Exodus (Shemot) Chapter 18

‎1 ‏וַיִּשְׁמַ֞ע יִתְר֨וֹ כֹהֵ֤ן מִדְיָן֙ חֹתֵ֣ן מֹשֶׁ֔ה אֵת֩ כָּל־אֲשֶׁ֨ר עָשָׂ֤ה אֱלֹהִים֙ לְמֹשֶׁ֔ה וּלְיִשְׂרָאֵ֖ל עַמּ֑וֹ כִּֽי־הוֹצִ֧יא יְהוָ֛ה אֶת־יִשְׂרָאֵ֖ל מִמִּצְרָֽיִם׃

‎2 ‏וַיִּקַּ֗ח יִתְרוֹ֙ חֹתֵ֣ן מֹשֶׁ֔ה אֶת־צִפֹּרָ֖ה אֵ֣שֶׁת מֹשֶׁ֑ה אַחַ֖ר שִׁלּוּחֶֽיהָ׃

‎3 ‏וְאֵ֖ת שְׁנֵ֣י בָנֶ֑יהָ אֲשֶׁ֨ר שֵׁ֤ם הָֽאֶחָד֙ גֵּֽרְשֹׁ֔ם כִּ֣י אָמַ֔ר גֵּ֣ר הָיִ֔יתִי בְּאֶ֖רֶץ נָכְרִיָּֽה׃

‎4 ‏וְשֵׁ֥ם הָאֶחָ֖ד אֱלִיעֶ֑זֶר כִּֽי־אֱלֹהֵ֤י אָבִי֙ בְּעֶזְרִ֔י וַיַּצִּלֵ֖נִי מֵחֶ֥רֶב פַּרְעֹֽה׃

‎5 ‏וַיָּבֹ֞א יִתְר֨וֹ חֹתֵ֥ן מֹשֶׁ֛ה וּבָנָ֥יו וְאִשְׁתּ֖וֹ אֶל־מֹשֶׁ֑ה אֶל־הַמִּדְבָּ֗ר אֲשֶׁר־ה֛וּא חֹנֶ֥ה שָׁ֖ם הַ֥ר הָאֱלֹהִֽים׃

‎6 ‏וַיֹּ֙אמֶר֙ אֶל־מֹשֶׁ֔ה אֲנִ֛י חֹתֶנְךָ֥ יִתְר֖וֹ בָּ֣א אֵלֶ֑יךָ וְאִ֨שְׁתְּךָ֔ וּשְׁנֵ֥י בָנֶ֖יהָ עִמָּֽהּ׃

‎7 ‏וַיֵּצֵ֨א מֹשֶׁ֜ה לִקְרַ֣את חֹֽתְנ֗וֹ וַיִּשְׁתַּ֙חוּ֙ וַיִּשַּׁק־ל֔וֹ וַיִּשְׁאֲל֥וּ אִישׁ־לְרֵעֵ֖הוּ לְשָׁל֑וֹם וַיָּבֹ֖אוּ הָאֹֽהֱלָה׃

‎8 ‏וַיְסַפֵּ֤ר מֹשֶׁה֙ לְחֹ֣תְנ֔וֹ אֵת֩ כָּל־אֲשֶׁ֨ר עָשָׂ֤ה יְהוָה֙ לְפַרְעֹ֣ה וּלְמִצְרַ֔יִם עַ֖ל אוֹדֹ֣ת יִשְׂרָאֵ֑ל אֵ֤ת כָּל־הַתְּלָאָה֙ אֲשֶׁ֣ר מְצָאָ֣תַם בַּדֶּ֔רֶךְ וַיַּצִּלֵ֖ם יְהוָֽה׃

‎9 ‏וַיִּ֣חַדְּ יִתְר֔וֹ עַ֚ל כָּל־הַטּוֹבָ֔ה אֲשֶׁר־עָשָׂ֥ה יְהוָ֖ה לְיִשְׂרָאֵ֑ל אֲשֶׁ֥ר הִצִּיל֖וֹ מִיַּ֥ד מִצְרָֽיִם׃

‎10 ‏וַיֹּאמֶר֮ יִתְרוֹ֒ בָּר֣וּךְ יְהוָ֔ה אֲשֶׁ֨ר הִצִּ֥יל אֶתְכֶ֛ם מִיַּ֥ד מִצְרַ֖יִם וּמִיַּ֣ד פַּרְעֹ֑ה אֲשֶׁ֤ר הִצִּיל֙ אֶת־הָעָ֔ם מִתַּ֖חַת יַד־מִצְרָֽיִם׃

‎11 ‏עַתָּ֣ה יָדַ֔עְתִּי כִּֽי־גָד֥וֹל יְהוָ֖ה מִכָּל־הָאֱלֹהִ֑ים כִּ֣י בַדָּבָ֔ר אֲשֶׁ֥ר זָד֖וּ עֲלֵיהֶֽם׃

‎12 ‏וַיִּקַּ֞ח יִתְר֨וֹ חֹתֵ֥ן מֹשֶׁ֛ה עֹלָ֥ה וּזְבָחִ֖ים לֵֽאלֹהִ֑ים וַיָּבֹ֨א אַהֲרֹ֜ן וְכֹ֣ל׀ זִקְנֵ֣י יִשְׂרָאֵ֗ל לֶאֱכָל־לֶ֛חֶם עִם־חֹתֵ֥ן מֹשֶׁ֖ה לִפְנֵ֥י הָאֱלֹהִֽים׃

‎13 ‏וַיְהִי֙ מִֽמָּחֳרָ֔ת וַיֵּ֥שֶׁב מֹשֶׁ֖ה לִשְׁפֹּ֣ט אֶת־הָעָ֑ם וַיַּעֲמֹ֤ד הָעָם֙ עַל־מֹשֶׁ֔ה מִן־הַבֹּ֖קֶר עַד־הָעָֽרֶב׃

‎14 ‏וַיַּרְא֙ חֹתֵ֣ן מֹשֶׁ֔ה אֵ֛ת כָּל־אֲשֶׁר־ה֥וּא עֹשֶׂ֖ה לָעָ֑ם וַיֹּ֗אמֶר מָֽה־הַדָּבָ֤ר הַזֶּה֙ אֲשֶׁ֨ר אַתָּ֤ה עֹשֶׂה֙ לָעָ֔ם מַדּ֗וּעַ אַתָּ֤ה יוֹשֵׁב֙ לְבַדֶּ֔ךָ וְכָל־הָעָ֛ם נִצָּ֥ב עָלֶ֖יךָ מִן־בֹּ֥קֶר עַד־עָֽרֶב׃

‎15 ‏וַיֹּ֥אמֶר מֹשֶׁ֖ה לְחֹתְנ֑וֹ כִּֽי־יָבֹ֥א אֵלַ֛י הָעָ֖ם לִדְרֹ֥שׁ אֱלֹהִֽים׃

‎16 ‏כִּֽי־יִהְיֶ֨ה לָהֶ֤ם דָּבָר֙ בָּ֣א אֵלַ֔י וְשָׁ֣פַטְתִּ֔י בֵּ֥ין אִ֖ישׁ וּבֵ֣ין רֵעֵ֑הוּ וְהוֹדַעְתִּ֛י אֶת־חֻקֵּ֥י הָאֱלֹהִ֖ים וְאֶת־תּוֹרֹתָֽיו׃

‎17 ‏וַיֹּ֛אמֶר חֹתֵ֥ן מֹשֶׁ֖ה אֵלָ֑יו לֹא־טוֹב֙ הַדָּבָ֔ר אֲשֶׁ֥ר אַתָּ֖ה עֹשֶֽׂה׃

‎18 ‏נָבֹ֣ל תִּבֹּ֔ל גַּם־אַתָּ֕ה גַּם־הָעָ֥ם הַזֶּ֖ה אֲשֶׁ֣ר עִמָּ֑ךְ כִּֽי־כָבֵ֤ד מִמְּךָ֙ הַדָּבָ֔ר לֹא־תוּכַ֥ל עֲשֹׂ֖הוּ לְבַדֶּֽךָ׃

‎19 ‏עַתָּ֞ה שְׁמַ֤ע בְּקֹלִי֙ אִיעָ֣צְךָ֔ וִיהִ֥י אֱלֹהִ֖ים עִמָּ֑ךְ הֱיֵ֧ה אַתָּ֣ה לָעָ֗ם מ֚וּל הָֽאֱלֹהִ֔ים וְהֵבֵאתָ֥ אַתָּ֛ה אֶת־הַדְּבָרִ֖ים אֶל־הָאֱלֹהִֽים׃

‎20 ‏וְהִזְהַרְתָּ֣ה אֶתְהֶ֔ם אֶת־הַחֻקִּ֖ים וְאֶת־הַתּוֹרֹ֑ת וְהוֹדַעְתָּ֣ לָהֶ֗ם אֶת־הַדֶּ֙רֶךְ֙ יֵ֣לְכוּ בָ֔הּ וְאֶת־הַֽמַּעֲשֶׂ֖ה אֲשֶׁ֥ר יַעֲשֽׂוּן׃

‎21 ‏וְאַתָּ֣ה תֶחֱזֶ֣ה מִכָּל־הָ֠עָם אַנְשֵׁי־חַ֜יִל יִרְאֵ֧י אֱלֹהִ֛ים אַנְשֵׁ֥י אֱמֶ֖ת שֹׂ֣נְאֵי בָ֑צַע וְשַׂמְתָּ֣ עֲלֵהֶ֗ם שָׂרֵ֤י אֲלָפִים֙ שָׂרֵ֣י מֵא֔וֹת שָׂרֵ֥י חֲמִשִּׁ֖ים וְשָׂרֵ֥י עֲשָׂרֹֽת׃

‎22 ‏וְשָׁפְט֣וּ אֶת־הָעָם֮ בְּכָל־עֵת֒ וְהָיָ֞ה כָּל־הַדָּבָ֤ר הַגָּדֹל֙ יָבִ֣יאוּ אֵלֶ֔יךָ וְכָל־הַדָּבָ֥ר הַקָּטֹ֖ן יִשְׁפְּטוּ־הֵ֑ם וְהָקֵל֙ מֵֽעָלֶ֔יךָ וְנָשְׂא֖וּ אִתָּֽךְ׃

‎23 ‏אִ֣ם אֶת־הַדָּבָ֤ר הַזֶּה֙ תַּעֲשֶׂ֔ה וְצִוְּךָ֣ אֱלֹהִ֔ים וְיָֽכָלְתָּ֖ עֲמֹ֑ד וְגַם֙ כָּל־הָעָ֣ם הַזֶּ֔ה עַל־מְקֹמ֖וֹ יָבֹ֥א בְשָׁלֽוֹם׃

‎24 ‏וַיִּשְׁמַ֥ע מֹשֶׁ֖ה לְק֣וֹל חֹתְנ֑וֹ וַיַּ֕עַשׂ כֹּ֖ל אֲשֶׁ֥ר אָמָֽר׃

‎25 ‏וַיִּבְחַ֨ר מֹשֶׁ֤ה אַנְשֵׁי־חַ֙יִל֙ מִכָּל־יִשְׂרָאֵ֔ל וַיִּתֵּ֥ן אֹתָ֛ם רָאשִׁ֖ים עַל־הָעָ֑ם שָׂרֵ֤י אֲלָפִים֙ שָׂרֵ֣י מֵא֔וֹת שָׂרֵ֥י חֲמִשִּׁ֖ים וְשָׂרֵ֥י עֲשָׂרֹֽת׃

‎26 ‏וְשָׁפְט֥וּ אֶת־הָעָ֖ם בְּכָל־עֵ֑ת אֶת־הַדָּבָ֤ר הַקָּשֶׁה֙ יְבִיא֣וּן אֶל־מֹשֶׁ֔ה וְכָל־הַדָּבָ֥ר הַקָּטֹ֖ן יִשְׁפּוּט֥וּ הֵֽם׃

‎27 ‏וַיְשַׁלַּ֥ח מֹשֶׁ֖ה אֶת־חֹתְנ֑וֹ וַיֵּ֥לֶךְ ל֖וֹ אֶל־אַרְצֽוֹ׃ פ

1 wayyišəm^a‘ yiṯərwō ḵōhēn miḏəyān ḥōṯēn mōšeh ’ēṯ kāl-’ăšer ‘āśâ ’ĕlōhîm ləmōšeh ûləyiśərā’ēl ‘ammwō kî-hwōṣî’ yəhwâ ’eṯ-yiśərā’ēl mimmiṣərāyim:

2 wayyiqq^aḥ yiṯərwō ḥōṯēn mōšeh ’eṯ-ṣipōrâ ’ēšeṯ mōšeh ’^aḥar šillûḥeyhā:

3 wə’ēṯ šənê ḇāneyhā ’ăšer šēm hā’eḥāḏ gērəšōm kî ’āmar gēr hāyîṯî bə’ereṣ nāḵərîyâ:

4 wəšēm hā’eḥāḏ ’ĕlî‘ezer kî-’ĕlōhê ’āḇî bə‘ezərî wayyaṣṣilēnî mēḥereḇ parə‘ōh:

5 wayyāḇō’ yiṯərwō ḥōṯēn mōšeh ûḇānāyw wə’išətwō ’el-mōšeh ’el-hammiḏəbār ’ăšer-hû’ ḥōneh šām har hā’ĕlōhîm:

6 wayyō’mer ’el-mōšeh ’ănî ḥōṯenəḵā yiṯərwō bā’ ’ēleyḵā wə’išətəḵā ûšənê ḇāneyhā ‘immāh:

7 wayyēṣē’ mōšeh liqəra’ṯ ḥōṯənwō wayyišət^aḥû wayyiššaq-lwō wayyišə’ălû ’îš-lərē‘ēhû ləšālwōm wayyāḇō’û hā’ōhĕlâ:

8 wayəsapēr mōšeh ləḥōṯənwō ’ēṯ kāl-’ăšer ‘āśâ yəhwâ ləfarə‘ōh ûləmiṣərayim ‘al ’wōḏōṯ yiśərā’ēl ’ēṯ kāl-hatəlā’â ’ăšer məṣā’āṯam badereḵə wayyaṣṣilēm yəhwâ:

9 wayyiḥadə yiṯərwō ‘al kāl-haṭṭwōḇâ ’ăšer-‘āśâ yəhwâ ləyiśərā’ēl ’ăšer hiṣṣîlwō mîyaḏ miṣərāyim:

10 wayyō’mer yiṯərwō bārûḵə yəhwâ ’ăšer hiṣṣîl ’eṯəḵem mîyaḏ miṣərayim ûmîyaḏ parə‘ōh ’ăšer hiṣṣîl ’eṯ-hā‘ām mit^aḥaṯ yaḏ-miṣərāyim:

11 ‘atâ yāḏ^a‘ətî kî-ḡāḏwōl yəhwâ mikāl-hā’ĕlōhîm kî ḇadāḇār ’ăšer zāḏû ‘ălêhem:

12 wayyiqq^aḥ yiṯərwō ḥōṯēn mōšeh ‘ōlâ ûzəḇāḥîm lē’lōhîm wayyāḇō’ ’ahărōn wəḵōl| ziqənê yiśərā’ēl le’ĕḵāl-leḥem ‘im-ḥōṯēn mōšeh lifənê hā’ĕlōhîm:

13 wayəhî mimmāḥŏrāṯ wayyēšeḇ mōšeh lišəpōṭ ’eṯ-hā‘ām wayy^a‘ămōḏ hā‘ām ‘al-mōšeh min-habōqer ‘aḏ-hā‘āreḇ:

14 wayyarə’ ḥōṯēn mōšeh ’ēṯ kāl-’ăšer-hû’ ‘ōśeh lā‘ām wayyō’mer mâ-hadāḇār hazzeh ’ăšer ’atâ ‘ōśeh lā‘ām madû‘a ’atâ ywōšēḇ ləḇadeḵā wəḵāl-hā‘ām niṣṣāḇ ‘āleyḵā min-bōqer ‘aḏ-‘āreḇ:

15 wayyō’mer mōšeh ləḥōṯənwō kî-yāḇō’ ’ēlay hā‘ām liḏərōš ’ĕlōhîm:

16 kî-yihəyeh lâem dāḇār bā’ ’ēlay wəšāfaṭətî bên ’îš ûḇên rē‘ēhû wəhwōḏ^a‘ətî ’eṯ-ḥuqqê hā’ĕlōhîm wə’eṯ-twōrōṯāyw:

17 wayyō’mer ḥōṯēn mōšeh ’ēlāyw lō’-ṭwōḇ hadāḇār ’ăšer ’atâ ‘ōśeh:

18 nāḇōl tibōl gam-’atâ gam-hā‘ām hazzeh ’ăšer ‘immāḵə kî-ḵāḇēḏ mimməḵā hadāḇār lō’-ṯûḵal ‘ăśōhû ləḇadeḵā:

19 ‘atâ šəm^a‘ bəqōlî ’î‘āṣəḵā wîhî ’ĕlōhîm ‘immāḵə hĕyēh ’atâ lā‘ām mûl hā’ĕlōhîm wəhēḇē’ṯā ’atâ ’eṯ-hadəḇārîm ’el-hā’ĕlōhîm:

20 wəhizəharətâ ’eṯəhem ’eṯ-h^aḥuqqîm wə’eṯ-hatwōrōṯ wəhwōḏ^a‘ətā lâem ’eṯ-hadereḵə yēləḵû ḇāh wə’eṯ-hamm^a‘ăśeh ’ăšer y^a‘ăśûn:

21 wə’atâ ṯeḥĕzeh mikāl-hā‘ām ’anəšê-ḥayil yirə’ê ’ĕlōhîm ’anəšê ’ĕmeṯ śōnə’ê ḇāṣ^a‘ wəśamətā ‘ălēhem śārê ’ălāfîm śārê mē’wōṯ śārê ḥămiššîm wəśārê ‘ăśārōṯ:

22 wəšāfəṭû ’eṯ-hā‘ām bəḵāl-‘ēṯ wəhāyâ kāl-hadāḇār hagāḏōl yāḇî’û ’ēleyḵā wəḵāl-hadāḇār haqqāṭōn yišəpəṭû-hēm wəhāqēl mē‘āleyḵā wənāśə’û ’itāḵə:

23 ’im ’eṯ-hadāḇār hazzeh t^a‘ăśeh wəṣiûəḵā ’ĕlōhîm wəyāḵālətā ‘ămōḏ wəḡam kāl-hā‘ām hazzeh ‘al-məqōmwō yāḇō’ ḇəšālwōm:

24 wayyišəm^a‘ mōšeh ləqwōl ḥōṯənwō wayy^a‘aś kōl ’ăšer ’āmār:

25 wayyiḇəḥar mōšeh ’anəšê-ḥayil mikāl-yiśərā’ēl wayyitēn ’ōṯām rā’šîm ‘al-hā‘ām śārê ’ălāfîm śārê mē’wōṯ śārê ḥămiššîm wəśārê ‘ăśārōṯ:

26 wəšāfəṭû ’eṯ-hā‘ām bəḵāl-‘ēṯ ’eṯ-hadāḇār haqqāšeh yəḇî’ûn ’el-mōšeh wəḵāl-hadāḇār haqqāṭōn yišəpûṭû hēm:

27 wayəšall^aḥ mōšeh ’eṯ-ḥōṯənwō wayyēleḵə lwō ’el-’arəṣwō: f