Leviticus (Vayikra) Chapter 1

‎1 ‏וַיִּקְרָ֖א אֶל־מֹשֶׁ֑ה וַיְדַבֵּ֤ר יְהוָה֙ אֵלָ֔יו מֵאֹ֥הֶל מוֹעֵ֖ד לֵאמֹֽר׃

‎2 ‏דַּבֵּ֞ר אֶל־בְּנֵ֤י יִשְׂרָאֵל֙ וְאָמַרְתָּ֣ אֲלֵהֶ֔ם אָדָ֗ם כִּֽי־יַקְרִ֥יב מִכֶּ֛ם קָרְבָּ֖ן לַֽיהוָ֑ה מִן־הַבְּהֵמָ֗ה מִן־הַבָּקָר֙ וּמִן־הַצֹּ֔אן תַּקְרִ֖יבוּ אֶת־קָרְבַּנְכֶֽם׃

‎3 ‏אִם־עֹלָ֤ה קָרְבָּנוֹ֙ מִן־הַבָּקָ֔ר זָכָ֥ר תָּמִ֖ים יַקְרִיבֶ֑נּוּ אֶל־פֶּ֝תַח¹ אֹ֤הֶל מוֹעֵד֙ יַקְרִ֣יב אֹת֔וֹ לִרְצֹנ֖וֹ לִפְנֵ֥י יְהוָֽה׃

‎4 ‏וְסָמַ֣ךְ יָד֔וֹ עַ֖ל רֹ֣אשׁ הָעֹלָ֑ה וְנִרְצָ֥ה ל֖וֹ לְכַפֵּ֥ר עָלָֽיו׃

‎5 ‏וְשָׁחַ֛ט אֶת־בֶּ֥ן הַבָּקָ֖ר לִפְנֵ֣י יְהוָ֑ה וְ֠הִקְרִיבוּ בְּנֵ֨י אַהֲרֹ֤ן הַֽכֹּֽהֲנִים֙ אֶת־הַדָּ֔ם וְזָרְק֨וּ אֶת־הַדָּ֤ם עַל־הַמִּזְבֵּ֙חַ֙ סָבִ֔יב אֲשֶׁר־פֶּ֖תַח אֹ֥הֶל מוֹעֵֽד׃

‎6 ‏וְהִפְשִׁ֖יט אֶת־הָעֹלָ֑ה וְנִתַּ֥ח אֹתָ֖הּ לִנְתָחֶֽיהָ׃

‎7 ‏וְ֠נָתְנוּ בְּנֵ֨י אַהֲרֹ֧ן הַכֹּהֵ֛ן אֵ֖שׁ עַל־הַמִּזְבֵּ֑חַ וְעָרְכ֥וּ עֵצִ֖ים עַל־הָאֵֽשׁ׃

‎8 ‏וְעָרְכ֗וּ בְּנֵ֤י אַהֲרֹן֙ הַכֹּ֣הֲנִ֔ים אֵ֚ת הַנְּתָחִ֔ים אֶת־הָרֹ֖אשׁ וְאֶת־הַפָּ֑דֶר עַל־הָעֵצִים֙ אֲשֶׁ֣ר עַל־הָאֵ֔שׁ אֲשֶׁ֖ר עַל־הַמִּזְבֵּֽחַ׃

‎9 ‏וְקִרְבּ֥וֹ וּכְרָעָ֖יו יִרְחַ֣ץ בַּמָּ֑יִם וְהִקְטִ֨יר הַכֹּהֵ֤ן אֶת־הַכֹּל֙ הַמִּזְבֵּ֔חָה עֹלָ֛ה אִשֵּׁ֥ה רֵֽיחַ־נִיח֖וֹחַ לַֽיהוָֽה׃ ס

‎10 ‏וְאִם־מִן־הַצֹּ֨אן קָרְבָּנ֧וֹ מִן־הַכְּשָׂבִ֛ים א֥וֹ מִן־הָעִזִּ֖ים לְעֹלָ֑ה זָכָ֥ר תָּמִ֖ים יַקְרִיבֶֽנּוּ׃

‎11 ‏וְשָׁחַ֨ט אֹת֜וֹ עַ֣ל יֶ֧רֶךְ הַמִּזְבֵּ֛חַ צָפֹ֖נָה לִפְנֵ֣י יְהוָ֑ה וְזָרְק֡וּ בְּנֵי֩ אַהֲרֹ֨ן הַכֹּהֲנִ֧ים אֶת־דָּמ֛וֹ עַל־הַמִּזְבֵּ֖חַ סָבִֽיב׃

‎12 ‏וְנִתַּ֤ח אֹתוֹ֙ לִנְתָחָ֔יו וְאֶת־רֹאשׁ֖וֹ וְאֶת־פִּדְר֑וֹ וְעָרַ֤ךְ הַכֹּהֵן֙ אֹתָ֔ם עַל־הָֽעֵצִים֙ אֲשֶׁ֣ר עַל־הָאֵ֔שׁ אֲשֶׁ֖ר עַל־הַמִּזְבֵּֽחַ׃

‎13 ‏וְהַקֶּ֥רֶב וְהַכְּרָעַ֖יִם יִרְחַ֣ץ בַּמָּ֑יִם וְהִקְרִ֨יב הַכֹּהֵ֤ן אֶת־הַכֹּל֙ וְהִקְטִ֣יר הַמִּזְבֵּ֔חָה עֹלָ֣ה ה֗וּא אִשֵּׁ֛ה רֵ֥יחַ נִיחֹ֖חַ לַיהוָֽה׃ פ

‎14 ‏וְאִ֧ם מִן־הָע֛וֹף עֹלָ֥ה קָרְבָּנ֖וֹ לַֽיהוָ֑ה וְהִקְרִ֣יב מִן־הַתֹּרִ֗ים א֛וֹ מִן־בְּנֵ֥י הַיּוֹנָ֖ה אֶת־קָרְבָּנֽוֹ׃

‎15 ‏וְהִקְרִיב֤וֹ הַכֹּהֵן֙ אֶל־הַמִּזְבֵּ֔חַ וּמָלַק֙ אֶת־רֹאשׁ֔וֹ וְהִקְטִ֖יר הַמִּזְבֵּ֑חָה וְנִמְצָ֣ה דָמ֔וֹ עַ֖ל קִ֥יר הַמִּזְבֵּֽחַ׃

‎16 ‏וְהֵסִ֥יר אֶת־מֻרְאָת֖וֹ בְּנֹצָתָ֑הּ וְהִשְׁלִ֨יךְ אֹתָ֜הּ אֵ֤צֶל הַמִּזְבֵּ֙חַ֙ קֵ֔דְמָה אֶל־מְק֖וֹם הַדָּֽשֶׁן׃

‎17 ‏וְשִׁסַּ֨ע אֹת֣וֹ בִכְנָפָיו֮ לֹ֣א יַבְדִּיל֒ וְהִקְטִ֨יר אֹת֤וֹ הַכֹּהֵן֙ הַמִּזְבֵּ֔חָה עַל־הָעֵצִ֖ים אֲשֶׁ֣ר עַל־הָאֵ֑שׁ עֹלָ֣ה ה֗וּא אִשֵּׁ֛ה רֵ֥יחַ נִיחֹ֖חַ לַיהוָֽה׃ ס

1 wayyiqərā’ ’el-mōšeh wayəḏabēr yəhwâ ’ēlāyw mē’ōhel mwō‘ēḏ lē’mōr:

2 dabēr ’el-bənê yiśərā’ēl wə’āmarətā ’ălēhem ’āḏām kî-yaqərîḇ mikem qārəbān layhwâ min-habəhēmâ min-habāqār ûmin-haṣṣō’n taqərîḇû ’eṯ-qārəbanəḵem:

3 ’im-‘ōlâ qārəbānwō min-habāqār zāḵār tāmîm yaqərîḇennû ’el-peṯ^aḥ¹ ’ōhel mwō‘ēḏ yaqərîḇ ’ōṯwō lirəṣōnwō lifənê yəhwâ:

4 wəsāmaḵə yāḏwō ‘al rō’š hā‘ōlâ wənirəṣâ lwō ləḵapēr ‘ālāyw:

5 wəšāḥaṭ ’eṯ-ben habāqār lifənê yəhwâ wəhiqərîḇû bənê ’ahărōn hakōhănîm ’eṯ-hadām wəzārəqû ’eṯ-hadām ‘al-hammizəbēḥa sāḇîḇ ’ăšer-peṯ^aḥ ’ōhel mwō‘ēḏ:

6 wəhifəšîṭ ’eṯ-hā‘ōlâ wənit^aḥ ’ōṯāh linəṯāḥeyhā:

7 wənāṯənû bənê ’ahărōn hakōhēn ’ēš ‘al-hammizəbēḥa wə‘ārəḵû ‘ēṣîm ‘al-hā’ēš:

8 wə‘ārəḵû bənê ’ahărōn hakōhănîm ’ēṯ hannəṯāḥîm ’eṯ-hārō’š wə’eṯ-hapāḏer ‘al-hā‘ēṣîm ’ăšer ‘al-hā’ēš ’ăšer ‘al-hammizəbēḥa:

9 wəqirəbwō ûḵərā‘āyw yirəḥaṣ bammāyim wəhiqəṭîr hakōhēn ’eṯ-hakōl hammizəbēḥâ ‘ōlâ ’iššēh rêḥa-nîḥwōḥa layhwâ: s

10 wə’im-min-haṣṣō’n qārəbānwō min-hakəśāḇîm ’wō min-hā‘izzîm lə‘ōlâ zāḵār tāmîm yaqərîḇennû:

11 wəšāḥaṭ ’ōṯwō ‘al yereḵə hammizəbēḥa ṣāfōnâ lifənê yəhwâ wəzārəqû bənê ’ahărōn hakōhănîm ’eṯ-dāmwō ‘al-hammizəbēḥa sāḇîḇ:

12 wənit^aḥ ’ōṯwō linəṯāḥāyw wə’eṯ-rō’šwō wə’eṯ-piḏərwō wə‘āraḵə hakōhēn ’ōṯām ‘al-hā‘ēṣîm ’ăšer ‘al-hā’ēš ’ăšer ‘al-hammizəbēḥa:

13 wəhaqqereḇ wəhakərā‘ayim yirəḥaṣ bammāyim wəhiqərîḇ hakōhēn ’eṯ-hakōl wəhiqəṭîr hammizəbēḥâ ‘ōlâ hû’ ’iššēh rêḥa nîḥōḥa layhwâ: f

14 wə’im min-hā‘wōf ‘ōlâ qārəbānwō layhwâ wəhiqərîḇ min-hatōrîm ’wō min-bənê hayywōnâ ’eṯ-qārəbānwō:

15 wəhiqərîḇwō hakōhēn ’el-hammizəbēḥa ûmālaq ’eṯ-rō’šwō wəhiqəṭîr hammizəbēḥâ wəniməṣâ ḏāmwō ‘al qîr hammizəbēḥa:

16 wəhēsîr ’eṯ-murə’āṯwō bənōṣāṯāh wəhišəlîḵə ’ōṯāh ’ēṣel hammizəbēḥa qēḏəmâ ’el-məqwōm hadāšen:

17 wəšiss^a‘ ’ōṯwō ḇiḵənāfāyw lō’ yaḇədîl wəhiqəṭîr ’ōṯwō hakōhēn hammizəbēḥâ ‘al-hā‘ēṣîm ’ăšer ‘al-hā’ēš ‘ōlâ hû’ ’iššēh rêḥa nîḥōḥa layhwâ: s