2 Samuel (2 Shmuel) Chapter 5

‎1 ‏וַיָּבֹ֜אוּ כָּל־שִׁבְטֵ֧י יִשְׂרָאֵ֛ל אֶל־דָּוִ֖ד חֶבְר֑וֹנָה וַיֹּאמְר֣וּ לֵאמֹ֔ר הִנְנ֛וּ עַצְמְךָ֥ וּֽבְשָׂרְךָ֖ אֲנָֽחְנוּ׃

‎2 ‏גַּם־אֶתְמ֣וֹל גַּם־שִׁלְשׁ֗וֹם בִּהְי֨וֹת שָׁא֥וּל מֶ֙לֶךְ֙ עָלֵ֔ינוּ אַתָּ֗ה הייתה הָיִ֛יתָ מוציא הַמּוֹצִ֥יא והמבי וְהַמֵּבִ֖יא אֶת־יִשְׂרָאֵ֑ל וַיֹּ֨אמֶר יְהוָ֜ה לְךָ֗ אַתָּ֨ה תִרְעֶ֤ה אֶת־עַמִּי֙ אֶת־יִשְׂרָאֵ֔ל וְאַתָּ֛ה תִּהְיֶ֥ה לְנָגִ֖יד עַל־יִשְׂרָאֵֽל׃

‎3 ‏וַ֠יָּבֹאוּ כָּל־זִקְנֵ֨י יִשְׂרָאֵ֤ל אֶל־הַמֶּ֙לֶךְ֙ חֶבְר֔וֹנָה וַיִּכְרֹ֣ת לָהֶם֩ הַמֶּ֨לֶךְ דָּוִ֥ד בְּרִ֛ית בְּחֶבְר֖וֹן לִפְנֵ֣י יְהוָ֑ה וַיִּמְשְׁח֧וּ אֶת־דָּוִ֛ד לְמֶ֖לֶךְ עַל־יִשְׂרָאֵֽל׃ פ

‎4 ‏בֶּן־שְׁלֹשִׁ֥ים שָׁנָ֛ה דָּוִ֖ד בְּמָלְכ֑וֹ אַרְבָּעִ֥ים שָׁנָ֖ה מָלָֽךְ׃

‎5 ‏בְּחֶבְרוֹן֙ מָלַ֣ךְ עַל־יְהוּדָ֔ה שֶׁ֥בַע שָׁנִ֖ים וְשִׁשָּׁ֣ה חֳדָשִׁ֑ים וּבִירוּשָׁלִַ֣ם מָלַ֗ךְ שְׁלֹשִׁ֤ים וְשָׁלֹשׁ֙ שָׁנָ֔ה עַ֥ל כָּל־יִשְׂרָאֵ֖ל וִיהוּדָֽה׃

‎6 ‏וַיֵּ֨לֶךְ הַמֶּ֤לֶךְ וַֽאֲנָשָׁיו֙ יְר֣וּשָׁלִַ֔ם אֶל־הַיְבֻסִ֖י יוֹשֵׁ֣ב הָאָ֑רֶץ וַיֹּ֨אמֶר לְדָוִ֤ד לֵאמֹר֙ לֹא־תָב֣וֹא הֵ֔נָּה כִּ֣י אִם־הֱסִֽירְךָ֗ הַעִוְרִ֤ים וְהַפִּסְחִים֙ לֵאמֹ֔ר לֹֽא־יָב֥וֹא דָוִ֖ד הֵֽנָּה׃

‎7 ‏וַיִּלְכֹּ֣ד דָּוִ֔ד אֵ֖ת מְצֻדַ֣ת צִיּ֑וֹן הִ֖יא עִ֥יר דָּוִֽד׃

‎8 ‏וַיֹּ֨אמֶר דָּוִ֜ד בַּיּ֣וֹם הַה֗וּא כָּל־מַכֵּ֤ה יְבֻסִי֙ וְיִגַּ֣ע בַּצִּנּ֔וֹר וְאֶת־הַפִּסְחִים֙ וְאֶת־הַ֣עִוְרִ֔ים שנאו שְׂנֻאֵ֖י נֶ֣פֶשׁ דָּוִ֑ד עַל־כֵּן֙ יֹֽאמְר֔וּ עִוֵּ֣ר וּפִסֵּ֔חַ לֹ֥א יָב֖וֹא אֶל־הַבָּֽיִת׃

‎9 ‏וַיֵּ֤שֶׁב דָּוִד֙ בַּמְּצֻדָ֔ה וַיִּקְרָא־לָ֖הּ עִ֣יר דָּוִ֑ד וַיִּ֤בֶן דָּוִד֙ סָבִ֔יב מִן־הַמִּלּ֖וֹא וָבָֽיְתָה׃

‎10 ‏וַיֵּ֥לֶךְ דָּוִ֖ד הָל֣וֹךְ וְגָד֑וֹל וַיהוָ֛ה אֱלֹהֵ֥י צְבָא֖וֹת עִמּֽוֹ׃ פ

‎11 ‏וַ֠יִּשְׁלַח חִירָ֨ם מֶֽלֶךְ־צֹ֥ר מַלְאָכִים֮ אֶל־דָּוִד֒ וַעֲצֵ֣י אֲרָזִ֔ים וְחָרָשֵׁ֣י עֵ֔ץ וְחָֽרָשֵׁ֖י אֶ֣בֶן קִ֑יר וַיִּבְנֽוּ־בַ֖יִת לְדָוִֽד׃

‎12 ‏וַיֵּ֣דַע דָּוִ֔ד כִּֽי־הֱכִינ֧וֹ יְהוָ֛ה לְמֶ֖לֶךְ עַל־יִשְׂרָאֵ֑ל וְכִי֙ נִשֵּׂ֣א מַמְלַכְתּ֔וֹ בַּעֲב֖וּר עַמּ֥וֹ יִשְׂרָאֵֽל׃ ס

‎13 ‏וַיִּקַּח֩ דָּוִ֨ד ע֜וֹד פִּֽלַגְשִׁ֤ים וְנָשִׁים֙ מִיר֣וּשָׁלִַ֔ם אַחֲרֵ֖י בֹּא֣וֹ מֵחֶבְר֑וֹן וַיִּוָּ֥לְדוּ ע֛וֹד לְדָוִ֖ד בָּנִ֥ים וּבָנֽוֹת׃

‎14 ‏וְאֵ֗לֶּה שְׁמ֛וֹת הַיִּלֹּדִ֥ים ל֖וֹ בִּירוּשָׁלִָ֑ם שַׁמּ֣וּעַ וְשׁוֹבָ֔ב וְנָתָ֖ן וּשְׁלֹמֹֽה׃

‎15 ‏וְיִבְחָ֥ר וֶאֱלִישׁ֖וּעַ וְנֶ֥פֶג וְיָפִֽיעַ׃

‎16 ‏וֶאֱלִישָׁמָ֥ע וְאֶלְיָדָ֖ע וֶאֱלִיפָֽלֶט׃ פ

‎17 ‏וַיִּשְׁמְע֣וּ פְלִשְׁתִּ֗ים כִּי־מָשְׁח֨וּ אֶת־דָּוִ֤ד לְמֶ֙לֶךְ֙ עַל־יִשְׂרָאֵ֔ל וַיַּעֲל֥וּ כָל־פְּלִשְׁתִּ֖ים לְבַקֵּ֣שׁ אֶת־דָּוִ֑ד וַיִּשְׁמַ֣ע דָּוִ֔ד וַיֵּ֖רֶד אֶל־הַמְּצוּדָֽה׃

‎18 ‏וּפְלִשְׁתִּ֖ים בָּ֑אוּ וַיִּנָּטְשׁ֖וּ בְּעֵ֥מֶק רְפָאִֽים׃

‎19 ‏וַיִּשְׁאַ֨ל דָּוִ֤ד בַּֽיהוָה֙ לֵאמֹ֔ר הַאֶֽעֱלֶה֙ אֶל־פְּלִשְׁתִּ֔ים הֲתִתְּנֵ֖ם בְּיָדִ֑י וַיֹּ֨אמֶר יְהוָ֤ה אֶל־דָּוִד֙ עֲלֵ֔ה כִּֽי־נָתֹ֥ן אֶתֵּ֛ן אֶת־הַפְּלִשְׁתִּ֖ים בְּיָדֶֽךָ׃

‎20 ‏וַיָּבֹ֨א דָוִ֥ד בְּבַֽעַל־פְּרָצִים֮ וַיַּכֵּ֣ם שָׁ֣ם דָּוִד֒ וַיֹּ֕אמֶר פָּרַ֨ץ יְהוָ֧ה אֶת־אֹיְבַ֛י לְפָנַ֖י כְּפֶ֣רֶץ מָ֑יִם עַל־כֵּ֗ן קָרָ֛א שֵֽׁם־הַמָּק֥וֹם הַה֖וּא בַּ֥עַל פְּרָצִֽים׃

‎21 ‏וַיַּעַזְבוּ־שָׁ֖ם אֶת־עֲצַבֵּיהֶ֑ם וַיִּשָּׂאֵ֥ם דָּוִ֖ד וַאֲנָשָֽׁיו׃ פ

‎22 ‏וַיֹּסִ֥פוּ ע֛וֹד פְּלִשְׁתִּ֖ים לַֽעֲל֑וֹת וַיִּנָּֽטְשׁ֖וּ בְּעֵ֥מֶק רְפָאִֽים׃

‎23 ‏וַיִּשְׁאַ֤ל דָּוִד֙ בַּֽיהוָ֔ה וַיֹּ֖אמֶר לֹ֣א תַעֲלֶ֑ה הָסֵב֙ אֶל־אַ֣חֲרֵיהֶ֔ם וּבָ֥אתָ לָהֶ֖ם מִמּ֥וּל בְּכָאִֽים׃

‎24 ‏וִ֠יהִי בשמעך כְּֽשָׁמְעֲךָ֞ אֶת־ק֧וֹל צְעָדָ֛ה בְּרָאשֵׁ֥י הַבְּכָאִ֖ים אָ֣ז תֶּחֱרָ֑ץ כִּ֣י אָ֗ז יָצָ֤א יְהוָה֙ לְפָנֶ֔יךָ לְהַכּ֖וֹת בְּמַחֲנֵ֥ה פְלִשְׁתִּֽים׃

‎25 ‏וַיַּ֤עַשׂ דָּוִד֙ כֵּ֔ן כַּאֲשֶׁ֥ר צִוָּ֖הוּ יְהוָ֑ה וַיַּךְ֙ אֶת־פְּלִשְׁתִּ֔ים מִגֶּ֖בַע עַד־בֹּאֲךָ֥ גָֽזֶר׃ פ

1 wayyāḇō’û kāl-šiḇəṭê yiśərā’ēl ’el-dāwiḏ ḥeḇərwōnâ wayyō’mərû lē’mōr hinənû ‘aṣəməḵā ûḇəśārəḵā ’ănāḥənû:

2 gam-’eṯəmwōl gam-šiləšwōm bihəywōṯ šā’ûl meleḵə ‘ālênû ’atâ hāyîṯâ hāyîṯā mwōṣî’ hammwōṣî’ wəhammēḇî wəhammēḇî’ ’eṯ-yiśərā’ēl wayyō’mer yəhwâ ləḵā ’atâ ṯirə‘eh ’eṯ-‘ammî ’eṯ-yiśərā’ēl wə’atâ tihəyeh lənāḡîḏ ‘al-yiśərā’ēl:

3 wayyāḇō’û kāl-ziqənê yiśərā’ēl ’el-hammeleḵə ḥeḇərwōnâ wayyiḵərōṯ lâem hammeleḵə dāwiḏ bərîṯ bəḥeḇərwōn lifənê yəhwâ wayyiməšəḥû ’eṯ-dāwiḏ ləmeleḵə ‘al-yiśərā’ēl: f

4 ben-šəlōšîm šānâ dāwiḏ bəmāləḵwō ’arəbā‘îm šānâ mālāḵə:

5 bəḥeḇərwōn mālaḵə ‘al-yəhûḏâ šeḇ^a‘ šānîm wəšiššâ ḥŏḏāšîm ûḇîrûšālaim mālaḵə šəlōšîm wəšālōš šānâ ‘al kāl-yiśərā’ēl wîhûḏâ:

6 wayyēleḵə hammeleḵə wa’ănāšāyw yərûšālaim ’el-hayəḇusî ywōšēḇ hā’āreṣ wayyō’mer ləḏāwiḏ lē’mōr lō’-ṯāḇwō’ hēnnâ kî ’im-hĕsîrəḵā h^a‘iwərîm wəhapisəḥîm lē’mōr lō’-yāḇwō’ ḏāwiḏ hēnnâ:

7 wayyiləkōḏ dāwiḏ ’ēṯ məṣuḏaṯ ṣîywōn hî’ ‘îr dāwiḏ:

8 wayyō’mer dāwiḏ bayywōm hahû’ kāl-makēh yəḇusî wəyig^a‘ baṣṣinnwōr wə’eṯ-hapisəḥîm wə’eṯ-h^a‘iwərîm śānə’û śənu’ê nefeš dāwiḏ ‘al-kēn yō’mərû ‘iûēr ûfissēḥa lō’ yāḇwō’ ’el-habāyiṯ:

9 wayyēšeḇ dāwiḏ bamməṣuḏâ wayyiqərā’-lāh ‘îr dāwiḏ wayyiḇen dāwiḏ sāḇîḇ min-hammillwō’ wāḇāyəṯâ:

10 wayyēleḵə dāwiḏ hālwōḵə wəḡāḏwōl wayhwâ ’ĕlōhê ṣəḇā’wōṯ ‘immwō: f

11 wayyišəl^aḥ ḥîrām meleḵə-ṣōr malə’āḵîm ’el-dāwiḏ w^a‘ăṣê ’ărāzîm wəḥārāšê ‘ēṣ wəḥārāšê ’eḇen qîr wayyiḇənû-ḇayiṯ ləḏāwiḏ:

12 wayyēḏ^a‘ dāwiḏ kî-hĕḵînwō yəhwâ ləmeleḵə ‘al-yiśərā’ēl wəḵî niśśē’ maməlaḵətwō b^a‘ăḇûr ‘ammwō yiśərā’ēl: s

13 wayyiqq^aḥ dāwiḏ ‘wōḏ pilaḡəšîm wənāšîm mîrûšālaim ’^aḥărê bō’wō mēḥeḇərwōn wayyiûāləḏû ‘wōḏ ləḏāwiḏ bānîm ûḇānwōṯ:

14 wə’ēlleh šəmwōṯ hayyillōḏîm lwō bîrûšālāim šammû‘a wəšwōḇāḇ wənāṯān ûšəlōmōh:

15 wəyiḇəḥār we’ĕlîšû‘a wənefeḡ wəyāfî‘a:

16 we’ĕlîšāmā‘ wə’eləyāḏā‘ we’ĕlîfāleṭ: f

17 wayyišəmə‘û fəlišətîm kî-māšəḥû ’eṯ-dāwiḏ ləmeleḵə ‘al-yiśərā’ēl wayy^a‘ălû ḵāl-pəlišətîm ləḇaqqēš ’eṯ-dāwiḏ wayyišəm^a‘ dāwiḏ wayyēreḏ ’el-hamməṣûḏâ:

18 ûfəlišətîm bā’û wayyinnāṭəšû bə‘ēmeq rəfā’îm:

19 wayyišə’al dāwiḏ bayhwâ lē’mōr ha’e‘ĕleh ’el-pəlišətîm hăṯitənēm bəyāḏî wayyō’mer yəhwâ ’el-dāwiḏ ‘ălēh kî-nāṯōn ’etēn ’eṯ-hapəlišətîm bəyāḏeḵā:

20 wayyāḇō’ ḏāwiḏ bəḇ^a‘al-pərāṣîm wayyakēm šām dāwiḏ wayyō’mer pāraṣ yəhwâ ’eṯ-’ōyəḇay ləfānay kəfereṣ māyim ‘al-kēn qārā’ šēm-hammāqwōm hahû’ b^a‘al pərāṣîm:

21 wayy^a‘azəḇû-šām ’eṯ-‘ăṣabêhem wayyiśśā’ēm dāwiḏ wa’ănāšāyw: f

22 wayyōsifû ‘wōḏ pəlišətîm l^a‘ălwōṯ wayyinnāṭəšû bə‘ēmeq rəfā’îm:

23 wayyišə’al dāwiḏ bayhwâ wayyō’mer lō’ ṯ^a‘ăleh hāsēḇ ’el-’^aḥărêhem ûḇā’ṯā lâem mimmûl bəḵā’îm:

24 wîhî bəšāmə‘ăḵā kəšāmə‘ăḵā ’eṯ-qwōl ṣə‘āḏâ bərā’šê habəḵā’îm ’āz teḥĕrāṣ kî ’āz yāṣā’ yəhwâ ləfāneyḵā ləhakwōṯ bəm^aḥănēh fəlišətîm:

25 wayy^a‘aś dāwiḏ kēn ka’ăšer ṣiûâû yəhwâ wayyaḵə ’eṯ-pəlišətîm migeḇ^a‘ ‘aḏ-bō’ăḵā ḡāzer: f