1 Chronicles (1 Divrey Yamim) Chapter 5

‎1 ‏וּבְנֵ֨י רְאוּבֵ֥ן בְּכֽוֹר־יִשְׂרָאֵל֮ כִּ֣י ה֣וּא הַבְּכוֹר֒ וּֽבְחַלְּלוֹ֙ יְצוּעֵ֣י אָבִ֔יו נִתְּנָה֙ בְּכֹ֣רָת֔וֹ לִבְנֵ֥י יוֹסֵ֖ף בֶּן־יִשְׂרָאֵ֑ל וְלֹ֥א לְהִתְיַחֵ֖שׂ לַבְּכֹרָֽה׃

‎2 ‏כִּ֤י יְהוּדָה֙ גָּבַ֣ר בְּאֶחָ֔יו וּלְנָגִ֖יד מִמֶּ֑נּוּ וְהַבְּכֹרָ֖ה לְיוֹסֵֽף׃ ס

‎3 ‏בְּנֵ֥י רְאוּבֵ֖ן בְּכ֣וֹר יִשְׂרָאֵ֑ל חֲנ֥וֹךְ וּפַלּ֖וּא חֶצְר֥וֹן וְכַרְמִֽי׃

‎4 ‏בְּנֵ֖י יוֹאֵ֑ל שְׁמַֽעְיָ֥ה בְנ֛וֹ גּ֥וֹג בְּנ֖וֹ שִׁמְעִ֥י בְנֽוֹ׃

‎5 ‏מִיכָ֥ה בְנ֛וֹ רְאָיָ֥ה בְנ֖וֹ בַּ֥עַל בְּנֽוֹ׃

‎6 ‏בְּאֵרָ֣ה בְנ֔וֹ אֲשֶׁ֣ר הֶגְלָ֔ה תִּלְּגַ֥ת פִּלְנְאֶ֖סֶר מֶ֣לֶךְ אַשֻּׁ֑ר ה֥וּא נָשִׂ֖יא לָרֽאוּבֵנִֽי׃

‎7 ‏וְאֶחָיו֙ לְמִשְׁפְּחֹתָ֔יו בְּהִתְיַחֵ֖שׂ לְתֹלְדוֹתָ֑ם הָרֹ֥אשׁ יְעִיאֵ֖ל וּזְכַרְיָֽהוּ׃

‎8 ‏וּבֶ֙לַע֙ בֶּן־עָזָ֔ז בֶּן־שֶׁ֖מַע בֶּן־יוֹאֵ֑ל ה֚וּא יוֹשֵׁ֣ב בַּעֲרֹעֵ֔ר וְעַד־נְב֖וֹ וּבַ֥עַל מְעֽוֹן׃

‎9 ‏וְלַמִּזְרָ֗ח יָשַׁב֙ עַד־לְב֣וֹא מִדְבָּ֔רָה לְמִן־הַנָּהָ֖ר פְּרָ֑ת כִּ֧י מִקְנֵיהֶ֛ם רָב֖וּ בְּאֶ֥רֶץ גִּלְעָֽד׃

‎10 ‏וּבִימֵ֣י שָׁא֗וּל עָשׂ֤וּ מִלְחָמָה֙ עִם־הַֽהַגְרִאִ֔ים וַֽיִּפְּל֖וּ בְּיָדָ֑ם וַיֵּשְׁבוּ֙ בְּאָ֣הֳלֵיהֶ֔ם עַֽל־כָּל־פְּנֵ֖י מִזְרָ֥ח לַגִּלְעָֽד׃ פ

‎11 ‏וּבְנֵי־גָ֣ד לְנֶגְדָּ֗ם יָֽשְׁב֛וּ בְּאֶ֥רֶץ הַבָּשָׁ֖ן עַד־סַלְכָֽה׃

‎12 ‏יוֹאֵ֣ל הָרֹ֔אשׁ וְשָׁפָ֖ם הַמִּשְׁנֶ֑ה וְיַעְנַ֥י וְשָׁפָ֖ט בַּבָּשָֽׁן׃

‎13 ‏וַאֲחֵיהֶ֞ם לְבֵ֣ית אֲבוֹתֵיהֶ֗ם מִֽיכָאֵ֡ל וּמְשֻׁלָּ֡ם וְ֠שֶׁבַע וְיוֹרַ֧י וְיַעְכָּ֛ן וְזִ֥יעַ וָעֵ֖בֶר שִׁבְעָֽה׃ ס

‎14 ‏אֵ֣לֶּה׀ בְּנֵ֣י אֲבִיחַ֗יִל בֶּן־חוּרִ֡י בֶּן־יָ֠רוֹחַ בֶּן־גִּלְעָ֧ד בֶּן־מִיכָאֵ֛ל בֶּן־יְשִׁישַׁ֥י בֶּן־יַחְדּ֖וֹ בֶּן־בּֽוּז׃

‎15 ‏אֲחִי֙ בֶּן־עַבְדִּיאֵ֣ל בֶּן־גּוּנִ֔י רֹ֖אשׁ לְבֵ֥ית אֲבוֹתָֽם׃

‎16 ‏וַיֵּֽשְׁב֛וּ בַּגִּלְעָ֥ד בַּבָּשָׁ֖ן וּבִבְנֹתֶ֑יהָ וּבְכָֽל־מִגְרְשֵׁ֥י שָׁר֖וֹן עַל־תּוֹצְאוֹתָֽם׃

‎17 ‏כֻּלָּם֙ הִתְיַחְשׂ֔וּ בִּימֵ֖י יוֹתָ֣ם מֶֽלֶךְ־יְהוּדָ֑ה וּבִימֵ֖י יָרָבְעָ֥ם מֶֽלֶךְ־יִשְׂרָאֵֽל׃ פ

‎18 ‏בְּנֵֽי־רְאוּבֵ֨ן וְגָדִ֜י וַחֲצִ֥י שֵֽׁבֶט־מְנַשֶּׁה֮ מִן־בְּנֵי־חַיִל֒ אֲ֠נָשִׁים נֹשְׂאֵ֨י מָגֵ֤ן וְחֶ֙רֶב֙ וְדֹ֣רְכֵי קֶ֔שֶׁת וּלְמוּדֵ֖י מִלְחָמָ֑ה אַרְבָּעִ֨ים וְאַרְבָּעָ֥ה אֶ֛לֶף וּשְׁבַע־מֵא֥וֹת וְשִׁשִּׁ֖ים יֹצְאֵ֥י צָבָֽא׃

‎19 ‏וַיַּעֲשׂ֥וּ מִלְחָמָ֖ה עִם־הַֽהַגְרִיאִ֑ים וִיט֥וּר וְנָפִ֖ישׁ וְנוֹדָֽב׃

‎20 ‏וַיֵּעָזְר֣וּ עֲלֵיהֶ֔ם וַיִּנָּתְנ֤וּ בְיָדָם֙ הַֽהַגְרִיאִ֔ים וְכֹ֖ל שֶׁ֣עִמָּהֶ֑ם כִּ֠י לֵאלֹהִ֤ים זָעֲקוּ֙ בַּמִּלְחָמָ֔ה וְנַעְתּ֥וֹר לָהֶ֖ם כִּי־בָ֥טְחוּ בֽוֹ׃

‎21 ‏וַיִּשְׁבּ֣וּ מִקְנֵיהֶ֗ם גְּֽמַלֵּיהֶ֞ם חֲמִשִּׁ֥ים אֶ֙לֶף֙ וְצֹ֗אן מָאתַ֤יִם וַחֲמִשִּׁים֙ אֶ֔לֶף וַחֲמוֹרִ֖ים אַלְפָּ֑יִם וְנֶ֥פֶשׁ אָדָ֖ם מֵ֥אָה אָֽלֶף׃

‎22 ‏כִּֽי־חֲלָלִ֤ים רַבִּים֙ נָפָ֔לוּ כִּ֥י מֵהָאֱלֹהִ֖ים הַמִּלְחָמָ֑ה וַיֵּשְׁב֥וּ תַחְתֵּיהֶ֖ם עַד־הַגֹּלָֽה׃ פ

‎23 ‏וּבְנֵ֗י חֲצִי֙ שֵׁ֣בֶט מְנַשֶּׁ֔ה יָשְׁב֖וּ בָּאָ֑רֶץ מִבָּשָׁ֞ן עַד־בַּ֧עַל חֶרְמ֛וֹן וּשְׂנִ֥יר וְהַר־חֶרְמ֖וֹן הֵ֥מָּה רָבֽוּ׃

‎24 ‏וְאֵ֖לֶּה רָאשֵׁ֣י בֵית־אֲבוֹתָ֑ם וְעֵ֡פֶר וְיִשְׁעִ֡י וֶאֱלִיאֵ֡ל וְ֠עַזְרִיאֵל וְיִרְמְיָ֨ה וְהוֹדַוְיָ֜ה וְיַחְדִּיאֵ֗ל אֲנָשִׁים֙ גִּבּ֣וֹרֵי חַ֔יִל אַנְשֵׁ֣י שֵׁמ֔וֹת רָאשִׁ֖ים לְבֵ֥ית אֲבוֹתָֽם׃

‎25 ‏וַיִּֽמְעֲל֔וּ בֵּאלֹהֵ֖י אֲבוֹתֵיהֶ֑ם וַיִּזְנ֗וּ אַחֲרֵי֙ אֱלֹהֵ֣י עַמֵּי־הָאָ֔רֶץ אֲשֶׁר־הִשְׁמִ֥יד אֱלֹהִ֖ים מִפְּנֵיהֶֽם׃

‎26 ‏וַיָּעַר֩ אֱלֹהֵ֨י יִשְׂרָאֵ֜ל אֶת־ר֣וּחַ׀ פּ֣וּל מֶֽלֶךְ־אַשּׁ֗וּר וְאֶת־ר֙וּחַ֙ תִּלְּגַ֤ת פִּלְנֶ֙סֶר֙ מֶ֣לֶךְ אַשּׁ֔וּר וַיַּגְלֵם֙ לָראוּבֵנִ֣י וְלַגָּדִ֔י וְלַחֲצִ֖י שֵׁ֣בֶט מְנַשֶּׁ֑ה וַ֠יְבִיאֵם לַחְלַ֨ח וְחָב֤וֹר וְהָרָא֙ וּנְהַ֣ר גּוֹזָ֔ן עַ֖ד הַיּ֥וֹם הַזֶּֽה׃ פ

‎27 ‏בְּנֵ֖י לֵוִ֑י גֵּרְשׁ֕וֹן קְהָ֖ת וּמְרָרִֽי׃

‎28 ‏וּבְנֵ֖י קְהָ֑ת עַמְרָ֣ם יִצְהָ֔ר וְחֶבְר֖וֹן וְעֻזִּיאֵֽל׃ ס

‎29 ‏וּבְנֵ֣י עַמְרָ֔ם אַהֲרֹ֥ן וּמֹשֶׁ֖ה וּמִרְיָ֑ם סוּבְנֵ֣י אַהֲרֹ֔ן נָדָב֙ וַאֲבִיה֔וּא אֶלְעָזָ֖ר וְאִיתָמָֽר׃ ס

‎30 ‏אֶלְעָזָר֙ הוֹלִ֣יד אֶת־פִּֽינְחָ֔ס פִּֽינְחָ֖ס הֹלִ֥יד אֶת־אֲבִישֽׁוּעַ׃

‎31 ‏וַאֲבִישׁ֙וּעַ֙ הוֹלִ֣יד אֶת־בֻּקִּ֔י וּבֻקִּ֖י הוֹלִ֥יד אֶת־עֻזִּֽי׃

‎32 ‏וְעֻזִּי֙ הוֹלִ֣יד אֶת־זְרַֽחְיָ֔ה וּֽזְרַֽחְיָ֖ה הוֹלִ֥יד אֶת־מְרָיֽוֹת׃

‎33 ‏מְרָיוֹת֙ הוֹלִ֣יד אֶת־אֲמַרְיָ֔ה וַאֲמַרְיָ֖ה הוֹלִ֥יד אֶת־אֲחִיטֽוּב׃

‎34 ‏וַאֲחִיטוּב֙ הוֹלִ֣יד אֶת־צָד֔וֹק וְצָד֖וֹק הוֹלִ֥יד אֶת־אֲחִימָֽעַץ׃

‎35 ‏וַאֲחִימַ֙עַץ֙ הוֹלִ֣יד אֶת־עֲזַרְיָ֔ה וַעֲזַרְיָ֖ה הוֹלִ֥יד אֶת־יוֹחָנָֽן׃

‎36 ‏וְיוֹחָנָ֖ן הוֹלִ֣יד אֶת־עֲזַרְיָ֑ה ה֚וּא אֲשֶׁ֣ר כִּהֵ֔ן בַּבַּ֕יִת אֲשֶׁר־בָּנָ֥ה שְׁלֹמֹ֖ה בִּירוּשָׁלִָֽם׃

‎37 ‏וַיּ֥וֹלֶד עֲזַרְיָ֖ה אֶת־אֲמַרְיָ֑ה וַאֲמַרְיָ֖ה הוֹלִ֥יד אֶת־אֲחִיטֽוּב׃

‎38 ‏וַאֲחִיטוּב֙ הוֹלִ֣יד אֶת־צָד֔וֹק וְצָד֖וֹק הוֹלִ֥יד אֶת־שַׁלּֽוּם׃

‎39 ‏וְשַׁלּוּם֙ הוֹלִ֣יד אֶת־חִלְקִיָּ֔ה וְחִלְקִיָּ֖ה הוֹלִ֥יד אֶת־עֲזַרְיָֽה׃

‎40 ‏וַעֲזַרְיָה֙ הוֹלִ֣יד אֶת־שְׂרָיָ֔ה וּשְׂרָיָ֖ה הוֹלִ֥יד אֶת־יְהוֹצָדָֽק׃

‎41 ‏וִיהוֹצָדָ֣ק הָלַ֔ךְ בְּהַגְל֣וֹת יְהוָ֔ה אֶת־יְהוּדָ֖ה וִירוּשָׁלִָ֑ם בְּיַ֖ד נְבֻכַדְנֶאצַּֽר׃ ס

1 ûḇənê rə’ûḇēn bəḵwōr-yiśərā’ēl kî hû’ habəḵwōr ûḇəḥalləlwō yəṣû‘ê ’āḇîw nitənâ bəḵōrāṯwō liḇənê ywōsēf ben-yiśərā’ēl wəlō’ ləhiṯəy^aḥēś labəḵōrâ:

2 kî yəhûḏâ gāḇar bə’eḥāyw ûlənāḡîḏ mimmennû wəhabəḵōrâ ləywōsēf: s

3 bənê rə’ûḇēn bəḵwōr yiśərā’ēl ḥănwōḵə ûfallû’ ḥeṣərwōn wəḵarəmî:

4 bənê ywō’ēl šəm^a‘əyâ ḇənwō gwōḡ bənwō šimə‘î ḇənwō:

5 mîḵâ ḇənwō rə’āyâ ḇənwō b^a‘al bənwō:

6 bə’ērâ ḇənwō ’ăšer heḡəlâ tilləḡaṯ pilənə’eser meleḵə ’aššur hû’ nāśî’ lār’ûḇēnî:

7 wə’eḥāyw ləmišəpəḥōṯāyw bəhiṯəy^aḥēś ləṯōləḏwōṯām hārō’š yə‘î’ēl ûzəḵarəyâû:

8 ûḇel^a‘ ben-‘āzāz ben-šem^a‘ ben-ywō’ēl hû’ ywōšēḇ b^a‘ărō‘ēr wə‘aḏ-nəḇwō ûḇ^a‘al mə‘wōn:

9 wəlammizərāḥ yāšaḇ ‘aḏ-ləḇwō’ miḏəbārâ ləmin-hannâār pərāṯ kî miqənêhem rāḇû bə’ereṣ gilə‘āḏ:

10 ûḇîmê šā’ûl ‘āśû miləḥāmâ ‘im-hahaḡəri’îm wayyipəlû bəyāḏām wayyēšəḇû bə’âŏlêhem ‘al-kāl-pənê mizərāḥ lagilə‘āḏ: f

11 ûḇənê-ḡāḏ ləneḡədām yāšəḇû bə’ereṣ habāšān ‘aḏ-saləḵâ:

12 ywō’ēl hārō’š wəšāfām hammišəneh wəy^a‘ənay wəšāfāṭ babāšān:

13 wa’ăḥêhem ləḇêṯ ’ăḇwōṯêhem mîḵā’ēl ûməšullām wəšeḇ^a‘ wəywōray wəy^a‘əkān wəzî‘a wā‘ēḇer šiḇə‘â: s

14 ’ēlleh| bənê ’ăḇîḥayil ben-ḥûrî ben-yārwōḥa ben-gilə‘āḏ ben-mîḵā’ēl ben-yəšîšay ben-y^aḥədwō ben-bûz:

15 ’ăḥî ben-‘aḇədî’ēl ben-gûnî rō’š ləḇêṯ ’ăḇwōṯām:

16 wayyēšəḇû bagilə‘āḏ babāšān ûḇiḇənōṯeyhā ûḇəḵāl-miḡərəšê šārwōn ‘al-twōṣə’wōṯām:

17 kullām hiṯəy^aḥəśû bîmê ywōṯām meleḵə-yəhûḏâ ûḇîmê yārāḇə‘ām meleḵə-yiśərā’ēl: f

18 bənê-rə’ûḇēn wəḡāḏî w^aḥăṣî šēḇeṭ-mənaššeh min-bənê-ḥayil ’ănāšîm nōśə’ê māḡēn wəḥereḇ wəḏōrəḵê qešeṯ ûləmûḏê miləḥāmâ ’arəbā‘îm wə’arəbā‘â ’elef ûšəḇ^a‘-mē’wōṯ wəšiššîm yōṣə’ê ṣāḇā’:

19 wayy^a‘ăśû miləḥāmâ ‘im-hahaḡərî’îm wîṭûr wənāfîš wənwōḏāḇ:

20 wayyē‘āzərû ‘ălêhem wayyinnāṯənû ḇəyāḏām hahaḡərî’îm wəḵōl še‘immâem kî lē’lōhîm zā‘ăqû bammiləḥāmâ wən^a‘ətwōr lâem kî-ḇāṭəḥû ḇwō:

21 wayyišəbû miqənêhem gəmallêhem ḥămiššîm ’elef wəṣō’n mā’ṯayim w^aḥămiššîm ’elef w^aḥămwōrîm ’aləpāyim wənefeš ’āḏām mē’â ’ālef:

22 kî-ḥălālîm rabîm nāfālû kî mēhā’ĕlōhîm hammiləḥāmâ wayyēšəḇû ṯ^aḥətêhem ‘aḏ-hagōlâ: f

23 ûḇənê ḥăṣî šēḇeṭ mənaššeh yāšəḇû bā’āreṣ mibāšān ‘aḏ-b^a‘al ḥerəmwōn ûśənîr wəhar-ḥerəmwōn hēmmâ rāḇû:

24 wə’ēlleh rā’šê ḇêṯ-’ăḇwōṯām wə‘ēfer wəyišə‘î we’ĕlî’ēl wə‘azərî’ēl wəyirəməyâ wəhwōḏawəyâ wəy^aḥədî’ēl ’ănāšîm gibwōrê ḥayil ’anəšê šēmwōṯ rā’šîm ləḇêṯ ’ăḇwōṯām:

25 wayyimə‘ălû bē’lōhê ’ăḇwōṯêhem wayyizənû ’^aḥărê ’ĕlōhê ‘ammê-hā’āreṣ ’ăšer-hišəmîḏ ’ĕlōhîm mipənêhem:

26 wayyā‘ar ’ĕlōhê yiśərā’ēl ’eṯ-rûḥa| pûl meleḵə-’aššûr wə’eṯ-rûḥa tilləḡaṯ piləneser meleḵə ’aššûr wayyaḡəlēm lār’ûḇēnî wəlagāḏî wəl^aḥăṣî šēḇeṭ mənaššeh wayəḇî’ēm l^aḥəl^aḥ wəḥāḇwōr wəhārā’ ûnəhar gwōzān ‘aḏ hayywōm hazzeh: f

27 bənê lēwî gērəšwōn qəhāṯ ûmərārî:

28 ûḇənê qəhāṯ ‘amərām yiṣəhār wəḥeḇərwōn wə‘uzzî’ēl: s

29 ûḇənê ‘amərām ’ahărōn ûmōšeh ûmirəyām sûḇənê ’ahărōn nāḏāḇ wa’ăḇîhû’ ’elə‘āzār wə’îṯāmār: s

30 ’elə‘āzār hwōlîḏ ’eṯ-pînəḥās pînəḥās hōlîḏ ’eṯ-’ăḇîšû‘a:

31 wa’ăḇîšû‘a hwōlîḏ ’eṯ-buqqî ûḇuqqî hwōlîḏ ’eṯ-‘uzzî:

32 wə‘uzzî hwōlîḏ ’eṯ-zər^aḥəyâ ûzər^aḥəyâ hwōlîḏ ’eṯ-mərāywōṯ:

33 mərāywōṯ hwōlîḏ ’eṯ-’ămarəyâ wa’ămarəyâ hwōlîḏ ’eṯ-’ăḥîṭûḇ:

34 wa’ăḥîṭûḇ hwōlîḏ ’eṯ-ṣāḏwōq wəṣāḏwōq hwōlîḏ ’eṯ-’ăḥîmā‘aṣ:

35 wa’ăḥîm^a‘aṣ hwōlîḏ ’eṯ-‘ăzarəyâ w^a‘ăzarəyâ hwōlîḏ ’eṯ-ywōḥānān:

36 wəywōḥānān hwōlîḏ ’eṯ-‘ăzarəyâ hû’ ’ăšer kihēn babayiṯ ’ăšer-bānâ šəlōmōh bîrûšālāim:

37 wayywōleḏ ‘ăzarəyâ ’eṯ-’ămarəyâ wa’ămarəyâ hwōlîḏ ’eṯ-’ăḥîṭûḇ:

38 wa’ăḥîṭûḇ hwōlîḏ ’eṯ-ṣāḏwōq wəṣāḏwōq hwōlîḏ ’eṯ-šallûm:

39 wəšallûm hwōlîḏ ’eṯ-ḥiləqîyâ wəḥiləqîyâ hwōlîḏ ’eṯ-‘ăzarəyâ:

40 w^a‘ăzarəyâ hwōlîḏ ’eṯ-śərāyâ ûśərāyâ hwōlîḏ ’eṯ-yəhwōṣāḏāq:

41 wîhwōṣāḏāq hālaḵə bəhaḡəlwōṯ yəhwâ ’eṯ-yəhûḏâ wîrûšālāim bəyaḏ nəḇuḵaḏəne’ṣṣar: s