Ezekiel (Yechezqel) Chapter 8

‎1 ‏וַיְהִ֣י׀ בַּשָּׁנָ֣ה הַשִּׁשִּׁ֗ית בַּשִּׁשִּׁי֙ בַּחֲמִשָּׁ֣ה לַחֹ֔דֶשׁ אֲנִי֙ יוֹשֵׁ֣ב בְּבֵיתִ֔י וְזִקְנֵ֥י יְהוּדָ֖ה יוֹשְׁבִ֣ים לְפָנָ֑י וַתִּפֹּ֤ל עָלַי֙ שָׁ֔ם יַ֖ד אֲדֹנָ֥י יְהוִֹֽה׃

‎2 ‏וָאֶרְאֶ֗ה וְהִנֵּ֤ה דְמוּת֙ כְּמַרְאֵה־אֵ֔שׁ מִמַּרְאֵ֥ה מָתְנָ֛יו וּלְמַ֖טָּה אֵ֑שׁ וּמִמָּתְנָ֣יו וּלְמַ֔עְלָה כְּמַרְאֵה־זֹ֖הַר כְּעֵ֥ין הַחַשְׁמַֽלָה׃

‎3 ‏וַיִּשְׁלַח֙ תַּבְנִ֣ית יָ֔ד וַיִּקָּחֵ֖נִי בְּצִיצִ֣ת רֹאשִׁ֑י וַתִּשָּׂ֣א אֹתִ֣י ר֣וּחַ׀ בֵּֽין־הָאָ֣רֶץ וּבֵ֣ין הַשָּׁמַ֡יִם וַתָּבֵא֩ אֹתִ֨י יְרוּשָׁלְַ֜מָה בְּמַרְא֣וֹת אֱלֹהִ֗ים אֶל־פֶּ֜תַח שַׁ֤עַר הַפְּנִימִית֙ הַפּוֹנֶ֣ה צָפ֔וֹנָה אֲשֶׁר־שָׁ֣ם מוֹשַׁ֔ב סֵ֖מֶל הַקִּנְאָ֥ה הַמַּקְנֶֽה׃

‎4 ‏וְהִ֨נֵּה־שָׁ֔ם כְּב֖וֹד אֱלֹהֵ֣י יִשְׂרָאֵ֑ל כַּמַּרְאֶ֕ה אֲשֶׁ֥ר רָאִ֖יתִי בַּבִּקְעָֽה׃

‎5 ‏וַיֹּ֣אמֶר אֵלַ֔י בֶּן־אָדָ֕ם שָׂא־נָ֥א עֵינֶ֖יךָ דֶּ֣רֶךְ צָפ֑וֹנָה וָאֶשָּׂ֤א עֵינַי֙ דֶּ֣רֶךְ צָפ֔וֹנָה וְהִנֵּ֤ה מִצָּפוֹן֙ לְשַׁ֣עַר הַמִּזְבֵּ֔חַ סֵ֛מֶל הַקִּנְאָ֥ה הַזֶּ֖ה בַּבִּאָֽה׃

‎6 ‏וַיֹּ֣אמֶר אֵלַ֔י בֶּן־אָדָ֕ם הֲרֹאֶ֥ה אַתָּ֖ה מהם מָ֣ה הֵ֣ם עֹשִׂ֑ים תּוֹעֵב֨וֹת גְּדֹל֜וֹת אֲשֶׁ֥ר בֵּֽית־יִשְׂרָאֵ֣ל׀ עֹשִׂ֣ים פֹּ֗ה לְרָֽחֳקָה֙ מֵעַ֣ל מִקְדָּשִׁ֔י וְעוֹד֙ תָּשׁ֣וּב תִּרְאֶ֔ה תּוֹעֵב֖וֹת גְּדֹלֽוֹת׃ ס

‎7 ‏וַיָּבֵ֥א אֹתִ֖י אֶל־פֶּ֣תַח הֶֽחָצֵ֑ר וָאֶרְאֶ֕ה וְהִנֵּ֥ה חֹר־אֶחָ֖ד בַּקִּֽיר׃

‎8 ‏וַיֹּ֣אמֶר אֵלַ֔י בֶּן־אָדָ֖ם חֲתָר־נָ֣א בַקִּ֑יר וָאֶחְתֹּ֣ר בַּקִּ֔יר וְהִנֵּ֖ה פֶּ֥תַח אֶחָֽד׃

‎9 ‏וַיֹּ֖אמֶר אֵלָ֑י בֹּ֤א וּרְאֵה֙ אֶת־הַתּוֹעֵב֣וֹת הָרָע֔וֹת אֲשֶׁ֛ר הֵ֥ם עֹשִׂ֖ים פֹּֽה׃

‎10 ‏וָאָבוֹא֮ וָֽאֶרְאֶה֒ וְהִנֵּ֨ה כָל־תַּבְנִ֜ית רֶ֤מֶשׂ וּבְהֵמָה֙ שֶׁ֔קֶץ וְכָל־גִּלּוּלֵ֖י³ בֵּ֣ית יִשְׂרָאֵ֑ל מְחֻקֶּ֥ה עַל־הַקִּ֖יר סָבִ֥יב׀ סָבִֽיב׃

‎11 ‏וְשִׁבְעִ֣ים אִ֣ישׁ מִזִּקְנֵ֣י בֵֽית־יִ֠שְׂרָאֵל וְיַאֲזַנְיָ֨הוּ בֶן־שָׁפָ֜ן עֹמֵ֤ד בְּתוֹכָם֙ עֹמְדִ֣ים לִפְנֵיהֶ֔ם וְאִ֥ישׁ מִקְטַרְתּ֖וֹ בְּיָד֑וֹ וַעֲתַ֥ר עֲנַֽן־הַקְּטֹ֖רֶת עֹלֶֽה׃

‎12 ‏וַיֹּ֣אמֶר אֵלַי֮ הֲרָאִ֣יתָ בֶן־אָדָם֒ אֲשֶׁ֨ר זִקְנֵ֤י בֵֽית־יִשְׂרָאֵל֙ עֹשִׂ֣ים בַּחֹ֔שֶׁךְ אִ֖ישׁ בְּחַדְרֵ֣י מַשְׂכִּית֑וֹ כִּ֣י אֹמְרִ֗ים אֵ֤ין יְהוָה֙ רֹאֶ֣ה אֹתָ֔נוּ עָזַ֥ב יְהוָ֖ה אֶת־הָאָֽרֶץ׃

‎13 ‏וַיֹּ֖אמֶר אֵלָ֑י ע֣וֹד תָּשׁ֥וּב תִּרְאֶ֛ה תּוֹעֵב֥וֹת גְּדֹל֖וֹת אֲשֶׁר־הֵ֥מָּה עֹשִֽׂים׃

‎14 ‏וַיָּבֵ֣א אֹתִ֗י אֶל־פֶּ֙תַח֙ שַׁ֣עַר בֵּית־יְהוָ֔ה אֲשֶׁ֖ר אֶל־הַצָּפ֑וֹנָה וְהִנֵּה־שָׁם֙ הַנָּשִׁ֣ים יֹֽשְׁב֔וֹת מְבַכּ֖וֹת אֶת־הַתַּמּֽוּז׃ ס

‎15 ‏וַיֹּ֥אמֶר אֵלַ֖י הֲרָאִ֣יתָ בֶן־אָדָ֑ם ע֣וֹד תָּשׁ֥וּב תִּרְאֶ֛ה תּוֹעֵב֥וֹת גְּדֹל֖וֹת מֵאֵֽלֶּה׃

‎16 ‏וַיָּבֵ֣א אֹתִ֗י אֶל־חֲצַ֣ר בֵּית־יְהוָה֮ הַפְּנִימִית֒ וְהִנֵּה־פֶ֜תַח הֵיכַ֣ל יְהוָ֗ה בֵּ֤ין הָֽאוּלָם֙ וּבֵ֣ין הַמִּזְבֵּ֔חַ כְּעֶשְׂרִ֥ים וַחֲמִשָּׁ֖ה אִ֑ישׁ אֲחֹ֨רֵיהֶ֜ם אֶל־הֵיכַ֤ל יְהוָה֙ וּפְנֵיהֶ֣ם קֵ֔דְמָה וְהֵ֛מָּה מִשְׁתַּחֲוִיתֶ֥ם קֵ֖דְמָה לַשָּֽׁמֶשׁ׃

‎17 ‏וַיֹּ֣אמֶר אֵלַי֮ הֲרָאִ֣יתָ בֶן־אָדָם֒ הֲנָקֵל֙ לְבֵ֣ית יְהוּדָ֔ה מֵעֲשׂ֕וֹת אֶת־הַתּוֹעֵב֖וֹת אֲשֶׁ֣ר עָֽשׂוּ־פֹ֑ה כִּֽי־מָלְא֨וּ אֶת־הָאָ֜רֶץ חָמָ֗ס וַיָּשֻׁ֙בוּ֙ לְהַכְעִיסֵ֔נִי וְהִנָּ֛ם שֹׁלְחִ֥ים אֶת־הַזְּמוֹרָ֖ה אֶל־אַפָּֽם׃

‎18 ‏וְגַם־אֲנִי֙ אֶעֱשֶׂ֣ה בְחֵמָ֔ה לֹֽא־תָח֥וֹס עֵינִ֖י וְלֹ֣א אֶחְמֹ֑ל וְקָרְא֤וּ בְאָזְנַי֙ ק֣וֹל גָּד֔וֹל וְלֹ֥א אֶשְׁמַ֖ע אוֹתָֽם׃

1 wayəhî| baššānâ haššiššîṯ baššiššî b^aḥămiššâ l^aḥōḏeš ’ănî ywōšēḇ bəḇêṯî wəziqənê yəhûḏâ ywōšəḇîm ləfānāy watipōl ‘ālay šām yaḏ ’ăḏōnāy yəhwōih:

2 wā’erə’eh wəhinnēh ḏəmûṯ kəmarə’ēh-’ēš mimmarə’ēh māṯənāyw ûləmaṭṭâ ’ēš ûmimmāṯənāyw ûləm^a‘əlâ kəmarə’ēh-zōhar kə‘ên h^aḥašəmalâ:

3 wayyišəl^aḥ taḇənîṯ yāḏ wayyiqqāḥēnî bəṣîṣiṯ rō’šî watiśśā’ ’ōṯî rûḥa| bên-hā’āreṣ ûḇên haššāmayim watāḇē’ ’ōṯî yərûšālaəmâ bəmarə’wōṯ ’ĕlōhîm ’el-peṯ^aḥ š^a‘ar hapənîmîṯ hapwōneh ṣāfwōnâ ’ăšer-šām mwōšaḇ sēmel haqqinə’â hammaqəneh:

4 wəhinnēh-šām kəḇwōḏ ’ĕlōhê yiśərā’ēl kammarə’eh ’ăšer rā’îṯî babiqə‘â:

5 wayyō’mer ’ēlay ben-’āḏām śā’-nā’ ‘êneyḵā dereḵə ṣāfwōnâ wā’eśśā’ ‘ênay dereḵə ṣāfwōnâ wəhinnēh miṣṣāfwōn ləš^a‘ar hammizəbēḥa sēmel haqqinə’â hazzeh babi’â:

6 wayyō’mer ’ēlay ben-’āḏām hărō’eh ’atâ mēhem mâ hēm ‘ōśîm twō‘ēḇwōṯ gəḏōlwōṯ ’ăšer bêṯ-yiśərā’ēl| ‘ōśîm pōh lərāḥŏqâ mē‘al miqədāšî wə‘wōḏ tāšûḇ tirə’eh twō‘ēḇwōṯ gəḏōlwōṯ: s

7 wayyāḇē’ ’ōṯî ’el-peṯ^aḥ heḥāṣēr wā’erə’eh wəhinnēh ḥōr-’eḥāḏ baqqîr:

8 wayyō’mer ’ēlay ben-’āḏām ḥăṯār-nā’ ḇaqqîr wā’eḥətōr baqqîr wəhinnēh peṯ^aḥ ’eḥāḏ:

9 wayyō’mer ’ēlāy bō’ ûrə’ēh ’eṯ-hatwō‘ēḇwōṯ hārā‘wōṯ ’ăšer hēm ‘ōśîm pōh:

10 wā’āḇwō’ wā’erə’eh wəhinnēh ḵāl-taḇənîṯ remeś ûḇəhēmâ šeqeṣ wəḵāl-gillûlê³ bêṯ yiśərā’ēl məḥuqqeh ‘al-haqqîr sāḇîḇ| sāḇîḇ:

11 wəšiḇə‘îm ’îš mizziqənê ḇêṯ-yiśərā’ēl wəya’ăzanəyâû ḇen-šāfān ‘ōmēḏ bəṯwōḵām ‘ōməḏîm lifənêhem wə’îš miqəṭarətwō bəyāḏwō w^a‘ăṯar ‘ănan-haqqəṭōreṯ ‘ōleh:

12 wayyō’mer ’ēlay hărā’îṯā ḇen-’āḏām ’ăšer ziqənê ḇêṯ-yiśərā’ēl ‘ōśîm b^aḥōšeḵə ’îš bəḥaḏərê maśəkîṯwō kî ’ōmərîm ’ên yəhwâ rō’eh ’ōṯānû ‘āzaḇ yəhwâ ’eṯ-hā’āreṣ:

13 wayyō’mer ’ēlāy ‘wōḏ tāšûḇ tirə’eh twō‘ēḇwōṯ gəḏōlwōṯ ’ăšer-hēmmâ ‘ōśîm:

14 wayyāḇē’ ’ōṯî ’el-peṯ^aḥ š^a‘ar bêṯ-yəhwâ ’ăšer ’el-haṣṣāfwōnâ wəhinnēh-šām hannāšîm yōšəḇwōṯ məḇakwōṯ ’eṯ-hatammûz: s

15 wayyō’mer ’ēlay hărā’îṯā ḇen-’āḏām ‘wōḏ tāšûḇ tirə’eh twō‘ēḇwōṯ gəḏōlwōṯ mē’ēlleh:

16 wayyāḇē’ ’ōṯî ’el-ḥăṣar bêṯ-yəhwâ hapənîmîṯ wəhinnēh-feṯ^aḥ hêḵal yəhwâ bên hā’ûlām ûḇên hammizəbēḥa kə‘eśərîm w^aḥămiššâ ’îš ’ăḥōrêhem ’el-hêḵal yəhwâ ûfənêhem qēḏəmâ wəhēmmâ mišət^aḥăwîṯem qēḏəmâ laššāmeš:

17 wayyō’mer ’ēlay hărā’îṯā ḇen-’āḏām hănāqēl ləḇêṯ yəhûḏâ mē‘ăśwōṯ ’eṯ-hatwō‘ēḇwōṯ ’ăšer ‘āśû-fōh kî-mālə’û ’eṯ-hā’āreṣ ḥāmās wayyāšuḇû ləhaḵə‘îsēnî wəhinnām šōləḥîm ’eṯ-hazzəmwōrâ ’el-’apām:

18 wəḡam-’ănî ’e‘ĕśeh ḇəḥēmâ lō’-ṯāḥwōs ‘ênî wəlō’ ’eḥəmōl wəqārə’û ḇə’āzənay qwōl gāḏwōl wəlō’ ’ešəm^a‘ ’wōṯām: