Riddle 35

Verse Indeterminate Saxon

Mec se wæta wong,      wundrum freorig,
of his innaþe      ærist cende.
Ne wat ic mec beworhtne      wulle flysum,
hærum þurh heahcræft,      hygeþoncum min.

5

Wundene me ne beoð wefle,      ne ic wearp hafu,
ne þurh þreata geþræcu      þræd me ne hlimmeð,
ne æt me hrutende      hrisil scriþeð,
ne mec ohwonan      sceal am cnyssan.
Wyrmas mec ne awæfan      wyrda cræftum,

10

þa þe geolo godwebb      geatwum frætwað.
Wile mec mon hwæþre seþeah      wide ofer eorþan
hatan for hæleþum      hyhtlic gewæde.
Saga soðcwidum,      searoþoncum gleaw,
wordum wisfæst,      hwæt þis gewæde sy.