Exodus (Shemot) Chapter 19

‎1 ‏בַּחֹ֙דֶשׁ֙ הַשְּׁלִישִׁ֔י לְצֵ֥את בְּנֵי־יִשְׂרָאֵ֖ל מֵאֶ֣רֶץ מִצְרָ֑יִם בַּיּ֣וֹם הַזֶּ֔ה בָּ֖אוּ מִדְבַּ֥ר סִינָֽי׃

‎2 ‏וַיִּסְע֣וּ מֵרְפִידִ֗ים וַיָּבֹ֙אוּ֙ מִדְבַּ֣ר סִינַ֔י וַֽיַּחֲנ֖וּ בַּמִּדְבָּ֑ר וַיִּֽחַן־שָׁ֥ם יִשְׂרָאֵ֖ל נֶ֥גֶד הָהָֽר׃

‎3 ‏וּמֹשֶׁ֥ה עָלָ֖ה אֶל־הָאֱלֹהִ֑ים וַיִּקְרָ֨א אֵלָ֤יו יְהוָה֙ מִן־הָהָ֣ר לֵאמֹ֔ר כֹּ֤ה תֹאמַר֙ לְבֵ֣ית יַעֲקֹ֔ב וְתַגֵּ֖יד לִבְנֵ֥י יִשְׂרָאֵֽל׃

‎4 ‏אַתֶּ֣ם רְאִיתֶ֔ם אֲשֶׁ֥ר עָשִׂ֖יתִי לְמִצְרָ֑יִם וָאֶשָּׂ֤א אֶתְכֶם֙ עַל־כַּנְפֵ֣י נְשָׁרִ֔ים וָאָבִ֥א אֶתְכֶ֖ם אֵלָֽי׃

‎5 ‏וְעַתָּ֗ה אִם־שָׁמ֤וֹעַ תִּשְׁמְעוּ֙ בְּקֹלִ֔י וּשְׁמַרְתֶּ֖ם אֶת־בְּרִיתִ֑י וִהְיִ֨יתֶם לִ֤י סְגֻלָּה֙ מִכָּל־הָ֣עַמִּ֔ים כִּי־לִ֖י כָּל־הָאָֽרֶץ׃

‎6 ‏וְאַתֶּ֧ם תִּהְיוּ־לִ֛י מַמְלֶ֥כֶת כֹּהֲנִ֖ים וְג֣וֹי קָד֑וֹשׁ אֵ֚לֶּה הַדְּבָרִ֔ים אֲשֶׁ֥ר תְּדַבֵּ֖ר אֶל־בְּנֵ֥י יִשְׂרָאֵֽל׃

‎7 ‏וַיָּבֹ֣א מֹשֶׁ֔ה וַיִּקְרָ֖א לְזִקְנֵ֣י הָעָ֑ם וַיָּ֣שֶׂם לִפְנֵיהֶ֗ם אֵ֚ת כָּל־הַדְּבָרִ֣ים הָאֵ֔לֶּה אֲשֶׁ֥ר צִוָּ֖הוּ יְהוָֽה׃

‎8 ‏וַיַּעֲנ֨וּ כָל־הָעָ֤ם יַחְדָּו֙ וַיֹּ֣אמְר֔וּ כֹּ֛ל אֲשֶׁר־דִּבֶּ֥ר יְהוָ֖ה נַעֲשֶׂ֑ה וַיָּ֧שֶׁב מֹשֶׁ֛ה אֶת־דִּבְרֵ֥י הָעָ֖ם אֶל־יְהוָֽה׃

‎9 ‏וַיֹּ֨אמֶר יְהוָ֜ה אֶל־מֹשֶׁ֗ה הִנֵּ֨ה אָנֹכִ֜י בָּ֣א אֵלֶיךָ֮ בְּעַ֣ב הֶֽעָנָן֒ בַּעֲב֞וּר יִשְׁמַ֤ע הָעָם֙ בְּדַבְּרִ֣י עִמָּ֔ךְ וְגַם־בְּךָ֖ יַאֲמִ֣ינוּ לְעוֹלָ֑ם וַיַּגֵּ֥ד מֹשֶׁ֛ה אֶת־דִּבְרֵ֥י הָעָ֖ם אֶל־יְהוָֽה׃

‎10 ‏וַיֹּ֨אמֶר יְהוָ֤ה אֶל־מֹשֶׁה֙ לֵ֣ךְ אֶל־הָעָ֔ם וְקִדַּשְׁתָּ֥ם הַיּ֖וֹם וּמָחָ֑ר וְכִבְּס֖וּ שִׂמְלֹתָֽם׃

‎11 ‏וְהָי֥וּ נְכֹנִ֖ים לַיּ֣וֹם הַשְּׁלִישִׁ֑י כִּ֣י׀ בַּיּ֣וֹם הַשְּׁלִישִׁ֗י יֵרֵ֧ד יְהוָ֛ה לְעֵינֵ֥י כָל־הָעָ֖ם עַל־הַ֥ר סִינָֽי׃

‎12 ‏וְהִגְבַּלְתָּ֤ אֶת־הָעָם֙ סָבִ֣יב לֵאמֹ֔ר הִשָּׁמְר֥וּ לָכֶ֛ם עֲל֥וֹת בָּהָ֖ר וּנְגֹ֣עַ בְּקָצֵ֑הוּ כָּל־הַנֹּגֵ֥עַ בָּהָ֖ר מ֥וֹת יוּמָֽת׃

‎13 ‏לֹא־תִגַּ֨ע בּ֜וֹ יָ֗ד כִּֽי־סָק֤וֹל יִסָּקֵל֙ אוֹ־יָרֹ֣ה יִיָּרֶ֔ה אִם־בְּהֵמָ֥ה אִם־אִ֖ישׁ לֹ֣א יִחְיֶ֑ה בִּמְשֹׁךְ֙ הַיֹּבֵ֔ל הֵ֖מָּה יַעֲל֥וּ בָהָֽר׃

‎14 ‏וַיֵּ֧רֶד מֹשֶׁ֛ה מִן־הָהָ֖ר אֶל־הָעָ֑ם וַיְקַדֵּשׁ֙ אֶת־הָעָ֔ם וַֽיְכַבְּס֖וּ שִׂמְלֹתָֽם׃

‎15 ‏וַיֹּ֙אמֶר֙ אֶל־הָעָ֔ם הֱי֥וּ נְכֹנִ֖ים לִשְׁלֹ֣שֶׁת יָמִ֑ים אַֽל־תִּגְּשׁ֖וּ אֶל־אִשָּֽׁה׃

‎16 ‏וַיְהִי֩ בַיּ֨וֹם הַשְּׁלִישִׁ֜י בִּֽהְיֹ֣ת הַבֹּ֗קֶר וַיְהִי֩ קֹלֹ֨ת וּבְרָקִ֜ים וְעָנָ֤ן כָּבֵד֙ עַל־הָהָ֔ר וְקֹ֥ל שֹׁפָ֖ר חָזָ֣ק מְאֹ֑ד וַיֶּחֱרַ֥ד כָּל־הָעָ֖ם אֲשֶׁ֥ר בַּֽמַּחֲנֶֽה׃

‎17 ‏וַיּוֹצֵ֨א מֹשֶׁ֧ה אֶת־הָעָ֛ם לִקְרַ֥את הָֽאֱלֹהִ֖ים מִן־הַֽמַּחֲנֶ֑ה וַיִּֽתְיַצְּב֖וּ בְּתַחְתִּ֥ית הָהָֽר׃

‎18 ‏וְהַ֤ר סִינַי֙ עָשַׁ֣ן כֻּלּ֔וֹ מִ֠פְּנֵי אֲשֶׁ֨ר יָרַ֥ד עָלָ֛יו יְהוָ֖ה בָּאֵ֑שׁ וַיַּ֤עַל עֲשָׁנוֹ֙ כְּעֶ֣שֶׁן הַכִּבְשָׁ֔ן וַיֶּחֱרַ֥ד כָּל־הָהָ֖ר מְאֹֽד׃

‎19 ‏וַיְהִי֙³ ק֣וֹל הַשּׁוֹפָ֔ר הוֹלֵ֖ךְ וְחָזֵ֣ק מְאֹ֑ד מֹשֶׁ֣ה יְדַבֵּ֔ר וְהָאֱלֹהִ֖ים יַעֲנֶ֥נּוּ בְקֽוֹל׃

