The Paris Psalter: Psalm 70

Verse Indeterminate Saxon

Ic on þe, god drihten,      gearuwe gewene;
ne weorðe ic on ealdre      æfre gescended;
þu me sniome alys      þuruh þine þa swiþeran miht.
Ahyld me þin eare to      holde mode,

5

and me lustum alys      and me lungre weorð
on god drihten      georne þeccend
and on trume stowe,      þæt þu me teala hæle.
Forþon þu me, god, wære      geara trymmend,
freoða fultumiend;      alys me feondum nu,

10

and me of folmum afere      firenwyrcendra,
þe þine æ      efnan nellað;
syndon unrihtes      ealle wyrcende.
Forþon þu me eart fæle geþyld      fæste, drihten
wære me on geoguðe hyht      gleaw æt frymðe.

15

Ic of modur hrife      mundbyrd on þe
þriste hæfde;      þu eart þeccend min;
on þe ic singge nu      symble and geneahhie.
Ic eom swa forebeacen      folce manegum,
and þu me eart fultum strang      fæste æt þearfe.

20

Sy min muð and min mod      mægene gefylled,
þæt ic þin lof mæge      lustum singan
and wuldur þin      wide mærsian
and þe ealne dæg      æghwær herian.
Ne aweorp þu me,      wuldres ealdor,

25

þonne me ylde tid      on gesige;
þonne me mægen and mod      mylte on hreðre,
ne forlæt þu me,      lifiende god.
Oft me feala cwædon      feondas yfele,
and sætendan      sawle minre

30

and on anre geþeaht      eodan togædere.
Cweþað cuðlice:      "Wuton cunnian,
hwænne hine god læte      swa swa gymeleasne;
þonne we hine forgripen      and his geara ehtan;
syþþan he ne hæbbe      helpend ænne."

35

Ne ofgif þu me huru,      god ælmihtig;
beseoh þu me, soð god,      symble on fultum.
Beoð gedrette,      eac gescende,
þa mine sawle ær      swyþust tældun;
byð þam scand and sceamu      þe me syrwedan yfel.

40

Ic me symble on god      swiðost getreowige,
ofer eall þin lof      lengest hihte.
Min muð sægeð      þine mægenspede
and þin soðfæst weorc      swyþust mæreð,
sægeð þe ealne dæg      ece hælu.

45

Forþon ic ne ongeat      grame ceapunga,
ac ic on þine þa myclan      mihte gange.
Ic þine soðfæstnesse geman      symble, drihten;
þu me ara, god,      ærest lærdest
of geoguðhade;      nu ic eom gomel wintrum.

50

A ic wundor þin      weorþlic sægde,
and ic þæt wið oryldu      awa fremme;
ne forlæt þu me,      lifigende god,
Oððæt ic þines earmes      eall asecge
stiþe strencðe      þisse cneorisse,

55

eallum þam teohhe,      þe nu toweard ys,
þines mihtes þrym,      and þæt mære soð,
þæt ðu on heofenum, god,      heah geworhtest
wundur wræclicu;      nis þe, wuldres cyning,
ænig æfre gelic,      ece drihten.

60

Oft þu me ætywdest      earfoðes feala
on costunge      cuðra manna,
and me yfela feala      oft oncnyssedest;
þonne þu yrre þin      eft oncyrdest
and me of neowelnesse eft      neoðan alysdest

65

þysse eorðan,      þe we on buiað.
ðær þu þin soðfæst weorc      sniome tobræddest,
þonne þu gehwyrfdest      and hulpe min,
and me getrymedest      þæt ic teala mihte;
forþon ic þe andette,      ece drihten,

70

and þe on sealmfatum      singe be hearpan,
Israela god,      ece and halig.
Mine weleras gefeoð,      wynnum lofiað,
þonne ic þe singe,      sigora wealdend,
and min sawl eac,      þa þu sylf lysdest.

75

Swylce min tunge      tidum mærde
þin soðfæst weorc;      scende wæron ealle
þe me yfel to      ær gesohton.