Exodus (Shemot) Chapter 23

‎1 ‏לֹ֥א תִשָּׂ֖א שֵׁ֣מַע שָׁ֑וְא אַל־תָּ֤שֶׁת יָֽדְךָ֙ עִם־רָשָׁ֔ע לִהְיֹ֖ת עֵ֥ד חָמָֽס׃ ס

‎2 ‏לֹֽא־תִהְיֶ֥ה אַחֲרֵֽי־רַבִּ֖ים לְרָעֹ֑ת וְלֹא־תַעֲנֶ֣ה עַל־רִ֗ב לִנְטֹ֛ת אַחֲרֵ֥י רַבִּ֖ים לְהַטֹּֽת׃

‎3 ‏וְדָ֕ל לֹ֥א תֶהְדַּ֖ר בְּרִיבֽוֹ׃ ס

‎4 ‏כִּ֣י תִפְגַּ֞ע שׁ֧וֹר אֹֽיִבְךָ֛ א֥וֹ חֲמֹר֖וֹ תֹּעֶ֑ה הָשֵׁ֥ב תְּשִׁיבֶ֖נּוּ לֽוֹ׃ ס

‎5 ‏כִּֽי־תִרְאֶ֞ה חֲמ֣וֹר שֹׂנַאֲךָ֗ רֹבֵץ֙ תַּ֣חַת מַשָּׂא֔וֹ וְחָדַלְתָּ֖ מֵעֲזֹ֣ב ל֑וֹ עָזֹ֥ב תַּעֲזֹ֖ב עִמּֽוֹ׃ ס

‎6 ‏לֹ֥א תַטֶּ֛ה מִשְׁפַּ֥ט אֶבְיֹנְךָ֖ בְּרִיבֽוֹ׃

‎7 ‏מִדְּבַר־שֶׁ֖קֶר תִּרְחָ֑ק וְנָקִ֤י וְצַדִּיק֙ אַֽל־תַּהֲרֹ֔ג כִּ֥י לֹא־אַצְדִּ֖יק רָשָֽׁע׃

‎8 ‏וְשֹׁ֖חַד לֹ֣א תִקָּ֑ח כִּ֤י הַשֹּׁ֙חַד֙ יְעַוֵּ֣ר פִּקְחִ֔ים וִֽיסַלֵּ֖ף דִּבְרֵ֥י צַדִּיקִֽים׃

‎9 ‏וְגֵ֖ר לֹ֣א תִלְחָ֑ץ וְאַתֶּ֗ם יְדַעְתֶּם֙ אֶת־נֶ֣פֶשׁ הַגֵּ֔ר כִּֽי־גֵרִ֥ים הֱיִיתֶ֖ם בְּאֶ֥רֶץ מִצְרָֽיִם׃

‎10 ‏וְשֵׁ֥שׁ שָׁנִ֖ים תִּזְרַ֣ע אֶת־אַרְצֶ֑ךָ וְאָסַפְתָּ֖ אֶת־תְּבוּאָתָֽהּ׃

‎11 ‏וְהַשְּׁבִיעִ֞ת תִּשְׁמְטֶ֣נָּה וּנְטַשְׁתָּ֗הּ וְאָֽכְלוּ֙ אֶבְיֹנֵ֣י עַמֶּ֔ךָ וְיִתְרָ֕ם תֹּאכַ֖ל חַיַּ֣ת הַשָּׂדֶ֑ה כֵּֽן־תַּעֲשֶׂ֥ה לְכַרְמְךָ֖ לְזֵיתֶֽךָ׃

‎12 ‏שֵׁ֤שֶׁת יָמִים֙ תַּעֲשֶׂ֣ה מַעֲשֶׂ֔יךָ וּבַיּ֥וֹם הַשְּׁבִיעִ֖י תִּשְׁבֹּ֑ת לְמַ֣עַן יָנ֗וּחַ שֽׁוֹרְךָ֙ וַחֲמֹרֶ֔ךָ וְיִנָּפֵ֥שׁ בֶּן־אֲמָתְךָ֖ וְהַגֵּֽר׃

‎13 ‏וּבְכֹ֛ל אֲשֶׁר־אָמַ֥רְתִּי אֲלֵיכֶ֖ם תִּשָּׁמֵ֑רוּ וְשֵׁ֨ם אֱלֹהִ֤ים אֲחֵרִים֙ לֹ֣א תַזְכִּ֔ירוּ לֹ֥א יִשָּׁמַ֖ע עַל־פִּֽיךָ׃

‎14 ‏שָׁלֹ֣שׁ רְגָלִ֔ים תָּחֹ֥ג לִ֖י בַּשָּׁנָֽה׃

‎15 ‏אֶת־חַ֣ג הַמַּצּוֹת֮ תִּשְׁמֹר֒ שִׁבְעַ֣ת יָמִים֩ תֹּאכַ֨ל מַצּ֜וֹת כַּֽאֲשֶׁ֣ר צִוִּיתִ֗ךָ לְמוֹעֵד֙ חֹ֣דֶשׁ הָֽאָבִ֔יב כִּי־ב֖וֹ יָצָ֣אתָ מִמִּצְרָ֑יִם וְלֹא־יֵרָא֥וּ פָנַ֖י רֵיקָֽם׃

‎16 ‏וְחַ֤ג הַקָּצִיר֙ בִּכּוּרֵ֣י מַעֲשֶׂ֔יךָ אֲשֶׁ֥ר תִּזְרַ֖ע בַּשָּׂדֶ֑ה וְחַ֤ג הָֽאָסִף֙ בְּצֵ֣את הַשָּׁנָ֔ה בְּאָסְפְּךָ֥ אֶֽת־מַעֲשֶׂ֖יךָ מִן־הַשָּׂדֶֽה׃

‎17 ‏שָׁלֹ֥שׁ פְּעָמִ֖ים בַּשָּׁנָ֑ה יֵרָאֶה֙ כָּל־זְכ֣וּרְךָ֔ אֶל־פְּנֵ֖י הָאָדֹ֥ן׀ יְהוָֽה׃

‎18 ‏לֹֽא־תִזְבַּ֥ח עַל־חָמֵ֖ץ דַּם־זִבְחִ֑י וְלֹֽא־יָלִ֥ין חֵֽלֶב־חַגִּ֖י עַד־בֹּֽקֶר׃

‎19 ‏רֵאשִׁ֗ית בִּכּוּרֵי֙ אַדְמָ֣תְךָ֔ תָּבִ֕יא בֵּ֖ית יְהוָ֣ה אֱלֹהֶ֑יךָ לֹֽא־תְבַשֵּׁ֥ל גְּדִ֖י בַּחֲלֵ֥ב אִמּֽוֹ׃ ס

‎20 ‏הִנֵּ֨ה אָנֹכִ֜י שֹׁלֵ֤חַ מַלְאָךְ֙ לְפָנֶ֔יךָ לִשְׁמָרְךָ֖ בַּדָּ֑רֶךְ וְלַהֲבִ֣יאֲךָ֔ אֶל־הַמָּק֖וֹם אֲשֶׁ֥ר הֲכִנֹֽתִי׃

‎21 ‏הִשָּׁ֧מֶר מִפָּנָ֛יו וּשְׁמַ֥ע בְּקֹל֖וֹ אַל־תַּמֵּ֣ר בּ֑וֹ כִּ֣י לֹ֤א יִשָּׂא֙ לְפִשְׁעֲכֶ֔ם כִּ֥י שְׁמִ֖י בְּקִרְבּֽוֹ׃

‎22 ‏כִּ֣י אִם־שָׁמֹ֤עַ תִּשְׁמַע֙ בְּקֹל֔וֹ וְעָשִׂ֕יתָ כֹּ֖ל אֲשֶׁ֣ר אֲדַבֵּ֑ר וְאָֽיַבְתִּי֙ אֶת־אֹ֣יְבֶ֔יךָ וְצַרְתִּ֖י אֶת־צֹרְרֶֽיךָ׃

‎23 ‏כִּֽי־יֵלֵ֣ךְ מַלְאָכִי֮ לְפָנֶיךָ֒ וֶהֱבִֽיאֲךָ֗ אֶל־הָֽאֱמֹרִי֙ וְהַ֣חִתִּ֔י וְהַפְּרִזִּי֙ וְהַֽכְּנַעֲנִ֔י הַחִוִּ֖י וְהַיְבוּסִ֑י וְהִכְחַדְתִּֽיו׃

‎24 ‏לֹֽא־תִשְׁתַּחֲוֶ֤ה לֵאלֹֽהֵיהֶם֙ וְלֹ֣א תָֽעָבְדֵ֔ם וְלֹ֥א תַעֲשֶׂ֖ה כְּמַֽעֲשֵׂיהֶ֑ם כִּ֤י הָרֵס֙ תְּהָ֣רְסֵ֔ם וְשַׁבֵּ֥ר תְּשַׁבֵּ֖ר מַצֵּבֹתֵיהֶֽם׃

‎25 ‏וַעֲבַדְתֶּ֗ם אֵ֚ת יְהוָ֣ה אֱלֹֽהֵיכֶ֔ם וּבֵרַ֥ךְ אֶֽת־לַחְמְךָ֖ וְאֶת־מֵימֶ֑יךָ וַהֲסִרֹתִ֥י מַחֲלָ֖ה מִקִּרְבֶּֽךָ׃

‎26 ‏לֹ֥א תִהְיֶ֛ה מְשַׁכֵּלָ֥ה וַעֲקָרָ֖ה בְּאַרְצֶ֑ךָ אֶת־מִסְפַּ֥ר יָמֶ֖יךָ אֲמַלֵּֽא׃

‎27 ‏אֶת־אֵֽימָתִי֙ אֲשַׁלַּ֣ח לְפָנֶ֔יךָ וְהַמֹּתִי֙ אֶת־כָּל־הָעָ֔ם אֲשֶׁ֥ר תָּבֹ֖א בָּהֶ֑ם וְנָתַתִּ֧י אֶת־כָּל־אֹיְבֶ֛יךָ אֵלֶ֖יךָ עֹֽרֶף׃

‎28 ‏וְשָׁלַחְתִּ֥י אֶת־הַצִּרְעָ֖ה לְפָנֶ֑יךָ וְגֵרְשָׁ֗ה אֶת־הַחִוִּ֧י אֶת־הַֽכְּנַעֲנִ֛י וְאֶת־הַחִתִּ֖י מִלְּפָנֶֽיךָ׃

‎29 ‏לֹ֧א אֲגָרְשֶׁ֛נּוּ מִפָּנֶ֖יךָ בְּשָׁנָ֣ה אֶחָ֑ת פֶּן־תִּהְיֶ֤ה הָאָ֙רֶץ֙ שְׁמָמָ֔ה וְרַבָּ֥ה עָלֶ֖יךָ חַיַּ֥ת הַשָּׂדֶֽה׃

‎30 ‏מְעַ֥ט מְעַ֛ט אֲגָרְשֶׁ֖נּוּ מִפָּנֶ֑יךָ עַ֚ד אֲשֶׁ֣ר תִּפְרֶ֔ה וְנָחַלְתָּ֖ אֶת־הָאָֽרֶץ׃

‎31 ‏וְשַׁתִּ֣י אֶת־גְּבֻלְךָ֗ מִיַּם־סוּף֙ וְעַד־יָ֣ם פְּלִשְׁתִּ֔ים וּמִמִּדְבָּ֖ר עַד־הַנָּהָ֑ר כִּ֣י׀ אֶתֵּ֣ן בְּיֶדְכֶ֗ם אֵ֚ת יֹשְׁבֵ֣י הָאָ֔רֶץ וְגֵרַשְׁתָּ֖מוֹ מִפָּנֶֽיךָ׃

‎32 ‏לֹא־תִכְרֹ֥ת³ לָהֶ֛ם וְלֵאלֹֽהֵיהֶ֖ם בְּרִֽית׃

‎33 ‏לֹ֤א יֵשְׁבוּ֙ בְּאַרְצְךָ֔ פֶּן־יַחֲטִ֥יאוּ אֹתְךָ֖ לִ֑י כִּ֤י תַעֲבֹד֙ אֶת־אֱלֹ֣הֵיהֶ֔ם כִּֽי־יִהְיֶ֥ה לְךָ֖ לְמוֹקֵֽשׁ׃ פ

1 lō’ ṯiśśā’ šēm^a‘ šāwə’ ’al-tāšeṯ yāḏəḵā ‘im-rāšā‘ lihəyōṯ ‘ēḏ ḥāmās: s

2 lō’-ṯihəyeh ’^aḥărê-rabîm lərā‘ōṯ wəlō’-ṯ^a‘ăneh ‘al-riḇ linəṭōṯ ’^aḥărê rabîm ləhaṭṭōṯ:

3 wəḏāl lō’ ṯehədar bərîḇwō: s

4 kî ṯifəg^a‘ šwōr ’ōyiḇəḵā ’wō ḥămōrwō tō‘eh hāšēḇ təšîḇennû lwō: s

5 kî-ṯirə’eh ḥămwōr śōna’ăḵā rōḇēṣ t^aḥaṯ maśśā’wō wəḥāḏalətā mē‘ăzōḇ lwō ‘āzōḇ t^a‘ăzōḇ ‘immwō: s

6 lō’ ṯaṭṭeh mišəpaṭ ’eḇəyōnəḵā bərîḇwō:

7 midəḇar-šeqer tirəḥāq wənāqî wəṣadîq ’al-tahărōḡ kî lō’-’aṣədîq rāšā‘:

8 wəšōḥaḏ lō’ ṯiqqāḥ kî haššōḥaḏ yə‘aûēr piqəḥîm wîsallēf diḇərê ṣadîqîm:

9 wəḡēr lō’ ṯiləḥāṣ wə’atem yəḏ^a‘ətem ’eṯ-nefeš hagēr kî-ḡērîm hĕyîṯem bə’ereṣ miṣərāyim:

10 wəšēš šānîm tizər^a‘ ’eṯ-’arəṣeḵā wə’āsafətā ’eṯ-təḇû’āṯāh:

11 wəhaššəḇî‘iṯ tišəməṭennâ ûnəṭašətāh wə’āḵəlû ’eḇəyōnê ‘ammeḵā wəyiṯərām tō’ḵal ḥayyaṯ haśśāḏeh kēn-t^a‘ăśeh ləḵarəməḵā ləzêṯeḵā:

12 šēšeṯ yāmîm t^a‘ăśeh m^a‘ăśeyḵā ûḇayywōm haššəḇî‘î tišəbōṯ ləm^a‘an yānûḥa šwōrəḵā w^aḥămōreḵā wəyinnāfēš ben-’ămāṯəḵā wəhagēr:

13 ûḇəḵōl ’ăšer-’āmarətî ’ălêḵem tiššāmērû wəšēm ’ĕlōhîm ’ăḥērîm lō’ ṯazəkîrû lō’ yiššām^a‘ ‘al-pîḵā:

14 šālōš rəḡālîm tāḥōḡ lî baššānâ:

15 ’eṯ-ḥaḡ hammaṣṣwōṯ tišəmōr šiḇə‘aṯ yāmîm tō’ḵal maṣṣwōṯ ka’ăšer ṣiûîṯiḵā ləmwō‘ēḏ ḥōḏeš hā’āḇîḇ kî-ḇwō yāṣā’ṯā mimmiṣərāyim wəlō’-yērā’û fānay rêqām:

16 wəḥaḡ haqqāṣîr bikûrê m^a‘ăśeyḵā ’ăšer tizər^a‘ baśśāḏeh wəḥaḡ hā’āsif bəṣē’ṯ haššānâ bə’āsəpəḵā ’eṯ-m^a‘ăśeyḵā min-haśśāḏeh:

17 šālōš pə‘āmîm baššānâ yērā’eh kāl-zəḵûrəḵā ’el-pənê hā’āḏōn| yəhwâ:

18 lō’-ṯizəb^aḥ ‘al-ḥāmēṣ dam-ziḇəḥî wəlō’-yālîn ḥēleḇ-ḥagî ‘aḏ-bōqer:

19 rē’šîṯ bikûrê ’aḏəmāṯəḵā tāḇî’ bêṯ yəhwâ ’ĕlōheyḵā lō’-ṯəḇaššēl gəḏî b^aḥălēḇ ’immwō: s

20 hinnēh ’ānōḵî šōlēḥa malə’āḵə ləfāneyḵā lišəmārəḵā badāreḵə wəlahăḇî’ăḵā ’el-hammāqwōm ’ăšer hăḵinōṯî:

21 hiššāmer mipānāyw ûšəm^a‘ bəqōlwō ’al-tammēr bwō kî lō’ yiśśā’ ləfišə‘ăḵem kî šəmî bəqirəbwō:

22 kî ’im-šāmō‘a tišəm^a‘ bəqōlwō wə‘āśîṯā kōl ’ăšer ’ăḏabēr wə’āyaḇətî ’eṯ-’ōyəḇeyḵā wəṣarətî ’eṯ-ṣōrəreyḵā:

23 kî-yēlēḵə malə’āḵî ləfāneyḵā wehĕḇî’ăḵā ’el-hā’ĕmōrî wəh^aḥitî wəhapərizzî wəhakən^a‘ănî h^aḥiûî wəhayəḇûsî wəhiḵəḥaḏətîw:

24 lō’-ṯišət^aḥăweh lē’lōhêhem wəlō’ ṯā‘āḇəḏēm wəlō’ ṯ^a‘ăśeh kəm^a‘ăśêhem kî hārēs təhārəsēm wəšabēr təšabēr maṣṣēḇōṯêhem:

25 w^a‘ăḇaḏətem ’ēṯ yəhwâ ’ĕlōhêḵem ûḇēraḵə ’eṯ-l^aḥəməḵā wə’eṯ-mêmeyḵā wahăsirōṯî m^aḥălâ miqqirəbeḵā:

26 lō’ ṯihəyeh məšakēlâ w^a‘ăqārâ bə’arəṣeḵā ’eṯ-misəpar yāmeyḵā ’ămallē’:

27 ’eṯ-’êmāṯî ’ăšall^aḥ ləfāneyḵā wəhammōṯî ’eṯ-kāl-hā‘ām ’ăšer tāḇō’ bâem wənāṯatî ’eṯ-kāl-’ōyəḇeyḵā ’ēleyḵā ‘ōref:

28 wəšāl^aḥətî ’eṯ-haṣṣirə‘â ləfāneyḵā wəḡērəšâ ’eṯ-h^aḥiûî ’eṯ-hakən^a‘ănî wə’eṯ-h^aḥitî milləfāneyḵā:

29 lō’ ’ăḡārəšennû mipāneyḵā bəšānâ ’eḥāṯ pen-tihəyeh hā’āreṣ šəmāmâ wərabâ ‘āleyḵā ḥayyaṯ haśśāḏeh:

30 mə‘aṭ mə‘aṭ ’ăḡārəšennû mipāneyḵā ‘aḏ ’ăšer tifəreh wənāḥalətā ’eṯ-hā’āreṣ:

31 wəšatî ’eṯ-gəḇuləḵā mîyam-sûf wə‘aḏ-yām pəlišətîm ûmimmiḏəbār ‘aḏ-hannâār kî| ’etēn bəyeḏəḵem ’ēṯ yōšəḇê hā’āreṣ wəḡērašətāmwō mipāneyḵā:

32 lō’-ṯiḵərōṯ³ lâem wəlē’lōhêhem bərîṯ:

33 lō’ yēšəḇû bə’arəṣəḵā pen-y^aḥăṭî’û ’ōṯəḵā lî kî ṯ^a‘ăḇōḏ ’eṯ-’ĕlōhêhem kî-yihəyeh ləḵā ləmwōqēš: f