The Paris Psalter: Psalm 78

Verse Indeterminate Saxon

Comon on ðin yrfe,      ece drihten,
fremde þeode,      þa þin fæle hus,
ealh haligne      yfele gewemdan.
Settan Hierusalem      samod anlicast

5

swa in æppelbearu      ane cytan;
swylce hi setton      swylt þinum esnum,
sealdon flæsc heora      fuglum to mose,
haligra lic      hundum and deorum.
Hi þara bearna blod      on byrig leton

10

swa man gute wæter      ymb Hierusalem;
blodige lagan,      nahtan byrgendas.
We synd gewordene      wera cneorissum
eallum edwitstæf      ymbsittendum,
þe us ahwær neah      nu ða syndon.

15

Hu wilt þu, wuldres god,      wrað yrre þin
on ende fram us      æfre oncyrran?
Is nu onbærned      biter þin yrre
on ðinum folce      fyre hatre.
Ageot yrre þin      on þæt rice

20

and on cneowmagas      þe ne cunnan ðe,
ne naman þinne      neode cigeað.
Forþon hi Iacob      geara ætan,
and his wicstede      westan gelome.
Ne gemune þu to oft,      mihta wealdend,

25

ealdra unrihta      þe we oft fremedon,
ac we hraðe begytan      hyldo ðine,
forþon we ðearfende      þearle syndon.
Gefultuma us,      frea ælmihtig,
and alys us,      lifigende god;

30

weorð urum synnum      sefte and milde
for naman þinum      neode and aare.
þy læs æfre cweðan      oðre þeoda,
hæðene herigeas,      "Hwær com eower halig god?"
and us þæt on eagum      oftust worpen,

35

þær manna wese      mæst ætgædere.
Wrec agen blod      esna þinra,
þæt wæs sarlice agoten,      þær þu gesawe to;
geonge for ðe      gnornendra care
þara þe on feterum      fæste wæran.

40

æfter ðines earmes      æðelum mægene
gegang þa deaða bearn      þe hi demað nu.
Gyld nu gramhydigum,      swa hi geearnedan,
on sceat hiora      seofonfealde wrace,
forþon hi edwit on þe      ealle hæfdon.

45

We þin folc wærun      and fæle sceap
eowdes þines;      we ðe andettað,
and þe to worulde      wuldur sæcgeað
and þe on worulda woruld      wordum heriað.