Deuteronomy (Devarim) Chapter 5

‎1 ‏וַיִּקְרָ֣א מֹשֶׁה֮ אֶל־כָּל־יִשְׂרָאֵל֒ וַיֹּ֣אמֶר אֲלֵהֶ֗ם שְׁמַ֤ע יִשְׂרָאֵל֙ אֶת־הַחֻקִּ֣ים וְאֶת־הַמִּשְׁפָּטִ֔ים אֲשֶׁ֧ר אָנֹכִ֛י דֹּבֵ֥ר בְּאָזְנֵיכֶ֖ם הַיּ֑וֹם וּלְמַדְתֶּ֣ם אֹתָ֔ם וּשְׁמַרְתֶּ֖ם לַעֲשֹׂתָֽם׃

‎2 ‏יְהוָ֣ה אֱלֹהֵ֗ינוּ כָּרַ֥ת עִמָּ֛נוּ בְּרִ֖ית בְּחֹרֵֽב׃

‎3 ‏לֹ֣א אֶת־אֲבֹתֵ֔ינוּ כָּרַ֥ת יְהוָ֖ה אֶת־הַבְּרִ֣ית הַזֹּ֑את כִּ֣י אִתָּ֗נוּ אֲנַ֨חְנוּ אֵ֥לֶּה פֹ֛ה הַיּ֖וֹם כֻּלָּ֥נוּ חַיִּֽים׃

‎4 ‏פָּנִ֣ים׀ בְּפָנִ֗ים דִּבֶּ֨ר יְהוָ֧ה עִמָּכֶ֛ם בָּהָ֖ר מִתּ֥וֹךְ הָאֵֽשׁ׃

‎5 ‏אָ֠נֹכִי עֹמֵ֨ד בֵּין־יְהוָ֤ה וּבֵֽינֵיכֶם֙ בָּעֵ֣ת הַהִ֔וא לְהַגִּ֥יד לָכֶ֖ם אֶת־דְּבַ֣ר יְהוָ֑ה כִּ֤י יְרֵאתֶם֙ מִפְּנֵ֣י הָאֵ֔שׁ וְלֹֽא־עֲלִיתֶ֥ם בָּהָ֖ר לֵאמֹֽר׃ ס

‎6 ‏אָֽנֹכִי֙ יְהוָ֣ה אֱלֹהֶ֔יךָ אֲשֶׁ֧ר הוֹצֵאתִ֛יךָ מֵאֶ֥רֶץ מִצְרַ֖יִם מִבֵּ֣ית עֲבָדִֽ֑ים׃

‎7 ‏לֹ֣א יִהְיֶ֥ה־לְךָ֛֩ אֱלֹהִ֥֨ים אֲחֵרִ֖֜ים עַל־פָּנָֽ֗יַ׃

‎8 ‏לֹֽ֣א־תַעֲשֶׂ֥ה־לְךָ֥֣ פֶ֣֙סֶל֙׀ כָּל־תְּמוּנָ֔֡ה אֲשֶׁ֤֣ר בַּשָּׁמַ֣֙יִם֙׀ מִמַּ֔֡עַל וַאֲשֶׁ֥ר֩ בָּאָ֖֨רֶץ מִתָּ֑֜חַת וַאֲשֶׁ֥ר בַּמַּ֖֣יִם׀ מִתַּ֥֣חַת לָאָֽ֗רֶץ׃

‎9 ‏לֹא־תִשְׁתַּחֲוֶ֥֣ה לָהֶ֖ם֮ וְלֹ֣א תָעָבְדֵ֑ם֒ כִּ֣י אָנֹכִ֞י יְהוָ֤ה אֱלֹהֶ֙יךָ֙ אֵ֣ל קַנָּ֔א פֹּ֠קֵד עֲוֹ֨ן אָב֧וֹת עַל־בָּנִ֛ים וְעַל־שִׁלֵּשִׁ֥ים וְעַל־רִבֵּעִ֖ים לְשֹׂנְאָֽ֑י׃

