2 Samuel (2 Shmuel) Chapter 10

‎1 ‏וַֽיְהִי֙ אַֽחֲרֵי־כֵ֔ן וַיָּ֕מָת מֶ֖לֶךְ בְּנֵ֣י עַמּ֑וֹן וַיִּמְלֹ֛ךְ חָנ֥וּן בְּנ֖וֹ תַּחְתָּֽיו׃

‎2 ‏וַיֹּ֨אמֶר דָּוִ֜ד אֶעֱשֶׂה־חֶ֣סֶד׀ עִם־חָנ֣וּן בֶּן־נָחָ֗שׁ כַּאֲשֶׁר֩ עָשָׂ֨ה אָבִ֤יו עִמָּדִי֙ חֶ֔סֶד וַיִּשְׁלַ֨ח דָּוִ֧ד לְנַחֲמ֛וֹ בְּיַד־עֲבָדָ֖יו אֶל־אָבִ֑יו וַיָּבֹ֙אוּ֙ עַבְדֵ֣י דָוִ֔ד אֶ֖רֶץ בְּנֵ֥י עַמּֽוֹן׃

‎3 ‏וַיֹּאמְרוּ֩ שָׂרֵ֨י בְנֵֽי־עַמּ֜וֹן אֶל־חָנ֣וּן אֲדֹֽנֵיהֶ֗ם הַֽמְכַבֵּ֨ד דָּוִ֤ד אֶת־אָבִ֙יךָ֙ בְּעֵינֶ֔יךָ כִּֽי־שָׁלַ֥ח לְךָ֖ מְנַֽחֲמִ֑ים הֲ֠לוֹא בַּעֲב֞וּר חֲק֤וֹר אֶת־הָעִיר֙ וּלְרַגְּלָ֣הּ וּלְהָפְכָ֔הּ שָׁלַ֥ח דָּוִ֛ד אֶת־עֲבָדָ֖יו אֵלֶֽיךָ׃

‎4 ‏וַיִּקַּ֨ח חָנ֜וּן אֶת־עַבְדֵ֣י דָוִ֗ד וַיְגַלַּח֙ אֶת־חֲצִ֣י זְקָנָ֔ם וַיִּכְרֹ֧ת אֶת־מַדְוֵיהֶ֛ם בַּחֵ֖צִי עַ֣ד שְׁתֽוֹתֵיהֶ֑ם וַֽיְשַׁלְּחֵֽם׃

‎5 ‏וַיַּגִּ֤דוּ לְדָוִד֙ וַיִּשְׁלַ֣ח לִקְרָאתָ֔ם כִּֽי־הָי֥וּ הָאֲנָשִׁ֖ים נִכְלָמִ֣ים מְאֹ֑ד וַיֹּ֤אמֶר הַמֶּ֙לֶךְ֙ שְׁב֣וּ בִֽירֵח֔וֹ עַד־יְצַמַּ֥ח זְקַנְכֶ֖ם וְשַׁבְתֶּֽם׃

‎6 ‏וַיִּרְאוּ֙ בְּנֵ֣י עַמּ֔וֹן כִּ֥י נִבְאֲשׁ֖וּ בְּדָוִ֑ד וַיִּשְׁלְח֣וּ בְנֵֽי־עַמּ֡וֹן וַיִּשְׂכְּרוּ֩ אֶת־אֲרַ֨ם בֵּית־רְח֜וֹב וְאֶת־אֲרַ֣ם צוֹבָ֗א עֶשְׂרִ֥ים אֶ֙לֶף֙ רַגְלִ֔י וְאֶת־מֶ֤לֶךְ מַֽעֲכָה֙ אֶ֣לֶף אִ֔ישׁ וְאִ֣ישׁ ט֔וֹב שְׁנֵים־עָשָׂ֥ר אֶ֖לֶף אִֽישׁ׃

‎7 ‏וַיִּשְׁמַ֖ע דָּוִ֑ד וַיִּשְׁלַח֙ אֶת־יוֹאָ֔ב וְאֵ֥ת כָּל־הַצָּבָ֖א הַגִּבֹּרִֽים׃

‎8 ‏וַיֵּֽצְאוּ֙ בְּנֵ֣י עַמּ֔וֹן וַיַּעַרְכ֥וּ מִלְחָמָ֖ה פֶּ֣תַח הַשָּׁ֑עַר וַאֲרַ֨ם צוֹבָ֤א וּרְחוֹב֙ וְאִֽישׁ־ט֣וֹב וּמַֽעֲכָ֔ה לְבַדָּ֖ם בַּשָּׂדֶֽה׃

‎9 ‏וַיַּ֣רְא יוֹאָ֗ב כִּֽי־הָיְתָ֤ה אֵלָיו֙ פְּנֵ֣י הַמִּלְחָמָ֔ה מִפָּנִ֖ים וּמֵֽאָח֑וֹר וַיִּבְחַ֗ר מִכֹּל֙ בְּחוּרֵ֣י בישראל יִשְׂרָאֵ֔ל וַֽיַּעֲרֹ֖ךְ לִקְרַ֥את אֲרָֽם׃

‎10 ‏וְאֵת֙ יֶ֣תֶר הָעָ֔ם נָתַ֕ן בְּיַ֖ד אַבְשַׁ֣י אָחִ֑יו וַֽיַּעֲרֹ֕ךְ לִקְרַ֖את בְּנֵ֥י עַמּֽוֹן׃

‎11 ‏וַיֹּ֗אמֶר אִם־תֶּחֱזַ֤ק אֲרָם֙ מִמֶּ֔נִּי וְהָיִ֥תָה לִּ֖י לִֽישׁוּעָ֑ה וְאִם־בְּנֵ֤י עַמּוֹן֙ יֶחֱזְק֣וּ מִמְּךָ֔ וְהָלַכְתִּ֖י לְהוֹשִׁ֥יעַֽ לָֽךְ׃

‎12 ‏חֲזַ֤ק וְנִתְחַזַּק֙ בְּעַד־עַמֵּ֔נוּ וּבְעַ֖ד עָרֵ֣י אֱלֹהֵ֑ינוּ וַֽיהוָ֔ה יַעֲשֶׂ֥ה הַטּ֖וֹב בְּעֵינָֽיו׃

‎13 ‏וַיִּגַּ֣שׁ יוֹאָ֗ב וְהָעָם֙ אֲשֶׁ֣ר עִמּ֔וֹ לַמִּלְחָמָ֖ה בַּֽאֲרָ֑ם וַיָּנֻ֖סוּ מִפָּנָֽיו׃

‎14 ‏וּבְנֵ֨י עַמּ֤וֹן רָאוּ֙ כִּי־נָ֣ס אֲרָ֔ם וַיָּנֻ֙סוּ֙ מִפְּנֵ֣י אֲבִישַׁ֔י וַיָּבֹ֖אוּ הָעִ֑יר וַיָּ֣שָׁב יוֹאָ֗ב מֵעַל֙ בְּנֵ֣י עַמּ֔וֹן וַיָּבֹ֖א יְרוּשָׁלִָֽם׃

‎15 ‏וַיַּ֣רְא אֲרָ֔ם כִּ֥י נִגַּ֖ף לִפְנֵ֣י יִשְׂרָאֵ֑ל וַיֵּאָסְפ֖וּ יָֽחַד׃

‎16 ‏וַיִּשְׁלַ֣ח הֲדַדְעֶ֗זֶר וַיֹּצֵ֤א אֶת־אֲרָם֙ אֲשֶׁר֙ מֵעֵ֣בֶר הַנָּהָ֔ר וַיָּבֹ֖אוּ חֵילָ֑ם וְשׁוֹבַ֛ךְ שַׂר־צְבָ֥א הֲדַדְעֶ֖זֶר לִפְנֵיהֶֽם׃

