1 Samuel (1 Shmuel) Chapter 10

‎1 ‏וַיִּקַּ֨ח שְׁמוּאֵ֜ל אֶת־פַּ֥ךְ הַשֶּׁ֛מֶן וַיִּצֹ֥ק עַל־רֹאשׁ֖וֹ וַיִּשָּׁקֵ֑הוּ וַיֹּ֕אמֶר הֲל֗וֹא כִּֽי־מְשָׁחֲךָ֧ יְהוָ֛ה עַל־נַחֲלָת֖וֹ לְנָגִֽיד׃

‎2 ‏בְּלֶכְתְּךָ֤ הַיּוֹם֙ מֵעִמָּדִ֔י וּמָצָאתָ֩ שְׁנֵ֨י אֲנָשִׁ֜ים עִם־קְבֻרַ֥ת רָחֵ֛ל בִּגְב֥וּל בִּנְיָמִ֖ן בְּצֶלְצַ֑ח וְאָמְר֣וּ אֵלֶ֗יךָ נִמְצְא֤וּ הָאֲתֹנוֹת֙ אֲשֶׁ֣ר הָלַ֣כְתָּ לְבַקֵּ֔שׁ וְהִנֵּ֨ה נָטַ֤שׁ אָבִ֙יךָ֙ אֶת־דִּבְרֵ֣י הָאֲתֹנ֔וֹת וְדָאַ֤ג לָכֶם֙ לֵאמֹ֔ר מָ֥ה אֶעֱשֶׂ֖ה לִבְנִֽי׃

‎3 ‏וְחָלַפְתָּ֨ מִשָּׁ֜ם וָהָ֗לְאָה וּבָ֙אתָ֙ עַד־אֵל֣וֹן תָּב֔וֹר וּמְצָא֤וּךָ שָּׁם֙ שְׁלֹשָׁ֣ה אֲנָשִׁ֔ים עֹלִ֥ים אֶל־הָאֱלֹהִ֖ים בֵּֽית־אֵ֑ל אֶחָ֞ד נֹשֵׂ֣א׀ שְׁלֹשָׁ֣ה גְדָיִ֗ים וְאֶחָד֙ נֹשֵׂ֗א שְׁלֹ֙שֶׁת֙ כִּכְּר֣וֹת לֶ֔חֶם וְאֶחָ֥ד נֹשֵׂ֖א נֵֽבֶל־יָֽיִן׃

‎4 ‏וְשָׁאֲל֥וּ לְךָ֖ לְשָׁל֑וֹם וְנָתְנ֤וּ לְךָ֙ שְׁתֵּי־לֶ֔חֶם וְלָקַחְתָּ֖ מִיָּדָֽם׃

‎5 ‏אַ֣חַר כֵּ֗ן תָּבוֹא֙ גִּבְעַ֣ת הָאֱלֹהִ֔ים אֲשֶׁר־שָׁ֖ם נְצִבֵ֣י פְלִשְׁתִּ֑ים וִיהִי֩ כְבֹאֲךָ֨ שָׁ֜ם הָעִ֗יר וּפָגַעְתָּ֞ חֶ֤בֶל נְבִיאִים֙ יֹרְדִ֣ים מֵֽהַבָּמָ֔ה וְלִפְנֵיהֶ֞ם נֵ֤בֶל וְתֹף֙ וְחָלִ֣יל וְכִנּ֔וֹר וְהֵ֖מָּה מִֽתְנַבְּאִֽים׃

‎6 ‏וְצָלְחָ֤ה עָלֶ֙יךָ֙ ר֣וּחַ יְהוָ֔ה וְהִתְנַבִּ֖יתָ עִמָּ֑ם וְנֶהְפַּכְתָּ֖ לְאִ֥ישׁ אַחֵֽר׃

‎7 ‏וְהָיָ֗ה כִּ֥י תבאינה תָבֹ֛אנָה הָאֹת֥וֹת הָאֵ֖לֶּה לָ֑ךְ עֲשֵׂ֤ה לְךָ֙ אֲשֶׁ֣ר תִּמְצָ֣א יָדֶ֔ךָ כִּ֥י הָאֱלֹהִ֖ים עִמָּֽךְ׃

‎8 ‏וְיָרַדְתָּ֣ לְפָנַי֮ הַגִּלְגָּל֒ וְהִנֵּ֤ה אָֽנֹכִי֙ יֹרֵ֣ד אֵלֶ֔יךָ לְהַעֲל֣וֹת עֹל֔וֹת לִזְבֹּ֖חַ זִבְחֵ֣י שְׁלָמִ֑ים שִׁבְעַ֨ת יָמִ֤ים תּוֹחֵל֙ עַד־בּוֹאִ֣י אֵלֶ֔יךָ וְהוֹדַעְתִּ֣י לְךָ֔ אֵ֖ת אֲשֶׁ֥ר תַּעֲשֶֽׂה׃

‎9 ‏וְהָיָ֗ה כְּהַפְנֹת֤וֹ שִׁכְמוֹ֙ לָלֶ֙כֶת֙ מֵעִ֣ם שְׁמוּאֵ֔ל וַיַּהֲפָךְ־ל֥וֹ אֱלֹהִ֖ים לֵ֣ב אַחֵ֑ר וַיָּבֹ֛אוּ כָּל־הָאֹת֥וֹת הָאֵ֖לֶּה בַּיּ֥וֹם הַהֽוּא׃ ס

‎10 ‏וַיָּבֹ֤אוּ שָׁם֙ הַגִּבְעָ֔תָה וְהִנֵּ֥ה חֶֽבֶל־נְבִאִ֖ים לִקְרָאת֑וֹ וַתִּצְלַ֤ח עָלָיו֙ ר֣וּחַ אֱלֹהִ֔ים וַיִּתְנַבֵּ֖א בְּתוֹכָֽם׃

‎11 ‏וַיְהִ֗י כָּל־יֽוֹדְעוֹ֙ מֵאִתְּמ֣וֹל שִׁלְשׁ֔וֹם וַיִּרְא֕וּ וְהִנֵּ֥ה עִם־נְבִאִ֖ים נִבָּ֑א וַיֹּ֨אמֶר הָעָ֜ם אִ֣ישׁ אֶל־רֵעֵ֗הוּ מַה־זֶּה֙ הָיָ֣ה לְבֶן־קִ֔ישׁ הֲגַ֥ם שָׁא֖וּל בַּנְּבִיאִֽים׃

‎12 ‏וַיַּ֨עַן אִ֥ישׁ מִשָּׁ֛ם וַיֹּ֖אמֶר וּמִ֣י אֲבִיהֶ֑ם עַל־כֵּן֙ הָיְתָ֣ה לְמָשָׁ֔ל הֲגַ֥ם שָׁא֖וּל בַּנְּבִאִֽים׃

‎13 ‏וַיְכַל֙ מֵֽהִתְנַבּ֔וֹת וַיָּבֹ֖א הַבָּמָֽה׃

‎14 ‏וַיֹּאמֶר֩ דּ֨וֹד שָׁא֥וּל אֵלָ֛יו וְאֶֽל־נַעֲר֖וֹ אָ֣ן הֲלַכְתֶּ֑ם וַיֹּ֕אמֶר לְבַקֵּשׁ֙ אֶת־הָ֣אֲתֹנ֔וֹת וַנִּרְאֶ֣ה כִי־אַ֔יִן וַנָּב֖וֹא אֶל־שְׁמוּאֵֽל׃

‎15 ‏וַיֹּ֖אמֶר דּ֣וֹד שָׁא֑וּל הַגִּֽידָה־נָּ֣א לִ֔י מָֽה־אָמַ֥ר לָכֶ֖ם שְׁמוּאֵֽל׃

‎16 ‏וַיֹּ֤אמֶר שָׁאוּל֙ אֶל־דּוֹד֔וֹ הַגֵּ֤ד הִגִּיד֙ לָ֔נוּ כִּ֥י נִמְצְא֖וּ הָאֲתֹנ֑וֹת וְאֶת־דְּבַ֤ר הַמְּלוּכָה֙ לֹֽא־הִגִּ֣יד ל֔וֹ אֲשֶׁ֖ר אָמַ֥ר שְׁמוּאֵֽל׃ פ

