2 Chronicles (2 Divrey Yamim) Chapter 9

‎1 ‏וּמַֽלְכַּת־שְׁבָ֗א שָֽׁמְעָה֮ אֶת־שֵׁ֣מַע שְׁלֹמֹה֒ וַתָּב֣וֹא לְנַסּוֹת֩ אֶת־שְׁלֹמֹ֨ה בְחִיד֜וֹת בִּירֽוּשָׁלִַ֗ם בְּחַ֣יִל כָּבֵ֣ד מְאֹ֡ד וּ֠גְמַלִּים נֹשְׂאִ֨ים בְּשָׂמִ֧ים וְזָהָ֛ב לָרֹ֖ב וְאֶ֣בֶן יְקָרָ֑ה וַתָּבוֹא֙ אֶל־שְׁלֹמֹ֔ה וַתְּדַבֵּ֣ר עִמּ֔וֹ אֵ֛ת כָּל־אֲשֶׁ֥ר הָיָ֖ה עִם־לְבָבָֽהּ׃

‎2 ‏וַיַּגֶּד־לָ֥הּ שְׁלֹמֹ֖ה אֶת־כָּל־דְּבָרֶ֑יהָ וְלֹֽא־נֶעְלַ֤ם דָּבָר֙ מִשְּׁלֹמֹ֔ה אֲשֶׁ֧ר לֹ֦א הִגִּ֖יד לָֽהּ׃

‎3 ‏וַתֵּ֙רֶא֙ מַֽלְכַּת־שְׁבָ֔א אֵ֖ת חָכְמַ֣ת שְׁלֹמֹ֑ה וְהַבַּ֖יִת אֲשֶׁ֥ר בָּנָֽה׃

‎4 ‏וּמַאֲכַ֣ל שֻׁלְחָנ֡וֹ וּמוֹשַׁ֣ב עֲבָדָיו֩ וּמַעֲמַ֨ד מְשָׁרְתָ֜יו וּמַלְבּֽוּשֵׁיהֶ֗ם וּמַשְׁקָיו֙ וּמַלְבּ֣וּשֵׁיהֶ֔ם וַעֲלִיָּת֔וֹ אֲשֶׁ֥ר יַעֲלֶ֖ה בֵּ֣ית יְהוָ֑ה וְלֹא־הָ֥יָה ע֛וֹד בָּ֖הּ רֽוּחַ׃

‎5 ‏וַתֹּ֙אמֶר֙ אֶל־הַמֶּ֔לֶךְ אֱמֶת֙ הַדָּבָ֔ר אֲשֶׁ֥ר שָׁמַ֖עְתִּי בְּאַרְצִ֑י עַל־דְּבָרֶ֖יךָ וְעַל־חָכְמָתֶֽךָ׃

‎6 ‏וְלֹֽא־הֶאֱמַ֣נְתִּי לְדִבְרֵיהֶ֗ם עַ֤ד אֲשֶׁר־בָּ֙אתִי֙ וַתִּרְאֶ֣ינָה עֵינַ֔י וְהִנֵּה֙ לֹ֣א הֻגַּד־לִ֔י חֲצִ֖י מַרְבִּ֣ית חָכְמָתֶ֑ךָ יָסַ֕פְתָּ עַל־הַשְּׁמוּעָ֖ה אֲשֶׁ֥ר שָׁמָֽעְתִּי׃

‎7 ‏אַשְׁרֵ֣י אֲנָשֶׁ֔יךָ וְאַשְׁרֵ֖י עֲבָדֶ֣יךָ אֵ֑לֶּה הָעֹמְדִ֤ים לְפָנֶ֙יךָ֙ תָּמִ֔יד וְשֹׁמְעִ֖ים אֶת־חָכְמָתֶֽךָ׃

‎8 ‏יְהִ֨י יְהוָ֤ה אֱלֹהֶ֙יךָ֙ בָּר֔וּךְ אֲשֶׁ֣ר׀ חָפֵ֣ץ בְּךָ֗ לְתִתְּךָ֤ עַל־כִּסְאוֹ֙ לְמֶ֔לֶךְ לַיהוָ֖ה אֱלֹהֶ֑יךָ בְּאַהֲבַ֨ת אֱלֹהֶ֤יךָ אֶת־יִשְׂרָאֵל֙ לְהַעֲמִיד֣וֹ לְעוֹלָ֔ם וַיִּתֶּנְךָ֤ עֲלֵיהֶם֙ לְמֶ֔לֶךְ לַעֲשׂ֖וֹת מִשְׁפָּ֥ט וּצְדָקָֽה׃

‎9 ‏וַתִּתֵּ֨ן לַמֶּ֜לֶךְ מֵאָ֥ה וְעֶשְׂרִ֣ים׀ כִּכַּ֣ר זָהָ֗ב וּבְשָׂמִ֛ים לָרֹ֥ב מְאֹ֖ד וְאֶ֣בֶן יְקָרָ֑ה וְלֹ֤א הָיָה֙ כַּבֹּ֣שֶׂם הַה֔וּא אֲשֶׁר־נָתְנָ֥ה מַֽלְכַּת־שְׁבָ֖א לַמֶּ֥לֶךְ שְׁלֹמֹֽה׃

‎10 ‏וְגַם־עַבְדֵ֤י חירם חוּרָם֙ וְעַבְדֵ֣י שְׁלֹמֹ֔ה אֲשֶׁר־הֵבִ֥יאוּ זָהָ֖ב מֵאוֹפִ֑יר הֵבִ֛יאוּ עֲצֵ֥י אַלְגּוּמִּ֖ים וְאֶ֥בֶן יְקָרָֽה׃

‎11 ‏וַיַּ֣עַשׂ הַ֠מֶּלֶךְ אֶת־עֲצֵ֨י הָֽאַלְגּוּמִּ֜ים מְסִלּ֤וֹת לְבֵית־יְהוָה֙ וּלְבֵ֣ית הַמֶּ֔לֶךְ וְכִנֹּר֥וֹת וּנְבָלִ֖ים לַשָּׁרִ֑ים וְלֹא־נִרְא֥וּ כָהֵ֛ם לְפָנִ֖ים בְּאֶ֥רֶץ יְהוּדָֽה׃

‎12 ‏וְהַמֶּ֨לֶךְ שְׁלֹמֹ֜ה נָתַ֣ן לְמַֽלְכַּת־שְׁבָ֗א אֶת־כָּל־חֶפְצָהּ֙ אֲשֶׁ֣ר שָׁאָ֔לָה מִלְּבַ֖ד אֲשֶׁר־הֵבִ֣יאָה אֶל־הַמֶּ֑לֶךְ וַֽתַּהֲפֹ֛ךְ וַתֵּ֥לֶךְ לְאַרְצָ֖הּ הִ֥יא וַעֲבָדֶֽיהָ׃ פ

‎13 ‏וַיְהִי֙ מִשְׁקַ֣ל הַזָּהָ֔ב אֲשֶׁר־בָּ֥א לִשְׁלֹמֹ֖ה בְּשָׁנָ֣ה אֶחָ֑ת שֵׁ֥שׁ מֵא֛וֹת וְשִׁשִּׁ֥ים וָשֵׁ֖שׁ כִּכְּרֵ֥י זָהָֽב׃

‎14 ‏לְבַ֞ד מֵאַנְשֵׁ֧י הַתָּרִ֛ים וְהַסֹּחֲרִ֖ים מְבִיאִ֑ים וְכָל־מַלְכֵ֤י עֲרַב֙ וּפַח֣וֹת הָאָ֔רֶץ מְבִיאִ֛ים זָהָ֥ב וָכֶ֖סֶף לִשְׁלֹמֹֽה׃

‎15 ‏וַיַּ֨עַשׂ הַמֶּ֧לֶךְ שְׁלֹמֹ֛ה מָאתַ֥יִם צִנָּ֖ה זָהָ֣ב שָׁח֑וּט שֵׁ֤שׁ מֵאוֹת֙ זָהָ֣ב שָׁח֔וּט יַעֲלֶ֖ה עַל־הַצִּנָּ֥ה הָאֶחָֽת׃

‎16 ‏וּשְׁלֹשׁ־מֵא֤וֹת מָֽגִנִּים֙ זָהָ֣ב שָׁח֔וּט שְׁלֹ֤שׁ מֵאוֹת֙ זָהָ֔ב יַעֲלֶ֖ה עַל־הַמָּגֵ֣ן הָאֶחָ֑ת וַיִּתְּנֵ֣ם הַמֶּ֔לֶךְ בְּבֵ֖ית יַ֥עַר הַלְּבָנֽוֹן׃ פ

‎17 ‏וַיַּ֧עַשׂ הַמֶּ֛לֶךְ כִּסֵּא־שֵׁ֖ן גָּד֑וֹל וַיְצַפֵּ֖הוּ זָהָ֥ב טָהֽוֹר׃

‎18 ‏וְשֵׁ֣שׁ מַעֲל֣וֹת לַ֠כִּסֵּא וְכֶ֨בֶשׁ בַּזָּהָ֤ב לַכִּסֵּא֙ מָאֳחָזִ֔ים וְיָד֛וֹת מִזֶּ֥ה וּמִזֶּ֖ה עַל־מְק֣וֹם הַשָּׁ֑בֶת וּשְׁנַ֣יִם אֲרָי֔וֹת עֹמְדִ֖ים אֵ֥צֶל הַיָּדֽוֹת׃

‎19 ‏וּשְׁנֵ֧ים עָשָׂ֣ר אֲרָי֗וֹת עֹמְדִ֥ים שָׁ֛ם עַל־שֵׁ֥שׁ הַֽמַּעֲל֖וֹת מִזֶּ֣ה וּמִזֶּ֑ה לֹא־נַעֲשָׂ֥ה כֵ֖ן לְכָל־מַמְלָכָֽה׃

‎20 ‏וְ֠כֹל כְּלֵ֞י מַשְׁקֵ֨ה הַמֶּ֤לֶךְ שְׁלֹמֹה֙ זָהָ֔ב וְכֹ֗ל כְּלֵ֛י בֵּֽית־יַ֥עַר הַלְּבָנ֖וֹן זָהָ֣ב סָג֑וּר אֵ֣ין כֶּ֗סֶף נֶחְשָׁ֛ב בִּימֵ֥י שְׁלֹמֹ֖ה לִמְאֽוּמָה׃

‎21 ‏כִּֽי־אֳנִיּ֤וֹת לַמֶּ֙לֶךְ֙ הֹלְכ֣וֹת תַּרְשִׁ֔ישׁ עִ֖ם עַבְדֵ֣י חוּרָ֑ם אַחַת֩ לְשָׁל֨וֹשׁ שָׁנִ֜ים תָּב֣וֹאנָה׀ אֳנִיּ֣וֹת תַּרְשִׁ֗ישׁ נֹֽשְׂאוֹת֙ זָהָ֣ב וָכֶ֔סֶף שֶׁנְהַבִּ֥ים וְקוֹפִ֖ים וְתוּכִּיִּֽים׃ פ

‎22 ‏וַיִּגְדַּל֙ הַמֶּ֣לֶךְ שְׁלֹמֹ֔ה מִכֹּ֖ל מַלְכֵ֣י הָאָ֑רֶץ לְעֹ֖שֶׁר וְחָכְמָֽה׃

‎23 ‏וְכֹל֙ מַלְכֵ֣י הָאָ֔רֶץ מְבַקְשִׁ֖ים אֶת־פְּנֵ֣י שְׁלֹמֹ֑ה לִשְׁמֹ֙עַ֙ אֶת־חָכְמָת֔וֹ אֲשֶׁר־נָתַ֥ן הָאֱלֹהִ֖ים בְּלִבּֽוֹ׃

‎24 ‏וְהֵ֣ם מְבִיאִ֣ים אִ֣ישׁ מִנְחָת֡וֹ כְּלֵ֣י כֶסֶף֩ וּכְלֵ֨י זָהָ֤ב וּשְׂלָמוֹת֙ נֵ֣שֶׁק וּבְשָׂמִ֔ים סוּסִ֖ים וּפְרָדִ֑ים דְּבַר־שָׁנָ֖ה בְּשָׁנָֽה׃ פ

‎25 ‏וַיְהִ֨י לִשְׁלֹמֹ֜ה אַרְבַּעַת֩ אֲלָפִ֨ים אֻֽרְי֤וֹת סוּסִים֙ וּמַרְכָּב֔וֹת וּשְׁנֵים־עָשָׂ֥ר אֶ֖לֶף פָּרָשִׁ֑ים וַיַּנִּיחֵם֙ בְּעָרֵ֣י הָרֶ֔כֶב וְעִם־הַמֶּ֖לֶךְ בִּירוּשָׁלִָֽם׃

‎26 ‏וַיְהִ֥י מוֹשֵׁ֖ל בְּכָל־הַמְּלָכִ֑ים מִן־הַנָּהָר֙ וְעַד־אֶ֣רֶץ פְּלִשְׁתִּ֔ים וְעַ֖ד גְּב֥וּל מִצְרָֽיִם׃

‎27 ‏וַיִּתֵּ֨ן הַמֶּ֧לֶךְ אֶת־הַכֶּ֛סֶף בִּירוּשָׁלִַ֖ם כָּאֲבָנִ֑ים וְאֵ֣ת הָאֲרָזִ֗ים נָתַ֛ן כַּשִּׁקְמִ֥ים אֲשֶׁר־בַּשְּׁפֵלָ֖ה לָרֹֽב׃

‎28 ‏וּמוֹצִיאִ֨ים סוּסִ֧ים מִמִּצְרַ֛יִם לִשְׁלֹמֹ֖ה וּמִכָּל־הָאֲרָצֽוֹת׃

‎29 ‏וּשְׁאָר֙ דִּבְרֵ֣י שְׁלֹמֹ֔ה הָרִאשֹׁנִ֖ים וְהָאֲחֲרוֹנִ֑ים הֲלֹא־הֵ֣ם כְּתוּבִ֗ים עַל־דִּבְרֵי֙ נָתָ֣ן הַנָּבִ֔יא וְעַל־נְבוּאַ֞ת אֲחִיָּ֣ה הַשִּֽׁילוֹנִ֗י וּבַחֲזוֹת֙ יעדי יֶעְדּ֣וֹ הַחֹזֶ֔ה עַל־יָרָבְעָ֖ם בֶּן־נְבָֽט׃

‎30 ‏וַיִּמְלֹ֨ךְ שְׁלֹמֹ֧ה בִֽירוּשָׁלִַ֛ם עַל־כָּל־יִשְׂרָאֵ֖ל אַרְבָּעִ֥ים שָׁנָֽה׃

‎31 ‏וַיִּשְׁכַּ֤ב שְׁלֹמֹה֙ עִם־אֲבֹתָ֔יו וַֽיִּקְבְּרֻ֔הוּ בְּעִ֖יר דָּוִ֣יד אָבִ֑יו וַיִּמְלֹ֛ךְ רְחַבְעָ֥ם בְּנ֖וֹ תַּחְתָּֽיו׃ פ

1 ûmaləkaṯ-šəḇā’ šāmə‘â ’eṯ-šēm^a‘ šəlōmōh watāḇwō’ lənasswōṯ ’eṯ-šəlōmōh ḇəḥîḏwōṯ bîrûšālaim bəḥayil kāḇēḏ mə’ōḏ ûḡəmallîm nōśə’îm bəśāmîm wəzâāḇ lārōḇ wə’eḇen yəqārâ watāḇwō’ ’el-šəlōmōh watəḏabēr ‘immwō ’ēṯ kāl-’ăšer hāyâ ‘im-ləḇāḇāh:

2 wayyageḏ-lāh šəlōmōh ’eṯ-kāl-dəḇāreyhā wəlō’-ne‘əlam dāḇār miššəlōmōh ’ăšer lō’ higîḏ lāh:

3 watēre’ maləkaṯ-šəḇā’ ’ēṯ ḥāḵəmaṯ šəlōmōh wəhabayiṯ ’ăšer bānâ:

4 ûma’ăḵal šuləḥānwō ûmwōšaḇ ‘ăḇāḏāyw ûm^a‘ămaḏ məšārəṯāyw ûmaləbûšêhem ûmašəqāyw ûmaləbûšêhem w^a‘ălîyāṯwō ’ăšer y^a‘ăleh bêṯ yəhwâ wəlō’-hāyâ ‘wōḏ bāh rûḥa:

5 watō’mer ’el-hammeleḵə ’ĕmeṯ hadāḇār ’ăšer šām^a‘ətî bə’arəṣî ‘al-dəḇāreyḵā wə‘al-ḥāḵəmāṯeḵā:

6 wəlō’-he’ĕmanətî ləḏiḇərêhem ‘aḏ ’ăšer-bā’ṯî watirə’eynâ ‘ênay wəhinnēh lō’ hugaḏ-lî ḥăṣî marəbîṯ ḥāḵəmāṯeḵā yāsafətā ‘al-haššəmû‘â ’ăšer šāmā‘ətî:

7 ’ašərê ’ănāšeyḵā wə’ašərê ‘ăḇāḏeyḵā ’ēlleh hā‘ōməḏîm ləfāneyḵā tāmîḏ wəšōmə‘îm ’eṯ-ḥāḵəmāṯeḵā:

8 yəhî yəhwâ ’ĕlōheyḵā bārûḵə ’ăšer| ḥāfēṣ bəḵā ləṯitəḵā ‘al-kisə’wō ləmeleḵə layhwâ ’ĕlōheyḵā bə’ahăḇaṯ ’ĕlōheyḵā ’eṯ-yiśərā’ēl ləh^a‘ămîḏwō lə‘wōlām wayyitenəḵā ‘ălêhem ləmeleḵə l^a‘ăśwōṯ mišəpāṭ ûṣəḏāqâ:

9 watitēn lammeleḵə mē’â wə‘eśərîm| kikar zâāḇ ûḇəśāmîm lārōḇ mə’ōḏ wə’eḇen yəqārâ wəlō’ hāyâ kabōśem hahû’ ’ăšer-nāṯənâ maləkaṯ-šəḇā’ lammeleḵə šəlōmōh:

10 wəḡam-‘aḇəḏê ḥîrām ḥûrām wə‘aḇəḏê šəlōmōh ’ăšer-hēḇî’û zâāḇ mē’wōfîr hēḇî’û ‘ăṣê ’aləgûmmîm wə’eḇen yəqārâ:

11 wayy^a‘aś hammeleḵə ’eṯ-‘ăṣê hā’aləgûmmîm məsillwōṯ ləḇêṯ-yəhwâ ûləḇêṯ hammeleḵə wəḵinnōrwōṯ ûnəḇālîm laššārîm wəlō’-nirə’û ḵâēm ləfānîm bə’ereṣ yəhûḏâ:

12 wəhammeleḵə šəlōmōh nāṯan ləmaləkaṯ-šəḇā’ ’eṯ-kāl-ḥefəṣāh ’ăšer šā’ālâ milləḇaḏ ’ăšer-hēḇî’â ’el-hammeleḵə watahăfōḵə watēleḵə lə’arəṣāh hî’ w^a‘ăḇāḏeyhā: f

13 wayəhî mišəqal hazzâāḇ ’ăšer-bā’ lišəlōmōh bəšānâ ’eḥāṯ šēš mē’wōṯ wəšiššîm wāšēš kikərê zâāḇ:

14 ləḇaḏ mē’anəšê hatārîm wəhassōḥărîm məḇî’îm wəḵāl-maləḵê ‘ăraḇ ûf^aḥwōṯ hā’āreṣ məḇî’îm zâāḇ wāḵesef lišəlōmōh:

15 wayy^a‘aś hammeleḵə šəlōmōh mā’ṯayim ṣinnâ zâāḇ šāḥûṭ šēš mē’wōṯ zâāḇ šāḥûṭ y^a‘ăleh ‘al-haṣṣinnâ hā’eḥāṯ:

16 ûšəlōš-mē’wōṯ māḡinnîm zâāḇ šāḥûṭ šəlōš mē’wōṯ zâāḇ y^a‘ăleh ‘al-hammāḡēn hā’eḥāṯ wayyitənēm hammeleḵə bəḇêṯ y^a‘ar halləḇānwōn: f

17 wayy^a‘aś hammeleḵə kissē’-šēn gāḏwōl wayəṣapēhû zâāḇ ṭâwōr:

18 wəšēš m^a‘ălwōṯ lakissē’ wəḵeḇeš bazzâāḇ lakissē’ mā’ŏḥāzîm wəyāḏwōṯ mizzeh ûmizzeh ‘al-məqwōm haššāḇeṯ ûšənayim ’ărāywōṯ ‘ōməḏîm ’ēṣel hayyāḏwōṯ:

19 ûšənêm ‘āśār ’ărāywōṯ ‘ōməḏîm šām ‘al-šēš hamm^a‘ălwōṯ mizzeh ûmizzeh lō’-n^a‘ăśâ ḵēn ləḵāl-maməlāḵâ:

20 wəḵōl kəlê mašəqēh hammeleḵə šəlōmōh zâāḇ wəḵōl kəlê bêṯ-y^a‘ar halləḇānwōn zâāḇ sāḡûr ’ên kesef neḥəšāḇ bîmê šəlōmōh limə’ûmâ:

21 kî-’ŏnîywōṯ lammeleḵə hōləḵwōṯ tarəšîš ‘im ‘aḇəḏê ḥûrām ’^aḥaṯ ləšālwōš šānîm tāḇwō’nâ| ’ŏnîywōṯ tarəšîš nōśə’wōṯ zâāḇ wāḵesef šenəhabîm wəqwōfîm wəṯûkîyîm: f

22 wayyiḡədal hammeleḵə šəlōmōh mikōl maləḵê hā’āreṣ lə‘ōšer wəḥāḵəmâ:

23 wəḵōl maləḵê hā’āreṣ məḇaqəšîm ’eṯ-pənê šəlōmōh lišəmō‘a ’eṯ-ḥāḵəmāṯwō ’ăšer-nāṯan hā’ĕlōhîm bəlibwō:

24 wəhēm məḇî’îm ’îš minəḥāṯwō kəlê ḵesef ûḵəlê zâāḇ ûśəlāmwōṯ nēšeq ûḇəśāmîm sûsîm ûfərāḏîm dəḇar-šānâ bəšānâ: f

25 wayəhî lišəlōmōh ’arəb^a‘aṯ ’ălāfîm ’urəywōṯ sûsîm ûmarəkāḇwōṯ ûšənêm-‘āśār ’elef pārāšîm wayyannîḥēm bə‘ārê hāreḵeḇ wə‘im-hammeleḵə bîrûšālāim:

26 wayəhî mwōšēl bəḵāl-hamməlāḵîm min-hannâār wə‘aḏ-’ereṣ pəlišətîm wə‘aḏ gəḇûl miṣərāyim:

27 wayyitēn hammeleḵə ’eṯ-hakesef bîrûšālaim kā’ăḇānîm wə’ēṯ hā’ărāzîm nāṯan kaššiqəmîm ’ăšer-baššəfēlâ lārōḇ:

28 ûmwōṣî’îm sûsîm mimmiṣərayim lišəlōmōh ûmikāl-hā’ărāṣwōṯ:

29 ûšə’ār diḇərê šəlōmōh hāri’šōnîm wəhā’ăḥărwōnîm hălō’-hēm kəṯûḇîm ‘al-diḇərê nāṯān hannāḇî’ wə‘al-nəḇû’aṯ ’ăḥîyâ haššîlwōnî ûḇ^aḥăzwōṯ ye‘ədî ye‘ədwō h^aḥōzeh ‘al-yārāḇə‘ām ben-nəḇāṭ:

30 wayyiməlōḵə šəlōmōh ḇîrûšālaim ‘al-kāl-yiśərā’ēl ’arəbā‘îm šānâ:

31 wayyišəkaḇ šəlōmōh ‘im-’ăḇōṯāyw wayyiqəbəruhû bə‘îr dāwîḏ ’āḇîw wayyiməlōḵə rəḥaḇə‘ām bənwō t^aḥətāyw: f