2 Chronicles (2 Divrey Yamim) Chapter 12

‎1 ‏וַיְהִ֗י כְּהָכִ֞ין מַלְכ֤וּת רְחַבְעָם֙ וּכְחֶזְקָת֔וֹ עָזַ֖ב אֶת־תּוֹרַ֣ת יְהוָ֑ה וְכָל־יִשְׂרָאֵ֖ל עִמּֽוֹ׃ פ

‎2 ‏וַיְהִ֞י בַּשָּׁנָ֤ה הַֽחֲמִישִׁית֙ לַמֶּ֣לֶךְ רְחַבְעָ֔ם עָלָ֛ה שִׁישַׁ֥ק מֶֽלֶךְ־מִצְרַ֖יִם עַל־יְרוּשָׁלִָ֑ם כִּ֥י מָעֲל֖וּ בַּיהוָֽה׃

‎3 ‏בְּאֶ֤לֶף וּמָאתַ֙יִם֙ רֶ֔כֶב וּבְשִׁשִּׁ֥ים אֶ֖לֶף פָּרָשִׁ֑ים וְאֵ֣ין מִסְפָּ֗ר לָעָ֞ם אֲשֶׁר־בָּ֤אוּ עִמּוֹ֙ מִמִּצְרַ֔יִם לוּבִ֥ים סֻכִּיִּ֖ים וְכוּשִֽׁים׃

‎4 ‏וַיִּלְכֹּ֛ד אֶת־עָרֵ֥י הַמְּצֻר֖וֹת אֲשֶׁ֣ר לִֽיהוּדָ֑ה וַיָּבֹ֖א עַד־יְרוּשָׁלִָֽם׃ ס

‎5 ‏וּֽשְׁמַֽעְיָ֤ה הַנָּבִיא֙ בָּ֣א אֶל־רְחַבְעָ֔ם וְשָׂרֵ֣י יְהוּדָ֔ה אֲשֶׁר־נֶאֶסְפ֥וּ אֶל־יְרוּשָׁלִַ֖ם מִפְּנֵ֣י שִׁישָׁ֑ק וַיֹּ֨אמֶר לָהֶ֜ם כֹּה־אָמַ֣ר יְהוָ֗ה אַתֶּם֙ עֲזַבְתֶּ֣ם אֹתִ֔י וְאַף־אֲנִ֛י עָזַ֥בְתִּי אֶתְכֶ֖ם בְּיַד־שִׁישָֽׁק׃

‎6 ‏וַיִּכָּנְע֥וּ שָׂרֵֽי־יִשְׂרָאֵ֖ל וְהַמֶּ֑לֶךְ וַיֹּאמְר֖וּ צַדִּ֥יק׀ יְהוָֽה׃

‎7 ‏וּבִרְא֤וֹת יְהוָה֙ כִּ֣י נִכְנָ֔עוּ הָיָה֩ דְבַר־יְהוָה֙ אֶל־שְׁמַֽעְיָ֧ה׀ לֵאמֹ֛ר נִכְנְע֖וּ לֹ֣א אַשְׁחִיתֵ֑ם וְנָתַתִּ֨י לָהֶ֤ם כִּמְעַט֙ לִפְלֵיטָ֔ה וְלֹא־תִתַּ֧ךְ חֲמָתִ֛י בִּירוּשָׁלִַ֖ם בְּיַד־שִׁישָֽׁק׃

‎8 ‏כִּ֥י יִהְיוּ־ל֖וֹ לַעֲבָדִ֑ים וְיֵדְעוּ֙ עֲב֣וֹדָתִ֔י וַעֲבוֹדַ֖ת מַמְלְכ֥וֹת הָאֲרָצֽוֹת׃ ס

‎9 ‏וַיַּ֨עַל שִׁישַׁ֥ק מֶֽלֶךְ־מִצְרַיִם֮ עַל־יְרוּשָׁלִַם֒ וַיִּקַּ֞ח אֶת־אֹצְר֣וֹת בֵּית־יְהוָ֗ה וְאֶת־אֹֽצְרוֹת֙ בֵּ֣ית הַמֶּ֔לֶךְ אֶת־הַכֹּ֖ל לָקָ֑ח וַיִּקַּח֙ אֶת־מָגִנֵּ֣י הַזָּהָ֔ב אֲשֶׁ֥ר עָשָׂ֖ה שְׁלֹמֹֽה׃

‎10 ‏וַיַּ֨עַשׂ הַמֶּ֤לֶךְ רְחַבְעָם֙ תַּחְתֵּיהֶ֔ם מָגִנֵּ֖י נְחֹ֑שֶׁת וְהִפְקִ֗יד עַל־יַד֙ שָׂרֵ֣י הָרָצִ֔ים הַשֹּׁ֣מְרִ֔ים פֶּ֖תַח בֵּ֥ית הַמֶּֽלֶךְ׃

‎11 ‏וַיְהִ֛י מִדֵּי־ב֥וֹא הַמֶּ֖לֶךְ בֵּ֣ית יְהוָ֑ה בָּ֤אוּ הָרָצִים֙ וּנְשָׂא֔וּם וֶהֱשִׁב֖וּם אֶל־תָּ֥א הָרָצִֽים׃

‎12 ‏וּבְהִכָּֽנְע֗וֹ שָׁ֤ב מִמֶּ֙נּוּ֙ אַף־יְהוָ֔ה וְלֹ֥א לְהַשְׁחִ֖ית לְכָלָ֑ה וְגַם֙ בִּֽיהוּדָ֔ה הָיָ֖ה דְּבָרִ֥ים טוֹבִֽים׃ ס

‎13 ‏וַיִּתְחַזֵּ֞ק הַמֶּ֧לֶךְ רְחַבְעָ֛ם בִּירוּשָׁלִַ֖ם וַיִּמְלֹ֑ךְ כִּ֣י בֶן־אַרְבָּעִ֣ים וְאַחַ֣ת שָׁנָה֩ רְחַבְעָ֨ם בְּמָלְכ֜וֹ וּֽשֲׁבַ֨ע עֶשְׂרֵ֥ה שָׁנָ֣ה׀ מָלַ֣ךְ בִּֽירוּשָׁלִַ֗ם הָ֠עִיר אֲשֶׁר־בָּחַ֨ר יְהוָ֜ה לָשׂ֨וּם אֶת־שְׁמ֥וֹ שָׁם֙ מִכֹּל֙ שִׁבְטֵ֣י יִשְׂרָאֵ֔ל וְשֵׁ֣ם אִמּ֔וֹ נַעֲמָ֖ה הָֽעַמֹּנִֽית׃

‎14 ‏וַיַּ֖עַשׂ הָרָ֑ע כִּ֣י לֹ֤א הֵכִין֙ לִבּ֔וֹ לִדְר֖וֹשׁ אֶת־יְהוָֽה׃ ס

‎15 ‏וְדִבְרֵ֣י רְחַבְעָ֗ם הָרִאשֹׁנִים֙ וְהָאֲ֣חַרוֹנִ֔ים הֲלֹא־הֵ֨ם כְּתוּבִ֜ים בְּדִבְרֵ֨י שְׁמַֽעְיָ֧ה הַנָּבִ֛יא וְעִדּ֥וֹ הַחֹזֶ֖ה לְהִתְיַחֵ֑שׂ וּמִלְחֲמ֧וֹת רְחַבְעָ֛ם וְיָרָבְעָ֖ם כָּל־הַיָּמִֽים׃

‎16 ‏וַיִּשְׁכַּ֤ב רְחַבְעָם֙ עִם־אֲבֹתָ֔יו וַיִּקָּבֵ֖ר בְּעִ֣יר דָּוִ֑יד וַיִּמְלֹ֛ךְ אֲבִיָּ֥ה בְנ֖וֹ תַּחְתָּֽיו׃ פ

1 wayəhî kəhāḵîn maləḵûṯ rəḥaḇə‘ām ûḵəḥezəqāṯwō ‘āzaḇ ’eṯ-twōraṯ yəhwâ wəḵāl-yiśərā’ēl ‘immwō: f

2 wayəhî baššānâ h^aḥămîšîṯ lammeleḵə rəḥaḇə‘ām ‘ālâ šîšaq meleḵə-miṣərayim ‘al-yərûšālāim kî mā‘ălû bayhwâ:

3 bə’elef ûmā’ṯayim reḵeḇ ûḇəšiššîm ’elef pārāšîm wə’ên misəpār lā‘ām ’ăšer-bā’û ‘immwō mimmiṣərayim lûḇîm sukîyîm wəḵûšîm:

4 wayyiləkōḏ ’eṯ-‘ārê hamməṣurwōṯ ’ăšer lîhûḏâ wayyāḇō’ ‘aḏ-yərûšālāim: s

5 ûšəm^a‘əyâ hannāḇî’ bā’ ’el-rəḥaḇə‘ām wəśārê yəhûḏâ ’ăšer-ne’esəfû ’el-yərûšālaim mipənê šîšāq wayyō’mer lâem kōh-’āmar yəhwâ ’atem ‘ăzaḇətem ’ōṯî wə’af-’ănî ‘āzaḇətî ’eṯəḵem bəyaḏ-šîšāq:

6 wayyikānə‘û śārê-yiśərā’ēl wəhammeleḵə wayyō’mərû ṣadîq| yəhwâ:

7 ûḇirə’wōṯ yəhwâ kî niḵənā‘û hāyâ ḏəḇar-yəhwâ ’el-šəm^a‘əyâ| lē’mōr niḵənə‘û lō’ ’ašəḥîṯēm wənāṯatî lâem kimə‘aṭ lifəlêṭâ wəlō’-ṯitaḵə ḥămāṯî bîrûšālaim bəyaḏ-šîšāq:

8 kî yihəyû-lwō l^a‘ăḇāḏîm wəyēḏə‘û ‘ăḇwōḏāṯî w^a‘ăḇwōḏaṯ mamələḵwōṯ hā’ărāṣwōṯ: s

9 wayy^a‘al šîšaq meleḵə-miṣərayim ‘al-yərûšālaim wayyiqq^aḥ ’eṯ-’ōṣərwōṯ bêṯ-yəhwâ wə’eṯ-’ōṣərwōṯ bêṯ hammeleḵə ’eṯ-hakōl lāqāḥ wayyiqq^aḥ ’eṯ-māḡinnê hazzâāḇ ’ăšer ‘āśâ šəlōmōh:

10 wayy^a‘aś hammeleḵə rəḥaḇə‘ām t^aḥətêhem māḡinnê nəḥōšeṯ wəhifəqîḏ ‘al-yaḏ śārê hārāṣîm haššōmərîm peṯ^aḥ bêṯ hammeleḵə:

11 wayəhî midê-ḇwō’ hammeleḵə bêṯ yəhwâ bā’û hārāṣîm ûnəśā’ûm wehĕšiḇûm ’el-tā’ hārāṣîm:

12 ûḇəhikānə‘wō šāḇ mimmennû ’af-yəhwâ wəlō’ ləhašəḥîṯ ləḵālâ wəḡam bîhûḏâ hāyâ dəḇārîm ṭwōḇîm: s

13 wayyiṯəḥazzēq hammeleḵə rəḥaḇə‘ām bîrûšālaim wayyiməlōḵə kî ḇen-’arəbā‘îm wə’^aḥaṯ šānâ rəḥaḇə‘ām bəmāləḵwō ûšăḇ^a‘ ‘eśərēh šānâ| mālaḵə bîrûšālaim hā‘îr ’ăšer-bāḥar yəhwâ lāśûm ’eṯ-šəmwō šām mikōl šiḇəṭê yiśərā’ēl wəšēm ’immwō n^a‘ămâ hā‘ammōnîṯ:

14 wayy^a‘aś hārā‘ kî lō’ hēḵîn libwō liḏərwōš ’eṯ-yəhwâ: s

15 wəḏiḇərê rəḥaḇə‘ām hāri’šōnîm wəhā’ăḥarwōnîm hălō’-hēm kəṯûḇîm bəḏiḇərê šəm^a‘əyâ hannāḇî’ wə‘idwō h^aḥōzeh ləhiṯəy^aḥēś ûmiləḥămwōṯ rəḥaḇə‘ām wəyārāḇə‘ām kāl-hayyāmîm:

16 wayyišəkaḇ rəḥaḇə‘ām ‘im-’ăḇōṯāyw wayyiqqāḇēr bə‘îr dāwîḏ wayyiməlōḵə ’ăḇîyâ ḇənwō t^aḥətāyw: f