Deuteronomy (Devarim) Chapter 10

‎1 ‏בָּעֵ֨ת הַהִ֜וא אָמַ֧ר יְהוָ֣ה אֵלַ֗י פְּסָל־לְךָ֞ שְׁנֵֽי־לוּחֹ֤ת אֲבָנִים֙ כָּרִ֣אשֹׁנִ֔ים וַעֲלֵ֥ה אֵלַ֖י הָהָ֑רָה וְעָשִׂ֥יתָ לְּךָ֖ אֲר֥וֹן עֵֽץ׃

‎2 ‏וְאֶכְתֹּב֙ עַל־הַלֻּחֹ֔ת אֶת־הַדְּבָרִ֔ים אֲשֶׁ֥ר הָי֛וּ עַל־הַלֻּחֹ֥ת הָרִאשֹׁנִ֖ים אֲשֶׁ֣ר שִׁבַּ֑רְתָּ וְשַׂמְתָּ֖ם בָּאָרֽוֹן׃

‎3 ‏וָאַ֤עַשׂ אֲרוֹן֙ עֲצֵ֣י שִׁטִּ֔ים וָאֶפְסֹ֛ל שְׁנֵי־לֻחֹ֥ת אֲבָנִ֖ים כָּרִאשֹׁנִ֑ים וָאַ֣עַל הָהָ֔רָה³ וּשְׁנֵ֥י הַלֻּחֹ֖ת בְּיָדִֽי׃

‎4 ‏וַיִּכְתֹּ֨ב עַֽל־הַלֻּחֹ֜ת כַּמִּכְתָּ֣ב הָרִאשׁ֗וֹן אֵ֚ת עֲשֶׂ֣רֶת הַדְּבָרִ֔ים אֲשֶׁ֣ר דִּבֶּר֩ יְהוָ֨ה אֲלֵיכֶ֥ם בָּהָ֛ר מִתּ֥וֹךְ הָאֵ֖שׁ בְּי֣וֹם הַקָּהָ֑ל וַיִּתְּנֵ֥ם יְהוָ֖ה אֵלָֽי׃

‎5 ‏וָאֵ֗פֶן וָֽאֵרֵד֙ מִן־הָהָ֔ר וָֽאָשִׂם֙ אֶת־הַלֻּחֹ֔ת בָּאָר֖וֹן אֲשֶׁ֣ר עָשִׂ֑יתִי וַיִּ֣הְיוּ שָׁ֔ם כַּאֲשֶׁ֥ר צִוַּ֖נִי יְהוָֽה׃

‎6 ‏וּבְנֵ֣י יִשְׂרָאֵ֗ל נָֽסְע֛וּ מִבְּאֵרֹ֥ת בְּנֵי־יַעֲקָ֖ן מוֹסֵרָ֑ה שָׁ֣ם מֵ֤ת אַהֲרֹן֙ וַיִּקָּבֵ֣ר שָׁ֔ם וַיְכַהֵ֛ן אֶלְעָזָ֥ר בְּנ֖וֹ תַּחְתָּֽיו׃

‎7 ‏מִשָּׁ֥ם נָסְע֖וּ הַגֻּדְגֹּ֑דָה וּמִן־הַגֻּדְגֹּ֣דָה יָטְבָ֔תָה אֶ֖רֶץ נַֽחֲלֵי מָֽיִם׃

‎8 ‏בָּעֵ֣ת הַהִ֗וא הִבְדִּ֤יל יְהוָה֙ אֶת־שֵׁ֣בֶט הַלֵּוִ֔י לָשֵׂ֖את אֶת־אֲר֣וֹן בְּרִית־יְהוָ֑ה לַעֲמֹד֩ לִפְנֵ֨י יְהוָ֤ה לְשָֽׁרְתוֹ֙ וּלְבָרֵ֣ךְ בִּשְׁמ֔וֹ עַ֖ד הַיּ֥וֹם הַזֶּֽה׃

‎9 ‏עַל־כֵּ֞ן לֹֽא־הָיָ֧ה לְלֵוִ֛י חֵ֥לֶק וְנַחֲלָ֖ה עִם־אֶחָ֑יו יְהוָה֙ ה֣וּא נַחֲלָת֔וֹ כַּאֲשֶׁ֥ר דִּבֶּ֛ר יְהוָ֥ה אֱלֹהֶ֖יךָ לֽוֹ׃

‎10 ‏וְאָנֹכִ֞י עָמַ֣דְתִּי בָהָ֗ר כַּיָּמִים֙ הָרִ֣אשֹׁנִ֔ים אַרְבָּעִ֣ים י֔וֹם וְאַרְבָּעִ֖ים לָ֑יְלָה וַיִּשְׁמַ֨ע יְהוָ֜ה אֵלַ֔י גַּ֚ם בַּפַּ֣עַם הַהִ֔וא לֹא־אָבָ֥ה יְהוָ֖ה הַשְׁחִיתֶֽךָ׃

‎11 ‏וַיֹּ֤אמֶר יְהוָה֙ אֵלַ֔י ק֛וּם לֵ֥ךְ לְמַסַּ֖ע לִפְנֵ֣י הָעָ֑ם וְיָבֹ֙אוּ֙ וְיִֽרְשׁ֣וּ אֶת־הָאָ֔רֶץ אֲשֶׁר־נִשְׁבַּ֥עְתִּי לַאֲבֹתָ֖ם לָתֵ֥ת לָהֶֽם׃ פ

‎12 ‏וְעַתָּה֙ יִשְׂרָאֵ֔ל מָ֚ה יְהוָ֣ה אֱלֹהֶ֔יךָ שֹׁאֵ֖ל מֵעִמָּ֑ךְ כִּ֣י אִם־לְ֠יִרְאָה אֶת־יְהוָ֨ה אֱלֹהֶ֜יךָ לָלֶ֤כֶת בְּכָל־דְּרָכָיו֙ וּלְאַהֲבָ֣ה אֹת֔וֹ וְלַֽעֲבֹד֙ אֶת־יְהוָ֣ה אֱלֹהֶ֔יךָ בְּכָל־לְבָבְךָ֖ וּבְכָל־נַפְשֶֽׁךָ׃

‎13 ‏לִשְׁמֹ֞ר אֶת־מִצְוֹ֤ת יְהוָה֙ וְאֶת־חֻקֹּתָ֔יו אֲשֶׁ֛ר אָנֹכִ֥י מְצַוְּךָ֖ הַיּ֑וֹם לְט֖וֹב לָֽךְ׃

‎14 ‏הֵ֚ן לַיהוָ֣ה אֱלֹהֶ֔יךָ הַשָּׁמַ֖יִם וּשְׁמֵ֣י הַשָּׁמָ֑יִם הָאָ֖רֶץ וְכָל־אֲשֶׁר־בָּֽהּ׃

‎15 ‏רַ֧ק בַּאֲבֹתֶ֛יךָ חָשַׁ֥ק יְהוָ֖ה לְאַהֲבָ֣ה אוֹתָ֑ם וַיִּבְחַ֞ר בְּזַרְעָ֣ם אַחֲרֵיהֶ֗ם בָּכֶ֛ם מִכָּל־הָעַמִּ֖ים כַּיּ֥וֹם הַזֶּֽה׃

‎16 ‏וּמַלְתֶּ֕ם אֵ֖ת עָרְלַ֣ת לְבַבְכֶ֑ם וְעָ֨רְפְּכֶ֔ם לֹ֥א תַקְשׁ֖וּ עֽוֹד׃

‎17 ‏כִּ֚י יְהוָ֣ה אֱלֹֽהֵיכֶ֔ם ה֚וּא אֱלֹהֵ֣י הָֽאֱלֹהִ֔ים וַאֲדֹנֵ֖י הָאֲדֹנִ֑ים הָאֵ֨ל הַגָּדֹ֤ל הַגִּבֹּר֙ וְהַנּוֹרָ֔א אֲשֶׁר֙ לֹא־יִשָּׂ֣א פָנִ֔ים וְלֹ֥א יִקַּ֖ח שֹֽׁחַד׃

‎18 ‏עֹשֶׂ֛ה מִשְׁפַּ֥ט יָת֖וֹם וְאַלְמָנָ֑ה וְאֹהֵ֣ב גֵּ֔ר לָ֥תֶת ל֖וֹ לֶ֥חֶם וְשִׂמְלָֽה׃

‎19 ‏וַאֲהַבְתֶּ֖ם אֶת־הַגֵּ֑ר כִּֽי־גֵרִ֥ים הֱיִיתֶ֖ם בְּאֶ֥רֶץ מִצְרָֽיִם׃

‎20 ‏אֶת־יְהוָ֧ה אֱלֹהֶ֛יךָ תִּירָ֖א אֹת֣וֹ תַעֲבֹ֑ד וּב֣וֹ תִדְבָּ֔ק וּבִשְׁמ֖וֹ תִּשָּׁבֵֽעַ׃

‎21 ‏ה֥וּא תְהִלָּתְךָ֖ וְה֣וּא אֱלֹהֶ֑יךָ אֲשֶׁר־עָשָׂ֣ה אִתְּךָ֗ אֶת־הַגְּדֹלֹ֤ת וְאֶת־הַנּֽוֹרָאֹת֙ הָאֵ֔לֶּה אֲשֶׁ֥ר רָא֖וּ עֵינֶֽיךָ׃

‎22 ‏בְּשִׁבְעִ֣ים נֶ֔פֶשׁ יָרְד֥וּ אֲבֹתֶ֖יךָ מִצְרָ֑יְמָה וְעַתָּ֗ה שָֽׂמְךָ֙ יְהוָ֣ה אֱלֹהֶ֔יךָ כְּכוֹכְבֵ֥י הַשָּׁמַ֖יִם לָרֹֽב׃

1 bā‘ēṯ hahiw’ ’āmar yəhwâ ’ēlay pəsāl-ləḵā šənê-lûḥōṯ ’ăḇānîm kāri’šōnîm w^a‘ălēh ’ēlay hâārâ wə‘āśîṯā lləḵā ’ărwōn ‘ēṣ:

2 wə’eḵətōḇ ‘al-halluḥōṯ ’eṯ-hadəḇārîm ’ăšer hāyû ‘al-halluḥōṯ hāri’šōnîm ’ăšer šibarətā wəśamətām bā’ārwōn:

3 wā’^a‘aś ’ărwōn ‘ăṣê šiṭṭîm wā’efəsōl šənê-luḥōṯ ’ăḇānîm kāri’šōnîm wā’^a‘al hâārâ³ ûšənê halluḥōṯ bəyāḏî:

4 wayyiḵətōḇ ‘al-halluḥōṯ kammiḵətāḇ hāri’šwōn ’ēṯ ‘ăśereṯ hadəḇārîm ’ăšer diber yəhwâ ’ălêḵem bâār mitwōḵə hā’ēš bəywōm haqqâāl wayyitənēm yəhwâ ’ēlāy:

5 wā’ēfen wā’ērēḏ min-hâār wā’āśim ’eṯ-halluḥōṯ bā’ārwōn ’ăšer ‘āśîṯî wayyihəyû šām ka’ăšer ṣiûanî yəhwâ:

6 ûḇənê yiśərā’ēl nāsə‘û mibə’ērōṯ bənê-y^a‘ăqān mwōsērâ šām mēṯ ’ahărōn wayyiqqāḇēr šām wayəḵahēn ’elə‘āzār bənwō t^aḥətāyw:

7 miššām nāsə‘û haguḏəgōḏâ ûmin-haguḏəgōḏâ yāṭəḇāṯâ ’ereṣ n^aḥălê māyim:

8 bā‘ēṯ hahiw’ hiḇədîl yəhwâ ’eṯ-šēḇeṭ hallēwî lāśē’ṯ ’eṯ-’ărwōn bərîṯ-yəhwâ l^a‘ămōḏ lifənê yəhwâ ləšārəṯwō ûləḇārēḵə bišəmwō ‘aḏ hayywōm hazzeh:

9 ‘al-kēn lō’-hāyâ ləlēwî ḥēleq wən^aḥălâ ‘im-’eḥāyw yəhwâ hû’ n^aḥălāṯwō ka’ăšer diber yəhwâ ’ĕlōheyḵā lwō:

10 wə’ānōḵî ‘āmaḏətî ḇâār kayyāmîm hāri’šōnîm ’arəbā‘îm ywōm wə’arəbā‘îm lāyəlâ wayyišəm^a‘ yəhwâ ’ēlay gam bap^a‘am hahiw’ lō’-’āḇâ yəhwâ hašəḥîṯeḵā:

11 wayyō’mer yəhwâ ’ēlay qûm lēḵə ləmass^a‘ lifənê hā‘ām wəyāḇō’û wəyirəšû ’eṯ-hā’āreṣ ’ăšer-nišəb^a‘ətî la’ăḇōṯām lāṯēṯ lâem: f

12 wə‘atâ yiśərā’ēl mâ yəhwâ ’ĕlōheyḵā šō’ēl mē‘immāḵə kî ’im-ləyirə’â ’eṯ-yəhwâ ’ĕlōheyḵā lāleḵeṯ bəḵāl-dərāḵāyw ûlə’ahăḇâ ’ōṯwō wəl^a‘ăḇōḏ ’eṯ-yəhwâ ’ĕlōheyḵā bəḵāl-ləḇāḇəḵā ûḇəḵāl-nafəšeḵā:

13 lišəmōr ’eṯ-miṣəwōṯ yəhwâ wə’eṯ-ḥuqqōṯāyw ’ăšer ’ānōḵî məṣaûəḵā hayywōm ləṭwōḇ lāḵə:

14 hēn layhwâ ’ĕlōheyḵā haššāmayim ûšəmê haššāmāyim hā’āreṣ wəḵāl-’ăšer-bāh:

15 raq ba’ăḇōṯeyḵā ḥāšaq yəhwâ lə’ahăḇâ ’wōṯām wayyiḇəḥar bəzarə‘ām ’^aḥărêhem bāḵem mikāl-hā‘ammîm kayywōm hazzeh:

16 ûmalətem ’ēṯ ‘ārəlaṯ ləḇaḇəḵem wə‘ārəpəḵem lō’ ṯaqəšû ‘wōḏ:

17 kî yəhwâ ’ĕlōhêḵem hû’ ’ĕlōhê hā’ĕlōhîm wa’ăḏōnê hā’ăḏōnîm hā’ēl hagāḏōl hagibōr wəhannwōrā’ ’ăšer lō’-yiśśā’ fānîm wəlō’ yiqq^aḥ šōḥaḏ:

18 ‘ōśeh mišəpaṭ yāṯwōm wə’aləmānâ wə’ōhēḇ gēr lāṯeṯ lwō leḥem wəśiməlâ:

19 wa’ăhaḇətem ’eṯ-hagēr kî-ḡērîm hĕyîṯem bə’ereṣ miṣərāyim:

20 ’eṯ-yəhwâ ’ĕlōheyḵā tîrā’ ’ōṯwō ṯ^a‘ăḇōḏ ûḇwō ṯiḏəbāq ûḇišəmwō tiššāḇē‘a:

21 hû’ ṯəhillāṯəḵā wəhû’ ’ĕlōheyḵā ’ăšer-‘āśâ ’itəḵā ’eṯ-hagəḏōlōṯ wə’eṯ-hannwōrā’ōṯ hā’ēlleh ’ăšer rā’û ‘êneyḵā:

22 bəšiḇə‘îm nefeš yārəḏû ’ăḇōṯeyḵā miṣərāyəmâ wə‘atâ śāməḵā yəhwâ ’ĕlōheyḵā kəḵwōḵəḇê haššāmayim lārōḇ: