Daniel (Daniyel) Chapter 9

‎1 ‏בִּשְׁנַ֣ת אַחַ֗ת לְדָרְיָ֛וֶשׁ בֶּן־אֲחַשְׁוֵר֖וֹשׁ מִזֶּ֣רַע מָדָ֑י אֲשֶׁ֣ר הָמְלַ֔ךְ עַ֖ל מַלְכ֥וּת כַּשְׂדִּֽים׃

‎2 ‏בִּשְׁנַ֤ת אַחַת֙ לְמָלְכ֔וֹ אֲנִי֙ דָּֽנִיֵּ֔אל בִּינֹ֖תִי בַּסְּפָרִ֑ים מִסְפַּ֣ר הַשָּׁנִ֗ים אֲשֶׁ֨ר הָיָ֤ה דְבַר־יְהוָה֙ אֶל־יִרְמִיָ֣ה הַנָּבִ֔יא לְמַלֹּ֛אות לְחָרְב֥וֹת יְרוּשָׁלִַ֖ם שִׁבְעִ֥ים שָׁנָֽה׃

‎3 ‏וָאֶתְּנָ֣ה אֶת־פָּנַ֗י אֶל־אֲדֹנָי֙ הָֽאֱלֹהִ֔ים לְבַקֵּ֥שׁ תְּפִלָּ֖ה וְתַחֲנוּנִ֑ים בְּצ֖וֹם וְשַׂ֥ק וָאֵֽפֶר׃

‎4 ‏וָֽאֶתְפַּֽלְלָ֛ה לַיהוָ֥ה אֱלֹהַ֖י וָאֶתְוַדֶּ֑ה וָאֹֽמְרָ֗ה אָנָּ֤א אֲדֹנָי֙ הָאֵ֤ל הַגָּדוֹל֙ וְהַנּוֹרָ֔א שֹׁמֵ֤ר הַבְּרִית֙ וְֽהַחֶ֔סֶד לְאֹהֲבָ֖יו וּלְשֹׁמְרֵ֥י מִצְוֹתָֽיו׃

‎5 ‏חָטָ֥אנוּ וְעָוִ֖ינוּ והרשענו הִרְשַׁ֣עְנוּ וּמָרָ֑דְנוּ וְס֥וֹר מִמִּצְוֹתֶ֖ךָ וּמִמִּשְׁפָּטֶֽיךָ׃

‎6 ‏וְלֹ֤א שָׁמַ֙עְנוּ֙ אֶל־עֲבָדֶ֣יךָ הַנְּבִיאִ֔ים אֲשֶׁ֤ר דִּבְּרוּ֙ בְּשִׁמְךָ֔ אֶל־מְלָכֵ֥ינוּ שָׂרֵ֖ינוּ וַאֲבֹתֵ֑ינוּ וְאֶ֖ל כָּל־עַ֥ם הָאָֽרֶץ׃

‎7 ‏לְךָ֤ אֲדֹנָי֙ הַצְּדָקָ֔ה וְלָ֛נוּ בֹּ֥שֶׁת הַפָּנִ֖ים כַּיּ֣וֹם הַזֶּ֑ה לְאִ֤ישׁ יְהוּדָה֙ וּלְיוֹשְׁבֵ֣י יְרֽוּשָׁלִַ֔ם וּֽלְכָל־יִשְׂרָאֵ֞ל הַקְּרֹבִ֣ים וְהָרְחֹקִ֗ים בְּכָל־הָֽאֲרָצוֹת֙ אֲשֶׁ֣ר הִדַּחְתָּ֣ם שָׁ֔ם בְּמַעֲלָ֖ם אֲשֶׁ֥ר מָֽעֲלוּ־בָֽךְ׃

‎8 ‏יְהוָ֗ה לָ֚נוּ בֹּ֣שֶׁת הַפָּנִ֔ים לִמְלָכֵ֥ינוּ לְשָׂרֵ֖ינוּ וְלַאֲבֹתֵ֑ינוּ אֲשֶׁ֥ר חָטָ֖אנוּ לָֽךְ׃

‎9 ‏לַֽאדֹנָ֣י אֱלֹהֵ֔ינוּ הָרַחֲמִ֖ים וְהַסְּלִח֑וֹת כִּ֥י מָרַ֖דְנוּ בּֽוֹ׃

‎10 ‏וְלֹ֣א שָׁמַ֔עְנוּ בְּק֖וֹל יְהוָ֣ה אֱלֹהֵ֑ינוּ לָלֶ֤כֶת בְּתֽוֹרֹתָיו֙ אֲשֶׁ֣ר נָתַ֣ן לְפָנֵ֔ינוּ בְּיַ֖ד עֲבָדָ֥יו הַנְּבִיאִֽים׃

‎11 ‏וְכָל־יִשְׂרָאֵ֗ל עָֽבְרוּ֙ אֶת־תּ֣וֹרָתֶ֔ךָ וְס֕וֹר לְבִלְתִּ֖י שְׁמ֣וֹעַ בְּקֹלֶ֑ךָ וַתִּתַּ֨ךְ עָלֵ֜ינוּ הָאָלָ֣ה וְהַשְּׁבֻעָ֗ה אֲשֶׁ֤ר כְּתוּבָה֙ בְּתוֹרַת֙ מֹשֶׁ֣ה עֶֽבֶד־הָֽאֱלֹהִ֔ים כִּ֥י חָטָ֖אנוּ לֽוֹ׃

‎12 ‏וַיָּ֜קֶם אֶת־דבריו דְּבָר֣וֹ׀ אֲשֶׁר־דִּבֶּ֣ר עָלֵ֗ינוּ וְעַ֤ל שֹֽׁפְטֵ֙ינוּ֙ אֲשֶׁ֣ר שְׁפָט֔וּנוּ לְהָבִ֥יא עָלֵ֖ינוּ רָעָ֣ה גְדֹלָ֑ה אֲשֶׁ֣ר לֹֽא־נֶעֶשְׂתָ֗ה תַּ֚חַת כָּל־הַשָּׁמַ֔יִם כַּאֲשֶׁ֥ר נֶעֶשְׂתָ֖ה בִּירוּשָׁלִָֽם׃

‎13 ‏כַּאֲשֶׁ֤ר כָּתוּב֙ בְּתוֹרַ֣ת מֹשֶׁ֔ה אֵ֛ת כָּל־הָרָעָ֥ה הַזֹּ֖את בָּ֣אָה עָלֵ֑ינוּ וְלֹֽא־חִלִּ֜ינוּ אֶת־פְּנֵ֣י׀ יְהוָ֣ה אֱלֹהֵ֗ינוּ לָשׁוּב֙ מֵֽעֲוֹנֵ֔נוּ וּלְהַשְׂכִּ֖יל בַּאֲמִתֶּֽךָ׃

‎14 ‏וַיִּשְׁקֹ֤ד יְהוָה֙ עַל־הָ֣רָעָ֔ה וַיְבִיאֶ֖הָ עָלֵ֑ינוּ כִּֽי־צַדִּ֞יק יְהוָ֣ה אֱלֹהֵ֗ינוּ עַל־כָּל־מַֽעֲשָׂיו֙ אֲשֶׁ֣ר עָשָׂ֔ה וְלֹ֥א שָׁמַ֖עְנוּ בְּקֹלֽוֹ׃

‎15 ‏וְעַתָּ֣ה׀ אֲדֹנָ֣י אֱלֹהֵ֗ינוּ אֲשֶׁר֩ הוֹצֵ֨אתָ אֶֽת־עַמְּךָ֜ מֵאֶ֤רֶץ מִצְרַ֙יִם֙ בְּיָ֣ד חֲזָקָ֔ה וַתַּֽעַשׂ־לְךָ֥ שֵׁ֖ם כַּיּ֣וֹם הַזֶּ֑ה חָטָ֖אנוּ רָשָֽׁעְנוּ׃

