Deuteronomy (Devarim) Chapter 4

‎1 ‏וְעַתָּ֣ה יִשְׂרָאֵ֗ל שְׁמַ֤ע אֶל־הַֽחֻקִּים֙ וְאֶל־הַמִּשְׁפָּטִ֔ים אֲשֶׁ֧ר אָֽנֹכִ֛י מְלַמֵּ֥ד אֶתְכֶ֖ם לַעֲשׂ֑וֹת לְמַ֣עַן תִּֽחְי֗וּ וּבָאתֶם֙ וִֽירִשְׁתֶּ֣ם אֶת־הָאָ֔רֶץ אֲשֶׁ֧ר יְהוָ֛ה אֱלֹהֵ֥י אֲבֹתֵיכֶ֖ם נֹתֵ֥ן לָכֶֽם׃

‎2 ‏לֹ֣א תֹסִ֗פוּ עַל־הַדָּבָר֙ אֲשֶׁ֤ר אָנֹכִי֙ מְצַוֶּ֣ה אֶתְכֶ֔ם וְלֹ֥א תִגְרְע֖וּ מִמֶּ֑נּוּ לִשְׁמֹ֗ר אֶת־מִצְוֹת֙ יְהוָ֣ה אֱלֹֽהֵיכֶ֔ם אֲשֶׁ֥ר אָנֹכִ֖י מְצַוֶּ֥ה אֶתְכֶֽם׃

‎3 ‏עֵֽינֵיכֶם֙ הָֽרֹאֹ֔ת אֵ֛ת אֲשֶׁר־עָשָׂ֥ה יְהוָ֖ה בְּבַ֣עַל פְּע֑וֹר כִּ֣י כָל־הָאִ֗ישׁ אֲשֶׁ֤ר הָלַךְ֙ אַחֲרֵ֣י בַֽעַל־פְּע֔וֹר הִשְׁמִיד֛וֹ יְהוָ֥ה אֱלֹהֶ֖יךָ מִקִּרְבֶּֽךָ׃

‎4 ‏וְאַתֶּם֙ הַדְּבֵקִ֔ים בַּיהוָ֖ה אֱלֹהֵיכֶ֑ם חַיִּ֥ים כֻּלְּכֶ֖ם הַיּֽוֹם׃

‎5 ‏רְאֵ֣ה׀ לִמַּ֣דְתִּי אֶתְכֶ֗ם חֻקִּים֙ וּמִשְׁפָּטִ֔ים כַּאֲשֶׁ֥ר צִוַּ֖נִי יְהוָ֣ה אֱלֹהָ֑י לַעֲשׂ֣וֹת כֵּ֔ן בְּקֶ֣רֶב הָאָ֔רֶץ אֲשֶׁ֥ר אַתֶּ֛ם בָּאִ֥ים שָׁ֖מָּה לְרִשְׁתָּֽהּ׃

‎6 ‏וּשְׁמַרְתֶּם֮ וַעֲשִׂיתֶם֒ כִּ֣י הִ֤וא חָכְמַתְכֶם֙ וּבִ֣ינַתְכֶ֔ם לְעֵינֵ֖י הָעַמִּ֑ים אֲשֶׁ֣ר יִשְׁמְע֗וּן אֵ֚ת כָּל־הַחֻקִּ֣ים הָאֵ֔לֶּה וְאָמְר֗וּ רַ֚ק עַם־חָכָ֣ם וְנָב֔וֹן הַגּ֥וֹי הַגָּד֖וֹל הַזֶּֽה׃

‎7 ‏כִּ֚י מִי־ג֣וֹי גָּד֔וֹל אֲשֶׁר־ל֥וֹ אֱלֹהִ֖ים קְרֹבִ֣ים אֵלָ֑יו כַּיהוָ֣ה אֱלֹהֵ֔ינוּ בְּכָל־קָרְאֵ֖נוּ אֵלָֽיו׃

‎8 ‏וּמִי֙ גּ֣וֹי גָּד֔וֹל אֲשֶׁר־ל֛וֹ חֻקִּ֥ים וּמִשְׁפָּטִ֖ים צַדִּיקִ֑ם כְּכֹל֙ הַתּוֹרָ֣ה הַזֹּ֔את אֲשֶׁ֧ר אָנֹכִ֛י נֹתֵ֥ן לִפְנֵיכֶ֖ם הַיּֽוֹם׃

‎9 ‏רַ֡ק הִשָּׁ֣מֶר לְךָ֩ וּשְׁמֹ֨ר נַפְשְׁךָ֜ מְאֹ֗ד פֶּן־תִּשְׁכַּ֨ח אֶת־הַדְּבָרִ֜ים אֲשֶׁר־רָא֣וּ עֵינֶ֗יךָ וּפֶן־יָס֙וּרוּ֙ מִלְּבָ֣בְךָ֔ כֹּ֖ל יְמֵ֣י חַיֶּ֑יךָ וְהוֹדַעְתָּ֥ם לְבָנֶ֖יךָ וְלִבְנֵ֥י בָנֶֽיךָ׃

‎10 ‏י֗וֹם אֲשֶׁ֨ר עָמַ֜דְתָּ לִפְנֵ֨י יְהוָ֣ה אֱלֹהֶיךָ֮ בְּחֹרֵב֒ בֶּאֱמֹ֨ר יְהוָ֜ה אֵלַ֗י הַקְהֶל־לִי֙ אֶת־הָעָ֔ם וְאַשְׁמִעֵ֖ם אֶת־דְּבָרָ֑י אֲשֶׁ֨ר יִלְמְד֜וּן לְיִרְאָ֣ה אֹתִ֗י כָּל־הַיָּמִים֙ אֲשֶׁ֨ר הֵ֤ם חַיִּים֙ עַל־הָ֣אֲדָמָ֔ה וְאֶת־בְּנֵיהֶ֖ם יְלַמֵּדֽוּן׃

‎11 ‏וַתִּקְרְב֥וּן וַתַּֽעַמְד֖וּן תַּ֣חַת הָהָ֑ר וְהָהָ֞ר בֹּעֵ֤ר בָּאֵשׁ֙ עַד־לֵ֣ב הַשָּׁמַ֔יִם חֹ֖שֶׁךְ עָנָ֥ן וַעֲרָפֶֽל׃

‎12 ‏וַיְדַבֵּ֧ר יְהוָ֛ה אֲלֵיכֶ֖ם מִתּ֣וֹךְ הָאֵ֑שׁ ק֤וֹל דְּבָרִים֙ אַתֶּ֣ם שֹׁמְעִ֔ים וּתְמוּנָ֛ה אֵינְכֶ֥ם רֹאִ֖ים זוּלָתִ֥י קֽוֹל׃

‎13 ‏וַיַּגֵּ֨ד לָכֶ֜ם אֶת־בְּרִית֗וֹ אֲשֶׁ֨ר צִוָּ֤ה אֶתְכֶם֙ לַעֲשׂ֔וֹת עֲשֶׂ֖רֶת הַדְּבָרִ֑ים וַֽיִּכְתְּבֵ֔ם עַל־שְׁנֵ֖י לֻח֥וֹת אֲבָנִֽים׃

‎14 ‏וְאֹתִ֞י צִוָּ֤ה יְהוָה֙ בָּעֵ֣ת הַהִ֔וא לְלַמֵּ֣ד אֶתְכֶ֔ם חֻקִּ֖ים וּמִשְׁפָּטִ֑ים לַעֲשֹׂתְכֶ֣ם אֹתָ֔ם בָּאָ֕רֶץ אֲשֶׁ֥ר אַתֶּ֛ם עֹבְרִ֥ים שָׁ֖מָּה לְרִשְׁתָּֽהּ׃

‎15 ‏וְנִשְׁמַרְתֶּ֥ם מְאֹ֖ד לְנַפְשֹׁתֵיכֶ֑ם כִּ֣י לֹ֤א רְאִיתֶם֙ כָּל־תְּמוּנָ֔ה בְּי֗וֹם דִּבֶּ֨ר יְהוָ֧ה אֲלֵיכֶ֛ם בְּחֹרֵ֖ב מִתּ֥וֹךְ הָאֵֽשׁ׃

‎16 ‏פֶּ֨ן־תַּשְׁחִת֔וּן וַעֲשִׂיתֶ֥ם לָכֶ֛ם פֶּ֖סֶל תְּמוּנַ֣ת כָּל־סָ֑מֶל תַּבְנִ֥ית זָכָ֖ר א֥וֹ נְקֵבָֽה׃

‎17 ‏תַּבְנִ֕ית כָּל־בְּהֵמָ֖ה אֲשֶׁ֣ר בָּאָ֑רֶץ תַּבְנִית֙ כָּל־צִפּ֣וֹר כָּנָ֔ף אֲשֶׁ֥ר תָּע֖וּף בַּשָּׁמָֽיִם׃

‎18 ‏תַּבְנִ֕ית כָּל־רֹמֵ֖שׂ בָּאֲדָמָ֑ה תַּבְנִ֛ית כָּל־דָּגָ֥ה אֲשֶׁר־בַּמַּ֖יִם מִתַּ֥חַת לָאָֽרֶץ׃

‎19 ‏וּפֶן־תִּשָּׂ֨א עֵינֶ֜יךָ הַשָּׁמַ֗יְמָה וְֽ֠רָאִיתָ אֶת־הַשֶּׁ֨מֶשׁ וְאֶת־הַיָּרֵ֜חַ וְאֶת־הַכּֽוֹכָבִ֗ים כֹּ֚ל צְבָ֣א הַשָּׁמַ֔יִם וְנִדַּחְתָּ֛ וְהִשְׁתַּחֲוִ֥יתָ לָהֶ֖ם וַעֲבַדְתָּ֑ם אֲשֶׁ֨ר חָלַ֜ק יְהוָ֤ה אֱלֹהֶ֙יךָ֙ אֹתָ֔ם לְכֹל֙ הָֽעַמִּ֔ים תַּ֖חַת כָּל־הַשָּׁמָֽיִם׃

‎20 ‏וְאֶתְכֶם֙ לָקַ֣ח יְהוָ֔ה וַיּוֹצִ֥א אֶתְכֶ֛ם מִכּ֥וּר הַבַּרְזֶ֖ל מִמִּצְרָ֑יִם לִהְי֥וֹת ל֛וֹ לְעַ֥ם נַחֲלָ֖ה כַּיּ֥וֹם הַזֶּֽה׃

‎21 ‏וַֽיהוָ֥ה הִתְאַנֶּף־בִּ֖י עַל־דִּבְרֵיכֶ֑ם וַיִּשָּׁבַ֗ע לְבִלְתִּ֤י עָבְרִי֙ אֶת־הַיַּרְדֵּ֔ן וּלְבִלְתִּי־בֹא֙ אֶל־הָאָ֣רֶץ הַטּוֹבָ֔ה אֲשֶׁר֙ יְהוָ֣ה אֱלֹהֶ֔יךָ נֹתֵ֥ן לְךָ֖ נַחֲלָֽה׃

‎22 ‏כִּ֣י אָנֹכִ֥י מֵת֙ בָּאָ֣רֶץ הַזֹּ֔את אֵינֶ֥נִּי עֹבֵ֖ר אֶת־הַיַּרְדֵּ֑ן וְאַתֶּם֙ עֹֽבְרִ֔ים וִֽירִשְׁתֶּ֕ם אֶת־הָאָ֥רֶץ הַטּוֹבָ֖ה הַזֹּֽאת׃

‎23 ‏הִשָּׁמְר֣וּ לָכֶ֗ם פֶּֽן־תִּשְׁכְּחוּ֙ אֶת־בְּרִ֤ית יְהוָה֙ אֱלֹ֣הֵיכֶ֔ם אֲשֶׁ֥ר כָּרַ֖ת עִמָּכֶ֑ם וַעֲשִׂיתֶ֨ם לָכֶ֥ם פֶּ֙סֶל֙ תְּמ֣וּנַת כֹּ֔ל אֲשֶׁ֥ר צִוְּךָ֖ יְהוָ֥ה אֱלֹהֶֽיךָ׃

‎24 ‏כִּ֚י יְהוָ֣ה אֱלֹהֶ֔יךָ אֵ֥שׁ אֹכְלָ֖ה ה֑וּא אֵ֖ל קַנָּֽא׃ פ

‎25 ‏כִּֽי־תוֹלִ֤יד בָּנִים֙ וּבְנֵ֣י בָנִ֔ים וְנוֹשַׁנְתֶּ֖ם בָּאָ֑רֶץ וְהִשְׁחַתֶּ֗ם וַעֲשִׂ֤יתֶם פֶּ֙סֶל֙ תְּמ֣וּנַת כֹּ֔ל וַעֲשִׂיתֶ֥ם הָרַ֛ע בְּעֵינֵ֥י יְהוָֽה־אֱלֹהֶ֖יךָ לְהַכְעִיסֽוֹ׃

‎26 ‏הַעִידֹתִי֩ בָכֶ֨ם הַיּ֜וֹם אֶת־הַשָּׁמַ֣יִם וְאֶת־הָאָ֗רֶץ כִּֽי־אָבֹ֣ד תֹּאבֵדוּן֮ מַהֵר֒ מֵעַ֣ל הָאָ֔רֶץ אֲשֶׁ֨ר אַתֶּ֜ם עֹבְרִ֧ים אֶת־הַיַּרְדֵּ֛ן שָׁ֖מָּה לְרִשְׁתָּ֑הּ לֹֽא־תַאֲרִיכֻ֤ן יָמִים֙ עָלֶ֔יהָ כִּ֥י הִשָּׁמֵ֖ד תִּשָּׁמֵדֽוּן׃

‎27 ‏וְהֵפִ֧יץ יְהוָ֛ה אֶתְכֶ֖ם בָּעַמִּ֑ים וְנִשְׁאַרְתֶּם֙ מְתֵ֣י מִסְפָּ֔ר בַּגּוֹיִ֕ם אֲשֶׁ֨ר יְנַהֵ֧ג יְהוָ֛ה אֶתְכֶ֖ם שָֽׁמָּה׃

‎28 ‏וַעֲבַדְתֶּם־שָׁ֣ם אֱלֹהִ֔ים מַעֲשֵׂ֖ה יְדֵ֣י אָדָ֑ם עֵ֣ץ וָאֶ֔בֶן אֲשֶׁ֤ר לֹֽא־יִרְאוּן֙ וְלֹ֣א יִשְׁמְע֔וּן וְלֹ֥א יֹֽאכְל֖וּן וְלֹ֥א יְרִיחֻֽן׃

‎29 ‏וּבִקַּשְׁתֶּ֥ם מִשָּׁ֛ם אֶת־יְהוָ֥ה אֱלֹהֶ֖יךָ וּמָצָ֑אתָ כִּ֣י תִדְרְשֶׁ֔נּוּ בְּכָל־לְבָבְךָ֖ וּבְכָל־נַפְשֶֽׁךָ׃

‎30 ‏בַּצַּ֣ר לְךָ֔ וּמְצָא֕וּךָ כֹּ֖ל הַדְּבָרִ֣ים הָאֵ֑לֶּה בְּאַחֲרִית֙ הַיָּמִ֔ים וְשַׁבְתָּ֙ עַד־יְהוָ֣ה אֱלֹהֶ֔יךָ וְשָׁמַעְתָּ֖ בְּקֹלֽוֹ׃

‎31 ‏כִּ֣י אֵ֤ל רַחוּם֙ יְהוָ֣ה אֱלֹהֶ֔יךָ לֹ֥א יַרְפְּךָ֖ וְלֹ֣א יַשְׁחִיתֶ֑ךָ וְלֹ֤א יִשְׁכַּח֙ אֶת־בְּרִ֣ית אֲבֹתֶ֔יךָ אֲשֶׁ֥ר נִשְׁבַּ֖ע לָהֶֽם׃

‎32 ‏כִּ֣י שְׁאַל־נָא֩ לְיָמִ֨ים רִֽאשֹׁנִ֜ים אֲשֶׁר־הָי֣וּ לְפָנֶ֗יךָ לְמִן־הַיּוֹם֙ אֲשֶׁר֩ בָּרָ֨א אֱלֹהִ֤ים׀ אָדָם֙ עַל־הָאָ֔רֶץ וּלְמִקְצֵ֥ה הַשָּׁמַ֖יִם וְעַד־קְצֵ֣ה הַשָּׁמָ֑יִם הֲנִֽהְיָ֗ה כַּדָּבָ֤ר הַגָּדוֹל֙ הַזֶּ֔ה א֖וֹ הֲנִשְׁמַ֥ע כָּמֹֽהוּ׃

‎33 ‏הֲשָׁ֣מַֽע עָם֩ ק֨וֹל אֱלֹהִ֜ים מְדַבֵּ֧ר מִתּוֹךְ־הָאֵ֛שׁ כַּאֲשֶׁר־שָׁמַ֥עְתָּ אַתָּ֖ה וַיֶּֽחִי׃

‎34 ‏א֣וֹ׀ הֲנִסָּ֣ה אֱלֹהִ֗ים לָ֠בוֹא לָקַ֨חַת ל֣וֹ גוֹי֮ מִקֶּ֣רֶב גּוֹי֒ בְּמַסֹּת֩ בְּאֹתֹ֨ת וּבְמוֹפְתִ֜ים וּבְמִלְחָמָ֗ה וּבְיָ֤ד חֲזָקָה֙ וּבִזְר֣וֹעַ נְטוּיָ֔ה וּבְמוֹרָאִ֖ים גְּדֹלִ֑ים כְּ֠כֹל אֲשֶׁר־עָשָׂ֨ה לָכֶ֜ם יְהוָ֧ה אֱלֹהֵיכֶ֛ם בְּמִצְרַ֖יִם לְעֵינֶֽיךָ׃

‎35 ‏אַתָּה֙ הָרְאֵ֣תָ לָדַ֔עַת כִּ֥י יְהוָ֖ה ה֣וּא הָאֱלֹהִ֑ים אֵ֥ין ע֖וֹד מִלְבַדּֽוֹ׃

‎36 ‏מִן־הַשָּׁמַ֛יִם הִשְׁמִֽיעֲךָ֥ אֶת־קֹל֖וֹ לְיַסְּרֶ֑ךָּ וְעַל־הָאָ֗רֶץ הֶרְאֲךָ֙ אֶת־אִשּׁ֣וֹ הַגְּדוֹלָ֔ה וּדְבָרָ֥יו שָׁמַ֖עְתָּ מִתּ֥וֹךְ הָאֵֽשׁ׃

‎37 ‏וְתַ֗חַת כִּ֤י אָהַב֙ אֶת־אֲבֹתֶ֔יךָ וַיִּבְחַ֥ר בְּזַרְע֖וֹ אַחֲרָ֑יו וַיּוֹצִֽאֲךָ֧ בְּפָנָ֛יו בְּכֹח֥וֹ הַגָּדֹ֖ל מִמִּצְרָֽיִם׃

‎38 ‏לְהוֹרִ֗ישׁ גּוֹיִ֛ם גְּדֹלִ֧ים וַעֲצֻמִ֛ים מִמְּךָ֖ מִפָּנֶ֑יךָ לַהֲבִֽיאֲךָ֗ לָֽתֶת־לְךָ֧ אֶת־אַרְצָ֛ם נַחֲלָ֖ה כַּיּ֥וֹם הַזֶּֽה׃

‎39 ‏וְיָדַעְתָּ֣ הַיּ֗וֹם וַהֲשֵׁבֹתָ֮ אֶל־לְבָבֶךָ֒ כִּ֤י יְהוָה֙ ה֣וּא הָֽאֱלֹהִ֔ים בַּשָּׁמַ֣יִם מִמַּ֔עַל וְעַל־הָאָ֖רֶץ מִתָּ֑חַת אֵ֖ין עֽוֹד׃

‎40 ‏וְשָׁמַרְתָּ֞ אֶת־חֻקָּ֣יו וְאֶת־מִצְוֹתָ֗יו אֲשֶׁ֨ר אָנֹכִ֤י מְצַוְּךָ֙ הַיּ֔וֹם אֲשֶׁר֙ יִיטַ֣ב לְךָ֔ וּלְבָנֶ֖יךָ אַחֲרֶ֑יךָ וּלְמַ֨עַן תַּאֲרִ֤יךְ יָמִים֙ עַל־הָ֣אֲדָמָ֔ה אֲשֶׁ֨ר יְהוָ֧ה אֱלֹהֶ֛יךָ נֹתֵ֥ן לְךָ֖ כָּל־הַיָּמִֽים׃ פ

‎41 ‏אָ֣ז יַבְדִּ֤יל מֹשֶׁה֙ שָׁלֹ֣שׁ עָרִ֔ים בְּעֵ֖בֶר הַיַּרְדֵּ֑ן מִזְרְחָ֖ה שָֽׁמֶשׁ׃

‎42 ‏לָנֻ֨ס שָׁ֜מָּה רוֹצֵ֗חַ אֲשֶׁ֨ר יִרְצַ֤ח אֶת־רֵעֵ֙הוּ֙ בִּבְלִי־דַ֔עַת וְה֛וּא לֹא־שֹׂנֵ֥א ל֖וֹ מִתְּמ֣וֹל שִׁלְשׁ֑וֹם וְנָ֗ס אֶל־אַחַ֛ת מִן־הֶעָרִ֥ים הָאֵ֖ל וָחָֽי׃

‎43 ‏אֶת־בֶּ֧צֶר בַּמִּדְבָּ֛ר בְּאֶ֥רֶץ הַמִּישֹׁ֖ר לָרֻֽאוּבֵנִ֑י¹ וְאֶת־רָאמֹ֤ת בַּגִּלְעָד֙ לַגָּדִ֔י וְאֶת־גּוֹלָ֥ן בַּבָּשָׁ֖ן לַֽמְנַשִּֽׁי׃

‎44 ‏וְזֹ֖את הַתּוֹרָ֑ה אֲשֶׁר־שָׂ֣ם מֹשֶׁ֔ה לִפְנֵ֖י בְּנֵ֥י יִשְׂרָאֵֽל׃

‎45 ‏אֵ֚לֶּה הָֽעֵדֹ֔ת וְהַֽחֻקִּ֖ים וְהַמִּשְׁפָּטִ֑ים אֲשֶׁ֨ר דִּבֶּ֤ר מֹשֶׁה֙ אֶל־בְּנֵ֣י יִשְׂרָאֵ֔ל בְּצֵאתָ֖ם מִמִּצְרָֽיִם׃

‎46 ‏בְּעֵ֨בֶר הַיַּרְדֵּ֜ן בַּגַּ֗יְא מ֚וּל בֵּ֣ית פְּע֔וֹר בְּאֶ֗רֶץ סִיחֹן֙ מֶ֣לֶךְ הָֽאֱמֹרִ֔י אֲשֶׁ֥ר יוֹשֵׁ֖ב בְּחֶשְׁבּ֑וֹן אֲשֶׁ֨ר הִכָּ֤ה מֹשֶׁה֙ וּבְנֵֽי יִשְׂרָאֵ֔ל בְּצֵאתָ֖ם מִמִּצְרָֽיִם׃

‎47 ‏וַיִּֽירְשׁ֨וּ אֶת־אַרְצ֜וֹ וְאֶת־אֶ֣רֶץ׀ ע֣וֹג מֶֽלֶךְ־הַבָּשָׁ֗ן שְׁנֵי֙ מַלְכֵ֣י הָֽאֱמֹרִ֔י אֲשֶׁ֖ר בְּעֵ֣בֶר הַיַּרְדֵּ֑ן מִזְרַ֖ח שָֽׁמֶשׁ׃

‎48 ‏מֵעֲרֹעֵ֞ר אֲשֶׁ֨ר עַל־שְׂפַת־נַ֧חַל אַרְנֹ֛ן וְעַד־הַ֥ר שִׂיאֹ֖ן ה֥וּא חֶרְמֽוֹן׃

‎49 ‏וְכָל־הָ֨עֲרָבָ֜ה עֵ֤בֶר הַיַּרְדֵּן֙ מִזְרָ֔חָה וְעַ֖ד יָ֣ם הָעֲרָבָ֑ה תַּ֖חַת אַשְׁדֹּ֥ת הַפִּסְגָּֽה׃ פ

1 wə‘atâ yiśərā’ēl šəm^a‘ ’el-h^aḥuqqîm wə’el-hammišəpāṭîm ’ăšer ’ānōḵî məlammēḏ ’eṯəḵem l^a‘ăśwōṯ ləm^a‘an tiḥəyû ûḇā’ṯem wîrišətem ’eṯ-hā’āreṣ ’ăšer yəhwâ ’ĕlōhê ’ăḇōṯêḵem nōṯēn lāḵem:

2 lō’ ṯōsifû ‘al-hadāḇār ’ăšer ’ānōḵî məṣaûeh ’eṯəḵem wəlō’ ṯiḡərə‘û mimmennû lišəmōr ’eṯ-miṣəwōṯ yəhwâ ’ĕlōhêḵem ’ăšer ’ānōḵî məṣaûeh ’eṯəḵem:

3 ‘ênêḵem hārō’ōṯ ’ēṯ ’ăšer-‘āśâ yəhwâ bəḇ^a‘al pə‘wōr kî ḵāl-hā’îš ’ăšer hālaḵə ’^aḥărê ḇ^a‘al-pə‘wōr hišəmîḏwō yəhwâ ’ĕlōheyḵā miqqirəbeḵā:

4 wə’atem hadəḇēqîm bayhwâ ’ĕlōhêḵem ḥayyîm kulləḵem hayywōm:

5 rə’ēh| limmaḏətî ’eṯəḵem ḥuqqîm ûmišəpāṭîm ka’ăšer ṣiûanî yəhwâ ’ĕlōhāy l^a‘ăśwōṯ kēn bəqereḇ hā’āreṣ ’ăšer ’atem bā’îm šāmmâ lərišətāh:

6 ûšəmarətem w^a‘ăśîṯem kî hiw’ ḥāḵəmaṯəḵem ûḇînaṯəḵem lə‘ênê hā‘ammîm ’ăšer yišəmə‘ûn ’ēṯ kāl-h^aḥuqqîm hā’ēlleh wə’āmərû raq ‘am-ḥāḵām wənāḇwōn hagwōy hagāḏwōl hazzeh:

7 kî mî-ḡwōy gāḏwōl ’ăšer-lwō ’ĕlōhîm qərōḇîm ’ēlāyw kayhwâ ’ĕlōhênû bəḵāl-qārə’ēnû ’ēlāyw:

8 ûmî gwōy gāḏwōl ’ăšer-lwō ḥuqqîm ûmišəpāṭîm ṣadîqim kəḵōl hatwōrâ hazzō’ṯ ’ăšer ’ānōḵî nōṯēn lifənêḵem hayywōm:

9 raq hiššāmer ləḵā ûšəmōr nafəšəḵā mə’ōḏ pen-tišək^aḥ ’eṯ-hadəḇārîm ’ăšer-rā’û ‘êneyḵā ûfen-yāsûrû milləḇāḇəḵā kōl yəmê ḥayyeyḵā wəhwōḏ^a‘ətām ləḇāneyḵā wəliḇənê ḇāneyḵā:

10 ywōm ’ăšer ‘āmaḏətā lifənê yəhwâ ’ĕlōheyḵā bəḥōrēḇ be’ĕmōr yəhwâ ’ēlay haqəhel-lî ’eṯ-hā‘ām wə’ašəmi‘ēm ’eṯ-dəḇārāy ’ăšer yiləməḏûn ləyirə’â ’ōṯî kāl-hayyāmîm ’ăšer hēm ḥayyîm ‘al-hā’ăḏāmâ wə’eṯ-bənêhem yəlammēḏûn:

11 watiqərəḇûn wat^a‘aməḏûn t^aḥaṯ hâār wəhâār bō‘ēr bā’ēš ‘aḏ-lēḇ haššāmayim ḥōšeḵə ‘ānān w^a‘ărāfel:

12 wayəḏabēr yəhwâ ’ălêḵem mitwōḵə hā’ēš qwōl dəḇārîm ’atem šōmə‘îm ûṯəmûnâ ’ênəḵem rō’îm zûlāṯî qwōl:

13 wayyagēḏ lāḵem ’eṯ-bərîṯwō ’ăšer ṣiûâ ’eṯəḵem l^a‘ăśwōṯ ‘ăśereṯ hadəḇārîm wayyiḵətəḇēm ‘al-šənê luḥwōṯ ’ăḇānîm:

14 wə’ōṯî ṣiûâ yəhwâ bā‘ēṯ hahiw’ ləlammēḏ ’eṯəḵem ḥuqqîm ûmišəpāṭîm l^a‘ăśōṯəḵem ’ōṯām bā’āreṣ ’ăšer ’atem ‘ōḇərîm šāmmâ lərišətāh:

15 wənišəmarətem mə’ōḏ lənafəšōṯêḵem kî lō’ rə’îṯem kāl-təmûnâ bəywōm diber yəhwâ ’ălêḵem bəḥōrēḇ mitwōḵə hā’ēš:

16 pen-tašəḥiṯûn w^a‘ăśîṯem lāḵem pesel təmûnaṯ kāl-sāmel taḇənîṯ zāḵār ’wō nəqēḇâ:

17 taḇənîṯ kāl-bəhēmâ ’ăšer bā’āreṣ taḇənîṯ kāl-ṣipwōr kānāf ’ăšer tā‘ûf baššāmāyim:

18 taḇənîṯ kāl-rōmēś bā’ăḏāmâ taḇənîṯ kāl-dāḡâ ’ăšer-bammayim mit^aḥaṯ lā’āreṣ:

19 ûfen-tiśśā’ ‘êneyḵā haššāmayəmâ wərā’îṯā ’eṯ-haššemeš wə’eṯ-hayyārēḥa wə’eṯ-hakwōḵāḇîm kōl ṣəḇā’ haššāmayim wənid^aḥətā wəhišət^aḥăwîṯā lâem w^a‘ăḇaḏətām ’ăšer ḥālaq yəhwâ ’ĕlōheyḵā ’ōṯām ləḵōl hā‘ammîm t^aḥaṯ kāl-haššāmāyim:

20 wə’eṯəḵem lāq^aḥ yəhwâ wayywōṣi’ ’eṯəḵem mikûr habarəzel mimmiṣərāyim lihəywōṯ lwō lə‘am n^aḥălâ kayywōm hazzeh:

21 wayhwâ hiṯə’annef-bî ‘al-diḇərêḵem wayyiššāḇ^a‘ ləḇilətî ‘āḇərî ’eṯ-hayyarədēn ûləḇilətî-ḇō’ ’el-hā’āreṣ haṭṭwōḇâ ’ăšer yəhwâ ’ĕlōheyḵā nōṯēn ləḵā n^aḥălâ:

22 kî ’ānōḵî mēṯ bā’āreṣ hazzō’ṯ ’ênennî ‘ōḇēr ’eṯ-hayyarədēn wə’atem ‘ōḇərîm wîrišətem ’eṯ-hā’āreṣ haṭṭwōḇâ hazzō’ṯ:

23 hiššāmərû lāḵem pen-tišəkəḥû ’eṯ-bərîṯ yəhwâ ’ĕlōhêḵem ’ăšer kāraṯ ‘immāḵem w^a‘ăśîṯem lāḵem pesel təmûnaṯ kōl ’ăšer ṣiûəḵā yəhwâ ’ĕlōheyḵā:

24 kî yəhwâ ’ĕlōheyḵā ’ēš ’ōḵəlâ hû’ ’ēl qannā’: f

25 kî-ṯwōlîḏ bānîm ûḇənê ḇānîm wənwōšanətem bā’āreṣ wəhišəḥatem w^a‘ăśîṯem pesel təmûnaṯ kōl w^a‘ăśîṯem hār^a‘ bə‘ênê yəhwâ-’ĕlōheyḵā ləhaḵə‘îswō:

26 h^a‘îḏōṯî ḇāḵem hayywōm ’eṯ-haššāmayim wə’eṯ-hā’āreṣ kî-’āḇōḏ tō’ḇēḏûn mahēr mē‘al hā’āreṣ ’ăšer ’atem ‘ōḇərîm ’eṯ-hayyarədēn šāmmâ lərišətāh lō’-ṯa’ărîḵun yāmîm ‘āleyhā kî hiššāmēḏ tiššāmēḏûn:

27 wəhēfîṣ yəhwâ ’eṯəḵem bā‘ammîm wənišə’arətem məṯê misəpār bagwōyim ’ăšer yənahēḡ yəhwâ ’eṯəḵem šāmmâ:

28 w^a‘ăḇaḏətem-šām ’ĕlōhîm m^a‘ăśēh yəḏê ’āḏām ‘ēṣ wā’eḇen ’ăšer lō’-yirə’ûn wəlō’ yišəmə‘ûn wəlō’ yō’ḵəlûn wəlō’ yərîḥun:

29 ûḇiqqašətem miššām ’eṯ-yəhwâ ’ĕlōheyḵā ûmāṣā’ṯā kî ṯiḏərəšennû bəḵāl-ləḇāḇəḵā ûḇəḵāl-nafəšeḵā:

30 baṣṣar ləḵā ûməṣā’ûḵā kōl hadəḇārîm hā’ēlleh bə’^aḥărîṯ hayyāmîm wəšaḇətā ‘aḏ-yəhwâ ’ĕlōheyḵā wəšām^a‘ətā bəqōlwō:

31 kî ’ēl r^aḥûm yəhwâ ’ĕlōheyḵā lō’ yarəpəḵā wəlō’ yašəḥîṯeḵā wəlō’ yišək^aḥ ’eṯ-bərîṯ ’ăḇōṯeyḵā ’ăšer nišəb^a‘ lâem:

32 kî šə’al-nā’ ləyāmîm ri’šōnîm ’ăšer-hāyû ləfāneyḵā ləmin-hayywōm ’ăšer bārā’ ’ĕlōhîm| ’āḏām ‘al-hā’āreṣ ûləmiqəṣēh haššāmayim wə‘aḏ-qəṣēh haššāmāyim hănihəyâ kadāḇār hagāḏwōl hazzeh ’wō hănišəm^a‘ kāmōhû:

33 hăšām^a‘ ‘ām qwōl ’ĕlōhîm məḏabēr mitwōḵə-hā’ēš ka’ăšer-šām^a‘ətā ’atâ wayyeḥî:

34 ’wō| hănissâ ’ĕlōhîm lāḇwō’ lāq^aḥaṯ lwō ḡwōy miqqereḇ gwōy bəmassōṯ bə’ōṯōṯ ûḇəmwōfəṯîm ûḇəmiləḥāmâ ûḇəyāḏ ḥăzāqâ ûḇizərwō‘a nəṭûyâ ûḇəmwōrā’îm gəḏōlîm kəḵōl ’ăšer-‘āśâ lāḵem yəhwâ ’ĕlōhêḵem bəmiṣərayim lə‘êneyḵā:

35 ’atâ hārə’ēṯā lāḏ^a‘aṯ kî yəhwâ hû’ hā’ĕlōhîm ’ên ‘wōḏ miləḇadwō:

36 min-haššāmayim hišəmî‘ăḵā ’eṯ-qōlwō ləyassəreḵḵā wə‘al-hā’āreṣ herə’ăḵā ’eṯ-’iššwō hagəḏwōlâ ûḏəḇārāyw šām^a‘ətā mitwōḵə hā’ēš:

37 wəṯ^aḥaṯ kî ’âaḇ ’eṯ-’ăḇōṯeyḵā wayyiḇəḥar bəzarə‘wō ’^aḥărāyw wayywōṣi’ăḵā bəfānāyw bəḵōḥwō hagāḏōl mimmiṣərāyim:

38 ləhwōrîš gwōyim gəḏōlîm w^a‘ăṣumîm mimməḵā mipāneyḵā lahăḇî’ăḵā lāṯeṯ-ləḵā ’eṯ-’arəṣām n^aḥălâ kayywōm hazzeh:

39 wəyāḏ^a‘ətā hayywōm wahăšēḇōṯā ’el-ləḇāḇeḵā kî yəhwâ hû’ hā’ĕlōhîm baššāmayim mimm^a‘al wə‘al-hā’āreṣ mitāḥaṯ ’ên ‘wōḏ:

40 wəšāmarətā ’eṯ-ḥuqqāyw wə’eṯ-miṣəwōṯāyw ’ăšer ’ānōḵî məṣaûəḵā hayywōm ’ăšer yîṭaḇ ləḵā ûləḇāneyḵā ’^aḥăreyḵā ûləm^a‘an ta’ărîḵə yāmîm ‘al-hā’ăḏāmâ ’ăšer yəhwâ ’ĕlōheyḵā nōṯēn ləḵā kāl-hayyāmîm: f

41 ’āz yaḇədîl mōšeh šālōš ‘ārîm bə‘ēḇer hayyarədēn mizərəḥâ šāmeš:

42 lānus šāmmâ rwōṣēḥa ’ăšer yirəṣ^aḥ ’eṯ-rē‘ēhû biḇəlî-ḏ^a‘aṯ wəhû’ lō’-śōnē’ lwō mitəmwōl šiləšwōm wənās ’el-’^aḥaṯ min-he‘ārîm hā’ēl wāḥāy:

43 ’eṯ-beṣer bammiḏəbār bə’ereṣ hammîšōr lāru’ûḇēnî¹ wə’eṯ-rā’mōṯ bagilə‘āḏ lagāḏî wə’eṯ-gwōlān babāšān lamənaššî:

44 wəzō’ṯ hatwōrâ ’ăšer-śām mōšeh lifənê bənê yiśərā’ēl:

45 ’ēlleh hā‘ēḏōṯ wəh^aḥuqqîm wəhammišəpāṭîm ’ăšer diber mōšeh ’el-bənê yiśərā’ēl bəṣē’ṯām mimmiṣərāyim:

46 bə‘ēḇer hayyarədēn bagayə’ mûl bêṯ pə‘wōr bə’ereṣ sîḥōn meleḵə hā’ĕmōrî ’ăšer ywōšēḇ bəḥešəbwōn ’ăšer hikâ mōšeh ûḇənê yiśərā’ēl bəṣē’ṯām mimmiṣərāyim:

47 wayyîrəšû ’eṯ-’arəṣwō wə’eṯ-’ereṣ| ‘wōḡ meleḵə-habāšān šənê maləḵê hā’ĕmōrî ’ăšer bə‘ēḇer hayyarədēn mizər^aḥ šāmeš:

48 mē‘ărō‘ēr ’ăšer ‘al-śəfaṯ-n^aḥal ’arənōn wə‘aḏ-har śî’ōn hû’ ḥerəmwōn:

49 wəḵāl-hā‘ărāḇâ ‘ēḇer hayyarədēn mizərāḥâ wə‘aḏ yām hā‘ărāḇâ t^aḥaṯ ’ašədōṯ hapisəgâ: f