Zechariah (Zekharyah) Chapter 4

‎1 ‏וַיָּ֕שָׁב הַמַּלְאָ֖ךְ הַדֹּבֵ֣ר בִּ֑י וַיְעִירֵ֕נִי כְּאִ֖ישׁ אֲשֶׁר־יֵע֥וֹר מִשְּׁנָתֽוֹ׃

‎2 ‏וַיֹּ֣אמֶר אֵלַ֔י מָ֥ה אַתָּ֖ה רֹאֶ֑ה ויאמר וָאֹמַ֡ר רָאִ֣יתִי׀ וְהִנֵּ֣ה מְנוֹרַת֩ זָהָ֨ב כֻּלָּ֜הּ וְגֻלָּ֣הּ עַל־רֹאשָׁ֗הּ וְשִׁבְעָ֤ה נֵרֹתֶ֙יהָ֙ עָלֶ֔יהָ שִׁבְעָ֤ה וְשִׁבְעָה֙ מֽוּצָק֔וֹת לַנֵּר֖וֹת אֲשֶׁ֥ר עַל־רֹאשָֽׁהּ׃

‎3 ‏וּשְׁנַ֥יִם זֵיתִ֖ים עָלֶ֑יהָ אֶחָד֙ מִימִ֣ין הַגֻּלָּ֔ה וְאֶחָ֖ד עַל־שְׂמֹאלָֽהּ׃

‎4 ‏וָאַ֙עַן֙ וָֽאֹמַ֔ר אֶל־הַמַּלְאָ֛ךְ הַדֹּבֵ֥ר בִּ֖י לֵאמֹ֑ר מָה־אֵ֖לֶּה אֲדֹנִֽי׃

‎5 ‏וַ֠יַּעַן הַמַּלְאָ֞ךְ הַדֹּבֵ֥ר בִּי֙ וַיֹּ֣אמֶר אֵלַ֔י הֲל֥וֹא יָדַ֖עְתָּ מָה־הֵ֣מָּה אֵ֑לֶּה וָאֹמַ֖ר לֹ֥א אֲדֹנִֽי׃

‎6 ‏וַיַּ֜עַן וַיֹּ֤אמֶר אֵלַי֙ לֵאמֹ֔ר זֶ֚ה דְּבַר־יְהוָ֔ה אֶל־זְרֻבָּבֶ֖ל לֵאמֹ֑ר לֹ֤א בְחַ֙יִל֙ וְלֹ֣א בְכֹ֔חַ כִּ֣י אִם־בְּרוּחִ֔י אָמַ֖ר יְהוָ֥ה צְבָאֽוֹת׃

‎7 ‏מִֽי־אַתָּ֧ה הַֽר־הַגָּד֛וֹל לִפְנֵ֥י זְרֻבָּבֶ֖ל לְמִישֹׁ֑ר וְהוֹצִיא֙ אֶת־הָאֶ֣בֶן הָרֹאשָׁ֔ה תְּשֻׁא֕וֹת חֵ֥ן חֵ֖ן לָֽהּ׃ פ

‎8 ‏וַיְהִ֥י דְבַר־יְהוָ֖ה אֵלַ֥י לֵאמֹֽר׃

‎9 ‏יְדֵ֣י זְרֻבָּבֶ֗ל יִסְּד֛וּ הַבַּ֥יִת הַזֶּ֖ה וְיָדָ֣יו תְּבַצַּ֑עְנָה וְיָ֣דַעְתָּ֔ כִּֽי־יְהוָ֥ה צְבָא֖וֹת שְׁלָחַ֥נִי אֲלֵיכֶֽם׃

‎10 ‏כִּ֣י מִ֣י בַז֮ לְי֣וֹם קְטַנּוֹת֒ וְשָׂמְח֗וּ וְרָא֞וּ אֶת־הָאֶ֧בֶן הַבְּדִ֛יל בְּיַ֥ד זְרֻבָּבֶ֖ל שִׁבְעָה־אֵ֑לֶּה עֵינֵ֣י יְהוָ֔ה הֵ֥מָּה מְשׁוֹטְטִ֖ים בְּכָל־הָאָֽרֶץ׃

‎11 ‏וָאַ֖עַן וָאֹמַ֣ר אֵלָ֑יו מַה־שְּׁנֵ֤י הַזֵּיתִים֙ הָאֵ֔לֶה עַל־יְמִ֥ין הַמְּנוֹרָ֖ה וְעַל־שְׂמֹאולָֽהּ׃

‎12 ‏וָאַ֣עַן שֵׁנִ֔ית וָאֹמַ֖ר אֵלָ֑יו מַה־שְׁתֵּ֞י שִׁבֲּלֵ֣י הַזֵּיתִ֗ים אֲשֶׁר֙ בְּיַ֗ד שְׁנֵי֙ צַנְתְּר֣וֹת הַזָּהָ֔ב הַֽמְרִיקִ֥ים מֵעֲלֵיהֶ֖ם הַזָּהָֽב׃

‎13 ‏וַיֹּ֤אמֶר אֵלַי֙ לֵאמֹ֔ר הֲל֥וֹא יָדַ֖עְתָּ מָה־אֵ֑לֶּה וָאֹמַ֖ר לֹ֥א אֲדֹנִֽי׃

‎14 ‏וַיֹּ֕אמֶר אֵ֖לֶּה שְׁנֵ֣י בְנֵֽי־הַיִּצְהָ֑ר הָעֹמְדִ֖ים עַל־אֲד֥וֹן כָּל־הָאָֽרֶץ׃

1 wayyāšāḇ hammalə’āḵə hadōḇēr bî wayə‘îrēnî kə’îš ’ăšer-yē‘wōr miššənāṯwō:

2 wayyō’mer ’ēlay mâ ’atâ rō’eh wayyō’mer wā’ōmar rā’îṯî| wəhinnēh mənwōraṯ zâāḇ kullāh wəḡullāh ‘al-rō’šāh wəšiḇə‘â nērōṯeyhā ‘āleyhā šiḇə‘â wəšiḇə‘â mûṣāqwōṯ lannērwōṯ ’ăšer ‘al-rō’šāh:

3 ûšənayim zêṯîm ‘āleyhā ’eḥāḏ mîmîn hagullâ wə’eḥāḏ ‘al-śəmō’lāh:

4 wā’^a‘an wā’ōmar ’el-hammalə’āḵə hadōḇēr bî lē’mōr mâ-’ēlleh ’ăḏōnî:

5 wayy^a‘an hammalə’āḵə hadōḇēr bî wayyō’mer ’ēlay hălwō’ yāḏ^a‘ətā mâ-hēmmâ ’ēlleh wā’ōmar lō’ ’ăḏōnî:

6 wayy^a‘an wayyō’mer ’ēlay lē’mōr zeh dəḇar-yəhwâ ’el-zərubāḇel lē’mōr lō’ ḇəḥayil wəlō’ ḇəḵōḥa kî ’im-bərûḥî ’āmar yəhwâ ṣəḇā’wōṯ:

7 mî-’atâ har-hagāḏwōl lifənê zərubāḇel ləmîšōr wəhwōṣî’ ’eṯ-hā’eḇen hārō’šâ təšu’wōṯ ḥēn ḥēn lāh: f

8 wayəhî ḏəḇar-yəhwâ ’ēlay lē’mōr:

9 yəḏê zərubāḇel yissəḏû habayiṯ hazzeh wəyāḏāyw təḇaṣṣ^a‘ənâ wəyāḏ^a‘ətā kî-yəhwâ ṣəḇā’wōṯ šəlāḥanî ’ălêḵem:

10 kî mî ḇaz ləywōm qəṭannwōṯ wəśāməḥû wərā’û ’eṯ-hā’eḇen habəḏîl bəyaḏ zərubāḇel šiḇə‘â-’ēlleh ‘ênê yəhwâ hēmmâ məšwōṭəṭîm bəḵāl-hā’āreṣ:

11 wā’^a‘an wā’ōmar ’ēlāyw mah-ššənê hazzêṯîm hā’ēleh ‘al-yəmîn hammənwōrâ wə‘al-śəmō’wlāh:

12 wā’^a‘an šēnîṯ wā’ōmar ’ēlāyw mah-šətê šibălê hazzêṯîm ’ăšer bəyaḏ šənê ṣanətərwōṯ hazzâāḇ hamərîqîm mē‘ălêhem hazzâāḇ:

13 wayyō’mer ’ēlay lē’mōr hălwō’ yāḏ^a‘ətā mâ-’ēlleh wā’ōmar lō’ ’ăḏōnî:

14 wayyō’mer ’ēlleh šənê ḇənê-hayyiṣəhār hā‘ōməḏîm ‘al-’ăḏwōn kāl-hā’āreṣ: