2 Chronicles (2 Divrey Yamim) Chapter 10

‎1 ‏וַיֵּ֥לֶךְ רְחַבְעָ֖ם שְׁכֶ֑מָה כִּ֥י שְׁכֶ֛ם בָּ֥אוּ כָל־יִשְׂרָאֵ֖ל לְהַמְלִ֥יךְ אֹתֽוֹ׃

‎2 ‏וַיְהִ֞י כִּשְׁמֹ֨עַ יָרָבְעָ֤ם בֶּן־נְבָט֙ וְה֣וּא בְמִצְרַ֔יִם אֲשֶׁ֣ר בָּרַ֔ח מִפְּנֵ֖י שְׁלֹמֹ֣ה הַמֶּ֑לֶךְ וַיָּ֥שָׁב יָרָבְעָ֖ם מִמִּצְרָֽיִם׃

‎3 ‏וַֽיִּשְׁלְחוּ֙ וַיִּקְרְאוּ־ל֔וֹ וַיָּבֹ֥א יָרָבְעָ֖ם וְכָל־יִשְׂרָאֵ֑ל וַֽיְדַבְּר֔וּ אֶל־רְחַבְעָ֖ם לֵאמֹֽר׃

‎4 ‏אָבִ֖יךָ הִקְשָׁ֣ה אֶת־עֻלֵּ֑נוּ וְעַתָּ֡ה הָקֵל֩ מֵעֲבֹדַ֨ת אָבִ֜יךָ הַקָּשָׁ֗ה וּמֵעֻלּ֧וֹ הַכָּבֵ֛ד אֲשֶׁר־נָתַ֥ן עָלֵ֖ינוּ וְנַֽעַבְדֶֽךָּ׃

‎5 ‏וַיֹּ֣אמֶר אֲלֵהֶ֗ם ע֛וֹד שְׁלֹ֥שֶׁת יָמִ֖ים וְשׁ֣וּבוּ אֵלָ֑י וַיֵּ֖לֶךְ הָעָֽם׃ ס

‎6 ‏וַיִּוָּעַ֞ץ הַמֶּ֣לֶךְ רְחַבְעָ֗ם אֶת־הַזְּקֵנִים֙ אֲשֶׁר־הָי֣וּ עֹֽמְדִ֗ים לִפְנֵי֙ שְׁלֹמֹ֣ה אָבִ֔יו בִּֽהְיֹת֥וֹ חַ֖י לֵאמֹ֑ר אֵ֚יךְ אַתֶּ֣ם נֽוֹעָצִ֔ים לְהָשִׁ֥יב לָֽעָם־הַזֶּ֖ה דָּבָֽר׃

‎7 ‏וַיְדַבְּר֨וּ אֵלָ֜יו לֵאמֹ֗ר אִם־תִּֽהְיֶ֨ה לְט֜וֹב לְהָעָ֤ם הַזֶּה֙ וּרְצִיתָ֔ם וְדִבַּרְתָּ֥ אֲלֵהֶ֖ם דְּבָרִ֣ים טוֹבִ֑ים וְהָי֥וּ לְךָ֛ עֲבָדִ֖ים כָּל־הַיָּמִֽים׃

‎8 ‏וַֽיַּעֲזֹ֛ב אֶת־עֲצַ֥ת הַזְּקֵנִ֖ים אֲשֶׁ֣ר יְעָצֻ֑הוּ וַיִּוָּעַ֗ץ אֶת־הַיְלָדִים֙ אֲשֶׁ֣ר גָּדְל֣וּ אִתּ֔וֹ הָעֹמְדִ֖ים לְפָנָֽיו׃

‎9 ‏וַיֹּ֣אמֶר אֲלֵהֶ֗ם מָ֚ה אַתֶּ֣ם נֽוֹעָצִ֔ים וְנָשִׁ֥יב דָּבָ֖ר אֶת־הָעָ֣ם הַזֶּ֑ה אֲשֶׁ֨ר דִּבְּר֤וּ אֵלַי֙ לֵאמֹ֔ר הָקֵל֙ מִן־הָעֹ֔ל אֲשֶׁר־נָתַ֥ן אָבִ֖יךָ עָלֵֽינוּ׃

‎10 ‏וַיְדַבְּר֣וּ אִתּ֗וֹ הַיְלָדִים֙ אֲשֶׁ֨ר גָּדְל֣וּ אִתּוֹ֮ לֵאמֹר֒ כֹּֽה־תֹאמַ֡ר לָעָם֩ אֲשֶׁר־דִּבְּר֨וּ אֵלֶ֜יךָ לֵאמֹ֗ר אָבִ֙יךָ֙ הִכְבִּ֣יד אֶת־עֻלֵּ֔נוּ וְאַתָּ֖ה הָקֵ֣ל מֵעָלֵ֑ינוּ כֹּ֚ה תֹּאמַ֣ר אֲלֵהֶ֔ם קָֽטָנִּ֥י עָבָ֖ה מִמָּתְנֵ֥י אָבִֽי׃

‎11 ‏וְעַתָּ֗ה אָבִי֙ הֶעְמִ֤יס עֲלֵיכֶם֙ עֹ֣ל כָּבֵ֔ד וַאֲנִ֖י אֹסִ֣יף עַֽל־עֻלְּכֶ֑ם אָבִ֗י יִסַּ֤ר אֶתְכֶם֙ בַּשּׁוֹטִ֔ים וַאֲנִ֖י בָּֽעֲקְרַבִּֽים׃ ס

‎12 ‏וַיָּבֹ֨א יָרָבְעָ֧ם וְכָל־הָעָ֛ם אֶל־רְחַבְעָ֖ם בַּיּ֣וֹם הַשְּׁלִשִׁ֑י כַּאֲשֶׁ֨ר דִּבֶּ֤ר הַמֶּ֙לֶךְ֙ לֵאמֹ֔ר שׁ֥וּבוּ אֵלַ֖י בַּיּ֥וֹם הַשְּׁלִשִֽׁי׃

‎13 ‏וַיַּעֲנֵ֥ם הַמֶּ֖לֶךְ קָשָׁ֑ה וַֽיַּעֲזֹב֙ הַמֶּ֣לֶךְ רְחַבְעָ֔ם אֵ֖ת עֲצַ֥ת הַזְּקֵנִֽים׃

‎14 ‏וַיְדַבֵּ֣ר אֲלֵהֶ֗ם כַּעֲצַ֤ת הַיְלָדִים֙ לֵאמֹ֔ר אַכְבִּיד֙ אֶֽת־עֻלְּכֶ֔ם וַאֲנִ֖י אֹסִ֣יף עָלָ֑יו אָבִ֗י יִסַּ֤ר אֶתְכֶם֙ בַּשּׁוֹטִ֔ים וַאֲנִ֖י בָּעֲקְרַבִּֽים׃

‎15 ‏וְלֹֽא־שָׁמַ֥ע הַמֶּ֖לֶךְ אֶל־הָעָ֑ם כִּֽי־הָיְתָ֤ה נְסִבָּה֙ מֵעִ֣ם הָֽאֱלֹהִ֔ים לְמַעַן֩ הָקִ֨ים יְהוָ֜ה אֶת־דְּבָר֗וֹ אֲשֶׁ֤ר דִּבֶּר֙ בְּיַד֙ אֲחִיָּ֣הוּ הַשִּֽׁלוֹנִ֔י אֶל־יָרָבְעָ֖ם בֶּן־נְבָֽט׃

‎16 ‏וְכָל־יִשְׂרָאֵ֗ל כִּ֠י לֹא־שָׁמַ֣ע הַמֶּלֶךְ֮ לָהֶם֒ וַיָּשִׁ֣יבוּ הָעָ֣ם אֶת־הַמֶּ֣לֶךְ׀ לֵאמֹ֡ר מַה־לָּנוּ֩ חֵ֨לֶק בְּדָוִ֜יד וְלֹֽא־נַחֲלָ֣ה בְּבֶן־יִשַׁ֗י אִ֤ישׁ לְאֹהָלֶ֙יךָ֙ יִשְׂרָאֵ֔ל עַתָּ֕ה רְאֵ֥ה בֵיתְךָ֖ דָּוִ֑יד וַיֵּ֥לֶךְ כָּל־יִשְׂרָאֵ֖ל לְאֹהָלָֽיו׃ ס

‎17 ‏וּבְנֵ֣י יִשְׂרָאֵ֔ל הַיֹּֽשְׁבִ֖ים בְּעָרֵ֣י יְהוּדָ֑ה וַיִּמְלֹ֥ךְ עֲלֵיהֶ֖ם רְחַבְעָֽם׃

‎18 ‏וַיִּשְׁלַ֞ח הַמֶּ֣לֶךְ רְחַבְעָ֗ם אֶת־הֲדֹרָם֙ אֲשֶׁ֣ר עַל־הַמַּ֔ס וַיִּרְגְּמוּ־ב֧וֹ בְנֵֽי־יִשְׂרָאֵ֛ל אֶ֖בֶן וַיָּמֹ֑ת וְהַמֶּ֣לֶךְ רְחַבְעָ֗ם הִתְאַמֵּץ֙ לַֽעֲל֣וֹת בַּמֶּרְכָּבָ֔ה לָנ֖וּס יְרוּשָׁלִָֽם׃ ס

‎19 ‏וַיִּפְשְׁע֤וּ יִשְׂרָאֵל֙ בְּבֵ֣ית דָּוִ֔יד עַ֖ד הַיּ֥וֹם הַזֶּֽה׃ ס

1 wayyēleḵə rəḥaḇə‘ām šəḵemâ kî šəḵem bā’û ḵāl-yiśərā’ēl ləhaməlîḵə ’ōṯwō:

2 wayəhî kišəmō‘a yārāḇə‘ām ben-nəḇāṭ wəhû’ ḇəmiṣərayim ’ăšer bār^aḥ mipənê šəlōmōh hammeleḵə wayyāšāḇ yārāḇə‘ām mimmiṣərāyim:

3 wayyišələḥû wayyiqərə’û-lwō wayyāḇō’ yārāḇə‘ām wəḵāl-yiśərā’ēl wayəḏabərû ’el-rəḥaḇə‘ām lē’mōr:

4 ’āḇîḵā hiqəšâ ’eṯ-‘ullēnû wə‘atâ hāqēl mē‘ăḇōḏaṯ ’āḇîḵā haqqāšâ ûmē‘ullwō hakāḇēḏ ’ăšer-nāṯan ‘ālênû wən^a‘aḇəḏeḵḵā:

5 wayyō’mer ’ălēhem ‘wōḏ šəlōšeṯ yāmîm wəšûḇû ’ēlāy wayyēleḵə hā‘ām: s

6 wayyiûā‘aṣ hammeleḵə rəḥaḇə‘ām ’eṯ-hazzəqēnîm ’ăšer-hāyû ‘ōməḏîm lifənê šəlōmōh ’āḇîw bihəyōṯwō ḥay lē’mōr ’êḵə ’atem nwō‘āṣîm ləhāšîḇ lā‘ām-hazzeh dāḇār:

7 wayəḏabərû ’ēlāyw lē’mōr ’im-tihəyeh ləṭwōḇ ləhā‘ām hazzeh ûrəṣîṯām wəḏibarətā ’ălēhem dəḇārîm ṭwōḇîm wəhāyû ləḵā ‘ăḇāḏîm kāl-hayyāmîm:

8 wayy^a‘ăzōḇ ’eṯ-‘ăṣaṯ hazzəqēnîm ’ăšer yə‘āṣuhû wayyiûā‘aṣ ’eṯ-hayəlāḏîm ’ăšer gāḏəlû ’itwō hā‘ōməḏîm ləfānāyw:

9 wayyō’mer ’ălēhem mâ ’atem nwō‘āṣîm wənāšîḇ dāḇār ’eṯ-hā‘ām hazzeh ’ăšer dibərû ’ēlay lē’mōr hāqēl min-hā‘ōl ’ăšer-nāṯan ’āḇîḵā ‘ālênû:

10 wayəḏabərû ’itwō hayəlāḏîm ’ăšer gāḏəlû ’itwō lē’mōr kōh-ṯō’mar lā‘ām ’ăšer-dibərû ’ēleyḵā lē’mōr ’āḇîḵā hiḵəbîḏ ’eṯ-‘ullēnû wə’atâ hāqēl mē‘ālênû kōh tō’mar ’ălēhem qāṭānnî ‘āḇâ mimmāṯənê ’āḇî:

11 wə‘atâ ’āḇî he‘əmîs ‘ălêḵem ‘ōl kāḇēḏ wa’ănî ’ōsîf ‘al-‘ulləḵem ’āḇî yissar ’eṯəḵem baššwōṭîm wa’ănî bā‘ăqərabîm: s

12 wayyāḇō’ yārāḇə‘ām wəḵāl-hā‘ām ’el-rəḥaḇə‘ām bayywōm haššəlišî ka’ăšer diber hammeleḵə lē’mōr šûḇû ’ēlay bayywōm haššəlišî:

13 wayy^a‘ănēm hammeleḵə qāšâ wayy^a‘ăzōḇ hammeleḵə rəḥaḇə‘ām ’ēṯ ‘ăṣaṯ hazzəqēnîm:

14 wayəḏabēr ’ălēhem k^a‘ăṣaṯ hayəlāḏîm lē’mōr ’aḵəbîḏ ’eṯ-‘ulləḵem wa’ănî ’ōsîf ‘ālāyw ’āḇî yissar ’eṯəḵem baššwōṭîm wa’ănî bā‘ăqərabîm:

15 wəlō’-šām^a‘ hammeleḵə ’el-hā‘ām kî-hāyəṯâ nəsibâ mē‘im hā’ĕlōhîm ləm^a‘an hāqîm yəhwâ ’eṯ-dəḇārwō ’ăšer diber bəyaḏ ’ăḥîyâû haššilwōnî ’el-yārāḇə‘ām ben-nəḇāṭ:

16 wəḵāl-yiśərā’ēl kî lō’-šām^a‘ hammeleḵə lâem wayyāšîḇû hā‘ām ’eṯ-hammeleḵə| lē’mōr mah-llānû ḥēleq bəḏāwîḏ wəlō’-n^aḥălâ bəḇen-yišay ’îš lə’ōhāleyḵā yiśərā’ēl ‘atâ rə’ēh ḇêṯəḵā dāwîḏ wayyēleḵə kāl-yiśərā’ēl lə’ōhālāyw: s

17 ûḇənê yiśərā’ēl hayyōšəḇîm bə‘ārê yəhûḏâ wayyiməlōḵə ‘ălêhem rəḥaḇə‘ām:

18 wayyišəl^aḥ hammeleḵə rəḥaḇə‘ām ’eṯ-hăḏōrām ’ăšer ‘al-hammas wayyirəgəmû-ḇwō ḇənê-yiśərā’ēl ’eḇen wayyāmōṯ wəhammeleḵə rəḥaḇə‘ām hiṯə’ammēṣ l^a‘ălwōṯ bammerəkāḇâ lānûs yərûšālāim: s

19 wayyifəšə‘û yiśərā’ēl bəḇêṯ dāwîḏ ‘aḏ hayywōm hazzeh: s