Daniel (Daniyel) Chapter 8

‎1 ‏בִּשְׁנַ֣ת שָׁל֔וֹשׁ לְמַלְכ֖וּת בֵּלְאשַׁצַּ֣ר הַמֶּ֑לֶךְ חָז֞וֹן נִרְאָ֤ה אֵלַי֙ אֲנִ֣י דָנִיֵּ֔אל אַחֲרֵ֛י הַנִּרְאָ֥ה אֵלַ֖י בַּתְּחִלָּֽה׃

‎2 ‏וָֽאֶרְאֶה֮ בֶּחָזוֹן֒ וַיְהִי֙ בִּרְאֹתִ֔י וַאֲנִי֙ בְּשׁוּשַׁ֣ן הַבִּירָ֔ה אֲשֶׁ֖ר בְּעֵילָ֣ם הַמְּדִינָ֑ה וָאֶרְאֶה֙ בֶּֽחָז֔וֹן וַאֲנִ֥י הָיִ֖יתִי עַל־אוּבַ֥ל אוּלָֽי׃

‎3 ‏וָאֶשָּׂ֤א עֵינַי֙ וָאֶרְאֶ֔ה וְהִנֵּ֣ה׀ אַ֣יִל אֶחָ֗ד עֹמֵ֛ד לִפְנֵ֥י הָאֻבָ֖ל וְל֣וֹ קְרָנָ֑יִם וְהַקְּרָנַ֣יִם גְּבֹה֗וֹת וְהָאַחַת֙ גְּבֹהָ֣ה מִן־הַשֵּׁנִ֔ית וְהַ֨גְּבֹהָ֔ה עֹלָ֖ה בָּאַחֲרֹנָֽה׃

‎4 ‏רָאִ֣יתִי אֶת־הָאַ֡יִל מְנַגֵּחַ֩ יָ֨מָּה וְצָפ֜וֹנָה וָנֶ֗גְבָּה וְכָל־חַיּוֹת֙ לֹֽא־יַֽעַמְד֣וּ לְפָנָ֔יו וְאֵ֥ין מַצִּ֖יל מִיָּד֑וֹ וְעָשָׂ֥ה כִרְצֹנ֖וֹ וְהִגְדִּֽיל׃

‎5 ‏וַאֲנִ֣י׀ הָיִ֣יתִי מֵבִ֗ין וְהִנֵּ֤ה צְפִיר־הָֽעִזִּים֙ בָּ֤א מִן־הַֽמַּעֲרָב֙ עַל־פְּנֵ֣י כָל־הָאָ֔רֶץ וְאֵ֥ין נוֹגֵ֖עַ בָּאָ֑רֶץ וְהַ֨צָּפִ֔יר קֶ֥רֶן חָז֖וּת בֵּ֥ין עֵינָֽיו׃

‎6 ‏וַיָּבֹ֗א עַד־הָאַ֙יִל֙ בַּ֣עַל הַקְּרָנַ֔יִם אֲשֶׁ֣ר רָאִ֔יתִי עֹמֵ֖ד לִפְנֵ֣י הָאֻבָ֑ל וַיָּ֥רָץ אֵלָ֖יו בַּחֲמַ֥ת כֹּחֽוֹ׃

‎7 ‏וּרְאִיתִ֞יו מַגִּ֣יעַ׀ אֵ֣צֶל הָאַ֗יִל וַיִּתְמַרְמַ֤ר אֵלָיו֙ וַיַּ֣ךְ אֶת־הָאַ֔יִל וַיְשַׁבֵּר֙ אֶת־שְׁתֵּ֣י קְרָנָ֔יו וְלֹא־הָ֥יָה כֹ֛חַ בָּאַ֖יִל לַעֲמֹ֣ד לְפָנָ֑יו וַיַּשְׁלִיכֵ֤הוּ אַ֙רְצָה֙ וַֽיִּרְמְסֵ֔הוּ וְלֹא־הָיָ֥ה מַצִּ֛יל לָאַ֖יִל מִיָּדֽוֹ׃

‎8 ‏וּצְפִ֥יר הָעִזִּ֖ים הִגְדִּ֣יל עַד־מְאֹ֑ד וּכְעָצְמ֗וֹ נִשְׁבְּרָה֙ הַקֶּ֣רֶן הַגְּדוֹלָ֔ה וַֽתַּעֲלֶ֜נָה חָז֤וּת אַרְבַּע֙ תַּחְתֶּ֔יהָ לְאַרְבַּ֖ע רוּח֥וֹת הַשָּׁמָֽיִם׃

‎9 ‏וּמִן־הָאַחַ֣ת מֵהֶ֔ם יָצָ֥א קֶֽרֶן־אַחַ֖ת מִצְּעִירָ֑ה וַתִּגְדַּל־יֶ֛תֶר אֶל־הַנֶּ֥גֶב וְאֶל־הַמִּזְרָ֖ח וְאֶל־הַצֶּֽבִי׃

‎10 ‏וַתִּגְדַּ֖ל עַד־צְבָ֣א הַשָּׁמָ֑יִם וַתַּפֵּ֥ל אַ֛רְצָה מִן־הַצָּבָ֥א וּמִן־הַכּוֹכָבִ֖ים וַֽתִּרְמְסֵֽם׃

‎11 ‏וְעַ֥ד שַֽׂר־הַצָּבָ֖א הִגְדִּ֑יל וּמִמֶּ֙נּוּ֙ הרים הוּרַ֣ם הַתָּמִ֔יד וְהֻשְׁלַ֖ךְ מְכ֥וֹן מִקְדָּשֽׁוֹ׃

‎12 ‏וְצָבָ֛א תִּנָּתֵ֥ן עַל־הַתָּמִ֖יד בְּפָ֑שַׁע וְתַשְׁלֵ֤ךְ אֱמֶת֙ אַ֔רְצָה וְעָשְׂתָ֖ה וְהִצְלִֽיחָה׃

‎13 ‏וָאֶשְׁמְעָ֥ה אֶֽחָד־קָד֖וֹשׁ מְדַבֵּ֑ר וַיֹּאמֶר֩ אֶחָ֨ד קָד֜וֹשׁ לַפַּֽלְמוֹנִ֣י הַֽמְדַבֵּ֗ר עַד־מָתַ֞י הֶחָז֤וֹן הַתָּמִיד֙ וְהַפֶּ֣שַׁע שֹׁמֵ֔ם תֵּ֛ת וְקֹ֥דֶשׁ וְצָבָ֖א מִרְמָֽס׃

‎14 ‏וַיֹּ֣אמֶר אֵלַ֔י עַ֚ד עֶ֣רֶב בֹּ֔קֶר אַלְפַּ֖יִם וּשְׁלֹ֣שׁ מֵא֑וֹת וְנִצְדַּ֖ק קֹֽדֶשׁ׃

‎15 ‏וַיְהִ֗י בִּרְאֹתִ֛י אֲנִ֥י דָנִיֵּ֖אל אֶת־הֶחָז֑וֹן וָאֲבַקְשָׁ֣ה בִינָ֔ה וְהִנֵּ֛ה עֹמֵ֥ד לְנֶגְדִּ֖י כְּמַרְאֵה־גָֽבֶר׃

‎16 ‏וָאֶשְׁמַ֥ע קוֹל־אָדָ֖ם בֵּ֣ין אוּלָ֑י וַיִּקְרָא֙ וַיֹּאמַ֔ר גַּבְרִיאֵ֕ל הָבֵ֥ן לְהַלָּ֖ז אֶת־הַמַּרְאֶֽה׃

‎17 ‏וַיָּבֹא֙ אֵ֣צֶל עָמְדִ֔י וּבְבֹא֣וֹ נִבְעַ֔תִּי וָאֶפְּלָ֖ה עַל־פָּנָ֑י וַיֹּ֤אמֶר אֵלַי֙ הָבֵ֣ן בֶּן־אָדָ֔ם כִּ֖י לְעֶת־קֵ֥ץ הֶחָזֽוֹן׃

‎18 ‏וּבְדַבְּר֣וֹ עִמִּ֔י נִרְדַּ֥מְתִּי עַל־פָּנַ֖י אָ֑רְצָה וַיִּ֨גַּע־בִּ֔י וַיַּֽעֲמִידֵ֖נִי עַל־עָמְדִֽי׃

‎19 ‏וַיֹּ֙אמֶר֙ הִנְנִ֣י מוֹדִֽיעֲךָ֔ אֵ֥ת אֲשֶׁר־יִהְיֶ֖ה בְּאַחֲרִ֣ית הַזָּ֑עַם כִּ֖י לְמוֹעֵ֥ד קֵֽץ׃

‎20 ‏הָאַ֥יִל אֲשֶׁר־רָאִ֖יתָ בַּ֣עַל הַקְּרָנָ֑יִם מַלְכֵ֖י מָדַ֥י וּפָרָֽס׃

‎21 ‏וְהַצָּפִ֥יר הַשָּׂעִ֖יר מֶ֣לֶךְ יָוָ֑ן וְהַקֶּ֤רֶן הַגְּדוֹלָה֙ אֲשֶׁ֣ר בֵּין־עֵינָ֔יו ה֖וּא הַמֶּ֥לֶךְ הָרִאשֽׁוֹן׃

‎22 ‏וְהַ֨נִּשְׁבֶּ֔רֶת וַתַּֽעֲמֹ֥דְנָה אַרְבַּ֖ע תַּחְתֶּ֑יהָ אַרְבַּ֧ע מַלְכֻי֛וֹת מִגּ֥וֹי יַעֲמֹ֖דְנָה וְלֹ֥א בְכֹחֽוֹ׃

‎23 ‏וּֽבְאַחֲרִית֙ מַלְכוּתָ֔ם כְּהָתֵ֖ם הַפֹּשְׁעִ֑ים יַעֲמֹ֛ד מֶ֥לֶךְ עַז־פָּנִ֖ים וּמֵבִ֥ין חִידֽוֹת׃

‎24 ‏וְעָצַ֤ם כֹּחוֹ֙ וְלֹ֣א בְכֹח֔וֹ וְנִפְלָא֥וֹת יַשְׁחִ֖ית וְהִצְלִ֣יחַ וְעָשָׂ֑ה וְהִשְׁחִ֥ית עֲצוּמִ֖ים וְעַם־קְדֹשִֽׁים׃

‎25 ‏וְעַל־שִׂכְל֗וֹ וְהִצְלִ֤יחַ מִרְמָה֙ בְּיָד֔וֹ וּבִלְבָב֣וֹ יַגְדִּ֔יל וּבְשַׁלְוָ֖ה יַשְׁחִ֣ית רַבִּ֑ים וְעַ֤ל־שַׂר־שָׂרִים֙ יַעֲמֹ֔ד וּבְאֶ֥פֶס יָ֖ד יִשָּׁבֵֽר׃

‎26 ‏וּמַרְאֵ֨ה הָעֶ֧רֶב וְהַבֹּ֛קֶר אֲשֶׁ֥ר נֶאֱמַ֖ר אֱמֶ֣ת ה֑וּא וְאַתָּה֙ סְתֹ֣ם הֶֽחָז֔וֹן כִּ֖י לְיָמִ֥ים רַבִּֽים׃

‎27 ‏וַאֲנִ֣י דָנִיֵּ֗אל נִהְיֵ֤יתִי וְנֶֽחֱלֵ֙יתִי֙ יָמִ֔ים וָאָק֕וּם וָאֶֽעֱשֶׂ֖ה אֶת־מְלֶ֣אכֶת הַמֶּ֑לֶךְ וָאֶשְׁתּוֹמֵ֥ם עַל־הַמַּרְאֶ֖ה וְאֵ֥ין מֵבִֽין׃ פ

1 bišənaṯ šālwōš ləmaləḵûṯ bēlə’šaṣṣar hammeleḵə ḥāzwōn nirə’â ’ēlay ’ănî ḏānîyē’l ’^aḥărê hannirə’â ’ēlay batəḥillâ:

2 wā’erə’eh beḥāzwōn wayəhî birə’ōṯî wa’ănî bəšûšan habîrâ ’ăšer bə‘êlām hamməḏînâ wā’erə’eh beḥāzwōn wa’ănî hāyîṯî ‘al-’ûḇal ’ûlāy:

3 wā’eśśā’ ‘ênay wā’erə’eh wəhinnēh| ’ayil ’eḥāḏ ‘ōmēḏ lifənê hā’uḇāl wəlwō qərānāyim wəhaqqərānayim gəḇōhwōṯ wəhā’^aḥaṯ gəḇōhâ min-haššēnîṯ wəhagəḇōhâ ‘ōlâ bā’^aḥărōnâ:

4 rā’îṯî ’eṯ-hā’ayil mənagēḥa yāmmâ wəṣāfwōnâ wāneḡəbâ wəḵāl-ḥayywōṯ lō’-y^a‘aməḏû ləfānāyw wə’ên maṣṣîl mîyāḏwō wə‘āśâ ḵirəṣōnwō wəhiḡədîl:

5 wa’ănî| hāyîṯî mēḇîn wəhinnēh ṣəfîr-hā‘izzîm bā’ min-hamm^a‘ărāḇ ‘al-pənê ḵāl-hā’āreṣ wə’ên nwōḡē‘a bā’āreṣ wəhaṣṣāfîr qeren ḥāzûṯ bên ‘ênāyw:

6 wayyāḇō’ ‘aḏ-hā’ayil b^a‘al haqqərānayim ’ăšer rā’îṯî ‘ōmēḏ lifənê hā’uḇāl wayyārāṣ ’ēlāyw b^aḥămaṯ kōḥwō:

7 ûrə’îṯîw magî‘a| ’ēṣel hā’ayil wayyiṯəmarəmar ’ēlāyw wayyaḵə ’eṯ-hā’ayil wayəšabēr ’eṯ-šətê qərānāyw wəlō’-hāyâ ḵōḥa bā’ayil l^a‘ămōḏ ləfānāyw wayyašəlîḵēhû ’arəṣâ wayyirəməsēhû wəlō’-hāyâ maṣṣîl lā’ayil mîyāḏwō:

8 ûṣəfîr hā‘izzîm hiḡədîl ‘aḏ-mə’ōḏ ûḵə‘āṣəmwō nišəbərâ haqqeren hagəḏwōlâ wat^a‘ălenâ ḥāzûṯ ’arəb^a‘ t^aḥəteyhā lə’arəb^a‘ rûḥwōṯ haššāmāyim:

9 ûmin-hā’^aḥaṯ mēhem yāṣā’ qeren-’^aḥaṯ miṣṣə‘îrâ watiḡədal-yeṯer ’el-hanneḡeḇ wə’el-hammizərāḥ wə’el-haṣṣeḇî:

10 watiḡədal ‘aḏ-ṣəḇā’ haššāmāyim watapēl ’arəṣâ min-haṣṣāḇā’ ûmin-hakwōḵāḇîm watirəməsēm:

11 wə‘aḏ śar-haṣṣāḇā’ hiḡədîl ûmimmennû hērîm hûram hatāmîḏ wəhušəlaḵə məḵwōn miqədāšwō:

12 wəṣāḇā’ tinnāṯēn ‘al-hatāmîḏ bəfāš^a‘ wəṯašəlēḵə ’ĕmeṯ ’arəṣâ wə‘āśəṯâ wəhiṣəlîḥâ:

13 wā’ešəmə‘â ’eḥāḏ-qāḏwōš məḏabēr wayyō’mer ’eḥāḏ qāḏwōš lapaləmwōnî haməḏabēr ‘aḏ-māṯay heḥāzwōn hatāmîḏ wəhapeš^a‘ šōmēm tēṯ wəqōḏeš wəṣāḇā’ mirəmās:

14 wayyō’mer ’ēlay ‘aḏ ‘ereḇ bōqer ’aləpayim ûšəlōš mē’wōṯ wəniṣədaq qōḏeš:

15 wayəhî birə’ōṯî ’ănî ḏānîyē’l ’eṯ-heḥāzwōn wā’ăḇaqəšâ ḇînâ wəhinnēh ‘ōmēḏ ləneḡədî kəmarə’ēh-ḡāḇer:

16 wā’ešəm^a‘ qwōl-’āḏām bên ’ûlāy wayyiqərā’ wayyō’mar gaḇərî’ēl hāḇēn ləhallāz ’eṯ-hammarə’eh:

17 wayyāḇō’ ’ēṣel ‘āməḏî ûḇəḇō’wō niḇə‘atî wā’epəlâ ‘al-pānāy wayyō’mer ’ēlay hāḇēn ben-’āḏām kî lə‘eṯ-qēṣ heḥāzwōn:

18 ûḇəḏabərwō ‘immî nirədamətî ‘al-pānay ’ārəṣâ wayyig^a‘-bî wayy^a‘ămîḏēnî ‘al-‘āməḏî:

19 wayyō’mer hinənî mwōḏî‘ăḵā ’ēṯ ’ăšer-yihəyeh bə’^aḥărîṯ hazzā‘am kî ləmwō‘ēḏ qēṣ:

20 hā’ayil ’ăšer-rā’îṯā b^a‘al haqqərānāyim maləḵê māḏay ûfārās:

21 wəhaṣṣāfîr haśśā‘îr meleḵə yāwān wəhaqqeren hagəḏwōlâ ’ăšer bên-‘ênāyw hû’ hammeleḵə hāri’šwōn:

22 wəhannišəbereṯ wat^a‘ămōḏənâ ’arəb^a‘ t^aḥəteyhā ’arəb^a‘ maləḵuywōṯ migwōy y^a‘ămōḏənâ wəlō’ ḇəḵōḥwō:

23 ûḇə’^aḥărîṯ maləḵûṯām kəhāṯēm hapōšə‘îm y^a‘ămōḏ meleḵə ‘az-pānîm ûmēḇîn ḥîḏwōṯ:

24 wə‘āṣam kōḥwō wəlō’ ḇəḵōḥwō wənifəlā’wōṯ yašəḥîṯ wəhiṣəlîḥa wə‘āśâ wəhišəḥîṯ ‘ăṣûmîm wə‘am-qəḏōšîm:

25 wə‘al-śiḵəlwō wəhiṣəlîḥa mirəmâ bəyāḏwō ûḇiləḇāḇwō yaḡədîl ûḇəšaləwâ yašəḥîṯ rabîm wə‘al-śar-śārîm y^a‘ămōḏ ûḇə’efes yāḏ yiššāḇēr:

26 ûmarə’ēh hā‘ereḇ wəhabōqer ’ăšer ne’ĕmar ’ĕmeṯ hû’ wə’atâ səṯōm heḥāzwōn kî ləyāmîm rabîm:

27 wa’ănî ḏānîyē’l nihəyêṯî wəneḥĕlêṯî yāmîm wā’āqûm wā’e‘ĕśeh ’eṯ-məle’ḵeṯ hammeleḵə wā’ešətwōmēm ‘al-hammarə’eh wə’ên mēḇîn: f