‎10 ‏וְעֹ֤֥שֶׂה חֶ֖֙סֶד֙ לַֽאֲלָפִ֑֔ים לְאֹהֲבַ֖י וּלְשֹׁמְרֵ֥י מצותו מִצְוֹתָֽי׃ ס

‎11 ‏לֹ֥א תִשָּׂ֛א אֶת־שֵֽׁם־יְהוָ֥ה אֱלֹהֶ֖יךָ לַשָּׁ֑וְא כִּ֣י לֹ֤א יְנַקֶּה֙ יְהוָ֔ה אֵ֛ת אֲשֶׁר־יִשָּׂ֥א אֶת־שְׁמ֖וֹ לַשָּֽׁוְא׃ ס

‎12 ‏שָׁמ֣֛וֹר אֶת־י֥וֹם֩ הַשַּׁבָּ֖֨ת לְקַדְּשׁ֑֜וֹ כַּאֲשֶׁ֥ר צִוְּךָ֖֣׀ יְהוָ֥֣ה אֱלֹהֶֽ֗יךָ²

‎13 ‏שֵׁ֤֣שֶׁת יָמִ֣ים֙ תַּֽעֲבֹ֔ד֮ וְעָשִׂ֖֣יתָ כָּֿל־מְלַאכְתֶּֽךָ֒׃

‎14 ‏וְי֙וֹם֙ הַשְּׁבִיעִ֜֔י שַׁבָּ֖֣ת׀ לַיהוָ֖֣ה אֱלֹהֶ֑֗יךָ לֹ֣א תַעֲשֶׂ֣ה כָל־מְלָאכָ֡ה אַתָּ֣ה וּבִנְךָֽ־וּבִתֶּ֣ךָ וְעַבְדְּךָֽ־וַ֠אֲמָתֶךָ וְשׁוֹרְךָ֨ וַחֲמֹֽרְךָ֜ וְכָל־בְּהֶמְתֶּ֗ךָ וְגֵֽרְךָ֙ אֲשֶׁ֣ר בִּשְׁעָרֶ֔יךָ לְמַ֗עַן יָנ֛וּחַ עַבְדְּךָ֥ וַאֲמָתְךָ֖ כָּמֽ֑וֹךָ׃

‎15 ‏וְזָכַרְתָּ֞֗ כִּ֣י־עֶ֤֥בֶד הָיִ֣֙יתָ֙׀ בְּאֶ֣רֶץ מִצְרַ֔֗יִם וַיֹּצִ֨אֲךָ֜֩ יְהוָ֤֨ה אֱלֹהֶ֤֙יךָ֙ מִשָּׁ֔ם֙ בְּיָ֤֥ד חֲזָקָ֖ה֙ וּבִזְרֹ֣עַ נְטוּיָ֑֔ה עַל־כֵּ֗ן צִוְּךָ֙ יְהוָ֣ה אֱלֹהֶ֔יךָ לַעֲשׂ֖וֹת אֶת־י֥וֹם הַשַּׁבָּֽת׃ ס

‎16 ‏כַּבֵּ֤ד אֶת־אָבִ֙יךָ֙ וְאֶת־אִמֶּ֔ךָ כַּאֲשֶׁ֥ר צִוְּךָ֖ יְהוָ֣ה אֱלֹהֶ֑יךָ לְמַ֣עַן׀ יַאֲרִיכֻ֣ן יָמֶ֗יךָ וּלְמַ֙עַן֙ יִ֣יטַב לָ֔ךְ עַ֚ל הָֽאֲדָמָ֔ה אֲשֶׁר־יְהוָ֥ה אֱלֹהֶ֖יךָ נֹתֵ֥ן לָֽךְ׃ ס

‎17 ‏לֹ֥֖א תִּֿרְצָֽח׃ ס

‎18 ‏וְלֹ֖֣א תִּֿנְאָֽ֑ף׃ ס

‎19 ‏וְלֹ֖֣א תִּֿגְנֹֽ֔ב׃ ס

‎20 ‏וְלֹֽא־תַעֲנֶ֥ה בְרֵֽעֲךָ֖ עֵ֥ד שָֽׁוְא׃ ס

‎21 ‏וְלֹ֥א תַחְמֹ֖ד אֵ֣שֶׁת רֵעֶ֑ךָ סוְלֹ֨א תִתְאַוֶּ֜ה בֵּ֣ית רֵעֶ֗ךָ שָׂדֵ֜הוּ וְעַבְדּ֤וֹ וַאֲמָתוֹ֙ שׁוֹר֣וֹ וַחֲמֹר֔וֹ וְכֹ֖ל אֲשֶׁ֥ר לְרֵעֶֽךָ׃ ס

‎22 ‏אֶֽת־הַדְּבָרִ֣ים הָאֵ֡לֶּה דִּבֶּר֩ יְהוָ֨ה אֶל־כָּל־קְהַלְכֶ֜ם בָּהָ֗ר מִתּ֤וֹךְ הָאֵשׁ֙ הֶֽעָנָ֣ן וְהָֽעֲרָפֶ֔ל ק֥וֹל גָּד֖וֹל וְלֹ֣א יָסָ֑ף וַֽיִּכְתְּבֵ֗ם עַל־שְׁנֵי֙ לֻחֹ֣ת אֲבָנִ֔ים וַֽיִּתְּנֵ֖ם אֵלָֽי׃

‎23 ‏וַיְהִ֗י כְּשָׁמְעֲכֶ֤ם אֶת־הַקּוֹל֙ מִתּ֣וֹךְ הַחֹ֔שֶׁךְ וְהָהָ֖ר בֹּעֵ֣ר בָּאֵ֑שׁ וַתִּקְרְב֣וּן אֵלַ֔י כָּל־רָאשֵׁ֥י שִׁבְטֵיכֶ֖ם וְזִקְנֵיכֶֽם׃

‎24 ‏וַתֹּאמְר֗וּ הֵ֣ן הֶרְאָ֜נוּ יְהוָ֤ה אֱלֹהֵ֙ינוּ֙ אֶת־כְּבֹד֣וֹ וְאֶת־גָּדְל֔וֹ וְאֶת־קֹל֥וֹ שָׁמַ֖עְנוּ מִתּ֣וֹךְ הָאֵ֑שׁ הַיּ֤וֹם הַזֶּה֙ רָאִ֔ינוּ כִּֽי־יְדַבֵּ֧ר אֱלֹהִ֛ים אֶת־הָֽאָדָ֖ם וָחָֽי׃

‎25 ‏וְעַתָּה֙ לָ֣מָּה נָמ֔וּת כִּ֣י תֹֽאכְלֵ֔נוּ הָאֵ֥שׁ הַגְּדֹלָ֖ה הַזֹּ֑את אִם־יֹסְפִ֣ים׀ אֲנַ֗חְנוּ לִ֠שְׁמֹעַ אֶת־ק֨וֹל יְהוָ֧ה אֱלֹהֵ֛ינוּ ע֖וֹד וָמָֽתְנוּ׃

‎26 ‏כִּ֣י מִ֣י כָל־בָּשָׂ֡ר אֲשֶׁ֣ר שָׁמַ֣ע קוֹל֩ אֱלֹהִ֨ים חַיִּ֜ים מְדַבֵּ֧ר מִתּוֹךְ־הָאֵ֛שׁ כָּמֹ֖נוּ וַיֶּֽחִי׃

‎27 ‏קְרַ֤ב אַתָּה֙ וּֽשֲׁמָ֔ע אֵ֛ת כָּל־אֲשֶׁ֥ר יֹאמַ֖ר יְהוָ֣ה אֱלֹהֵ֑ינוּ וְאַ֣תְּ׀ תְּדַבֵּ֣ר אֵלֵ֗ינוּ אֵת֩ כָּל־אֲשֶׁ֨ר יְדַבֵּ֜ר יְהוָ֧ה אֱלֹהֵ֛ינוּ אֵלֶ֖יךָ וְשָׁמַ֥עְנוּ וְעָשִֽׂינוּ׃

‎28 ‏וַיִּשְׁמַ֤ע יְהוָה֙ אֶת־ק֣וֹל דִּבְרֵיכֶ֔ם בְּדַבֶּרְכֶ֖ם אֵלָ֑י וַיֹּ֨אמֶר יְהוָ֜ה אֵלַ֗י שָׁ֠מַעְתִּי אֶת־ק֨וֹל דִּבְרֵ֜י הָעָ֤ם הַזֶּה֙ אֲשֶׁ֣ר דִּבְּר֣וּ אֵלֶ֔יךָ הֵיטִ֖יבוּ כָּל־אֲשֶׁ֥ר דִּבֵּֽרוּ׃

‎29 ‏מִֽי־יִתֵּ֡ן וְהָיָה֩ לְבָבָ֨ם זֶ֜ה לָהֶ֗ם לְיִרְאָ֥ה אֹתִ֛י וְלִשְׁמֹ֥ר אֶת־כָּל־מִצְוֹתַ֖י כָּל־הַיָּמִ֑ים לְמַ֨עַן יִיטַ֥ב לָהֶ֛ם וְלִבְנֵיהֶ֖ם לְעֹלָֽם׃

‎30 ‏לֵ֖ךְ אֱמֹ֣ר לָהֶ֑ם שׁ֥וּבוּ לָכֶ֖ם לְאָהֳלֵיכֶֽם׃

‎31 ‏וְאַתָּ֗ה פֹּה֮ עֲמֹ֣ד עִמָּדִי֒ וַאֲדַבְּרָ֣ה אֵלֶ֗יךָ אֵ֧ת כָּל־הַמִּצְוָ֛ה וְהַחֻקִּ֥ים וְהַמִּשְׁפָּטִ֖ים אֲשֶׁ֣ר תְּלַמְּדֵ֑ם וְעָשׂ֣וּ בָאָ֔רֶץ אֲשֶׁ֧ר אָנֹכִ֛י נֹתֵ֥ן לָהֶ֖ם לְרִשְׁתָּֽהּ׃

‎32 ‏וּשְׁמַרְתֶּ֣ם לַעֲשׂ֔וֹת כַּאֲשֶׁ֥ר צִוָּ֛ה יְהוָ֥ה אֱלֹהֵיכֶ֖ם אֶתְכֶ֑ם לֹ֥א תָסֻ֖רוּ יָמִ֥ין וּשְׂמֹֽאל׃

‎33 ‏בְּכָל־הַדֶּ֗רֶךְ אֲשֶׁ֨ר צִוָּ֜ה יְהוָ֧ה אֱלֹהֵיכֶ֛ם אֶתְכֶ֖ם תֵּלֵ֑כוּ לְמַ֤עַן תִּֽחְיוּן֙ וְט֣וֹב לָכֶ֔ם וְהַאֲרַכְתֶּ֣ם יָמִ֔ים בָּאָ֖רֶץ אֲשֶׁ֥ר תִּֽירָשֽׁוּן׃

1 wayyiqərā’ mōšeh ’el-kāl-yiśərā’ēl wayyō’mer ’ălēhem šəm^a‘ yiśərā’ēl ’eṯ-h^aḥuqqîm wə’eṯ-hammišəpāṭîm ’ăšer ’ānōḵî dōḇēr bə’āzənêḵem hayywōm ûləmaḏətem ’ōṯām ûšəmarətem l^a‘ăśōṯām:

2 yəhwâ ’ĕlōhênû kāraṯ ‘immānû bərîṯ bəḥōrēḇ:

3 lō’ ’eṯ-’ăḇōṯênû kāraṯ yəhwâ ’eṯ-habərîṯ hazzō’ṯ kî ’itānû ’ăn^aḥənû ’ēlleh fōh hayywōm kullānû ḥayyîm:

4 pānîm| bəfānîm diber yəhwâ ‘immāḵem bâār mitwōḵə hā’ēš:

5 ’ānōḵî ‘ōmēḏ bên-yəhwâ ûḇênêḵem bā‘ēṯ hahiw’ ləhagîḏ lāḵem ’eṯ-dəḇar yəhwâ kî yərē’ṯem mipənê hā’ēš wəlō’-‘ălîṯem bâār lē’mōr: s

6 ’ānōḵî yəhwâ ’ĕlōheyḵā ’ăšer hwōṣē’ṯîḵā mē’ereṣ miṣərayim mibêṯ ‘ăḇāḏîm:

7 lō’ yihəyeh-ləḵā ’ĕlōhîm ’ăḥērîm ‘al-pānāya:

8 lō’-ṯ^a‘ăśeh-ləḵā fesel| kāl-təmûnâ ’ăšer baššāmayim| mimm^a‘al wa’ăšer bā’āreṣ mitāḥaṯ wa’ăšer bammayim| mit^aḥaṯ lā’āreṣ:

9 lō’-ṯišət^aḥăweh lâem wəlō’ ṯā‘āḇəḏēm kî ’ānōḵî yəhwâ ’ĕlōheyḵā ’ēl qannā’ pōqēḏ ‘ăwōn ’āḇwōṯ ‘al-bānîm wə‘al-šillēšîm wə‘al-ribē‘îm ləśōnə’āy:

10 wə‘ōśeh ḥeseḏ la’ălāfîm lə’ōhăḇay ûləšōmərê miṣəwōṯāw miṣəwōṯāy: s

11 lō’ ṯiśśā’ ’eṯ-šēm-yəhwâ ’ĕlōheyḵā laššāwə’ kî lō’ yənaqqeh yəhwâ ’ēṯ ’ăšer-yiśśā’ ’eṯ-šəmwō laššāwə’: s

12 šāmwōr ’eṯ-ywōm haššabāṯ ləqadəšwō ka’ăšer ṣiûəḵā| yəhwâ ’ĕlōheyḵā²

13 šēšeṯ yāmîm t^a‘ăḇōḏ wə‘āśîṯā kāl-məla’ḵəteḵā:

14 wəywōm haššəḇî‘î šabāṯ| layhwâ ’ĕlōheyḵā lō’ ṯ^a‘ăśeh ḵāl-məlā’ḵâ ’atâ ûḇinəḵā-ûḇiteḵā wə‘aḇədəḵā-wa’ămāṯeḵā wəšwōrəḵā w^aḥămōrəḵā wəḵāl-bəheməteḵā wəḡērəḵā ’ăšer bišə‘āreyḵā ləm^a‘an yānûḥa ‘aḇədəḵā wa’ămāṯəḵā kāmwōḵā:

15 wəzāḵarətā kî-‘eḇeḏ hāyîṯā| bə’ereṣ miṣərayim wayyōṣi’ăḵā yəhwâ ’ĕlōheyḵā miššām bəyāḏ ḥăzāqâ ûḇizərō‘a nəṭûyâ ‘al-kēn ṣiûəḵā yəhwâ ’ĕlōheyḵā l^a‘ăśwōṯ ’eṯ-ywōm haššabāṯ: s

16 kabēḏ ’eṯ-’āḇîḵā wə’eṯ-’immeḵā ka’ăšer ṣiûəḵā yəhwâ ’ĕlōheyḵā ləm^a‘an| ya’ărîḵun yāmeyḵā ûləm^a‘an yîṭaḇ lāḵə ‘al hā’ăḏāmâ ’ăšer-yəhwâ ’ĕlōheyḵā nōṯēn lāḵə: s

17 lō’ tirəṣāḥ: s

18 wəlō’ tinə’āf: s

19 wəlō’ tiḡənōḇ: s

20 wəlō’-ṯ^a‘ăneh ḇərē‘ăḵā ‘ēḏ šāwə’: s

21 wəlō’ ṯ^aḥəmōḏ ’ēšeṯ rē‘eḵā swəlō’ ṯiṯə’aûeh bêṯ rē‘eḵā śāḏēhû wə‘aḇədwō wa’ămāṯwō šwōrwō w^aḥămōrwō wəḵōl ’ăšer lərē‘eḵā: s

22 ’eṯ-hadəḇārîm hā’ēlleh diber yəhwâ ’el-kāl-qəhaləḵem bâār mitwōḵə hā’ēš he‘ānān wəhā‘ărāfel qwōl gāḏwōl wəlō’ yāsāf wayyiḵətəḇēm ‘al-šənê luḥōṯ ’ăḇānîm wayyitənēm ’ēlāy:

23 wayəhî kəšāmə‘ăḵem ’eṯ-haqqwōl mitwōḵə h^aḥōšeḵə wəhâār bō‘ēr bā’ēš watiqərəḇûn ’ēlay kāl-rā’šê šiḇəṭêḵem wəziqənêḵem:

24 watō’mərû hēn herə’ānû yəhwâ ’ĕlōhênû ’eṯ-kəḇōḏwō wə’eṯ-gāḏəlwō wə’eṯ-qōlwō šām^a‘ənû mitwōḵə hā’ēš hayywōm hazzeh rā’înû kî-yəḏabēr ’ĕlōhîm ’eṯ-hā’āḏām wāḥāy:

25 wə‘atâ lāmmâ nāmûṯ kî ṯō’ḵəlēnû hā’ēš hagəḏōlâ hazzō’ṯ ’im-yōsəfîm| ’ăn^aḥənû lišəmō‘a ’eṯ-qwōl yəhwâ ’ĕlōhênû ‘wōḏ wāmāṯənû:

26 kî mî ḵāl-bāśār ’ăšer šām^a‘ qwōl ’ĕlōhîm ḥayyîm məḏabēr mitwōḵə-hā’ēš kāmōnû wayyeḥî:

27 qəraḇ ’atâ ûšămā‘ ’ēṯ kāl-’ăšer yō’mar yəhwâ ’ĕlōhênû wə’atə| təḏabēr ’ēlênû ’ēṯ kāl-’ăšer yəḏabēr yəhwâ ’ĕlōhênû ’ēleyḵā wəšām^a‘ənû wə‘āśînû:

28 wayyišəm^a‘ yəhwâ ’eṯ-qwōl diḇərêḵem bəḏaberəḵem ’ēlāy wayyō’mer yəhwâ ’ēlay šām^a‘ətî ’eṯ-qwōl diḇərê hā‘ām hazzeh ’ăšer dibərû ’ēleyḵā hêṭîḇû kāl-’ăšer dibērû:

29 mî-yitēn wəhāyâ ləḇāḇām zeh lâem ləyirə’â ’ōṯî wəlišəmōr ’eṯ-kāl-miṣəwōṯay kāl-hayyāmîm ləm^a‘an yîṭaḇ lâem wəliḇənêhem lə‘ōlām:

30 lēḵə ’ĕmōr lâem šûḇû lāḵem lə’âŏlêḵem:

31 wə’atâ pōh ‘ămōḏ ‘immāḏî wa’ăḏabərâ ’ēleyḵā ’ēṯ kāl-hammiṣəwâ wəh^aḥuqqîm wəhammišəpāṭîm ’ăšer təlamməḏēm wə‘āśû ḇā’āreṣ ’ăšer ’ānōḵî nōṯēn lâem lərišətāh:

32 ûšəmarətem l^a‘ăśwōṯ ka’ăšer ṣiûâ yəhwâ ’ĕlōhêḵem ’eṯəḵem lō’ ṯāsurû yāmîn ûśəmō’l:

33 bəḵāl-hadereḵə ’ăšer ṣiûâ yəhwâ ’ĕlōhêḵem ’eṯəḵem tēlēḵû ləm^a‘an tiḥəyûn wəṭwōḇ lāḵem wəha’ăraḵətem yāmîm bā’āreṣ ’ăšer tîrāšûn: