Deuteronomy (Devarim) Chapter 11

‎1 ‏וְאָ֣הַבְתָּ֔ אֵ֖ת יְהוָ֣ה אֱלֹהֶ֑יךָ וְשָׁמַרְתָּ֣ מִשְׁמַרְתּ֗וֹ וְחֻקֹּתָ֧יו וּמִשְׁפָּטָ֛יו וּמִצְוֹתָ֖יו כָּל־הַיָּמִֽים׃

‎2 ‏וִֽידַעְתֶּם֮ הַיּוֹם֒ כִּ֣י׀ לֹ֣א אֶת־בְּנֵיכֶ֗ם אֲשֶׁ֤ר לֹֽא־יָדְעוּ֙ וַאֲשֶׁ֣ר לֹא־רָא֔וּ אֶת־מוּסַ֖ר יְהוָ֣ה אֱלֹהֵיכֶ֑ם אֶת־גָּדְל֕וֹ אֶת־יָדוֹ֙ הַחֲזָקָ֔ה וּזְרֹע֖וֹ הַנְּטוּיָֽה׃

‎3 ‏וְאֶת־אֹֽתֹתָיו֙ וְאֶֽת־מַעֲשָׂ֔יו אֲשֶׁ֥ר עָשָׂ֖ה בְּת֣וֹךְ מִצְרָ֑יִם לְפַרְעֹ֥ה מֶֽלֶךְ־מִצְרַ֖יִם וּלְכָל־אַרְצֽוֹ׃

‎4 ‏וַאֲשֶׁ֣ר עָשָׂה֩ לְחֵ֨יל מִצְרַ֜יִם לְסוּסָ֣יו וּלְרִכְבּ֗וֹ אֲשֶׁ֨ר הֵצִ֜יף אֶת־מֵ֤י יַם־סוּף֙ עַל־פְּנֵיהֶ֔ם בְּרָדְפָ֖ם אַחֲרֵיכֶ֑ם וַיְאַבְּדֵ֣ם יְהוָ֔ה עַ֖ד הַיּ֥וֹם הַזֶּֽה׃

‎5 ‏וַאֲשֶׁ֥ר עָשָׂ֛ה לָכֶ֖ם בַּמִּדְבָּ֑ר עַד־בֹּאֲכֶ֖ם עַד־הַמָּק֥וֹם הַזֶּֽה׃

‎6 ‏וַאֲשֶׁ֨ר עָשָׂ֜ה לְדָתָ֣ן וְלַאֲבִירָ֗ם בְּנֵ֣י אֱלִיאָב֮ בֶּן־רְאוּבֵן֒ אֲשֶׁ֨ר פָּצְתָ֤ה הָאָ֙רֶץ֙ אֶת־פִּ֔יהָ וַתִּבְלָעֵ֥ם וְאֶת־בָּתֵּיהֶ֖ם וְאֶת־אָהֳלֵיהֶ֑ם וְאֵ֤ת כָּל־הַיְקוּם֙ אֲשֶׁ֣ר בְּרַגְלֵיהֶ֔ם בְּקֶ֖רֶב כָּל־יִשְׂרָאֵֽל׃

‎7 ‏כִּ֤י עֵֽינֵיכֶם֙ הָֽרֹאֹ֔ת אֶת־כָּל־מַעֲשֵׂ֥ה יְהוָ֖ה הַגָּדֹ֑ל אֲשֶׁ֖ר עָשָֽׂה׃

‎8 ‏וּשְׁמַרְתֶּם֙ אֶת־כָּל־הַמִּצְוָ֔ה אֲשֶׁ֛ר אָנֹכִ֥י מְצַוְּךָ֖ הַיּ֑וֹם לְמַ֣עַן תֶּחֶזְק֗וּ וּבָאתֶם֙ וִֽירִשְׁתֶּ֣ם אֶת־הָאָ֔רֶץ אֲשֶׁ֥ר אַתֶּ֛ם עֹבְרִ֥ים שָׁ֖מָּה לְרִשְׁתָּֽהּ׃

‎9 ‏וּלְמַ֨עַן תַּאֲרִ֤יכוּ יָמִים֙ עַל־הָ֣אֲדָמָ֔ה אֲשֶׁר֩ נִשְׁבַּ֨ע יְהוָ֧ה לַאֲבֹתֵיכֶ֛ם לָתֵ֥ת לָהֶ֖ם וּלְזַרְעָ֑ם אֶ֛רֶץ זָבַ֥ת חָלָ֖ב וּדְבָֽשׁ׃ ס

‎10 ‏כִּ֣י הָאָ֗רֶץ אֲשֶׁ֨ר אַתָּ֤ה בָא־שָׁ֙מָּה֙ לְרִשְׁתָּ֔הּ לֹ֣א כְאֶ֤רֶץ מִצְרַ֙יִם֙ הִ֔וא אֲשֶׁ֥ר יְצָאתֶ֖ם מִשָּׁ֑ם אֲשֶׁ֤ר תִּזְרַע֙ אֶֽת־זַרְעֲךָ֔ וְהִשְׁקִ֥יתָ בְרַגְלְךָ֖ כְּגַ֥ן הַיָּרָֽק׃

‎11 ‏וְהָאָ֗רֶץ אֲשֶׁ֨ר אַתֶּ֜ם עֹבְרִ֥ים שָׁ֙מָּה֙ לְרִשְׁתָּ֔הּ אֶ֥רֶץ הָרִ֖ים וּבְקָעֹ֑ת לִמְטַ֥ר הַשָּׁמַ֖יִם תִּשְׁתֶּה־מָּֽיִם׃

‎12 ‏אֶ֕רֶץ אֲשֶׁר־יְהוָ֥ה אֱלֹהֶ֖יךָ דֹּרֵ֣שׁ אֹתָ֑הּ תָּמִ֗יד עֵינֵ֨י יְהוָ֤ה אֱלֹהֶ֙יךָ֙ בָּ֔הּ מֵֽרֵשִׁית֙ הַשָּׁנָ֔ה וְעַ֖ד אַחֲרִ֥ית שָׁנָֽה׃ ס

‎13 ‏וְהָיָ֗ה אִם־שָׁמֹ֤עַ תִּשְׁמְעוּ֙ אֶל־מִצְוֹתַ֔י אֲשֶׁ֧ר אָנֹכִ֛י מְצַוֶּ֥ה אֶתְכֶ֖ם הַיּ֑וֹם לְאַהֲבָ֞ה אֶת־יְהוָ֤ה אֱלֹֽהֵיכֶם֙ וּלְעָבְד֔וֹ בְּכָל־לְבַבְכֶ֖ם וּבְכָל־נַפְשְׁכֶֽם׃

‎14 ‏וְנָתַתִּ֧י מְטַֽר־אַרְצְכֶ֛ם בְּעִתּ֖וֹ יוֹרֶ֣ה וּמַלְק֑וֹשׁ וְאָסַפְתָּ֣ דְגָנֶ֔ךָ וְתִֽירֹשְׁךָ֖ וְיִצְהָרֶֽךָ׃

‎15 ‏וְנָתַתִּ֛י עֵ֥שֶׂב בְּשָׂדְךָ֖ לִבְהֶמְתֶּ֑ךָ וְאָכַלְתָּ֖ וְשָׂבָֽעְתָּ׃

‎16 ‏הִשָּֽׁמְר֣וּ לָכֶ֔ם פֶּ֥ן יִפְתֶּ֖ה לְבַבְכֶ֑ם וְסַרְתֶּ֗ם וַעֲבַדְתֶּם֙ אֱלֹהִ֣ים אֲחֵרִ֔ים וְהִשְׁתַּחֲוִיתֶ֖ם לָהֶֽם׃

‎17 ‏וְחָרָ֨ה אַף־יְהוָ֜ה בָּכֶ֗ם וְעָצַ֤ר אֶת־הַשָּׁמַ֙יִם֙ וְלֹֽא־יִהְיֶ֣ה מָטָ֔ר וְהָ֣אֲדָמָ֔ה לֹ֥א תִתֵּ֖ן אֶת־יְבוּלָ֑הּ וַאֲבַדְתֶּ֣ם מְהֵרָ֗ה מֵעַל֙ הָאָ֣רֶץ הַטֹּבָ֔ה אֲשֶׁ֥ר יְהוָ֖ה נֹתֵ֥ן לָכֶֽם׃

‎18 ‏וְשַׂמְתֶּם֙ אֶת־דְּבָרַ֣י אֵ֔לֶּה עַל־לְבַבְכֶ֖ם וְעַֽל־נַפְשְׁכֶ֑ם וּקְשַׁרְתֶּ֨ם אֹתָ֤ם לְאוֹת֙ עַל־יֶדְכֶ֔ם וְהָי֥וּ לְטוֹטָפֹ֖ת בֵּ֥ין עֵינֵיכֶֽם׃

‎19 ‏וְלִמַּדְתֶּ֥ם אֹתָ֛ם אֶת־בְּנֵיכֶ֖ם לְדַבֵּ֣ר בָּ֑ם בְּשִׁבְתְּךָ֤ בְּבֵיתֶ֙ךָ֙ וּבְלֶכְתְּךָ֣ בַדֶּ֔רֶךְ וּֽבְשָׁכְבְּךָ֖ וּבְקוּמֶֽךָ׃

‎20 ‏וּכְתַבְתָּ֛ם עַל־מְזוּז֥וֹת בֵּיתֶ֖ךָ וּבִשְׁעָרֶֽיךָ׃

‎21 ‏לְמַ֨עַן יִרְבּ֤וּ יְמֵיכֶם֙ וִימֵ֣י בְנֵיכֶ֔ם עַ֚ל הָֽאֲדָמָ֔ה אֲשֶׁ֨ר נִשְׁבַּ֧ע יְהוָ֛ה לַאֲבֹתֵיכֶ֖ם לָתֵ֣ת לָהֶ֑ם כִּימֵ֥י הַשָּׁמַ֖יִם עַל־הָאָֽרֶץ׃ ס

‎22 ‏כִּי֩ אִם־שָׁמֹ֨ר תִּשְׁמְר֜וּן אֶת־כָּל־הַמִּצְוָ֣ה הַזֹּ֗את אֲשֶׁ֧ר אָנֹכִ֛י מְצַוֶּ֥ה אֶתְכֶ֖ם לַעֲשֹׂתָ֑הּ לְאַהֲבָ֞ה אֶת־יְהוָ֧ה אֱלֹהֵיכֶ֛ם לָלֶ֥כֶת בְּכָל־דְּרָכָ֖יו וּלְדָבְקָה־בֽוֹ׃

‎23 ‏וְהוֹרִ֧ישׁ יְהוָ֛ה אֶת־כָּל־הַגּוֹיִ֥ם הָאֵ֖לֶּה מִלִּפְנֵיכֶ֑ם וִֽירִשְׁתֶּ֣ם גּוֹיִ֔ם גְּדֹלִ֥ים וַעֲצֻמִ֖ים מִכֶּֽם׃

‎24 ‏כָּל־הַמָּק֗וֹם אֲשֶׁ֨ר תִּדְרֹ֧ךְ כַּֽף־רַגְלְכֶ֛ם בּ֖וֹ לָכֶ֣ם יִהְיֶ֑ה מִן־הַמִּדְבָּ֨ר וְהַלְּבָנ֜וֹן מִן־הַנָּהָ֣ר נְהַר־פְּרָ֗ת וְעַד֙ הַיָּ֣ם הָֽאַחֲר֔וֹן יִהְיֶ֖ה גְּבֻלְכֶֽם׃

‎25 ‏לֹא־יִתְיַצֵּ֥ב אִ֖ישׁ בִּפְנֵיכֶ֑ם פַּחְדְּכֶ֨ם וּמֽוֹרַאֲכֶ֜ם יִתֵּ֣ן׀ יְהוָ֣ה אֱלֹֽהֵיכֶ֗ם עַל־פְּנֵ֤י³ כָל־הָאָ֙רֶץ֙ אֲשֶׁ֣ר תִּדְרְכוּ־בָ֔הּ כַּאֲשֶׁ֖ר דִּבֶּ֥ר לָכֶֽם׃ ס

‎26 ‏רְאֵ֗ה אָנֹכִ֛י נֹתֵ֥ן לִפְנֵיכֶ֖ם הַיּ֑וֹם בְּרָכָ֖ה וּקְלָלָֽה׃

‎27 ‏אֶֽת־הַבְּרָכָ֑ה אֲשֶׁ֣ר תִּשְׁמְע֗וּ אֶל־מִצְוֹת֙ יְהוָ֣ה אֱלֹֽהֵיכֶ֔ם אֲשֶׁ֧ר אָנֹכִ֛י מְצַוֶּ֥ה אֶתְכֶ֖ם הַיּֽוֹם׃

‎28 ‏וְהַקְּלָלָ֗ה אִם־לֹ֤א תִשְׁמְעוּ֙ אֶל־מִצְוֹת֙ יְהוָ֣ה אֱלֹֽהֵיכֶ֔ם וְסַרְתֶּ֣ם מִן־הַדֶּ֔רֶךְ אֲשֶׁ֧ר אָנֹכִ֛י מְצַוֶּ֥ה אֶתְכֶ֖ם הַיּ֑וֹם לָלֶ֗כֶת אַחֲרֵ֛י אֱלֹהִ֥ים אֲחֵרִ֖ים אֲשֶׁ֥ר לֹֽא־יְדַעְתֶּֽם׃ ס

‎29 ‏וְהָיָ֗ה כִּ֤י יְבִֽיאֲךָ֙ יְהוָ֣ה אֱלֹהֶ֔יךָ אֶל־הָאָ֕רֶץ אֲשֶׁר־אַתָּ֥ה בָא־שָׁ֖מָּה לְרִשְׁתָּ֑הּ וְנָתַתָּ֤ה אֶת־הַבְּרָכָה֙ עַל־הַ֣ר גְּרִזִ֔ים וְאֶת־הַקְּלָלָ֖ה עַל־הַ֥ר עֵיבָֽל׃

‎30 ‏הֲלֹא־הֵ֜מָּה בְּעֵ֣בֶר הַיַּרְדֵּ֗ן אַֽחֲרֵי֙ דֶּ֚רֶךְ מְב֣וֹא הַשֶּׁ֔מֶשׁ בְּאֶ֙רֶץ֙ הַֽכְּנַעֲנִ֔י הַיֹּשֵׁ֖ב בָּעֲרָבָ֑ה מ֚וּל הַגִּלְגָּ֔ל אֵ֖צֶל אֵלוֹנֵ֥י מֹרֶֽה׃

‎31 ‏כִּ֤י אַתֶּם֙ עֹבְרִ֣ים אֶת־הַיַּרְדֵּ֔ן לָבֹא֙ לָרֶ֣שֶׁת אֶת־הָאָ֔רֶץ אֲשֶׁר־יְהוָ֥ה אֱלֹהֵיכֶ֖ם נֹתֵ֣ן לָכֶ֑ם וִֽירִשְׁתֶּ֥ם אֹתָ֖הּ וִֽישַׁבְתֶּם־בָּֽהּ׃

‎32 ‏וּשְׁמַרְתֶּ֣ם לַעֲשׂ֔וֹת אֵ֥ת כָּל־הַֽחֻקִּ֖ים וְאֶת־הַמִּשְׁפָּטִ֑ים אֲשֶׁ֧ר אָנֹכִ֛י נֹתֵ֥ן לִפְנֵיכֶ֖ם הַיּֽוֹם׃

1 wə’âaḇətā ’ēṯ yəhwâ ’ĕlōheyḵā wəšāmarətā mišəmarətwō wəḥuqqōṯāyw ûmišəpāṭāyw ûmiṣəwōṯāyw kāl-hayyāmîm:

2 wîḏ^a‘ətem hayywōm kî| lō’ ’eṯ-bənêḵem ’ăšer lō’-yāḏə‘û wa’ăšer lō’-rā’û ’eṯ-mûsar yəhwâ ’ĕlōhêḵem ’eṯ-gāḏəlwō ’eṯ-yāḏwō h^aḥăzāqâ ûzərō‘wō hannəṭûyâ:

3 wə’eṯ-’ōṯōṯāyw wə’eṯ-m^a‘ăśāyw ’ăšer ‘āśâ bəṯwōḵə miṣərāyim ləfarə‘ōh meleḵə-miṣərayim ûləḵāl-’arəṣwō:

4 wa’ăšer ‘āśâ ləḥêl miṣərayim ləsûsāyw ûləriḵəbwō ’ăšer hēṣîf ’eṯ-mê yam-sûf ‘al-pənêhem bərāḏəfām ’^aḥărêḵem wayə’abəḏēm yəhwâ ‘aḏ hayywōm hazzeh:

5 wa’ăšer ‘āśâ lāḵem bammiḏəbār ‘aḏ-bō’ăḵem ‘aḏ-hammāqwōm hazzeh:

6 wa’ăšer ‘āśâ ləḏāṯān wəla’ăḇîrām bənê ’ĕlî’āḇ ben-rə’ûḇēn ’ăšer pāṣəṯâ hā’āreṣ ’eṯ-pîhā watiḇəlā‘ēm wə’eṯ-bātêhem wə’eṯ-’âŏlêhem wə’ēṯ kāl-hayəqûm ’ăšer bəraḡəlêhem bəqereḇ kāl-yiśərā’ēl:

7 kî ‘ênêḵem hārō’ōṯ ’eṯ-kāl-m^a‘ăśēh yəhwâ hagāḏōl ’ăšer ‘āśâ:

8 ûšəmarətem ’eṯ-kāl-hammiṣəwâ ’ăšer ’ānōḵî məṣaûəḵā hayywōm ləm^a‘an teḥezəqû ûḇā’ṯem wîrišətem ’eṯ-hā’āreṣ ’ăšer ’atem ‘ōḇərîm šāmmâ lərišətāh:

9 ûləm^a‘an ta’ărîḵû yāmîm ‘al-hā’ăḏāmâ ’ăšer nišəb^a‘ yəhwâ la’ăḇōṯêḵem lāṯēṯ lâem ûləzarə‘ām ’ereṣ zāḇaṯ ḥālāḇ ûḏəḇāš: s

10 kî hā’āreṣ ’ăšer ’atâ ḇā’-šāmmâ lərišətāh lō’ ḵə’ereṣ miṣərayim hiw’ ’ăšer yəṣā’ṯem miššām ’ăšer tizər^a‘ ’eṯ-zarə‘ăḵā wəhišəqîṯā ḇəraḡələḵā kəḡan hayyārāq:

11 wəhā’āreṣ ’ăšer ’atem ‘ōḇərîm šāmmâ lərišətāh ’ereṣ hārîm ûḇəqā‘ōṯ liməṭar haššāmayim tišəteh-mmāyim:

12 ’ereṣ ’ăšer-yəhwâ ’ĕlōheyḵā dōrēš ’ōṯāh tāmîḏ ‘ênê yəhwâ ’ĕlōheyḵā bāh mērēšîṯ haššānâ wə‘aḏ ’^aḥărîṯ šānâ: s

13 wəhāyâ ’im-šāmō‘a tišəmə‘û ’el-miṣəwōṯay ’ăšer ’ānōḵî məṣaûeh ’eṯəḵem hayywōm lə’ahăḇâ ’eṯ-yəhwâ ’ĕlōhêḵem ûlə‘āḇəḏwō bəḵāl-ləḇaḇəḵem ûḇəḵāl-nafəšəḵem:

14 wənāṯatî məṭar-’arəṣəḵem bə‘itwō ywōreh ûmaləqwōš wə’āsafətā ḏəḡāneḵā wəṯîrōšəḵā wəyiṣəhāreḵā:

15 wənāṯatî ‘ēśeḇ bəśāḏəḵā liḇəheməteḵā wə’āḵalətā wəśāḇā‘ətā:

16 hiššāmərû lāḵem pen yifəteh ləḇaḇəḵem wəsarətem w^a‘ăḇaḏətem ’ĕlōhîm ’ăḥērîm wəhišət^aḥăwîṯem lâem:

17 wəḥārâ ’af-yəhwâ bāḵem wə‘āṣar ’eṯ-haššāmayim wəlō’-yihəyeh māṭār wəhā’ăḏāmâ lō’ ṯitēn ’eṯ-yəḇûlāh wa’ăḇaḏətem məhērâ mē‘al hā’āreṣ haṭṭōḇâ ’ăšer yəhwâ nōṯēn lāḵem:

18 wəśamətem ’eṯ-dəḇāray ’ēlleh ‘al-ləḇaḇəḵem wə‘al-nafəšəḵem ûqəšarətem ’ōṯām lə’wōṯ ‘al-yeḏəḵem wəhāyû ləṭwōṭāfōṯ bên ‘ênêḵem:

19 wəlimmaḏətem ’ōṯām ’eṯ-bənêḵem ləḏabēr bām bəšiḇətəḵā bəḇêṯeḵā ûḇəleḵətəḵā ḇadereḵə ûḇəšāḵəbəḵā ûḇəqûmeḵā:

20 ûḵəṯaḇətām ‘al-məzûzwōṯ bêṯeḵā ûḇišə‘āreyḵā:

21 ləm^a‘an yirəbû yəmêḵem wîmê ḇənêḵem ‘al hā’ăḏāmâ ’ăšer nišəb^a‘ yəhwâ la’ăḇōṯêḵem lāṯēṯ lâem kîmê haššāmayim ‘al-hā’āreṣ: s

22 kî ’im-šāmōr tišəmərûn ’eṯ-kāl-hammiṣəwâ hazzō’ṯ ’ăšer ’ānōḵî məṣaûeh ’eṯəḵem l^a‘ăśōṯāh lə’ahăḇâ ’eṯ-yəhwâ ’ĕlōhêḵem lāleḵeṯ bəḵāl-dərāḵāyw ûləḏāḇəqâ-ḇwō:

23 wəhwōrîš yəhwâ ’eṯ-kāl-hagwōyim hā’ēlleh millifənêḵem wîrišətem gwōyim gəḏōlîm w^a‘ăṣumîm mikem:

24 kāl-hammāqwōm ’ăšer tiḏərōḵə kaf-raḡələḵem bwō lāḵem yihəyeh min-hammiḏəbār wəhalləḇānwōn min-hannâār nəhar-pərāṯ wə‘aḏ hayyām hā’^aḥărwōn yihəyeh gəḇuləḵem:

25 lō’-yiṯəyaṣṣēḇ ’îš bifənêḵem p^aḥədəḵem ûmwōra’ăḵem yitēn| yəhwâ ’ĕlōhêḵem ‘al-pənê³ ḵāl-hā’āreṣ ’ăšer tiḏərəḵû-ḇāh ka’ăšer diber lāḵem: s

26 rə’ēh ’ānōḵî nōṯēn lifənêḵem hayywōm bərāḵâ ûqəlālâ:

27 ’eṯ-habərāḵâ ’ăšer tišəmə‘û ’el-miṣəwōṯ yəhwâ ’ĕlōhêḵem ’ăšer ’ānōḵî məṣaûeh ’eṯəḵem hayywōm:

28 wəhaqqəlālâ ’im-lō’ ṯišəmə‘û ’el-miṣəwōṯ yəhwâ ’ĕlōhêḵem wəsarətem min-hadereḵə ’ăšer ’ānōḵî məṣaûeh ’eṯəḵem hayywōm lāleḵeṯ ’^aḥărê ’ĕlōhîm ’ăḥērîm ’ăšer lō’-yəḏ^a‘ətem: s

29 wəhāyâ kî yəḇî’ăḵā yəhwâ ’ĕlōheyḵā ’el-hā’āreṣ ’ăšer-’atâ ḇā’-šāmmâ lərišətāh wənāṯatâ ’eṯ-habərāḵâ ‘al-har gərizîm wə’eṯ-haqqəlālâ ‘al-har ‘êḇāl:

30 hălō’-hēmmâ bə‘ēḇer hayyarədēn ’^aḥărê dereḵə məḇwō’ haššemeš bə’ereṣ hakən^a‘ănî hayyōšēḇ bā‘ărāḇâ mûl hagiləgāl ’ēṣel ’ēlwōnê mōreh:

31 kî ’atem ‘ōḇərîm ’eṯ-hayyarədēn lāḇō’ lārešeṯ ’eṯ-hā’āreṣ ’ăšer-yəhwâ ’ĕlōhêḵem nōṯēn lāḵem wîrišətem ’ōṯāh wîšaḇətem-bāh:

32 ûšəmarətem l^a‘ăśwōṯ ’ēṯ kāl-h^aḥuqqîm wə’eṯ-hammišəpāṭîm ’ăšer ’ānōḵî nōṯēn lifənêḵem hayywōm: