2 Samuel (2 Shmuel) Chapter 17

‎1 ‏וַיֹּ֥אמֶר אֲחִיתֹ֖פֶל אֶל־אַבְשָׁלֹ֑ם אֶבְחֲרָ֣ה נָּ֗א שְׁנֵים־עָשָׂ֥ר אֶ֙לֶף֙ אִ֔ישׁ וְאָק֛וּמָה וְאֶרְדְּפָ֥ה אַחֲרֵי־דָוִ֖ד הַלָּֽיְלָה׃

‎2 ‏וְאָב֣וֹא עָלָ֗יו וְה֤וּא יָגֵ֙עַ֙ וּרְפֵ֣ה יָדַ֔יִם וְהַֽחֲרַדְתִּ֣י אֹת֔וֹ וְנָ֖ס כָּל־הָעָ֣ם אֲשֶׁר־אִתּ֑וֹ וְהִכֵּיתִ֥י אֶת־הַמֶּ֖לֶךְ לְבַדּֽוֹ׃

‎3 ‏וְאָשִׁ֥יבָה כָל־הָעָ֖ם אֵלֶ֑יךָ כְּשׁ֣וּב הַכֹּ֔ל הָאִישׁ֙ אֲשֶׁ֣ר אַתָּ֣ה מְבַקֵּ֔שׁ כָּל־הָעָ֖ם יִהְיֶ֥ה שָׁלֽוֹם׃

‎4 ‏וַיִּישַׁ֥ר הַדָּבָ֖ר בְּעֵינֵ֣י אַבְשָׁלֹ֑ם וּבְעֵינֵ֖י כָּל־זִקְנֵ֥י יִשְׂרָאֵֽל׃ ס

‎5 ‏וַיֹּ֙אמֶר֙ אַבְשָׁל֔וֹם קְרָ֣א נָ֔א גַּ֖ם לְחוּשַׁ֣י הָאַרְכִּ֑י וְנִשְׁמְעָ֥ה מַה־בְּפִ֖יו גַּם־הֽוּא׃

‎6 ‏וַיָּבֹ֣א חוּשַׁי֮ אֶל־אַבְשָׁלוֹם֒ וַיֹּאמֶר֩ אַבְשָׁל֨וֹם אֵלָ֜יו לֵאמֹ֗ר כַּדָּבָ֤ר הַזֶּה֙ דִּבֶּ֣ר אֲחִיתֹ֔פֶל הֲנַעֲשֶׂ֖ה אֶת־דְּבָר֑וֹ אִם־אַ֖יִן אַתָּ֥ה דַבֵּֽר׃ ס

‎7 ‏וַיֹּ֥אמֶר חוּשַׁ֖י אֶל־אַבְשָׁל֑וֹם לֹֽא־טוֹבָ֧ה הָעֵצָ֛ה אֲשֶׁר־יָעַ֥ץ אֲחִיתֹ֖פֶל בַּפַּ֥עַם הַזֹּֽאת׃

‎8 ‏וַיֹּ֣אמֶר חוּשַׁ֗י אַתָּ֣ה יָ֠דַעְתָּ אֶת־אָבִ֨יךָ וְאֶת־אֲנָשָׁ֜יו כִּ֧י גִבֹּרִ֣ים הֵ֗מָּה וּמָרֵ֥י נֶ֙פֶשׁ֙ הֵ֔מָּה כְּדֹ֥ב שַׁכּ֖וּל בַּשָּׂדֶ֑ה וְאָבִ֙יךָ֙ אִ֣ישׁ מִלְחָמָ֔ה וְלֹ֥א יָלִ֖ין אֶת־הָעָֽם׃

‎9 ‏הִנֵּ֨ה עַתָּ֤ה הֽוּא־נֶחְבָּא֙ בְּאַחַ֣ת הַפְּחָתִ֔ים א֖וֹ בְּאַחַ֣ד הַמְּקוֹמֹ֑ת וְהָיָ֗ה כִּנְפֹ֤ל בָּהֶם֙ בַּתְּחִלָּ֔ה וְשָׁמַ֤ע הַשֹּׁמֵ֙עַ֙ וְאָמַ֔ר הָֽיְתָה֙ מַגֵּפָ֔ה בָּעָ֕ם אֲשֶׁ֖ר אַחֲרֵ֥י אַבְשָׁלֹֽם׃

‎10 ‏וְה֣וּא גַם־בֶּן־חַ֗יִל אֲשֶׁ֥ר לִבּ֛וֹ כְּלֵ֥ב הָאַרְיֵ֖ה הִמֵּ֣ס יִמָּ֑ס כִּֽי־יֹדֵ֤עַ כָּל־יִשְׂרָאֵל֙ כִּי־גִבּ֣וֹר אָבִ֔יךָ וּבְנֵי־חַ֖יִל אֲשֶׁ֥ר אִתּֽוֹ׃

‎11 ‏כִּ֣י יָעַ֗צְתִּי הֵ֠אָסֹף יֵאָסֵ֨ף עָלֶ֤יךָ כָל־יִשְׂרָאֵל֙ מִדָּן֙ וְעַד־בְּאֵ֣ר שֶׁ֔בַע כַּח֥וֹל אֲשֶׁר־עַל־הַיָּ֖ם לָרֹ֑ב וּפָנֶ֥יךָ הֹלְכִ֖ים בַּקְרָֽב׃

‎12 ‏וּבָ֣אנוּ אֵלָ֗יו באחת בְּאַחַ֤ד הַמְּקוֹמֹת֙ אֲשֶׁ֣ר נִמְצָ֣א שָׁ֔ם וְנַ֣חְנוּ עָלָ֔יו כַּאֲשֶׁ֛ר יִפֹּ֥ל הַטַּ֖ל עַל־הָאֲדָמָ֑ה וְלֹֽא־נ֥וֹתַר בּ֛וֹ וּבְכָל־הָאֲנָשִׁ֥ים אֲשֶׁר־אִתּ֖וֹ גַּם־אֶחָֽד׃

‎13 ‏וְאִם־אֶל־עִיר֙ יֵֽאָסֵ֔ף וְהִשִּׂ֧יאוּ כָֽל־יִשְׂרָאֵ֛ל אֶל־הָעִ֥יר הַהִ֖יא חֲבָלִ֑ים וְסָחַ֤בְנוּ אֹתוֹ֙ עַד־הַנַּ֔חַל עַ֛ד אֲשֶֽׁר־לֹא־נִמְצָ֥א שָׁ֖ם גַּם־צְרֽוֹר׃ פ

‎14 ‏וַיֹּ֤אמֶר אַבְשָׁלוֹם֙ וְכָל־אִ֣ישׁ יִשְׂרָאֵ֔ל טוֹבָ֗ה עֲצַת֙ חוּשַׁ֣י הָאַרְכִּ֔י מֵעֲצַ֖ת אֲחִיתֹ֑פֶל וַיהוָ֣ה צִוָּ֗ה לְהָפֵ֞ר אֶת־עֲצַ֤ת אֲחִיתֹ֙פֶל֙ הַטּוֹבָ֔ה לְבַעֲב֗וּר הָבִ֧יא יְהוָ֛ה אֶל־אַבְשָׁל֖וֹם אֶת־הָרָעָֽה׃ ס

‎15 ‏וַיֹּ֣אמֶר חוּשַׁ֗י אֶל־צָד֤וֹק וְאֶל־אֶבְיָתָר֙ הַכֹּ֣הֲנִ֔ים כָּזֹ֣את וְכָזֹ֗את יָעַ֤ץ אֲחִיתֹ֙פֶל֙ אֶת־אַבְשָׁלֹ֔ם וְאֵ֖ת זִקְנֵ֣י יִשְׂרָאֵ֑ל וְכָזֹ֥את וְכָזֹ֖את יָעַ֥צְתִּי אָֽנִי׃

‎16 ‏וְעַתָּ֡ה שִׁלְח֣וּ מְהֵרָה֩ וְהַגִּ֨ידוּ לְדָוִ֜ד לֵאמֹ֗ר אַל־תָּ֤לֶן הַלַּ֙יְלָה֙ בְּעַֽרְב֣וֹת הַמִּדְבָּ֔ר וְגַ֖ם עָב֣וֹר תַּעֲב֑וֹר פֶּ֚ן יְבֻלַּ֣ע לַמֶּ֔לֶךְ וּלְכָל־הָעָ֖ם אֲשֶׁ֥ר אִתּֽוֹ׃