‎17 ‏וַיֻּגַּ֣ד לְדָוִ֗ד סוַיֶּאֱסֹ֤ף אֶת־כָּל־יִשְׂרָאֵל֙ וַיַּעֲבֹ֣ר אֶת־הַיַּרְדֵּ֔ן וַיָּבֹ֖א חֵלָ֑אמָה וַיַּעַרְכ֤וּ אֲרָם֙ לִקְרַ֣את דָּוִ֔ד וַיִּלָּחֲמ֖וּ עִמּֽוֹ׃

‎18 ‏וַיָּ֣נָס אֲרָם֮ מִפְּנֵ֣י יִשְׂרָאֵל֒ וַיַּהֲרֹ֨ג דָּוִ֜ד מֵאֲרָ֗ם שְׁבַ֤ע מֵאוֹת֙ רֶ֔כֶב וְאַרְבָּעִ֥ים אֶ֖לֶף פָּרָשִׁ֑ים וְאֵ֨ת שׁוֹבַ֧ךְ שַׂר־צְבָא֛וֹ הִכָּ֖ה וַיָּ֥מָת שָֽׁם׃

‎19 ‏וַיִּרְא֨וּ כָֽל־הַמְּלָכִ֜ים עַבְדֵ֣י הֲדַדְעֶ֗זֶר כִּ֤י נִגְּפוּ֙ לִפְנֵ֣י יִשְׂרָאֵ֔ל וַיַּשְׁלִ֥מוּ אֶת־יִשְׂרָאֵ֖ל וַיַּֽעַבְד֑וּם וַיִּֽרְא֣וּ אֲרָ֔ם לְהוֹשִׁ֥יעַ ע֖וֹד אֶת־בְּנֵ֥י עַמּֽוֹן׃ פ

1 wayəhî ’^aḥărê-ḵēn wayyāmāṯ meleḵə bənê ‘ammwōn wayyiməlōḵə ḥānûn bənwō t^aḥətāyw:

2 wayyō’mer dāwiḏ ’e‘ĕśeh-ḥeseḏ| ‘im-ḥānûn ben-nāḥāš ka’ăšer ‘āśâ ’āḇîw ‘immāḏî ḥeseḏ wayyišəl^aḥ dāwiḏ lən^aḥămwō bəyaḏ-‘ăḇāḏāyw ’el-’āḇîw wayyāḇō’û ‘aḇəḏê ḏāwiḏ ’ereṣ bənê ‘ammwōn:

3 wayyō’mərû śārê ḇənê-‘ammwōn ’el-ḥānûn ’ăḏōnêhem haməḵabēḏ dāwiḏ ’eṯ-’āḇîḵā bə‘êneyḵā kî-šāl^aḥ ləḵā mən^aḥămîm hălwō’ b^a‘ăḇûr ḥăqwōr ’eṯ-hā‘îr ûləragəlāh ûləhāfəḵāh šāl^aḥ dāwiḏ ’eṯ-‘ăḇāḏāyw ’ēleyḵā:

4 wayyiqq^aḥ ḥānûn ’eṯ-‘aḇəḏê ḏāwiḏ wayəḡall^aḥ ’eṯ-ḥăṣî zəqānām wayyiḵərōṯ ’eṯ-maḏəwêhem b^aḥēṣî ‘aḏ šəṯwōṯêhem wayəšalləḥēm:

5 wayyagiḏû ləḏāwiḏ wayyišəl^aḥ liqərā’ṯām kî-hāyû hā’ănāšîm niḵəlāmîm mə’ōḏ wayyō’mer hammeleḵə šəḇû ḇîrēḥwō ‘aḏ-yəṣamm^aḥ zəqanəḵem wəšaḇətem:

6 wayyirə’û bənê ‘ammwōn kî niḇə’ăšû bəḏāwiḏ wayyišələḥû ḇənê-‘ammwōn wayyiśəkərû ’eṯ-’ăram bêṯ-rəḥwōḇ wə’eṯ-’ăram ṣwōḇā’ ‘eśərîm ’elef raḡəlî wə’eṯ-meleḵə m^a‘ăḵâ ’elef ’îš wə’îš ṭwōḇ šənêm-‘āśār ’elef ’îš:

7 wayyišəm^a‘ dāwiḏ wayyišəl^aḥ ’eṯ-ywō’āḇ wə’ēṯ kāl-haṣṣāḇā’ hagibōrîm:

8 wayyēṣə’û bənê ‘ammwōn wayy^a‘arəḵû miləḥāmâ peṯ^aḥ haššā‘ar wa’ăram ṣwōḇā’ ûrəḥwōḇ wə’îš-ṭwōḇ ûm^a‘ăḵâ ləḇadām baśśāḏeh:

9 wayyarə’ ywō’āḇ kî-hāyəṯâ ’ēlāyw pənê hammiləḥāmâ mipānîm ûmē’āḥwōr wayyiḇəḥar mikōl bəḥûrê bəyiśərā’ēl yiśərā’ēl wayy^a‘ărōḵə liqəra’ṯ ’ărām:

10 wə’ēṯ yeṯer hā‘ām nāṯan bəyaḏ ’aḇəšay ’āḥîw wayy^a‘ărōḵə liqəra’ṯ bənê ‘ammwōn:

11 wayyō’mer ’im-teḥĕzaq ’ărām mimmennî wəhāyiṯâ llî lîšû‘â wə’im-bənê ‘ammwōn yeḥĕzəqû mimməḵā wəhālaḵətî ləhwōšî‘a lāḵə:

12 ḥăzaq wəniṯəḥazzaq bə‘aḏ-‘ammēnû ûḇə‘aḏ ‘ārê ’ĕlōhênû wayhwâ y^a‘ăśeh haṭṭwōḇ bə‘ênāyw:

13 wayyigaš ywō’āḇ wəhā‘ām ’ăšer ‘immwō lammiləḥāmâ ba’ărām wayyānusû mipānāyw:

14 ûḇənê ‘ammwōn rā’û kî-nās ’ărām wayyānusû mipənê ’ăḇîšay wayyāḇō’û hā‘îr wayyāšāḇ ywō’āḇ mē‘al bənê ‘ammwōn wayyāḇō’ yərûšālāim:

15 wayyarə’ ’ărām kî nigaf lifənê yiśərā’ēl wayyē’āsəfû yāḥaḏ:

16 wayyišəl^aḥ hăḏaḏə‘ezer wayyōṣē’ ’eṯ-’ărām ’ăšer mē‘ēḇer hannâār wayyāḇō’û ḥêlām wəšwōḇaḵə śar-ṣəḇā’ hăḏaḏə‘ezer lifənêhem:

17 wayyugaḏ ləḏāwiḏ swayye’ĕsōf ’eṯ-kāl-yiśərā’ēl wayy^a‘ăḇōr ’eṯ-hayyarədēn wayyāḇō’ ḥēlā’mâ wayy^a‘arəḵû ’ărām liqəra’ṯ dāwiḏ wayyillāḥămû ‘immwō:

18 wayyānās ’ărām mipənê yiśərā’ēl wayyahărōḡ dāwiḏ mē’ărām šəḇ^a‘ mē’wōṯ reḵeḇ wə’arəbā‘îm ’elef pārāšîm wə’ēṯ šwōḇaḵə śar-ṣəḇā’wō hikâ wayyāmāṯ šām:

19 wayyirə’û ḵāl-hamməlāḵîm ‘aḇəḏê hăḏaḏə‘ezer kî nigəfû lifənê yiśərā’ēl wayyašəlimû ’eṯ-yiśərā’ēl wayy^a‘aḇəḏûm wayyirə’û ’ărām ləhwōšî‘a ‘wōḏ ’eṯ-bənê ‘ammwōn: f