The House of Fame

The Canterbury Tales and Other Works of Chaucer (Middle English), by Geoffery Chaucer, [14th cent.], at sacred-texts.com

Other Works

The House of Fame

 God turne us every drem to goode!
 For hyt is wonder, be the roode,
 To my wyt, what causeth swevenes
 Eyther on morwes or on evenes,
 And why th' effect folweth of somme,
 And of somme hit shal never come;
 Why that is an avision
 And why this a revelacion,
 Why this a drem, why that a sweven,
10 And noght to every man lyche even;
 Why this a fantome, why these oracles,
 I not; but whoso of these miracles
 The causes knoweth bet then I,
 Devyne he, for I certeinly
 Ne kan hem noght, ne never thinke
 To besily my wyt to swinke
 To knowe of hir signifiaunce
 The gendres, neyther the distaunce
 Of tymes of hem, ne the causes,
20 Or why this more then that cause is --
 As yf folkys complexions
 Make hem dreme of reflexions,
 Or ellys thus, as other sayn,
 For to gret feblenesse of her brayn,
 By abstinence or by seknesse,
 Prison-stewe or gret distresse,
 Or ellys by dysordynaunce
 Of naturel acustumaunce,
 That som man is to curious
30 In studye, or melancolyous,
 Or thus so inly ful of drede
 That no man may hym bote bede;
 Or elles that devocion
 Of somme, and contemplacion
 Causeth suche dremes ofte;
 Or that the cruel lyf unsofte
 Which these ilke lovers leden
 That hopen over-muche or dreden,
 That purely her impressions
40 Causeth hem avisions;
 Or yf that spirites have the myght
 To make folk to dreme a-nyght;
 Or yf the soule of propre kynde
 Be so parfit, as men fynde,
 That yt forwot that ys to come,
 And that hyt warneth alle and some
 Of everych of her aventures
 Be avisions or be figures,
 But that oure flessh ne hath no myght
50 To understonde hyt aryght,
 For hyt is warned to derkly --
 But why the cause is, noght wot I.
 Wel worth of this thyng grete clerkys
 That trete of this and other werkes,
 For I of noon opinion
 Nyl as now make mensyon,
 But oonly that the holy roode
 Turne us every drem to goode!
 For never sith that I was born,
60 Ne no man elles me beforn,
 Mette, I trowe stedfastly,
 So wonderful a drem as I
 The tenthe day now of Decembre,
 The which, as I kan now remembre,
 I wol yow tellen everydel.
 But at my gynnynge, trusteth wel,
 I wol make invocacion,
 With special devocion,
 Unto the god of slep anoon,
70 That duelleth in a cave of stoon
 Upon a strem that cometh fro Lete,
 That is a flood of helle unswete,
 Besyde a folk men clepeth Cymerie --
 There slepeth ay this god unmerie
 With his slepy thousand sones,
 That alwey for to slepe hir wone is.
 And to this god that I of rede
 Prey I that he wol me spede
 My sweven for to telle aryght,
80 Yf every drem stonde in his myght.
 And he that mover ys of al,
 That is and was and ever shal,
 So yive hem joye that hyt here
 Of alle that they dreme to-yere,
 And for to stonden alle in grace
 Of her loves, or in what place
 That hem were levest for to stonde,
 And shelde hem fro poverte and shonde,
 And from unhap and ech disese,
90 And sende hem al that may hem plese,
 That take hit wel and skorne hyt noght,
 Ne hyt mysdemen in her thoght
 Thorgh malicious entencion.
 And whoso thorgh presumpcion,
 Or hate, or skorn, or thorgh envye,
 Dispit, or jape, or vilanye,
 Mysdeme hyt, pray I Jesus God
 That (dreme he barefot, dreme he shod),
 That every harm that any man
100 Hath had syth the world began
 Befalle hym therof or he sterve,
 And graunte he mote hit ful deserve,
 Lo, with such a conclusion
 As had of his avision
 Cresus, that was kyng of Lyde,
 That high upon a gebet dyde.
 This prayer shal he have of me;
 I am no bet in charyte!
 Now herkeneth, as I have yow seyd,
110 What that I mette or I abreyd.
 Of Decembre the tenthe day,
 Whan hit was nyght to slepe I lay
 Ryght ther as I was wont to done,
 And fil on slepe wonder sone,
 As he that wery was forgo
 On pilgrymage myles two
 To the corseynt Leonard,
 To make lythe of that was hard.
 But as I slepte, me mette I was
120 Withyn a temple ymad of glas,
 In which ther were moo ymages
 Of gold, stondynge in sondry stages,
 And moo ryche tabernacles,
 And with perre moo pynacles,
 And moo curiouse portreytures,
 And queynte maner of figures
 Of olde werk, then I saugh ever.
 For certeynly, I nyste never
 Wher that I was, but wel wyste I
130 Hyt was of Venus redely,
 The temple; for in portreyture
 I sawgh anoon-ryght hir figure
 Naked fletynge in a see,
 And also on hir hed, pardee,
 Hir rose garlond whit and red,
 And hir comb to kembe hyr hed,
 Hir dowves, and daun Cupido
 Hir blynde sone, and Vulcano,
 That in his face was ful broun.
140 But as I romed up and doun,
 I fond that on a wall ther was
 Thus writen on a table of bras:
 "I wol now synge, yif I kan,
 The armes and also the man
 That first cam, thurgh his destinee,
 Fugityf of Troy contree,
 In Itayle, with ful moche pyne
 Unto the strondes of Lavyne."
 And tho began the story anoon,
150 As I shal telle yow echon.
 First sawgh I the destruction
 Of Troye thurgh the Grek Synon,
 [That] with his false forswerynge,
 And his chere and his lesynge,
 Made the hors broght into Troye,
 Thorgh which Troyens loste al her joye.
 And aftir this was grave, allas,
 How Ilyon assayled was
 And wonne, and kyng Priam yslayn
160 And Polytes his sone, certayn,
 Dispitously, of daun Pirrus.
 And next that sawgh I how Venus,
 Whan that she sawgh the castel brende,
 Doun fro the heven gan descende,
 And bad hir sone Eneas flee;
 And how he fledde, and how that he
 Escaped was from al the pres,
 And took his fader Anchises,
 And bar hym on hys bak away,
170 Cryinge, "Allas, and welaway!"
 The whiche Anchises in hys hond
 Bar the goddes of the lond,
 Thilke that unbrende were.
 And I saugh next, in al thys fere,
 How Creusa, daun Eneas wif,
 Which that he lovede as hys lyf,
 And hir yonge sone Iulo,
 And eke Askanius also,
 Fledden eke with drery chere,
180 That hyt was pitee for to here;
 And in a forest as they wente,
 At a turnynge of a wente,
 How Creusa was ylost, allas,
 That ded, not I how, she was;
 How he hir soughte, and how hir gost
 Bad hym to flee the Grekes host,
 And seyde he moste unto Itayle,
 As was hys destinee, sauns faille;
 That hyt was pitee for to here,
190 When hir spirit gan appere,
 The wordes that she to hym seyde,
 And for to kepe hir sone hym preyde.
 Ther sawgh I graven eke how he,
 Hys fader eke, and his meynee,
 With hys shippes gan to saylle
 Towardes the contree of Itaylle
 As streight as that they myghte goo.
 Ther saugh I thee, cruel Juno,
 That art daun Jupiteres wif,
200 That hast yhated al thy lyf
 Al the Troianysshe blood,
 Renne and crye as thou were wood
 On Eolus, the god of wyndes,
 To blowen oute, of alle kyndes,
 So lowde that he shulde drenche
 Lord and lady, grom and wenche,
 Of al the Troian nacion,
 Withoute any savacion.
 Ther saugh I such tempeste aryse
210 That every herte myght agryse
 To see hyt peynted on the wal.
 Ther saugh I graven eke withal,
 Venus, how ye, my lady dere,
 Wepynge with ful woful chere,
 Prayen Jupiter on hye
 To save and kepe that navye
 Of the Troian Eneas,
 Syth that he hir sone was.
 Ther saugh I Joves Venus kysse,
220 And graunted of the tempest lysse.
 Ther saugh I how the tempest stente,
 And how with alle pyne he wente,
 And prively tok arryvage
 In the contree of Cartage;
 And on the morwe, how that he
 And a knyght highte Achate
 Mette with Venus that day,
 Goynge in a queynt array
 As she had ben an hunteresse,
230 With wynd blowynge upon hir tresse;
 How Eneas gan hym to pleyne,
 When that he knew hir, of his peyne;
 And how his shippes dreynte were,
 Or elles lost, he nyste where;
 How she gan hym comforte thoo,
 And bad hym to Cartage goo,
 And ther he shulde his folk fynde,
 That in the see were left behynde.
 And, shortly of this thyng to pace,
240 She made Eneas so in grace
 Of Dido, quene of that contree,
 That, shortly for to tellen, she
 Becam hys love and let him doo
 Al that weddynge longeth too.
 What shulde I speke more queynte,
 Or peyne me my wordes peynte
 To speke of love? Hyt wol not be;
 I kan not of that faculte.
 And eke to telle the manere
250 How they aqueynteden in fere,
 Hyt were a long proces to telle,
 And over-long for yow to dwelle.
 Ther sawgh I grave how Eneas
 Tolde Dido every caas
 That hym was tyd upon the see.
 And after grave was how shee
 Made of hym shortly at oo word
 Hyr lyf, hir love, hir lust, hir lord,
 And dide hym al the reverence
260 And leyde on hym al the dispence
 That any woman myghte do,
 Wenynge hyt had al be so
 As he hir swor; and herby demed
 That he was good, for he such semed.
 Allas! what harm doth apparence,
 Whan hit is fals in existence!
 For he to hir a traytour was;
 Wherfore she slow hirself, allas!
 Loo, how a woman doth amys
270 To love hym that unknowen ys.
 For, be Cryste, lo, thus yt fareth.
 "Hyt is not al gold that glareth."
 For also browke I wel myn hed,
 Ther may be under godlyhed
 Kevered many a shrewed vice.
 Therfore be no wyght so nyce
 To take a love oonly for chere,
 Or speche, or for frendly manere,
 For this shal every woman fynde,
280 That som man, of his pure kynde,
 Wol shewen outward the fayreste,
 Tyl he have caught that what him leste;
 And thanne wol he causes fynde
 And swere how that she ys unkynde,
 Or fals, or privy, or double was.
 Al this seye I be Eneas
 And Dido, and hir nyce lest,
 That loved al to sone a gest;
 Therfore I wol seye a proverbe,
290 That "he that fully knoweth th' erbe
 May saufly leye hyt to his ye" --
 Withoute drede, this ys no lye.
 But let us speke of Eneas,
 How he betrayed hir, allas,
 And lefte hir ful unkyndely.
 So when she saw al utterly
 That he wolde hir of trouthe fayle,
 And wende fro hir to Itayle,
 She gan to wringe hir hondes two.
300 "Allas," quod she, "what me ys woo!
 Allas, is every man thus trewe,
 That every yer wolde have a newe,
 Yf hit so longe tyme dure,
 Or elles three, peraventure?
 As thus: of oon he wolde have fame
 In magnyfyinge of hys name;
 Another for frendshippe, seyth he;
 And yet ther shal the thridde be
 That shal be take for delyt,
310 Loo, or for synguler profit""
 In suche wordes gan to pleyne
 Dydo of hir grete peyne,
 As me mette redely --
 Non other auctour alegge I.
 "Allas!" quod she, "my swete herte,
 Have pitee on my sorwes smerte,
 And slee mee not! Goo noght awey!
 O woful Dido, wel-away!"
 Quod she to hirselve thoo.
320 "O Eneas, what wol ye doo?
 O that your love, ne your bond
 That ye have sworn with your ryght hond,
 Ne my crewel deth," quod she,
 "May holde yow stille here with me!
 O haveth of my deth pitee!
 Iwys, my dere herte, ye
 Knowen ful wel that never yit,
 As ferforth as I hadde wyt,
 Agylte [I] yow in thoght ne dede.
330 O, have ye men such godlyhede
 In speche, and never a del of trouthe?
 Allas, that ever hadde routhe
 Any woman on any man!
 Now see I wel, and telle kan,
 We wrechched wymmen konne noon art;
 For certeyn, for the more part,
 Thus we be served everychone.
 How sore that ye men konne groone,
 Anoon as we have yow receyved,
340 Certaynly we ben deceyvyd!
 For, though your love laste a seson,
 Wayte upon the conclusyon,
 And eke how that ye determynen,
 And for the more part diffynen.
 "O wel-awey that I was born!
 For thorgh yow is my name lorn,
 And alle myn actes red and songe
 Over al thys lond, on every tonge.
 O wikke Fame! -- for ther nys
350 Nothing so swift, lo, as she is.
 O, soth ys, every thing ys wyst,
 Though hit be kevered with the myst.
 Eke, though I myghte duren ever,
 That I have don rekever I never,
 That I ne shal be seyd, allas,
 Yshamed be thourgh Eneas,
 And that I shal thus juged be:
 `Loo, ryght as she hath don, now she
 Wol doo eft-sones, hardely' --
360 Thus seyth the peple prively."
 But that is don, is not to done;
 Al hir compleynt ne al hir moone,
 Certeyn, avayleth hir not a stre.
 And when she wiste sothly he
 Was forth unto his shippes goon,
 She into hir chambre wente anoon,
 And called on hir suster Anne,
 And gan hir to compleyne thanne,
 And seyde that she cause was
370 That she first loved him, allas,
 And thus counseylled hir thertoo.
 But what! When this was seyd and doo,
 She rof hirselve to the herte
 And deyde thorgh the wounde smerte.
 And al the maner how she deyde,
 And alle the wordes that she seyde,
 Whoso to knowe hit hath purpos,
 Rede Virgile in Eneydos
 Or the Epistle of Ovyde,
380 What that she wrot or that she dyde;
 And nere hyt to long to endyte,
 Be God, I wolde hyt here write.
 But wel-away, the harm, the routhe,
 That hath betyd for such untrouthe,
 As men may ofte in bokes rede,
 And al day sen hyt yet in dede,
 That for to thynken hyt, a tene is.
 Loo Demophon, duk of Athenys,
 How he forswor hym ful falsly,
390 And traysed Phillis wikkidly,
 That kynges doghtre was of Trace,
 And falsly gan hys terme pace;
 And when she wiste that he was fals,
 She heng hirself ryght be the hals,
 For he had doon hir such untrouthe.
 Loo, was not this a woo and routhe?
 Eke lo how fals and reccheles
 Was to Breseyda Achilles,
 And Paris to Oenone,
400 And Jason to Isiphile,
 And eft Jason to Medea,
 And Ercules to Dyanira,
 For he left hir for Yole,
 That made hym cache his deth, parde.
 How fals eke was he Theseus,
 That, as the story telleth us,
 How he betrayed Adriane --
 The devel be hys soules bane!
 For had he lawghed, had he loured,
410 He moste have ben al devoured,
 Yf Adriane ne had ybe.
 And for she had of hym pite,
 She made hym fro the deth escape,
 And he made hir a ful fals jape;
 For aftir this, withyn a while,
 He lefte hir slepynge in an ile
 Desert allone, ryght in the se,
 And stal away and let hir be,
 And took hir suster Phedra thoo
420 With him, and gan to shippe goo.
 And yet he had yswore to here
 On al that ever he myghte swere
 That, so she saved hym hys lyf,
 He wolde have take hir to hys wif;
 For she desired nothing ellis,
 In certeyn, as the book us tellis.
 But to excusen Eneas
 Fullyche of al his grete trespas,
 The book seyth Mercurie, sauns fayle,
430 Bad hym goo into Itayle,
 And leve Auffrikes regioun,
 And Dido and hir faire toun.
 Thoo sawgh I grave how to Itayle
 Daun Eneas is goo to sayle;
 And how the tempest al began,
 And how he loste hys sterisman,
 Which that the stere, or he tok kep,
 Smot over bord, loo, as he slep.
 And also sawgh I how Sybile
440 And Eneas, besyde an yle,
 To helle wente for to see
 His fader, Anchyses the free;
 How he ther fond Palinurus,
 And Dido, and eke Deiphebus;
 And every turment eke in helle
 Saugh he, which is longe to telle;
 Which whoso willeth for to knowe,
 He moste rede many a rowe
 On Virgile or on Claudian,
450 Or Daunte, that hit telle kan.
 Tho saugh I grave al the aryvayle
 That Eneas had in Itayle;
 And with kyng Latyne hys tretee
 And alle the batayles that hee
 Was at hymself, and eke hys knyghtis,
 Or he had al ywonne his ryghtis;
 And how he Turnus reft his lyf,
 And wan Lavina to his wif;
 And alle the mervelous signals
460 Of the goddys celestials;
 How, mawgree Juno, Eneas,
 For al hir sleight and hir compas,
 Acheved al his aventure,
 For Jupiter took of hym cure
 At the prayer of Venus --
 The whiche I preye alwey save us,
 And us ay of oure sorwes lyghte!
 When I had seen al this syghte
 In this noble temple thus,
470 "A, Lord," thoughte I, "that madest us,
 Yet sawgh I never such noblesse
 Of ymages, ne such richesse,
 As I saugh graven in this chirche;
 But not wot I whoo did hem wirche,
 Ne where I am, ne in what contree.
 But now wol I goo out and see,
 Ryght at the wiket, yf y kan
 See owhere any stiryng man
 That may me telle where I am."
480 When I out at the dores cam,
 I faste aboute me beheld.
 Then sawgh I but a large feld,
 As fer as that I myghte see,
 Withouten toun, or hous, or tree,
 Or bush, or grass, or eryd lond;
 For al the feld nas but of sond
 As smal as man may se yet lye
 In the desert of Lybye.
 Ne no maner creature
490 That ys yformed be Nature
 Ne sawgh I, me to rede or wisse.
 "O Crist," thoughte I, "that art in blysse,
 Fro fantome and illusion
 Me save!" And with devocion
 Myn eyen to the hevene I caste.
 Thoo was I war, lo, at the laste,
 That faste be the sonne, as hye
 As kenne myghte I with myn ye,
 Me thoughte I sawgh an egle sore,
500 But that hit semed moche more
 Then I had any egle seyn.
 But this as sooth as deth, certeyn,
 Hyt was of gold, and shon so bryghte
 That never sawe men such a syghte,
 But yf the heven had ywonne
 Al newe of gold another sonne;
 So shone the egles fethers bryghte,
 And somwhat dounward gan hyt lyghte.
 Now herkeneth every maner man
510 That Englissh understonde kan
 And [listeth. of my drem to lere,
 For now at erste shul ye here
 So sely an avisyon,
 That Isaye, ne Scipion,
 Ne kyng Nabugodonosor,
 Pharoo, Turnus, ne Elcanor,
 Ne mette such a drem as this.
 Now faire blisfull, O Cipris,
 So be my favour at this tyme!
520 And ye, me to endite and ryme
 Helpeth, that on Parnaso duelle,
 Be Elicon, the clere welle.
 O Thought, that wrot al that I mette,
 And in the tresorye hyt shette
 Of my brayn, now shal men se
 Yf any vertu in the be
 To tellen al my drem aryght.
 Now kythe thyn engyn and myght!
 This egle, of which I have yow told,
530 That shon with fethres as of gold,
 Which that so hye gan to sore,
 I gan beholde more and more
 To se the beaute and the wonder;
 But never was ther dynt of thonder,
 Ne that thyng that men calle fouder,
 That smot somtyme a tour to powder
 And in his swifte comynge brende,
 That so swithe gan descende
 As this foul, when hyt beheld
540 That I a-roume was in the feld.
 And with hys grymme pawes stronge,
 Withyn hys sharpe nayles longe,
 Me, fleynge, in a swap he hente,
 And with hys sours ayen up wente,
 Me caryinge in his clawes starke
 As lyghtly as I were a larke,
 How high, I can not telle yow,
 For I cam up, y nyste how.
 For so astonyed and asweved
550 Was every vertu in my heved,
 What with his sours and with my drede,
 That al my felynge gan to dede,
 For-whi hit was to gret affray.
 Thus I longe in hys clawes lay,
 Til at the laste he to me spak
 In mannes vois, and seyde, "Awak!
 And be not agast so, for shame!"
 And called me tho by my name,
 And for I shulde the bet abreyde,
560 Me mette "Awak," to me he seyde
 Ryght in the same vois and stevene
 That useth oon I koude nevene;
 And with that vois, soth for to seyn,
 My mynde cam to me ageyn,
 For hyt was goodly seyd to me,
 So nas hyt never wont to be.
 And here-withal I gan to stere,
 And he me in his fet to bere,
 Til that he felte that I had hete,
570 And felte eke tho myn herte bete.
 And thoo gan he me to disporte,
 And with wordes to comforte,
 And sayde twyes, "Seynte Marye,
 Thou art noyous for to carye!
 And nothyng nedeth it, pardee,
 For also wis God helpe me,
 As thou noon harm shalt have of this;
 And this caas that betyd the is,
 Is for thy lore and for thy prow.
580 Let see! Darst thou yet loke now?
 Be ful assured, boldely,
 I am thy frend." And therwith I
 Gan for to wondren in my mynde.
 "O God," thoughte I, "that madest kynde,
 Shal I noon other weyes dye?
 Wher Joves wol me stellyfye,
 Or what thing may this sygnifye?
 I neyther am Ennok, ne Elye,
 Ne Romulus, ne Ganymede,
590 That was ybore up, as men rede,
 To hevene with daun Jupiter,
 And mad the goddys botiller."
 Loo, this was thoo my fantasye.
 But he that bar me gan espye
 That I so thoughte, and seyde this:
 "Thow demest of thyself amys,
 For Joves ys not theraboute --
 I dar wel putte the out of doute --
 To make of the as yet a sterre;
600 But er I bere the moche ferre,
 I wol the telle what I am,
 And whider thou shalt, and why I cam
 To do thys, so that thou take
 Good herte, and not for fere quake."
 "Gladly," quod I. "Now wel," quod he,
 "First, I, that in my fet have the,
 Of which thou hast a fere and wonder,
 Am dwellynge with the god of thonder,
 Which that men callen Jupiter,
610 That dooth me flee ful ofte fer
 To do al hys comaundement.
 And for this cause he hath me sent
 To the. Now herke, be thy trouthe:
 Certeyn, he hath of the routhe
 That thou so longe trewely
 Hast served so ententyfly
 Hys blynde nevew Cupido,
 And faire Venus also,
 Withoute guerdon ever yit,
620 And never-the-lesse hast set thy wit --
 Although that in thy hed ful lyte is --
 To make bookys, songes, dytees,
 In ryme or elles in cadence,
 As thou best canst, in reverence
 Of Love and of hys servantes eke,
 That have hys servyse soght, and seke;
 And peynest the to preyse hys art,
 Although thou haddest never part.
 Wherfore, also God me blesse,
630 Joves halt hyt gret humblesse
 And vertu eke, that thou wolt make
 A-nyght ful ofte thyn hed to ake
 In thy studye, so thou writest,
 And ever mo of love enditest,
 In honour of hym and in preysynges,
 And in his folkes furtherynges,
 And in hir matere al devisest,
 And noght hym nor his folk dispisest,
 Although thou maist goo in the daunce
640 Of hem that hym lyst not avaunce.
 "Wherfore, as I seyde, ywys,
 Jupiter considereth this,
 And also, beau sir, other thynges:
 That is, that thou hast no tydynges
 Of Loves folk yf they be glade,
 Ne of noght elles that God made;
 And noght oonly fro fer contree
 That ther no tydynge cometh to thee,
 But of thy verray neyghebores,
650 That duellen almost at thy dores,
 Thou herist neyther that ne this;
 For when thy labour doon al ys,
 And hast mad alle thy rekenynges,
 In stede of reste and newe thynges
 Thou goost hom to thy hous anoon,
 And, also domb as any stoon,
 Thou sittest at another book
 Tyl fully daswed ys thy look;
 And lyvest thus as an heremyte,
660 Although thyn abstynence ys lyte.
 "And therfore Joves, thorgh hys grace,
 Wol that I bere the to a place
 Which that hight the Hous of Fame,
 To do the som disport and game,
 In som recompensacion
 Of labour and devocion
 That thou hast had, loo causeles,
 To Cupido the rechcheles.
 And thus this god, thorgh his merite,
670 Wol with som maner thing the quyte,
 So that thou wolt be of good chere.
 For truste wel that thou shalt here,
 When we be come there I seye,
 Mo wonder thynges, dar I leye,
 And of Loves folk moo tydynges,
 Both sothe sawes and lesinges,
 And moo loves newe begonne,
 And longe yserved loves wonne,
 And moo loves casuelly
680 That ben betyd, no man wot why,
 But as a blynd man stert an hare;
 And more jolytee and fare
 While that they fynde love of stel,
 As thinketh hem, and over-al wel;
 Mo discordes, moo jelousies,
 Mo murmures and moo novelries,
 And moo dissymulacions,
 And feyned reparacions,
 And moo berdys in two houres
690 Withoute rasour or sisoures
 Ymad then greynes be of sondes;
 And eke moo holdynge in hondes,
 And also moo renovelaunces
 Of olde forleten aqueyntaunces;
 Mo love-dayes and acordes
 Then on instrumentes be cordes;
 And eke of loves moo eschaunges
 Then ever cornes were in graunges --
 Unnethe maistow trowen this?"
700 Quod he. "Noo, helpe me God so wys,"
 Quod I. "Noo? why?" quod he. "For hyt
 Were impossible, to my wit,
 Though that Fame had alle the pies
 In al a realme, and alle the spies,
 How that yet she shulde here al this,
 Or they espie hyt." "O yis, yis!"
 Quod he to me, "that kan I preve
 Be reson worthy for to leve,
 So that thou yeve thyn advertence
710 To understonde my sentence.
 "First shalt thou here where she duelleth,
 And so thyn oune bok hyt tellith.
 Hir paleys stant, as I shal seye,
 Ryght even in myddes of the weye
 Betwixen hevene and erthe and see,
 That what so ever in al these three
 Is spoken, either privy or apert,
 The way therto ys so overt,
 And stant eke in so juste a place
720 That every soun mot to hyt pace;
 Or what so cometh from any tonge,
 Be hyt rouned, red, or songe,
 Or spoke in suerte or in drede,
 Certeyn, hyt moste thider nede.
 "Now herkene wel, for-why I wille
 Tellen the a propre skille
 And a worthy demonstracion
 In myn ymagynacion.
 "Geffrey, thou wost ryght wel this,
730 That every kyndely thyng that is
 Hath a kyndely stede ther he
 May best in hyt conserved be;
 Unto which place every thyng
 Thorgh his kyndely enclynyng
 Moveth for to come to
 Whan that hyt is awey therfro;
 As thus: loo, thou maist alday se
 That any thing that hevy be,
 As stoon, or led, or thyng of wighte,
740 And bere hyt never so hye on highte,
 Lat goo thyn hand, hit falleth doun.
 Ryght so seye I be fyr or soun,
 Or smoke or other thynges lyghte;
 Alwey they seke upward on highte,
 While ech of hem is at his large:
 Lyght thing upward, and dounward charge.
 And for this cause mayst thou see
 That every ryver to the see
 Enclyned ys to goo by kynde,
750 And by these skilles, as I fynde,
 Hath fyssh duellynge in flood and see,
 And trees eke in erthe bee.
 Thus every thing, by thys reson,
 Hath his propre mansyon
 To which hit seketh to repaire,
 Ther-as hit shulde not apaire.
 Loo, this sentence ys knowen kouth
 Of every philosophres mouth,
 As Aristotle and daun Platon,
760 And other clerkys many oon;
 And to confirme my resoun,
 Thou wost wel this, that spech is soun,
 Or elles no man myghte hyt here;
 Now herke what y wol the lere.
 "Soun ys noght but eyr ybroken;
 And every speche that ys spoken,
 Lowd or pryvee, foul or fair,
 In his substaunce ys but air;
 For as flaumbe ys but lyghted smoke,
770 Ryght soo soun ys air ybroke.
 But this may be in many wyse,
 Of which I wil the twoo devyse,
 As soun that cometh of pipe or harpe.
 For whan a pipe is blowen sharpe
 The air ys twyst with violence
 And rent -- loo, thys ys my sentence.
 Eke whan men harpe-strynges smyte,
 Whether hyt be moche or lyte,
 Loo, with the strok the ayr tobreketh.
780 And ryght so breketh it when men speketh.
 Thus wost thou wel what thing is speche.
 "Now hennesforth y wol the teche
 How every speche, or noyse, or soun,
 Thurgh hys multiplicacioun,
 Thogh hyt were piped of a mous,
 Mot nede come to Fames Hous.
 I preve hyt thus -- take hede now --
 Be experience; for yf that thow
 Throwe on water now a stoon,
790 Wel wost thou hyt wol make anoon
 A litel roundell as a sercle,
 Paraunter brod as a covercle;
 And ryght anoon thow shalt see wel
 That whel wol cause another whel,
 And that the thridde, and so forth, brother,
 Every sercle causynge other
 Wydder than hymselve was;
 And thus fro roundel to compas,
 Ech aboute other goynge
800 Causeth of othres sterynge
 And multiplyinge ever moo,
 Til that hyt be so fer ygoo
 That hyt at bothe brynkes bee.
 Although thou mowe hyt not ysee
 Above, hyt gooth yet alway under,
 Although thou thenke hyt a gret wonder.
 And whoso seyth of trouthe I varye,
 Bid hym proven the contrarye.
 And ryght thus every word, ywys,
810 That lowd or pryvee spoken ys,
 Moveth first an ayr aboute,
 And of thys movynge, out of doute,
 Another ayr anoon ys meved;
 As I have of the watir preved,
 That every cercle causeth other,
 Ryght so of ayr, my leve brother:
 Everych ayr another stereth
 More and more, and speche up bereth,
 Or voys, or noyse, or word, or soun,
820 Ay through multiplicacioun,
 Til hyt be atte Hous of Fame --
 Take yt in ernest or in game.
 "Now have I told, yf thou have mynde,
 How speche or soun, of pure kynde,
 Enclyned ys upward to meve --
 This mayst thou fele wel I preve --
 And that same place, ywys,
 That every thyng enclyned to ys
 Hath his kyndelyche stede:
830 That sheweth hyt, withouten drede,
 That kyndely the mansioun
 Of every speche, of every soun,
 Be hyt eyther foul or fair,
 Hath hys kynde place in ayr.
 And syn that every thyng that is
 Out of hys kynde place, ywys,
 Moveth thidder for to goo,
 Yif hyt aweye be therfroo --
 As I have before preved the --
840 Hyt seweth, every soun, parde,
 Moveth kyndely to pace
 Al up into his kyndely place.
 And this place of which I telle,
 Ther as Fame lyst to duelle,
 Ys set amyddys of these three,
 Heven, erthe, and eke the see,
 As most conservatyf the soun.
 Than ys this the conclusyoun:
 That every speche of every man,
850 As y the telle first began,
 Moveth up on high to pace
 Kyndely to Fames place.
 "Telle me this now feythfully,
 Have y not preved thus symply,
 Withoute any subtilite
 Of speche, or gret prolixite
 Of termes of philosophie,
 Of figures of poetrie,
 Or colours of rethorike?
860 Pardee, hit oughte the to lyke,
 For hard langage and hard matere
 Ys encombrous for to here
 Attones; wost thou not wel this?"
 And y answered and seyde, "Yis."
 "A ha," quod he, "lo, so I can
 Lewedly to a lewed man
 Speke, and shewe hym swyche skiles
 That he may shake hem be the biles,
 So palpable they shulden be.
870 But telle me this, now praye y the,
 How thinketh the my conclusyon?"
 [Quod he]. "A good persuasion,"
 Quod I, "hyt is, and lyk to be
 Ryght so as thou hast preved me."
 "Be God," quod he, "and as I leve,
 Thou shalt have yet, or hit be eve,
 Of every word of thys sentence
 A preve by experience,
 And with thyne eres heren wel,
880 Top and tayl and everydel,
 That every word that spoken ys
 Cometh into Fames Hous, ywys,
 As I have seyd; what wilt thou more?"
 And with this word upper to sore
 He gan, and seyde, "Be Seynt Jame,
 Now wil we speken al of game!"
 "How farest thou?" quod he to me.
 "Wel," quod I. "Now see," quod he,
 "By thy trouthe, yond adoun,
890 Wher that thou knowest any toun,
 Or hous, or any other thing.
 And whan thou hast of ought knowyng,
 Looke that thou warne me,
 And y anoon shal telle the
 How fer that thou art now therfro."
 And y adoun gan loken thoo,
 And beheld feldes and playnes,
 And now hilles, and now mountaynes,
 Now valeyes, now forestes,
900 And now unnethes grete bestes,
 Now ryveres, now citees,
 Now tounes, and now grete trees,
 Now shippes seyllynge in the see.
 But thus sone in a while he
 Was flowen fro the ground so hye
 That al the world, as to myn ye,
 No more semed than a prikke;
 Or elles was the air so thikke
 That y ne myghte not discerne.
910 With that he spak to me as yerne,
 And seyde, "Seest thou any [toun]
 Or ought thou knowest yonder doun?"
 I sayde, "Nay." "No wonder nys,"
 Quod he, "for half so high as this
 Nas Alixandre Macedo;
 Ne the kyng, Daun Scipio,
 That saw in drem, at poynt devys,
 Helle and erthe and paradys;
 Ne eke the wrechche Dedalus,
920 Ne his child, nyce Ykarus,
 That fleigh so highe that the hete
 Hys wynges malt, and he fel wete
 In myd the see, and ther he dreynte,
 For whom was maked moch compleynte.
 "Now turn upward," quod he, "thy face,
 And behold this large space,
 This eyr, but loke thou ne be
 Adrad of hem that thou shalt se,
 For in this region, certeyn,
930 Duelleth many a citezeyn,
 Of which that speketh Daun Plato;
 These ben the eyryssh bestes, lo!"
 And so saw y all that meynee
 Boothe goon and also flee.
 "Now," quod he thoo, "cast up thyn ye.
 Se yonder, loo, the Galaxie,
 Which men clepeth the Milky Wey
 For hit ys whit (and somme, parfey,
 Kallen hyt Watlynge Strete),
940 That ones was ybrent with hete,
 Whan the sonnes sone the rede,
 That highte Pheton, wolde lede
 Algate hys fader carte, and gye.
 The carte-hors gonne wel espye
 That he koude no governaunce,
 And gonne for to lepe and launce,
 And beren hym now up, now doun,
 Til that he sey the Scorpioun,
 Which that in heven a sygne is yit.
950 And he for ferde loste hys wyt
 Of that, and let the reynes gon
 Of his hors; and they anoon
 Gonne up to mounte and doun descende,
 Til bothe the eyr and erthe brende,
 Til Jupiter, loo, atte laste,
 Hym slow, and fro the carte caste.
 Loo, ys it not a gret myschaunce
 To lete a fool han governaunce
 Of thing that he can not demeyne?"
960 And with this word, soth for to seyne,
 He gan alway upper to sore,
 And gladded me ay more and more,
 So feythfully to me spak he.
 Tho gan y loken under me
 And beheld the ayerissh bestes,
 Cloudes, mystes, and tempestes,
 Snowes, hayles, reynes, wyndes,
 And th' engendrynge in hir kyndes,
 All the wey thrugh which I cam.
970 "O God," quod y, "that made Adam,
 Moche ys thy myght and thy noblesse!"
 And thoo thoughte y upon Boece,
 That writ, "A thought may flee so hye
 Wyth fetheres of Philosophye,
 To passen everych element,
 And whan he hath so fer ywent,
 Than may be seen behynde hys bak
 Cloude" -- and al that y of spak.
 Thoo gan y wexen in a were,
980 And seyde, "Y wot wel y am here,
 But wher in body or in gost
 I not, ywys, but God, thou wost,"
 For more clere entendement
 Nas me never yit ysent.
 And than thoughte y on Marcian,
 And eke on Anteclaudian,
 That sooth was her descripsion
 Of alle the hevenes region,
 As fer as that y sey the preve;
990 Therfore y kan hem now beleve.
 With that this egle gan to crye,
 "Lat be," quod he, "thy fantasye!
 Wilt thou lere of sterres aught?"
 "Nay, certeynly," quod y, "ryght naught."
 "And why?" "For y am now to old."
 "Elles I wolde the have told,"
 Quod he, "the sterres names, lo,
 And al the hevenes sygnes therto,
 And which they ben." "No fors," quod y.
1000 "Yis, pardee," quod he; "wostow why?
 For when thou redest poetrie,
 How goddes gonne stellifye
 Bridd, fissh, best, or him or here,
 As the Raven or eyther Bere,
 Or Arionis harpe fyn,
 Castor, Pollux, or Delphyn,
 Or Athalantes doughtres sevene,
 How alle these arn set in hevene;
 For though thou have hem ofte on honde,
1010 Yet nostow not wher that they stonde."
 "No fors," quod y, "hyt is no nede.
 I leve as wel, so God me spede,
 Hem that write of this matere,
 As though I knew her places here;
 And eke they shynen here so bryghte,
 Hyt shulde shenden al my syghte
 To loke on hem." "That may wel be,"
 Quod he. And so forth bar he me
 A while, and than he gan to crye,
1020 That never herde I thing so hye,
 "Now up the hed, for al ys wel;
 Seynt Julyan, loo, bon hostel!
 Se here the Hous of Fame, lo!
 Maistow not heren that I do?"
 "What?" quod I. "The grete soun,"
 Quod he, "that rumbleth up and doun
 In Fames Hous, full of tydynges,
 Bothe of feir speche and chidynges,
 And of fals and soth compouned.
1030 Herke wel; hyt is not rouned.
 Herestow not the grete swogh?"
 "Yis, parde," quod y, "wel ynogh."
 "And what soun is it lyk?" quod hee.
 "Peter, lyk betynge of the see,"
 Quod y, "ayen the roches holowe,
 Whan tempest doth the shippes swalowe,
 And lat a man stonde, out of doute,
 A myle thens, and here hyt route;
 Or elles lyk the last humblynge
1040 After the clappe of a thundringe,
 Whan Joves hath the air ybete.
 But yt doth me for fere swete."
 "Nay, dred the not therof," quod he;
 "Hyt is nothing will byten the;
 Thou shalt non harm have trewely."
 And with this word both he and y
 As nygh the place arryved were
 As men may casten with a spere.
 Y nyste how, but in a strete
1050 He sette me fair on my fete,
 And seyde, "Walke forth a pas,
 And tak thyn aventure or cas
 That thou shalt fynde in Fames place."
 "Now," quod I, "while we han space
 To speke, or that I goo fro the,
 For the love of God, telle me --
 In sooth, that wil I of the lere --
 Yf thys noyse that I here
 Be, as I have herd the tellen,
1060 Of folk that doun in erthe duellen,
 And cometh here in the same wyse
 As I the herde or this devyse;
 And that there lives body nys
 In al that hous that yonder ys,
 That maketh al this loude fare."
 "Noo," quod he, "by Seynte Clare,
 And also wis God rede me;
 But o thing y will warne the,
 Of the whiche thou wolt have wonder.
1070 Loo, to the Hous of Fame yonder,
 Thou wost now how, cometh every speche --
 Hyt nedeth noght eft the to teche.
 But understond now ryght wel this:
 Whan any speche ycomen ys
 Up to the paleys, anon-ryght
 Hyt wexeth lyk the same wight
 Which that the word in erthe spak,
 Be hyt clothed red or blak;
 And hath so verray hys lyknesse
1080 That spak the word, that thou wilt gesse
 That it the same body be,
 Man or woman, he or she.
 And ys not this a wonder thyng?"
 "Yis," quod I tho, "by heven kyng!"
 And with this word, "Farewel," quod he,
 "And here I wol abyden the;
 And God of heven sende the grace
 Some good to lernen in this place."
 And I of him tok leve anon,
1090 And gan forth to the paleys gon.
 O God of science and of lyght,
 Appollo, thurgh thy grete myght,
 This lytel laste bok thou gye!
 Nat that I wilne, for maistrye,
 Here art poetical be shewed,
 But for the rym ys lyght and lewed,
 Yit make hyt sumwhat agreable,
 Though som vers fayle in a sillable;
 And that I do no diligence
1100 To shewe craft, but o sentence.
 And yif, devyne vertu, thow
 Wilt helpe me to shewe now
 That in myn hed ymarked ys --
 Loo, that is for to menen this,
 The Hous of Fame for to descryve --
 Thou shalt se me go as blyve
 Unto the nexte laure y see,
 And kysse yt, for hyt is thy tree.
 Now entre in my brest anoon!
1110 Whan I was fro thys egle goon,
 I gan beholde upon this place.
 And certein, or I ferther pace,
 I wol yow al the shap devyse
 Of hous and [site], and al the wyse
 How I gan to thys place aproche
 That stood upon so hygh a roche,
 Hier stant ther non in Spayne.
 But up I clomb with alle payne,
 And though to clymbe it greved me,
1120 Yit I ententyf was to see,
 And for to powren wonder lowe,
 Yf I koude any weyes knowe
 What maner stoon this roche was.
 For hyt was lyk alum de glas,
 But that hyt shoon ful more clere;
 But of what congeled matere
 Hyt was, I nyste redely.
 But at the laste aspied I,
 And found that hit was every del
1130 A roche of yse, and not of stel.
 Thoughte I, "By Seynt Thomas of Kent,
 This were a feble fundament
 To bilden on a place hye.
 He ought him lytel glorifye
 That hereon bilt, God so me save!"
 Tho sawgh I al the half ygrave
 With famous folkes names fele,
 That had iben in mochel wele,
 And her fames wide yblowe.
1140 But wel unnethes koude I knowe
 Any lettres for to rede
 Hir names by; for, out of drede,
 They were almost ofthowed so
 That of the lettres oon or two
 Was molte away of every name,
 So unfamous was woxe hir fame.
 But men seyn, "What may ever laste?"
 Thoo gan I in myn herte caste
 That they were molte awey with hete,
1150 And not awey with stormes bete.
 For on that other syde I say
 Of this hil, that northward lay,
 How hit was writen ful of names
 Of folkes that hadden grete fames
 Of olde tyme, and yet they were
 As fressh as men had writen hem here
 The selve day ryght, or that houre
 That I upon hem gan to poure.
 But wel I wiste what yt made;
1160 Hyt was conserved with the shade
 Of a castel that stood on high --
 Al this writynge that I sigh --
 And stood eke on so cold a place
 That hete myghte hit not deface.
 Thoo gan I up the hil to goon,
 And fond upon the cop a woon,
 That al the men that ben on lyve
 Ne han the kunnynge to descrive
 The beaute of that ylke place,
1170 Ne coude casten no compace
 Swich another for to make,
 That myght of beaute ben hys make,
 Ne so wonderlych ywrought;
 That hit astonyeth yit my thought,
 And maketh al my wyt to swynke,
 On this castel to bethynke,
 So that the grete craft, beaute,
 The cast, the curiosite
 Ne kan I not to yow devyse;
1180 My wit ne may me not suffise.
 But natheles al the substance
 I have yit in my remembrance;
 For whi me thoughte, be Seynt Gyle,
 Al was of ston of beryle,
 Bothe the castel and the tour,
 And eke the halle and every bour,
 Wythouten peces or joynynges.
 But many subtil compassinges,
 [Babewynnes] and pynacles,
1190 Ymageries and tabernacles
 I say; and ful eke of wyndowes
 As flakes falle in grete snowes.
 And eke in ech of the pynacles
 Weren sondry habitacles,
 In which stoden, al withoute --
 Ful the castel, al aboute --
 Of alle maner of mynstralles
 And gestiours that tellen tales
 Both of wepinge and of game,
1200 Of al that longeth unto Fame.
 Ther herde I pleyen on an harpe,
 That sowned bothe wel and sharpe,
 Orpheus ful craftely,
 And on his syde, faste by,
 Sat the harper Orion,
 And Eacides Chiron,
 And other harpers many oon,
 And the Bret Glascurion;
 And smale harpers with her glees
1210 Sate under hem in dyvers sees,
 And gunne on hem upward to gape,
 And countrefete hem as an ape,
 Or as craft countrefeteth kynde.
 Tho saugh I stonden hem behynde,
 Afer fro hem, al be hemselve,
 Many thousand tymes twelve,
 That maden lowde mynstralcies
 In cornemuse and shalemyes,
 And many other maner pipe,
1220 That craftely begunne to pipe,
 Bothe in doucet and in rede,
 That ben at festes with the brede;
 And many flowte and liltyng horn,
 And pipes made of grene corn,
 As han thise lytel herde-gromes
 That kepen bestis in the bromes.
 Ther saugh I than Atiteris,
 And of Athenes daun Pseustis,
 And Marcia that loste her skyn,
1230 Bothe in face, body, and chyn,
 For that she wolde envien, loo,
 To pipen bet than Appolloo.
 Ther saugh I famous, olde and yonge,
 Pipers of the Duche tonge,
 To lerne love-daunces, sprynges,
 Reyes, and these straunge thynges.
 Tho saugh I in an other place
 Stonden in a large space,
 Of hem that maken blody soun
1240 In trumpe, beme, and claryoun;
 For in fight and blod-shedynge
 Ys used gladly clarionynge.
 Ther herde I trumpen Messenus,
 Of whom that speketh Virgilius.
 There herde I trumpe Joab also,
 Theodomas, and other mo;
 And alle that used clarion
 In Cataloigne and Aragon,
 That in her tyme famous were
1250 To lerne, saugh I trumpe there.
 There saugh I sitte in other sees,
 Pleyinge upon sondry glees,
 Whiche that I kan not nevene,
 Moo than sterres ben in hevene,
 Of whiche I nyl as now not ryme,
 For ese of yow and los of tyme.
 For tyme ylost, this knowen ye,
 Be no way may recovered be.
 Ther saugh I pleye jugelours,
1260 Magiciens, and tregetours,
 And Phitonesses, charmeresses,
 Olde wicches, sorceresses,
 That use exorsisacions,
 And eke these fumygacions;
 And clerkes eke, which konne wel
 Al this magik naturel,
 That craftely doon her ententes
 To make, in certeyn ascendentes,
 Ymages, lo, thrugh which magik
1270 To make a man ben hool or syk.
 Ther saugh I the, quene Medea,
 And Circes eke, and Calipsa;
 Ther saugh I Hermes Ballenus,
 Limote, and eke Symon Magus.
 There saugh I, and knew hem by name,
 That by such art don men han fame.
 Ther saugh I Colle tregetour
 Upon a table of sycamour
 Pleye an uncouth thyng to telle --
1280 Y saugh him carien a wynd-melle
 Under a walsh-note shale.
 What shuld I make lenger tale
 Of alle the pepil y ther say,
 Fro hennes into domes day?
 Whan I had al this folk beholde,
 And fond me lous and nought yholde,
 And eft imused longe while
 Upon these walles of berile,
 That shoone ful lyghter than a glas
1290 And made wel more than hit was
 To semen every thing, ywis,
 As kynde thyng of Fames is,
 I gan forth romen til I fond
 The castel-yate on my ryght hond,
 Which that so wel corven was
 That never such another nas;
 And yit it was be aventure
 Iwrought, as often as be cure.
 Hyt nedeth noght yow more to tellen,
1300 To make yow to longe duellen,
 Of this yates florisshinges,
 Ne of compasses, ne of kervynges,
 Ne how they hatte in masoneries,
 As corbetz, ful of ymageries.
 But Lord, so fair yt was to shewe,
 For hit was al with gold behewe.
 But in I wente, and that anoon.
 Ther mette I cryinge many oon,
 "A larges, larges, hold up wel!
1310 God save the lady of thys pel,
 Our oune gentil lady Fame,
 And hem that wilnen to have name
 Of us!" Thus herde y crien alle,
 And faste comen out of halle
 And shoken nobles and sterlynges.
 And somme corouned were as kynges,
 With corounes wroght ful of losenges;
 And many ryban and many frenges
 Were on her clothes trewely.
1320 Thoo atte last aspyed y
 That pursevantes and heraudes,
 That crien ryche folkes laudes,
 Hyt weren alle; and every man
 Of hem, as y yow tellen can,
 Had on him throwen a vesture
 Which that men clepe a cote-armure,
 Enbrowded wonderliche ryche,
 Although they nere nought ylyche.
 But noght nyl I, so mote y thryve,
1330 Ben aboute to dyscryve
 Alle these armes that ther weren,
 That they thus on her cotes beren,
 For hyt to me were impossible;
 Men myghte make of hem a bible
 Twenty foot thykke, as y trowe.
 For certeyn, whoso koude iknowe
 Myghte ther alle the armes seen
 Of famous folk that han ybeen
 In Auffrike, Europe, and Asye,
1340 Syth first began the chevalrie.
 Loo, how shulde I now telle al thys?
 Ne of the halle eke what nede is
 To tellen yow that every wal
 Of hit, and flor, and roof, and al
 Was plated half a foote thikke
 Of gold, and that nas nothyng wikke,
 But for to prove in alle wyse,
 As fyn as ducat in Venyse,
 Of which to lite al in my pouche is.
1350 And they were set as thik of nouchis
 Ful of the fynest stones faire
 That men rede in the Lapidaire,
 As grasses growen in a mede.
 But hit were al to longe to rede
 The names, and therfore I pace.
 But in this lusty and ryche place
 That Fames halle called was,
 Ful moche prees of folk ther nas,
 Ne crowdyng for to mochil prees.
1360 But al on hye, above a dees,
 Sitte in a see imperiall,
 That mad was of a rubee all,
 Which that a carbuncle ys ycalled,
 Y saugh, perpetually ystalled,
 A femynyne creature,
 That never formed by Nature
 Nas such another thing yseye.
 For alther-first, soth for to seye,
 Me thoughte that she was so lyte
1370 That the lengthe of a cubite
 Was lengere than she semed be.
 But thus sone in a whyle she
 Hir tho so wonderliche streighte
 That with hir fet she erthe reighte,
 And with hir hed she touched hevene,
 Ther as shynen sterres sevene,
 And therto eke, as to my wit,
 I saugh a gretter wonder yit,
 Upon her eyen to beholde;
1380 But certeyn y hem never tolde,
 For as feele eyen hadde she
 As fetheres upon foules be,
 Or weren on the bestes foure
 That Goddis trone gunne honoure,
 As John writ in th' Apocalips.
 Hir heer, that oundy was and crips,
 As burned gold hyt shoon to see;
 And soth to tellen, also she
 Had also fele upstondyng eres
1390 And tonges, as on bestes heres;
 And on hir fet woxen saugh Y
 Partriches wynges redely.
 But Lord, the perry and the richesse
 I saugh sittyng on this godesse!
 And Lord, the hevenyssh melodye
 Of songes ful of armonye
 I herde aboute her trone ysonge,
 That al the paleys-walles ronge.
 So song the myghty Muse, she
1400 That cleped ys Caliope,
 And hir eighte sustren eke,
 That in her face semen meke;
 And ever mo, eternally,
 They songe of Fame, as thoo herd y:
 "Heryed be thou and thy name,
 Goddesse of Renoun or of Fame!"
 Tho was I war, loo, atte laste,
 As I myne eyen gan up caste,
 That thys ylke noble quene
1410 On her shuldres gan sustene
 Bothe th' armes and the name
 Of thoo that hadde large fame:
 Alexander and Hercules,
 That with a sherte hys lyf les.
 And thus fond y syttynge this goddesse
 In nobley, honour, and rychesse;
 Of which I stynte a while now,
 Other thing to tellen yow.
 Tho saugh I stonde on eyther syde,
1420 Streight doun to the dores wide,
 Fro the dees, many a peler
 Of metal that shoon not ful cler;
 But though they nere of no rychesse,
 Yet they were mad for gret noblesse,
 And in hem hy and gret sentence;
 And folk of digne reverence,
 Of which I wil yow telle fonde,
 Upon the piler saugh I stonde.
 Alderfirst, loo, ther I sigh
1430 Upon a piler stonde on high,
 That was of led and yren fyn,
 Hym of secte saturnyn,
 The Ebrayk Josephus the olde,
 That of Jewes gestes tolde;
 And he bar on hys shuldres hye
 The fame up of the Jewerye.
 And by hym stoden other sevene,
 Wise and worthy for to nevene,
 To helpen him bere up the charge,
1440 Hyt was so hevy and so large.
 And for they writen of batayles,
 As wel as other olde mervayles,
 Therfor was, loo, thys piler
 Of which that I yow telle her,
 Of led and yren bothe, ywys,
 For yren Martes metal ys,
 Which that god is of bataylle;
 And the led, withouten faille,
 Ys, loo, the metal of Saturne,
1450 That hath a ful large whel to turne.
 Thoo stoden forth on every rowe
 Of hem which that I koude knowe,
 Though I hem noght be ordre telle,
 To make yow to longe to duelle,
 These of whiche I gynne rede.
 There saugh I stonden, out of drede,
 Upon an yren piler strong
 That peynted was al endelong
 With tigres blod in every place,
1460 The Tholosan that highte Stace,
 That bar of Thebes up the fame
 Upon his shuldres, and the name
 Also of cruel Achilles.
 And by him stood, withouten les,
 Ful wonder hy on a piler
 Of yren, he, the gret Omer;
 And with him Dares and Tytus
 Before, and eke he Lollius,
 And Guydo eke de Columpnis,
1470 And Englyssh Gaufride eke, ywis;
 And ech of these, as have I joye,
 Was besy for to bere up Troye.
 So hevy therof was the fame
 That for to bere hyt was no game.
 But yet I gan ful wel espie,
 Betwex hem was a litil envye.
 Oon seyde that Omer made lyes,
 Feynynge in hys poetries,
 And was to Grekes favorable;
1480 Therfor held he hyt but fable.
 Tho saugh I stonde on a piler,
 That was of tynned yren cler,
 The Latyn poete Virgile,
 That bore hath up a longe while
 The fame of Pius Eneas.
 And next hym on a piler was,
 Of coper, Venus clerk Ovide,
 That hath ysowen wonder wide
 The grete god of Loves name.
1490 And ther he bar up wel hys fame
 Upon this piler, also hye
 As I myghte see hyt with myn ye;
 For-why this halle, of which I rede,
 Was woxen on highte, length, and brede,
 Wel more be a thousand del
 Than hyt was erst, that saugh I wel.
 Thoo saugh I on a piler by,
 Of yren wroght ful sternely,
 The grete poete daun Lucan,
1500 And on hys shuldres bar up than,
 As high as that y myghte see,
 The fame of Julius and Pompe.
 And by him stoden alle these clerkes
 That writen of Romes myghty werkes,
 That yf y wolde her names telle,
 Al to longe most I dwelle.
 And next him on a piler stood
 Of soulfre, lyk as he were wood,
 Daun Claudian, the sothe to telle,
1510 That bar up al the fame of helle,
 Of Pluto, and of Proserpyne,
 That quene ys of the derke pyne.
 What shulde y more telle of this?
 The halle was al ful, ywys,
 Of hem that writen olde gestes
 As ben on trees rokes nestes;
 But hit a ful confus matere
 Were alle the gestes for to here
 That they of write, or how they highte.
1520 But while that y beheld thys syghte,
 I herde a noyse aprochen blyve,
 That ferde as been don in an hive
 Ayen her tyme of out-fleynge;
 Ryght such a maner murmurynge,
 For al the world, hyt semed me.
 Tho gan I loke aboute and see
 That ther come entryng into the halle
 A ryght gret companye withalle,
 And that of sondry regiouns,
1530 Of alleskynnes condiciouns
 That dwelle in erthe under the mone,
 Pore and ryche. And also sone
 As they were come in to the halle,
 They gonne doun on knees falle
 Before this ilke noble quene,
 And seyde, "Graunte us, lady shene,
 Ech of us of thy grace a bone!"
 And somme of hem she graunted sone,
 And somme she werned wel and faire,
1540 And some she graunted the contraire
 Of her axyng outterly.
 But thus I seye yow, trewely,
 What her cause was, y nyste.
 For of this folk ful wel y wiste
 They hadde good fame ech deserved,
 Although they were dyversly served;
 Ryght as her suster, dame Fortune,
 Ys wont to serven in comune.
 Now herke how she gan to paye
1550 That gonne her of her grace praye;
 And yit, lo, al this companye
 Seyden sooth, and noght a lye.
 "Madame," seyde they, "we be
 Folk that here besechen the
 That thou graunte us now good fame,
 And let our werkes han that name.
 In ful recompensacioun
 Of good werkes, yive us good renoun."
 "I werne yow hit," quod she anon;
1560 "Ye gete of me good fame non,
 Be God, and therfore goo your wey."
 "Allas," quod they, "and welaway!
 Telle us what may your cause be."
 "For me lyst hyt noght," quod she;
 "No wyght shal speke of yow, ywis,
 Good ne harm, ne that ne this."
 And with that word she gan to calle
 Her messager, that was in halle,
 And bad that he shulde faste goon,
1570 Upon peyne to be blynd anon,
 For Eolus the god of wynde --
 "In Trace, ther ye shal him fynde,
 And bid him bringe his clarioun,
 That is ful dyvers of his soun,
 And hyt is cleped Clere Laude,
 With which he wont is to heraude
 Hem that me list ypreised be.
 And also bid him how that he
 Brynge his other clarioun,
1580 That highte Sklaundre in every toun,
 With which he wont is to diffame
 Hem that me liste, and do hem shame."
 This messager gan faste goon,
 And found where in a cave of ston,
 In a contree that highte Trace,
 This Eolus, with harde grace,
 Held the wyndes in distresse,
 And gan hem under him to presse,
 That they gonne as beres rore,
1590 He bond and pressed hem so sore.
 This messager gan faste crie,
 "Rys up," quod he, "and faste hye,
 Til thou at my lady be;
 And tak thy clariouns eke with the,
 And sped the forth." And he anon
 Tok to a man that highte Triton
 Hys clarions to bere thoo,
 And let a certeyn wynd to goo,
 That blew so hydously and hye
1600 That hyt ne lefte not a skye
 In alle the welken long and brod.
 This Eolus nowhere abod
 Til he was come to Fames fet,
 And eke the man that Triton het;
 And ther he stod, as stille as stoon.
 And her-withal ther come anoon
 Another huge companye
 Of goode folk, and gunne crie,
 "Lady, graunte us now good fame,
1610 And lat oure werkes han that name
 Now in honour of gentilesse,
 And also God your soule blesse!
 For we han wel deserved hyt,
 Therfore is ryght that we ben quyt."
 "As thryve I," quod she, "ye shal faylle!
 Good werkes shal yow noght availle
 To have of me good fame as now.
 But wite ye what? Y graunte yow
 That ye shal have a shrewed fame,
1620 And wikkyd loos, and worse name,
 Though ye good loos have wel deserved.
 Now goo your wey, for ye be served.
 And thou, dan Eolus, let see,
 Tak forth thy trumpe anon," quod she,
 "That is ycleped Sklaundre lyght,
 And blow her loos, that every wight
 Speke of hem harm and shrewednesse
 In stede of good and worthynesse.
 For thou shalt trumpe alle the contrayre
1630 Of that they han don wel or fayre."
 "Allas," thoughte I, "what aventures
 Han these sory creatures!
 For they, amonges al the pres,
 Shul thus be shamed gilteles.
 But what, hyt moste nedes be."
 What dide this Eolus, but he
 Tok out hys blake trumpe of bras,
 That fouler than the devel was,
 And gan this trumpe for to blowe,
1640 As al the world shulde overthrowe,
 That thrughout every regioun
 Wente this foule trumpes soun,
 As swifte as pelet out of gonne
 Whan fyr is in the poudre ronne.
 And such a smoke gan out wende
 Out of his foule trumpes ende,
 Blak, bloo, grenyssh, swartish red,
 As doth where that men melte led,
 Loo, al on high fro the tuel.
1650 And therto oo thing saugh I wel,
 That the ferther that hit ran,
 The gretter wexen hit began,
 As dooth the ryver from a welle,
 And hyt stank as the pit of helle.
 Allas, thus was her shame yronge,
 And gilteles, on every tonge!
 Tho come the thridde companye,
 And gunne up to the dees to hye,
 And doun on knes they fille anon,
1660 And seyde, "We ben everychon
 Folk that han ful trewely
 Deserved fame ryghtfully,
 And praye yow, hit mote be knowe
 Ryght as hit is, and forth yblowe."
 "I graunte," quod she, "for me list
 That now your goode werkes be wist,
 And yet ye shul han better loos,
 Right in dispit of alle your foos,
 Than worthy is, and that anoon.
1670 Lat now," quod she, "thy trumpe goon,
 Thou Eolus, that is so blak;
 And out thyn other trumpe tak
 That highte Laude, and blow yt soo
 That thrugh the world her fame goo
 Al esely, and not to faste,
 That hyt be knowen atte laste."
 "Ful gladly, lady myn," he seyde;
 And out hys trumpe of gold he brayde
 Anon, and sette hyt to his mouth,
1680 And blew it est, and west, and south,
 And north, as lowde as any thunder,
 That every wight hath of hit wonder,
 So brode hyt ran or than hit stente.
 And, certes, al the breth that wente
 Out of his trumpes mouth it smelde
 As men a pot of bawme helde
 Among a basket ful of roses.
 This favour dide he til her loses.
 And ryght with this y gan aspye,
1690 Ther come the ferthe companye --
 But certeyn they were wonder fewe --
 And gunne stonden in a rewe,
 And seyden, "Certes, lady bryght,
 We han don wel with al our myght,
 But we ne kepen have no fame.
 Hyde our werkes and our name,
 For Goddys love; for certes we
 Han certeyn doon hyt for bounte,
 And for no maner other thing."
1700 "I graunte yow alle your askyng,"
 Quod she; "let your werkes be ded."
 With that aboute y clew myn hed,
 And saugh anoon the fifte route
 That to this lady gunne loute,
 And doun on knes anoon to falle;
 And to hir thoo besoughten alle
 To hide her goode werkes ek,
 And seyden they yeven noght a lek
 For fame ne for such renoun;
1710 For they for contemplacioun
 And Goddes love hadde ywrought,
 Ne of fame wolde they nought.
 "What?" quod she, "and be ye wood?
 And wene ye for to doo good,
 And for to have of that no fame?
 Have ye dispit to have my name?
 Nay, ye shul lyven everychon!
 Blow thy trumpes, and that anon,"
 Quod she, "thou Eolus, y hote,
1720 And ryng this folkes werk be note,
 That al the world may of hyt here."
 And he gan blowe her loos so clere
 In his golden clarioun
 That thrugh the world wente the soun
 Also kenely and eke so softe;
 But atte last hyt was on-lofte.
 Thoo come the sexte companye,
 And gunne faste on Fame crie.
 Ryght verraily in this manere
1730 They seyden: "Mercy, lady dere!
 To tellen certeyn as hyt is,
 We han don neither that ne this,
 But ydel al oure lyf ybe.
 But natheles yet preye we
 That we mowe han as good a fame,
 And gret renoun and knowen name,
 As they that han doon noble gestes,
 And acheved alle her lestes,
 As wel of love as other thyng.
1740 Al was us never broche ne ryng,
 Ne elles noght, from wymmen sent,
 Ne ones in her herte yment
 To make us oonly frendly chere,
 But myghten temen us upon bere;
 Yet lat us to the peple seme
 Suche as the world may of us deme
 That wommen loven us for wod.
 Hyt shal doon us as moche good,
 And to oure herte as moche avaylle
1750 To countrepese ese and travaylle,
 As we had wonne hyt with labour;
 For that is dere boght honour
 At regard of oure grete ese.
 And yet thou most us more plese:
 Let us be holden eke therto
 Worthy, wise, and goode also,
 And riche, and happy unto love.
 For Goddes love, that sit above,
 Thogh we may not the body have
1760 Of wymmen, yet, so God yow save,
 Leet men gliwe on us the name --
 Sufficeth that we han the fame."
 "I graunte," quod she, "be my trouthe!
 Now, Eolus, withouten slouthe,
 Tak out thy trumpe of gold, let se,
 And blow as they han axed me,
 That every man wene hem at ese,
 Though they goon in ful badde lese."
 This Eolus gan hit so blowe
1770 That thrugh the world hyt was yknowe.
 Thoo come the seventh route anoon,
 And fel on knees everychoon,
 And seyde, "Lady, graunte us sone
 The same thing, the same bone,
 That [ye] this nexte folk han doon."
 "Fy on yow," quod she, "everychon!
 Ye masty swyn, ye ydel wrechches,
 Ful of roten, slowe techches!
 What? False theves! Wher ye wolde
1780 Be famous good, and nothing nolde
 Deserve why, ne never ye roughte?
 Men rather yow to hangen oughte!
 For ye be lyke the sweynte cat
 That wolde have fissh; but wostow what?
 He wolde nothing wete his clowes.
 Yvel thrift come to your jowes,
 And eke to myn, if I hit graunte,
 Or do yow favour, yow to avaunte!
 Thou Eolus, thou kyng of Trace,
1790 Goo blowe this folk a sory grace,"
 Quod she, "anon; and wostow how?
 As I shal telle thee ryght now.
 Sey: `These ben they that wolde honour
 Have, and do noskynnes labour,
 Ne doo no good, and yet han lawde;
 And that men wende that bele Isawde
 Ne coude hem noght of love werne,
 And yet she that grynt at a querne
 Ys al to good to ese her herte.'"
1800 This Eolus anon up sterte,
 And with his blake clarioun
 He gan to blasen out a soun
 As lowde as beloweth wynd in helle;
 And eke therwith, soth to telle,
 This soun was so ful of japes,
 As ever mowes were in apes.
 And that wente al the world aboute,
 That every wight gan on hem shoute
 And for to lawghe as they were wod,
1810 Such game fonde they in her hod.
 Tho come another companye,
 That had ydoon the trayterye,
 The harm, the grettest wikkednesse
 That any herte kouth. gesse;
 And prayed her to han good fame,
 And that she nolde doon hem no shame,
 But yeve hem loos and good renoun,
 And do hyt blowe in a clarioun.
 "Nay, wis," quod she, "hyt were a vice.
1820 Al be ther in me no justice,
 Me lyste not to doo hyt now,
 Ne this nyl I not graunte yow."
 Tho come ther lepynge in a route,
 And gunne choppen al aboute
 Every man upon the crowne,
 That al the halle gan to sowne,
 And seyden: "Lady, leef and dere,
 We ben suche folk as ye mowe here.
 To tellen al the tale aryght,
1830 We ben shrewes, every wyght,
 And han delyt in wikkednesse,
 As goode folk han in godnesse;
 And joye to be knowen shrewes,
 And ful of vice and wikked thewes;
 Wherefore we praye yow, a-rowe,
 That oure fame such be knowe
 In alle thing ryght as hit ys."
 "Y graunte hyt yow," quod she, "ywis.
 But what art thow that seyst this tale,
1840 That werest on thy hose a pale,
 And on thy tipet such a belle?"
 "Madame," quod he, "soth to telle,
 I am that ylke shrewe, ywis,
 That brende the temple of Ysidis
 In Athenes, loo, that citee."
 "And wherfor didest thou so?" quod she.
 "By my thrift," quod he, "madame,
 I wolde fayn han had a fame,
 As other folk hadde in the toun,
1850 Although they were of gret renoun
 For her vertu and for her thewes.
 Thoughte y, as gret a fame han shrewes,
 Though hit be for shrewednesse,
 As goode folk han for godnesse;
 And sith y may not have that oon,
 That other nyl y noght forgoon.
 And for to gette of Fames hire,
 The temple sette y al afire.
 Now do our loos be blowen swithe,
1860 As wisly be thou ever blythe!"
 "Gladly," quod she; "thow Eolus,
 Herestow not what they prayen us?"
 "Madame, yis, ful wel," quod he,
 "And I wil trumpen it, parde!"
 And tok his blake trumpe faste,
 And gan to puffen and to blaste,
 Til hyt was at the worldes ende.
 With that y gan aboute wende,
 For oon that stood ryght at my bak,
1870 Me thoughte, goodly to me spak,
 And seyde, "Frend, what is thy name?
 Artow come hider to han fame?"
 "Nay, for sothe, frend," quod y;
 "I cam noght hyder, graunt mercy,
 For no such cause, by my hed!
 Sufficeth me, as I were ded,
 That no wight have my name in honde.
 I wot myself best how y stonde;
 For what I drye, or what I thynke,
1880 I wil myselven al hyt drynke,
 Certeyn, for the more part,
 As fer forth as I kan myn art."
 "But what doost thou here than?" quod he.
 Quod y, "That wyl y tellen the,
 The cause why y stonde here:
 Somme newe tydynges for to lere,
 Somme newe thinges, y not what,
 Tydynges, other this or that,
 Of love or suche thynges glade.
1890 For certeynly, he that me made
 To comen hyder, seyde me,
 Y shulde bothe here and se
 In this place wonder thynges;
 But these be no suche tydynges
 As I mene of." "Noo?" quod he.
 And I answered, "Noo, parde!
 For wel y wiste ever yit,
 Sith that first y hadde wit,
 That somme folk han desired fame
1900 Diversly, and loos, and name.
 But certeynly, y nyste how
 Ne where that Fame duelled, er now,
 And eke of her descripcioun,
 Ne also her condicioun,
 Ne the ordre of her dom,
 Unto the tyme y hidder com."
 "[Whych] than be, loo, these tydynges,
 That thou now [thus] hider brynges,
 That thou hast herd?" quod he to me;
1910 "But now no fors, for wel y se
 What thou desirest for to here.
 Com forth and stond no lenger here,
 And y wil thee, withouten drede,
 In such another place lede
 Ther thou shalt here many oon."
 Tho gan I forth with hym to goon
 Out of the castel, soth to seye.
 Tho saugh y stonde in a valeye,
 Under the castel, faste by,
1920 An hous, that Domus Dedaly,
 That Laboryntus cleped ys,
 Nas mad so wonderlych, ywis,
 Ne half so queyntelych ywrought.
 And ever mo, as swyft as thought,
 This queynte hous aboute wente,
 That never mo hyt stille stente.
 And therout com so gret a noyse
 That, had hyt stonden upon Oyse,
 Men myghte hyt han herd esely
1930 To Rome, y trowe sikerly.
 And the noyse which that I herde,
 For al the world ryght so hyt ferde
 As dooth the rowtynge of the ston
 That from th' engyn ys leten gon.
 And al thys hous of which y rede
 Was mad of twigges, falwe, rede,
 And grene eke, and somme weren white,
 Swiche as men to these cages thwite,
 Or maken of these panyers,
1940 Or elles [hottes] or dossers;
 That, for the swough and for the twygges,
 This hous was also ful of gygges,
 And also ful eke of chirkynges,
 And of many other werkynges;
 And eke this hous hath of entrees
 As fele as of leves ben in trees
 In somer, whan they grene been;
 And on the roof men may yet seen
 A thousand holes, and wel moo,
1950 To leten wel the soun out goo.
 And be day, in every tyde,
 Been al the dores opened wide,
 And be nyght echon unshette;
 Ne porter ther is noon to lette
 No maner tydynges in to pace.
 Ne never rest is in that place
 That hit nys fild ful of tydynges,
 Other loude or of whisprynges;
 And over alle the houses angles
1960 Ys ful of rounynges and of jangles
 Of werres, of pes, of mariages,
 Of reste, of labour, of viages,
 Of abood, of deeth, of lyf,
 Of love, of hate, acord, of stryf,
 Of loos, of lore, and of wynnynges,
 Of hele, of seknesse, of bildynges,
 Of faire wyndes, and of tempestes,
 Of qwalm of folk, and eke of bestes;
 Of dyvers transmutacions
1970 Of estats, and eke of regions;
 Of trust, of drede, of jelousye,
 Of wit, of wynnynge, of folye;
 Of plente, and of gret famyne,
 Of chepe, of derthe, and of ruyne;
 Of good or mys governement,
 Of fyr, and of dyvers accident.
 And loo, thys hous, of which I write,
 Syker be ye, hit nas not lyte,
 For hyt was sixty myle of lengthe.
1980 Al was the tymber of no strengthe,
 Yet hit is founded to endure
 While that hit lyst to Aventure,
 That is the moder of tydynges,
 As the see of welles and of sprynges;
 And hyt was shapen lyk a cage.
 "Certys," quod y, "in al myn age,
 Ne saugh y such an hous as this."
 And as y wondred me, ywys,
 Upon this hous, tho war was y
1990 How that myn egle faste by
 Was perched hye upon a stoon;
 And I gan streghte to hym gon,
 And seyde thus: "Y preye the
 That thou a while abide me,
 For Goddis love, and lete me seen
 What wondres in this place been;
 For yit, paraunter, y may lere
 Som good theron, or sumwhat here
 That leef me were, or that y wente."
2000 "Petre, that is myn entente,"
 Quod he to me; "therfore y duelle.
 But certeyn, oon thyng I the telle,
 That but I bringe the therinne,
 Ne shalt thou never kunne gynne
 To come into hyt, out of doute,
 So faste hit whirleth, lo, aboute.
 But sith that Joves, of his grace,
 As I have seyd, wol the solace
 Fynally with these thinges,
2010 Unkouthe syghtes and tydynges,
 To passe with thyn hevynesse,
 Such routhe hath he of thy distresse,
 That thou suffrest debonairly --
 And wost thyselven outtirly
 Disesperat of alle blys,
 Syth that Fortune hath mad amys
 The [fruit] of al thyn hertys reste
 Languisshe and eke in poynt to breste --
 That he, thrugh hys myghty merite,
2020 Wol do the an ese, al be hyt lyte,
 And yaf in expres commaundement,
 To which I am obedient,
 To further the with al my myght,
 And wisse and teche the aryght
 Where thou maist most tidynges here.
 Shaltow here anoon many oon lere."
 With this word he ryght anoon
 Hente me up bytweene hys toon,
 And at a wyndowe yn me broghte,
2030 That in this hous was, as me thoghte --
 And therwithalle, me thoughte hit stente,
 And nothing hyt aboute wente --
 And me sette in the flor adoun.
 But which a congregacioun
 Of folk, as I saugh rome aboute,
 Some wythin and some wythoute,
 Nas never seen, ne shal ben eft;
 That, certys, in the world nys left
 So many formed be Nature,
2040 Ne ded so many a creature;
 That wel unnethe in that place
 Hadde y a fote-brede of space.
 And every wight that I saugh there
 Rouned everych in others ere
 A newe tydynge prively,
 Or elles tolde al openly
 Ryght thus, and seyde: "Nost not thou
 That ys betyd, lo, late or now?"
 "No," quod he, "telle me what."
2050 And than he tolde hym this and that,
 And swor therto that hit was soth --
 "Thus hath he sayd," and "Thus he doth,"
 "Thus shal hit be," "Thus herde y seye,"
 "That shal be founde," "That dar I leye" --
 That al the folk that ys alyve
 Ne han the kunnynge to discryve
 The thinges that I herde there,
 What aloude, and what in ere.
 But al the wondermost was this:
2060 Whan oon had herd a thing, ywis,
 He com forth ryght to another wight,
 And gan him tellen anon-ryght
 The same that to him was told,
 Or hyt a forlong way was old,
 But gan somwhat for to eche
 To this tydynge in this speche
 More than hit ever was.
 And nat so sone departed nas
 Tho fro him, that he ne mette
2070 With the thridde; and or he lette
 Any stounde, he told him als;
 Were the tydynge soth or fals,
 Yit wolde he telle hyt natheles,
 And evermo with more encres
 Than yt was erst. Thus north and south
 Wente every tydyng fro mouth to mouth,
 And that encresing ever moo,
 As fyr ys wont to quyke and goo
 From a sparke spronge amys,
2080 Til al a citee brent up ys.
 And whan that was ful yspronge,
 And woxen more on every tonge
 Than ever hit was, [hit] wente anoon
 Up to a wyndowe out to goon;
 Or, but hit myghte out there pace,
 Hyt gan out crepe at som crevace,
 And flygh forth faste for the nones.
 And somtyme saugh I thoo at ones
 A lesyng and a sad soth sawe,
2090 That gonne of aventure drawe
 Out at a wyndowe for to pace;
 And, when they metten in that place,
 They were achekked bothe two,
 And neyther of hem moste out goo
 For other, so they gonne crowde,
 Til ech of hem gan crien lowde,
 "Lat me go first!" "Nay, but let me!
 And here I wol ensuren the,
 Wyth the nones that thou wolt do so,
2100 That I shal never fro the go,
 But be thyn owne sworen brother!
 We wil medle us ech with other,
 That no man, be they never so wrothe,
 Shal han on [of us] two, but bothe
 At ones, al besyde his leve,
 Come we a-morwe or on eve,
 Be we cried or stille yrouned."
 Thus saugh I fals and soth compouned
 Togeder fle for oo tydynge.
2110 Thus out at holes gunne wringe
 Every tydynge streght to Fame,
 And she gan yeven ech hys name,
 After hir disposicioun,
 And yaf hem eke duracioun,
 Somme to wexe and wane sone,
 As doth the faire white mone,
 And let hem goon. Ther myghte y seen
 Wynged wondres faste fleen,
 Twenty thousand in a route,
2120 As Eolus hem blew aboute.
 And, Lord, this hous in alle tymes
 Was ful of shipmen and pilgrimes,
 With scrippes bret-ful of lesinges,
 Entremedled with tydynges,
 And eek allone be hemselve.
 O, many a thousand tymes twelve
 Saugh I eke of these pardoners,
 Currours, and eke messagers,
 With boystes crammed ful of lyes
2130 As ever vessel was with lyes.
 And as I alther-fastest wente
 About, and dide al myn entente
 Me for to pleyen and for to lere,
 And eke a tydynge for to here,
 That I had herd of som contre
 That shal not now be told for me --
 For hit no nede is, redely;
 Folk kan synge hit bet than I;
 For al mot out, other late or rathe,
2140 Alle the sheves in the lathe --
 I herde a gret noyse withalle
 In a corner of the halle,
 Ther men of love-tydynges tolde,
 And I gan thiderward beholde;
 For I saugh rennynge every wight
 As faste as that they hadden myght,
 And everych cried, "What thing is that?"
 And somme sayde, "I not never what."
 And whan they were alle on an hepe,
2150 Tho behynde begunne up lepe,
 And clamben up on other faste,
 And up the nose and yen kaste,
 And troden fast on others heles,
 And stampen, as men doon aftir eles.
 Atte laste y saugh a man,
 Which that y [nevene] nat ne kan;
 But he semed for to be
 A man of gret auctorite. . . .