‎17 ‏וִיהוֹנָתָ֨ן וַאֲחִימַ֜עַץ עֹמְדִ֣ים בְּעֵין־רֹגֵ֗ל וְהָלְכָ֤ה הַשִּׁפְחָה֙ וְהִגִּ֣ידָה לָהֶ֔ם וְהֵם֙ יֵֽלְכ֔וּ וְהִגִּ֖ידוּ לַמֶּ֣לֶךְ דָּוִ֑ד כִּ֣י לֹ֥א יוּכְל֛וּ לְהֵרָא֖וֹת לָב֥וֹא הָעִֽירָה׃

‎18 ‏וַיַּ֤רְא אֹתָם֙ נַ֔עַר וַיַּגֵּ֖ד לְאַבְשָׁלֹ֑ם וַיֵּלְכוּ֩ שְׁנֵיהֶ֨ם מְהֵרָ֜ה וַיָּבֹ֣אוּ׀ אֶל־בֵּֽית־אִ֣ישׁ בְּבַחוּרִ֗ים וְל֥וֹ בְאֵ֛ר בַּחֲצֵר֖וֹ וַיֵּ֥רְדוּ שָֽׁם׃

‎19 ‏וַתִּקַּ֣ח הָאִשָּׁ֗ה וַתִּפְרֹ֤שׂ אֶת־הַמָּסָךְ֙ עַל־פְּנֵ֣י הַבְּאֵ֔ר וַתִּשְׁטַ֥ח עָלָ֖יו הָֽרִפ֑וֹת וְלֹ֥א נוֹדַ֖ע דָּבָֽר׃

‎20 ‏וַיָּבֹ֣אוּ עַבְדֵי֩ אַבְשָׁל֨וֹם אֶֽל־הָאִשָּׁ֜ה הַבַּ֗יְתָה וַיֹּֽאמְרוּ֙ אַיֵּ֗ה אֲחִימַ֙עַץ֙ וִיה֣וֹנָתָ֔ן וַתֹּ֤אמֶר לָהֶם֙ הָֽאִשָּׁ֔ה עָבְר֖וּ מִיכַ֣ל הַמָּ֑יִם וַיְבַקְשׁוּ֙ וְלֹ֣א מָצָ֔אוּ וַיָּשֻׁ֖בוּ יְרוּשָׁלִָֽם׃ ס

‎21 ‏וַיְהִ֣י׀ אַחֲרֵ֣י לֶכְתָּ֗ם וַֽיַּעֲלוּ֙ מֵֽהַבְּאֵ֔ר וַיֵּ֣לְכ֔וּ וַיַּגִּ֖דוּ לַמֶּ֣לֶךְ דָּוִ֑ד וַיֹּאמְר֣וּ אֶל־דָּוִ֗ד ק֣וּמוּ וְעִבְר֤וּ מְהֵרָה֙ אֶת־הַמַּ֔יִם כִּי־כָ֛כָה יָעַ֥ץ עֲלֵיכֶ֖ם אֲחִיתֹֽפֶל׃

‎22 ‏וַיָּ֣קָם דָּוִ֗ד וְכָל־הָעָם֙ אֲשֶׁ֣ר אִתּ֔וֹ וַיַּעַבְר֖וּ אֶת־הַיַּרְדֵּ֑ן עַד־א֣וֹר הַבֹּ֗קֶר עַד־אַחַד֙ לֹ֣א נֶעְדָּ֔ר אֲשֶׁ֥ר לֹא־עָבַ֖ר אֶת־הַיַּרְדֵּֽן׃

‎23 ‏וַאֲחִיתֹ֣פֶל רָאָ֗ה כִּ֣י לֹ֣א נֶעֶשְׂתָה֮ עֲצָתוֹ֒ וַיַּחֲבֹ֣שׁ אֶֽת־הַחֲמ֗וֹר וַיָּ֜קָם וַיֵּ֤לֶךְ אֶל־בֵּיתוֹ֙ אֶל־עִיר֔וֹ וַיְצַ֥ו אֶל־בֵּית֖וֹ וַיֵּחָנַ֑ק וַיָּ֕מָת וַיִּקָּבֵ֖ר בְּקֶ֥בֶר אָבִֽיו׃ ס

‎24 ‏וְדָוִ֖ד בָּ֣א מַחֲנָ֑יְמָה וְאַבְשָׁלֹ֗ם עָבַר֙ אֶת־הַיַּרְדֵּ֔ן ה֕וּא וְכָל־אִ֥ישׁ יִשְׂרָאֵ֖ל עִמּֽוֹ׃

‎25 ‏וְאֶת־עֲמָשָׂ֗א שָׂ֧ם אַבְשָׁלֹ֛ם תַּ֥חַת יוֹאָ֖ב עַל־הַצָּבָ֑א וַעֲמָשָׂ֣א בֶן־אִ֗ישׁ וּשְׁמוֹ֙ יִתְרָ֣א הַיִּשְׂרְאֵלִ֔י אֲשֶׁר־בָּא֙ אֶל־אֲבִיגַ֣ל בַּת־נָחָ֔שׁ אֲח֥וֹת צְרוּיָ֖ה אֵ֥ם יוֹאָֽב׃

‎26 ‏וַיִּ֤חַן יִשְׂרָאֵל֙ וְאַבְשָׁלֹ֔ם אֶ֖רֶץ הַגִּלְעָֽד׃ ס

‎27 ‏וַיְהִ֕י כְּב֥וֹא דָוִ֖ד מַחֲנָ֑יְמָה וְשֹׁבִ֨י בֶן־נָחָ֜שׁ מֵרַבַּ֣ת בְּנֵֽי־עַמּ֗וֹן וּמָכִ֤יר בֶּן־עַמִּיאֵל֙ מִלֹּ֣א דְבָ֔ר וּבַרְזִלַּ֥י הַגִּלְעָדִ֖י מֵרֹגְלִֽים׃

‎28 ‏מִשְׁכָּ֤ב וְסַפּוֹת֙ וּכְלִ֣י יוֹצֵ֔ר וְחִטִּ֥ים וּשְׂעֹרִ֖ים וְקֶ֣מַח וְקָלִ֑י וּפ֥וֹל וַעֲדָשִׁ֖ים וְקָלִֽי׃

‎29 ‏וּדְבַ֣שׁ וְחֶמְאָ֗ה וְצֹאן֙ וּשְׁפ֣וֹת בָּקָ֔ר הִגִּ֧ישׁוּ לְדָוִ֛ד וְלָעָ֥ם אֲשֶׁר־אִתּ֖וֹ לֶאֱכ֑וֹל כִּ֣י אָמְר֔וּ הָעָ֗ם רָעֵ֛ב וְעָיֵ֥ף וְצָמֵ֖א בַּמִּדְבָּֽר׃

1 wayyō’mer ’ăḥîṯōfel ’el-’aḇəšālōm ’eḇəḥărâ nnā’ šənêm-‘āśār ’elef ’îš wə’āqûmâ wə’erədəfâ ’^aḥărê-ḏāwiḏ hallāyəlâ:

2 wə’āḇwō’ ‘ālāyw wəhû’ yāḡē‘a ûrəfēh yāḏayim wəh^aḥăraḏətî ’ōṯwō wənās kāl-hā‘ām ’ăšer-’itwō wəhikêṯî ’eṯ-hammeleḵə ləḇadwō:

3 wə’āšîḇâ ḵāl-hā‘ām ’ēleyḵā kəšûḇ hakōl hā’îš ’ăšer ’atâ məḇaqqēš kāl-hā‘ām yihəyeh šālwōm:

4 wayyîšar hadāḇār bə‘ênê ’aḇəšālōm ûḇə‘ênê kāl-ziqənê yiśərā’ēl: s

5 wayyō’mer ’aḇəšālwōm qərā’ nā’ gam ləḥûšay hā’arəkî wənišəmə‘â mah-bəfîw gam-hû’:

6 wayyāḇō’ ḥûšay ’el-’aḇəšālwōm wayyō’mer ’aḇəšālwōm ’ēlāyw lē’mōr kadāḇār hazzeh diber ’ăḥîṯōfel hăn^a‘ăśeh ’eṯ-dəḇārwō ’im-’ayin ’atâ ḏabēr: s

7 wayyō’mer ḥûšay ’el-’aḇəšālwōm lō’-ṭwōḇâ hā‘ēṣâ ’ăšer-yā‘aṣ ’ăḥîṯōfel bap^a‘am hazzō’ṯ:

8 wayyō’mer ḥûšay ’atâ yāḏ^a‘ətā ’eṯ-’āḇîḵā wə’eṯ-’ănāšāyw kî ḡibōrîm hēmmâ ûmārê nefeš hēmmâ kəḏōḇ šakûl baśśāḏeh wə’āḇîḵā ’îš miləḥāmâ wəlō’ yālîn ’eṯ-hā‘ām:

9 hinnēh ‘atâ hû’-neḥəbā’ bə’^aḥaṯ hapəḥāṯîm ’wō bə’^aḥaḏ hamməqwōmōṯ wəhāyâ kinəfōl bâem batəḥillâ wəšām^a‘ haššōmē‘a wə’āmar hāyəṯâ magēfâ bā‘ām ’ăšer ’^aḥărê ’aḇəšālōm:

10 wəhû’ ḡam-ben-ḥayil ’ăšer libwō kəlēḇ hā’arəyēh himmēs yimmās kî-yōḏē‘a kāl-yiśərā’ēl kî-ḡibwōr ’āḇîḵā ûḇənê-ḥayil ’ăšer ’itwō:

11 kî yā‘aṣətî hē’āsōf yē’āsēf ‘āleyḵā ḵāl-yiśərā’ēl midān wə‘aḏ-bə’ēr šeḇ^a‘ k^aḥwōl ’ăšer-‘al-hayyām lārōḇ ûfāneyḵā hōləḵîm baqərāḇ:

12 ûḇā’nû ’ēlāyw bə’^aḥaṯ bə’^aḥaḏ hamməqwōmōṯ ’ăšer niməṣā’ šām wən^aḥənû ‘ālāyw ka’ăšer yipōl haṭṭal ‘al-hā’ăḏāmâ wəlō’-nwōṯar bwō ûḇəḵāl-hā’ănāšîm ’ăšer-’itwō gam-’eḥāḏ:

13 wə’im-’el-‘îr yē’āsēf wəhiśśî’û ḵāl-yiśərā’ēl ’el-hā‘îr hahî’ ḥăḇālîm wəsāḥaḇənû ’ōṯwō ‘aḏ-hann^aḥal ‘aḏ ’ăšer-lō’-niməṣā’ šām gam-ṣərwōr: f

14 wayyō’mer ’aḇəšālwōm wəḵāl-’îš yiśərā’ēl ṭwōḇâ ‘ăṣaṯ ḥûšay hā’arəkî mē‘ăṣaṯ ’ăḥîṯōfel wayhwâ ṣiûâ ləhāfēr ’eṯ-‘ăṣaṯ ’ăḥîṯōfel haṭṭwōḇâ ləḇ^a‘ăḇûr hāḇî’ yəhwâ ’el-’aḇəšālwōm ’eṯ-hārā‘â: s

15 wayyō’mer ḥûšay ’el-ṣāḏwōq wə’el-’eḇəyāṯār hakōhănîm kāzō’ṯ wəḵāzō’ṯ yā‘aṣ ’ăḥîṯōfel ’eṯ-’aḇəšālōm wə’ēṯ ziqənê yiśərā’ēl wəḵāzō’ṯ wəḵāzō’ṯ yā‘aṣətî ’ānî:

16 wə‘atâ šiləḥû məhērâ wəhagîḏû ləḏāwiḏ lē’mōr ’al-tālen hallayəlâ bə‘arəḇwōṯ hammiḏəbār wəḡam ‘āḇwōr t^a‘ăḇwōr pen yəḇull^a‘ lammeleḵə ûləḵāl-hā‘ām ’ăšer ’itwō:

17 wîhwōnāṯān wa’ăḥîm^a‘aṣ ‘ōməḏîm bə‘ên-rōḡēl wəhāləḵâ haššifəḥâ wəhigîḏâ lâem wəhēm yēləḵû wəhigîḏû lammeleḵə dāwiḏ kî lō’ yûḵəlû ləhērā’wōṯ lāḇwō’ hā‘îrâ:

18 wayyarə’ ’ōṯām n^a‘ar wayyagēḏ lə’aḇəšālōm wayyēləḵû šənêhem məhērâ wayyāḇō’û| ’el-bêṯ-’îš bəḇ^aḥûrîm wəlwō ḇə’ēr b^aḥăṣērwō wayyērəḏû šām:

19 watiqq^aḥ hā’iššâ watifərōś ’eṯ-hammāsāḵə ‘al-pənê habə’ēr watišəṭ^aḥ ‘ālāyw hārifwōṯ wəlō’ nwōḏ^a‘ dāḇār:

20 wayyāḇō’û ‘aḇəḏê ’aḇəšālwōm ’el-hā’iššâ habayəṯâ wayyō’mərû ’ayyēh ’ăḥîm^a‘aṣ wîhwōnāṯān watō’mer lâem hā’iššâ ‘āḇərû mîḵal hammāyim wayəḇaqəšû wəlō’ māṣā’û wayyāšuḇû yərûšālāim: s

21 wayəhî| ’^aḥărê leḵətām wayy^a‘ălû mēhabə’ēr wayyēləḵû wayyagiḏû lammeleḵə dāwiḏ wayyō’mərû ’el-dāwiḏ qûmû wə‘iḇərû məhērâ ’eṯ-hammayim kî-ḵāḵâ yā‘aṣ ‘ălêḵem ’ăḥîṯōfel:

22 wayyāqām dāwiḏ wəḵāl-hā‘ām ’ăšer ’itwō wayy^a‘aḇərû ’eṯ-hayyarədēn ‘aḏ-’wōr habōqer ‘aḏ-’^aḥaḏ lō’ ne‘ədār ’ăšer lō’-‘āḇar ’eṯ-hayyarədēn:

23 wa’ăḥîṯōfel rā’â kî lō’ ne‘eśəṯâ ‘ăṣāṯwō wayy^aḥăḇōš ’eṯ-h^aḥămwōr wayyāqām wayyēleḵə ’el-bêṯwō ’el-‘îrwō wayəṣaw ’el-bêṯwō wayyēḥānaq wayyāmāṯ wayyiqqāḇēr bəqeḇer ’āḇîw: s

24 wəḏāwiḏ bā’ m^aḥănāyəmâ wə’aḇəšālōm ‘āḇar ’eṯ-hayyarədēn hû’ wəḵāl-’îš yiśərā’ēl ‘immwō:

25 wə’eṯ-‘ămāśā’ śām ’aḇəšālōm t^aḥaṯ ywō’āḇ ‘al-haṣṣāḇā’ w^a‘ămāśā’ ḇen-’îš ûšəmwō yiṯərā’ hayyiśərə’ēlî ’ăšer-bā’ ’el-’ăḇîḡal baṯ-nāḥāš ’ăḥwōṯ ṣərûyâ ’ēm ywō’āḇ:

26 wayyiḥan yiśərā’ēl wə’aḇəšālōm ’ereṣ hagilə‘āḏ: s

27 wayəhî kəḇwō’ ḏāwiḏ m^aḥănāyəmâ wəšōḇî ḇen-nāḥāš mērabaṯ bənê-‘ammwōn ûmāḵîr ben-‘ammî’ēl millō’ ḏəḇār ûḇarəzillay hagilə‘āḏî mērōḡəlîm:

28 mišəkāḇ wəsapwōṯ ûḵəlî ywōṣēr wəḥiṭṭîm ûśə‘ōrîm wəqem^aḥ wəqālî ûfwōl w^a‘ăḏāšîm wəqālî:

29 ûḏəḇaš wəḥemə’â wəṣō’n ûšəfwōṯ bāqār higîšû ləḏāwiḏ wəlā‘ām ’ăšer-’itwō le’ĕḵwōl kî ’āmərû hā‘ām rā‘ēḇ wə‘āyēf wəṣāmē’ bammiḏəbār: