1 Samuel (1 Shmuel) Chapter 19

‎1 ‏וַיְדַבֵּ֣ר שָׁא֗וּל אֶל־יוֹנָתָ֤ן בְּנוֹ֙ וְאֶל־כָּל־עֲבָדָ֔יו לְהָמִ֖ית אֶת־דָּוִ֑ד וִיהֽוֹנָתָן֙ בֶּן־שָׁא֔וּל חָפֵ֥ץ בְּדָוִ֖ד מְאֹֽד׃

‎2 ‏וַיַּגֵּ֤ד יְהוֹנָתָן֙ לְדָוִ֣ד לֵאמֹ֔ר מְבַקֵּ֛שׁ שָׁא֥וּל אָבִ֖י לַהֲמִיתֶ֑ךָ וְעַתָּה֙ הִשָּֽׁמֶר־נָ֣א בַבֹּ֔קֶר וְיָשַׁבְתָּ֥ בַסֵּ֖תֶר וְנַחְבֵּֽאתָ׃

‎3 ‏וַאֲנִ֨י אֵצֵ֜א וְעָמַדְתִּ֣י לְיַד־אָבִ֗י בַּשָּׂדֶה֙ אֲשֶׁ֣ר אַתָּ֣ה שָׁ֔ם וַאֲנִ֕י אֲדַבֵּ֥ר בְּךָ֖ אֶל־אָבִ֑י וְרָאִ֥יתִי מָ֖ה וְהִגַּ֥דְתִּי לָֽךְ׃ ס

‎4 ‏וַיְדַבֵּ֨ר יְהוֹנָתָ֤ן בְּדָוִד֙ ט֔וֹב אֶל־שָׁא֖וּל אָבִ֑יו וַיֹּ֣אמֶר אֵ֠לָיו אַל־יֶחֱטָ֨א הַמֶּ֜לֶךְ בְּעַבְדּ֣וֹ בְדָוִ֗ד כִּ֣י ל֤וֹא חָטָא֙ לָ֔ךְ וְכִ֥י מַעֲשָׂ֖יו טוֹב־לְךָ֥ מְאֹֽד׃

‎5 ‏וַיָּשֶׂם֩ אֶת־נַפְשׁ֨וֹ בְכַפּ֜וֹ וַיַּ֣ךְ אֶת־הַפְּלִשְׁתִּ֗י וַיַּ֨עַשׂ יְהוָ֜ה תְּשׁוּעָ֤ה גְדוֹלָה֙ לְכָל־יִשְׂרָאֵ֔ל רָאִ֖יתָ וַתִּשְׂמָ֑ח וְלָ֤מָּה תֶֽחֱטָא֙ בְּדָ֣ם נָקִ֔י לְהָמִ֥ית אֶת־דָּוִ֖ד חִנָּֽם׃

‎6 ‏וַיִּשְׁמַ֥ע שָׁא֖וּל בְּק֣וֹל יְהוֹנָתָ֑ן וַיִּשָּׁבַ֣ע שָׁא֔וּל חַי־יְהוָ֖ה אִם־יוּמָֽת׃

‎7 ‏וַיִּקְרָ֤א יְהוֹנָתָן֙ לְדָוִ֔ד וַיַּגֶּד־לוֹ֙ יְה֣וֹנָתָ֔ן אֵ֥ת כָּל־הַדְּבָרִ֖ים הָאֵ֑לֶּה וַיָּבֵ֨א יְהוֹנָתָ֤ן אֶת־דָּוִד֙ אֶל־שָׁא֔וּל וַיְהִ֥י לְפָנָ֖יו כְּאֶתְמ֥וֹל שִׁלְשֽׁוֹם׃ ס

‎8 ‏וַתּ֥וֹסֶף הַמִּלְחָמָ֖ה לִֽהְי֑וֹת וַיֵּצֵ֨א דָוִ֜ד וַיִּלָּ֣חֶם בַּפְּלִשְׁתִּ֗ים וַיַּ֤ךְ בָּהֶם֙ מַכָּ֣ה גְדוֹלָ֔ה וַיָּנֻ֖סוּ מִפָּנָֽיו׃

‎9 ‏וַתְּהִי֩ ר֨וּחַ יְהוָ֤ה׀ רָעָה֙ אֶל־שָׁא֔וּל וְהוּא֙ בְּבֵית֣וֹ יוֹשֵׁ֔ב וַחֲנִית֖וֹ בְּיָד֑וֹ וְדָוִ֖ד מְנַגֵּ֥ן בְּיָֽד׃

‎10 ‏וַיְבַקֵּ֨שׁ שָׁא֜וּל לְהַכּ֤וֹת בַּֽחֲנִית֙ בְּדָוִ֣ד וּבַקִּ֔יר וַיִּפְטַר֙ מִפְּנֵ֣י שָׁא֔וּל וַיַּ֥ךְ אֶֽת־הַחֲנִ֖ית בַּקִּ֑יר וְדָוִ֛ד נָ֥ס וַיִּמָּלֵ֖ט בַּלַּ֥יְלָה הֽוּא׃ פ

‎11 ‏וַיִּשְׁלַח֩ שָׁא֨וּל מַלְאָכִ֜ים אֶל־בֵּ֤ית דָּוִד֙ לְשָׁמְר֔וֹ וְלַהֲמִית֖וֹ בַּבֹּ֑קֶר וַתַּגֵּ֣ד לְדָוִ֗ד מִיכַ֤ל אִשְׁתּוֹ֙ לֵאמֹ֔ר אִם־אֵ֨ינְךָ֜ מְמַלֵּ֤ט אֶֽת־נַפְשְׁךָ֙ הַלַּ֔יְלָה מָחָ֖ר אַתָּ֥ה מוּמָֽת׃

‎12 ‏וַתֹּ֧רֶד מִיכַ֛ל אֶת־דָּוִ֖ד בְּעַ֣ד הַחַלּ֑וֹן וַיֵּ֥לֶךְ וַיִּבְרַ֖ח וַיִּמָּלֵֽט׃

‎13 ‏וַתִּקַּ֨ח מִיכַ֜ל אֶת־הַתְּרָפִ֗ים וַתָּ֙שֶׂם֙ אֶל־הַמִּטָּ֔ה וְאֵת֙ כְּבִ֣יר הָֽעִזִּ֔ים שָׂ֖מָה מְרַֽאֲשֹׁתָ֑יו וַתְּכַ֖ס בַּבָּֽגֶד׃ ס

‎14 ‏וַיִּשְׁלַ֥ח שָׁא֛וּל מַלְאָכִ֖ים לָקַ֣חַת אֶת־דָּוִ֑ד וַתֹּ֖אמֶר חֹלֶ֥ה הֽוּא׃ פ

‎15 ‏וַיִּשְׁלַ֤ח שָׁאוּל֙ אֶת־הַמַּלְאָכִ֔ים לִרְא֥וֹת אֶת־דָּוִ֖ד לֵאמֹ֑ר הַעֲל֨וּ אֹת֧וֹ בַמִּטָּ֛ה אֵלַ֖י לַהֲמִתֽוֹ׃

‎16 ‏וַיָּבֹ֙אוּ֙ הַמַּלְאָכִ֔ים וְהִנֵּ֥ה הַתְּרָפִ֖ים אֶל־הַמִּטָּ֑ה וּכְבִ֥יר הָעִזִּ֖ים מְרַאֲשֹׁתָֽיו׃

‎17 ‏וַיֹּ֨אמֶר שָׁא֜וּל אֶל־מִיכַ֗ל לָ֤מָּה כָּ֙כָה֙ רִמִּיתִ֔נִי וַתְּשַׁלְּחִ֥י אֶת־אֹיְבִ֖י וַיִּמָּלֵ֑ט וַתֹּ֤אמֶר מִיכַל֙ אֶל־שָׁא֔וּל הוּא־אָמַ֥ר אֵלַ֛י שַׁלְּחִ֖נִי לָמָ֥ה אֲמִיתֵֽךְ׃

‎18 ‏וְדָוִ֨ד בָּרַ֜ח וַיִּמָּלֵ֗ט וַיָּבֹ֤א אֶל־שְׁמוּאֵל֙ הָרָמָ֔תָה וַיַּ֨גֶּד־ל֔וֹ אֵ֛ת כָּל־אֲשֶׁ֥ר עָֽשָׂה־ל֖וֹ שָׁא֑וּל וַיֵּ֤לֶךְ הוּא֙ וּשְׁמוּאֵ֔ל וַיֵּשְׁב֖וּ בנוית בְּנָֽיוֹת׃

‎19 ‏וַיֻּגַּ֥ד לְשָׁא֖וּל לֵאמֹ֑ר הִנֵּ֣ה דָוִ֔ד בנוית בְּנָי֖וֹת בָּרָמָֽה׃

‎20 ‏וַיִּשְׁלַ֨ח שָׁא֣וּל מַלְאָכִים֮ לָקַ֣חַת אֶת־דָּוִד֒ וַיַּ֗רְא אֶֽת־לַהֲקַ֤ת הַנְּבִיאִים֙ נִבְּאִ֔ים וּשְׁמוּאֵ֕ל עֹמֵ֥ד נִצָּ֖ב עֲלֵיהֶ֑ם וַתְּהִ֞י עַֽל־מַלְאֲכֵ֤י שָׁאוּל֙ ר֣וּחַ אֱלֹהִ֔ים וַיִּֽתְנַבְּא֖וּ גַּם־הֵֽמָּה׃

‎21 ‏וַיַּגִּ֣דוּ לְשָׁא֗וּל וַיִּשְׁלַח֙ מַלְאָכִ֣ים אֲחֵרִ֔ים וַיִּֽתְנַבְּא֖וּ גַּם־הֵ֑מָּה וַיֹּ֣סֶף שָׁא֗וּל וַיִּשְׁלַח֙ מַלְאָכִ֣ים שְׁלִשִׁ֔ים וַיִּֽתְנַבְּא֖וּ גַּם־הֵֽמָּה׃

‎22 ‏וַיֵּ֨לֶךְ גַּם־ה֜וּא הָרָמָ֗תָה וַיָּבֹא֙ עַד־בּ֤וֹר הַגָּדוֹל֙ אֲשֶׁ֣ר בַּשֶּׂ֔כוּ וַיִּשְׁאַ֣ל וַיֹּ֔אמֶר אֵיפֹ֥ה שְׁמוּאֵ֖ל וְדָוִ֑ד וַיֹּ֕אמֶר הִנֵּ֖ה בנוית בְּנָי֥וֹת בָּרָמָֽה׃

‎23 ‏וַיֵּ֣לֶךְ שָׁ֔ם אֶל־נוית נָי֖וֹת בָּרָמָ֑ה וַתְּהִי֩ עָלָ֨יו גַּם־ה֜וּא ר֣וּחַ אֱלֹהִ֗ים וַיֵּ֤לֶךְ הָלוֹךְ֙ וַיִּתְנַבֵּ֔א עַד־בֹּא֖וֹ בנוית בְּנָי֥וֹת בָּרָמָֽה׃

‎24 ‏וַיִּפְשַׁ֨ט גַּם־ה֜וּא בְּגָדָ֗יו וַיִּתְנַבֵּ֤א גַם־הוּא֙ לִפְנֵ֣י שְׁמוּאֵ֔ל וַיִּפֹּ֣ל עָרֹ֔ם כָּל־הַיּ֥וֹם הַה֖וּא וְכָל־הַלָּ֑יְלָה עַל־כֵּן֙ יֹֽאמְר֔וּ הֲגַ֥ם שָׁא֖וּל בַּנְּבִיאִֽם׃ פ

1 wayəḏabēr šā’ûl ’el-ywōnāṯān bənwō wə’el-kāl-‘ăḇāḏāyw ləhāmîṯ ’eṯ-dāwiḏ wîhwōnāṯān ben-šā’ûl ḥāfēṣ bəḏāwiḏ mə’ōḏ:

2 wayyagēḏ yəhwōnāṯān ləḏāwiḏ lē’mōr məḇaqqēš šā’ûl ’āḇî lahămîṯeḵā wə‘atâ hiššāmer-nā’ ḇabōqer wəyāšaḇətā ḇassēṯer wən^aḥəbē’ṯā:

3 wa’ănî ’ēṣē’ wə‘āmaḏətî ləyaḏ-’āḇî baśśāḏeh ’ăšer ’atâ šām wa’ănî ’ăḏabēr bəḵā ’el-’āḇî wərā’îṯî mâ wəhigaḏətî lāḵə: s

4 wayəḏabēr yəhwōnāṯān bəḏāwiḏ ṭwōḇ ’el-šā’ûl ’āḇîw wayyō’mer ’ēlāyw ’al-yeḥĕṭā’ hammeleḵə bə‘aḇədwō ḇəḏāwiḏ kî lwō’ ḥāṭā’ lāḵə wəḵî m^a‘ăśāyw ṭwōḇ-ləḵā mə’ōḏ:

5 wayyāśem ’eṯ-nafəšwō ḇəḵapwō wayyaḵə ’eṯ-hapəlišətî wayy^a‘aś yəhwâ təšû‘â ḡəḏwōlâ ləḵāl-yiśərā’ēl rā’îṯā watiśəmāḥ wəlāmmâ ṯeḥĕṭā’ bəḏām nāqî ləhāmîṯ ’eṯ-dāwiḏ ḥinnām:

6 wayyišəm^a‘ šā’ûl bəqwōl yəhwōnāṯān wayyiššāḇ^a‘ šā’ûl ḥay-yəhwâ ’im-yûmāṯ:

7 wayyiqərā’ yəhwōnāṯān ləḏāwiḏ wayyageḏ-lwō yəhwōnāṯān ’ēṯ kāl-hadəḇārîm hā’ēlleh wayyāḇē’ yəhwōnāṯān ’eṯ-dāwiḏ ’el-šā’ûl wayəhî ləfānāyw kə’eṯəmwōl šiləšwōm: s

8 watwōsef hammiləḥāmâ lihəywōṯ wayyēṣē’ ḏāwiḏ wayyillāḥem bapəlišətîm wayyaḵə bâem makâ ḡəḏwōlâ wayyānusû mipānāyw:

9 watəhî rûḥa yəhwâ| rā‘â ’el-šā’ûl wəhû’ bəḇêṯwō ywōšēḇ w^aḥănîṯwō bəyāḏwō wəḏāwiḏ mənagēn bəyāḏ:

10 wayəḇaqqēš šā’ûl ləhakwōṯ b^aḥănîṯ bəḏāwiḏ ûḇaqqîr wayyifəṭar mipənê šā’ûl wayyaḵə ’eṯ-h^aḥănîṯ baqqîr wəḏāwiḏ nās wayyimmālēṭ ballayəlâ hû’: f

11 wayyišəl^aḥ šā’ûl malə’āḵîm ’el-bêṯ dāwiḏ ləšāmərwō wəlahămîṯwō babōqer watagēḏ ləḏāwiḏ mîḵal ’išətwō lē’mōr ’im-’ênəḵā məmallēṭ ’eṯ-nafəšəḵā hallayəlâ māḥār ’atâ mûmāṯ:

12 watōreḏ mîḵal ’eṯ-dāwiḏ bə‘aḏ h^aḥallwōn wayyēleḵə wayyiḇər^aḥ wayyimmālēṭ:

13 watiqq^aḥ mîḵal ’eṯ-hatərāfîm watāśem ’el-hammiṭṭâ wə’ēṯ kəḇîr hā‘izzîm śāmâ məra’ăšōṯāyw watəḵas babāḡeḏ: s

14 wayyišəl^aḥ šā’ûl malə’āḵîm lāq^aḥaṯ ’eṯ-dāwiḏ watō’mer ḥōleh hû’: f

15 wayyišəl^aḥ šā’ûl ’eṯ-hammalə’āḵîm lirə’wōṯ ’eṯ-dāwiḏ lē’mōr h^a‘ălû ’ōṯwō ḇammiṭṭâ ’ēlay lahămiṯwō:

16 wayyāḇō’û hammalə’āḵîm wəhinnēh hatərāfîm ’el-hammiṭṭâ ûḵəḇîr hā‘izzîm məra’ăšōṯāyw:

17 wayyō’mer šā’ûl ’el-mîḵal lāmmâ kāḵâ rimmîṯinî watəšalləḥî ’eṯ-’ōyəḇî wayyimmālēṭ watō’mer mîḵal ’el-šā’ûl hû’-’āmar ’ēlay šalləḥinî lāmâ ’ămîṯēḵə:

18 wəḏāwiḏ bār^aḥ wayyimmālēṭ wayyāḇō’ ’el-šəmû’ēl hārāmāṯâ wayyageḏ-lwō ’ēṯ kāl-’ăšer ‘āśâ-lwō šā’ûl wayyēleḵə hû’ ûšəmû’ēl wayyēšəḇû bənəwāyōṯ bənāywōṯ:

19 wayyugaḏ ləšā’ûl lē’mōr hinnēh ḏāwiḏ bənəwāyōṯ bənāywōṯ bārāmâ:

20 wayyišəl^aḥ šā’ûl malə’āḵîm lāq^aḥaṯ ’eṯ-dāwiḏ wayyarə’ ’eṯ-lahăqaṯ hannəḇî’îm nibə’îm ûšəmû’ēl ‘ōmēḏ niṣṣāḇ ‘ălêhem watəhî ‘al-malə’ăḵê šā’ûl rûḥa ’ĕlōhîm wayyiṯənabə’û gam-hēmmâ:

21 wayyagiḏû ləšā’ûl wayyišəl^aḥ malə’āḵîm ’ăḥērîm wayyiṯənabə’û gam-hēmmâ wayyōsef šā’ûl wayyišəl^aḥ malə’āḵîm šəlišîm wayyiṯənabə’û gam-hēmmâ:

22 wayyēleḵə gam-hû’ hārāmāṯâ wayyāḇō’ ‘aḏ-bwōr hagāḏwōl ’ăšer baśśeḵû wayyišə’al wayyō’mer ’êfōh šəmû’ēl wəḏāwiḏ wayyō’mer hinnēh bənəwāyōṯ bənāywōṯ bārāmâ:

23 wayyēleḵə šām ’el-nəwāyōṯ nāywōṯ bārāmâ watəhî ‘ālāyw gam-hû’ rûḥa ’ĕlōhîm wayyēleḵə hālwōḵə wayyiṯənabē’ ‘aḏ-bō’wō bənəwāyōṯ bənāywōṯ bārāmâ:

24 wayyifəšaṭ gam-hû’ bəḡāḏāyw wayyiṯənabē’ ḡam-hû’ lifənê šəmû’ēl wayyipōl ‘ārōm kāl-hayywōm hahû’ wəḵāl-hallāyəlâ ‘al-kēn yō’mərû hăḡam šā’ûl bannəḇî’im: f