‎17 ‏וַיַּצְעֵ֤ק שְׁמוּאֵל֙ אֶת־הָעָ֔ם אֶל־יְהוָ֖ה הַמִּצְפָּֽה׃

‎18 ‏וַיֹּ֣אמֶר׀ אֶל־בְּנֵ֣י יִשְׂרָאֵ֗ל פכֹּֽה־אָמַ֤ר יְהוָה֙ אֱלֹהֵ֣י יִשְׂרָאֵ֔ל אָנֹכִ֛י הֶעֱלֵ֥יתִי אֶת־יִשְׂרָאֵ֖ל מִמִּצְרָ֑יִם וָאַצִּ֤יל אֶתְכֶם֙ מִיַּ֣ד מִצְרַ֔יִם וּמִיַּד֙ כָּל־הַמַּמְלָכ֔וֹת הַלֹּחֲצִ֖ים אֶתְכֶֽם׃

‎19 ‏וְאַתֶּ֨ם הַיּ֜וֹם מְאַסְתֶּ֣ם אֶת־אֱלֹהֵיכֶ֗ם אֲשֶׁר־ה֣וּא מוֹשִׁ֣יעַ לָכֶם֮ מִכָּל־רָעוֹתֵיכֶ֣ם וְצָרֹֽתֵיכֶם֒ וַתֹּ֣אמְרוּ ל֔וֹ כִּי־מֶ֖לֶךְ תָּשִׂ֣ים עָלֵ֑ינוּ וְעַתָּ֗ה הִֽתְיַצְּבוּ֙ לִפְנֵ֣י יְהוָ֔ה לְשִׁבְטֵיכֶ֖ם וּלְאַלְפֵיכֶֽם׃

‎20 ‏וַיַּקְרֵ֣ב שְׁמוּאֵ֔ל אֵ֖ת כָּל־שִׁבְטֵ֣י יִשְׂרָאֵ֑ל וַיִּלָּכֵ֖ד שֵׁ֥בֶט בִּנְיָמִֽן׃

‎21 ‏וַיַּקְרֵ֞ב אֶת־שֵׁ֤בֶט בִּנְיָמִן֙ למשפחתו לְמִשְׁפְּחֹתָ֔יו וַתִּלָּכֵ֖ד מִשְׁפַּ֣חַת הַמַּטְרִ֑י וַיִּלָּכֵד֙ שָׁא֣וּל בֶּן־קִ֔ישׁ וַיְבַקְשֻׁ֖הוּ וְלֹ֥א נִמְצָֽא׃

‎22 ‏וַיִּשְׁאֲלוּ־עוֹד֙ בַּֽיהוָ֔ה הֲבָ֥א ע֖וֹד הֲלֹ֣ם אִ֑ישׁ סוַיֹּ֣אמֶר יְהוָ֔ה הִנֵּה־ה֥וּא נֶחְבָּ֖א אֶל־הַכֵּלִֽים׃

‎23 ‏וַיָּרֻ֙צוּ֙ וַיִּקָּחֻ֣הוּ מִשָּׁ֔ם וַיִּתְיַצֵּ֖ב בְּת֣וֹךְ הָעָ֑ם וַיִּגְבַּהּ֙ מִכָּל־הָעָ֔ם מִשִּׁכְמ֖וֹ וָמָֽעְלָה׃

‎24 ‏וַיֹּ֨אמֶר שְׁמוּאֵ֜ל אֶל־כָּל־הָעָ֗ם הַרְּאִיתֶם֙ אֲשֶׁ֣ר בָּֽחַר־בּ֣וֹ יְהוָ֔ה כִּ֛י אֵ֥ין כָּמֹ֖הוּ בְּכָל־הָעָ֑ם וַיָּרִ֧עוּ כָל־הָעָ֛ם וַיֹּאמְר֖וּ יְחִ֥י הַמֶּֽלֶךְ׃ פ

‎25 ‏וַיְדַבֵּ֨ר שְׁמוּאֵ֜ל אֶל־הָעָ֗ם אֵ֚ת מִשְׁפַּ֣ט הַמְּלֻכָ֔ה וַיִּכְתֹּ֣ב בַּסֵּ֔פֶר וַיַּנַּ֖ח לִפְנֵ֣י יְהוָ֑ה וַיְשַׁלַּ֧ח שְׁמוּאֵ֛ל אֶת־כָּל־הָעָ֖ם אִ֥ישׁ לְבֵיתֽוֹ׃

‎26 ‏וְגַ֨ם־שָׁא֔וּל הָלַ֥ךְ לְבֵית֖וֹ גִּבְעָ֑תָה וַיֵּלְכ֣וּ עִמּ֔וֹ הַחַ֕יִל אֲשֶׁר־נָגַ֥ע אֱלֹהִ֖ים בְּלִבָּֽם׃

‎27 ‏וּבְנֵ֧י בְלִיַּ֣עַל אָמְר֗וּ מַה־יֹּשִׁעֵ֙נוּ֙ זֶ֔ה וַיִּבְזֻ֕הוּ וְלֹֽא־הֵבִ֥יאוּ ל֖וֹ מִנְחָ֑ה וַיְהִ֖י כְּמַחֲרִֽישׁ׃ פ

1 wayyiqq^aḥ šəmû’ēl ’eṯ-paḵə haššemen wayyiṣōq ‘al-rō’šwō wayyiššāqēhû wayyō’mer hălwō’ kî-məšāḥăḵā yəhwâ ‘al-n^aḥălāṯwō lənāḡîḏ:

2 bəleḵətəḵā hayywōm mē‘immāḏî ûmāṣā’ṯā šənê ’ănāšîm ‘im-qəḇuraṯ rāḥēl biḡəḇûl binəyāmin bəṣeləṣ^aḥ wə’āmərû ’ēleyḵā niməṣə’û hā’ăṯōnwōṯ ’ăšer hālaḵətā ləḇaqqēš wəhinnēh nāṭaš ’āḇîḵā ’eṯ-diḇərê hā’ăṯōnwōṯ wəḏā’aḡ lāḵem lē’mōr mâ ’e‘ĕśeh liḇənî:

3 wəḥālafətā miššām wâālə’â ûḇā’ṯā ‘aḏ-’ēlwōn tāḇwōr ûməṣā’ûḵā ššām šəlōšâ ’ănāšîm ‘ōlîm ’el-hā’ĕlōhîm bêṯ-’ēl ’eḥāḏ nōśē’| šəlōšâ ḡəḏāyîm wə’eḥāḏ nōśē’ šəlōšeṯ kikərwōṯ leḥem wə’eḥāḏ nōśē’ nēḇel-yāyin:

4 wəšā’ălû ləḵā ləšālwōm wənāṯənû ləḵā šətê-leḥem wəlāq^aḥətā mîyāḏām:

5 ’^aḥar kēn tāḇwō’ giḇə‘aṯ hā’ĕlōhîm ’ăšer-šām nəṣiḇê fəlišətîm wîhî ḵəḇō’ăḵā šām hā‘îr ûfāḡ^a‘ətā ḥeḇel nəḇî’îm yōrəḏîm mēhabāmâ wəlifənêhem nēḇel wəṯōf wəḥālîl wəḵinnwōr wəhēmmâ miṯənabə’îm:

6 wəṣāləḥâ ‘āleyḵā rûḥa yəhwâ wəhiṯənabîṯā ‘immām wənehəpaḵətā lə’îš ’^aḥēr:

7 wəhāyâ kî ṯəḇō’eynâ ṯāḇō’nâ hā’ōṯwōṯ hā’ēlleh lāḵə ‘ăśēh ləḵā ’ăšer timəṣā’ yāḏeḵā kî hā’ĕlōhîm ‘immāḵə:

8 wəyāraḏətā ləfānay hagiləgāl wəhinnēh ’ānōḵî yōrēḏ ’ēleyḵā ləh^a‘ălwōṯ ‘ōlwōṯ lizəbōḥa ziḇəḥê šəlāmîm šiḇə‘aṯ yāmîm twōḥēl ‘aḏ-bwō’î ’ēleyḵā wəhwōḏ^a‘ətî ləḵā ’ēṯ ’ăšer t^a‘ăśeh:

9 wəhāyâ kəhafənōṯwō šiḵəmwō lāleḵeṯ mē‘im šəmû’ēl wayyahăfāḵə-lwō ’ĕlōhîm lēḇ ’^aḥēr wayyāḇō’û kāl-hā’ōṯwōṯ hā’ēlleh bayywōm hahû’: s

10 wayyāḇō’û šām hagiḇə‘āṯâ wəhinnēh ḥeḇel-nəḇi’îm liqərā’ṯwō watiṣəl^aḥ ‘ālāyw rûḥa ’ĕlōhîm wayyiṯənabē’ bəṯwōḵām:

11 wayəhî kāl-ywōḏə‘wō mē’itəmwōl šiləšwōm wayyirə’û wəhinnēh ‘im-nəḇi’îm nibā’ wayyō’mer hā‘ām ’îš ’el-rē‘ēhû mah-zzeh hāyâ ləḇen-qîš hăḡam šā’ûl bannəḇî’îm:

12 wayy^a‘an ’îš miššām wayyō’mer ûmî ’ăḇîhem ‘al-kēn hāyəṯâ ləmāšāl hăḡam šā’ûl bannəḇi’îm:

13 wayəḵal mēhiṯənabwōṯ wayyāḇō’ habāmâ:

14 wayyō’mer dwōḏ šā’ûl ’ēlāyw wə’el-n^a‘ărwō ’ān hălaḵətem wayyō’mer ləḇaqqēš ’eṯ-hā’ăṯōnwōṯ wannirə’eh ḵî-’ayin wannāḇwō’ ’el-šəmû’ēl:

15 wayyō’mer dwōḏ šā’ûl hagîḏâ-nnā’ lî mâ-’āmar lāḵem šəmû’ēl:

16 wayyō’mer šā’ûl ’el-dwōḏwō hagēḏ higîḏ lānû kî niməṣə’û hā’ăṯōnwōṯ wə’eṯ-dəḇar hamməlûḵâ lō’-higîḏ lwō ’ăšer ’āmar šəmû’ēl: f

17 wayyaṣə‘ēq šəmû’ēl ’eṯ-hā‘ām ’el-yəhwâ hammiṣəpâ:

18 wayyō’mer| ’el-bənê yiśərā’ēl fkōh-’āmar yəhwâ ’ĕlōhê yiśərā’ēl ’ānōḵî he‘ĕlêṯî ’eṯ-yiśərā’ēl mimmiṣərāyim wā’aṣṣîl ’eṯəḵem mîyaḏ miṣərayim ûmîyaḏ kāl-hammaməlāḵwōṯ hallōḥăṣîm ’eṯəḵem:

19 wə’atem hayywōm mə’asətem ’eṯ-’ĕlōhêḵem ’ăšer-hû’ mwōšî‘a lāḵem mikāl-rā‘wōṯêḵem wəṣārōṯêḵem watō’mərû lwō kî-meleḵə tāśîm ‘ālênû wə‘atâ hiṯəyaṣṣəḇû lifənê yəhwâ ləšiḇəṭêḵem ûlə’aləfêḵem:

20 wayyaqərēḇ šəmû’ēl ’ēṯ kāl-šiḇəṭê yiśərā’ēl wayyillāḵēḏ šēḇeṭ binəyāmin:

21 wayyaqərēḇ ’eṯ-šēḇeṭ binəyāmin ləmišəp^aḥətāw ləmišəpəḥōṯāyw watillāḵēḏ mišəp^aḥaṯ hammaṭərî wayyillāḵēḏ šā’ûl ben-qîš wayəḇaqəšuhû wəlō’ niməṣā’:

22 wayyišə’ălû-‘wōḏ bayhwâ hăḇā’ ‘wōḏ hălōm ’îš swayyō’mer yəhwâ hinnēh-hû’ neḥəbā’ ’el-hakēlîm:

23 wayyāruṣû wayyiqqāḥuhû miššām wayyiṯəyaṣṣēḇ bəṯwōḵə hā‘ām wayyiḡəb^ah mikāl-hā‘ām miššiḵəmwō wāmā‘əlâ:

24 wayyō’mer šəmû’ēl ’el-kāl-hā‘ām harrə’îṯem ’ăšer bāḥar-bwō yəhwâ kî ’ên kāmōhû bəḵāl-hā‘ām wayyāri‘û ḵāl-hā‘ām wayyō’mərû yəḥî hammeleḵə: f

25 wayəḏabēr šəmû’ēl ’el-hā‘ām ’ēṯ mišəpaṭ hamməluḵâ wayyiḵətōḇ bassēfer wayyann^aḥ lifənê yəhwâ wayəšall^aḥ šəmû’ēl ’eṯ-kāl-hā‘ām ’îš ləḇêṯwō:

26 wəḡam-šā’ûl hālaḵə ləḇêṯwō giḇə‘āṯâ wayyēləḵû ‘immwō h^aḥayil ’ăšer-nāḡ^a‘ ’ĕlōhîm bəlibām:

27 ûḇənê ḇəlîy^a‘al ’āmərû mah-yyōši‘ēnû zeh wayyiḇəzuhû wəlō’-hēḇî’û lwō minəḥâ wayəhî kəm^aḥărîš: f