‎20 ‏וַיֵּ֧רֶד יְהוָ֛ה עַל־הַ֥ר סִינַ֖י אֶל־רֹ֣אשׁ הָהָ֑ר וַיִּקְרָ֨א יְהוָ֧ה לְמֹשֶׁ֛ה אֶל־רֹ֥אשׁ הָהָ֖ר וַיַּ֥עַל מֹשֶֽׁה׃

‎21 ‏וַיֹּ֤אמֶר יְהוָה֙ אֶל־מֹשֶׁ֔ה רֵ֖ד הָעֵ֣ד בָּעָ֑ם פֶּן־יֶהֶרְס֤וּ אֶל־יְהוָה֙ לִרְא֔וֹת וְנָפַ֥ל מִמֶּ֖נּוּ רָֽב׃

‎22 ‏וְגַ֧ם הַכֹּהֲנִ֛ים הַנִּגָּשִׁ֥ים אֶל־יְהוָ֖ה יִתְקַדָּ֑שׁוּ פֶּן־יִפְרֹ֥ץ בָּהֶ֖ם יְהוָֽה׃

‎23 ‏וַיֹּ֤אמֶר מֹשֶׁה֙ אֶל־יְהוָ֔ה לֹא־יוּכַ֣ל הָעָ֔ם לַעֲלֹ֖ת אֶל־הַ֣ר סִינָ֑י כִּֽי־אַתָּ֞ה הַעֵדֹ֤תָה בָּ֙נוּ֙ לֵאמֹ֔ר הַגְבֵּ֥ל אֶת־הָהָ֖ר וְקִדַּשְׁתּֽוֹ׃

‎24 ‏וַיֹּ֨אמֶר אֵלָ֤יו יְהוָה֙ לֶךְ־רֵ֔ד וְעָלִ֥יתָ אַתָּ֖ה וְאַהֲרֹ֣ן עִמָּ֑ךְ וְהַכֹּהֲנִ֣ים וְהָעָ֗ם אַל־יֶֽהֶרְס֛וּ לַעֲלֹ֥ת אֶל־יְהוָ֖ה פֶּן־יִפְרָץ־בָּֽם׃

‎25 ‏וַיֵּ֥רֶד מֹשֶׁ֖ה אֶל־הָעָ֑ם וַיֹּ֖אמֶר אֲלֵהֶֽם׃ ס

1 b^aḥōḏeš haššəlîšî ləṣē’ṯ bənê-yiśərā’ēl mē’ereṣ miṣərāyim bayywōm hazzeh bā’û miḏəbar sînāy:

2 wayyisə‘û mērəfîḏîm wayyāḇō’û miḏəbar sînay wayy^aḥănû bammiḏəbār wayyiḥan-šām yiśərā’ēl neḡeḏ hâār:

3 ûmōšeh ‘ālâ ’el-hā’ĕlōhîm wayyiqərā’ ’ēlāyw yəhwâ min-hâār lē’mōr kōh ṯō’mar ləḇêṯ y^a‘ăqōḇ wəṯagêḏ liḇənê yiśərā’ēl:

4 ’atem rə’îṯem ’ăšer ‘āśîṯî ləmiṣərāyim wā’eśśā’ ’eṯəḵem ‘al-kanəfê nəšārîm wā’āḇi’ ’eṯəḵem ’ēlāy:

5 wə‘atâ ’im-šāmwō‘a tišəmə‘û bəqōlî ûšəmarətem ’eṯ-bərîṯî wihəyîṯem lî səḡullâ mikāl-hā‘ammîm kî-lî kāl-hā’āreṣ:

6 wə’atem tihəyû-lî maməleḵeṯ kōhănîm wəḡwōy qāḏwōš ’ēlleh hadəḇārîm ’ăšer təḏabēr ’el-bənê yiśərā’ēl:

7 wayyāḇō’ mōšeh wayyiqərā’ ləziqənê hā‘ām wayyāśem lifənêhem ’ēṯ kāl-hadəḇārîm hā’ēlleh ’ăšer ṣiûâû yəhwâ:

8 wayy^a‘ănû ḵāl-hā‘ām y^aḥədāw wayyō’mərû kōl ’ăšer-diber yəhwâ n^a‘ăśeh wayyāšeḇ mōšeh ’eṯ-diḇərê hā‘ām ’el-yəhwâ:

9 wayyō’mer yəhwâ ’el-mōšeh hinnēh ’ānōḵî bā’ ’ēleyḵā bə‘aḇ he‘ānān b^a‘ăḇûr yišəm^a‘ hā‘ām bəḏabərî ‘immāḵə wəḡam-bəḵā ya’ămînû lə‘wōlām wayyagēḏ mōšeh ’eṯ-diḇərê hā‘ām ’el-yəhwâ:

10 wayyō’mer yəhwâ ’el-mōšeh lēḵə ’el-hā‘ām wəqidašətām hayywōm ûmāḥār wəḵibəsû śiməlōṯām:

11 wəhāyû nəḵōnîm layywōm haššəlîšî kî| bayywōm haššəlîšî yērēḏ yəhwâ lə‘ênê ḵāl-hā‘ām ‘al-har sînāy:

12 wəhiḡəbalətā ’eṯ-hā‘ām sāḇîḇ lē’mōr hiššāmərû lāḵem ‘ălwōṯ bâār ûnəḡō‘a bəqāṣēhû kāl-hannōḡē‘a bâār mwōṯ yûmāṯ:

13 lō’-ṯig^a‘ bwō yāḏ kî-sāqwōl yissāqēl ’wō-yārōh yîyāreh ’im-bəhēmâ ’im-’îš lō’ yiḥəyeh biməšōḵə hayyōḇēl hēmmâ y^a‘ălû ḇâār:

14 wayyēreḏ mōšeh min-hâār ’el-hā‘ām wayəqadēš ’eṯ-hā‘ām wayəḵabəsû śiməlōṯām:

15 wayyō’mer ’el-hā‘ām hĕyû nəḵōnîm lišəlōšeṯ yāmîm ’al-tigəšû ’el-’iššâ:

16 wayəhî ḇayywōm haššəlîšî bihəyōṯ habōqer wayəhî qōlōṯ ûḇərāqîm wə‘ānān kāḇēḏ ‘al-hâār wəqōl šōfār ḥāzāq mə’ōḏ wayyeḥĕraḏ kāl-hā‘ām ’ăšer bamm^aḥăneh:

17 wayywōṣē’ mōšeh ’eṯ-hā‘ām liqəra’ṯ hā’ĕlōhîm min-hamm^aḥăneh wayyiṯəyaṣṣəḇû bəṯ^aḥətîṯ hâār:

18 wəhar sînay ‘āšan kullwō mipənê ’ăšer yāraḏ ‘ālāyw yəhwâ bā’ēš wayy^a‘al ‘ăšānwō kə‘ešen hakiḇəšān wayyeḥĕraḏ kāl-hâār mə’ōḏ:

19 wayəhî³ qwōl haššwōfār hwōlēḵə wəḥāzēq mə’ōḏ mōšeh yəḏabēr wəhā’ĕlōhîm y^a‘ănennû ḇəqwōl:

20 wayyēreḏ yəhwâ ‘al-har sînay ’el-rō’š hâār wayyiqərā’ yəhwâ ləmōšeh ’el-rō’š hâār wayy^a‘al mōšeh:

21 wayyō’mer yəhwâ ’el-mōšeh rēḏ hā‘ēḏ bā‘ām pen-yeherəsû ’el-yəhwâ lirə’wōṯ wənāfal mimmennû rāḇ:

22 wəḡam hakōhănîm hannigāšîm ’el-yəhwâ yiṯəqadāšû pen-yifərōṣ bâem yəhwâ:

23 wayyō’mer mōšeh ’el-yəhwâ lō’-yûḵal hā‘ām l^a‘ălōṯ ’el-har sînāy kî-’atâ h^a‘ēḏōṯâ bānû lē’mōr haḡəbēl ’eṯ-hâār wəqidašətwō:

24 wayyō’mer ’ēlāyw yəhwâ leḵə-rēḏ wə‘ālîṯā ’atâ wə’ahărōn ‘immāḵə wəhakōhănîm wəhā‘ām ’al-yeherəsû l^a‘ălōṯ ’el-yəhwâ pen-yifərāṣ-bām:

25 wayyēreḏ mōšeh ’el-hā‘ām wayyō’mer ’ălēhem: s