Deuteronomy (Devarim) Chapter 27

‎1 ‏וַיְצַ֤ו מֹשֶׁה֙ וְזִקְנֵ֣י יִשְׂרָאֵ֔ל אֶת־הָעָ֖ם לֵאמֹ֑ר שָׁמֹר֙ אֶת־כָּל־הַמִּצְוָ֔ה אֲשֶׁ֧ר אָנֹכִ֛י מְצַוֶּ֥ה אֶתְכֶ֖ם הַיּֽוֹם׃

‎2 ‏וְהָיָ֗ה בַּיּוֹם֮ אֲשֶׁ֣ר תַּעַבְר֣וּ אֶת־הַיַּרְדֵּן֒ אֶל־הָאָ֕רֶץ אֲשֶׁר־יְהוָ֥ה אֱלֹהֶ֖יךָ נֹתֵ֣ן לָ֑ךְ וַהֲקֵמֹתָ֤ לְךָ֙ אֲבָנִ֣ים גְּדֹל֔וֹת וְשַׂדְתָּ֥ אֹתָ֖ם בַּשִּֽׂיד׃

‎3 ‏וְכָתַבְתָּ֣ עֲלֵיהֶ֗ן אֶֽת־כָּל־דִּבְרֵ֛י הַתּוֹרָ֥ה הַזֹּ֖את בְּעָבְרֶ֑ךָ לְמַ֡עַן אֲשֶׁר֩ תָּבֹ֨א אֶל־הָאָ֜רֶץ אֲ‍ֽשֶׁר־יְהוָ֥ה אֱלֹהֶ֣יךָ׀ נֹתֵ֣ן לְךָ֗ אֶ֣רֶץ זָבַ֤ת חָלָב֙ וּדְבַ֔שׁ כַּאֲשֶׁ֥ר דִּבֶּ֛ר יְהוָ֥ה אֱלֹהֵֽי־אֲבֹתֶ֖יךָ לָֽךְ׃

‎4 ‏וְהָיָה֮ בְּעָבְרְכֶ֣ם אֶת־הַיַּרְדֵּן֒ תָּקִ֜ימוּ אֶת־הָאֲבָנִ֣ים הָאֵ֗לֶּה אֲשֶׁ֨ר אָנֹכִ֜י מְצַוֶּ֥ה אֶתְכֶ֛ם הַיּ֖וֹם בְּהַ֣ר עֵיבָ֑ל וְשַׂדְתָּ֥ אוֹתָ֖ם בַּשִּֽׂיד׃

‎5 ‏וּבָנִ֤יתָ שָּׁם֙ מִזְבֵּ֔חַ לַיהוָ֖ה אֱלֹהֶ֑יךָ מִזְבַּ֣ח אֲבָנִ֔ים לֹא־תָנִ֥יף עֲלֵיהֶ֖ם בַּרְזֶֽל׃

‎6 ‏אֲבָנִ֤ים שְׁלֵמוֹת֙ תִּבְנֶ֔ה אֶת־מִזְבַּ֖ח יְהוָ֣ה אֱלֹהֶ֑יךָ וְהַעֲלִ֤יתָ עָלָיו֙ עוֹלֹ֔ת לַיהוָ֖ה אֱלֹהֶֽיךָ׃

‎7 ‏וְזָבַחְתָּ֥ שְׁלָמִ֖ים וְאָכַ֣לְתָּ שָּׁ֑ם וְשָׂ֣מַחְתָּ֔ לִפְנֵ֖י יְהוָ֥ה אֱלֹהֶֽיךָ׃

‎8 ‏וְכָתַבְתָּ֣ עַל־הָאֲבָנִ֗ים אֶֽת־כָּל־דִּבְרֵ֛י הַתּוֹרָ֥ה הַזֹּ֖את בַּאֵ֥ר הֵיטֵֽב׃ ס

‎9 ‏וַיְדַבֵּ֤ר מֹשֶׁה֙ וְהַכֹּהֲנִ֣ים הַלְוִיִּ֔ם אֶ֥ל כָּל־יִשְׂרָאֵ֖ל לֵאמֹ֑ר הַסְכֵּ֤ת׀ וּשְׁמַע֙ יִשְׂרָאֵ֔ל הַיּ֤וֹם הַזֶּה֙ נִהְיֵ֣יתָֽ לְעָ֔ם לַיהוָ֖ה אֱלֹהֶֽיךָ׃

‎10 ‏וְשָׁ֣מַעְתָּ֔ בְּק֖וֹל יְהוָ֣ה אֱלֹהֶ֑יךָ וְעָשִׂ֤יתָ אֶת־מִצְוֹתָו֙^q וְאֶת־חֻקָּ֔יו אֲשֶׁ֛ר אָנֹכִ֥י מְצַוְּךָ֖ הַיּֽוֹם׃ ס

‎11 ‏וַיְצַ֤ו מֹשֶׁה֙ אֶת־הָעָ֔ם בַּיּ֥וֹם הַה֖וּא לֵאמֹֽר׃

‎12 ‏אֵ֠לֶּה יַֽעַמְד֞וּ לְבָרֵ֤ךְ אֶת־הָעָם֙ עַל־הַ֣ר גְּרִזִ֔ים בְּעָבְרְכֶ֖ם אֶת־הַיַּרְדֵּ֑ן שִׁמְעוֹן֙ וְלֵוִ֣י וִֽיהוּדָ֔ה וְיִשָּׂשכָ֖ר וְיוֹסֵ֥ף וּבִנְיָמִֽן׃

‎13 ‏וְאֵ֛לֶּה יַֽעַמְד֥וּ עַל־הַקְּלָלָ֖ה בְּהַ֣ר עֵיבָ֑ל רְאוּבֵן֙ גָּ֣ד וְאָשֵׁ֔ר וּזְבוּלֻ֖ן דָּ֥ן וְנַפְתָּלִֽי׃

‎14 ‏וְעָנ֣וּ הַלְוִיִּ֗ם וְאָֽמְר֛וּ אֶל־כָּל־אִ֥ישׁ יִשְׂרָאֵ֖ל ק֥וֹל רָֽם׃ ס

‎15 ‏אָר֣וּר הָאִ֡ישׁ אֲשֶׁ֣ר יַעֲשֶׂה֩ פֶ֨סֶל וּמַסֵּכָ֜ה תּוֹעֲבַ֣ת יְהוָ֗ה מַעֲשֵׂ֛ה יְדֵ֥י חָרָ֖שׁ וְשָׂ֣ם בַּסָּ֑תֶר וְעָנ֧וּ כָל־הָעָ֛ם וְאָמְר֖וּ אָמֵֽן׃ ס

‎16 ‏אָר֕וּר מַקְלֶ֥ה אָבִ֖יו וְאִמּ֑וֹ וְאָמַ֥ר כָּל־הָעָ֖ם אָמֵֽן׃ ס

‎17 ‏אָר֕וּר מַסִּ֖יג גְּב֣וּל רֵעֵ֑הוּ וְאָמַ֥ר כָּל־הָעָ֖ם אָמֵֽן׃ ס

‎18 ‏אָר֕וּר מַשְׁגֶּ֥ה עִוֵּ֖ר בַּדָּ֑רֶךְ וְאָמַ֥ר כָּל־הָעָ֖ם אָמֵֽן׃ ס

‎19 ‏אָר֗וּר מַטֶּ֛ה מִשְׁפַּ֥ט גֵּר־יָת֖וֹם וְאַלְמָנָ֑ה וְאָמַ֥ר כָּל־הָעָ֖ם אָמֵֽן׃ ס

‎20 ‏אָר֗וּר שֹׁכֵב֙ עִם־אֵ֣שֶׁת אָבִ֔יו כִּ֥י גִלָּ֖ה כְּנַ֣ף אָבִ֑יו וְאָמַ֥ר כָּל־הָעָ֖ם אָמֵֽן׃ ס

‎21 ‏אָר֕וּר שֹׁכֵ֖ב עִם־כָּל־בְּהֵמָ֑ה וְאָמַ֥ר כָּל־הָעָ֖ם אָמֵֽן׃ ס

‎22 ‏אָר֗וּר שֹׁכֵב֙ עִם־אֲחֹת֔וֹ בַּת־אָבִ֖יו א֣וֹ בַת־אִמּ֑וֹ וְאָמַ֥ר כָּל־הָעָ֖ם אָמֵֽן׃ ס

‎23 ‏אָר֕וּר שֹׁכֵ֖ב עִם־חֹֽתַנְתּ֑וֹ וְאָמַ֥ר כָּל־הָעָ֖ם אָמֵֽן׃ ס

‎24 ‏אָר֕וּר מַכֵּ֥ה רֵעֵ֖הוּ בַּסָּ֑תֶר וְאָמַ֥ר כָּל־הָעָ֖ם אָמֵֽן׃ ס

‎25 ‏אָרוּר֙ לֹקֵ֣חַ שֹׁ֔חַד לְהַכּ֥וֹת נֶ֖פֶשׁ דָּ֣ם נָקִ֑י וְאָמַ֥ר כָּל־הָעָ֖ם אָמֵֽן׃ ס

‎26 ‏אָר֗וּר אֲשֶׁ֧ר לֹא־יָקִ֛ים אֶת־דִּבְרֵ֥י הַתּוֹרָֽה־הַזֹּ֖את לַעֲשׂ֣וֹת אוֹתָ֑ם וְאָמַ֥ר כָּל־הָעָ֖ם אָמֵֽן׃ פ

1 wayəṣaw mōšeh wəziqənê yiśərā’ēl ’eṯ-hā‘ām lē’mōr šāmōr ’eṯ-kāl-hammiṣəwâ ’ăšer ’ānōḵî məṣaûeh ’eṯəḵem hayywōm:

2 wəhāyâ bayywōm ’ăšer t^a‘aḇərû ’eṯ-hayyarədēn ’el-hā’āreṣ ’ăšer-yəhwâ ’ĕlōheyḵā nōṯēn lāḵə wahăqēmōṯā ləḵā ’ăḇānîm gəḏōlwōṯ wəśaḏətā ’ōṯām baśśîḏ:

3 wəḵāṯaḇətā ‘ălêhen ’eṯ-kāl-diḇərê hatwōrâ hazzō’ṯ bə‘āḇəreḵā ləm^a‘an ’ăšer tāḇō’ ’el-hā’āreṣ ’ă‍šer-yəhwâ ’ĕlōheyḵā| nōṯēn ləḵā ’ereṣ zāḇaṯ ḥālāḇ ûḏəḇaš ka’ăšer diber yəhwâ ’ĕlōhê-’ăḇōṯeyḵā lāḵə:

4 wəhāyâ bə‘āḇərəḵem ’eṯ-hayyarədēn tāqîmû ’eṯ-hā’ăḇānîm hā’ēlleh ’ăšer ’ānōḵî məṣaûeh ’eṯəḵem hayywōm bəhar ‘êḇāl wəśaḏətā ’wōṯām baśśîḏ:

5 ûḇānîṯā ššām mizəbēḥa layhwâ ’ĕlōheyḵā mizəb^aḥ ’ăḇānîm lō’-ṯānîf ‘ălêhem barəzel:

6 ’ăḇānîm šəlēmwōṯ tiḇəneh ’eṯ-mizəb^aḥ yəhwâ ’ĕlōheyḵā wəh^a‘ălîṯā ‘ālāyw ‘wōlōṯ layhwâ ’ĕlōheyḵā:

7 wəzāḇ^aḥətā šəlāmîm wə’āḵalətā ššām wəśām^aḥətā lifənê yəhwâ ’ĕlōheyḵā:

8 wəḵāṯaḇətā ‘al-hā’ăḇānîm ’eṯ-kāl-diḇərê hatwōrâ hazzō’ṯ ba’ēr hêṭēḇ: s

9 wayəḏabēr mōšeh wəhakōhănîm haləwîyim ’el kāl-yiśərā’ēl lē’mōr hasəkēṯ| ûšəm^a‘ yiśərā’ēl hayywōm hazzeh nihəyêṯā lə‘ām layhwâ ’ĕlōheyḵā:

10 wəšām^a‘ətā bəqwōl yəhwâ ’ĕlōheyḵā wə‘āśîṯā ’eṯ-miṣəwōṯāw^q wə’eṯ-ḥuqqāyw ’ăšer ’ānōḵî məṣaûəḵā hayywōm: s

11 wayəṣaw mōšeh ’eṯ-hā‘ām bayywōm hahû’ lē’mōr:

12 ’ēlleh y^a‘aməḏû ləḇārēḵə ’eṯ-hā‘ām ‘al-har gərizîm bə‘āḇərəḵem ’eṯ-hayyarədēn šimə‘wōn wəlēwî wîhûḏâ wəyiśśāsḵār wəywōsēf ûḇinəyāmin:

13 wə’ēlleh y^a‘aməḏû ‘al-haqqəlālâ bəhar ‘êḇāl rə’ûḇēn gāḏ wə’āšēr ûzəḇûlun dān wənafətālî:

14 wə‘ānû haləwîyim wə’āmərû ’el-kāl-’îš yiśərā’ēl qwōl rām: s

15 ’ārûr hā’îš ’ăšer y^a‘ăśeh fesel ûmassēḵâ twō‘ăḇaṯ yəhwâ m^a‘ăśēh yəḏê ḥārāš wəśām bassāṯer wə‘ānû ḵāl-hā‘ām wə’āmərû ’āmēn: s

16 ’ārûr maqəleh ’āḇîw wə’immwō wə’āmar kāl-hā‘ām ’āmēn: s

17 ’ārûr massîḡ gəḇûl rē‘ēhû wə’āmar kāl-hā‘ām ’āmēn: s

18 ’ārûr mašəgeh ‘iûēr badāreḵə wə’āmar kāl-hā‘ām ’āmēn: s

19 ’ārûr maṭṭeh mišəpaṭ gēr-yāṯwōm wə’aləmānâ wə’āmar kāl-hā‘ām ’āmēn: s

20 ’ārûr šōḵēḇ ‘im-’ēšeṯ ’āḇîw kî ḡillâ kənaf ’āḇîw wə’āmar kāl-hā‘ām ’āmēn: s

21 ’ārûr šōḵēḇ ‘im-kāl-bəhēmâ wə’āmar kāl-hā‘ām ’āmēn: s

22 ’ārûr šōḵēḇ ‘im-’ăḥōṯwō baṯ-’āḇîw ’wō ḇaṯ-’immwō wə’āmar kāl-hā‘ām ’āmēn: s

23 ’ārûr šōḵēḇ ‘im-ḥōṯanətwō wə’āmar kāl-hā‘ām ’āmēn: s

24 ’ārûr makēh rē‘ēhû bassāṯer wə’āmar kāl-hā‘ām ’āmēn: s

25 ’ārûr lōqēḥa šōḥaḏ ləhakwōṯ nefeš dām nāqî wə’āmar kāl-hā‘ām ’āmēn: s

26 ’ārûr ’ăšer lō’-yāqîm ’eṯ-diḇərê hatwōrâ-hazzō’ṯ l^a‘ăśwōṯ ’wōṯām wə’āmar kāl-hā‘ām ’āmēn: f