Exodus (Shemot) Chapter 40

‎1 ‏וַיְדַבֵּ֥ר יְהוָ֖ה אֶל־מֹשֶׁ֥ה לֵּאמֹֽר׃

‎2 ‏בְּיוֹם־הַחֹ֥דֶשׁ הָרִאשׁ֖וֹן בְּאֶחָ֣ד לַחֹ֑דֶשׁ תָּקִ֕ים אֶת־מִשְׁכַּ֖ן אֹ֥הֶל מוֹעֵֽד׃

‎3 ‏וְשַׂמְתָּ֣ שָׁ֔ם אֵ֖ת אֲר֣וֹן הָעֵד֑וּת וְסַכֹּתָ֥ עַל־הָאָרֹ֖ן אֶת־הַפָּרֹֽכֶת׃

‎4 ‏וְהֵבֵאתָ֙ אֶת־הַשֻּׁלְחָ֔ן וְעָרַכְתָּ֖ אֶת־עֶרְכּ֑וֹ וְהֵבֵאתָ֙ אֶת־הַמְּנֹרָ֔ה וְהַעֲלֵיתָ֖ אֶת־נֵרֹתֶֽיהָ׃

‎5 ‏וְנָתַתָּ֞ה אֶת־מִזְבַּ֤ח הַזָּהָב֙ לִקְטֹ֔רֶת לִפְנֵ֖י אֲר֣וֹן הָעֵדֻ֑ת וְשַׂמְתָּ֛ אֶת־מָסַ֥ךְ הַפֶּ֖תַח לַמִּשְׁכָּֽן׃

‎6 ‏וְנָ֣תַתָּ֔ה אֵ֖ת מִזְבַּ֣ח הָעֹלָ֑ה לִפְנֵ֕י פֶּ֖תַח מִשְׁכַּ֥ן אֹֽהֶל־מוֹעֵֽד׃

‎7 ‏וְנָֽתַתָּ֙ אֶת־הַכִּיֹּ֔ר בֵּֽין־אֹ֥הֶל מוֹעֵ֖ד וּבֵ֣ין הַמִּזְבֵּ֑חַ וְנָתַתָּ֥ שָׁ֖ם מָֽיִם׃

‎8 ‏וְשַׂמְתָּ֥ אֶת־הֶחָצֵ֖ר סָבִ֑יב וְנָ֣תַתָּ֔ אֶת־מָסַ֖ךְ שַׁ֥עַר הֶחָצֵֽר׃

‎9 ‏וְלָקַחְתָּ֙ אֶת־שֶׁ֣מֶן הַמִּשְׁחָ֔ה וּמָשַׁחְתָּ֥ אֶת־הַמִּשְׁכָּ֖ן וְאֶת־כָּל־אֲשֶׁר־בּ֑וֹ וְקִדַּשְׁתָּ֥ אֹת֛וֹ וְאֶת־כָּל־כֵּלָ֖יו וְהָ֥יָה קֹֽדֶשׁ׃

‎10 ‏וּמָשַׁחְתָּ֛ אֶת־מִזְבַּ֥ח הָעֹלָ֖ה וְאֶת־כָּל־כֵּלָ֑יו וְקִדַּשְׁתָּ֙ אֶת־הַמִּזְבֵּ֔חַ וְהָיָ֥ה הַמִּזְבֵּ֖חַ קֹ֥דֶשׁ קָֽדָשִֽׁים׃

‎11 ‏וּמָשַׁחְתָּ֥ אֶת־הַכִּיֹּ֖ר וְאֶת־כַּנּ֑וֹ וְקִדַּשְׁתָּ֖ אֹתֽוֹ׃

‎12 ‏וְהִקְרַבְתָּ֤ אֶֽת־אַהֲרֹן֙ וְאֶת־בָּנָ֔יו אֶל־פֶּ֖תַח אֹ֣הֶל מוֹעֵ֑ד וְרָחַצְתָּ֥ אֹתָ֖ם בַּמָּֽיִם׃

‎13 ‏וְהִלְבַּשְׁתָּ֙ אֶֽת־אַהֲרֹ֔ן אֵ֖ת בִּגְדֵ֣י הַקֹּ֑דֶשׁ וּמָשַׁחְתָּ֥ אֹת֛וֹ וְקִדַּשְׁתָּ֥ אֹת֖וֹ וְכִהֵ֥ן לִֽי׃

‎14 ‏וְאֶת־בָּנָ֖יו תַּקְרִ֑יב וְהִלְבַּשְׁתָּ֥ אֹתָ֖ם כֻּתֳּנֹֽת׃

‎15 ‏וּמָשַׁחְתָּ֣ אֹתָ֗ם כַּאֲשֶׁ֤ר מָשַׁ֙חְתָּ֙ אֶת־אֲבִיהֶ֔ם וְכִהֲנ֖וּ לִ֑י וְ֠הָיְתָה לִהְיֹ֨ת לָהֶ֧ם מָשְׁחָתָ֛ם לִכְהֻנַּ֥ת עוֹלָ֖ם לְדֹרֹתָֽם׃³

‎16 ‏וַיַּ֖עַשׂ מֹשֶׁ֑ה כְּ֠כֹל אֲשֶׁ֨ר צִוָּ֧ה יְהוָ֛ה אֹת֖וֹ כֵּ֥ן עָשָֽׂה׃ ס

‎17 ‏וַיְהִ֞י בַּחֹ֧דֶשׁ הָרִאשׁ֛וֹן בַּשָּׁנָ֥ה הַשֵּׁנִ֖ית בְּאֶחָ֣ד לַחֹ֑דֶשׁ הוּקַ֖ם הַמִּשְׁכָּֽן׃

‎18 ‏וַיָּ֨קֶם מֹשֶׁ֜ה אֶת־הַמִּשְׁכָּ֗ן וַיִּתֵּן֙ אֶת־אֲדָנָ֔יו וַיָּ֙שֶׂם֙ אֶת־קְרָשָׁ֔יו וַיִּתֵּ֖ן אֶת־בְּרִיחָ֑יו וַיָּ֖קֶם אֶת־עַמּוּדָֽיו׃

‎19 ‏וַיִּפְרֹ֤שׂ אֶת־הָאֹ֙הֶל֙ עַל־הַמִּשְׁכָּ֔ן וַיָּ֜שֶׂם אֶת־מִכְסֵ֥ה הָאֹ֛הֶל עָלָ֖יו מִלְמָ֑עְלָה כַּאֲשֶׁ֛ר צִוָּ֥ה יְהוָ֖ה אֶת־מֹשֶֽׁה׃ ס

‎20 ‏וַיִּקַּ֞ח וַיִּתֵּ֤ן אֶת־הָעֵדֻת֙ אֶל־הָ֣אָרֹ֔ן וַיָּ֥שֶׂם אֶת־הַבַּדִּ֖ים עַל־הָאָרֹ֑ן וַיִּתֵּ֧ן אֶת־הַכַּפֹּ֛רֶת עַל־הָאָרֹ֖ן מִלְמָֽעְלָה׃

‎21 ‏וַיָּבֵ֣א אֶת־הָאָרֹן֮ אֶל־הַמִּשְׁכָּן֒ וַיָּ֗שֶׂם אֵ֚ת פָּרֹ֣כֶת הַמָּסָ֔ךְ וַיָּ֕סֶךְ עַ֖ל אֲר֣וֹן הָעֵד֑וּת כַּאֲשֶׁ֛ר צִוָּ֥ה יְהוָ֖ה אֶת־מֹשֶֽׁה׃ ס

‎22 ‏וַיִּתֵּ֤ן אֶת־הַשֻּׁלְחָן֙ בְּאֹ֣הֶל מוֹעֵ֔ד עַ֛ל יֶ֥רֶךְ הַמִּשְׁכָּ֖ן צָפֹ֑נָה מִח֖וּץ לַפָּרֹֽכֶת׃

‎23 ‏וַיַּעֲרֹ֥ךְ עָלָ֛יו עֵ֥רֶךְ לֶ֖חֶם לִפְנֵ֣י יְהוָ֑ה כַּאֲשֶׁ֛ר צִוָּ֥ה יְהוָ֖ה אֶת־מֹשֶֽׁה׃ ס

‎24 ‏וַיָּ֤שֶׂם אֶת־הַמְּנֹרָה֙ בְּאֹ֣הֶל מוֹעֵ֔ד נֹ֖כַח הַשֻּׁלְחָ֑ן עַ֛ל יֶ֥רֶךְ הַמִּשְׁכָּ֖ן נֶֽגְבָּה׃

‎25 ‏וַיַּ֥עַל הַנֵּרֹ֖ת לִפְנֵ֣י יְהוָ֑ה כַּאֲשֶׁ֛ר צִוָּ֥ה יְהוָ֖ה אֶת־מֹשֶֽׁה׃ ס

‎26 ‏וַיָּ֛שֶׂם אֶת־מִזְבַּ֥ח הַזָּהָ֖ב בְּאֹ֣הֶל מוֹעֵ֑ד לִפְנֵ֖י הַפָּרֹֽכֶת׃

‎27 ‏וַיַּקְטֵ֥ר עָלָ֖יו קְטֹ֣רֶת סַמִּ֑ים כַּאֲשֶׁ֛ר צִוָּ֥ה יְהוָ֖ה אֶת־מֹשֶֽׁה׃ פ

‎28 ‏וַיָּ֛שֶׂם אֶת־מָסַ֥ךְ הַפֶּ֖תַח לַמִּשְׁכָּֽן׃

‎29 ‏וְאֵת֙ מִזְבַּ֣ח הָעֹלָ֔ה שָׂ֕ם פֶּ֖תַח מִשְׁכַּ֣ן אֹֽהֶל־מוֹעֵ֑ד וַיַּ֣עַל עָלָ֗יו אֶת־הָעֹלָה֙ וְאֶת־הַמִּנְחָ֔ה כַּאֲשֶׁ֛ר צִוָּ֥ה יְהוָ֖ה אֶת־מֹשֶֽׁה׃ ס

‎30 ‏וַיָּ֙שֶׂם֙ אֶת־הַכִּיֹּ֔ר בֵּֽין־אֹ֥הֶל מוֹעֵ֖ד וּבֵ֣ין הַמִּזְבֵּ֑חַ וַיִּתֵּ֥ן שָׁ֛מָּה מַ֖יִם לְרָחְצָֽה׃

‎31 ‏וְרָחֲצ֣וּ מִמֶּ֔נּוּ מֹשֶׁ֖ה וְאַהֲרֹ֣ן וּבָנָ֑יו אֶת־יְדֵיהֶ֖ם וְאֶת־רַגְלֵיהֶֽם׃

‎32 ‏בְּבֹאָ֞ם אֶל־אֹ֣הֶל מוֹעֵ֗ד וּבְקָרְבָתָ֛ם אֶל־הַמִּזְבֵּ֖חַ יִרְחָ֑צוּ כַּאֲשֶׁ֛ר צִוָּ֥ה יְהוָ֖ה אֶת־מֹשֶֽׁה׃ ס

‎33 ‏וַיָּ֣קֶם אֶת־הֶחָצֵ֗ר סָבִיב֙ לַמִּשְׁכָּ֣ן וְלַמִּזְבֵּ֔חַ וַיִּתֵּ֕ן אֶת־מָסַ֖ךְ שַׁ֣עַר הֶחָצֵ֑ר וַיְכַ֥ל מֹשֶׁ֖ה אֶת־הַמְּלָאכָֽה׃ פ

‎34 ‏וַיְכַ֥ס הֶעָנָ֖ן אֶת־אֹ֣הֶל מוֹעֵ֑ד וּכְב֣וֹד יְהוָ֔ה מָלֵ֖א אֶת־הַמִּשְׁכָּֽן׃

‎35 ‏וְלֹא־יָכֹ֣ל מֹשֶׁ֗ה לָבוֹא֙ אֶל־אֹ֣הֶל מוֹעֵ֔ד כִּֽי־שָׁכַ֥ן עָלָ֖יו הֶעָנָ֑ן וּכְב֣וֹד יְהוָ֔ה מָלֵ֖א אֶת־הַמִּשְׁכָּֽן׃

‎36 ‏וּבְהֵעָל֤וֹת הֶֽעָנָן֙ מֵעַ֣ל הַמִּשְׁכָּ֔ן יִסְע֖וּ בְּנֵ֣י יִשְׂרָאֵ֑ל בְּכֹ֖ל מַסְעֵיהֶֽם׃

‎37 ‏וְאִם־לֹ֥א יֵעָלֶ֖ה הֶעָנָ֑ן וְלֹ֣א יִסְע֔וּ עַד־י֖וֹם הֵעָלֹתֽוֹ׃

‎38 ‏כִּי֩ עֲנַ֨ן יְהוָ֤ה עַֽל־הַמִּשְׁכָּן֙ יוֹמָ֔ם וְאֵ֕שׁ תִּהְיֶ֥ה לַ֖יְלָה בּ֑וֹ לְעֵינֵ֥י כָל־בֵּֽית־יִשְׂרָאֵ֖ל בְּכָל־מַסְעֵיהֶֽם׃

1 wayəḏabēr yəhwâ ’el-mōšeh llē’mōr:

2 bəywōm-h^aḥōḏeš hāri’šwōn bə’eḥāḏ l^aḥōḏeš tāqîm ’eṯ-mišəkan ’ōhel mwō‘ēḏ:

3 wəśamətā šām ’ēṯ ’ărwōn hā‘ēḏûṯ wəsakōṯā ‘al-hā’ārōn ’eṯ-hapārōḵeṯ:

4 wəhēḇē’ṯā ’eṯ-haššuləḥān wə‘āraḵətā ’eṯ-‘erəkwō wəhēḇē’ṯā ’eṯ-hammənōrâ wəh^a‘ălêṯā ’eṯ-nērōṯeyhā:

5 wənāṯatâ ’eṯ-mizəb^aḥ hazzâāḇ liqəṭōreṯ lifənê ’ărwōn hā‘ēḏuṯ wəśamətā ’eṯ-māsaḵə hapeṯ^aḥ lammišəkān:

6 wənāṯatâ ’ēṯ mizəb^aḥ hā‘ōlâ lifənê peṯ^aḥ mišəkan ’ōhel-mwō‘ēḏ:

7 wənāṯatā ’eṯ-hakîyōr bên-’ōhel mwō‘ēḏ ûḇên hammizəbēḥa wənāṯatā šām māyim:

8 wəśamətā ’eṯ-heḥāṣēr sāḇîḇ wənāṯatā ’eṯ-māsaḵə š^a‘ar heḥāṣēr:

9 wəlāq^aḥətā ’eṯ-šemen hammišəḥâ ûmāš^aḥətā ’eṯ-hammišəkān wə’eṯ-kāl-’ăšer-bwō wəqidašətā ’ōṯwō wə’eṯ-kāl-kēlāyw wəhāyâ qōḏeš:

10 ûmāš^aḥətā ’eṯ-mizəb^aḥ hā‘ōlâ wə’eṯ-kāl-kēlāyw wəqidašətā ’eṯ-hammizəbēḥa wəhāyâ hammizəbēḥa qōḏeš qāḏāšîm:

11 ûmāš^aḥətā ’eṯ-hakîyōr wə’eṯ-kannwō wəqidašətā ’ōṯwō:

12 wəhiqəraḇətā ’eṯ-’ahărōn wə’eṯ-bānāyw ’el-peṯ^aḥ ’ōhel mwō‘ēḏ wərāḥaṣətā ’ōṯām bammāyim:

13 wəhiləbašətā ’eṯ-’ahărōn ’ēṯ biḡəḏê haqqōḏeš ûmāš^aḥətā ’ōṯwō wəqidašətā ’ōṯwō wəḵihēn lî:

14 wə’eṯ-bānāyw taqərîḇ wəhiləbašətā ’ōṯām kutŏnōṯ:

15 ûmāš^aḥətā ’ōṯām ka’ăšer māš^aḥətā ’eṯ-’ăḇîhem wəḵihănû lî wəhāyəṯâ lihəyōṯ lâem māšəḥāṯām liḵəhunnaṯ ‘wōlām ləḏōrōṯām:³

16 wayy^a‘aś mōšeh kəḵōl ’ăšer ṣiûâ yəhwâ ’ōṯwō kēn ‘āśâ: s

17 wayəhî b^aḥōḏeš hāri’šwōn baššānâ haššēnîṯ bə’eḥāḏ l^aḥōḏeš hûqam hammišəkān:

18 wayyāqem mōšeh ’eṯ-hammišəkān wayyitēn ’eṯ-’ăḏānāyw wayyāśem ’eṯ-qərāšāyw wayyitēn ’eṯ-bərîḥāyw wayyāqem ’eṯ-‘ammûḏāyw:

19 wayyifərōś ’eṯ-hā’ōhel ‘al-hammišəkān wayyāśem ’eṯ-miḵəsēh hā’ōhel ‘ālāyw miləmā‘əlâ ka’ăšer ṣiûâ yəhwâ ’eṯ-mōšeh: s

20 wayyiqq^aḥ wayyitēn ’eṯ-hā‘ēḏuṯ ’el-hā’ārōn wayyāśem ’eṯ-habadîm ‘al-hā’ārōn wayyitēn ’eṯ-hakapōreṯ ‘al-hā’ārōn miləmā‘əlâ:

21 wayyāḇē’ ’eṯ-hā’ārōn ’el-hammišəkān wayyāśem ’ēṯ pārōḵeṯ hammāsāḵə wayyāseḵə ‘al ’ărwōn hā‘ēḏûṯ ka’ăšer ṣiûâ yəhwâ ’eṯ-mōšeh: s

22 wayyitēn ’eṯ-haššuləḥān bə’ōhel mwō‘ēḏ ‘al yereḵə hammišəkān ṣāfōnâ miḥûṣ lapārōḵeṯ:

23 wayy^a‘ărōḵə ‘ālāyw ‘ēreḵə leḥem lifənê yəhwâ ka’ăšer ṣiûâ yəhwâ ’eṯ-mōšeh: s

24 wayyāśem ’eṯ-hammənōrâ bə’ōhel mwō‘ēḏ nōḵ^aḥ haššuləḥān ‘al yereḵə hammišəkān neḡəbâ:

25 wayy^a‘al hannērōṯ lifənê yəhwâ ka’ăšer ṣiûâ yəhwâ ’eṯ-mōšeh: s

26 wayyāśem ’eṯ-mizəb^aḥ hazzâāḇ bə’ōhel mwō‘ēḏ lifənê hapārōḵeṯ:

27 wayyaqəṭēr ‘ālāyw qəṭōreṯ sammîm ka’ăšer ṣiûâ yəhwâ ’eṯ-mōšeh: f

28 wayyāśem ’eṯ-māsaḵə hapeṯ^aḥ lammišəkān:

29 wə’ēṯ mizəb^aḥ hā‘ōlâ śām peṯ^aḥ mišəkan ’ōhel-mwō‘ēḏ wayy^a‘al ‘ālāyw ’eṯ-hā‘ōlâ wə’eṯ-hamminəḥâ ka’ăšer ṣiûâ yəhwâ ’eṯ-mōšeh: s

30 wayyāśem ’eṯ-hakîyōr bên-’ōhel mwō‘ēḏ ûḇên hammizəbēḥa wayyitēn šāmmâ mayim lərāḥəṣâ:

31 wərāḥăṣû mimmennû mōšeh wə’ahărōn ûḇānāyw ’eṯ-yəḏêhem wə’eṯ-raḡəlêhem:

32 bəḇō’ām ’el-’ōhel mwō‘ēḏ ûḇəqārəḇāṯām ’el-hammizəbēḥa yirəḥāṣû ka’ăšer ṣiûâ yəhwâ ’eṯ-mōšeh: s

33 wayyāqem ’eṯ-heḥāṣēr sāḇîḇ lammišəkān wəlammizəbēḥa wayyitēn ’eṯ-māsaḵə š^a‘ar heḥāṣēr wayəḵal mōšeh ’eṯ-hamməlā’ḵâ: f

34 wayəḵas he‘ānān ’eṯ-’ōhel mwō‘ēḏ ûḵəḇwōḏ yəhwâ mālē’ ’eṯ-hammišəkān:

35 wəlō’-yāḵōl mōšeh lāḇwō’ ’el-’ōhel mwō‘ēḏ kî-šāḵan ‘ālāyw he‘ānān ûḵəḇwōḏ yəhwâ mālē’ ’eṯ-hammišəkān:

36 ûḇəhē‘ālwōṯ he‘ānān mē‘al hammišəkān yisə‘û bənê yiśərā’ēl bəḵōl masə‘êhem:

37 wə’im-lō’ yē‘āleh he‘ānān wəlō’ yisə‘û ‘aḏ-ywōm hē‘ālōṯwō:

38 kî ‘ănan yəhwâ ‘al-hammišəkān ywōmām wə’ēš tihəyeh layəlâ bwō lə‘ênê ḵāl-bêṯ-yiśərā’ēl bəḵāl-masə‘êhem: