2 Chronicles (2 Divrey Yamim) Chapter 25

‎1 ‏בֶּן־עֶשְׂרִ֨ים וְחָמֵ֤שׁ שָׁנָה֙ מָלַ֣ךְ אֲמַצְיָ֔הוּ וְעֶשְׂרִ֣ים וָתֵ֙שַׁע֙ שָׁנָ֔ה מָלַ֖ךְ בִּירוּשָׁלִָ֑ם וְשֵׁ֣ם אִמּ֔וֹ יְהוֹעַדָּ֖ן מִירוּשָׁלָֽיִם׃

‎2 ‏וַיַּ֥עַשׂ הַיָּשָׁ֖ר בְּעֵינֵ֣י יְהוָ֑ה רַ֕ק לֹ֖א בְּלֵבָ֥ב שָׁלֵֽם׃

‎3 ‏וַיְהִ֕י כַּאֲשֶׁ֛ר חָזְקָ֥ה הַמַּמְלָכָ֖ה עָלָ֑יו וַֽיַּהֲרֹג֙ אֶת־עֲבָדָ֔יו הַמַּכִּ֖ים אֶת־הַמֶּ֥לֶךְ אָבִֽיו׃

‎4 ‏וְאֶת־בְּנֵיהֶ֖ם לֹ֣א הֵמִ֑ית כִּ֣י כַכָּת֣וּב בַּתּוֹרָ֡ה בְּסֵ֣פֶר מֹשֶׁה֩ אֲשֶׁר־צִוָּ֨ה יְהוָ֜ה לֵאמֹ֗ר לֹא־יָמ֨וּתוּ אָב֤וֹת עַל־בָּנִים֙ וּבָנִים֙ לֹא־יָמ֣וּתוּ עַל־אָב֔וֹת כִּ֛י אִ֥ישׁ בְּחֶטְא֖וֹ יָמֽוּתוּ׃ פ

‎5 ‏וַיִּקְבֹּ֤ץ אֲמַצְיָ֙הוּ֙ אֶת־יְהוּדָ֔ה וַיַּֽעֲמִידֵ֣ם לְבֵית־אָב֗וֹת לְשָׂרֵ֤י הָאֲלָפִים֙ וּלְשָׂרֵ֣י הַמֵּא֔וֹת לְכָל־יְהוּדָ֖ה וּבִנְיָמִ֑ן וַֽיִּפְקְדֵ֗ם לְמִבֶּ֨ן עֶשְׂרִ֤ים שָׁנָה֙ וָמַ֔עְלָה וַיִּמְצָאֵ֗ם שְׁלֹשׁ־מֵא֨וֹת אֶ֤לֶף בָּחוּר֙ יוֹצֵ֣א צָבָ֔א אֹחֵ֖ז רֹ֥מַח וְצִנָּֽה׃

‎6 ‏וַיִּשְׂכֹּ֣ר מִיִּשְׂרָאֵ֗ל מֵ֥אָה אֶ֛לֶף גִּבּ֥וֹר חָ֖יִל בְּמֵאָ֥ה כִכַּר־כָּֽסֶף׃

‎7 ‏וְאִ֣ישׁ הָאֱלֹהִ֗ים בָּ֤א אֵלָיו֙ לֵאמֹ֔ר הַמֶּ֕לֶךְ אַל־יָבֹ֥א עִמְּךָ֖ צְבָ֣א יִשְׂרָאֵ֑ל כִּ֣י אֵ֤ין יְהוָה֙ עִם־יִשְׂרָאֵ֔ל כֹּ֖ל בְּנֵ֥י אֶפְרָֽיִם׃

‎8 ‏כִּ֚י אִם־בֹּ֣א אַתָּ֔ה עֲשֵׂ֖ה חֲזַ֣ק לַמִּלְחָמָ֑ה יַכְשִֽׁילְךָ֤ הָֽאֱלֹהִים֙ לִפְנֵ֣י אוֹיֵ֔ב כִּ֥י יֶשׁ־כֹּ֛חַ בֵּאלֹהִ֖ים לַעְז֥וֹר וּלְהַכְשִֽׁיל׃

‎9 ‏וַיֹּ֤אמֶר אֲמַצְיָ֙הוּ֙ לְאִ֣ישׁ הָאֱלֹהִ֔ים וּמַֽה־לַּעֲשׂוֹת֙ לִמְאַ֣ת הַכִּכָּ֔ר אֲשֶׁ֥ר נָתַ֖תִּי לִגְד֣וּד יִשְׂרָאֵ֑ל וַיֹּ֙אמֶר֙ אִ֣ישׁ הָֽאֱלֹהִ֔ים יֵ֚שׁ לַֽיהוָ֔ה לָ֥תֶת לְךָ֖ הַרְבֵּ֥ה מִזֶּֽה׃

‎10 ‏וַיַּבְדִּילֵ֣ם אֲמַצְיָ֗הוּ לְהַגְּדוּד֙ אֲשֶׁר־בָּ֤א אֵלָיו֙ מֵֽאֶפְרַ֔יִם לָלֶ֖כֶת לִמְקוֹמָ֑ם וַיִּ֨חַר אַפָּ֤ם מְאֹד֙ בִּֽיהוּדָ֔ה וַיָּשׁ֥וּבוּ לִמְקוֹמָ֖ם בָּחֳרִי־אָֽף׃ פ

‎11 ‏וַאֲמַצְיָ֙הוּ֙ הִתְחַזַּ֔ק וַיִּנְהַג֙ אֶת־עַמּ֔וֹ וַיֵּ֖לֶךְ גֵּ֣יא הַמֶּ֑לַח וַיַּ֥ךְ אֶת־בְּנֵי־שֵׂעִ֖יר עֲשֶׂ֥רֶת אֲלָפִֽים׃

‎12 ‏וַעֲשֶׂ֨רֶת אֲלָפִ֜ים חַיִּ֗ים שָׁבוּ֙ בְּנֵ֣י יְהוּדָ֔ה וַיְבִיא֖וּם לְרֹ֣אשׁ הַסָּ֑לַע וַיַּשְׁלִיכ֛וּם מֵֽרֹאשׁ־הַסֶּ֖לַע וְכֻלָּ֥ם נִבְקָֽעוּ׃ ס

‎13 ‏וּבְנֵ֣י הַגְּד֗וּד אֲשֶׁ֨ר הֵשִׁ֤יב אֲמַצְיָ֙הוּ֙ מִלֶּ֤כֶת עִמּוֹ֙ לַמִּלְחָמָ֔ה וַֽיִּפְשְׁטוּ֙ בְּעָרֵ֣י יְהוּדָ֔ה מִשֹּׁמְר֖וֹן וְעַד־בֵּ֣ית חוֹר֑וֹן וַיַּכּ֤וּ מֵהֶם֙ שְׁלֹ֣שֶׁת אֲלָפִ֔ים וַיָּבֹ֖זּוּ בִּזָּ֥ה רַבָּֽה׃ ס

‎14 ‏וַיְהִ֗י אַחֲרֵ֨י ב֤וֹא אֲמַצְיָ֙הוּ֙ מֵֽהַכּ֣וֹת אֶת־אֲדוֹמִ֔ים וַיָּבֵ֗א אֶת־אֱלֹהֵי֙ בְּנֵ֣י שֵׂעִ֔יר וַיַּֽעֲמִידֵ֥ם ל֖וֹ לֵאלֹהִ֑ים וְלִפְנֵיהֶ֥ם יִֽשְׁתַּחֲוֶ֖ה וְלָהֶ֥ם יְקַטֵּֽר׃

‎15 ‏וַיִּֽחַר־אַ֥ף יְהוָ֖ה בַּאֲמַצְיָ֑הוּ וַיִּשְׁלַ֤ח אֵלָיו֙ נָבִ֔יא וַיֹּ֣אמֶר ל֗וֹ לָ֤מָּה דָרַ֙שְׁתָּ֙ אֶת־אֱלֹהֵ֣י הָעָ֔ם אֲשֶׁ֛ר לֹא־הִצִּ֥ילוּ אֶת־עַמָּ֖ם מִיָּדֶֽךָ׃

‎16 ‏וַיְהִ֣י׀ בְּדַבְּר֣וֹ אֵלָ֗יו וַיֹּ֤אמֶר לוֹ֙ הַלְיוֹעֵ֤ץ לַמֶּ֙לֶךְ֙ נְתַנּ֔וּךָ חֲדַל־לְךָ֖ לָ֣מָּה יַכּ֑וּךָ וַיֶּחְדַּ֣ל הַנָּבִ֗יא וַיֹּ֙אמֶר֙ יָדַ֗עְתִּי כִּֽי־יָעַ֤ץ אֱלֹהִים֙ לְהַשְׁחִיתֶ֔ךָ כִּֽי־עָשִׂ֣יתָ זֹּ֔את וְלֹ֥א שָׁמַ֖עְתָּ לַעֲצָתִֽי׃ פ

‎17 ‏וַיִּוָּעַ֗ץ אֲמַצְיָ֙הוּ֙ מֶ֣לֶךְ יְהוּדָ֔ה וַ֠יִּשְׁלַח אֶל־יוֹאָ֨שׁ בֶּן־יְהוֹאָחָ֧ז בֶּן־יֵה֛וּא מֶ֥לֶךְ יִשְׂרָאֵ֖ל לֵאמֹ֑ר לך לְכָ֖ה נִתְרָאֶ֥ה פָנִֽים׃

‎18 ‏וַיִּשְׁלַ֞ח יוֹאָ֣שׁ מֶֽלֶךְ־יִשְׂרָאֵ֗ל אֶל־אֲמַצְיָ֣הוּ מֶֽלֶךְ־יְהוּדָה֮ לֵאמֹר֒ הַח֜וֹחַ אֲשֶׁ֣ר בַּלְּבָנ֗וֹן שָׁ֠לַח אֶל־הָאֶ֜רֶז אֲשֶׁ֤ר בַּלְּבָנוֹן֙ לֵאמֹ֔ר תְּנָֽה־אֶת־בִּתְּךָ֥ לִבְנִ֖י לְאִשָּׁ֑ה וַֽתַּעֲבֹ֞ר חַיַּ֤ת הַשָּׂדֶה֙ אֲשֶׁ֣ר בַּלְּבָנ֔וֹן וַתִּרְמֹ֖ס אֶת־הַחֽוֹחַ׃

‎19 ‏אָמַ֗רְתָּ הִנֵּ֤ה הִכִּ֙יתָ֙ אֶת־אֱד֔וֹם וּנְשָׂאֲךָ֥ לִבְּךָ֖ לְהַכְבִּ֑יד עַתָּה֙ שְׁבָ֣ה בְּבֵיתֶ֔ךָ לָ֤מָּה תִתְגָּרֶה֙ בְּרָעָ֔ה וְנָ֣פַלְתָּ֔ אַתָּ֖ה וִיהוּדָ֥ה עִמָּֽךְ׃

‎20 ‏וְלֹא־שָׁמַ֣ע אֲמַצְיָ֔הוּ כִּ֤י מֵהָֽאֱלֹהִים֙ הִ֔יא לְמַ֖עַן תִּתָּ֣ם בְּיָ֑ד כִּ֣י דָֽרְשׁ֔וּ אֵ֖ת אֱלֹהֵ֥י אֱדֽוֹם׃

‎21 ‏וַיַּ֨עַל יוֹאָ֤שׁ מֶֽלֶךְ־יִשְׂרָאֵל֙ וַיִּתְרָא֣וּ פָנִ֔ים ה֖וּא וַאֲמַצְיָ֣הוּ מֶֽלֶךְ־יְהוּדָ֑ה בְּבֵ֥ית שֶׁ֖מֶשׁ אֲשֶׁ֥ר לִיהוּדָֽה׃

‎22 ‏וַיִּנָּ֥גֶף יְהוּדָ֖ה לִפְנֵ֣י יִשְׂרָאֵ֑ל וַיָּנֻ֖סוּ אִ֥ישׁ לְאֹהָלָֽיו׃

‎23 ‏וְאֵת֩ אֲמַצְיָ֨הוּ מֶֽלֶךְ־יְהוּדָ֜ה בֶּן־יוֹאָ֣שׁ בֶּן־יְהוֹאָחָ֗ז תָּפַ֛שׂ יוֹאָ֥שׁ מֶֽלֶךְ־יִשְׂרָאֵ֖ל בְּבֵ֣ית שָׁ֑מֶשׁ וַיְבִיאֵ֙הוּ֙ יְר֣וּשָׁלִַ֔ם וַיִּפְרֹ֞ץ בְּחוֹמַ֣ת יְרוּשָׁלִַ֗ם מִשַּׁ֤עַר אֶפְרַ֙יִם֙ עַד־שַׁ֣עַר הַפּוֹנֶ֔ה אַרְבַּ֥ע מֵא֖וֹת אַמָּֽה׃

‎24 ‏וְכָֽל־הַזָּהָ֣ב וְהַכֶּ֡סֶף וְאֵ֣ת כָּל־הַ֠כֵּלִים הַנִּמְצְאִ֨ים בְּבֵית־הָאֱלֹהִ֜ים עִם־עֹבֵ֣ד אֱד֗וֹם וְאֶת־אֹצְרוֹת֙ בֵּ֣ית הַמֶּ֔לֶךְ וְאֵ֖ת בְּנֵ֣י הַתַּֽעֲרֻב֑וֹת וַיָּ֖שָׁב שֹׁמְרֽוֹן׃ פ

‎25 ‏וַיְחִ֨י אֲמַצְיָ֤הוּ בֶן־יוֹאָשׁ֙ מֶ֣לֶךְ יְהוּדָ֔ה אַחֲרֵ֣י מ֔וֹת יוֹאָ֥שׁ בֶּן־יְהוֹאָחָ֖ז מֶ֣לֶךְ יִשְׂרָאֵ֑ל חֲמֵ֥שׁ עֶשְׂרֵ֖ה שָׁנָֽה׃

‎26 ‏וְיֶ֙תֶר֙ דִּבְרֵ֣י אֲמַצְיָ֔הוּ הָרִאשֹׁנִ֖ים וְהָאַחֲרוֹנִ֑ים הֲלֹא֙ הִנָּ֣ם כְּתוּבִ֔ים עַל־סֵ֥פֶר מַלְכֵי־יְהוּדָ֖ה וְיִשְׂרָאֵֽל׃

‎27 ‏וּמֵעֵ֗ת אֲשֶׁר־סָ֤ר אֲמַצְיָ֙הוּ֙ מֵאַחֲרֵ֣י יְהוָ֔ה וַיִּקְשְׁר֨וּ עָלָ֥יו קֶ֛שֶׁר בִּירוּשָׁלִַ֖ם וַיָּ֣נָס לָכִ֑ישָׁה וַיִּשְׁלְח֤וּ אַחֲרָיו֙ לָכִ֔ישָׁה וַיְמִיתֻ֖הוּ שָֽׁם׃

‎28 ‏וַיִּשָּׂאֻ֖הוּ עַל־הַסּוּסִ֑ים וַֽיִּקְבְּר֥וּ אֹת֛וֹ עִם־אֲבֹתָ֖יו בְּעִ֥יר יְהוּדָֽה׃

1 ben-‘eśərîm wəḥāmēš šānâ mālaḵə ’ămaṣəyâû wə‘eśərîm wāṯēš^a‘ šānâ mālaḵə bîrûšālāim wəšēm ’immwō yəhwō‘adān mîrûšālāyim:

2 wayy^a‘aś hayyāšār bə‘ênê yəhwâ raq lō’ bəlēḇāḇ šālēm:

3 wayəhî ka’ăšer ḥāzəqâ hammaməlāḵâ ‘ālāyw wayyahărōḡ ’eṯ-‘ăḇāḏāyw hammakîm ’eṯ-hammeleḵə ’āḇîw:

4 wə’eṯ-bənêhem lō’ hēmîṯ kî ḵakāṯûḇ batwōrâ bəsēfer mōšeh ’ăšer-ṣiûâ yəhwâ lē’mōr lō’-yāmûṯû ’āḇwōṯ ‘al-bānîm ûḇānîm lō’-yāmûṯû ‘al-’āḇwōṯ kî ’îš bəḥeṭə’wō yāmûṯû: f

5 wayyiqəbōṣ ’ămaṣəyâû ’eṯ-yəhûḏâ wayy^a‘ămîḏēm ləḇêṯ-’āḇwōṯ ləśārê hā’ălāfîm ûləśārê hammē’wōṯ ləḵāl-yəhûḏâ ûḇinəyāmin wayyifəqəḏēm ləmiben ‘eśərîm šānâ wām^a‘əlâ wayyiməṣā’ēm šəlōš-mē’wōṯ ’elef bāḥûr ywōṣē’ ṣāḇā’ ’ōḥēz rōm^aḥ wəṣinnâ:

6 wayyiśəkōr mîyiśərā’ēl mē’â ’elef gibwōr ḥāyil bəmē’â ḵikar-kāsef:

7 wə’îš hā’ĕlōhîm bā’ ’ēlāyw lē’mōr hammeleḵə ’al-yāḇō’ ‘imməḵā ṣəḇā’ yiśərā’ēl kî ’ên yəhwâ ‘im-yiśərā’ēl kōl bənê ’efərāyim:

8 kî ’im-bō’ ’atâ ‘ăśēh ḥăzaq lammiləḥāmâ yaḵəšîləḵā hā’ĕlōhîm lifənê ’wōyēḇ kî yeš-kōḥa bē’lōhîm l^a‘əzwōr ûləhaḵəšîl:

9 wayyō’mer ’ămaṣəyâû lə’îš hā’ĕlōhîm ûmah-ll^a‘ăśwōṯ limə’aṯ hakikār ’ăšer nāṯatî liḡəḏûḏ yiśərā’ēl wayyō’mer ’îš hā’ĕlōhîm yēš layhwâ lāṯeṯ ləḵā harəbēh mizzeh:

10 wayyaḇədîlēm ’ămaṣəyâû ləhagəḏûḏ ’ăšer-bā’ ’ēlāyw mē’efərayim lāleḵeṯ liməqwōmām wayyiḥar ’apām mə’ōḏ bîhûḏâ wayyāšûḇû liməqwōmām bāḥŏrî-’āf: f

11 wa’ămaṣəyâû hiṯəḥazzaq wayyinəhaḡ ’eṯ-‘ammwō wayyēleḵə gê’ hammel^aḥ wayyaḵə ’eṯ-bənê-śē‘îr ‘ăśereṯ ’ălāfîm:

12 w^a‘ăśereṯ ’ălāfîm ḥayyîm šāḇû bənê yəhûḏâ wayəḇî’ûm lərō’š hassāl^a‘ wayyašəlîḵûm mērō’š-hassel^a‘ wəḵullām niḇəqā‘û: s

13 ûḇənê hagəḏûḏ ’ăšer hēšîḇ ’ămaṣəyâû milleḵeṯ ‘immwō lammiləḥāmâ wayyifəšəṭû bə‘ārê yəhûḏâ miššōmərwōn wə‘aḏ-bêṯ ḥwōrwōn wayyakû mēhem šəlōšeṯ ’ălāfîm wayyāḇōzzû bizzâ rabâ: s

14 wayəhî ’^aḥărê ḇwō’ ’ămaṣəyâû mēhakwōṯ ’eṯ-’ăḏwōmîm wayyāḇē’ ’eṯ-’ĕlōhê bənê śē‘îr wayy^a‘ămîḏēm lwō lē’lōhîm wəlifənêhem yišət^aḥăweh wəlâem yəqaṭṭēr:

15 wayyiḥar-’af yəhwâ ba’ămaṣəyâû wayyišəl^aḥ ’ēlāyw nāḇî’ wayyō’mer lwō lāmmâ ḏārašətā ’eṯ-’ĕlōhê hā‘ām ’ăšer lō’-hiṣṣîlû ’eṯ-‘ammām mîyāḏeḵā:

16 wayəhî| bəḏabərwō ’ēlāyw wayyō’mer lwō haləywō‘ēṣ lammeleḵə nəṯannûḵā ḥăḏal-ləḵā lāmmâ yakûḵā wayyeḥədal hannāḇî’ wayyō’mer yāḏ^a‘ətî kî-yā‘aṣ ’ĕlōhîm ləhašəḥîṯeḵā kî-‘āśîṯā zzō’ṯ wəlō’ šām^a‘ətā l^a‘ăṣāṯî: f

17 wayyiûā‘aṣ ’ămaṣəyâû meleḵə yəhûḏâ wayyišəl^aḥ ’el-ywō’āš ben-yəhwō’āḥāz ben-yēhû’ meleḵə yiśərā’ēl lē’mōr ləḵā ləḵâ niṯərā’eh fānîm:

18 wayyišəl^aḥ ywō’āš meleḵə-yiśərā’ēl ’el-’ămaṣəyâû meleḵə-yəhûḏâ lē’mōr h^aḥwōḥa ’ăšer balləḇānwōn šāl^aḥ ’el-hā’erez ’ăšer balləḇānwōn lē’mōr tənâ-’eṯ-bitəḵā liḇənî lə’iššâ wat^a‘ăḇōr ḥayyaṯ haśśāḏeh ’ăšer balləḇānwōn watirəmōs ’eṯ-h^aḥwōḥa:

19 ’āmarətā hinnēh hikîṯā ’eṯ-’ĕḏwōm ûnəśā’ăḵā libəḵā ləhaḵəbîḏ ‘atâ šəḇâ bəḇêṯeḵā lāmmâ ṯiṯəgāreh bərā‘â wənāfalətā ’atâ wîhûḏâ ‘immāḵə:

20 wəlō’-šām^a‘ ’ămaṣəyâû kî mēhā’ĕlōhîm hî’ ləm^a‘an titām bəyāḏ kî ḏārəšû ’ēṯ ’ĕlōhê ’ĕḏwōm:

21 wayy^a‘al ywō’āš meleḵə-yiśərā’ēl wayyiṯərā’û fānîm hû’ wa’ămaṣəyâû meleḵə-yəhûḏâ bəḇêṯ šemeš ’ăšer lîhûḏâ:

22 wayyinnāḡef yəhûḏâ lifənê yiśərā’ēl wayyānusû ’îš lə’ōhālāyw:

23 wə’ēṯ ’ămaṣəyâû meleḵə-yəhûḏâ ben-ywō’āš ben-yəhwō’āḥāz tāfaś ywō’āš meleḵə-yiśərā’ēl bəḇêṯ šāmeš wayəḇî’ēhû yərûšālaim wayyifərōṣ bəḥwōmaṯ yərûšālaim mišš^a‘ar ’efərayim ‘aḏ-š^a‘ar hapwōneh ’arəb^a‘ mē’wōṯ ’ammâ:

24 wəḵāl-hazzâāḇ wəhakesef wə’ēṯ kāl-hakēlîm hanniməṣə’îm bəḇêṯ-hā’ĕlōhîm ‘im-‘ōḇēḏ ’ĕḏwōm wə’eṯ-’ōṣərwōṯ bêṯ hammeleḵə wə’ēṯ bənê hat^a‘ăruḇwōṯ wayyāšāḇ šōmərwōn: f

25 wayəḥî ’ămaṣəyâû ḇen-ywō’āš meleḵə yəhûḏâ ’^aḥărê mwōṯ ywō’āš ben-yəhwō’āḥāz meleḵə yiśərā’ēl ḥămēš ‘eśərēh šānâ:

26 wəyeṯer diḇərê ’ămaṣəyâû hāri’šōnîm wəhā’^aḥărwōnîm hălō’ hinnām kəṯûḇîm ‘al-sēfer maləḵê-yəhûḏâ wəyiśərā’ēl:

27 ûmē‘ēṯ ’ăšer-sār ’ămaṣəyâû mē’^aḥărê yəhwâ wayyiqəšərû ‘ālāyw qešer bîrûšālaim wayyānās lāḵîšâ wayyišələḥû ’^aḥărāyw lāḵîšâ wayəmîṯuhû šām:

28 wayyiśśā’uhû ‘al-hassûsîm wayyiqəbərû ’ōṯwō ‘im-’ăḇōṯāyw bə‘îr yəhûḏâ: