1 Samuel (1 Shmuel) Chapter 22

‎1 ‏וַיֵּ֤לֶךְ דָּוִד֙ מִשָּׁ֔ם וַיִּמָּלֵ֖ט אֶל־מְעָרַ֣ת עֲדֻלָּ֑ם וַיִּשְׁמְע֤וּ אֶחָיו֙ וְכָל־בֵּ֣ית אָבִ֔יו וַיֵּרְד֥וּ אֵלָ֖יו שָֽׁמָּה׃

‎2 ‏וַיִּֽתְקַבְּצ֣וּ אֵ֠לָיו כָּל־אִ֨ישׁ מָצ֜וֹק וְכָל־אִ֨ישׁ אֲשֶׁר־ל֤וֹ נֹשֶׁא֙ וְכָל־אִ֣ישׁ מַר־נֶ֔פֶשׁ וַיְהִ֥י עֲלֵיהֶ֖ם לְשָׂ֑ר וַיִּהְי֣וּ עִמּ֔וֹ כְּאַרְבַּ֥ע מֵא֖וֹת אִֽישׁ׃

‎3 ‏וַיֵּ֧לֶךְ דָּוִ֛ד מִשָּׁ֖ם מִצְפֵּ֣ה מוֹאָ֑ב וַיֹּ֣אמֶר׀ אֶל־מֶ֣לֶךְ מוֹאָ֗ב יֵֽצֵא־נָ֞א אָבִ֤י וְאִמִּי֙ אִתְּכֶ֔ם עַ֚ד אֲשֶׁ֣ר אֵדַ֔ע מַה־יַּֽעֲשֶׂה־לִּ֖י אֱלֹהִֽים׃

‎4 ‏וַיַּנְחֵ֕ם אֶת־פְּנֵ֖י מֶ֣לֶךְ מוֹאָ֑ב וַיֵּשְׁב֣וּ עִמּ֔וֹ כָּל־יְמֵ֥י הֱיוֹת־דָּוִ֖ד בַּמְּצוּדָֽה׃ ס

‎5 ‏וַיֹּאמֶר֩ גָּ֨ד הַנָּבִ֜יא אֶל־דָּוִ֗ד לֹ֤א תֵשֵׁב֙ בַּמְּצוּדָ֔ה לֵ֥ךְ וּבָֽאתָ־לְּךָ֖ אֶ֣רֶץ יְהוּדָ֑ה וַיֵּ֣לֶךְ דָּוִ֔ד וַיָּבֹ֖א יַ֥עַר חָֽרֶת׃ ס

‎6 ‏וַיִּשְׁמַ֣ע שָׁא֔וּל כִּ֚י נוֹדַ֣ע דָּוִ֔ד וַאֲנָשִׁ֖ים אֲשֶׁ֣ר אִתּ֑וֹ וְשָׁאוּל֩ יוֹשֵׁ֨ב בַּגִּבְעָ֜ה תַּֽחַת־הָאֶ֤שֶׁל בָּֽרָמָה֙ וַחֲנִית֣וֹ בְיָד֔וֹ וְכָל־עֲבָדָ֖יו נִצָּבִ֥ים עָלָֽיו׃

‎7 ‏וַיֹּ֣אמֶר שָׁא֗וּל לַֽעֲבָדָיו֙ הַנִּצָּבִ֣ים עָלָ֔יו שִׁמְעוּ־נָ֖א בְּנֵ֣י יְמִינִ֑י גַּם־לְכֻלְּכֶ֗ם יִתֵּ֤ן בֶּן־יִשַׁי֙ שָׂד֣וֹת וּכְרָמִ֔ים לְכֻלְּכֶ֣ם יָשִׂ֔ים שָׂרֵ֥י אֲלָפִ֖ים וְשָׂרֵ֥י מֵאֽוֹת׃

‎8 ‏כִּי֩ קְשַׁרְתֶּ֨ם כֻּלְּכֶ֜ם עָלַ֗י וְאֵין־גֹּלֶ֤ה אֶת־אָזְנִי֙ בִּכְרָת־בְּנִ֣י עִם־בֶּן־יִשַׁ֔י וְאֵין־חֹלֶ֥ה מִכֶּ֛ם עָלַ֖י וְגֹלֶ֣ה אֶת־אָזְנִ֑י כִּ֣י הֵקִים֩ בְּנִ֨י אֶת־עַבְדִּ֥י עָלַ֛י לְאֹרֵ֖ב כַּיּ֥וֹם הַזֶּֽה׃ ס

‎9 ‏וַיַּ֜עַן דֹּאֵ֣ג הָאֲדֹמִ֗י וְה֛וּא נִצָּ֥ב עַל־עַבְדֵֽי־שָׁא֖וּל וַיֹּאמַ֑ר רָאִ֙יתִי֙ אֶת־בֶּן־יִשַׁ֔י בָּ֣א נֹ֔בֶה אֶל־אֲחִימֶ֖לֶךְ בֶּן־אֲחִטֽוּב׃

‎10 ‏וַיִּשְׁאַל־לוֹ֙ בַּֽיהוָ֔ה וְצֵידָ֖ה נָ֣תַן ל֑וֹ וְאֵ֗ת חֶ֛רֶב גָּלְיָ֥ת הַפְּלִשְׁתִּ֖י נָ֥תַן לֽוֹ׃

‎11 ‏וַיִּשְׁלַ֣ח הַמֶּ֡לֶךְ לִקְרֹא֩ אֶת־אֲחִימֶ֨לֶךְ בֶּן־אֲחִיט֜וּב הַכֹּהֵ֗ן וְאֵ֨ת כָּל־בֵּ֥ית אָבִ֛יו הַכֹּהֲנִ֖ים אֲשֶׁ֣ר בְּנֹ֑ב וַיָּבֹ֥אוּ כֻלָּ֖ם אֶל־הַמֶּֽלֶךְ׃ ס

‎12 ‏וַיֹּ֣אמֶר שָׁא֔וּל שְֽׁמַֽע־נָ֖א בֶּן־אֲחִיט֑וּב וַיֹּ֖אמֶר הִנְנִ֥י אֲדֹנִֽי׃

‎13 ‏וַיֹּ֤אמֶר אלו אֵלָיו֙ שָׁא֔וּל לָ֚מָּה קְשַׁרְתֶּ֣ם עָלַ֔י אַתָּ֖ה וּבֶן־יִשָׁ֑י בְּתִתְּךָ֙ ל֜וֹ לֶ֣חֶם וְחֶ֗רֶב וְשָׁא֥וֹל לוֹ֙ בֵּֽאלֹהִ֔ים לָק֥וּם אֵלַ֛י לְאֹרֵ֖ב כַּיּ֥וֹם הַזֶּֽה׃ ס

‎14 ‏וַיַּ֧עַן אֲחִימֶ֛לֶךְ אֶת־הַמֶּ֖לֶךְ וַיֹּאמַ֑ר וּמִ֤י בְכָל־עֲבָדֶ֙יךָ֙ כְּדָוִ֣ד נֶאֱמָ֔ן וַחֲתַ֥ן הַמֶּ֛לֶךְ וְסָ֥ר אֶל־מִשְׁמַעְתֶּ֖ךָ וְנִכְבָּ֥ד בְּבֵיתֶֽךָ׃

‎15 ‏הַיּ֧וֹם הַחִלֹּ֛תִי לשאול־ לִשְׁאָל־ ל֥וֹ בֵאלֹהִ֖ים חָלִ֣ילָה לִּ֑י אַל־יָשֵׂם֩ הַמֶּ֨לֶךְ בְּעַבְדּ֤וֹ דָבָר֙ בְּכָל־בֵּ֣ית אָבִ֔י כִּ֠י לֹֽא־יָדַ֤ע עַבְדְּךָ֙ בְּכָל־זֹ֔את דָּבָ֥ר קָטֹ֖ן א֥וֹ גָדֽוֹל׃

‎16 ‏וַיֹּ֣אמֶר הַמֶּ֔לֶךְ מ֥וֹת תָּמ֖וּת אֲחִימֶ֑לֶךְ אַתָּ֖ה וְכָל־בֵּ֥ית אָבִֽיךָ׃

‎17 ‏וַיֹּ֣אמֶר הַמֶּ֡לֶךְ לָרָצִים֩ הַנִּצָּבִ֨ים עָלָ֜יו סֹ֥בּוּ וְהָמִ֣יתוּ׀ כֹּהֲנֵ֣י יְהוָ֗ה כִּ֤י גַם־יָדָם֙ עִם־דָּוִ֔ד וְכִ֤י יָֽדְעוּ֙ כִּֽי־בֹרֵ֣חַ ה֔וּא וְלֹ֥א גָל֖וּ אֶת־אזנו אָזְנִ֑י וְלֹֽא־אָב֞וּ עַבְדֵ֤י הַמֶּ֙לֶךְ֙ לִשְׁלֹ֣חַ אֶת־יָדָ֔ם לִפְגֹ֖עַ בְּכֹהֲנֵ֥י יְהוָֽה׃ ס

‎18 ‏וַיֹּ֤אמֶר הַמֶּ֙לֶךְ֙ לדויג לְדוֹאֵ֔ג סֹ֣ב אַתָּ֔ה וּפְגַ֖ע בַּכֹּהֲנִ֑ים וַיִּסֹּ֞ב דויג דּוֹאֵ֣ג הָאֲדֹמִ֗י וַיִּפְגַּע־הוּא֙ בַּכֹּ֣הֲנִ֔ים וַיָּ֣מֶת׀ בַּיּ֣וֹם הַה֗וּא שְׁמֹנִ֤ים וַחֲמִשָּׁה֙ אִ֔ישׁ נֹשֵׂ֖א אֵפ֥וֹד בָּֽד׃

‎19 ‏וְאֵ֨ת נֹ֤ב עִיר־הַכֹּֽהֲנִים֙ הִכָּ֣ה לְפִי־חֶ֔רֶב מֵאִישׁ֙ וְעַד־אִשָּׁ֔ה מֵעוֹלֵ֖ל וְעַד־יוֹנֵ֑ק וְשׁ֧וֹר וַחֲמ֛וֹר וָשֶׂ֖ה לְפִי־חָֽרֶב׃

‎20 ‏וַיִּמָּלֵ֣ט בֵּן־אֶחָ֗ד לַאֲחִימֶ֙לֶךְ֙ בֶּן־אֲחִט֔וּב וּשְׁמ֖וֹ אֶבְיָתָ֑ר וַיִּבְרַ֖ח אַחֲרֵ֥י דָוִֽד׃

‎21 ‏וַיַּגֵּ֥ד אֶבְיָתָ֖ר לְדָוִ֑ד כִּ֚י הָרַ֣ג שָׁא֔וּל אֵ֖ת כֹּהֲנֵ֥י יְהוָֽה׃

‎22 ‏וַיֹּ֨אמֶר דָּוִ֜ד לְאֶבְיָתָ֗ר יָדַ֜עְתִּי בַּיּ֤וֹם הַהוּא֙ כִּֽי־שָׁם֙ דויג דּוֹאֵ֣ג הָאֲדֹמִ֔י כִּֽי־הַגֵּ֥ד יַגִּ֖יד לְשָׁא֑וּל אָנֹכִ֣י סַבֹּ֔תִי בְּכָל־נֶ֖פֶשׁ בֵּ֥ית אָבִֽיךָ׃

‎23 ‏שְׁבָ֤ה אִתִּי֙ אַל־תִּירָ֔א כִּ֛י אֲשֶׁר־יְבַקֵּ֥שׁ אֶת־נַפְשִׁ֖י יְבַקֵּ֣שׁ אֶת־נַפְשֶׁ֑ךָ כִּֽי־מִשְׁמֶ֥רֶת אַתָּ֖ה עִמָּדִֽי׃

1 wayyēleḵə dāwiḏ miššām wayyimmālēṭ ’el-mə‘āraṯ ‘ăḏullām wayyišəmə‘û ’eḥāyw wəḵāl-bêṯ ’āḇîw wayyērəḏû ’ēlāyw šāmmâ:

2 wayyiṯəqabəṣû ’ēlāyw kāl-’îš māṣwōq wəḵāl-’îš ’ăšer-lwō nōše’ wəḵāl-’îš mar-nefeš wayəhî ‘ălêhem ləśār wayyihəyû ‘immwō kə’arəb^a‘ mē’wōṯ ’îš:

3 wayyēleḵə dāwiḏ miššām miṣəpēh mwō’āḇ wayyō’mer| ’el-meleḵə mwō’āḇ yēṣē’-nā’ ’āḇî wə’immî ’itəḵem ‘aḏ ’ăšer ’ēḏ^a‘ mah-yy^a‘ăśeh-llî ’ĕlōhîm:

4 wayyanəḥēm ’eṯ-pənê meleḵə mwō’āḇ wayyēšəḇû ‘immwō kāl-yəmê hĕywōṯ-dāwiḏ bamməṣûḏâ: s

5 wayyō’mer gāḏ hannāḇî’ ’el-dāwiḏ lō’ ṯēšēḇ bamməṣûḏâ lēḵə ûḇā’ṯā-lləḵā ’ereṣ yəhûḏâ wayyēleḵə dāwiḏ wayyāḇō’ y^a‘ar ḥāreṯ: s

6 wayyišəm^a‘ šā’ûl kî nwōḏ^a‘ dāwiḏ wa’ănāšîm ’ăšer ’itwō wəšā’ûl ywōšēḇ bagiḇə‘â t^aḥaṯ-hā’ešel bārāmâ w^aḥănîṯwō ḇəyāḏwō wəḵāl-‘ăḇāḏāyw niṣṣāḇîm ‘ālāyw:

7 wayyō’mer šā’ûl l^a‘ăḇāḏāyw hanniṣṣāḇîm ‘ālāyw šimə‘û-nā’ bənê yəmînî gam-ləḵulləḵem yitēn ben-yišay śāḏwōṯ ûḵərāmîm ləḵulləḵem yāśîm śārê ’ălāfîm wəśārê mē’wōṯ:

8 kî qəšarətem kulləḵem ‘ālay wə’ên-gōleh ’eṯ-’āzənî biḵərāṯ-bənî ‘im-ben-yišay wə’ên-ḥōleh mikem ‘ālay wəḡōleh ’eṯ-’āzənî kî hēqîm bənî ’eṯ-‘aḇədî ‘ālay lə’ōrēḇ kayywōm hazzeh: s

9 wayy^a‘an dō’ēḡ hā’ăḏōmî wəhû’ niṣṣāḇ ‘al-‘aḇəḏê-šā’ûl wayyō’mar rā’îṯî ’eṯ-ben-yišay bā’ nōḇeh ’el-’ăḥîmeleḵə ben-’ăḥiṭûḇ:

10 wayyišə’al-lwō bayhwâ wəṣêḏâ nāṯan lwō wə’ēṯ ḥereḇ gāləyāṯ hapəlišətî nāṯan lwō:

11 wayyišəl^aḥ hammeleḵə liqərō’ ’eṯ-’ăḥîmeleḵə ben-’ăḥîṭûḇ hakōhēn wə’ēṯ kāl-bêṯ ’āḇîw hakōhănîm ’ăšer bənōḇ wayyāḇō’û ḵullām ’el-hammeleḵə: s

12 wayyō’mer šā’ûl šəm^a‘-nā’ ben-’ăḥîṭûḇ wayyō’mer hinənî ’ăḏōnî:

13 wayyō’mer ’ēlāw ’ēlāyw šā’ûl lāmmâ qəšarətem ‘ālay ’atâ ûḇen-yišāy bəṯitəḵā lwō leḥem wəḥereḇ wəšā’wōl lwō bē’lōhîm lāqûm ’ēlay lə’ōrēḇ kayywōm hazzeh: s

14 wayy^a‘an ’ăḥîmeleḵə ’eṯ-hammeleḵə wayyō’mar ûmî ḇəḵāl-‘ăḇāḏeyḵā kəḏāwiḏ ne’ĕmān w^aḥăṯan hammeleḵə wəsār ’el-mišəm^a‘əteḵā wəniḵəbāḏ bəḇêṯeḵā:

15 hayywōm h^aḥillōṯî lišə’wōl- lišə’āl- lwō ḇē’lōhîm ḥālîlâ llî ’al-yāśēm hammeleḵə bə‘aḇədwō ḏāḇār bəḵāl-bêṯ ’āḇî kî lō’-yāḏ^a‘ ‘aḇədəḵā bəḵāl-zō’ṯ dāḇār qāṭōn ’wō ḡāḏwōl:

16 wayyō’mer hammeleḵə mwōṯ tāmûṯ ’ăḥîmeleḵə ’atâ wəḵāl-bêṯ ’āḇîḵā:

17 wayyō’mer hammeleḵə lārāṣîm hanniṣṣāḇîm ‘ālāyw sōbû wəhāmîṯû| kōhănê yəhwâ kî ḡam-yāḏām ‘im-dāwiḏ wəḵî yāḏə‘û kî-ḇōrēḥa hû’ wəlō’ ḡālû ’eṯ-’āzənwō ’āzənî wəlō’-’āḇû ‘aḇəḏê hammeleḵə lišəlōḥa ’eṯ-yāḏām lifəḡō‘a bəḵōhănê yəhwâ: s

18 wayyō’mer hammeleḵə ləḏwōyēḡ ləḏwō’ēḡ sōḇ ’atâ ûfəḡ^a‘ bakōhănîm wayyissōḇ dwōyēḡ dwō’ēḡ hā’ăḏōmî wayyifəg^a‘-hû’ bakōhănîm wayyāmeṯ| bayywōm hahû’ šəmōnîm w^aḥămiššâ ’îš nōśē’ ’ēfwōḏ bāḏ:

19 wə’ēṯ nōḇ ‘îr-hakōhănîm hikâ ləfî-ḥereḇ mē’îš wə‘aḏ-’iššâ mē‘wōlēl wə‘aḏ-ywōnēq wəšwōr w^aḥămwōr wāśeh ləfî-ḥāreḇ:

20 wayyimmālēṭ bēn-’eḥāḏ la’ăḥîmeleḵə ben-’ăḥiṭûḇ ûšəmwō ’eḇəyāṯār wayyiḇər^aḥ ’^aḥărê ḏāwiḏ:

21 wayyagēḏ ’eḇəyāṯār ləḏāwiḏ kî hāraḡ šā’ûl ’ēṯ kōhănê yəhwâ:

22 wayyō’mer dāwiḏ lə’eḇəyāṯār yāḏ^a‘ətî bayywōm hahû’ kî-šām dwōyēḡ dwō’ēḡ hā’ăḏōmî kî-hagēḏ yagîḏ ləšā’ûl ’ānōḵî sabōṯî bəḵāl-nefeš bêṯ ’āḇîḵā:

23 šəḇâ ’itî ’al-tîrā’ kî ’ăšer-yəḇaqqēš ’eṯ-nafəšî yəḇaqqēš ’eṯ-nafəšeḵā kî-mišəmereṯ ’atâ ‘immāḏî: