2 Chronicles (2 Divrey Yamim) Chapter 1

‎1 ‏וַיִּתְחַזֵּ֛ק שְׁלֹמֹ֥ה בֶן־דָּוִ֖יד עַל־מַלְכוּת֑וֹ וַיהוָ֤ה אֱלֹהָיו֙ עִמּ֔וֹ וַֽיְגַדְּלֵ֖הוּ לְמָֽעְלָה׃

‎2 ‏וַיֹּ֣אמֶר שְׁלֹמֹ֣ה לְכָל־יִשְׂרָאֵ֡ל לְשָׂרֵי֩ הָאֲלָפִ֨ים וְהַמֵּא֜וֹת וְלַשֹּֽׁפְטִ֗ים וּלְכֹ֛ל נָשִׂ֥יא לְכָל־יִשְׂרָאֵ֖ל רָאשֵׁ֥י הָאָבֽוֹת׃

‎3 ‏וַיֵּלְכ֗וּ שְׁלֹמֹה֙ וְכָל־הַקָּהָ֣ל עִמּ֔וֹ לַבָּמָ֖ה אֲשֶׁ֣ר בְּגִבְע֑וֹן כִּי־שָׁ֣ם הָיָ֗ה אֹ֤הֶל מוֹעֵד֙ הָֽאֱלֹהִ֔ים אֲשֶׁ֥ר עָשָׂ֛ה מֹשֶׁ֥ה עֶֽבֶד־יְהוָ֖ה בַּמִּדְבָּֽר׃

‎4 ‏אֲבָ֗ל אֲר֤וֹן הָאֱלֹהִים֙ הֶעֱלָ֤ה דָוִיד֙ מִקִּרְיַ֣ת יְעָרִ֔ים בַּֽהֵכִ֥ין ל֖וֹ דָּוִ֑יד כִּ֧י נָֽטָה־ל֛וֹ אֹ֖הֶל בִּירוּשָׁלִָֽם׃

‎5 ‏וּמִזְבַּ֣ח הַנְּחֹ֗שֶׁת אֲשֶׁ֤ר עָשָׂה֙ בְּצַלְאֵל֙ בֶּן־אוּרִ֣י בֶן־ח֔וּר שָׂ֕ם לִפְנֵ֖י מִשְׁכַּ֣ן יְהוָ֑ה וַיִּדְרְשֵׁ֥הוּ שְׁלֹמֹ֖ה וְהַקָּהָֽל׃

‎6 ‏וַיַּעַל֩ שְׁלֹמֹ֨ה שָׁ֜ם עַל־מִזְבַּ֤ח הַנְּחֹ֙שֶׁת֙ לִפְנֵ֣י יְהוָ֔ה אֲשֶׁ֖ר לְאֹ֣הֶל מוֹעֵ֑ד וַיַּ֧עַל עָלָ֛יו עֹל֖וֹת אָֽלֶף׃

‎7 ‏בַּלַּ֣יְלָה הַה֔וּא נִרְאָ֥ה אֱלֹהִ֖ים לִשְׁלֹמֹ֑ה וַיֹּ֣אמֶר ל֔וֹ שְׁאַ֖ל מָ֥ה אֶתֶּן־לָֽךְ׃

‎8 ‏וַיֹּ֤אמֶר שְׁלֹמֹה֙ לֵֽאלֹהִ֔ים אַתָּ֗ה עָשִׂ֛יתָ עִם־דָּוִ֥יד אָבִ֖י חֶ֣סֶד גָּד֑וֹל וְהִמְלַכְתַּ֖נִי תַּחְתָּֽיו׃

‎9 ‏עַתָּה֙ יְהוָ֣ה אֱלֹהִ֔ים יֵֽאָמֵן֙ דְּבָ֣רְךָ֔ עִ֖ם דָּוִ֣יד אָבִ֑י כִּ֤י אַתָּה֙ הִמְלַכְתַּ֔נִי עַל־עַ֕ם רַ֖ב כַּעֲפַ֥ר הָאָֽרֶץ׃

‎10 ‏עַתָּ֗ה חָכְמָ֤ה וּמַדָּע֙ תֶּן־לִ֔י וְאֵֽצְאָ֛ה לִפְנֵ֥י הָֽעָם־הַזֶּ֖ה וְאָב֑וֹאָה כִּֽי־מִ֣י יִשְׁפֹּ֔ט אֶת־עַמְּךָ֥ הַזֶּ֖ה הַגָּדֽוֹל׃ ס

‎11 ‏וַיֹּ֣אמֶר־אֱלֹהִ֣ים׀ לִשְׁלֹמֹ֡ה יַ֣עַן אֲשֶׁר֩ הָיְתָ֨ה זֹ֜את עִם־לְבָבֶ֗ךָ וְלֹֽא־שָׁ֠אַלְתָּ עֹ֣שֶׁר נְכָסִ֤ים וְכָבוֹד֙ וְאֵת֙ נֶ֣פֶשׁ שֹׂנְאֶ֔יךָ וְגַם־יָמִ֥ים רַבִּ֖ים לֹ֣א שָׁאָ֑לְתָּ וַתִּֽשְׁאַל־לְךָ֙ חָכְמָ֣ה וּמַדָּ֔ע אֲשֶׁ֤ר תִּשְׁפּוֹט֙ אֶת־עַמִּ֔י אֲשֶׁ֥ר הִמְלַכְתִּ֖יךָ עָלָֽיו׃

‎12 ‏הַֽחָכְמָ֥ה וְהַמַּדָּ֖ע נָת֣וּן לָ֑ךְ וְעֹ֨שֶׁר וּנְכָסִ֤ים וְכָבוֹד֙ אֶתֶּן־לָ֔ךְ אֲשֶׁ֣ר׀ לֹא־הָ֣יָה כֵ֗ן לַמְּלָכִים֙ אֲשֶׁ֣ר לְפָנֶ֔יךָ וְאַחֲרֶ֖יךָ לֹ֥א יִֽהְיֶה־כֵּֽן׃

‎13 ‏וַיָּבֹ֨א שְׁלֹמֹ֜ה לַבָּמָ֤ה אֲשֶׁר־בְּגִבְעוֹן֙ יְר֣וּשָׁלִַ֔ם מִלִּפְנֵ֖י אֹ֣הֶל מוֹעֵ֑ד וַיִּמְלֹ֖ךְ עַל־יִשְׂרָאֵֽל׃ פ

‎14 ‏וַיֶּאֱסֹ֣ף שְׁלֹמֹה֮ רֶ֣כֶב וּפָרָשִׁים֒ וַֽיְהִי־ל֗וֹ אֶ֤לֶף וְאַרְבַּע־מֵאוֹת֙ רֶ֔כֶב וּשְׁנֵים־עָשָׂ֥ר אֶ֖לֶף פָּרָשִׁ֑ים וַיַּנִּיחֵם֙ בְּעָרֵ֣י הָרֶ֔כֶב וְעִם־הַמֶּ֖לֶךְ בִּירֽוּשָׁלִָֽם׃

‎15 ‏וַיִּתֵּ֨ן הַמֶּ֜לֶךְ אֶת־הַכֶּ֧סֶף וְאֶת־הַזָּהָ֛ב בִּירוּשָׁלִַ֖ם כָּאֲבָנִ֑ים וְאֵ֣ת הָאֲרָזִ֗ים נָתַ֛ן כַּשִּׁקְמִ֥ים אֲשֶׁר־בַּשְּׁפֵלָ֖ה לָרֹֽב׃

‎16 ‏וּמוֹצָ֧א הַסּוּסִ֛ים אֲשֶׁ֥ר לִשְׁלֹמֹ֖ה מִמִּצְרָ֑יִם וּמִקְוֵ֕א סֹחֲרֵ֣י הַמֶּ֔לֶךְ מִקְוֵ֥א יִקְח֖וּ בִּמְחִֽיר׃

‎17 ‏וַֽ֠יַּעֲלוּ וַיּוֹצִ֨יאוּ מִמִּצְרַ֤יִם מֶרְכָּבָה֙ בְּשֵׁ֣שׁ מֵא֣וֹת כֶּ֔סֶף וְס֖וּס בַּחֲמִשִּׁ֣ים וּמֵאָ֑ה וְ֠כֵן לְכָל־מַלְכֵ֧י הַֽחִתִּ֛ים וּמַלְכֵ֥י אֲרָ֖ם בְּיָדָ֥ם יוֹצִֽיאוּ׃

‎18 ‏וַיֹּ֣אמֶר שְׁלֹמֹ֗ה לִבְנ֥וֹת בַּ֙יִת֙ לְשֵׁ֣ם יְהוָ֔ה וּבַ֖יִת לְמַלְכוּתֽוֹ׃

1 wayyiṯəḥazzēq šəlōmōh ḇen-dāwîḏ ‘al-maləḵûṯwō wayhwâ ’ĕlōhāyw ‘immwō wayəḡadəlēhû ləmā‘əlâ:

2 wayyō’mer šəlōmōh ləḵāl-yiśərā’ēl ləśārê hā’ălāfîm wəhammē’wōṯ wəlaššōfəṭîm ûləḵōl nāśî’ ləḵāl-yiśərā’ēl rā’šê hā’āḇwōṯ:

3 wayyēləḵû šəlōmōh wəḵāl-haqqâāl ‘immwō labāmâ ’ăšer bəḡiḇə‘wōn kî-šām hāyâ ’ōhel mwō‘ēḏ hā’ĕlōhîm ’ăšer ‘āśâ mōšeh ‘eḇeḏ-yəhwâ bammiḏəbār:

4 ’ăḇāl ’ărwōn hā’ĕlōhîm he‘ĕlâ ḏāwîḏ miqqirəyaṯ yə‘ārîm bahēḵîn lwō dāwîḏ kî nāṭâ-lwō ’ōhel bîrûšālāim:

5 ûmizəb^aḥ hannəḥōšeṯ ’ăšer ‘āśâ bəṣalə’ēl ben-’ûrî ḇen-ḥûr śām lifənê mišəkan yəhwâ wayyiḏərəšēhû šəlōmōh wəhaqqâāl:

6 wayy^a‘al šəlōmōh šām ‘al-mizəb^aḥ hannəḥōšeṯ lifənê yəhwâ ’ăšer lə’ōhel mwō‘ēḏ wayy^a‘al ‘ālāyw ‘ōlwōṯ ’ālef:

7 ballayəlâ hahû’ nirə’â ’ĕlōhîm lišəlōmōh wayyō’mer lwō šə’al mâ ’eten-lāḵə:

8 wayyō’mer šəlōmōh lē’lōhîm ’atâ ‘āśîṯā ‘im-dāwîḏ ’āḇî ḥeseḏ gāḏwōl wəhiməlaḵətanî t^aḥətāyw:

9 ‘atâ yəhwâ ’ĕlōhîm yē’āmēn dəḇārəḵā ‘im dāwîḏ ’āḇî kî ’atâ himəlaḵətanî ‘al-‘am raḇ k^a‘ăfar hā’āreṣ:

10 ‘atâ ḥāḵəmâ ûmadā‘ ten-lî wə’ēṣə’â lifənê hā‘ām-hazzeh wə’āḇwō’â kî-mî yišəpōṭ ’eṯ-‘amməḵā hazzeh hagāḏwōl: s

11 wayyō’mer-’ĕlōhîm| lišəlōmōh y^a‘an ’ăšer hāyəṯâ zō’ṯ ‘im-ləḇāḇeḵā wəlō’-šā’alətā ‘ōšer nəḵāsîm wəḵāḇwōḏ wə’ēṯ nefeš śōnə’eyḵā wəḡam-yāmîm rabîm lō’ šā’ālətā watišə’al-ləḵā ḥāḵəmâ ûmadā‘ ’ăšer tišəpwōṭ ’eṯ-‘ammî ’ăšer himəlaḵətîḵā ‘ālāyw:

12 h^aḥāḵəmâ wəhammadā‘ nāṯûn lāḵə wə‘ōšer ûnəḵāsîm wəḵāḇwōḏ ’eten-lāḵə ’ăšer| lō’-hāyâ ḵēn lamməlāḵîm ’ăšer ləfāneyḵā wə’^aḥăreyḵā lō’ yihəyeh-kēn:

13 wayyāḇō’ šəlōmōh labāmâ ’ăšer-bəḡiḇə‘wōn yərûšālaim millifənê ’ōhel mwō‘ēḏ wayyiməlōḵə ‘al-yiśərā’ēl: f

14 wayye’ĕsōf šəlōmōh reḵeḇ ûfārāšîm wayəhî-lwō ’elef wə’arəb^a‘-mē’wōṯ reḵeḇ ûšənêm-‘āśār ’elef pārāšîm wayyannîḥēm bə‘ārê hāreḵeḇ wə‘im-hammeleḵə bîrûšālāim:

15 wayyitēn hammeleḵə ’eṯ-hakesef wə’eṯ-hazzâāḇ bîrûšālaim kā’ăḇānîm wə’ēṯ hā’ărāzîm nāṯan kaššiqəmîm ’ăšer-baššəfēlâ lārōḇ:

16 ûmwōṣā’ hassûsîm ’ăšer lišəlōmōh mimmiṣərāyim ûmiqəwē’ sōḥărê hammeleḵə miqəwē’ yiqəḥû biməḥîr:

17 wayy^a‘ălû wayywōṣî’û mimmiṣərayim merəkāḇâ bəšēš mē’wōṯ kesef wəsûs b^aḥămiššîm ûmē’â wəḵēn ləḵāl-maləḵê h^aḥitîm ûmaləḵê ’ărām bəyāḏām ywōṣî’û:

18 wayyō’mer šəlōmōh liḇənwōṯ bayiṯ ləšēm yəhwâ ûḇayiṯ ləmaləḵûṯwō: