר שְׁמוּאֵ֔ל אֵ֖ת כָּל־דִּבְרֵ֣י יְהוָ֑ה אֶל־הָעָ֕ם הַשֹּׁאֲלִ֥ים מֵאִתּ֖וֹ מֶֽלֶךְ׃ ס

‎11 ‏וַיֹּ֕אמֶר זֶ֗ה יִֽהְיֶה֙ מִשְׁפַּ֣ט הַמֶּ֔לֶךְ אֲשֶׁ֥ר יִמְלֹ֖ךְ עֲלֵיכֶ֑ם אֶת־בְּנֵיכֶ֣ם יִקָּ֗ח וְשָׂ֥ם לוֹ֙ בְּמֶרְכַּבְתּ֣וֹ וּבְפָרָשָׁ֔יו וְרָצ֖וּ לִפְנֵ֥י מֶרְכַּבְתּֽוֹ׃

‎12 ‏וְלָשׂ֣וּם ל֔וֹ שָׂרֵ֥י אֲלָפִ֖ים וְשָׂרֵ֣י חֲמִשִּׁ֑ים וְלַחֲרֹ֤שׁ חֲרִישׁוֹ֙ וְלִקְצֹ֣ר קְצִיר֔וֹ וְלַעֲשׂ֥וֹת כְּלֵֽי־מִלְחַמְתּ֖וֹ וּכְלֵ֥י רִכְבּֽוֹ׃

‎13 ‏וְאֶת־בְּנוֹתֵיכֶ֖ם יִקָּ֑ח לְרַקָּח֥וֹת וּלְטַבָּח֖וֹת וּלְאֹפֽוֹת׃

‎14 ‏וְאֶת־שְׂ֠דֽוֹתֵיכֶם וְאֶת־כַּרְמֵיכֶ֧ם וְזֵיתֵיכֶ֛ם הַטּוֹבִ֖ים יִקָּ֑ח וְנָתַ֖ן לַעֲבָדָֽיו׃

‎15 ‏וְזַרְעֵיכֶ֥ם וְכַרְמֵיכֶ֖ם יַעְשֹׂ֑ר וְנָתַ֥ן לְסָרִיסָ֖יו וְלַעֲבָדָֽיו׃

‎16 ‏וְאֶת־עַבְדֵיכֶם֩ וְֽאֶת־שִׁפְח֨וֹתֵיכֶ֜ם וְאֶת־בַּחוּרֵיכֶ֧ם הַטּוֹבִ֛ים וְאֶת־חֲמוֹרֵיכֶ֖ם יִקָּ֑ח וְעָשָׂ֖ה לִמְלַאכְתּֽוֹ׃

‎17 ‏צֹאנְכֶ֖ם יַעְשֹׂ֑ר וְאַתֶּ֖ם תִּֽהְיוּ־ל֥וֹ לַעֲבָדִֽים׃

‎18 ‏וּזְעַקְתֶּם֙ בַּיּ֣וֹם הַה֔וּא מִלִּפְנֵ֣י מַלְכְּכֶ֔ם אֲשֶׁ֥ר בְּחַרְתֶּ֖ם לָכֶ֑ם וְלֹֽא־יַעֲנֶ֧ה יְהוָ֛ה אֶתְכֶ֖ם בַּיּ֥וֹם הַהֽוּא׃

‎19 ‏וַיְמָאֲנ֣וּ הָעָ֔ם לִשְׁמֹ֖עַ בְּק֣וֹל שְׁמוּאֵ֑ל וַיֹּאמְר֣וּ לֹּ֔א כִּ֥י אִם־מֶ֖לֶךְ יִֽהְיֶ֥ה עָלֵֽינוּ׃

‎20 ‏וְהָיִ֥ינוּ גַם־אֲנַ֖חְנוּ כְּכָל־הַגּוֹיִ֑ם וּשְׁפָטָ֤נוּ מַלְכֵּ֙נוּ֙ וְיָצָ֣א לְפָנֵ֔ינוּ וְנִלְחַ֖ם אֶת־מִלְחֲמֹתֵֽנוּ׃

‎21 ‏וַיִּשְׁמַ֣ע שְׁמוּאֵ֔ל אֵ֖ת כָּל־דִּבְרֵ֣י הָעָ֑ם וַֽיְדַבְּרֵ֖ם בְּאָזְנֵ֥י יְהוָֽה׃ פ

‎22 ‏וַיֹּ֨אמֶר יְהוָ֤ה אֶל־שְׁמוּאֵל֙ שְׁמַ֣ע בְּקוֹלָ֔ם וְהִמְלַכְתָּ֥ לָהֶ֖ם מֶ֑לֶךְ וַיֹּ֤אמֶר שְׁמוּאֵל֙ אֶל־אַנְשֵׁ֣י יִשְׂרָאֵ֔ל לְכ֖וּ אִ֥ישׁ לְעִירֽוֹ׃ פ

1 wayəhî ka’ăšer zāqēn šəmû’ēl wayyāśem ’eṯ-bānāyw šōfəṭîm ləyiśərā’ēl:

2 wayəhî šem-bənwō habəḵwōr ywō’ēl wəšēm mišənēhû ’ăḇîyâ šōfəṭîm biḇə’ēr šāḇ^a‘:

3 wəlō’-hāləḵû ḇānāyw biḏərāḵāw biḏərāḵāyw wayyiṭṭû ’^aḥărê habāṣ^a‘ wayyiqəḥû-šōḥaḏ wayyaṭṭû mišəpāṭ: f

4 wayyiṯəqabəṣû kōl ziqənê yiśərā’ēl wayyāḇō’û ’el-šəmû’ēl hārāmāṯâ:

5 wayyō’mərû ’ēlāyw hinnēh ’atâ zāqanətā ûḇāneyḵā lō’ hāləḵû biḏərāḵeyḵā ‘atâ śîmâ-llānû meleḵə ləšāfəṭēnû kəḵāl-hagwōyim:

6 wayyēr^a‘ hadāḇār bə‘ênê šəmû’ēl ka’ăšer ’āmərû tənâ-llānû meleḵə ləšāfəṭēnû wayyiṯəpallēl šəmû’ēl ’el-yəhwâ: f

7 wayyō’mer yəhwâ ’el-šəmû’ēl šəm^a‘ bəqwōl hā‘ām ləḵōl ’ăšer-yō’mərû ’ēleyḵā kî lō’ ’ōṯəḵā mā’āsû kî-’ōṯî mā’ăsû mimməlōḵə ‘ălêhem:

8 kəḵāl-hamm^a‘ăśîm ’ăšer-‘āśû mîywōm h^a‘ălōṯî ’ōṯām mimmiṣərayim wə‘aḏ-hayywōm hazzeh wayy^a‘azəḇunî wayy^a‘aḇəḏû ’ĕlōhîm ’ăḥērîm kēn hēmmâ ‘ōśîm gam-lāḵə:

9 wə‘atâ šəm^a‘ bəqwōlām ’aḵə kî-hā‘ēḏ tā‘îḏ bâem wəhigaḏətā lâem mišəpaṭ hammeleḵə ’ăšer yiməlōḵə ‘ălêhem: s

10 wayyō’mer šəmû’ēl ’ēṯ kāl-diḇərê yəhwâ ’el-hā‘ām haššō’ălîm mē’itwō meleḵə: s

11 wayyō’mer zeh yihəyeh mišəpaṭ hammeleḵə ’ăšer yiməlōḵə ‘ălêḵem ’eṯ-bənêḵem yiqqāḥ wəśām lwō bəmerəkaḇətwō ûḇəfārāšāyw wərāṣû lifənê merəkaḇətwō:

12 wəlāśûm lwō śārê ’ălāfîm wəśārê ḥămiššîm wəl^aḥărōš ḥărîšwō wəliqəṣōr qəṣîrwō wəl^a‘ăśwōṯ kəlê-miləḥamətwō ûḵəlê riḵəbwō:

13 wə’eṯ-bənwōṯêḵem yiqqāḥ ləraqqāḥwōṯ ûləṭabāḥwōṯ ûlə’ōfwōṯ:

14 wə’eṯ-śəḏwōṯêḵem wə’eṯ-karəmêḵem wəzêṯêḵem haṭṭwōḇîm yiqqāḥ wənāṯan l^a‘ăḇāḏāyw:

15 wəzarə‘êḵem wəḵarəmêḵem y^a‘əśōr wənāṯan ləsārîsāyw wəl^a‘ăḇāḏāyw:

16 wə’eṯ-‘aḇəḏêḵem wə’eṯ-šifəḥwōṯêḵem wə’eṯ-b^aḥûrêḵem haṭṭwōḇîm wə’eṯ-ḥămwōrêḵem yiqqāḥ wə‘āśâ liməla’ḵətwō:

17 ṣō’nəḵem y^a‘əśōr wə’atem tihəyû-lwō l^a‘ăḇāḏîm:

18 ûzə‘aqətem bayywōm hahû’ millifənê maləkəḵem ’ăšer bəḥarətem lāḵem wəlō’-y^a‘ăneh yəhwâ ’eṯəḵem bayywōm hahû’:

19 wayəmā’ănû hā‘ām lišəmō‘a bəqwōl šəmû’ēl wayyō’mərû llō’ kî ’im-meleḵə yihəyeh ‘ālênû:

20 wəhāyînû ḡam-’ăn^aḥənû kəḵāl-hagwōyim ûšəfāṭānû maləkēnû wəyāṣā’ ləfānênû wəniləḥam ’eṯ-miləḥămōṯēnû:

21 wayyišəm^a‘ šəmû’ēl ’ēṯ kāl-diḇərê hā‘ām wayəḏabərēm bə’āzənê yəhwâ: f

22 wayyō’mer yəhwâ ’el-šəmû’ēl šəm^a‘ bəqwōlām wəhiməlaḵətā lâem meleḵə wayyō’mer šəmû’ēl ’el-’anəšê yiśərā’ēl ləḵû ’îš lə‘îrwō: f