The Paris Psalter: Psalm 105

Verse Indeterminate Saxon

Ic andette      ecum drihtne,
georne ðam gleawan,      forðan ic hine godne wat;
forþon he his mildheortnysse      mannum cyðde,
on ðysse worulde      wis gestandeð.

5

Hwylc mæg æfre      mihta drihtnes
asprecan and aspyrian,      oððe spedlice
eall his lofmægen      leode gehyran
and his gehyrnesse      her oncnawan?
Eadige beoð æghwær,      þa ðe a wyllað

10

soðe domas      sylfe efnan,
on ealle tid      æghwæs healdan
heora soðfæstnysse      symble mid dædum.
Gemune us, drihten,      on modsefan
forð hycgende      folces þines,

15

and us mid hælo      her geneosa.
And us tidlice      teala sceawige,
ceose mid gecorenum,      þenden we cwice lifgen,
þæt we mid þinre ðeode      þær blissian
and þæt yrfe þin      æghwær herige.

20

We gefyrnedan      mid urum fæderum ær,
and we unsoðfæste      ealle wæron
and unrihtes      æghwær worhtan.
Fæderas ure      fæste ne oncneowan
ealle þa wundor      þe ðu on Egyptum

25

worhtest wræclice,      wundor unlytel;
næron hi gemyndige      miltsa þinra,
þa ðu him on ðære mægðe      manige cyðdest.
Hi bysmredan,      þa hi on brad wæter
on þone readan sæ      randas bæron,

30

þær ðu hi alysdest,      lifes ealdor,
and hi generedest      on naman þinum,
þa ðu þine miht      mycle cyðdest.
þær ðu readne sæ      ricene geðywdest,
and þær wæron      þa wareðas drige,

35

and hi betweonum wætera      weallas læddest,
swa hi on westenne      wæron on drigum.
Swa hi alysde      lifes ealdor
of heora feonda      fæcnum handum,
and of feogendra      folmum swylce,

40

and heora feondas      flod adrencte,
þæt þæra æfre ne com      an spellboda.
Syððan hi his wordon      wel gelyfdan
and him lofsangum      lustum cwemdan,
and þæs eft hraðe      ealle forgeaton,

45

weorca wræclicra;      na hi wel syþþan
his geæhtunge      ahwær heoldan.
Hi on westenne      wraðe ongunnan
gitsunge began      and gramlice
heora godes þær      geare costedan.

50

He him been sniome      brohte and sealde,
sende on heora muþas      mete to genihte.
Ongunnon hi on þam wicum      wraðe swylce
mærne Moyses      ma bysmrian
and Aaron mid      eac þone halgan.

55

þa eorðe togaan      and eall forswealh
on deope forwyrd      Dathanes weorod
and Abirones      eall ætgædere.
þær fyr abarn      frecne swylce
on heora gemetinge,      and þær maansceaðan

60

þa synfullan      sniome forbærnde.
Hi on Choreb swylce      cealf ongunnan
him to godgylde      georne wyrcean,
onwendan heora wuldor      on þæne wyrsan had
hæðenstyrces      hig etendes.

65

Godes hi forgeaton,      þe hi of gramra ær
feonda folmum      frecne generede,
þe on Egyptum      æðele wundur
and on Chananea      cymu worhte
and recene wundur      on þam readan sæ.

70

þa hi wolde toweorpan      wuldres aldor,
þær heora Moyses      mægene ne hulpe;
he þæt folc forstod      feonda mægene;
forðon he him his yrre      of acyrde,
þæt he hi ne towurpe      geond werþeoda.

75

Ne hi for awyht      eorþan cyste
þa selestan      geseon woldan,
ne his wordum eac      woldan gelyfan;
ac hi granedan      and grame spræcan,
noldan his wordum      wel gehyran.

80

He his handa ahof      and hi hraðe wolde
on þam westenne      wide todrifan
and heora swæs cynn      sendan on wid land.
Hi Belphegor      bædon are,
æton deadra lac,      swa hit gedefe ne wæs.

85

And hi bysmredon      bealde drihten
on heora gemetincge      mægene ealle,
and þær healicne      on hryre gefremedan.
Hi þæs feondætes      Finees awerede,
þa he on þam folce      feondgyld gebræc;

90

he þæs hæl gehleat      and helpe fand
of cynna gehwam      and on cneorisse.
Eac hi gefremedan      oðer bysmer,
þær hi wiðercwyde      wæteres hæfdon;
þær Moyses wearð      mægene gebysgad

95

for heora yfelum,      swa he oftor wæs,
on his gaste gram;      ne mihte him godes willan
mid his welerum      wisne getæcean.
Noldan hi toworpan      wraðe þeode,
swa him drihten ær      dema sægde,

100

ac hi wið manfullum      mengdan þeode
and leornedan      lað weorc gode
and sceuccgyldum      swyþe guldan;
him þæt eall gewearð      to æswyce.
Ongunnan heora bearn      blotan feondum,

105

sceuccum onsæcgean      suna and dohter;
agutan blod swylce      bearna feala,
þa unscyldige      ealle wærun,
syðþan hi gecuran      Chananea god.
þanon eorþe wearð      eall mid blode

110

mane gemenged,      misdædum fah.
Eall hi forheoldan      heahweorc godes;
forðan him yrre wearð      ece drihten
and he his yrfe      eall forhogode.
He hi on handgeweald      hæðenum sealde

115

and heora weoldan,      þa him wyrrest ær
on feondscipe      fæste gestodon.
Heora costedan      cuþe feondas
and under handum      hynþe þoledan;
hi alysde oft      lifes ealdor.

120

Hi hine on geþeahte      oft abylgdan;
wæron on unrihtum      oft gehynde.
Swa he furðum oncneow,      þæt heora fynd ehtan,
he heora bene      bealde gehyrde.
þonne he his wordgebeot      well gemunde;

125

hreaw hine sona,      þonne hi hynþa drugan,
æfter his miltsa      menigu godes.
Syððan he him sealde      sona miltse,
þær hi on gesawon      ealle ætgædere,
þe ehtend him      ær gestodan.

130

Do us hale nu,      halig drihten,
and us, se goda god,      georne gesamna
of widwegum,      þær we wean dreogað,
þæt we þinne naman      nede motan
þone halgestan      her andettan

135

and we on lofe þinum      lungre weorðan
ofer werðeode      wuldre geherede.
Wese Israhela god      aa gebletsad
on worulda woruld,      wealdend drihten,
and þæt fægere becweðe      folca æghwylc;

140

wese swa, wese swa      þurh eall wide ferhð.