Exodus (Shemot) Chapter 24

‎1 ‏וְאֶל־מֹשֶׁ֨ה אָמַ֜ר עֲלֵ֣ה אֶל־יְהוָ֗ה אַתָּה֙ וְאַהֲרֹן֙ נָדָ֣ב וַאֲבִיה֔וּא וְשִׁבְעִ֖ים מִזִּקְנֵ֣י יִשְׂרָאֵ֑ל וְהִשְׁתַּחֲוִיתֶ֖ם מֵרָחֹֽק׃

‎2 ‏וְנִגַּ֨שׁ מֹשֶׁ֤ה לְבַדּוֹ֙ אֶל־יְהוָ֔ה וְהֵ֖ם לֹ֣א יִגָּ֑שׁוּ וְהָעָ֕ם לֹ֥א יַעֲל֖וּ עִמּֽוֹ׃

‎3 ‏וַיָּבֹ֣א מֹשֶׁ֗ה וַיְסַפֵּ֤ר לָעָם֙ אֵ֚ת כָּל־דִּבְרֵ֣י יְהוָ֔ה וְאֵ֖ת כָּל־הַמִּשְׁפָּטִ֑ים וַיַּ֨עַן כָּל־הָעָ֜ם ק֤וֹל אֶחָד֙ וַיֹּ֣אמְר֔וּ כָּל־הַדְּבָרִ֛ים אֲשֶׁר־דִּבֶּ֥ר יְהוָ֖ה נַעֲשֶֽׂה׃

‎4 ‏וַיִּכְתֹּ֣ב מֹשֶׁ֗ה אֵ֚ת כָּל־דִּבְרֵ֣י יְהוָ֔ה וַיַּשְׁכֵּ֣ם בַּבֹּ֔קֶר וַיִּ֥בֶן מִזְבֵּ֖חַ תַּ֣חַת הָהָ֑ר וּשְׁתֵּ֤ים עֶשְׂרֵה֙ מַצֵּבָ֔ה לִשְׁנֵ֥ים עָשָׂ֖ר שִׁבְטֵ֥י יִשְׂרָאֵֽל׃

‎5 ‏וַיִּשְׁלַ֗ח אֶֽת־נַעֲרֵי֙ בְּנֵ֣י יִשְׂרָאֵ֔ל וַיַּֽעֲל֖וּ עֹלֹ֑ת וַֽיִּזְבְּח֞וּ זְבָחִ֧ים שְׁלָמִ֛ים לַיהוָ֖ה פָּרִֽים׃

‎6 ‏וַיִּקַּ֤ח מֹשֶׁה֙ חֲצִ֣י הַדָּ֔ם וַיָּ֖שֶׂם בָּאַגָּנֹ֑ת וַחֲצִ֣י הַדָּ֔ם זָרַ֖ק עַל־הַמִּזְבֵּֽחַ׃

‎7 ‏וַיִּקַּח֙ סֵ֣פֶר הַבְּרִ֔ית וַיִּקְרָ֖א בְּאָזְנֵ֣י הָעָ֑ם וַיֹּ֣אמְר֔וּ כֹּ֛ל אֲשֶׁר־דִּבֶּ֥ר יְהוָ֖ה נַעֲשֶׂ֥ה וְנִשְׁמָֽע׃

‎8 ‏וַיִּקַּ֤ח מֹשֶׁה֙ אֶת־הַדָּ֔ם וַיִּזְרֹ֖ק עַל־הָעָ֑ם וַיֹּ֗אמֶר הִנֵּ֤ה דַֽם־הַבְּרִית֙ אֲשֶׁ֨ר כָּרַ֤ת יְהוָה֙ עִמָּכֶ֔ם עַ֥ל כָּל־הַדְּבָרִ֖ים הָאֵֽלֶּה׃

‎9 ‏וַיַּ֥עַל מֹשֶׁ֖ה וְאַהֲרֹ֑ן נָדָב֙ וַאֲבִיה֔וּא וְשִׁבְעִ֖ים מִזִּקְנֵ֥י יִשְׂרָאֵֽל׃

‎10 ‏וַיִּרְא֕וּ אֵ֖ת אֱלֹהֵ֣י יִשְׂרָאֵ֑ל וְתַ֣חַת רַגְלָ֗יו כְּמַעֲשֵׂה֙ לִבְנַ֣ת הַסַּפִּ֔יר וּכְעֶ֥צֶם הַשָּׁמַ֖יִם לָטֹֽהַר׃

‎11 ‏וְאֶל־אֲצִילֵי֙ בְּנֵ֣י יִשְׂרָאֵ֔ל לֹ֥א שָׁלַ֖ח יָד֑וֹ וַֽיֶּחֱזוּ֙ אֶת־הָ֣אֱלֹהִ֔ים וַיֹּאכְל֖וּ וַיִּשְׁתּֽוּ׃ ס

‎12 ‏וַיֹּ֨אמֶר יְהוָ֜ה אֶל־מֹשֶׁ֗ה עֲלֵ֥ה אֵלַ֛י הָהָ֖רָה וֶהְיֵה־שָׁ֑ם וְאֶתְּנָ֨ה לְךָ֜ אֶת־לֻחֹ֣ת הָאֶ֗בֶן וְהַתּוֹרָה֙ וְהַמִּצְוָ֔ה אֲשֶׁ֥ר כָּתַ֖בְתִּי לְהוֹרֹתָֽם׃

‎13 ‏וַיָּ֣קָם מֹשֶׁ֔ה וִיהוֹשֻׁ֖עַ מְשָׁרְת֑וֹ וַיַּ֥עַל מֹשֶׁ֖ה אֶל־הַ֥ר הָאֱלֹהִֽים׃

‎14 ‏וְאֶל־הַזְּקֵנִ֤ים אָמַר֙ שְׁבוּ־לָ֣נוּ בָזֶ֔ה עַ֥ד אֲשֶׁר־נָשׁ֖וּב אֲלֵיכֶ֑ם וְהִנֵּ֨ה אַהֲרֹ֤ן וְחוּר֙ עִמָּכֶ֔ם מִי־בַ֥עַל דְּבָרִ֖ים יִגַּ֥שׁ אֲלֵהֶֽם׃

‎15 ‏וַיַּ֥עַל מֹשֶׁ֖ה אֶל־הָהָ֑ר וַיְכַ֥ס הֶעָנָ֖ן אֶת־הָהָֽר׃

‎16 ‏וַיִּשְׁכֹּ֤ן כְּבוֹד־יְהוָה֙ עַל־הַ֣ר סִינַ֔י וַיְכַסֵּ֥הוּ הֶעָנָ֖ן שֵׁ֣שֶׁת יָמִ֑ים וַיִּקְרָ֧א אֶל־מֹשֶׁ֛ה בַּיּ֥וֹם הַשְּׁבִיעִ֖י מִתּ֥וֹךְ הֶעָנָֽן׃

‎17 ‏וּמַרְאֵה֙ כְּב֣וֹד יְהוָ֔ה כְּאֵ֥שׁ אֹכֶ֖לֶת בְּרֹ֣אשׁ הָהָ֑ר לְעֵינֵ֖י בְּנֵ֥י יִשְׂרָאֵֽל׃

‎18 ‏וַיָּבֹ֥א מֹשֶׁ֛ה בְּת֥וֹךְ הֶעָנָ֖ן וַיַּ֣עַל אֶל־הָהָ֑ר וַיְהִ֤י מֹשֶׁה֙ בָּהָ֔ר אַרְבָּעִ֣ים י֔וֹם וְאַרְבָּעִ֖ים לָֽיְלָה׃ פ

1 wə’el-mōšeh ’āmar ‘ălēh ’el-yəhwâ ’atâ wə’ahărōn nāḏāḇ wa’ăḇîhû’ wəšiḇə‘îm mizziqənê yiśərā’ēl wəhišət^aḥăwîṯem mērāḥōq:

2 wənigaš mōšeh ləḇadwō ’el-yəhwâ wəhēm lō’ yigāšû wəhā‘ām lō’ y^a‘ălû ‘immwō:

3 wayyāḇō’ mōšeh wayəsapēr lā‘ām ’ēṯ kāl-diḇərê yəhwâ wə’ēṯ kāl-hammišəpāṭîm wayy^a‘an kāl-hā‘ām qwōl ’eḥāḏ wayyō’mərû kāl-hadəḇārîm ’ăšer-diber yəhwâ n^a‘ăśeh:

4 wayyiḵətōḇ mōšeh ’ēṯ kāl-diḇərê yəhwâ wayyašəkēm babōqer wayyiḇen mizəbēḥa t^aḥaṯ hâār ûšətêm ‘eśərēh maṣṣēḇâ lišənêm ‘āśār šiḇəṭê yiśərā’ēl:

5 wayyišəl^aḥ ’eṯ-n^a‘ărê bənê yiśərā’ēl wayy^a‘ălû ‘ōlōṯ wayyizəbəḥû zəḇāḥîm šəlāmîm layhwâ pārîm:

6 wayyiqq^aḥ mōšeh ḥăṣî hadām wayyāśem bā’agānōṯ w^aḥăṣî hadām zāraq ‘al-hammizəbēḥa:

7 wayyiqq^aḥ sēfer habərîṯ wayyiqərā’ bə’āzənê hā‘ām wayyō’mərû kōl ’ăšer-diber yəhwâ n^a‘ăśeh wənišəmā‘:

8 wayyiqq^aḥ mōšeh ’eṯ-hadām wayyizərōq ‘al-hā‘ām wayyō’mer hinnēh ḏam-habərîṯ ’ăšer kāraṯ yəhwâ ‘immāḵem ‘al kāl-hadəḇārîm hā’ēlleh:

9 wayy^a‘al mōšeh wə’ahărōn nāḏāḇ wa’ăḇîhû’ wəšiḇə‘îm mizziqənê yiśərā’ēl:

10 wayyirə’û ’ēṯ ’ĕlōhê yiśərā’ēl wəṯ^aḥaṯ raḡəlāyw kəm^a‘ăśēh liḇənaṯ hassapîr ûḵə‘eṣem haššāmayim lāṭōhar:

11 wə’el-’ăṣîlê bənê yiśərā’ēl lō’ šāl^aḥ yāḏwō wayyeḥĕzû ’eṯ-hā’ĕlōhîm wayyō’ḵəlû wayyišətû: s

12 wayyō’mer yəhwâ ’el-mōšeh ‘ălēh ’ēlay hâārâ wehəyēh-šām wə’etənâ ləḵā ’eṯ-luḥōṯ hā’eḇen wəhatwōrâ wəhammiṣəwâ ’ăšer kāṯaḇətî ləhwōrōṯām:

13 wayyāqām mōšeh wîhwōšu‘a məšārəṯwō wayy^a‘al mōšeh ’el-har hā’ĕlōhîm:

14 wə’el-hazzəqēnîm ’āmar šəḇû-lānû ḇāzeh ‘aḏ ’ăšer-nāšûḇ ’ălêḵem wəhinnēh ’ahărōn wəḥûr ‘immāḵem mî-ḇ^a‘al dəḇārîm yigaš ’ălēhem:

15 wayy^a‘al mōšeh ’el-hâār wayəḵas he‘ānān ’eṯ-hâār:

16 wayyišəkōn kəḇwōḏ-yəhwâ ‘al-har sînay wayəḵassēhû he‘ānān šēšeṯ yāmîm wayyiqərā’ ’el-mōšeh bayywōm haššəḇî‘î mitwōḵə he‘ānān:

17 ûmarə’ēh kəḇwōḏ yəhwâ kə’ēš ’ōḵeleṯ bərō’š hâār lə‘ênê bənê yiśərā’ēl:

18 wayyāḇō’ mōšeh bəṯwōḵə he‘ānān wayy^a‘al ’el-hâār wayəhî mōšeh bâār ’arəbā‘îm ywōm wə’arəbā‘îm lāyəlâ: f