1 Chronicles (1 Divrey Yamim) Chapter 29

‎1 ‏וַיֹּ֨אמֶר דָּוִ֤יד הַמֶּ֙לֶךְ֙ לְכָל־הַקָּהָ֔ל שְׁלֹמֹ֨ה בְנִ֥י אֶחָ֛ד בָּֽחַר־בּ֥וֹ אֱלֹהִ֖ים נַ֣עַר וָרָ֑ךְ וְהַמְּלָאכָ֣ה גְדוֹלָ֔ה כִּ֣י לֹ֤א לְאָדָם֙ הַבִּירָ֔ה כִּ֖י לַיהוָ֥ה אֱלֹהִֽים׃

‎2 ‏וּֽכְכָל־כֹּחִ֞י הֲכִינ֣וֹתִי לְבֵית־אֱלֹהַ֗י הַזָּהָ֣ב׀ לַ֠זָּהָב וְהַכֶּ֨סֶף לַכֶּ֜סֶף וְהַנְּחֹ֣שֶׁת לַנְּחֹ֗שֶׁת הַבַּרְזֶל֙ לַבַּרְזֶ֔ל וְהָעֵצִ֖ים לָעֵצִ֑ים אַבְנֵי־שֹׁ֨הַם וּמִלּוּאִ֜ים אַבְנֵי־פ֣וּךְ וְרִקְמָ֗ה וְכֹ֨ל אֶ֧בֶן יְקָרָ֛ה וְאַבְנֵי־שַׁ֖יִשׁ לָרֹֽב׃

‎3 ‏וְע֗וֹד בִּרְצוֹתִי֙ בְּבֵ֣ית אֱלֹהַ֔י יֶשׁ־לִ֥י סְגֻלָּ֖ה זָהָ֣ב וָכָ֑סֶף נָתַ֤תִּי לְבֵית־אֱלֹהַי֙ לְמַ֔עְלָה מִכָּל־הֲכִינ֖וֹתִי לְבֵ֥ית הַקֹּֽדֶשׁ׃

‎4 ‏שְׁלֹ֧שֶׁת אֲלָפִ֛ים כִּכְּרֵ֥י זָהָ֖ב מִזְּהַ֣ב אוֹפִ֑יר וְשִׁבְעַ֨ת אֲלָפִ֤ים כִּכַּר־כֶּ֙סֶף֙ מְזֻקָּ֔ק לָט֖וּחַ קִיר֥וֹת הַבָּתִּֽים׃

‎5 ‏לַזָּהָ֤ב לַזָּהָב֙ וְלַכֶּ֣סֶף לַכֶּ֔סֶף וּלְכָל־מְלָאכָ֖ה בְּיַ֣ד חָרָשִׁ֑ים וּמִ֣י מִתְנַדֵּ֔ב לְמַלֹּ֥אות יָד֛וֹ הַיּ֖וֹם לַיהוָֽה׃

‎6 ‏וַיִּֽתְנַדְּבוּ֩ שָׂרֵ֨י הָאָב֜וֹת וְשָׂרֵ֣י׀ שִׁבְטֵ֣י יִשְׂרָאֵ֗ל וְשָׂרֵ֤י הָאֲלָפִים֙ וְהַמֵּא֔וֹת וּלְשָׂרֵ֖י מְלֶ֥אכֶת הַמֶּֽלֶךְ׃

‎7 ‏וַֽיִּתְּנ֞וּ לַעֲבוֹדַ֣ת בֵּית־הָאֱלֹהִ֗ים זָהָ֞ב כִּכָּרִ֣ים חֲמֵֽשֶׁת־אֲלָפִים֮ וַאֲדַרְכֹנִ֣ים רִבּוֹ֒ וְכֶ֗סֶף כִּכָּרִים֙ עֲשֶׂ֣רֶת אֲלָפִ֔ים וּנְחֹ֕שֶׁת רִבּ֛וֹ וּשְׁמוֹנַ֥ת אֲלָפִ֖ים כִּכָּרִ֑ים וּבַרְזֶ֖ל מֵֽאָה־אֶ֥לֶף כִּכָּרִֽים׃

‎8 ‏וְהַנִּמְצָ֤א אִתּוֹ֙ אֲבָנִ֔ים נָתְנ֖וּ לְאוֹצַ֣ר בֵּית־יְהוָ֑ה עַ֥ל יַד־יְחִיאֵ֖ל הַגֵּרְשֻׁנִּֽי׃

‎9 ‏וַיִּשְׂמְח֤וּ הָעָם֙ עַל־הִֽתְנַדְּבָ֔ם כִּ֚י בְּלֵ֣ב שָׁלֵ֔ם הִֽתְנַדְּב֖וּ לַיהוָ֑ה וְגַם֙ דָּוִ֣יד הַמֶּ֔לֶךְ שָׂמַ֖ח שִׂמְחָ֥ה גְדוֹלָֽה׃ פ

‎10 ‏וַיְבָ֤רֶךְ דָּוִיד֙ אֶת־יְהוָ֔ה לְעֵינֵ֖י כָּל־הַקָּהָ֑ל וַיֹּ֣אמֶר דָּוִ֗יד בָּר֨וּךְ אַתָּ֤ה יְהוָה֙ אֱלֹהֵי֙ יִשְׂרָאֵ֣ל אָבִ֔ינוּ מֵעוֹלָ֖ם וְעַד־עוֹלָֽם׃

‎11 ‏לְךָ֣ יְ֠הוָה הַגְּדֻלָּ֨ה וְהַגְּבוּרָ֤ה וְהַתִּפְאֶ֙רֶת֙ וְהַנֵּ֣צַח וְהַה֔וֹד כִּי־כֹ֖ל בַּשָּׁמַ֣יִם וּבָאָ֑רֶץ לְךָ֤ יְהוָה֙ הַמַּמְלָכָ֔ה וְהַמִּתְנַשֵּׂ֖א לְכֹ֥ל׀ לְרֹֽאשׁ׃

‎12 ‏וְהָעֹ֤שֶׁר וְהַכָּבוֹד֙ מִלְּפָנֶ֔יךָ וְאַתָּה֙ מוֹשֵׁ֣ל בַּכֹּ֔ל וּבְיָדְךָ֖ כֹּ֣חַ וּגְבוּרָ֑ה וּבְיָ֣דְךָ֔ לְגַדֵּ֥ל וּלְחַזֵּ֖ק לַכֹּֽל׃

‎13 ‏וְעַתָּ֣ה אֱלֹהֵ֔ינוּ מוֹדִ֥ים אֲנַ֖חְנוּ לָ֑ךְ וּֽמְהַֽלְלִ֖ים לְשֵׁ֥ם תִּפְאַרְתֶּֽךָ׃

‎14 ‏וְכִ֨י מִ֤י אֲנִי֙ וּמִ֣י עַמִּ֔י כִּֽי־נַעְצֹ֣ר כֹּ֔חַ לְהִתְנַדֵּ֖ב כָּזֹ֑את כִּֽי־מִמְּךָ֣ הַכֹּ֔ל וּמִיָּדְךָ֖ נָתַ֥נּוּ לָֽךְ׃

‎15 ‏כִּֽי־גֵרִ֨ים אֲנַ֧חְנוּ לְפָנֶ֛יךָ וְתוֹשָׁבִ֖ים כְּכָל־אֲבֹתֵ֑ינוּ כַּצֵּ֧ל׀ יָמֵ֛ינוּ עַל־הָאָ֖רֶץ וְאֵ֥ין מִקְוֶֽה׃

‎16 ‏יְהוָ֣ה אֱלֹהֵ֔ינוּ כֹ֣ל הֶהָמ֤וֹן הַזֶּה֙ אֲשֶׁ֣ר הֲכִינֹ֔נוּ לִבְנֽוֹת־לְךָ֥ בַ֖יִת לְשֵׁ֣ם קָדְשֶׁ֑ךָ מִיָּדְךָ֥ היא ה֖וּא וּלְךָ֥ הַכֹּֽל׃

‎17 ‏וְיָדַ֣עְתִּי אֱלֹהַ֔י כִּ֤י אַתָּה֙ בֹּחֵ֣ן לֵבָ֔ב וּמֵישָׁרִ֖ים תִּרְצֶ֑ה אֲנִ֗י בְּיֹ֤שֶׁר לְבָבִי֙ הִתְנַדַּ֣בְתִּי כָל־אֵ֔לֶּה וְעַתָּ֗ה עַמְּךָ֙ הַנִּמְצְאוּ־פֹ֔ה רָאִ֥יתִי בְשִׂמְחָ֖ה לְהִֽתְנַדֶּב־לָֽךְ׃

‎18 ‏יְהוָ֗ה אֱ֠לֹהֵי אַבְרָהָ֞ם יִצְחָ֤ק וְיִשְׂרָאֵל֙ אֲבֹתֵ֔ינוּ שֳׁמְרָה־זֹּ֣את לְעוֹלָ֔ם לְיֵ֥צֶר מַחְשְׁב֖וֹת לְבַ֣ב עַמֶּ֑ךָ וְהָכֵ֥ן לְבָבָ֖ם אֵלֶֽיךָ׃

‎19 ‏וְלִשְׁלֹמֹ֣ה בְנִ֗י תֵּ֚ן לֵבָ֣ב שָׁלֵ֔ם לִשְׁמוֹר֙ מִצְוֹתֶ֔יךָ עֵדְוֹתֶ֖יךָ וְחֻקֶּ֑יךָ וְלַעֲשׂ֣וֹת הַכֹּ֔ל וְלִבְנ֖וֹת הַבִּירָ֥ה אֲשֶׁר־הֲכִינֽוֹתִי׃ פ

‎20 ‏וַיֹּ֤אמֶר דָּוִיד֙ לְכָל־הַקָּהָ֔ל בָּֽרְכוּ־נָ֖א אֶת־יְהוָ֣ה אֱלֹהֵיכֶ֑ם וַיְבָרֲכ֣וּ כָֽל־הַקָּהָ֗ל לַיהוָה֙ אֱלֹהֵ֣י אֲבֹֽתֵיהֶ֔ם וַיִּקְּד֧וּ וַיִּֽשְׁתַּחֲו֛וּ לַיהוָ֖ה וְלַמֶּֽלֶךְ׃

‎21 ‏וַיִּזְבְּח֣וּ לַיהוָ֣ה׀ זְ֠בָחִים וַיַּעֲל֨וּ עֹל֜וֹת לַיהוָ֗ה לְֽמָחֳרַת֮ הַיּ֣וֹם הַהוּא֒ פָּרִ֨ים אֶ֜לֶף אֵילִ֥ים אֶ֛לֶף כְּבָשִׂ֥ים אֶ֖לֶף וְנִסְכֵּיהֶ֑ם וּזְבָחִ֥ים לָרֹ֖ב לְכָל־יִשְׂרָאֵֽל׃

‎22 ‏וַיֹּאכְל֨וּ וַיִּשְׁתּ֜וּ לִפְנֵ֧י יְהוָ֛ה בַּיּ֥וֹם הַה֖וּא בְּשִׂמְחָ֣ה גְדוֹלָ֑ה וַיַּמְלִ֤יכוּ שֵׁנִית֙ לִשְׁלֹמֹ֣ה בֶן־דָּוִ֔יד וַיִּמְשְׁח֧וּ לַיהוָ֛ה לְנָגִ֥יד וּלְצָד֖וֹק לְכֹהֵֽן׃

‎23 ‏וַיֵּ֣שֶׁב שְׁ֠לֹמֹה עַל־כִּסֵּ֨א יְהוָ֧ה׀ לְמֶ֛לֶךְ תַּֽחַת־דָּוִ֥יד אָבִ֖יו וַיַּצְלַ֑ח וַיִּשְׁמְע֥וּ אֵלָ֖יו כָּל־יִשְׂרָאֵֽל׃

‎24 ‏וְכָל־הַשָּׂרִים֙ וְהַגִּבֹּרִ֔ים וְגַ֕ם כָּל־בְּנֵ֖י הַמֶּ֣לֶךְ דָּוִ֑יד נָ֣תְנוּ יָ֔ד תַּ֖חַת שְׁלֹמֹ֥ה הַמֶּֽלֶךְ׃

‎25 ‏וַיְגַדֵּ֨ל יְהוָ֤ה אֶת־שְׁלֹמֹה֙ לְמַ֔עְלָה לְעֵינֵ֖י כָּל־יִשְׂרָאֵ֑ל וַיִּתֵּ֤ן עָלָיו֙ ה֣וֹד מַלְכ֔וּת אֲ֠שֶׁר לֹֽא־הָיָ֧ה עַל־כָּל־מֶ֛לֶךְ לְפָנָ֖יו עַל־יִשְׂרָאֵֽל׃ פ

‎26 ‏וְדָוִיד֙ בֶּן־יִשָׁ֔י מָלַ֖ךְ עַל־כָּל־יִשְׂרָאֵֽל׃

‎27 ‏וְהַיָּמִ֗ים אֲשֶׁ֤ר מָלַךְ֙ עַל־יִשְׂרָאֵ֔ל אַרְבָּעִ֖ים שָׁנָ֑ה בְּחֶבְר֤וֹן מָלַךְ֙ שֶׁ֣בַע שָׁנִ֔ים וּבִירוּשָׁלִַ֥ם מָלַ֖ךְ שְׁלֹשִׁ֥ים וְשָׁלֽוֹשׁ׃

‎28 ‏וַיָּ֙מָת֙ בְּשֵׂיבָ֣ה טוֹבָ֔ה שְׂבַ֥ע יָמִ֖ים עֹ֣שֶׁר וְכָב֑וֹד וַיִּמְלֹ֛ךְ שְׁלֹמֹ֥ה בְנ֖וֹ תַּחְתָּֽיו׃

‎29 ‏וְדִבְרֵי֙ דָּוִ֣יד הַמֶּ֔לֶךְ הָרִאשֹׁנִ֖ים וְהָאֲחרֹנִ֑ים הִנָּ֣ם כְּתוּבִ֗ים עַל־דִּבְרֵי֙ שְׁמוּאֵ֣ל הָרֹאֶ֔ה וְעַל־דִּבְרֵי֙ נָתָ֣ן הַנָּבִ֔יא וְעַל־דִּבְרֵ֖י גָּ֥ד הַחֹזֶֽה׃

‎30 ‏עִ֥ם כָּל־מַלְכוּת֖וֹ וּגְבוּרָת֑וֹ וְהָעִתִּ֗ים אֲשֶׁ֨ר עָבְר֤וּ עָלָיו֙ וְעַל־יִשְׂרָאֵ֔ל וְעַ֖ל כָּל־מַמְלְכ֥וֹת הָאֲרָצֽוֹת׃ פ

1 wayyō’mer dāwîḏ hammeleḵə ləḵāl-haqqâāl šəlōmōh ḇənî ’eḥāḏ bāḥar-bwō ’ĕlōhîm n^a‘ar wārāḵə wəhamməlā’ḵâ ḡəḏwōlâ kî lō’ lə’āḏām habîrâ kî layhwâ ’ĕlōhîm:

2 ûḵəḵāl-kōḥî hăḵînwōṯî ləḇêṯ-’ĕlōhay hazzâāḇ| lazzâāḇ wəhakesef lakesef wəhannəḥōšeṯ lannəḥōšeṯ habarəzel labarəzel wəhā‘ēṣîm lā‘ēṣîm ’aḇənê-šōham ûmillû’îm ’aḇənê-fûḵə wəriqəmâ wəḵōl ’eḇen yəqārâ wə’aḇənê-šayiš lārōḇ:

3 wə‘wōḏ birəṣwōṯî bəḇêṯ ’ĕlōhay yeš-lî səḡullâ zâāḇ wāḵāsef nāṯatî ləḇêṯ-’ĕlōhay ləm^a‘əlâ mikāl-hăḵînwōṯî ləḇêṯ haqqōḏeš:

4 šəlōšeṯ ’ălāfîm kikərê zâāḇ mizzəhaḇ ’wōfîr wəšiḇə‘aṯ ’ălāfîm kikar-kesef məzuqqāq lāṭûḥa qîrwōṯ habātîm:

5 lazzâāḇ lazzâāḇ wəlakesef lakesef ûləḵāl-məlā’ḵâ bəyaḏ ḥārāšîm ûmî miṯənadēḇ ləmallō’wṯ yāḏwō hayywōm layhwâ:

6 wayyiṯənadəḇû śārê hā’āḇwōṯ wəśārê| šiḇəṭê yiśərā’ēl wəśārê hā’ălāfîm wəhammē’wōṯ ûləśārê məle’ḵeṯ hammeleḵə:

7 wayyitənû l^a‘ăḇwōḏaṯ bêṯ-hā’ĕlōhîm zâāḇ kikārîm ḥămēšeṯ-’ălāfîm wa’ăḏarəḵōnîm ribwō wəḵesef kikārîm ‘ăśereṯ ’ălāfîm ûnəḥōšeṯ ribwō ûšəmwōnaṯ ’ălāfîm kikārîm ûḇarəzel mē’â-’elef kikārîm:

8 wəhanniməṣā’ ’itwō ’ăḇānîm nāṯənû lə’wōṣar bêṯ-yəhwâ ‘al yaḏ-yəḥî’ēl hagērəšunnî:

9 wayyiśəməḥû hā‘ām ‘al-hiṯənadəḇām kî bəlēḇ šālēm hiṯənadəḇû layhwâ wəḡam dāwîḏ hammeleḵə śām^aḥ śiməḥâ ḡəḏwōlâ: f

10 wayəḇāreḵə dāwîḏ ’eṯ-yəhwâ lə‘ênê kāl-haqqâāl wayyō’mer dāwîḏ bārûḵə ’atâ yəhwâ ’ĕlōhê yiśərā’ēl ’āḇînû mē‘wōlām wə‘aḏ-‘wōlām:

11 ləḵā yəhwâ hagəḏullâ wəhagəḇûrâ wəhatifə’ereṯ wəhannēṣ^aḥ wəhahwōḏ kî-ḵōl baššāmayim ûḇā’āreṣ ləḵā yəhwâ hammaməlāḵâ wəhammiṯənaśśē’ ləḵōl| lərō’š:

12 wəhā‘ōšer wəhakāḇwōḏ milləfāneyḵā wə’atâ mwōšēl bakōl ûḇəyāḏəḵā kōḥa ûḡəḇûrâ ûḇəyāḏəḵā ləḡadēl ûləḥazzēq lakōl:

13 wə‘atâ ’ĕlōhênû mwōḏîm ’ăn^aḥənû lāḵə ûməhaləlîm ləšēm tifə’arəteḵā:

14 wəḵî mî ’ănî ûmî ‘ammî kî-n^a‘əṣōr kōḥa ləhiṯənadēḇ kāzō’ṯ kî-mimməḵā hakōl ûmîyāḏəḵā nāṯannû lāḵə:

15 kî-ḡērîm ’ăn^aḥənû ləfāneyḵā wəṯwōšāḇîm kəḵāl-’ăḇōṯênû kaṣṣēl| yāmênû ‘al-hā’āreṣ wə’ên miqəweh:

16 yəhwâ ’ĕlōhênû ḵōl hehāmwōn hazzeh ’ăšer hăḵînōnû liḇənwōṯ-ləḵā ḇayiṯ ləšēm qāḏəšeḵā mîyāḏəḵā hî’ hû’ ûləḵā hakōl:

17 wəyāḏ^a‘ətî ’ĕlōhay kî ’atâ bōḥēn lēḇāḇ ûmêšārîm tirəṣeh ’ănî bəyōšer ləḇāḇî hiṯənadaḇətî ḵāl-’ēlleh wə‘atâ ‘amməḵā hanniməṣə’û-fōh rā’îṯî ḇəśiməḥâ ləhiṯənadeḇ-lāḵə:

18 yəhwâ ’ĕlōhê ’aḇərâām yiṣəḥāq wəyiśərā’ēl ’ăḇōṯênû šŏmərâ-zzō’ṯ lə‘wōlām ləyēṣer m^aḥəšəḇwōṯ ləḇaḇ ‘ammeḵā wəhāḵēn ləḇāḇām ’ēleyḵā:

19 wəlišəlōmōh ḇənî tēn lēḇāḇ šālēm lišəmwōr miṣəwōṯeyḵā ‘ēḏəwōṯeyḵā wəḥuqqeyḵā wəl^a‘ăśwōṯ hakōl wəliḇənwōṯ habîrâ ’ăšer-hăḵînwōṯî: f

20 wayyō’mer dāwîḏ ləḵāl-haqqâāl bārəḵû-nā’ ’eṯ-yəhwâ ’ĕlōhêḵem wayəḇārăḵû ḵāl-haqqâāl layhwâ ’ĕlōhê ’ăḇōṯêhem wayyiqqəḏû wayyišət^aḥăwû layhwâ wəlammeleḵə:

21 wayyizəbəḥû layhwâ| zəḇāḥîm wayy^a‘ălû ‘ōlwōṯ layhwâ ləmāḥŏraṯ hayywōm hahû’ pārîm ’elef ’êlîm ’elef kəḇāśîm ’elef wənisəkêhem ûzəḇāḥîm lārōḇ ləḵāl-yiśərā’ēl:

22 wayyō’ḵəlû wayyišətû lifənê yəhwâ bayywōm hahû’ bəśiməḥâ ḡəḏwōlâ wayyaməlîḵû šēnîṯ lišəlōmōh ḇen-dāwîḏ wayyiməšəḥû layhwâ lənāḡîḏ ûləṣāḏwōq ləḵōhēn:

23 wayyēšeḇ šəlōmōh ‘al-kissē’ yəhwâ| ləmeleḵə t^aḥaṯ-dāwîḏ ’āḇîw wayyaṣəl^aḥ wayyišəmə‘û ’ēlāyw kāl-yiśərā’ēl:

24 wəḵāl-haśśārîm wəhagibōrîm wəḡam kāl-bənê hammeleḵə dāwîḏ nāṯənû yāḏ t^aḥaṯ šəlōmōh hammeleḵə:

25 wayəḡadēl yəhwâ ’eṯ-šəlōmōh ləm^a‘əlâ lə‘ênê kāl-yiśərā’ēl wayyitēn ‘ālāyw hwōḏ maləḵûṯ ’ăšer lō’-hāyâ ‘al-kāl-meleḵə ləfānāyw ‘al-yiśərā’ēl: f

26 wəḏāwîḏ ben-yišāy mālaḵə ‘al-kāl-yiśərā’ēl:

27 wəhayyāmîm ’ăšer mālaḵə ‘al-yiśərā’ēl ’arəbā‘îm šānâ bəḥeḇərwōn mālaḵə šeḇ^a‘ šānîm ûḇîrûšālaim mālaḵə šəlōšîm wəšālwōš:

28 wayyāmāṯ bəśêḇâ ṭwōḇâ śəḇ^a‘ yāmîm ‘ōšer wəḵāḇwōḏ wayyiməlōḵə šəlōmōh ḇənwō t^aḥətāyw:

29 wəḏiḇərê dāwîḏ hammeleḵə hāri’šōnîm wəhā’ăḥrōnîm hinnām kəṯûḇîm ‘al-diḇərê šəmû’ēl hārō’eh wə‘al-diḇərê nāṯān hannāḇî’ wə‘al-diḇərê gāḏ h^aḥōzeh:

30 ‘im kāl-maləḵûṯwō ûḡəḇûrāṯwō wəhā‘itîm ’ăšer ‘āḇərû ‘ālāyw wə‘al-yiśərā’ēl wə‘al kāl-mamələḵwōṯ hā’ărāṣwōṯ: f