The Paris Psalter: Psalm 136

Verse Indeterminate Saxon

Ofer Babilone      bradum streame,
þær we sittað      and sare wepað,
þonne we Sion gemunan      swiðe georne.
On salig we sarige      swiðe gelome

5

ure organan      up ahengan.
Forþon us þær frunon      fæcnum wordum,
woh meldedan,      ða us on weg læddan:
"Singað us ymnum      ealdra sanga
þe ge on Sione      sungan geneahhige."

10

Hu magon we singan      sangas drihtne
on þære foldan      þe us fremde is?
Gif ic þin, Hierusalem,      forgyten hæbbe,
forgyte min seo swyðre      symble æt þearfe;
ætfeole min tunge      fæste gomum,

15

gif ic ofergittol þin      æfre weorðe,
Gif ic ne forsette þe      symble æt frymðe;
ac ic on Hierusalem      georne blissie.
Gemune þu, drihten,      manigra bearna,
þe on Edom synt      eal lifigende,

20

þonne þu Hierusalem      gegodie;
þa nu oft cweðað:      "Wutun hi idle gedon,
oðþæt hi heora      eard geceosan."
Hwæt, þu eart Babilone      bitere ætfæsted
ænge and yfele,      hire earm dohter;

25

eadig byð hwæðere      se þe eft gyldeð
þa þu him on ealdre      ær forgeafe
and us eallum      eac gesealdest.
Eadig byð se þe nimeð      and eac seteð
his agen bearn      on þone æþelan stan.