‎16 ‏אֲדֹנָ֗י כְּכָל־צִדְקֹתֶ֙ךָ֙ יָֽשָׁב־נָ֤א אַפְּךָ֙ וַחֲמָ֣תְךָ֔ מֵעִֽירְךָ֥ יְרוּשָׁלִַ֖ם הַר־קָדְשֶׁ֑ךָ כִּ֤י בַחֲטָאֵ֙ינוּ֙ וּבַעֲוֹנ֣וֹת אֲבֹתֵ֔ינוּ יְרוּשָׁלִַ֧ם וְעַמְּךָ֛ לְחֶרְפָּ֖ה לְכָל־סְבִיבֹתֵֽינוּ׃

‎17 ‏וְעַתָּ֣ה׀ שְׁמַ֣ע אֱלֹהֵ֗ינוּ אֶל־תְּפִלַּ֤ת עַבְדְּךָ֙ וְאֶל־תַּ֣חֲנוּנָ֔יו וְהָאֵ֣ר פָּנֶ֔יךָ עַל־מִקְדָּשְׁךָ֖ הַשָּׁמֵ֑ם לְמַ֖עַן אֲדֹנָֽי׃

‎18 ‏הַטֵּ֨ה אֱלֹהַ֥י׀ אָזְנְךָ֮ וּֽשֲׁמָע֒ פקחה פְּקַ֣ח עֵינֶ֗יךָ וּרְאֵה֙ שֹֽׁמְמֹתֵ֔ינוּ וְהָעִ֕יר אֲשֶׁר־נִקְרָ֥א שִׁמְךָ֖ עָלֶ֑יהָ כִּ֣י׀ לֹ֣א עַל־צִדְקֹתֵ֗ינוּ אֲנַ֨חְנוּ מַפִּילִ֤ים תַּחֲנוּנֵ֙ינוּ֙ לְפָנֶ֔יךָ כִּ֖י עַל־רַחֲמֶ֥יךָ הָרַבִּֽים׃

‎19 ‏אֲדֹנָ֤י׀ שְׁמָ֙עָה֙ אֲדֹנָ֣י׀ סְלָ֔חָה אֲדֹנָ֛י הַֽקֲשִׁ֥יבָה וַעֲשֵׂ֖ה אַל־תְּאַחַ֑ר לְמַֽעֲנְךָ֣ אֱלֹהַ֔י כִּֽי־שִׁמְךָ֣ נִקְרָ֔א עַל־עִירְךָ֖ וְעַל־עַמֶּֽךָ׃

‎20 ‏וְע֨וֹד אֲנִ֤י מְדַבֵּר֙ וּמִתְפַּלֵּ֔ל וּמִתְוַדֶּה֙ חַטָּאתִ֔י וְחַטַּ֖את עַמִּ֣י יִשְׂרָאֵ֑ל וּמַפִּ֣יל תְּחִנָּתִ֗י לִפְנֵי֙ יְהוָ֣ה אֱלֹהַ֔י עַ֖ל הַר־קֹ֥דֶשׁ אֱלֹהָֽי׃

‎21 ‏וְע֛וֹד אֲנִ֥י מְדַבֵּ֖ר בַּתְּפִלָּ֑ה וְהָאִ֣ישׁ גַּבְרִיאֵ֡ל אֲשֶׁר֩ רָאִ֨יתִי בֶחָז֤וֹן בַּתְּחִלָּה֙ מֻעָ֣ף בִּיעָ֔ף נֹגֵ֣עַ אֵלַ֔י כְּעֵ֖ת מִנְחַת־עָֽרֶב׃

‎22 ‏וַיָּ֖בֶן וַיְדַבֵּ֣ר עִמִּ֑י וַיֹּאמַ֕ר דָּנִיֵּ֕אל עַתָּ֥ה יָצָ֖אתִי לְהַשְׂכִּילְךָ֥ בִינָֽה׃

‎23 ‏בִּתְחִלַּ֨ת תַּחֲנוּנֶ֜יךָ יָצָ֣א דָבָ֗ר וַאֲנִי֙ בָּ֣אתִי לְהַגִּ֔יד כִּ֥י חֲמוּד֖וֹת אָ֑תָּה וּבִין֙ בַּדָּבָ֔ר וְהָבֵ֖ן בַּמַּרְאֶֽה׃

‎24 ‏שָׁבֻעִ֨ים שִׁבְעִ֜ים נֶחְתַּ֥ךְ עַֽל־עַמְּךָ֣׀ וְעַל־עִ֣יר קָדְשֶׁ֗ךָ לְכַלֵּ֨א הַפֶּ֜שַׁע ולחתם וּלְהָתֵ֤ם חטאות חַטָּאת֙ וּלְכַפֵּ֣ר עָוֹ֔ן וּלְהָבִ֖יא צֶ֣דֶק עֹֽלָמִ֑ים וְלַחְתֹּם֙ חָז֣וֹן וְנָבִ֔יא וְלִמְשֹׁ֖חַ קֹ֥דֶשׁ קָֽדָשִֽׁים׃

‎25 ‏וְתֵדַ֨ע וְתַשְׂכֵּ֜ל מִן־מֹצָ֣א דָבָ֗ר לְהָשִׁיב֙ וְלִבְנ֤וֹת יְרֽוּשָׁלִַ֙ם֙ עַד־מָשִׁ֣יחַ נָגִ֔יד שָׁבֻעִ֖ים שִׁבְעָ֑ה וְשָׁבֻעִ֞ים שִׁשִּׁ֣ים וּשְׁנַ֗יִם תָּשׁוּב֙ וְנִבְנְתָה֙ רְח֣וֹב וְחָר֔וּץ וּבְצ֖וֹק הָעִתִּֽים׃

‎26 ‏וְאַחֲרֵ֤י הַשָּׁבֻעִים֙ שִׁשִּׁ֣ים וּשְׁנַ֔יִם יִכָּרֵ֥ת מָשִׁ֖יחַ וְאֵ֣ין ל֑וֹ וְהָעִ֨יר וְהַקֹּ֜דֶשׁ יַ֠שְׁחִית עַ֣ם נָגִ֤יד הַבָּא֙ וְקִצּ֣וֹ בַשֶּׁ֔טֶף וְעַד֙ קֵ֣ץ מִלְחָמָ֔ה נֶחֱרֶ֖צֶת שֹׁמֵמֽוֹת׃

‎27 ‏וְהִגְבִּ֥יר בְּרִ֛ית לָרַבִּ֖ים שָׁב֣וּעַ אֶחָ֑ד וַחֲצִ֨י הַשָּׁב֜וּעַ יַשְׁבִּ֣ית׀ זֶ֣בַח וּמִנְחָ֗ה וְעַ֨ל כְּנַ֤ף שִׁקּוּצִים֙ מְשֹׁמֵ֔ם וְעַד־כָּלָה֙ וְנֶ֣חֱרָצָ֔ה תִּתַּ֖ךְ עַל־שֹׁמֵֽם׃ פ

1 bišənaṯ ’^aḥaṯ ləḏārəyāweš ben-’ăḥašəwērwōš mizzer^a‘ māḏāy ’ăšer hāməlaḵə ‘al maləḵûṯ kaśədîm:

2 bišənaṯ ’^aḥaṯ ləmāləḵwō ’ănî dānîyē’l bînōṯî bassəfārîm misəpar haššānîm ’ăšer hāyâ ḏəḇar-yəhwâ ’el-yirəmîâ hannāḇî’ ləmallō’wṯ ləḥārəḇwōṯ yərûšālaim šiḇə‘îm šānâ:

3 wā’etənâ ’eṯ-pānay ’el-’ăḏōnāy hā’ĕlōhîm ləḇaqqēš təfillâ wəṯ^aḥănûnîm bəṣwōm wəśaq wā’ēfer:

4 wā’eṯəpaləlâ layhwâ ’ĕlōhay wā’eṯəwadeh wā’ōmərâ ’ānnā’ ’ăḏōnāy hā’ēl hagāḏwōl wəhannwōrā’ šōmēr habərîṯ wəh^aḥeseḏ lə’ōhăḇāyw ûləšōmərê miṣəwōṯāyw:

5 ḥāṭā’nû wə‘āwînû wəhirəš^a‘ənû hirəš^a‘ənû ûmārāḏənû wəswōr mimmiṣəwōṯeḵā ûmimmišəpāṭeyḵā:

6 wəlō’ šām^a‘ənû ’el-‘ăḇāḏeyḵā hannəḇî’îm ’ăšer dibərû bəšiməḵā ’el-məlāḵênû śārênû wa’ăḇōṯênû wə’el kāl-‘am hā’āreṣ:

7 ləḵā ’ăḏōnāy haṣṣəḏāqâ wəlānû bōšeṯ hapānîm kayywōm hazzeh lə’îš yəhûḏâ ûləywōšəḇê yərûšālaim ûləḵāl-yiśərā’ēl haqqərōḇîm wəhārəḥōqîm bəḵāl-hā’ărāṣwōṯ ’ăšer hid^aḥətām šām bəm^a‘ălām ’ăšer mā‘ălû-ḇāḵə:

8 yəhwâ lānû bōšeṯ hapānîm liməlāḵênû ləśārênû wəla’ăḇōṯênû ’ăšer ḥāṭā’nû lāḵə:

9 la’ḏōnāy ’ĕlōhênû hār^aḥămîm wəhassəliḥwōṯ kî māraḏənû bwō:

10 wəlō’ šām^a‘ənû bəqwōl yəhwâ ’ĕlōhênû lāleḵeṯ bəṯwōrōṯāyw ’ăšer nāṯan ləfānênû bəyaḏ ‘ăḇāḏāyw hannəḇî’îm:

11 wəḵāl-yiśərā’ēl ‘āḇərû ’eṯ-twōrāṯeḵā wəswōr ləḇilətî šəmwō‘a bəqōleḵā watitaḵə ‘ālênû hā’ālâ wəhaššəḇu‘â ’ăšer kəṯûḇâ bəṯwōraṯ mōšeh ‘eḇeḏ-hā’ĕlōhîm kî ḥāṭā’nû lwō:

12 wayyāqem ’eṯ-dəḇārāyw dəḇārwō| ’ăšer-diber ‘ālênû wə‘al šōfəṭênû ’ăšer šəfāṭûnû ləhāḇî’ ‘ālênû rā‘â ḡəḏōlâ ’ăšer lō’-ne‘eśəṯâ t^aḥaṯ kāl-haššāmayim ka’ăšer ne‘eśəṯâ bîrûšālāim:

13 ka’ăšer kāṯûḇ bəṯwōraṯ mōšeh ’ēṯ kāl-hārā‘â hazzō’ṯ bā’â ‘ālênû wəlō’-ḥillînû ’eṯ-pənê| yəhwâ ’ĕlōhênû lāšûḇ mē‘ăwōnēnû ûləhaśəkîl ba’ămiteḵā:

14 wayyišəqōḏ yəhwâ ‘al-hārā‘â wayəḇî’ehā ‘ālênû kî-ṣadîq yəhwâ ’ĕlōhênû ‘al-kāl-m^a‘ăśāyw ’ăšer ‘āśâ wəlō’ šām^a‘ənû bəqōlwō:

15 wə‘atâ| ’ăḏōnāy ’ĕlōhênû ’ăšer hwōṣē’ṯā ’eṯ-‘amməḵā mē’ereṣ miṣərayim bəyāḏ ḥăzāqâ wat^a‘aś-ləḵā šēm kayywōm hazzeh ḥāṭā’nû rāšā‘ənû:

16 ’ăḏōnāy kəḵāl-ṣiḏəqōṯeḵā yāšāḇ-nā’ ’apəḵā w^aḥămāṯəḵā mē‘îrəḵā yərûšālaim har-qāḏəšeḵā kî ḇ^aḥăṭā’ênû ûḇ^a‘ăwōnwōṯ ’ăḇōṯênû yərûšālaim wə‘amməḵā ləḥerəpâ ləḵāl-səḇîḇōṯênû:

17 wə‘atâ| šəm^a‘ ’ĕlōhênû ’el-təfillaṯ ‘aḇədəḵā wə’el-t^aḥănûnāyw wəhā’ēr pāneyḵā ‘al-miqədāšəḵā haššāmēm ləm^a‘an ’ăḏōnāy:

18 haṭṭēh ’ĕlōhay| ’āzənəḵā ûšămā‘ piqəḥâ pəq^aḥ ‘êneyḵā ûrə’ēh šōməmōṯênû wəhā‘îr ’ăšer-niqərā’ šiməḵā ‘āleyhā kî| lō’ ‘al-ṣiḏəqōṯênû ’ăn^aḥənû mapîlîm t^aḥănûnênû ləfāneyḵā kî ‘al-r^aḥămeyḵā hārabîm:

19 ’ăḏōnāy| šəmā‘â ’ăḏōnāy| səlāḥâ ’ăḏōnāy haqăšîḇâ w^a‘ăśēh ’al-tə’^aḥar ləm^a‘ănəḵā ’ĕlōhay kî-šiməḵā niqərā’ ‘al-‘îrəḵā wə‘al-‘ammeḵā:

20 wə‘wōḏ ’ănî məḏabēr ûmiṯəpallēl ûmiṯəwadeh ḥaṭṭā’ṯî wəḥaṭṭa’ṯ ‘ammî yiśərā’ēl ûmapîl təḥinnāṯî lifənê yəhwâ ’ĕlōhay ‘al har-qōḏeš ’ĕlōhāy:

21 wə‘wōḏ ’ănî məḏabēr batəfillâ wəhā’îš gaḇərî’ēl ’ăšer rā’îṯî ḇeḥāzwōn batəḥillâ mu‘āf bî‘āf nōḡē‘a ’ēlay kə‘ēṯ minəḥaṯ-‘āreḇ:

22 wayyāḇen wayəḏabēr ‘immî wayyō’mar dānîyē’l ‘atâ yāṣā’ṯî ləhaśəkîləḵā ḇînâ:

23 biṯəḥillaṯ t^aḥănûneyḵā yāṣā’ ḏāḇār wa’ănî bā’ṯî ləhagîḏ kî ḥămûḏwōṯ ’ātâ ûḇîn badāḇār wəhāḇēn bammarə’eh:

24 šāḇu‘îm šiḇə‘îm neḥətaḵə ‘al-‘amməḵā| wə‘al-‘îr qāḏəšeḵā ləḵallē’ hapeš^a‘ ûl^aḥətōm ûləhāṯēm ḥaṭṭā’wōṯ ḥaṭṭā’ṯ ûləḵapēr ‘āwōn ûləhāḇî’ ṣeḏeq ‘ōlāmîm wəl^aḥətōm ḥāzwōn wənāḇî’ wəliməšōḥa qōḏeš qāḏāšîm:

25 wəṯēḏ^a‘ wəṯaśəkēl min-mōṣā’ ḏāḇār ləhāšîḇ wəliḇənwōṯ yərûšālaim ‘aḏ-māšîḥa nāḡîḏ šāḇu‘îm šiḇə‘â wəšāḇu‘îm šiššîm ûšənayim tāšûḇ wəniḇənəṯâ rəḥwōḇ wəḥārûṣ ûḇəṣwōq hā‘itîm:

26 wə’^aḥărê haššāḇu‘îm šiššîm ûšənayim yikārēṯ māšîḥa wə’ên lwō wəhā‘îr wəhaqqōḏeš yašəḥîṯ ‘am nāḡîḏ habā’ wəqiṣṣwō ḇaššeṭef wə‘aḏ qēṣ miləḥāmâ neḥĕreṣeṯ šōmēmwōṯ:

27 wəhiḡəbîr bərîṯ lārabîm šāḇû‘a ’eḥāḏ w^aḥăṣî haššāḇû‘a yašəbîṯ| zeḇ^aḥ ûminəḥâ wə‘al kənaf šiqqûṣîm məšōmēm wə‘aḏ-kālâ wəneḥĕrāṣâ titaḵə ‘al-šōmēm: f